TBP Balochi

سند ءِ مزن شھر کراچی ءِ پریس کلب ءِ دیما زورانسری آوار جنگ بوتگیں مردمانی ھاتر ءَ زھرشانی بنجل ءَ نوزدہ روچ سرجم بوتگ انت –

کراچی زھرشانی ءَ نشتگیں کھولانی تہ ءَ کراچی ءِ دمگ گلستان جوہر ءَ آوار جنگ بوتگیں عبدالحمید زہری، کراچی ءِ دمگ ماڑی پور ءَ آوار جنگ بوتگین عمران، لیاری ءَ آوار جنگ بوتگیں شوکت بلوچ ءُ رئیس گوٹ ءَ زورانسری آوار جنگ بوتگیں نوربخش ء حبیب ءِ کھول ھوار انت-

بیگواھیں مردمانی کھولاں وتی دوستیگیں مردمانی یل نہ کنگے بگیری ءَ نارہ جتگ ءُ سند ءُ وفاقی سرکار ءَ چی لوٹ کتگ کہ درسیں بیگواھیں مردم یل کنگ بہ بنت –

چہ کراچی ءَ زورانسری آوار جنگ بوتگیں عبدالحمید زہری ءِ زھگ سعیدہ حمید ءَ پیپلز پاٹی ءِ سروک بلاول بھٹو ءَ چی لوٹ کتگ کہ سند ءِ تہ ءَ بلوچانی زورانسری آوارجنی ءِ بگیری ءَ وتی کرد ءَ پیلو بہ کنت – آئی گوشتگ کہ سند پولیس ءِ کمک ءَ پوج بیگناھیں مردماں زورانسری آوار جنگ ءُ بیگواہ کنگ ءَ انت –

زھرشانی بنجل ءَ بیگواھیں عبدالحمید زہری ءِ لوگبانک فاطمہ حمید ءُ آئی ءِ زھگ سعیدہ حمید ءَ ھوار دگہ بیگواھیں مردمانی کھول ساڑی بوتگ انت –

سعیدہ حمید ءَ گوشتگ کہ کراچی ءِ تہ ءَ بلوچانی زورانسری آوار جنی ءَ سند ءِ سرکار ءُ وفاقی ادارھانی دست مان انت –

سعیدہ حمید ءَ چہ کراچی ءَ پھازگی ادارھانی دست ءَ زورانسری آوار جنگ بوتگیں وتی پت عبدالحمید زہری ءُ دگہ بیگواھیں مردمانی یل کنگے لوٹ کتگ ءُ گوشتگ کہ اگاں مئے مردم کتکار انت آھانی بگیری ءَ سبوت ھست انت گڈا آمیدگس ءَ آرگ بہ بنت –

کراچی ءَ زھرشانی ءَ نشتگیں بیگواھیں مردمانی کھولاں لوٹ کتگ ءُ گوشتگ کہ سند ءِ سرکار مئے دوستیگیں مردماں مارا بہ دنت اگاں آھانی سر ءَ الزام ءِ ھست گڑا آمیدگس ءَ آرگ بہ بنت-

بلوچستان ءِ تیاب دپی دمگ پسنی ءَ ازم آزمان پسنی ءِ چیردستی مروچی بزاں سینزدہ جولائی ءَ جڈی ائید میڑہ پسنی ءِ اولی روچ ماں پسنی فش ہاربر جیٹی ءَ برجم دارگ بوتگ، مراگش ءَ لس مھلوک ءَ مزنیں کچے ءَ بھر زرتگ-

مروچیگیں مراگشانی تہ ءَ بلوچی تژن ءُ بچکندی کسمانک ، میش اپ، سولو اکٹنگ، نوساز، جُست ءُ پسہ، لیوا، بلوچی ساز ءُ زیملی دیوان ءُ دگہ جلواناکیں مراگش ھوار بوتگ اَنت-

مراگش ءَ پسنی ءِ کُوھنیں ءُ ورنائیں ازمکاراں ابید جنزآرٹ اکیڈمی گوادر ءِ ازمکاراں ھم وتی ازم ءِ درانگازی کتگ ءُ چہ لس مھلوک ءَ داد گپتگ، میڑہ ءَ وڈ وڈیں ورگی چیزانی دکان ھم لگتگ –

میڑہ ءَ مصدق اسلم ءُ اسماعیل فراز ءِ چیردستی ءَ کسانسالیں گشندھانی مراگش نوساز ءَ ھم مھلوک وشنود کتگ،اکبر لتا ءِ چیردستی ءَ پسنی لیوا گروپ ءَ شوکیں لیوایے ھم پیش داشتگ-
مراگش ءِ جارچینی ءِ زمہ واری گلاب غالب، عادل سجاد، کامران اسلم، موسی امیت، عرفان اسلم، نسیم قاضی، رمیزشریف ءُ سجاد محمد علی ءَ پیلو کتگ اَنت-

جڈی ائید میڑہ دومی روچ باند ءَ برجم دارگ بیت اِنت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ شش سد ءُ نود ءُ ھشت روچ سرجم بوتگ انت – سیاسی ءُ چاگردی باسکاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ وھدیکہ ایردستیں دمگ ءَ پانگس گیش بوان بنت گڈا پوج ملک ءِ سیمسرانی بدل ءَ ھمے ایردستیں زمین ءِ کُنڈ کُنڈ ءَ مسلط بنت پوجی بنجل ءُ پانگس جوڈ کن انت ءُ مردماں زورانسری آوار جن انت ءُ بیگواہ کن انت ءُ آھانی سر ءَ دروگیں بھتام بند انت ءُ آھاں ملک ءِ دژمن گُش انت ءُ چکچینی ءَ کن انت –

ماما قدیر بلوچ ءَ گوشتگ کہ ریاست ءَ بلوچستان ءِ تہ ءَ وتی ناشرکاری گیش کُتگ انت – بازیں دمگانی تہ ءَ پوج ءُ آئی داشتگیں دلارانی زوراکی ءُ زورانسری آوار جنی ءِ درچ برجاہ برجاہ انت – گوستگیں لھتے ماھانی تہ ءَ کراچی ءَ ھم بلوچ ورنایانی زورانسری آوار جنی ءِ تہ ءَ گیشی اتکگ –

آئی ءَ گوشتگ کہ مئے گل ءَ ھما اولی روچ ءَ اے پندل پدر کُتگ انت، بلوچستان ءِ تہ ءَ ریاست ءِ زلم ءُ زوراکی زاھر کنگ ءَ ایں –

ماما قدیر بلوچ ءَ گوشتگ کہ پاکستانی ریاست ءَ میان استمانی انسانی ھکانی کانود لگتمال کتگ انت بلے آئی ءَ جُست کنوک نیست انسانی ھکانی گلانی گپ ءُ درشان بس کاگدی جوڈ بوتگ انت بلوچستان انسانی ھکانی درگت ءَ بلیک ھول ءِ جوڈ بوان انت – استمانی ءُ میاں استمانء رسانکدر بلیک اؤٹ انت درساں وتی چم بستگ انت –

ماما قدیر بلوچ ءَ گوشتگ انسانی ھکانی ادارھانی نیمگ ءَ گامگیج ءُ جار ءِ پد ءَ ناکہ انسانی ھکانی لگتمالی کمی اتکگ ءُ ناکہ گرءُدار بوگ ءَ انت –

بلوچستان ءِ ضلع سوراب ءَ ناشناسیں مردماں شپ ءِ وھد ءَ زالبولے ءَ ھوار دو مردم کُشگ بوتگ، کُشگ بوتگینانی پجّار حبیب اللہ ءُ مسمات ( ص) ءِ ناماں چہ بوتگ-

لیویز ءِ رِد ءَ گوستگیں شپ ءَ دوئیں کُشگ بوتگ اَنت ءُ لاش ویرانگ ءَ دور داتگ اَنت، وئیل ھال رسگ ءَ لیویز فورس وئیل جاہ ءَ سر بوتگ-

لیویز ءَ لاش دستگیں کتگ ءُ نادُراھجاہ ءَ برتگ ءُ پہ گیشیں چار ءُ ٹپاس ءَ پد کھول ءَ داتگ اَنت-

بلوچستان ءِ ضلع کیچ ءِ بُنجاھی شھر تربت ءَ سلاہ بندیں مردمانی تیرگواری ءَ چہ یک مردمے بیران ءُ وھدے کہ مستونگ ءَ بازیں روچانی کوھنیں لاشے دست کپتگ-

تیرگواری ءَ چہ بیران بوتگیں مردم ءِ پجّار معاذ نام ءَ چہ بوتگ-

اِھوالکارانی رِد ءَ تیرگواری ءِ وئیل تربت ءِ دمگ سنگانی سر ءَ بوتگ وھدے کہ کُشگ بوتگیں مردم ءِ درگت ءَ گْوشگ بوگ ءَ اِنت آ پولیس ءَ کار ءَ بوتگ-

کُشگ بوتگین ءِ درگت ءَ ھمے گْوشگ بوگ ءَ اِنت فٹ بالرے بوتگ ءُ دمگی فٹبال ٹیم ءِ لیبی یے بوتگ- وئیل سوب زانگ نہ بوتگ-

دومی نیمگ ءَ چہ مستونگ ءَ ھال سر بوتگ کہ ولی خان لیویز تھانہ ءِ سیمسر ءَ پشکرم جنگل ءَ ممنی ءِ ھند ءَ یک ناشناسیں مردمے ءِ کوھنیں لاشے دست کپتگ کہ پجّار ھاتر ءَ شال نادُراہ جاہ ءَ برتگ اِت-

لاش نزیک ءَ یک وتاسے ءُ ھالیگ پشنگ ھم دست کپتگ اَنت ،لاش کوھن بوگ ءِ سبب ءَ پجّار ءِ کابل نک بوتگ ءُ لاش نزیک ءَ چمپل ھم دست کپتگ-

بلوچستان ءِ دمگ زیارت ءَ ناشناسیں مردماں پاکستان پوج ءِ یک بلاھیں آپیسرے ءَ ھوار دو مردم آوار جتگ ءُ گوں وت برتگ اَنت-

ھالانی رِد ءَ آوار جنگ بوتگینانی تہ ءَ یکے پاکستان پوج ءِ کرنلے ءُ دگہ یکے ھوار اِنت-

زانگ بہ بیت گوستگیں شپ ءَ زیارت ءِ دمگ ورچوم ءَ ناشناسیں سلاہ بندیں مردماں اے آوار جتگ اَنت-

بلوچستان ھکومت ءُ لیویز رِد ءَ اے مردم کھول ھمراھی ءَ پہ سیل سواد ءِ ھاتر ءَ زیارت ءَ روگ ءَ بوتگ اَنت- چست کنوکاں کھول یل داتگ اَنت ءُ دو مردم وتی ھمراھی ءَ برتگ اَنت گوں-

لیویز جارکش ءِ گْوشگ اِنت کہ آوار جنگ بوتگینانی یل کنائینگ ءِ ھاتر ءَ پٹ ءُ پول برجاہ ءَ اِنت- وھدے کک ٹی پی بی اھوالکار ءِ رِد ءَ گوستگیں شپ ءَ چہ پاکستان پوج نیمگ ءَ چہ زیارت ءِ ھواریں دمگاں بُرزی لشکر کشی برجاہ ءَ اِنت-

وئیل سوب انگت زانگ نہ بوتگ نانکہ گلاں زمہ واری منّ اِتگ-

کراچی پریس کلب ءِ دیما بیگواھیں بلوچانی ھاتر ءَ بنجل مروچی ائید ءِ سیمی روچ ءَ ھم برجاہ بوتگ –

بیگواھیں مردمانی کھول کراچی پریس کلب ءِ دیما وتی زھرشانی ءَ نبشتہ کنائینگ ءَ انت نودربر گل ءُ سول سوسائٹی ءِ مردماں بنجل ءَ اتکگ ءُ بیگواھین مردمانی کھول ءِ گوم ءَ دلپدردی درشان اتگ وھدیکہ اے زھرشانی بلوچ یکجھتی کمیٹی ءِ رھشون آمنہ بلوچ ءِ چیردستی ءَ برجاہ ایں –

کراچی زھرشانی ءَ نشتگیں کھولانی تہ ءَ کراچی ءِ دمگ گلستان جوہر ءَ آوار جنگ بوتگیں عبدالحمید زہری، کراچی ءِ دمگ ماڑی پور ءَ آوار جنگ بوتگین عمران، لیاری ءَ آوار جنگ بوتگیں شوکت بلوچ ءُ رئیس گوٹ ءَ زورانسری آوار جنگ بوتگیں نوربخش ء حبیب ءِ کھول ھوار انت –

چہ کراچی ءَ زورانسری آوار جنگ بوتگیں مردمانی کھولاں مروچی ھژدہ روچ انت کہ زھرشانی بنجل ءَ نشتگ انت اشی ءَ پیش زھرشانی ءَ سعید عمر ءُ شعیب اعظم ءِ کھول ھم ھوار بوتگ انت بلے گوستگیں روچاں سعید عمر یل کنگ بوتگ –

زھرشانی ءَ ھواریں شعیب اعظم ءِ کھول ءَ گوستگیں روچ ءَ تربت پرہس کلب ءَ اھوالکاراں گوں تران کنان ءَ گوشتگ کہ شعیب بلوچ سند پولیس نیمگ ءَ ناشرکاری ءِ دروگیں بھتام جنگ ءُ دزگیر کنگ بوتگ کھول ءِ رِد ءَ شعیب پیسر ءَ چیریں ادارھانی کارمنداں آوار جتگ ءُ بیگواہ کتگ بوتگ –

کھول ءَ گوشتگ کہ شعیب بلوچ بیست ءُ نھ اپریل ءَ کراچی ءِ دمگ گلستان جوہر ءَ بشیر ولیج ءَ آوار جنگ بوتگ بلے سی ٹی ڈی ءَ آئی ءِ دزگیری چار جولائی کراچی مارپور زاھر کتگ ءُ آئی ءِ سر ءَ بے بنیں بھتام جتگ –

کراچی زھرشانی ءَ نشتگیں بیگواھیں مردمانی کھول ءِ لوٹ انت کہ سند ءِ سرکار زورانسری آور جنگ بوتگیں درسیں مردماں یل بہ کنت –

آھانی گوشگ انت کہ زورانسری آوار جنگ بوتگیں درسیں مردم بے کسور انت – اشی ءَ پیش بیگواھیں مردمانی کھولاں سند پولیس ءِ برزی تبک ءِ واکداراں گوں گند ءُ نند کتگ ءُ آھاں باور کنائینتگ کہ بیگواھیں مردم یل کنگ بنت بلے پدا ھم کھولانی لوٹانی سر ءَ ھچ وڈیں گامگیج زورگ بوھگ ءَ نہ انت کھول یکشل ءَ زھرشانی ءَ نشتگ انت –

زورانسری آوار جنگ بوتگیں مردمانی کھولاں ائید ءِ اولی روچ ءَ کراچی پریس کلب ءِ دیما زھرشانی ءِ کتگ –

زھرشانی کنوکاں زورانسری آوار جنی ایرجتگ ءُ گوشتگ کہ چہ کراچی ءَ زورانسری آوار جنیانی جیڑہ گیش بوان انت تنی وھدی بازیں بلوچ ءِ درکانودی اوار جنگ بوتگ ءُ آھانی زانگولیں جون مارا رستگ انت –

کراچی ءَ زھرشانی ءَ نشتگیں بیگواھیں مردمانی کھولاں لوٹ کتگ ءُ گوشتگ کہ سند ءِ سرکار مئے دوستیگیں مردماں مارا بہ دنت اگاں آھانی سر ءَ الزام ءِ ھست گڑا آمیدگس ءَ آرگ بہ بنت –