TBP Balochi

بلوچستان ءِ بنجاھی شھر شال ءُ ڈیرہ بگٹی ، مستونگ ءُ پنجگور تیرگواری ءُ آپ ءِ بڈگ ءِ وئیلاں پنچ مردم بیران بوتگ اَنت سے بیگواہ ءَ اَنت-

سربوتگیں ھالانی رد ءَ شال ءِ دمگ قمبرانی دگ ءَ کلی کمالو نزیک ءَ سلاہ بندیں مردمانی تیرگواری ءَ چہ محمد ء گل محمد حسین نامیں مردمے بیران بوتگ-

اِھوالکارانی رِد ءَ اُرشکار تچگ ءَ سوبمند بوتگ اَنت- لاش نادُراھجاہ ءَ برگ بوتگ ءُ پہ اژدری چار ءُ ٹپاس ءَ پد کھول ءَ دیگ بوتگ-

مستونگ کانک ءِ دمگ کلی یار محمد ءَ ناشناسیں سلاہ بندیں پرپٹ سوارانی تیرگواری ءَ چہ غلام مرتضیٰ رخشانی نامیں مردمے بیران بوتگ-

دگہ یک وئیلے ڈیرہ بگٹی ءَ کہ اود ءَ یک مردمے ٹیل فون ءِ ویر ءَ شر کنگ ءَ بوتگ ءُ آ لین ءَ گپتگ چریشی ءِ آسر ءَ آ بیران بوتگ-

بیران بوتگیں مردم ءِ پجّار محمد جان ء حضوری خان ءِ نام ءَ چہ بوتگ-

ھمے وڑ مروچی بلوچستان ءِ دمگ پنجگور ءَ تُرندیں ھورانی سوب ءَ کوراں مزنیں آپ آورتگ ءُ چریشی ءِ پنچ مردم کور ءَ بُکتگ ءُ آپ ءَ برتگ اَنت-

اِھوالکارانی رِد ءَ پنچ مردمانی تہ ءَ دو مردم ءِ لاش دست کپتگ اَنت ءُ سئینانی پٹ ءُ پول برجاہ ءَ اِنت-

زانگ بہ بلوچستان ءَ جتاجتائیں دمگاں پشّی ھورانی سوب ءَ کساس سد ءَ گیش مردم بیران ءُ بازیں مالی تاوان ھم مھلوک رس اتگ-

بلوچستان ءِ بنجاھی شھر شال ءَ پریس کلب ءِ دیما بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ماما قدیر بلوچ ءِ سروکی ءَ برجاہ، زھرشانی بنجل ءَ مروچی چار ھزار ءُ ھپسد ءُ سَے روچ سرجم بوتگ انت – زورانسری آوار جنگ بوتگیں راشد حسین بلوچ ءِ مات ءُ دوست محمد ءِ کھول ھم زھرشانی بنجل ءَ ساڑی بوتگ انت – مروچی بی ایس او پجار ءِ سرکماش زبیر بلوچ ءَ وتی سنگتانی ھمراھی ءَ اتکگ ءُ بیگواھیں مردمانی کھول ءِ گوم ءَ دلپدردی درشان اتگ –

بنجل ءَ اتکگیں مردمانی میان ءَ تران کنان ءَ گل ءِ کمک سرکماش ماما قدیر بلوچ ءَ گوشتگ دگہ جاھاں روچ وشیانی ھمراھی در کئیت مئے گور ءَ جونانی سوگات گون ءُ ٹک دنت – دژمن ءِ گوم ءَ پرایمنیں جھد کنوک یا دژمن ءِ زنداناں شھید بوتگیں بلوچ پرزندانی کرد مروچی پہ ھر بلوچ ءَ پھری گپ یے کہ ھمے نزریہ ءِ سوب ءَ کاروان ءِ تہ ءَ شھیدانی ھون روچ پہ روچ گیش بوان انت –

ماما قدیر بلوچ ءَ گوشتگ کہ پاکستان زلم زوراکی ءُ کُشت ءُ کوش ءَ ابید ھم بلوچ دیمھونی دیگ ءَ چک ءُ پد نہ بنت آئی ءَ گوشتگ کہ جاورھالاں اے گپ پدرکتگ کہ ریاست ءِ پالیسی بے سوب بوتگ انت ریاست ءِ وتی زوراکی کنگ ءَ ابید ھم زانشتی جھد ایرموش کرت نہ کتگ –

ماما قدیر بلوچ ءَ گوشتگ کہ دژمن ھمینچو گیش زوراکی کنت آئی بگیری ءَ نپرت گیش بیت وھدیکہ نپرت گیش بیت گڈا مردمانی تہ ءِ تُرس وت ھلاس بیت – اگاں ما بلوچ ءِ پُرایمنیں جھد ءِ سر ءَ چمشانک ءِ بہ دے ایں گڈا وھدیکہ بلوچ راج ءِ جونانی چگل دیگ ءِ وھد ءَ ھر سیاسی باسک ءُ راج ءِ تہ ءَ تُرس ءِ ودی بوتگ ءُ اے ترس ءَ سرجمیں چاگرد گپتگ ھر سیمی مردم مرگ ءَ چہ تتکگ وھدیکہ جونانی چگل دیگے تہ ءَ گیشی اتکگ گڈا ترس نپرت ءِ تہ ءَ بدل بوتگ پرچا کہ نپرت ءِ ھم سیمسر ءِ بیت ھمینچو نپرت گیش بیت ترس ھلاس بوان کنت –

ماما قدیر بلوچ ءَ گوشتگ اے وھدی ھما مردم دژمن ءَ گوں گیش نپرت کنت ھما مردم گشتر املی کار کنت اے وھدی بلوچستان ءَ شھید بوتگیں مردمانی ھوناں جھدے چراگ گیشتر رژناہ کتگ –

بلوچستان ءِ دمگ کلات ءَ ناشناسیں سلاہ بندین مردمان گیس درکنوکین سائٹ ءِ سر ءَ اُرش کتگ ءُ گیس ءِ چات تراک ءَ ڈروینتگ، چوکیدارانی سلاہ دستیگ کتگ اَنت-

دمگی مردمانی رد ءَ گوستگیں شپ ءَ کلات ءِ دمگ شیخڑی ءَ پیش اتکگیں اُرش ءَ کہ اود ءَ بازیں کچے ءَ سلاہ بند گیس ءِ سر ءَ پھریزوکیں دمگی چوکیدار دزگیر کتگ اَنت-

دمگی مردمانی رد ءَ اُرشکاراں مارگنڈ بلاک ایکس ون ءِ چات تراکناکیں شورو مان کتگ ءُ ڈروینتگ ءُ چوکیدار یلو کتگ ءُ سلاہ گون وت برتگ اَنت-

زانگ بہ بیت شیخڑی ءِ ھند ءَ دوھزار ءُ بیست ءَ دَہ کھرب مکعب فٹ گیس گندگ بیتگ ات اے گوستگیں ھبدہ سالاں چہ دراتکگیں گیس ءَ چہ درستاں گیشتر گیس اِنت سائٹ ءِ سرجمی ءَ ایل ایم جی ءِ درایگ ءَ اشی ءَ نُھ سد ملین ڈالر ءِ بچگ ءِ اندازہ جنگ بیتگ-

پاکستانی پوج ءِ جارکش ءِ ٹاپار ءَ جنگ بیتگیں مردمانی تہ ءَ یک مردمے ءِ پجار بیتگ-

گوستگیں روچ ءَ زیارت ءَ پاکستانی پوج ءِ گون ءَ ناگتی جنگ بیتگیں نُھ کسانی تہ ءَ یکے ءِ پجار کھول ءَ کرتگ کہ آئی ءِ پجار شمس ساتکزئی ءِ نام ءَ زانگ بیتگ کہ پاکستانی پوج ءَ دزگیر کنگ ءَ پد بیگواہ کتگ ات-

اے مردم چہ پنچ سالاں پوج ءِ بندیگ جاھاں بند بیتگ-

زانگ بہ بیت گوستگیں روچ ءَ پاکستانی پوج ءِ جارکش ءَ لشکر کشی ءِ وھد ءَ بی ایل اے ءَ بندوکیں مردمانی جنگ ءِ ٹاہ داتگ اَت ءُ یک کارندھے ءِ مرگ ءِ ھال شنگ کتگ ات-

بی ایل اے ءِ جارکش جیئند بلوچ ءَ رسانکدراں زیارت ءَ بیڑی ءِ وھد ءَ وتی باسکانی مرگ ءِ ھال رد کتگ ات-

جارکش ءَ گشتگ ات کہ زیارت ءَ وتی گچینی بیڑ ءَ پد آیانی ھمراہ وتی مھکمیں جاھاں سر بیتگ اَنت ءُ اے بیڑ ءَ مئے ھچ ھمراہ زدگ ھم نہ بیتگ اَنت-

زیارت ءِ کش ءُ گوراں پوجی بیڑ ھما وھد ءَ بندات بیتگ ات کہ دوازدہ ءُ سیزدہ جولائی ءِ شپ ءَ لیفٹیننٹ کرنل لئیق مرزا ءُ آئی ءِ ھمراہ عمر سلاہ بنداں راہ بستگ ءُ برتگ ات اَنت-

اے کرنل ءِ آوار جنگ ءُ کوش ءِ زمہ واری بلوچ لبریشن آرمی ءَ من اتگ اَت گل ءِ جارکش جیئند بلوچ ءِ رد ءَ پاکستانی کرنل لئیق مرگ ءِ سزا داتگ –

زیارت ءَ پوجی بیڑ ءَ ناگتی جنگ بیتگیں دگہ ھشت مردمانی لاش انگت ءَ شال ءِ ھسپتال ءَ ایر اَنت بلوچ تکاں گوشگ بیگ ءَ اِنت کُشگ بیتگیں مردم پوج ءَ دروگیں میڑ ءِ میان ءَ جتگ اَنت ءُ سرمچار اش کنگ اِنت-

بلوچستان ءِ بنجاھی شھر شال ءِ سول ھسپتال ءَ اے وھد ءَ نُھ لاش ایر اَنت، پوج ءِ رد ءَ آیاں اے زیارت ءَ دیم پہ دیمی جنگ ءَ جتگ اَنت، بلے بلوچ پھناتاں پوج ءِ اے ٹاہ ءَ دروگ کنگ ءَ اَنت-

بلوچ پھناتانی رد ءَ جنگ بیتگیں مردم بیگواھیں مردم اَنت کہ آیاں پوج دروگیں دیم پہ دیمی جنگ ءِ نام ءَ سرمچار گوشگ اِنت-

پوج ءِ واکدارانی رد ءَ زیارت ءَ بی ایل اے ءِ ھلاپ ءَ بیتگیں بیڑ ءَ اے مردم جنگ بیتگ اَنت-

زیارت ءِ کش ءُ گوراں پوجی بیڑ ءِ بندات ھما وھد ءَ بیتگ کہ دوازدہ ءُ سیزدہ جولائی ءِ شپ ءَ لیفٹیننٹ کرنل لئیق مرزا کہ ڈی ایچ اے شال ءَ گون بندوک بیتگ ءُ آئی ناکوزھگ عمر سلاہ بندیں مردماں راہ بستگ ءُ پجار کنگ ءَ پد برتگ اَنت –

کُشگ بیتگیں کرنل ءِ آوار جنگ ءُ کوش ءِ زمہ واری بلوچ لبریشن آرمی ءَ منّ اتگ اَت – درشان ءَ گل ءِ جارکش جیئند بلوچ ءَ گوشتگ ات کہ پاکستانی کرنل لئیق مرگ ءِ سزا داتگ –

بی ایل اے ءِ جارکش جیئند بلوچ ءَ وتی درشان ءَ گُشتگ اَت کہ کرنل لئیق بی ایل اے ءِ اسپیشل فورس اسپیشل ٹیکٹیکپ آپریشنز اسکواڈ یک چیریں ھالے ءِ رد ءَ دوازدہ جولائی ءَ دزگیر کتگ – کرنل لئیق ءِ لاش زیارت ءَ دزکپتگ اَت-

پاکستان ءِ پوج ءِ جارکش ءَ آپریشن ءِ وھد ءَ بی ایل اے ءَ بندوکیں مردمانی جنگ ءِ ٹاپار جتگ ات ءُ یک کارندے ءِ مرگ ءِ ھال شنگ کتگ ات-

دومی نیمگ ءَ بی ایل اے ءِ جارکش ءَ بلوچ سرمچارانی جنگ ءِ گپ دروگ کتگ ات ءُ گوشتگ ات کہ ھرنائی ءُ کلات ءَ وتگڑیں آپریشن ءِ وھد ءَ بلوچ لبریشن آرمی ءِ سرمچارانی شھید کنگ پاکستانی پوج ءِ گوست ءِ دروگانی رنگ ءَ یک پندلے کہ آئی ءِ مول ءُ مراد بلوچستان ءَ وتی پروشی ءِ چیر دیگ ءِ پروشی اِنت-

بلوچستان ءِ دارالھکومت شال ءَ یکشمبے ءِ روچ ءَ تیرگواری ءِ دو جتاجتائیں وئیلاں دو زالبولاں ھوار سے مردم بیران بوتگ اَنت-

سربوتگیں ھالانی رِد ءَ جان محمد دگ ءُ قمبرانی دگ سر ءَ تیرگواری ءَ چہ دو زالبولاں ھوار سے مردم بیران بوتگ اَنت-

تیرگواری ءِ بنداتی وئیل جان محمد دگ ءَ بوتگ کہ اود ءُ تیرگواری ءَ چہ یک مردمے بیران بوتگ ءُ آئی ءِ پجّار آزاد خان ء بگو خان نام ءَ چہ بوتگ-

وھدے کہ تیرگواری ءِ دومی وئیل قمبرانی دگ ءَ بوتگ کہ اود ءَ لوگ ءَ پترتگ ءُ تیرگواری ءَ چہ دو زالبول کُشگ بوتگ اَنت-

ایدھی ءَ لاش سول نادُراھجاہ ءَ برتگ اَنت گیشیں چار ءُ ٹپاس ءَ پد لاش کھول ءَ داتگ اَنت-

پولیس رِد ءَ وئیل لوگی جیڑھے ءُ کُتکار ءِ دزگیری ءِ ھاتر ءَ ٹولی دیم داتگ اَنت-

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشانی ءَ گوشتگ کہ شال ءُ کلات ءَ دو جتا جتائیں اُرشاں پاکستانی پوج نشانگ کتگ ءُ پنچ کارندہ زدگ کتگ –

جارکش ءَ گوشتگ کہ بی ایل اے ءِ سرمچاراں شال ءَ قمبرانی دگ ءَ زورگریں پاکستانی پوج فرنٹیئر کور ءِ یک چیک پوسٹے ءِ سر ءَ دزبمبے چگل داتگ چریشی ءَ دشمنیں لشکر ءِ سَے کارندہ زدگ بیتگ اَنت-

جارکش جیئند بلوچ ءَ گوشتگ کہ کلات ءِ دمگ منگچر ءَ جوھان کراس ءِ ھند ءَ سرمچاراں لیویز پورس ھما وھد ءَ نشانگ کتگ آیاں راہ بستگ بیتگ، اُرش ءَ دو کارندہ زدگ بیتگ اَنت-

جارکش ءَ گوشتگ کہ اشی ءَ پیسر ما پولیس ءُ لیویز پورس بیھار داتگ کہ آ ھواری ءِ درگت ءَ بلوچ راجی جنز ءِ دیم ءَ ھچ رنگ ءَ مِک بیگ ءَ پھریز بہ کن اَنت-

جارکش ءَ گوشتگ کہ بی ایل اے ءِ اے وڑیں اُرش رھبندانی رد ءَ جد ءُ جھد برجاہ بیت اِنت-

مروچی یکشمبے ءِ روچ ءَ شال پریس کلب ءَ دالبندین ءِ جھمنند غلام محمد ء محمد خیر ءَ وتی لوگبانک ءُ کسانیں جنکو ءِ ھمراھی ءَ اھوالکاراں گوں تران کنان ءَ ثاقب ء میر عبدالخالق محمد حسنی ءِ سر ءَ الزام جتگ ءُ گوشتگ کہ اے مرد توپک ءِ زور ءَ منی کسانسالیں جنکو ءَ آوار جنگ لوٹیت –

غلام محمد ءِ رِد ءَ آئی ءِ جنکو ءَ تنی وھدی ھپت سال انت آ چاگی ءِ دمگ چھتر ءَ نندوک ایں، آئی ءَ گوشتگ کہ ثاقب نامی مردمےءَ شراب بوتل دست ءَ بوتگ سرکاری سلاہ بندیں گارڈانی ھمراھی ءَ اتکگ منی ھپت سالی جنکو ءِ آوار جنگ ءِ کوشست کتگ ءُ مارا بیھار داتگ کہ ھپت سالی جنکو ءِ سانگ گوں ھمائی کنگ بی بیت اگاں ناں گڈا آئی زورانسری بارت ایں –

غلام محمد ءَ دیمتر ءَ گوشتگ کہ من شپ ءِ تھاری ءَ شال ءَ پہ ھک ءِ لوٹگ ءَ اتکگاں ھدایا بہ چارے مناں ءُ منی کھول ءَ چہ اے ثاقب ءَ انساپ بہ دئیت اگاں منی گوم ءَ انساپ کنگ نہ بوت گڈا من لاچار باں کہ وت ءَ گوں ھمراھے کھول ءَ دالبندین چار راہ ءِ سر ءَ بہ سوچاں –

ھمے درگت ءَ دی بلوچستان پوسٹ ءِ اھوالکاراں ھمائی ءِ دمگ ءَ پٹ پول ءِ جھد کتگ گڈا دمگی مردماں ٹی بی پی اھوالکار ءِ گون ءَ تران کنان ءَ گوشتگ کہ ثاقب ءِ سرکار ءِ چیردستی ءَ جوڈ بوتگیں کُشندہ ٹولی ءَ سیادی داریت –

اھوالکار ءِ رِد ءَ ثاقب محمد حسنی پاکستان ءِ چیریں ادارھانی چیردستی ءَ دمگ ءِ تہ ءَ دُزی ءُ ڈنگی ، مردمانی آوار جنگ ءُ دگہ چاگردی سلکاریاں ھوار انت ءُ پوج ءَ آ مھار گُٹ داتگ ءُ یل داتگ –

اھوالکار ءِ رِد ءَ ثاقب ھما ٹوکی ءِ سروک انت کہ آئی ءِ سروک پیسر ءَ حفیظ محمد حسنی بوتگ کہ سال دوھزار شانزدہ ءِ سِی اگست ءَ پاکستانی پوج ءَ آوار جتگ ءُ بیگواہ کتگ – حفیظ آوار جنوکیں میجر نوید ءَ شست ءُ ھشت لک ءِ لوٹ کتگ پدا رند ءَ سال دوھزار نوزدہ ءِ اگست ماہ ءَ ھمے میجر ءِ کورٹ مارشل کنگ بوتگ ءُ امر کیز سزا دیگ بوتگ –

حفیظ محمد حسنی ءَ میجر نوید ءِ گوشگ ءِ پد ءَ نشہ باپاری کنوکیں گاڑی پُلتگ ءُ بھا کتگ انت ءُ پدا زرانی گیشتریں بھر میجر ےَ داتگ انت – گڈا یک رندے میجر ءَ شک بوتگ کہ حفیظ ءَ آئی ءِ بھر نہ داتگ گڈا حفیظ آوار جنائینتگ ءُ چہ آئی ءَ شست ءُ ھشت لک ءِ لوٹ کتگ وھدیکہ گپ برز شتگ ءُ پوج ءَ شک بوتگ کہ راز آؤٹ بنت گڈا آئی حفیظ کُشتگ ءُ آئی ءِ جون ویرانگاں کل کُتگ – پدا آئی ءَ چہ پد ھمے ٹولی ءِ سروک ثاقب کنگ بوتگ –

بلوچستان ءِ دمگ کیچ تمپ ءَ ایف سی پانگس ءِ چست کنگ ءُ گِس ءِ سر ءَ ماٹر گولہ ءِ آس دیگے بگیری ءَ مروچی دومی روچ ءَ ھم زھرشانی برجاہ بوتگ –

زھرشانی ءَ ھواریں دمگی مردماں لوٹ کتگ گوشتگ کہ کلات ءِ سر ءِ ایف سی پانگس چست کنگ بہ بیت چہ اے پانگس ءَ مھلوک دلسیاہ انت –

تمپ ءَ گوستگیں روچ ءَ ایف سی ءِ نیمگ ءَ آس دیگ بوتگیں گولہ ءَ زدگ بوتگیں موسی جاسم ءِ کھول ءَ دمگے دگہ مردمانی ھمراھی ءَ مروچی یکشمبے ءِ روچ ءَ زھرشانی کتگ ءُ روانک کش اِتگ –

روانک ہائی سکول چار راہ ءَ بندات کنگ بوتگ ءُ تاں لیڈیز مارکیٹ ءَ مچی ءِ دروشم ءَ مردماں نندانک جتگ ءُ زھرشانی کتگ –

زھرشانی میان ءَ تمپ ءِ بازار بند بوتگ ءُ زھرشانی کنوکاں ایف سی ءِ بگیری ءَ نارہ جتگ –

زھرشانی کنوکاں تران کنان ءَ گوشتگ کہ کلات ءِ سر ءِ پاکستانی پوج ھِ پانگس چست کنگ بہ بیت چریشی ءَ لس مھلوک ھترہ تہ ءَ انت –

آھاں گوشتگ کہ لس مھلوک ءِ سر ءَ راکٹ آس دئیگ ءِ گرءُدار کنگ بیت، اسر مند بوتگیں موسی جاسم ءِ کھول ھک دیگ بہ بیت ءُ بلوچ ءِ دود ءُ ربیدگانی پاسداری کنگ بہ بیت –

زھرشانی کنوکاں پدا رند ءَ پولیس تانہ ءِ دیما شُتگ ءُ زھرشانی کتگ ھمے وھد ءَ ایس ایچ او نادل کمال ءُ تمپ تحسیلدار عابد بلوچ ءَ زھرشانی کنوکانی گوم ءَ گند ءُ نند کتگ ءُ آھاں باور کنائینتگ کہ آھانی لوٹ برزی تبک ءَ سرکنگ بنت پدا رند ءَ زھرشانی کنوکاں ایمنی ءَ گوں زھرشانی ھلاس کتگ –