TBP Balochi

بلوچستان ءَ بشّی ھور برجاہ انت ءُ چریشی ءِ سوب ءَ کور ءُ شیپ ھار انت –

سربوتگیں ھالانی رِد ءَ ھب ءِ کور ءَ جانشودگ ءِ میان ءَ دو ورنا بُکتگ، یکے درکنگ بوتگ ءُ وھدیکہ دومی آپ ءِ جھلانکی ءَ بُکتگ ءُ بیران بوتگ –

دمگی پھازداراں اژدری چار ٹپاس ءَ پد ورنایے جون کھول ءِ دست ءَ داتگ –

بیران بوتگیں ورنایے پجار رضا علی ءِ نام ءَ بوتگ کہ آئی ءِ اُمر بیست ءُ دو سال انت ءُ آ کراچی ءِ دمگ بلدیہ ٹاؤن ءَ نندوک بوتگ –

زانگ بہ بیت ھور ءُ ھارانی سوب ءَ ھب کور ءَ144 جنگ بوتگ بلے پھازدار ءِ نہ بوگے سوب ءَ مردم ھب ءِ کور ءَ پکنک کنگ ءَ انت –

اھوالکار ءِ رِد ءَ ھب ڈیم ءِ اسپیل وے آپ ھب کور سربوتگ ءُ اے وھدی آپ سک باز انت – ھب ڈیم ءِ پُر بوگ ءَ پد اسپیل وے ءَ آپ درکنگ بوگ ءَ انت – ھمے درگت ءَ دمگی پھازداران مھلوک سرپد کتگ ءُ گوشتگ کہ مروچی بیگاہ ءَ تاں ھب کور ءِ توپانی کنگے ھترہ ھست انت –

اے وھدی ھب ڈیم آپ ءِ برزی 339 دو انچ گوشگ بوگ ءَ انت مزن مزنین ھار ڈیم آھگ انت –

دومی نیمگ ءَ تربت کوشک ءَ ملک آباد ءِ جھمنندیں دو کسانسالیں جنکو دھ سالی فرحت ناصر ءُ ھشت سالی سنگین ناصر کیچ کور ءَ جان شودگ ءِ میان ءَ بُکتگ ءُ بیران بوتگ انت – ھردوکانی جون سول ھسپتال ءَ آرگ بوتگ انت –

زانگ بہ بیت کیچ کور ھم 144 جنگ بوتگ بلے ھنگت مردم اشی ءِ سر ءَ امل کنگ ءَ کنگ ءَ نہ انت –

طالبان ءِ گون ءَ ریاست ءِ گپ ءُ تران ءَ مھلوک ءِ پھریزگ ءِ ھچ پرواہ نیست اِنت-

اے گپ پشتون تھپز مومنٹ ءِ سروک منظور پشتین ءَ گوستگیں روچ ءَ وزیرستان ءِ دمگ لدھا ءَ ورنا ءِ کوش ءِ پژدر ءَ کتگ اَنت-

منظور پشتین ءَ گوشتگ کہ تحریک طالبان پاکستان ءِ کارندھاں یک ورنایے ءَ وتی گور ءَ اسکرین موبائل ءِ ایر کنگ ءِ پژدر ءَ دردناکیں رنگے ءَ کُشگ بیتگ –

آئی ءَ دیمترا گُشتگ کہ ما بنداتی روچ چہ ریاست ءَ جست کنگ ءَ ایں تحریک طالبان پاکستان ءِ گون ءَ بیتگیں مسام ءَ لس مھلوک ءِ پھریزگ ءِ مانزمان اِنت بلے ریاست ءَ اشی ءِ ھچ پرواہ نیست اِنت-

پشتون تھپز مومنٹ ءِ سروک ءَ طالبان ءِ دست ءَ ورنائیں حمید ء عبدالحسن ءِ کوش ءِ ھلاپ ءَ نوزدہ جولائی ءَ لدھا جرگہ بیت اِنت-

زانگ بہ بیت اوگانستان ءَ طالباں ءِ واک ءَ آیگ ءَ پد پاکستان ءُ تحریک طالبان پاکستان ءِ میان ءَ گپ ءُ تران ءِ درچ برجاہ اِنت، بلے حیبرپختون خواہ ءِ بازیں سیاسی پاٹی کہ اشانی تہ ءَ گیشتر عوامی نیشنل پاٹی ءُ پشتون تھپز مومنٹ ءَ وتی وتی لیکہ درشان کتگ اَنت-

کفایت اللہ بلوچ ءِ یل نہ کنگ ءِ ھلاپ ءَ کلات منگچر ءِ بنجاھی شھدگ ءِ سر ءَ نندانک جنگ ءُ بند کنگ بیتگ – کفایت اللہ ءَ سلامتی ءِ یل کنگ ءِ واستا آئی ءِ کھول زھرشانی کنگ ءَ اِنت-

کفایت اللہ ءِ کار ءُ کسب یک اسکولے ء استادے ءُ استادانی یونین ءِ باسکے ھم بیتگ – آ یازدہ فروری دوھزار ءُ بیست ءُ دو ءِ شپ ءَ منگچر ءَ وتی لوگ ءَ آوار جنگ ءُ ناشناسیں جاھے ءَ برگ بیتگ-

کفایت اللہ ءِ لوگبانک کرن کفایت ءِ گوشگ اِنت ھما وھد ءَ کفایت ءَ ریاستی لشکر برگ ءَ بیتگ آ وھد ءَ من لاپر بیتگ اَنت وتی لوگ واجہ چمانی دیم ءَ زورانسری آوار جنی ءَ دیستگ ءُ پریات کتگ وتی لاپ ءِ زھگ دیم ءَ داتگ بلے آیاں انگت ءَ رھم نہ کتگ ابید اشی ءَ آیاں من ءَ لٹ ءُ کُٹانی نشانگ کتگ ءُ منی لوگواجہ برتگ – ترندیں لٹ ءُ کُٹانی سبب ءَ من نادراہ جاہ ءَ برگ بیتگ اَنت ءُ وتی زھگ وھد ءَ پیسر چلگی بیتگ اَنت-

کفایت اللہ ءِ کھول ءِ گوشگ اِنت اگاں آئی ءِ سر ءَ بھتامے ھست گڑا آمیدگس ءَ پیش کنگ بہ بیت –

زھرشانی ءَ زھگ ءُ زالبولاں ھوار مردین ھوار اَنت-

وائس فار بلوچ مسنگ پرسنز ءِ سرکماش نصراللہ بلوچ ، کمک سرکماش ماما قدیر بلوچ ءَ شمبے ءِ روچ ءَ شال پریس کلب ءَ بیگواھیں مردمانی کھولانی ھمراھی ءَ اھوالکاراں گوں تران کنان ءَ گوشتگ کہ ڈیھ بنجاھی پتر ءِ برزی تبک ءِ نیمگ ءَ بیگواھیں مردمانی جیڑھ ءِ درگت ءَ پارلیمانی کمیٹی ءِ جوڑ کنگ بوتگ کہ آئی ءِ سَے میٹنگ بوتگ انت کہ بازیں گلانی نمائندگ لوٹارینگ بوتگ انت ءُ آ گوشدارگ بوتگ انت بلے کمیٹی ءِ نیمگ ءَ ناکہ وائس فار بلوچ مسنگ پرسنز گند ءُ نند ءَ لوٹارینگ بوتگ ءُ ناکہ زورانسری آوارجنیانی درگت ءَ مئے پونٹ آف ویو زورگ بوتگ ما ھمے سرپد بہ ایں کہ کمیٹی ءِ اے رویش جمھوری ءِ نہ انت ءُ ایرجنگی انت –

آئی ءَ گوشتگ کہ زورانسری آوارجنیانی درگت ءَ درساں گیش بلوچستان اسرمند انت ءُ بلوچستان ءَ ھزارانی کچ ءَ بلوچ زورانسری آوار جنگ ءُ بیگواہ کنگ بوتگ انت ءُ گل ھمایانی نمائندگی ءَ کنگ ءَ انت –

آئی ءَ گوشتگ کہ وائس فار بلوچ مسنگ پرسنز بیگواھیں مردمانی یل کنائینگ ءُ زورانسری آوار جنیانی بگیری ءَ جھد ءَ انت گل ءَ بیگواھیں مردمانی جیڑہ دیما آرگ ءِ ھاتر ءَ شال ءَ بگر تاں کراچی ءُ کراچی تاں اسلام آباد ءَ دنیا ءِ دراجتریں پند بُراِتگ ءُ شال پریس کلب ءِ دیما گل ءِ نیمگ ءَ جوڑ کنگ بوتگیں زھرشانی بنجل ءَ چار ھزار ءُ ھپسد روچ سرجم بوتگ انت بزانکہ گل ءِ زھرشانی بنجل ءَ سینزدہ سال سرجم انت کہ برجاہ انت اشی ءَ ابید گل ءَ سوبائی ءُ وفاقی سرکارانی گوم ءَ گند ءُ نند کتگ سرجمیں پاکستان ءَ آوار جنگ بوتگیں بیگواھیں مردمانی جیڑہ جوانی دیما آرتگ انت اشی ءَ ھوار ھوار بیگواھیں مردمانی درگت ءَ جوڑ کنگ بوتگیں کمیشن ءُ برزی تبک ءِ آمیدگساں ھوار ھک ءِ ھاتر ءَ جوڑ کنگ بوتگیں ایندگہ ادارھانی نمائندگی ءَ کنگ ءَ انت ھمے ھاتر ءَ وفاقی پھناتاں بیگواھیں مردمانی ھاتر ءَ جوڑ کنگ بوتگیں پارلیمانی کمیٹی ءَ گل ءَ ڈالچار کنگ ناھکی یے ءُ بلوچستان ءَ زورانسری آوار جنگ بوتگیں بیگواھیں مردمانی کھول ءِ گوم ءَ زوراکی یے –

آئی ءَ گوشتگ کی وفاق ءِ نیمگ ءَ بیگواھیں مردمانی ھاتر ءَ جوڑ کنگ بوتگیں کمیٹی ءَ چہ لوٹ کن ایں کہ وی بی ایم پی ءَ پارلمانی کمیٹی ءِ میٹنگاں لوٹارینگ ءَ ھوار گل گوشدارگ بہ بیت ءُ کمیٹی چاریں سوبھاں تر ءُ تاب بہ کنت بیگواھیں مردمانی کھولانی گوم ءَ گند ءُ نند بہ کنت ءُ آھانی سر ءَ بوتگیں زلم زوراکی ازیتاں چہ ھماھانی زبان ءَ اش بہ کنت –

آئی ءَ لیکہ داتگ ءُ گوشتگ کہ پارلیمانی کمیٹی اے چیز ءِ سر ءَ پابند بوگی انت کہ بیگواھیں مردمانی درگت ءَ درسیں اسٹیک ہھولڈرزانی گپ گوشدارگی انت ءُ پارلیمانی کمیٹی ھما گڈی پیسلہ کہ زوریت گڑا درسیں اسٹیک ھولدرزاں جست بہ کنت ءُ پد ءَ وتی گڈی پیسلہ سرکار ءَ دیم بہ دنت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءَ پاکستانی پوج ءِ ماں رسانکدر ءَ بے بُنیں دانک گوں تْرندی ءَ ایرجتگ ءُ گوشتگ کہ پاکستانی پوج ءِ نیمگ ءَ گْوستگیں شپ ءَ کیچ ءِ دمگ تُمپ ءَ لس مھلوک ءِ سر ءَ ماٹر گولہ آس داتگ ءُ چاریں مردمانی زدگ کنگ ءِ جنگی میارباری ءِ چیردیگ ءَ گل ءِ نام کارمرد کُرتگ-

میجر گوھرام بلوچ ءَ گوشتگ کہ گْوستگیں شپ ءَ کیچ ءِ دمگ تُمپ ءَ وھدیکہ پاکستانی پوج ءَ چو مدامی ءِ وڑ ءَ لس مھلوک ءِ سر ءَ ماٹر گولا آس داتگ گڑا چریشی ءَ چار کودکیں مردم زدگ بیتگ اَنت وھدے مردماں دُژمنیں پوج ءِ اے کار ءِ بگیری ءَ زھرشانی کُرتگ گڑا آئی چہ وتی بے سوبی ءَ ماں چاگردی رسانکدر ءَ اے بےسریں کار بی ایل ایف ءِ نام ءَ کُرتگ ءُ آئی بی ایل ایف ءِ لیٹرپیڈ ءِ سر ءَ اے وئیل ءِ زمّہ واری منّ اِتگ،آئی مردمانی تہ ءَ اڈاند ودی  کنگ ءُ بی ایل ایف ءِ بدنام کنگ ءِ جُھد کُرتگ-

جارکش ءَ چہ بلوچ راج ءُ دُژمنیں پوج ءِ اُرش ءَ زدگ بیتگیں کھول ءِ گون ءَ دلپدردی درشان کُرتگ ءُ گوشتگ کہ آ ریاست ءِ بےسریں گپانی سر ءَ مہ بنت- گل ءِ نیمگ ءَ ھر وڈیں کارے کہ بہ بیت آئی ءِ زمہ واری ءَ گل وتی تندجاہ ٹیلگرام ءَ شنگ کنت ءُ چہ دگہ جاھاں گل ءِ نام ءَ شنگ بیتگیں درشانانی زمہ وار بی ایل ایف نہ اِنت-

آئی گوشتگ کہ بی ایل ایف یک آشوبی گلے کہ بلوچستان ءُ پہ بلوچ راج ءِ آجوئی،جان ءُ مال، تیاب ءُ مڈیانی پھریزگ ءَ جنگ کنگ ءَ اِنت ءُ آ ھچ پیم ءَ کودک ءُ بےمیاریں بلوچ راج ءِ تاوان دیگے درگت ءَ نہ جیڑ ایت-

بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ ہرنائی ءُ زیارت ءَ وتگڑیں سرچ آپریشن ءِ میان ءَ بی ایل اے ءِ سرمچارانی شھید کنگے ٹاہ پوج ءِ پروپکنڈیانی بھرے کہ آئی ءِ مول مراد بس وتی بے سوبیانی چیردیگ انت –

آئی ءَ گوشتگ کہ بی ایل اے ءِ اسپیشل ٹیکٹیکل آپریشنز اسکواڈ (ایس ٹی او ایس) ءَ وتی آپریشن سرجم کُتگ ءُ مئے درستیں سرمچار وش ءُ سلامتی آ دمگاں چہ در اتکگ ءُ وتی اوتاکاں سر بوتگ انت، اے آپریشن ءَ مئے یک سنگتے ھم شھید نہ بوتگ –

آئی ءَ دیمتر ءَ گوشتگ کہ اے سرجمیں دمگ ءَ پاکستانی پوج ءَ ھزاراں پوجی، بالگرد ءُ ڈرون آرتگ انت اشی ءَ ابید ھم دژمن پوج بی ایل اے ءِ سرمچارانی دارگ ءَ بے سوب بوتگ ءُ بلوچ سرمچاراں سوبمندی ءَ گوں وتی مشن سرجم کتگ ءُ اودے دراھگ ءَ سوبمند بوتگ انت – وتی ھمے بے سوبی ءِ چیردیگے ھاتر ءَ پاکستانی پوج زورانسری آوار جتگیں مردماں بلوچ سرمچار زاھر کنگے کوشست ءَ کنگ ءَ انت –

جارکش ءَ گوشتگ کہ بلوچ لبریشن آرمی راجی آجوئی جُھد ءُ اے جھدے میان ءَ شھید بوتگیں سرمچارانی سر ءَ پھر بندیت ءُ شھیدی مئے دلی واھشت انت- ھر ھما وھد ءَ مئے سرمچارے شھید بیت گڈا مئے گل پہ پھرے آئی ءِ شھیدی ءِ جار ءَ جنت ءُ شھید ءَ پہ شان ءِ دروت ندر کنت ءُ آ رکست کنگ بیت – اگاں اے آپریشن ءَ مئے ھر سرمچارے شھید بوتیں ما پھر آ زرتگ ات –

جارکش ءَ گوشتگ کہ کرنل لئیق ءِ دزگیری ءُ بلوچ راجی آمیدگس ءَ پیشی ءُ سزا دیگ بلوچ لبریشن آرمی ءِ مدامی کار ءُ درشانی انت آؤکیں وھداں بی ایل اے وتی اے دابیں آپریشنانی تہ ءَ گیشی کاریت –

جئیند بلوچ ءَ ھمے درشان ءِ تہ ءَ گوشتگ کہ بلوچ لبریشن آرمی پنجاپ ءِ جھمننداں ھمے پیام ءَ دیگ لوٹیت کہ وتی زھگاں چہ اے لالچ پرستیں جنرلانی روک کتگیں آس ءَ بہ رکین انت – بلوچستان بلوچانی ڈیھ ءُ راجدپتری سرڈگار انت، بلوچ ھر وڑا وتی آجوئی گیپت – بلوچستان ءِ تہ ءَ بے سوبی پاکستانی ریاست ءُ پاکستانی پوج ءِ مقدر انت – نوں پنجاپ جھمنند وت وتی راہ ءَ گچین بہ کناں کہ ھمک روچ چہ بلوچستان ءَ وتی زھگانی جوناں دست گرگ لوٹاں یا ناں وتی پوج ءِ سر ءَ زور دینت کہ آ ایمنی ءَ گوم ءَ بلوچستان ءَ یل بہ کن انت –

گوستگیں روچ ءَ ایف سی ءِ نیمگ ءَ آس دیگ بوتگیں ماٹر گولہ چی زدگ بوتگیں چُک ءُ زالبولانی ھک ءَ مروچی کیچ ءِ دمگ تربت ءَ بلوچستان سول سوسائٹی ءَ ایف سی ءِ بگیری ءَ روانکے کش اِتگ کہ تربت پریس کلب ءِ دیم ءَ بگر تاں شھید فدا بلوچ چار راہ ءَ مچی ءِ دروشم ءَ آسر بوتگ –

زھرشانی روانک ءَ سیول سوسائٹی ءِ کنوینر گلزار دوست ءَ ھوار دگہ ترانکاراں تران کتگ ءُ گوشتگ کہ پاکستانی پوج وتی اے ناشرکاریاں چیردیگے ھاتر ءَ گیش زوراکی کنگ ءَ انت -زدگ بوتگیں مردماں کھولانی دست ءَ دیگ ءُ آھاں دیم ءَ آرگے بدل ءَ آ وتی کرا داشتگ اَنت- مارا تُرس انت کہ زدگ بوتگیں مردمانی زند گیشتر ھترہ ءِ تہ انت –

آھانی گوشگ ات کہ اے اولی وئیل نہ اِنت اشی ءَ پیش ھم پاکستانی پوج ءَ لس مھلوک ءِ سر ءَ ھمے وڑ ءَ تیرگواری کرتگ ءُ گولا آس داتگ انت، لگوریں پوج وتی پروش ورگ ءِ چیر دیگ ءَ لس مھلوک ءَ نشانگ کنگ ءَ اِنت ءُ نوں وتی لگوری ءِ چیر دیگے ھاتر ءَ زدگ بوتگیں مردم وتی گور ءَ داشتگ انت ءَ مردماں بیھار دیگ ءُ تُرسینگ ءَ اِنت –

زانگ بہ بیت گوستگیں روچاں تمپ ءَ ایف سی ءِ نیمگ ءَ ماٹر گولہ ءِ آس دیگ ءَ یکیں کھول ءِ سَے مردماں ھوار چار مردم زدگ بوتگ انت، زدگ بوتگیں مردمانی تہ ءَ موسی آئی ءِ لوگبانک ءُ زھگ ھوار انت –

زدگ بوتگیں مردم تنی وھدی ایف سی ءَ وتی گور ءَ داشتگ انت ءُ اھوالکارانی رِد ءَ آ گوستگیں شپ ءَ شال ءَ دیم دیگ بوتگ انت، کہ آھانی تہ ءَ موسی ءِ زھگ ماھکان ءِ جاور نگیگ انت –

ھمے وڈ تمپ ءَ ھم کھول ءُ تمپ سول سوسائٹی ءِ نیمگ ءَ روانک ءِ کشگ بوتگ، زھرشانی کنوکاں ریاستی زوراکی ءُ تمپ ءِ وئیل ترندی ءَ گوں ایرجتگ ءُ نارہ جتگ –

آھانی گوشگ ات کہ ما ھچ وڑ ءَ ریاست ءِ زوراکیاں نہ منّ ایں ءُ بے توار نہ بہ ایں – وئیل ءَ ھواریں پاکستانی پوج ءِ کارمند دیم ءَ آرگ ءُ سزا دیگ بہ بنت – پاکستانی لشکر چہ لس آبادیانی تہ ءَ کشگ بہ بیت- ایف سی ءِ کارمند مئے پھازدار نہ اِنت مئے کشندہ انت کہ آھانی دست ءَ ھمک روچ بلوچ ءِ گِسانی چراگ کشگ بیگ ءَ اَنت- ما چہ اے زواکیاں رکگ لوٹ ایں-

دومی نیمگ ءَ ڈپٹی کمشنر کیچ ءَ تمپ وئیلے پژدر ءَ ایف سی ءِ نام گروکانی بگیری ءَ کاروائی کنگے جار جتگ –