TBP Balochi

نیشنل ڈیموکریٹک پاٹی ءِ جارکش ءَ رسانکدراں وتی شنگ کرتگیں درشان ءَ پھازگی ادارھانی نیمگ ءَ زورانسری آوار جنگ بوتگیں مردمانی کوش ایرجتگ ءُ گوشتگ کہ پھازگی ادارھاں بلوچستان ءِ وتی جتائیں استان ءِ جوڈ کتگ، اے پھازگی ادارہ ناکہ پاکستان ءِ آمیدگس ءُ ناکہ انسانی ھکاں منّ انت ھر ھما وھد ءَ آھانی دل بہ لوٹیت انسانی ھکانی لگتمالی ءَ کن انت – کس ءَ ھمت نیست کہ اشانی بگیری ءَ گامگیج بہ زوریت ءُ ناکہ اے بے لگامیں ھپس لوٹارینگ بنت –

جارکش ءَ گوشتگ کہ بازیں کرن ءِ بیت کہ آس ءُ آسن ءِ ھور گوارگ انت – اے سرڈگار ءِ بازیں پدریچ ءَ ھون ءُ آس ءِ ندارگ چم وت دیستگ ءُ گندگ ءَ انت – اے آس ءُ ھون ءِ گوازی سک باز بوتگ ھمینچو باز کہ استان ءِ دیم ھم ھونین انت، نوں اے پہ بلوچ ءِ ھوناں ھنچو تُنیگ انت کہ بلوچستان ءِ کُنڈ کُند ھمک روچ یک بلوچ ءِ ھون مپت ءُ ناھک ءَ ریچگ بنت – نوں ھمینچو ھون وار جوڈ بوتگ انت کہ وتی زندانانی تہ ءِ بندیگیں بلوچانی دست ءُ پاداں بند انت ءُ آھاں کُش انت –

جارکش ءَ گوشتگ کہ زیارت ءِ وئیل ءَ پھازگی لشکر ءَ دروگیں میڑ ءِ نام ءَ نُھ ءَ گیش زورانسری آوار جنگ بوتگیں بلوچ ورنا بے دردی تیر باران کُتگ ءُ آھانی زانگولیں جون چگل داتگ انت، تنی وھدی آھانی تہ ءَ پنچ مردمانی شہزاد بلوچ، شمس ساتکزئی، مختیار بلوچ، انجینئیر ظہیر بلوچ ءُ سالم بلوچ ءِ پجار بوتگ انت – اشانی درگت ءَ ریکارڈ ءِ تہ ءَ ھست انت کہ اے دراھیں مردم پیسر ءَ آوار جنگ بوتگ انت آھانی زورانسری آوار ءُ بیگواھی ءِ ریکارڈ ھست انت ءُ آھانی کھول ءِ نیمگ ءَ زورانسری آوار جنی ءِ بگیری ءَ زھرشانی ھم کنگ بوتگ –

جارکش ءَ وتی درشان ءِ گڈسر ءَ میاں استمانی انسانی ھکانی ادارہ ءُ اقوام متھدہ ءَ چہ لوٹ کتگ ءُ گوشتگ کہ بلوچستان ءَ انسانی ھکانی لگتمالی ءِ بگیری ءَ گامگیج زورگ بہ بیت – پاکستان پہ پسوی ءَ لوٹارینگ بہ بیت – آئی ءَ چہ پاکستان ءِ سپریم کورٹ ءِ چیف جسٹس ءَ ھم دزبندی کُتگ ءُ گوشتگ کہ اے جیڑہ ءِ سر ءَ وت گامگیج بہ زوریت ءُ جوڈیشنل انکوائری بہ کنت ھرکسے کہ اے کتکاری ءَ ھوار انت آھاں سزا بہ دنت –

گوستگیں روچاں بلوچستان ءِ دمگ زیارت ءَ پاکستانی پوج ءِ دست ءَ دروگیں میڑے ءِ تہءَ کُشگ بیتگیں نھ مردمانی تہءَ پنچ ءِ پجار پاکستانی لشکریانی دستءَ بیگواھیں مردمانی ردءَ بیتگ اَنت۔

پجار بیتگیں مردمانی تہءَ شمس ساتکزئی، انجینئر ظھیر، شھزاد دھوار، مختیار ءُ سالم ھوار اَنت، چہ پیسرءَ بیگواھیں مردماں میڑے ءِ نام دیگ ءُ کُشگ ءِ سرءَ بلوچ تکانی تہءَ ترندیں زھرشانی ءُ رنج گندگ ءَ پیداک اِنت۔

بلوچ نودربریں رھشون ڈاکٹر مھرنگ بلوچ ءَ چاگردی رسانکدرانی تندجاہ ٹوئیٹر ءَ اے درگت ءَ نبشتہ کنان ءَ گُشتگ کہ بیگواھیں مردماں دروگیں میړ‎انی تہءَ کُشگ نہ تھنا ترسناکیں بلوچ نسل کشی اِنت بلکینہ بلوچستان ءُ پاکستان ءِ ھما درستیں سیاسی پاٹیانی ءُ مردمانی دیما شامات اِنت کہ آ سرپد بنت کہ پاکستان ءَ آمید گِس ءُ پارلیمنٹ آجوہ اَنت۔

آئی ءَ گُشتگ کہ بلوچ نسل کشی ءَ پاکستانی سیاسی گل ھم جرمءَ ھوار اَنت۔

آئی ءَ دیمترءَ گُشتگ کہ بازیں ماہ ءُ سالاں چہ بیگواھیں مردماں دروگیں میڑانی تہءَ کُشگ ءَ چہ نہ تھنا شما یک زوراکیں ریاست ءِ بیگ ءِ منانک دیگ ءَ اِت بلکینہ شما مات ءُ گھارانی بددعاھاں ھم زیرگ ءَ اِت۔ یہ چورھیں زھگ مات ءُ گھارانی دلاں چہ درکپتگیں بددعا شمارءَ اے تاگت ءِ پجیگ ءَ تباہ ءُ برباد کنت۔

یات بہ بیت کہ سینزدہ جولائی ءِ نیامی شپ ءَ ناشناسیں مردماں پاکستانی پوج ءِ کرنل ءِ ھما وھدءَ بیگواہ کُتگ اَت کہ آ وتی کھول ءِ پجیگ ءَ بلوچستان ءِ دمگ زیارت ءَ گردگ ءَ بیتگ۔

ھمے کرنل ءِ بیگواھی ءِ زمہ واری بلوچ سلاہ بندیں آجوئی لوٹوکیں سلاہ بندیں گل بی ایل اے ءَ من اِتگ اَت وھدیکہ ھمے کرنل ءِ جون رند تر ءَ در کپتگ اَت۔

بی ایل اے نیمگ ءَ رسانکدرءَ شنگ بیتگیں یک درشانے ءِ ردءَ لیفٹیننٹ کرنل لئیق بیگ مرزا، بلوچ لبریشن آرمی ءِ ھک ھاسیں نشانگ ءِ بیتگ ءُ بی ایل اے ءِ انٹیلی جنس یونٹ آئی ءَ چارگ ءَ بیتگ۔ 12 جولائی ءَ سرجمیں روچ ءَ آئی ءِ رندگیری ءَ پد آ یک انچیں جاھے ءَ چہ دزگیر کنگ بیتگ، کہ آودہ لس مردمانی ھاترءَ تُرس کم ءَ چہ کم بہ بیت۔

زانگ بہ بیت بی ایل اے ءِ اُرش ءَ پد پاکستانی لشکریاں نھ مردمانی زیارت ءَ بیڑیے ءِ تہءَ کُشگ ءِ ٹاہ داتگ اَت، بلے رندءَ زانگ بیتگ کہ پوجی ٹاہ دروگ بیتگ ءُ آھاں بیگواھیں مردم دروگے میڑ ءَ کُشتگ اَنت ءُ پدءَ گُشتگ کہ آ جنگول بیتگ اَنت۔

بلوچستان ءِ بنجاھی شھر شال ءِ پریس کلب ءَ کلات ءِ جھمنند شھزاد بلوچ ءِ کھول ءَ اھوالکاراں گوں تران کنان ءَ گوشتگ کہ شھزاد بلوچ ھمے سال ءِ چار جون ءَ چہ شال ءَ زورانسری آوار جنگ ءُ بیگواہ کنگ بوتگ –

آھاں گوشتگ کہ ھنو زیارت ءِ آپریشن ءَ شھزاد بلوچ بے گناہ ءَ جنگ بوتگ – شھزاد بلوچ ریٹائرڈ بوتگیں ڈی ایس پی کیپٹن خدابخش دہوار ءِ زھگ، کونسلر وحید احمد دہوار، انجینئیر عبدالحمید دہوار، بی این پی ءِ کلانیں رھشون کامرید علی اکبر دہوار ءِ کستریں برات بوتگ –

کھول ءَ پوج ءِ گپ رد کُرتگ انت ءُ گوشتگ کہ شھزاد ھماھانی زنداناں بندیگ بوتگ –

اے وھد ءَ بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ھم ھمودا ساڑی بوتگ –

پدا رند ءَ کھول ءَ جون زرتگ ءُ وتی بنکی ھنکین ءَ شُتگ انت ءُ اودا مردماں مزنیں کچ ءَ شال تاں کراچی ءَ رؤکیں شھدگ بند کرتگ ءُ جون دگ ءِ سر ءَ ایرکرتگ انت ءُ پھازگی لشکر ءِ بگیری ءَ زھرشانی کتگ ءُ ڈیھے دیناں کربان بوگ ءَ شھید ءَ سھر چکیں دروت ندر کتگ –

زھرشانی کنوکاں زیارت ءَ بوتگیں پوجی میڑ رد کُتگ انسانی ھکانی ادارھاں چہ بیگواھیں مردمانی یل کنگے لوٹ کتگ –

بلوچ یکجھتی کمیٹی ءَ زیارت ءَ زورانسری آوار جنگ بوتگیں بیگواھیں مردمانی کوش ءِ سر ءَ دلپدردی درشان اتگ گوشتگ پاکستان ءِ تہ ءَ ھک، جمھوریت ءُ آمیدگسانی آزاتی ءِ بس گپ جنگ بیت وھدیکہ اشی ءِ پژدر ءَ بلوچستان ءِ زلم زوراکی ءِ ھاکمی ایں اودا بلوچستانی زانگولیں جون دست کپگ ءَ انت آ دروگیں میڑ ءِ نام ءَ کُشگ بوگ ءَ انت –

زیارت ءَدروگیں میڑ ءِ نام ءَ کہ نُھ مردم جنگ بوتگ انت آ پیسر ءَ زورانسری آوار جنگ ءُ بیگواہ کنگ بوتگ انت – دروگیں میڑ ءِ نام ءَ بیگواھیں مردمانی کوش ناھکی ءُ زوراکی ءِ گڈی سیمسر انت –

جارکش ءَ گوشتگ کہ سینزدہ جولائی ءَ پھازگی لشکر ءَ ھما مردمانی کہ زیارت ءَ دیم پہ دیمی میڑ ءَ جنگ بوگے ٹاہ داتگ آھانی تہ ءَ سَے ءِ پجار بوتگ کہ پیش ءَ زورانسری آوار جنگ ءُ بیگواہ کنگ بوتگ انت کہ آھانی پجار شمس ساتکزئی، نودربر شہزاد بلوچ ، انجینئر ظہیر بلوچ ءِ نام ءَ بوتگ انت وھدیکہ ایندگرانی پجار کنگ بوگ ءَ انت –

زانگ بہ بیت دروگیں میڑ ءَ دگہ دو مردمانی مختار بلوچ ءُ سالم کریم ھم پجار بوتگ کہ آ پیش ءَ زورانسری آوار جنگ بیگواہ کنگ بوتگ انت-

بی وائی سی ءِ جارکش ءَ دیمتر ءَ وتی درشان ءِ تہ ءَ گوشتگ کہ اے بیگواھیں مردمانی کھولاں وتی دوستیگیں مردمانی زورانسری آوار جنی ءِ بگیری ءَ سرجمیں بلوچستان ءَ زھرشانی ھم کُتگ بلے جھندم آھانی یل کنگ ءَ آ دروگیں میڑ ءِ نام ءَ جنگ بوتگ انت – اشی ءِ بگیری ءَ سرکار، سیاسی پاٹی ءُ آمیدگس ءَ گامگیج زورگی انت اگاں ناں اے درچ گیش بوان بیت –

جارکش ءَ وتی درشان ءِ گڈسر ءَ آمیدگس، پاکستان ءِ چیف جسٹس ءُ ھک دئی ءِ درسیں ادارھاں چہ لوٹ کتگ ءُ گوشتگ کہ بلوچستان ءَ دروگیں میڑ ءِ نام ءَ بیگناھیں مردمانی نشانگ کنگے آسر سنگین بنت – اشی ءِ گرءُدار ءِ ھاتر ءَ ترندیں گامگیج زورگی انت – بلوچستان ءِ درسیں اختیار ءَ پھازگی لشکر ءِ دست دیگ ءَ بلوچستان ءِ جاورھال سنگین بوت کناں –

روکپتی بلوچستان ءِ بنجاھی شھر دزاپ ءَ شش مردم دزگیر کنگ ءَ پد گون وت برتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان “دزاپ ” ءَ ایرانی لشکر ءَ بلوچی زبان ءِ ورنائیں گشندہ ءُ شائر بلال نسروئی دزگیر کتگ ءُ گوں وت برتگ –

انٹرنیشنل وائس فار بلوچ مسنگ پرسنز ءِ رد ءَ سیزدہ جولائی دوھزار ءُ بیست ءُ دو ءَ ایرانی لشکر ءَ روکپتی بلوچستان ءِ بنجاھی شھر زاھدان ءِ ھند شیر آباد ءَ بلوچی زبان ءِ ورنائیں شائر ءُ گشندہ بلال نسروئی دزگیر کتگ ءُ برتگ ءُ چریشی ءَ پد آئی ءِ درگت ءَ آئی ءِ کھول ھال دیگ نہ بیتگ-

انٹرنیشنل وائس فار بلوچ مسنگ پرسنز ءِ رد ءَ روکپتی بلوچستان ءَ یکشل ءَ مردم گرگ ءُ برگ بیگ ءَ اَنت ءُ چریشی ءَ پد آیانی سر ءَ نشہ باپاری ءُ دگہ دگہ بھتام جنگ بیگ ءَ اَنت-

ھمے وڑ ءَ بلوچ کمپعن فعالین ءِ رد ءَ زاھدان ءِ ھند شیر آباد ءَ دگہ پنچ کس ھم گرگ ءُ برگ بیتگ اَنت کہ آیانی تہ ءَ یکے ءِ اکس شنگ کنگ بیتگ ءُ ایرانی بیرک ءِ دار ءَ بندوک اِنت-

بلوچ کمپعن فعالین ءِ رد ءَ گرگ بیتگیں مردمانی تہ ءَ خدانور لجعی ء عیسی گوں ھمراھ ءِ کریم براھوئی، ناسر براھوئی، یزدان گورگیج ءُ ابراھیم باران زئی ءِ ھمراھی ءَ ایرانی لشکر ءَ شیر آباد زاھدان ءَ دزگیر کتگ ءُ برتگ اَنت-

اشانی تہ ءَ خدانور ما ایرانی بیرک ءَ بندگ ءُ آئی ءِ اکس ایرانی لشکر ءَ شنگ کتگ – اکس ءِ تہ ءَ گندگ بیت اِنت آ یک بیرکے ءِ دار ءَ بندوک اِنت-

بلوچ کمپعن فعالین ءِ رد ءَ اے پنچیں مردمانی دزگیری ءِ درگت ءَ ایرانی لشکر ءَ دگہ سبب پدر نہ کرتگ اَنت ءُ نانکہ آیانی بھتامانی بارو ءَ دگہ گپ دیم ءَ آورتگ اَنت-