TBP Balochi

بلوچستان ءِ دمگ چہ مستونگ ءَ پاکستانی پوج ءَ چار ورنا زورانسری آوار جتگ ءُ بیگواہ کتگ اَنت-

دمگی مردمانی رد ءَ چار شمبے ءُ پشمبے ءِ میانی شپ ءَ ساھت دو ءَ پاکستانی پوج ءَ لوگانی سر ءَ بیڑ برتگ کھڈکوچہ ءَ ٹکی رھشون زمیندار ھاجی میر جان محمد شاھوانی ءِ دو زھگ عطا اللہ شاھوانی ءُ عبید اللہ شاھوانی ءُ آیانی دو ناکو زھگ مجیب الرحمان ءُ عبدالخالق شاھوانی آوار جتگ ءُ ناشناسیں جاھے ءَ برتگ اَنت-

اے گرگ بیتگیں ورنا انگت بیگواہ اَنت وئیل ءِ درگت ءَ دمگدارانی نیمگ ءَ تنی وھدی ھچ گامگیج دیم ءَ نیتکگ اَنت ھمے وڑ ورنایانی ابید ارزی ءَ دزگیری ءِ سر ءَ ترس آماچ اَنت-

زانگ بہ بیت گوستگیں سَے روچانی میان ءَ شال، ھاران ءُ مستونگ ءَ ھپ مردم زورانسری آوار جنگ ءُ بیگواہ کنگ بیتگ اَنت کہ آیانی تہ ءَ چہ شال ءَ میٹرک ءِ ورنائیں نودربر سعود عاقب، چہ ھاران ءَ غلام جیلانی حسین زئی ءُ مھمد ابراھیم مینگل ھوار اَنت-

چریشی ءَ پیسر چہ کیچ ءَ سَے مردم زورانسری آوار جنی ءِ آماچ بیتگ اَنت داں انگت ءَ آیانی درگت ءَ دگہ ھال دیم ءَ نیتکگ اَنت-

دومی نیمگ ءَ زیارت ءَ نُھ کسانی کوش ءِ بگیری ءَ شال ءَ زھرشانی بیگ ءَ اَنت ـ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ کیچ دمگ ھوشاپ ءَ پاکستانی پوج ءُ کلات ءَ گیس درکنوکیں سائٹ ءِ سر ءَ بوتگیں اُرشانی زمّہ واری منّ اِتگ انت –

جارکش جئیند بلوچ ءَ گوشتگ کہ مئے سرمچاراں گوستگیں روچ ءَ ھوشاپ ءِ دمگ الندور کاشولی ءَ برجاھیں پاکستانی پوج ءِ پانگس ءِ سر ءَ دورجنگیں توپک ءَ گوں یک پوجی کارمندے نشانگ کتگ ءُ کُشتگ –

آئی ءَ گوشتگ کہ زورگیریں پوج ءِ ٹولی ءَ اُرش ءَ پد سرمچارانی رندگیری ءِ جھد کُتگ بلے سرمچاراں جوانیں شوربندیاں گوں پیش ءَ راہ ءِ سر ءَ سنگر بستگ ءُ نشتگ انت ءُ دژمن ءِ کارمندانی سر ءَ مزنیں سلاھانی گوم ءَ اُرش کُتگ – اُرش ءِ آسر ءَ آھانی بازیں جانی ءُ مالی تاوان ءِ دیمپانی بوتگ –

جارکش ءَ دیمتر ءَ گوشتگ کہ ھژدہ جولائی ءَ مئے سرمچاراں کلات شیخڑی ءَ گیس درکنوکیں سائٹ ءِ سر ءَ اُرش کُتگ کہ اود ءَ تراکناکیں شورواں گون مارگنڈ بلاک نمبر یک ءِ چات تباہ کُتگ وھدیکہ چات ءِ پھازگی سلاہ بندیں مردم دزگیر کُتگ انت –

جارکش ءَ گوشتگ بی ایل اے ءِ سرمچاراں دزگیر کُتگیں مردم دمگی بلوچ بوگے سوب ءَ مکن کُتگ ءُ یل داتگ انت بلے آھاں سلاہ دستیگ کتگ انت – آئی ءَ گوشتگ کہ ما دمگی مردماں مکن کنیں کہ آ زورگیریں لٹ پُلی شوربندیانی بھر جوڈ مہ بنت اگاں ناں وتی جان ءُ مال ءِ زمّہ دار وت انت –

وائس فار بلوچ مسنگ پرسنز، نیشنل ڈیموکریٹک پارٹی، بلوچ یکجھتی کمیٹی ، بلوچ وومن فورم، بی ایس او ءُ بی ایس او پجار ءِ یک یکجاھی دیوان وائس فار بلوچ مسنت پرسنز ءِ چئیرمین نصراللہ بلوچ سروکی ءَ برجم دارگ بوتگ-

دیوان ءَ انوگاں پاکستانی پوج ءِ نیمگ ءَ چہ بلوچ بیگواھیں مردم دروگیں میڑے ءَ جنگ ءَ گوں تُرندی ءَ ایر جتگ ءُ گْوشتگ کہ ریاست نیمگ ءَ چہ بیگواھیں مردماں ناشرکار گوشگ ءُ اے شھید کتگ اَنت، ھالانکہ اے سرجمیں مردم زورانسری آوار جنی ءِ نشانگ کنگ بوتگ اَنت اے درستانی زورانسری آوار جنی ءِ منّانک وائس فار بلوچ مسنگ پرسنز ءِ کر ءَ ھست اَنت-

آیاں گْوشتگ کہ چوناھا باید اے وڑ بوتیں ریاست ءُ آئی ءِ ادارہ بیگواھیں مردمانی جیڑہ جوانیں وڑے ءَ بہ چار اَنت ءُ اشی گشینگ ءِ جُھد ءَ بہ کن اَنت بلے ھکومتی ادارھانی سنجیدگی ءِ اے زانت اِنت کہ بیگواھیں مردماں یل کنائینگ وتی جاہ آیاں دروگیں میڑے ءَ شھید کن اَنت ءُ لاش ءَ دور دے اَنت-

دیوان ءِ گُڈی ءَ یکجاھی دروشم شور کنگ بیتگ کہ پاکستانی لشکر نیمگ ءَ چہ بیگواھیں مردماں شھید کنگ ءُ لاشانی دور دیگ ءِ بگیری ءَ باندا بزاں 21 جولائی ءَ ساھت 12 ءَ شال پریس کلب دیم ءَ یک زھرشانی کنگ بیت، دُرستاں گوں دزبندی اِنت آ اے زھرشانی جوانیں وڑے ءَ بھر بزور اَنت-

سربوتگیں ھالانی رِد ءَ پاکستانی پوج ءَ چہ شال ءَ دھمی تبک ءِ نودربرے زورانسری آوار جتگ ءُ بیگواہ کتگ –

گیشیں ھالانی رِد ءَ دوشی شپ پاکستانی پوج ءِ کارمنداں فیض آباد سریاب ءَ حاجی نوراللہ سرپرہ ءِ گِس ءَ بیڑ برتگ ءُ آئی ورنائیں زھگ سعود عاقب زورانسری آوار جتگ ءُ گوں وت برتگ –

زانگ بہ بیت ھمے سال ءِ دوازدہ فروری ءِ شپ ءَ شال ءِ دمگ فیض آباد ءَ پاکستانی پوج ءَ ھمے کھول ءِ سر ءَ بیڑ برتگ ءُ دھمی تبک ءِ نودربر سعود عاقب ءُ آئی ءِ وارس یازدھمی تبک ءِ نودربر سدیس ء حاجی نثار سرپرہ زورانسری آوار جتگ ءُ گوں وت برتگ انت –

اشی ءَ پیس ھپت فروری ءَ ھم پاکستانی پوج ءَ حاجی نوراللہ ءِ گِس ءَ بیڑ برتگ آئی ءِ یک دگہ زھگے فرہاد سرپرہ ءُ وارس ثاقب سرپرہ آوار جتگ انت وھدیکہ یک روچ ءِ ساری شش فروری پوج ءَ حاجی نثار ءِ گِس ءَ آئی ءِ دگہ زھگے ہارون ولید ء حاجی نثار زورانسری آوار جتگ ءُ بیگواہ کتگ –

فروری ءِ ماہ ءَ پوج ءَ یکیں کھول ءِ پنچ مردم زورانسری آوار جتگ ءُ بیگواہ کتگ انت بلے پدا ھمے سال ءِ مئی ماہ ءَ پنچیں ورنا زاھر کُتگ ءُ ھاران ءُ چمن ءَ پولیس ءِ دست ءَ داتگ انت –

پولیس ءِ دست ءَ دیگ ءَ یک ماہ ءَ پد جون ءِ ماہ ءَ ہاروان سرپرہ، سدیس ءُ عاقب پولیس ءَ یل کتگ ءُ وتی گِس ءَ سربوتگ انت بلے گوستگیں شپ ءَ عاقب ء حاجی نوراللہ یکرندے پدا آوار جنگ ءُ بیگواہ کنگ بوتگ –

بلوچستان ءِ دمگ کیچ ءَ زالبولے ءَ ھوار دو مردمانی لاش کپتگ اَنت-

ھردوکیں لاش کیچ ءِ دمگ بلیدہ ءِ ھند ءَ دزکپتگ اَنت، پولیس ءِ رد ءَ ھردوک تیر جنگ ءُ کشگ بیتگ اَنت-

دمگی مردمانی رد ءَ ھردوکیں مردم گوستگیں روچ ءَ بلیدہ ءَ ابید ءِ ھال دیگ ءَ شتگ بیتگ اَنت چارشمبے ءِ روچ ءَ آیانی لاش دزکپتگ اَنت-

ھردوکانی سیادی چہ بلیدہ ءَ اِنت کوش ءِ سبب تنی وھدی زانگ نہ بیتگ-

بلوچستان ءِ دمگ ھاران ءَ پاکستانی پوج ءَ یک مردمے دزگیر کتگ ءُ ناشناسیں جاھے ءَ برتگ، بیگواہ کنگ بیتگیں مردم ءِ پجار غلام جیلانی حسین زئی ءِ نام ءَ زانگ بیتگ-

کھول ءَ بیگواھی ءِ گپ راست کتگ ءُ گُشتگ کہ غلام جیلانی حسین زئی گوستگیں روچ ءَ مزنیں مسیت ءِ نزیک ءَ لھتے دیم پوشیں سلاہ بندیں مردم ءُ سی ٹی ڈی ءِ کارندھاں آوار جتگ ءُ برتگ-

کھسل ءِ رد ءَ بھتام جتگ ءُ گوشتگ کہ اے مئے کھول ءِ تہ ءَ اولی وئیل نہ اِنت گوستگیں یک دھکے ءَ گیش مئے کسان سالیں زھگ ءَ کماشاں بہ گر چادر ءُ چار دیواری ءُ گیرت پامال بوگ ءَ اِنت-

آیاں دیمتر ءَ گوشتگ کہ مئے زھگ ءُ زالبول بے میار ءَ چوشیں زُلمانی دیمپان اَنت نا ایوک ءَ مئے شھری بلکیں انسانی ھکانی لگتمالی اِنت-

آیاں ڈیھی ادارھاں گوں دزبندی کتگ ءُ گوشتگ ما پر ایمنیں شھری اِنت مارا اے رنگ ءَ باگیانی لڑا ھوار مہ کن اِت ما دراھیں انسانی ھکانی داروک ءُ ھمدرداں گوں دزبندی کن ایں کہ غلام جیلانی بلوچ ءِ گیر کانونی دزگیری ءِ ھلاپ ءَ توار چست بہ کن اَنت-

روکپتی بلوچستان ءَ بے آپی ءِ سبب ءَ بازیں مردم ٹوھیں جنجالانی دیمپان اَنت-

روکپتی بلوچستان ءِ دمگ نیکشھر ءِ بازیں ھنداں بے آپی ءِ سبب ءَ اود ءِ مھلوک تن ءِ دیمپان اَنت-

نیکشھر ءِ دمگدار مجیب ھسنی ریڈیو ءَ تران کنان ءَ گوشتگ کہ نیکشھر ءِ دو سد ءُ بیست میتگاں تھ آپی ءِ آماچ اَنت-

آئی ءَ گوشتگ کہ بازیں میتگاں اگاں تشے تشے آپ ھست گڑا اود ءَ آپ گند ءُ گسڑیں آپے ءِ دروشم ءَ اِنت کہ مردم آئی ءَ پہ لاچاری ءَ ورگ ءَ اَنت-

مجیب ھسنی ءَ تران کنان ءَ گوشتگ کہ باید سرکار اے دمگانی واستا آپ ءِ مچ کنگ ءُ مردماں سر کنگ ءَ ڈیم ءُ دگہ چیزانی چن ءُ لانچ ءَ بہ کنت-

روکپتی بلوچستان ءَ چاگردی ترام جاھاں انسانی ھک ءُ دگہ چیزانی درگت ءَ کار کنوکیں گل بلوچ کمپعن فعالین ءِ رد ءَ اے دمگاں سَے سد ءُ بیست میتگاں آپ ءِ کمی اِنت چریشی ءَ اود ءَ نندوکیں مردم یکدم تکانسر اَنت-

ھمے وڑ ءَ پارلمینٹ ءِ باسک معین الدین سعیدی ءَ گوشتگ کہ چھبار، دشتیاری، نیکشھر ءُ کسرکند ءَ پارلمینٹ ءِ پتر ءَ گپ کنان ءَ گوشتگ کہ بلوچستان ءِ اے جاھاں پنجاہ درسد آپ ءِ کمی پیش اتکگ چریشی ءَ آپ ءِ کمی ءِ دیمپان اِنت –

پتر ءِ باسک ءَ تران کنان ءَ گوشتگ کہ اے میتگاں ھزار ھزار مردم ھست کہ اے مردم تن ءِ دیمپان اَنت چریشی ءَ باید برزی ھندانی سرکار گامگیج بہ زور اَنت-

بلوچ نیشنل موومنٹ ءِ جارکش ءَ گوشتگ کہ پاکستانی پوج ءَ 15 جولائی ءَ بلوچستان ءِ دمگ زیارت ءَ آجوئی لوٹوگیں گل ءَ چہ ھمگرنچ نُھ مردمانی جنگ ءِ ٹاہ جتگ کہ ھمکروچی وڑ ءَ وتگڑ ءُ دروگ بوتگ اَنت- کُشگ بوتگیانی تہ ءَ پنچ مردم ءِ پجّار بوتگ اَنت کہ آ جتاجتائیں وھداں پاکستانی پوج ءَ زورانسری آوار جنی ءِ نشانگ کتگ اَنت- اے مردم چیریں آزارجاھانی تہ ءَ بندیگ بوتگ اَنت کہ ھمے مردم لشکر ءَ زنداناں درکتگ ءُ دروگیں میڑ نام ءَ سر ءَ کُشتگ اَنت-

آئی ءَ گْوشتگ کہ کُشگ بوتگیں مردمانی تہ ءَ شمس ساتکزئی پنچ سال ءَ ساری ، شھزاد ء خدا بخش دھوار جھمنند کلات ھمے سال ءِ چار جون ءَ چہ شال موسیٰ کولونی ءَ ، انجینئر زھیر اھمد 7 اکتوبر 2021 ، سالم ء کریم بخش جھمنند بالگتر 18 اپریل 2022 ءَ، ڈاکٹر مختیار احمد ء عبدالحئ جھمنند نال ھُزدار 11 جون ءَ شال سریاب دگ ءَ ھستیں پولی ٹیکنیکل کالج ءَ پاکستانی پوج ءَ زورانسری آوار جنی ءِ نشانگ کتگ اَنت-

جارکش ءَ گْوشتگ کہ پاکستانی پوج ءَ اے بیگواھیں مردم سلاہ بندیں گل ءِ گوم ءَ میڑ ءَ جنگ بوتگیں دروگیں ٹاہ جنگ ءَ اِنت- وھدے کہ بلوچ سلاہ بندیں آجوئی لوٹوکیں گلانانی رسم ءُ رواج اِنت وھدے آیانی یک باسکے جنگ بہ بیت تھنا آ اشی ءَ منّ اَنت بلکیں راجی پھر ءُ شانی ھمراھی ءَ گُڈی رسماں پیلو کن اَنت وھدے کہ مارا پاکستان ءِ نیمگ ءَ چُشیں جُرت ھچبر گندگ نَیت – بازیں سالاں چہ پاکستان ءَ زندانانی تہ ءَ بندیگیں مردماں چست کنت ءُ میڑ نام ءَ کُش اِیت ءُ آیاں آجوئی لوٹوکیں گلاں چہ ھمگرنچ کنگ ءِ جُھد ءَ کنت دانکہ اشی ءِ سر ءَ بے میار ءُ آزارجاھاں بندیگیں مردمانی کُشگ ءِ بھتام سر ءَ مَیت، بلے ھک ءُ راستی ءَ اے وڑ تُرسناکیں درشمے ءَ چہ چیر دات نہ کن ئے-

آئی ءَ گْوشتگ کہ زیارت ءَ کُشگ بوتگیں مردم وتی دوستناکانی یل کنائینگ ھاتر ءَ زھرشانی ءَ بھر زور اَنت – آیاں انسانی ھکانی ادارھانی گور ءَ کیس نکش کتگ اَنت ، اے دراھیں منّانک ھست اَنت- زیارت ءَ کُشگ بوتگیں لھتے مردم ءِ پجّار انگت نہ بوتگ چریشی ءِ زورانسری آوار جنگ بوتگیں مردمانی کھولانی تہ ءَ تُرس ودی بیت-

جارکش ءَ گْوشتگ اے تُرسناکیں زوراو ءِ بگیری ءُ جھانی ستہ ءَ زھرشانی کنگ بیت- سرجمیں چیپٹرزاں سرپدی دیگ لوٹ ایں کہ زھرشانی ءُ جھانی ستہ ءِ نیمگ ءَ آجوئیں راج ءَ سرپدی دیگ ءِ ھاتر ءَ جوانیں وڑے ءَ گیش ءُ گیواری بہ کن اِت-