TBP Balochi

بلوچ یکجھتی کمیٹی کیچ ءَ وتی شنگ کرتگیں درشانی ءِ تہ ءَ گوشتگ کہ زیارت ءِ وئیل ءِ ھلاپ ءَ بیست ءُ سَے جولائی ءَ زھرشانی کنگ بیت اِنت-

بلوچ یکجھتی کمیٹی کیچ ءِ جارکش ءَ گوشتگ کہ چوشکہ شما سرپد ات ریاست ءِ روشت گوں بلوچ راج ءَ چہ بن ازل ءَ شر نہ بوتگ، بلکیں آ مدام بلوچ ءَ ماتوئی چماں چاران ءَ پیداک انت۔ زُلم ء زوراکی ءِ درچ ءَ دیما بران ءَ 2004 ءُ دیم بلوچاں چست کنگ، آیاں آمیدگس ءَ نیارگ، گار کنگ ءُ پد ءَ آیانی لاشاں ویرانگ ءُ گیاباناں لاوارسانی پیم ءَ دور دیگ ءِ سلسلہ پمیشکا بندات بوت کہ وفاق پوجی تاکت ءِ زور ءَ بلوچانی توار ءَ پروش دیگ لوٹگ ءَ اَت، بلے اے توار روچ پہ روچ ودّان بوت۔ ھمے توار ءِ دارگ ءِ ھاتر ءَ ریاست ءَ بلوچ ءِ نسل کُشی ءِ تسلسلے پچ کت اے وئیل ءَ ما توتک ءِ ھواریں لاشانی دروشم ءَ گند ایں، اے تسلسل ءَ ما مرگاپ ءُ ایدگہ بلوچستان ءِ کنڈ کنڈاں گند ایں۔ بلے زیکیں روچ ءُ مروچیگیں روچ ءِ پرک باز جتا انت۔ زی بیتواری ءَ چست کت ءُ بیتواری ءَ آیانی لاش دور دات انت ، بلے مروچی آیاں وتگڑیں دیم پہ دیمی جنگ ءِ نام ءَ شھید کنگ ءَ انت۔

جارکش ءَ گوشتگ 15 ءُ 16 جولائی ءِ میان ءَ زیارت ءَ نھ لاش دزکپتگ ات چہ ریاست ءِ نیمگ ءَ گشگ بوتگ ات کہ دیم پہ دیمی جنگ ءَ من نھ ناشرکار جتگ۔ بلئے وھدے کہ لاش چارگ بوت انت تاں اے کل گار ءُ بیگواھیں مردم انت۔ چو مدامی ئیں ڈول ءَ پد ءَ ریاست پندل سازگ ءَ انت۔ ایشانی تہ ءَ لھتے انچیں بیگواھیں مردم انت کہ آیانی بیگواھی ءَ یک ءُ دو سال ءَ بگر دان پنچ سال بوتگ۔ چوشکہ شمس ساتکزئی چہ گوستگیں پنچ سالاں بندیگجاہ ءَ بند بوتگ ءُ ھمے پئیم ایدگہ اے ھما ات انت کہ ایشانی زہگ، مات ءُ گوھار ماں دگانی س رءَ نندوک ات انت، آمیدگسانی دروازگ ءَ ٹکگ ءَ ات انت ءُ ایشانی زھگاں وتی وانگ یلہ داتگ ات ءُ پوسٹر دست ءَ ات ءُ زھرشانی کنگ ءَ ات انت۔ بلوچ نسل کشی ءِ تسلسل نوں گیش بوان اِنت، گوستگیں چندے ماھاں پیسر دشت ءَ درزنانی درزن لاش لاوارسی کل کنگ بوتگ انت اگاں سرکار سرکارے بوتیں گڑا کم ءَ چہ کم آیانی ڈی این اے ڈیسٹ اش کت۔ بلے جنوک وھدے کہ ھمائی ءِ جند بہ بیت تاں گلگ گوں کئے ءَ کنگ بہ بیت۔ بلوچ انچیں گیرت مندیں راجے کہ آئی ءِ جنین کدی چو دگانی سر ءَ پولیس ءُ ایدگہ ادارھانی دست ءَ وتی بیگواھیں برات ءُ چک ءُ پتانی یل دیگ ءِ سر ءَ کم شرپ نہ کتگ انت چوشکہ سندھ پولیس ءَ آیانی گوما کتگ۔ ما راجدپتر ءِ تہ ءَ چوشیں درور کم گند ایں۔ دومی دیم ءَ نامی ئیں بلوچ راجدوستیں پارٹیز اے نسل کُشی ءِ ندارگ ءَ چمانی وت گندگ ءَ انت بلے آیانی گورا چوشیں بود نیست انت کہ کھولانی گوما ھمدردی بہ کن انت، مدام بس وتی زاتی نپانی ھاتر ءَ بلوچ ءِ نام ءَ کارمرز کن انت۔ اے وھداں ایشانی ھاموشی بازیں جستے پاد کنت۔

آئی ءَ گوشتگ چہ اے وئیل ءَ ھمے پدر بوت کہ اگاں آوکیں وھد ءَ چوشیں وئیلے دیم ءَ بئیت انت گڑا ریاست وتی نزوری ءَ چیر دیگ ءِ ھاتر ءَ بیگواھیں مردماں مرگ ءِ دپار کنت۔ اے وَ انگت ھما پجہ آورتگیں مردم بوتگ انت کہ ایشانی کیس وی بی ایم پی ءِ گور ءَ درج انت، یا ایشانی ھلاپ ءَ کھول ءِ نیمگ ءَ سداں زھرشانی ءُ روانک کشگ بوتگ بلے ارزشداریں گپ ایش کہ دگہ ھزاراں گار ءُ بیگواھیں بلوچ ھست انت کہ آیانی کھولاں وتی کیس درج نہ کتگ انت، پہ ھمے ترس ءَ کہ باندا بلکیں آھاں مستریں تاوانے دیگ بیت، پمیشکا آ مدام اے واجہ ءُ پلاں واجہ ءِ منہ وار انت۔ چُشیں کھولاں گیگ گور کنگی اِنت کہ اے دابیں وئیلاں انچیں گار ءُ بیگواھیں مردمانی جون پہ راج ءَ سوگات کنگ بنت کہ بے نام اَنت۔

جارکش ءَ گوشتگ نوں بیا ات کہ شمئے گاری ءِ سامان سرجم انت۔ وتی چک، پت، برات ءُ ززیزانی کیساں وی بی ایم پی ءُ ایدگہ انسانی ادارھاں درج کنیں ءُ وتی توار ءَ ھر ھما جاگ ہءَ سر کنیں کہ اود ءَ مئے گپاں گوشدارگ ءِ موکل بہ رس ایت ءُ واکداریں ادارھانی سر ءَ پریشرے بئیت انت کہ بلوچ لاوارس نہ انت ءُ آیانی نسل کشی چو پس ءُ گوکانی پیم ءَ کنگ مہ بیت۔ مارا سرپد بوگی اِنت کہ اے جیڑہ تھنا یک کھولے ءِ جیڑہ نہ انت بلکیں سرجمیں بلوچ ءِ راجی جیڑہ انت پمیشکا ھر کس اے درگتءَ وتی توار ءَ چست بہ کنت ءُ وت ءَ را چرے انسانیت کشیں پدکرد ءَ گیشینگ ءِ جھد ءَ بہ کنت۔

جارکش ءَ گڈسر ءَ گوزتگ شمبے ءِ روچ، بزاں 23جولائی ءَ سُھب ءِ 11بج ءَ ماں تربت ءَ زھرشانی بوگ ءَ اِنت کُل وت ءَ ساڑی بکن اِت۔

نیشنل ڈیموکریٹگ پاٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ زورانسری آوار جنیانی بگیری ءَ زھرشانی کنوکیں بلوچ درنگاز کنوکانی سر ءَ پولیس لٹ شاپی درشان آزاتی ءِ سر ءَ بندش جنگ انت – زھرشانی کنگ ءُ وتی ھیالانی درشانگ انسانی بنکی ھکاں ھوار انت کہ میاں استمانی کانودانی رِد ءَ رَد کنگ نہ بیت – شال زھرشانی ءَ بلوچ درنگاز کنوکانی درسیں لوٹ کانودی ءُ جمھوری بوتگ انت ءُ زھرشانی ءِ سر ءَ زوراکی کنگ زمہ وارانی نااھلی ءُ ترس ءِ پددرائی ءَ کنت –

جارکش ءَ دیمتر ءَ گوشتگ کہ شال پولیس ءِ زوراکی ءَ زھرشانی ھواریں زالبول زدگ بوتگ انت، بازیں زھگ ءُ کماش ءُ ورنا ھم زدگ بوتگ انت – پولیس ءِ نیمگ ءَ جنگی جاور پیداک کنگ بوتگ انت کہ اودا ھچ کس بکشگ نہ بوتگ – اگاں ملک ءِ واکدار ھمے پھم انت کہ زلم زوراکی ءَ گوں بلوچاں وتی بنکی ھکانی ھاتر ءَ دار انت گڈا اے آھانی مزنیں ردی یے – زلم ءُ زوراکیاں گوں نا پیش ءَ دارگ بوتگ ءُ ناکہ نون بیت اِنت ھمے ھاتر ءَ بلوچاں بنکی، سیاسی ءُ انسانی ھکاں دزکش کنگے واھشت بے وقوفی یے –

جارکش ءَ گوشتگ کہ نیشنل ڈیموکریٹگ پاٹی اے وئیل ءَ ھواریں پولیس کارمندانی در کنگ ءُ اشی ءَ ھوار ھوار پٹ پولی جوڈیشل انکوائری ءِ لوٹ کنت کہ اے وئیلے جوانی ءَ پٹ پول ءَ بہ کنت ءُاشی ءَ ھواریں کارکنوکاں سزا بہ دنت –

مشکے کوہ ءَ پوجی اپسر ءَ ھوار ھشت پوجی کارمند کُشتگ انت – میجر گوھرام

بلوچ سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءَ مشکے ءَ پاکستانی پوج ءِ کاروان ءِ سر ءَ بوتگیں اُرش ءِ زمّہ واری منّ اِتگ –

جارکش ءَ گوشتگ کہ مئے سرمچاراں مروچی بیست ءُ یک جولائی ءَ آواران ءِ دمگ مشکے ملیشبند ءَ پوجی کاروان ءِ ویگو گاڑی ءِ تراکناکیں شوروانی نشانگ کُتگ –

جارکش ءَ گوشتگ کہ پوجی کاروان ءِ یک ویگو گاڑی ءِ تراکناکیں شوروانی زد ءَ اتکگ کہ آئی ءَ سواریں پوجی اپسر ءَ ھوار ھشت پوجی کارمند مُرتگ انت ءُ گاڑی سرجمی ءَ تباہ بوتگ –

جارکش میجر گوھرام بلوچ ءَ وتی درشان ءِ گڈسر ءَ گوشتگ کہ زورگریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

گوستگیں روچاں زیارت ءَ دروگیں میڑے نام ءَ پیش ءَ آوار جنگ بوتگیں مردمانی کوش ءِ بگیری ءَ آھانی کھولاں زھرشانی کُتگ زھرشانی سر ءَ پولیس ءَ بیڑ برتگ زھرشانی کنوک لٹ شاپ کُتگ انت ءُ آھانی سر ءل ارسی گیس جتگ ءُ زدگ کُتگ انت –

لٹ شاپ ءُ ارسی گیس ءِ شیلنگ ءِ سوب ءَ وی بی ایم پی ءِ کمک سرکماش ماما قدیر بلوچ ھوار بازیں زالبول ءُ زھگانی جاور نہ وش بوتگ انت وھدیکہ بازینے دمتوس بوتگ –

چاگردی ترامجاھاں شنگ بوتگیں تامرانی تہ ءَ گندگ بیت کہ پولیس کھولانی سر ءَ لٹ شاپی ءُ ارسی گیس جنگ ءَ انت وھدیکہ دگہ شنگ بوتگیں اکس ءِ تہ ءَ بیگواھیں کفایت اللہ لوگبانک کرن ءِ ٹپی ایں دست گم گندگ بیت کہ آئی ءِ دست ھون انت –

کھول ءِ رِد ءَ ھنچوش کہ زیارت ءَ پیش ءَ زورانسری آوار جنگ بوتگیں مردم کُشگ بوتگ انت آھاں تُرس انت کہ آھانی دوستیگیں مردم کہ اے وھدی پوج زنداناں بندیگ انت آھانی گوم ءَ ھم ھنچوش بیت انت –

کھولانی گوشگ ات کہ زیارت ءَ دروگیں میڑے جنگ بوتگیں انجینئیر ظہیر ءِ گھار زھرشانی ءَ بوتگ ءُ ھمے ماہ ءَ ائید ءِ زھرشانی ءَ ھم ھوار بوتگ کہ آئی ءَ ھک دیگ بہ بیت آئی ءِ برات دیما آرگ بہ بیت بلے آئی ءِ برات ءِ زانگولیں جون دیگ بوتگ –

زانگ بہ بیت کہ دوازدہ ءُ سینزدہ جولائی ءِ میانی شپ ءَ بلوچ سرمچاراں پاکستانی پوج ءِ کرنل ءِ ھما وھد ءَ آوار جتگ ءُ گوں وت برتگ کہ وتی کھول ءِ ھمراھی ءَ بلوچستان ءِ دمگ زیارت ءَ سیل ءُ سواد ءَ بوتگ –

اے کرنل ءِ آوار جنگے زمہ واری بلوچستان ءِ آجوئی لوٹوکیں گل بی ایل اے ءَ منّ اِتگ ات پدا رند ءَ پوج ءَ کرنل ءِ جون دست کپتگ –

بی ایل اے ءَ رسانکدراں وتی شنگ کرتگیں درشان ءِ تہ ءَ گوشتگ ات کہ لیفٹیننٹ کرنل لئیق بیگ مرزا بلوچ لبریشن آرمی ءِ ٹارگٹ ءِ بوتگ ءُ بی ایل اے ءِ انٹلی جنس ٹولی ءَ آئی ءِ رندگیری کُتگ دوازدہ جولائی ءِ سرجمیں روچ ءَ آئی رندگیری کتگ ءُ پدا گڑسر ءَ ھنچیں ھند ءَ دزگیر کتگ کہ اودا مھلوک ءِ ھاتر ءَ ھترہ کم بوتگ –

بی ایل اے ءِ رِد ءَ کرنل لئیق بلوچستان ءَ زوگریں پوج ءِ یک آفیسرے ءِ بیگ، بزگیں بلوچ زالبول ءُ زھگانی زورانسری آوارجنی، بلوچ نسل کُشی ءُ دگہ جرماں ھوار انسانی ھکانی سنگینین لگتمالیاں تچک ءَ ھوار بیگ ءِ پژدر ءَ دزگیر کتگ – آ بلوچ راجی آمیدگس ءَ پیش کتگ ءُ آئی ءَ وتی بے گناھی ءِ ھک دیگ بیتگ بلے اود ءَ آئی ءَ وتی سرجمیں جرم منّ اتگ اَنت چریشی ءِ پژدر ءَ آ راجی آمیدگس ءَ مرگ ءِ سزا داتگ ءُ چریشی ءَ پد اے گپ ءِ سر ءَ گامگیج زرتگ-

پوج ءَ کرنل لئیق اوار جنی ءِ بگیری ءَ ھمے دمگ ءَ مزنیں کچ ءَ لشکر کشی کُتگ ءُ پاکستانی پوج آئی ایس پی آر ءَ آپریشن ءِ میان ءَ نُھ مردمے جنگ ءِ ٹاہ داتگ بلے پدا ھم بی ایل اے ءَ آئی ایس پی آر ءِ ٹاہ دروگ کُتگ گوشتگ کہ اے جنگ بوتگیں مردماں گوں بی ایل اے ءَ ھچ سیادی نہ بوتگ –

بی ایل اے ءَ گوشتگ ات کہ ہرنائی ءُ زیارت ءَ وتگڑیں سرچ آپریشن ءِ میان ءَ بی ایل اے ءِ سرمچارانی شھید کنگے ٹاہ پوج ءِ پروپکنڈیانی بھرے کہ آئی ءِ مول مراد بس وتی بے سوبیانی چیردیگ انت-

بی ایل اے ءِ گوشگ ات کہ اے سرجمیں دمگ ءَ پاکستانی پوج ءَ ھزاراں پوجی، بالگرد ءُ ڈرون آرتگ انت اشی ءَ ابید ھم دژمن پوج بی ایل اے ءِ سرمچارانی دارگ ءَ بے سوب بوتگ ءُ بلوچ سرمچاراں سوبمندی ءَ گوں وتی مشن سرجم کتگ ءُ اودے دراھگ ءَ سوبمند بوتگ انت – وتی ھمے بے سوبی ءِ چیردیگے ھاتر ءَ پاکستانی پوج زورانسری آوار جتگیں مردماں بلوچ سرمچار زاھر کنگے کوشست ءَ کنگ ءَ انت-

تنی وھدی زیارت ءَ دروگیں میڑے نام ءَ کُشگ بوتگیں مردمانی تہ ءَ ھپت مردمانی پجار بوتگ انت کہ پیش ءَ پوج ءِ زنداناں بندیگ بوتگ انت ءُ آھانی نام ءَ بیگواھیں مردمانی لڑ ءَ ھوار انت – آھانی نام ءِ بیگواھیں مردمانی لڑ ءَ ھوار بوھگے راستی دپ ءِ وت بلوچستان ءِ سرکار ءِ داخلہ مشیر ضیا لانگو ءَ گوستگیں روچ ءَ شال ءَ اھوالکاراں گوں تران کنگے میان ءَ منّ اِتگ –

گوستگیں روچ ءَ وائس فار بلوچ مسنگ پرسنز، نیشنل ڈیموکریٹک پاٹی، بلوچ یکھتی کمیٹی، بلوچ وومن فارم، بی ایس او، بی ایس او پجار ءِ یک اجلاس ءِ وی بی ایم پی ءِ سرکماش نصراللہ بلوچ ءِ چیردستی ءَ برجم دارگ بوتگ –

اجلاس ءَ درساں ھمے پیسلہ کتگ پھازگی لشکر ءِ نیمگ ءَ بیگواھیں مردمانی شھید کنگ ءُ چگل دیگے بگیری ءَ بیست ءُ یک جولائی ءَ ادار دوازدہ ءَ شال پریس کلب ءِ دیم ءَ زھرشانی کنگ بیت انت –

اوگانستان ءِ تہ ءَ پاکستان ءِ چیریں ادارھانی نیمگ ءَ چہ بلوچستان ءَ اتکگیں بلوچ پناھگیرانی سر ءَ اُرش پیش ءَ ھم بوتگ انت چریشی ءَ بازیں بلوچ پناھگیرے جنگ بوتگ انت –

ھالانی رِد ءَ اوگانستان ءِ دمگ نیمروز ءَ پاکستانی چیریں ادارھانی کارمنداں بلوچ پناھگیرانی سر ءَ اُرش کُتگ – اُرش ءَ یک ورنایے جلمب مری ء ملک مری بیران بوتگ –

جلمب مری ءِ کھول ءَ دھ سال انت کہ اوگانستان ءَ در پہ دری زند گوازینگ ءَ انت –

دومی نیمگ ءَ اوگان ءِ سرکار ءِ کارمنداں جملب مری ءِ سر ءَ اُرش ءَ پد سَے مردم دزگیر کُتگ انت کہ آھانی سر ءَ ھمے الزام انت کہ آ ورنایے کوش ءُ شوربندی ءَ ھوار بوتگ انت –

بلوچ سیاسی پاٹیاں اوگانستان ءِ نوکیں سرکار ءَ چہ لوٹ کتگ کہ پاکستان ءِ چیریں ادارھانی کارمندانی بلوچ پناھگیرانی سر ءَ اُرش ءَ گامگیج بہ زوریت ءُ اشی ءِ گرءُدارءَ بہ کنت –

آزمانک: مجرم ھُدا، یا کریم؟

آزمانکار: شاری لاؔل

دی بلوچستان پوسٹ

ھپتگے ءِ زندان ءَ پد مروچی کریم آمیدگس ءَ پیش بوتگ اد ءِ زندانی گیشتر آمیدگس ءَ پیش نہ بنت بلے زاناں کریم ءِ بھت ءَ جتگ۔

وکیل: ” تو اِے بے گناھیں مرد چیا کُشتگ؟”
کریم: “من نہ کُشتگ ھُدا ءَ کُشتگ”۔
وکیل: “دروگ مہ بند ترا مردماں دیستگ کہ تو اِے مرد ءَ تِیرے جتگ ءُ آ مرتگ”
کریم: “توبہ بکن چشیں گپ مہ جن گنھگار بہ ئے۔
منی بسات اینکس نہ اِنت کہ من مردمے کُشت بہ کن آں کُشوک ءُ زندگ کنوک وَ آ یکتائیں ھُدا اِنت”۔
وکیل ” تو ھبر ءَ دگہ تلے ءَ مہ بر مئے کرّ ءَ منانک ءُ شاھد ھست کہ ترا دیستگ اِش مرد ءِ کُشگ ءَ”

شاھد پیش کنگ بوت اَنت، آھاں شاھدی دات کہ ما کریم ءَ دیستگ مرد ءِ کُشگ ءَ۔

کریم ءَ پد ءَ گُشت “اے ھبر دراہ دروگ انت بنیادم ءِ ودی کنوک ءُ کشوک ھُدا اِنت ھچ مردم ءِ گنجائش نہ اِنت کہ مردمے ءَ را کُشت بہ کنت”۔

وکیل: “کریم تو اے ھبر ءَ منّ ئے کہ تیر تو جتگ اَنت ؟”

کریم : “ھو من اے ھبر ءَ منّ آں کہ تیر من جتگ بلے کُشتگ ھُدا ءَ”۔

وکیل: تو اے مرد چیا جتگ ایشی ءِ میار چی بوتگ؟ کریم : اولی گپ ایش انت کہ من مرد ءَ را نہ کُشتگ تھنا تیر من جتگ انت۔ دومی گپ ایش اِنت کہ من چیا جتگ، من ءَ دیریگیں کینگے پہ اے مرد ءَ لاپ ءَ بوتگ بلے من چہ ھُدا ءِ تُرس ءَ اے مرد نہ جتگ، وھدے کہ من مولوی ءِ دپ ءَ اِشکت کہ ھمک بنیادم ھُدا ءِ نویس اتگیں نسیب ءِ سر ءَ روان اِنت بید ء ھُدا ءِ لوٹ ءِ پد ءَ کس یک بوچے ٹالے چِست کت نہ کنت۔ شرّی یے کہ بیت یا بدی یے دراہ ھدا ءِ لوٹ ءِ پد ءَ بیت”۔

من ھمے گپانی اِشکنگ ءَ پد ھُدا ءِ کتاب ھم چار اِت مولوی ءِ ھبر راست اِت اَنت کتاب ءِ تہ ءَ ھم ھمے گپ نویس اتگ اَت پد ءَ منی ستک مھکمتر بوت کہ “ھر چیزے بیت چہ ھُدا ءَ ءُ ھُدا ءِ داتگیں بھت ءُ نسیب ءَ بیت پمیشکا من بازیں جیڑگ ءَ پد من وتی بَیر چہ دژمن ءَ گپت ءُ کُشت اگاں مرد مرتگ من نہ کُشتگ ھُدا ءَ کُشتگ، ھُدا ءِ کشتگیں مرد ءِ سزاوار من آں پرچیا؟

وکیل: “بس ھلاس تو کہ تیر جتگ مجرم توئے آ مرد ءِ ھون تئی سر ءَ اِنت من گوں جج ساھب ءَ لوٹ کن آں کہ کریم ءَ مرد ءِ کوش ءِ سزا ءَ پاھو دیگ بہ بیت”-

جج: “کریم دراھیں منانک ءُ شاھدانی گندگ ءَ پد اے ھبر پدّر بیت کہ مرد تو کُشتگ مجرم توئے، تو وتی پھریزگ ءُ سپائی ءَ چے گُش ئے؟”

کریم “جج ساھب ھُدا ءِ گُشگ اِنت ھمک مردم ءِ کُشوک ءُ ودی کنوک من آں ھمک ءِ بھت ءُ نسیب منی دست ءَ اِنت، وھدے کہ دراھیں چیز ھمائی ءِ دست ءَ اَنت گڑا آ مرد من چتور کُشتگ؟ کشوک وَ ھُدا اِنت۔

جج: ” بِچار کریم تئی ھبر راست اَنت بلے آ مرد کہ مرتگ تئی بھت ءَ نویسگ بوتگ کہ آ مرد ءِ مرگ ءِ سوب تو بہ ئے ءُ ھُدا ءَ ترا توپیک داتگ کہ تو آئی ءَ کُشت بہ کن ئے”۔

کریم : “جج ساھب تو وَ سرپدئے بلے من انگت ھمے جُست ءَ کنگ لوٹ آں منی بھت ءِ نویسوک کے اِنت؟

جج “ھُدا اِنت” کریم “منی کسمت ءِ تہ ءَ ھُدا ءَ مرد ءِ مرگ مہ نویس اتیں من آئی ءَ را بِھ کُشت نہ کتگ اِت تو اے ھبر ءَ وت زان ئے گڑا وھدے کہ بھت ءِ نویسوک ھما اِنت کشوک ھما اِنت گڑا گنھگار من آں پرچا؟-

جج ءَ وتی دوئیں دست سر ءَ کت اَنت جیڑگانی شھکورے ءَ کپت نہ زانت ئِے گنھگار کے اِنت؟ ند ءِ سرگ ءَ تاکے ءِ سر ءَ پُرشت ئِے ءُ چہ آمیدگس ءَ در آتک۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔