TBP Balochi

زیارت ءَ دروگیں میڑے نام ءَ بیگواھیں مردمانی کوش بلوچستان ءَ برجاھیں راجی چکچینی ءِ درچ انت – ترانکار

بلوچستان نیشنل پاٹی ءِ چیردستی ءَ زیارت وئیل ءُ شال ءَ بیگواھیں مردمانی کھول ءِ سر ءَ پولیس ءِ زوراکی ءِ بگیری ءَ پاٹی ءِ باسکاں بلوچستان ءِ بازیں دمگ ءَ وتی زھرشانی نبشتہ کنائینتگ –

درنگاز کنوکاں زیارت وئیل ءَ جوڈیشل کمیشن ءِ جوڈ کنگ ءُ وئیل ءِ درگت ءَ پٹ پول کنگے لوٹ کتگ –

پاٹی ءِ بنجاھی جار ءِ پد ءَ بلوچستان ءِ دمگ دالبندین، چاگی، جعفرآباد، نوشکی، تربت، ڈیرہ اللہ یار ءَ ھوار دگہ دمگاں زھرشانی کتگ ءُ زھرشانی پاٹی ءِ باسک ءُ بنجاھی رھشوناں بھر زرتگ –

ڈیرہ اللہ یار ءَ بی این پی ءِ چیردستی ءَ بیگواھیں مردمانی کوش ءِ بگیری ءَ زھرشانی کنگ بوتگ، درنگاز کنوکانی دست ءَ پلے کارڈ ءُ بوتگ ءُ آھانی سر ءَ بیگواھیں مردمانی ھک ءَ نارہ نبشتہ بوتگ انت –

ترانکارانی گوشگ ات زیارت ءِ وئیل پدردی یے بیگواھیں مردمانی درکانودی کوش ءَ ھمینچو ایر بہ جن کم ایں – دزگیر کنگ بوتگیں مردمانی کوش انسانیت ءِ بگیری یے – درنگاز کنوکاں لوٹ کتگ کہ بیگواھیں مردمانی کوش ءِ درگت ءَ سرکار کمیٹی ءِ اڈ بہ دنت آھانی کھول ءَ انساپ بہ دنت –

بی این پی ءِ چیر دستی ءَ نوشکی پریس کلب ءِ دیم ءَ زھرشانی کنگ بوتگ درنگاز کنوکاں گوستگیں روچ ءَ شال ءَ بیگواھیں مردمانی کھول ءِ سر ءَ پولیس ءِ زوراکی ایرجتگ –

دومی نیمگ ءَ بلوچستان نیشنل پاٹی ءِ سینٹرل ایگزیکٹو کمیٹی ءِ باسک آغا خالد شاہ، شال ءِ دمگی سینیئر نائب سرکماش ملک محی الدین لہڑی، شال ءِ دمگی ڈپٹی جنرل سیکرٹری ڈاکٹر علی احمد قمبرانی شال ءَ بیگواھیں مردمانی کھول ءِ زھرشانء نندانک ءَ بھر زرتگ ءُ دلپدردی درشان اتگ –

بی این پی ءَ شال ءِ وتی رھشون ءُ باسک گوشتگ انت کہ شال ءِ زھرشانی نندانک ءَ بھر بہ زور انت –

بلوچستان نیشنل پاٹی ءِ بنجاھی جارکش ءَ زیارت ءِ وئیل ءَ بیگواھیں مردمانی دروگیں میڑ ءَ کوش ترندی ءَ گوں ایر جتگ ءُ گوشتگ کہ سلیم بلوچ، ظہیر بلوچ، مختار بلوچ شمس بلوچ شھزاد بلوچ ءَ ھوار دگہ بیگواھیں مردمانی کھول وتی دوستیگیں مردمانی ھاتر ءَ زھرشانی ءَ بوتگ انت آھانی دروگیں میڑ ءَ کوش بیگواھیں مردمانی کھول ءِ ھاتر ءَ بلاھیں وئیلے ءَ چہ کمتر نہ انت –

آئی ءَ گوشتگ کہ بیگواھیں مردمانی دروگیں میڑ ءَ کوش ءِ درگت ءَ پاٹی ءَ گوں سرکار ءَ ھال کتگ ءُ وفاقی وزیر ڈخلہ رانا سناء اللہ ھم گوشتگ کہ زیارت ءِ وئیل ءِ درگت ءَ جوڈیشل کمیشن ءِ اڈ بہ دنت تانکہ راستی راج ءِ دیم ءَ بہ ایت –

شال: بلوچ راجی زْرمبشت (بی این ایم) ءِ جارکش ءَ وتی درشان ءَ زیارت ءِ دروگیں میڑ ءِ بگیری ءَ پرایمنیں زھرشانی کنوکانی سر ءَ پولیس بیڑ ءُ آیانی سر ءَ ارس ریچیں گیس شانگ ءِ کارپد ایر جتگ ءُ گْوشتگ کہ پاکستانی ریاست ءِ درسیں تْرامگیج بلوچ ءِ چکچینی ءِ برابریں بائیوار اَنت ءُ اے تْرامگیجانی ھمک کار ءُ کرد بلوچ ءِ بگیری ءَ آیانی کست ءُ کینگ ءِ درشان اِنت۔

آئی ءَ گْوشتگ پاکستان ءِ لشکر سیاسی کارکن ءُ آ دگہ مردماں زورانسری بیگواھی ءِ نشانگ کن اَنت۔ پاکستان درسیں میان استمانی راھبندانی بگیری کنگ ءَ اِنت۔ ریاستی ادارہ بلوچاں ماں زندانان آزار دیگ، آیانی ژانگولیں کنٹانی چگل دیگ ءُ آیاں یک گور کنگ ءِ کاراں گون اَنت۔

جارکش ءَ دیمتر ءَ گْوشتگ وھدے ماں بلوچستان ءَ پاکستانی لشکر ءِ چیردستی ءَ نام ءِ ناشرکاری ءِ گر ءُ دار کنوکیں تْرامگیج پُرکارینگ بوت گڑا دروگیں میڑانی دراجیں دْرچے بنا بوت کہ داں مروچی برجاہ اِنت۔اے درسیں دروگیں میڑانی تہ ءَ جنگ بیتگیں مردم چہ پیسر ءَ پاکستانی لشکر ءُ گوں آئی ءَ ھمگرنچیں تْرامگیجانی بندیگ ءُ زورانسری بیگواہ اَت اَنت۔ زیارت ءَ دروگیں میڑ ءَ کشگ بیتگیں گیشتریں مردمانی پجار زورانسری بیگواھیں مردمانی بستار ءَ بیتگ۔ وھدے اے ویل ءِ بگیری ءَ سیاسی گلاں زھرشانی کرتگ گڑا پولیس ءَ آ لٹ داتگ ءُ آیانی سر ءَ ارس ریچیں گیس شانتگ ، اے پہ پاکستان ءِ ناشرکاریں چھرگ ءِ پدر کنگ ءَ بس اِنت۔

جارکش ءَ وتی درشان ءِ گڈی ءَ گْوشتگ کہ زوراکی ءِ بگیری ءَ بلوچ راج ءِ کست ءُ چہ اے کست ءَ رودم زیروکیں سیاسی گھگیری نوک آبادی تْرام ءِ آسرینگ ءِ پارست بیت۔

زیارت ءِ وئیل ءِ ھلاپ ءَ شال ءَ زھرشانی ءَ پد کیچ ءُ دگہ جاھاں یکشل ءَ زھرشانی درچ برجاہ اَنت-

مروچی بلوچ یکجتھی کمیٹی ءِ دزبندی ءَ بلوچستان ءِ دمگ کیچ ءِ بنجاھی شھر تربت ءَ اتاشاد ڈگری کالج ءَ بندات بیتگیں روانک شھر ءِ جتا جتائیں جاھاں تران بیتگ ءُ شھید پدا چوک ءَ مُچی ءِ دروشم ءَ مُچ بیتگ-

زھرشانی ءَ زھگ ءُ زالبول ءُ مریدین ھوار بیتگ اَنت، زھرشانی کنوکانی دستاں بینر ءُ اکس جتگیں مردمانی اکس ءُ پلے کارڈ دستاں بیتگ اَنت کہ آیانی سر ءَ زیارت ءَ دروگیںں میڑ ءُ بلوچ نسل کُشی ءُ دگہ دگہ نبشتگ بیتگ اَنت-

زھرشانی ءَ بلوچی زبان ءِ نبشتہ کار ءُ انسانی ھکانی کیچ ءِ رھشون گنی پروزار ءُ بیگواھیں مردمانی کھول ھوار بیتگ اَنت-

گنی پرواز ءَ تران کنان ءَ گوشتگ کہ زیارت ءِ وئیل ءِ وڑیں پیسر ءَ ھم پیش اتکگ اَنت ما پیسر ھم اشانی ھلاپ ءَ وتی درانگاز کتگ ءُ مروچی نی اے وئیلانی تہ ءَ گیشی اتکگ –

گنی پرواز ءَ گُشت کہ ریاست ھما وھد ءَ نیزوریں مردمانی جنگ ءَ بندات کنت گڑا اد ءَ چہ زانگ بیت اِنت آ نیزوری ءِ دیمپان اِنت-

گنی پرواز ءَ گُشت:پاکستان ءِ مستریں ادارہ پوج بیتگ ما گشتگ پوج چوشین کار نہ کنت بلے اے کار پوج ءَ کتگ ءُ اد ءَ چہ زانگ بیت پوج ءَ دیم ءَ میڑوکیں مردمانی گون ءَ میڑگ ءِ تاکت ھلاس بوتگ پمیشکا بندیگیں مردماں جنگ ءُ چگل دیگ اِنت-

گنی پرواز ءَ گُشت اے مردم تئی جیل ءُ بندیگ جاھاں بند بیتگ اَنت تو باید آ چوش مہ جتیں چگل مہ داتیناں پرچا کہ اشانی درستانی ڈس ءُ نشان پدر بیتگ اَنت آیانی کیس ءُ وغیرہ ھلگ ءَ بیتگ اَنت بلے تو یک ھنچیں کارے کتگ کہ مردمانی اوپار تو پروشتگ ءُ وت ءَ تاوان داتگ-

زھرشانی ءَ دگہ مردماں ھم تران کتگ ءُ آیاں وئیل اہر جتگ ءُ سرکار ءُ دگہ ادارہ ایمن بیوکیں مردمانی کُشگ ءُ ریچگ ءِ بند کنگ ءِ لوٹ کتگ –

بلوچانی بلوچستان

شائر: سلیم ناز

دی بلوچستان پوسٹ

بلوچانی دل ءِ آرمان
بلوچستان بلوچستان
منی پهر ءُ منی تو شان
بلوچستان بلوچستان

اجب ڈولداراں تئی زیداں
اے دریا جانشوں گوں میداں
منی ستک منی ایمان
بلوچستان بلوچستان

بدانی چم پہ تو سّکاں
تئی هکاں چہ پیم رکاں
کناں کرباں پہ تو من جان
بلوچستان بلوچستان

هدا ءِ داتگیں گنجے
چو روچ ءَ روشنیں سنجے
من ءَ نیلاں تئی اومان
بلوچستان بلوچستان

منی زگر ءُ اِتات تو
منی دین ءُ اِبادت تو
همک زردانی تو درمان
بلوچستان بلوچستان

تئی کوهانی سیل وش اِنت
اجب موسم نوں دلکش اِنت
تهار ماهیں شپ ءِ مهکان
بلوچستان بلوچستان

هدا آجو بہ کن ڈیھ ءَ
یزدی گار بہ بیہ ءَ
کتگ ملک ءَ بداں تاوان
بلوچستان بلوچستان

سر ءَ بستگ کپن ناز ءَ
وتی پہ هک ءِ شوهاز ءَ
کُتگ توکل وتی بولان
بلوچستان بلوچستان

بلوچستان ءَ مردمانی زورانسری آوار جنیانی درچ یکشل ءَ برجاہ اَنت –

سر بیتگیں ھالانی رد ءَ بلوچستان ءِ دمگ ھاران ءَ یک ورنایے پاکستانی پوج ءِ دست ءَ آوار جنگ ءَ پد بیگواہ کنگ بیتگ –

گیشیں ھالانی رد ءَ بیست جولائی ءِ روچ ءِ ساھت دوازدہ ءَ ھاران پرپیٹ ءِ جھمنندیں ورنا خلیل اھمد ء رحم اللہ ھاران ءِ دمگ کلان ءَ وتی دکان ءَ سی ٹی ڈی ءُ چیریں ادارھاں آوار جتگ ءُ برتگ کہ چریشی ءَ پد آئی ءِ ھچ ھال نیست اِنت-

زانگ بہ بیت ھاران ءَ اے لھتے روچانی تہ ءَ سیمی مردم اِنت کہ پوج ءَ آوار جتگ ءُ برتگ کہ چریشی ءَ پیسر ھژدہ جولائی ءَ اسلم ء ھاجی مھمد ابراھیم مینگل ءُ نوزدہ جولائی ءَ غلام جیلانی ء مھمد امین آوار جنگ بیتگ اِت اَنت-

دومی نیمگ ءَ غلام جیلانی ءِ آوار جنی ءِ ھلاپ ءَ آئی ءِ کھول شال ءَ برجمیں زھرشانی نندانک ءَ نشتگ ءُ غلام جیلانی یل کنگ ءِ لوٹ ءَ کنگ ءَ اَنت-

بلوچستان ءِ دمگ کیچ ءِ ھند مند ءَ پاکستانی پوج ءَ یک آروسے ءِ سر ءَ بیڑبرتگ ءُ زوراکی کتگ-

سربوتگیں ھالانی رِد ءَ گوستگیں شپ ءَ مند ءِ دمگ گیاب یک آروسے ءِ سر ءَ بیڑبرتگ ءُ آروس سر ءَ ساڑی ئیں سالونک فیروز ء عبدالواھد آوار جنگ ءِ جُھد کتگ بلے اود ءَ ساڑی ئیں مردماں گھگیری کتگ ءُ سالونک آوار جنگ ءَ نہ اِشتگ ءُ پاکستانی لشکر ءَ سالونک ءِ پت ءَ ھوار بازیں مردمے آوار جتگ ءُ گوں وت برتگ اَنت ءُ لٹ ءُ کُٹ کتگ اَنت مرچی یل کتگ اَنت-

اِھوالکارانی رِد ءَ پاکستانی پوج آروس سر ءَ ھمے ھاتر ءَ بیڑبرتگ ءُ کہ سالونک جُل پُشت ءَ بلوچستان ءِ بیرک جنگ بوتگ ءُ آشوبی سوت پر کنگ بوتگ-

زانگ بہ بیت اشی ءَ ساری ھم پاکستانی پوج ءَ چُشیں چیزانی سر ءَ مھلوک سر ءَ زوراکی کتگ ءُ آوار جتگ اَنت-

سند ءِ سرکار ءُ بیگواھیں مردمانی کھول ءِ میان ءَ دومی رند ءَ گند ءُ نند بوتگ – سند ءِ سرکار ءَ چہ بیگواھیں مردمانی کھول ءُ بلوچ یکجھتی کمیٹی ءَ گوں دزبندی کُتگ ءُ گوشتگ زھرشانی ءَ گیش مہ کن انت ءُ کراچی ءَ بیگواہ کنگ بوتگیں مردمانی ھاتر ءَ سن سرکار ءَ وھد لوٹیت ءُ سند ءِ سر وزیر سید مراد علی شاہ کراچی ءَ زورانسری آوارجنگ بوتگیں مردمانی ھاتر ءَ وت زاتی اے جیڑہ گیشگیوار کنگے جھد ءَ ھم کنگ ءَ انت –

اے درگت ءَ بلوچ یکجھتی کمیٹی ءِ آرگنائزر آمنہ بلوچ ءَ زھرشانی ءِ گیش کنگ سند ءِ سرکاری املی گامگیج ءَ گوں بندوک کتگ ءُ گوشتگ کہ کراچی ءَ زورانسری آوار جنگ بوتگیں مردم یل کنگ بہ بنت –

مروچی آدینگ ءِ روچ ءَ بلوچ یکجھتی کمیٹی کراچی ءِ آرگنائزر آمنہ بلوچ ءِ رھشونی ءَ بیگواھیں مردمانی کھولاں میر شبیر بجارانی ءِ کارگس سند سیکریٹریٹ ءَ گوں آئی ءَ گند ءُ نند کُتگ – گند ءُ نند ءَ چہ کراچی ءَ زورانسری آوار جنگ بوتگیں مردمانی درگت ءَ آھاں وتی ھیال درشان اتگ انت ءُ بیگواھیں مردمانی یل کنگے ھاتر ءَ سند ءِ سرکار ءَ آھانی درسیں گپ من اِتگ انت –

ھمے وھد ءَ میر شبیر بجارانی ءَ اتکگیں مردمانی میان ءَ گوشتگ کہ مناں سند ءِ سر وزیر سید مراد علی شاہ ءَ گوشتگ کہ آ کراچی ءَ زورانسری آوار جنگ بوتگیں مردمانی یل کنگے درگت ءَ املی گامگیج زوریت –

آئی ءَ سند اسمبلی ءَ ڈن بلوچ زالبولانی سر ءَ بوتگیں پولیس ءِ زوراکی ایرجتگ ءُ گوشتگ پولیس کارمندانی بگیری ءَ کار کنگ بیت –

ھمے وھد ءَ بلوچ یکجھتی کمیٹی کراچی ءِ آرگنائزر آمنہ بلوچ ءَ سند ءِ وزیر میر شبیر بجارانی ءَ کراچی ءَ آوار جنگ بوتگیں بیگواھیں مردمانی لڑ داتگ ءُ زوتاں زوت آھانی یل کنگے لوٹ کتگ –

آمنہ بلوچ ءَ میر شبیر بجارانی ءِ بیگواھیں مردمانی یل کنگے گپاں گوں اتپاک کتگ چیزے وھداں تاں زھرشانی ھلاس کنگے پیسلہ کتگ ءُ گوشتگ کہ آھاں زھرشانی کنگے شوک نھیں اگاں جیڑہ پہ گپ ءُ باوست ءَ گیشگیوار کنگ بنت گڈا آ اے گامگیج ءَ وش اتک کن انت –

ھمے وھد ءَ سند ءِ وزیر میر شبیر بجارانی ءَ آمنہ بلوچ باور کنائینتگ کہ آ بیگواھیں مردمانی یل کنائینگے ھاتر ءَ سند ءِ سر وزیر ءَ سرپد کنت ءُ آ یل کنگ بنت –

زانگ بہ بیت شش روچ ساری بلوچ یکجھتی کمیٹی ءِ آرگنائزر آمنہ ءَ بیگواھیں مردمانی کھول ءِ ھمراھی ءَ کراچی پریس کلب ءَ اھوالکاراں گوں تران کنان ءَ گوشتگ کہ اگاں سرکار ءَ یک ھپتگے ءِ تہ ءَ بیگواھیں مردم یل نہ کُتاں گڈا آ وتی زھرشانی ءِ تہ ءَ گیشی کار انت – اے جار ءَ پد سند ءِ سرکار ءَ بیگواھیں مردمانی گوم ءَ دومی رند ءَ گند ءُ نند کتگ –

گند ءُ نند ءِ میان ءَ آمنہ بلوچ ءَ گوشتگ کہ اے وھدی بازیں مردمے سی ٹی ڈی سند ءُ وفاقی ادارھانی بندیگ جاھاں بند انت ءُ آ بے کسور انت – آمنہ بلوچ ءَ گوشتگ کہ سند پولیس ءِ وفاقی ادارھانی کمک ءَ کنگ انت انسانی ھکانی لگتمالی ءَ آھانی دست مان انت –

آئی ءَ گوشتگ کہ چہ ماری پور ءِ دمگ دلفلاح آباد ءَ محمد عمران ء محمد حنیف آوار جنگ بوتگ ھمے وڈ نور بخش ء حبیب کراچی ءِ دمگ رئیس گوٹ ءَ آوار جنگ بوتگ لیاری ءِ دمگ میراں ناکہ ءَ شوکت بلوچ آوار جنگ بوتگ – وھدیکہ عبدالحمید زھری دہ اپریل سال دوھزار بیست ءُ یک ءَ کراچی ءِ دمگ گلستان جوہر ءَ بلاک سینزدہ ءَ شپ ءِ ادار سَے ءَ آوار جنگ بوتگ آئی ءَ گوشتگ کہ عبدالحمید لس پوشاک گوریں کارمنداں چہ جندے گس ءَ آوار جتگ – پنجگور ءِ جھمنند دوست محمد ء سالح محمد کراچی بالی پٹ ءَ آوار جنگ بوتگ – آ عمان آرمی ءِ پوجی کارمندے کہ وتی موکلانی گوازینگے وتی بنکی ھنکین ءَ آھگ ءَ بوتگ – عبدالحمید زھری ءُ دوست محمد ءُ دگہ بازیں مردمے بلوچستان ءَ سیادی دار انت – گندءُ نندی دیوان ءَ عبدالحمید زھری ءِ زھگ سعیدہ حمید ءُ دگہ بیگواھیں مردمانی کھول ھوار بوتگ انت –