TBP Balochi

بلوچ نیشنل مومنٹ ءَ جارکش ءَ وتی درشان ءَ گْوشتگ مارا گوں نائلہ کادری ءِ نام ءِ درانڈیھیں سرکار ءَ ھچ رنگیں سْیادی نیست ما اے ’ کلپیں سرکار‘ ءِ رد کن ایں۔چوناھائیں ھم درانڈیھیں سرکار ءِ جوڑ کنگ ءَ زْرمبشت ءِ تہ ءَ ھواریں درسیں گلانی ’ سوج ‘ ءُ آیانی ھم سنت بیگ ارزشت دار ایت۔ بی این ایم ءِ پجیگ ءَ ھچ مردم ءُ گل ءَ اے اگبال نیست کہ آ وتی جند ءِ بستار ءَ بلوچستان ءِ درانڈیھیں سرکار ءِ جوڑ کنگ ءِ جار ءَ بہ جنت ءُ پہ وت ’وتساچیں مزن وزیری‘ ءِ اگدہ ءَ گچین بہ کنت۔پمیشکا المی اِنت کہ ما بلوچ راج ءُ جھان ءَ اے گپ ءَ بہ گْوش ایں کہ اے نام ءِ سرکار ءُ ایشی ءِ نام ءِ سروزیر ءَ بی این ایم ءِ باور گون نہ اِنت۔

آئی ءَ گْوشتگ بی این ایم ءِ اے دیریگیں دیدانک اِنت کہ بلوچستان ءَ گوں زْرمبشت ءَ ھمگرنچیں ادارہ بلوچ زْرمبشت ءِ راستیں پشتپد اَنت ءُ درسیں راجی تک ءِ شور گوں یک دومی ءِ جست ءُ باوست ءَ ءُ درسانی منگ پد بہ بہ اَنت۔بلوچ آجوئیں دوستیں جنگی ءُ پرایمنیں گلانی لوٹاں ابید بلوچ زْرمبشت ءُ بلوچستان ءِ باندات ءِ بارہ ءَ بیوکیں شور ءِ بلوچ راج ءِ تہ ءَ ھچ رنگیں بستار نہ بیت انچوش کہ ھمے نام گیپتیں نام ءِ درانڈیھیں سرکار ئیگ اِنت۔ اے جاوراں اے ’ نام ءِ سرکار ‘ ءِ ھچ رنگیں راھبند، سیاسی ءُ راجمستری بستار نیست۔

بی این ایم ءِ جارکش ءَ گْوشتگ کہ مئے گل ءِ مسام ءُ مئے مدامگیں شونداتانی اے بھر اِنت کہ ما درسیں آجوئی دوستیں واکانی ھمراھی ءَ جنز ایں پمیشکا مئے گوں درسیں سیاسی گلانی راھشوناں نزیکیں رھوت ھست اَنت اگاں دیمتر ءَ مارگ بوت اے رنگیں سرکارے ٹاھینگ لوٹ ایت ءُ درساں اے گپ من اِت گڑا آ ’شور‘ یک مردمے نہ بیت ، یک گلے ءِ نہ بلکیں درسانی ھم سنتیں شورے بیت۔آئی ءِ جار ھم چہ ھواریں پترے ءَ جنگ بیت۔

درشان ءِ گڈ سر ءَ جارکش ءَ گْوشتگ ما وتی درسیں ھمساھگیں ڈیھ ءُ دوزواھیں گلاں ھم ھمے دزبندی کن ایں کہ آ اگاں بلوچ راج ءِ کمک کنگ لوٹ اَنت گڑا وتی مڈی ءُ وتی توان ءَ ’ مردمانی‘ سر ءَ ھرچ مہ کن اَنت بلکیں ادارھاں ارزشت بہ دے اَنت ءُ امیت اِنت کہ دنیا ’کلپیں مردمانی‘ جاہ ءَ گوں بلوچ راج ءِ راستیں سیاسی جھگیراں وتی سْیادیاں ٹاھین اَنت۔

ھزارہ رھشون طاہر خان ہزارہ بیران بیتگ، طاہر خان ہزارہ ءِ بیرانی دل ءِ دورہ ءِ سبب ءَ پیش اتکگ –

جلیلہ حیدر ءِ رد ءَ مروچی سھب ءَ آئی ءَ دل ءِ دورہ ءَ گپتگ چریشی ءَ پس آ سنڈیمن پد ءَ سٹی ھسپتال ءَ برتگ اود ءَ ڈاکٹرانی ناجاڑیگی ءِ سبب ءَ بیران بیتگ-

زانگ بہ بیت طاہت ہزارہ بلوچستان ءَ بیگواھیں مردمانی ءُ انسانی ھکانی لگتمالیانی سر ءَ توار چست کنوکیں مردمانی تہ ءَ یک مھکمیں توارے بیتگ-

آئی ءَ باز رند ءَ بلوچستان ءُ انسانی ھکانی سر ءَ توار چست کنگ ءِ پژدر ءَ جیل ءُ ایف آئی آرانی دیمپانی کنگ کپتگ بلے آ داں گُڈی وھد ءَ بلوچستان ءِ سر ءَ بیوکیں زلمانی سر ءَ توار چست کنگ ءَ بیتگ-

دی بلوچستان پتر ھال ءَ سر بیتگیں ھالانی رد ءَ بلوچستان ءِ باپاری شھر ھب چوکی ءَ ناشناسیں مردماں یک لوگے ءَ دور کرتگ ءُ اود ءَ لوگ ءَ سھر ءُ زر دز اتگ ءُ گوں وت برتگ اَنت-

دومی نیمگ ءَ چاگردی رسانکجاھاں رھیم بالاچ نامیں مردمے ءَ یک تامر بندے شنگ کتگ ءَ گشتگ کہ منی لوگ ءَ بزاں ھب چوکی ءَ ناشناسیں دُزاں دور کرتگ ءُ اود ءَ لوگ ءَ جاڑیگیں زر ءُ مال دز اتگ ءُ برتگ اَنت-

رھیم بکش بالاچ ءَ گُشتگ کہ منی لوگ ءَ شست سھر، شش لک ءُ ھپتاد ءُ دو ھزار کلدار ایر بیتگ اَنت برتگ انت اش –

رھیم بکش ءَ گشتگ کہ من یک مزوریں مردمے ءَ پوریاگری کتگ ءُ شوھاز کتگ اَنت بلے دُزاں وتی ھرجان جتگ اَنت رھیم بکش ءَ سرکار ءَ چہ لوٹ کتگ ءُ گشتگ منی مالان پد بہ جنت ءُ بہ دنت-

دومی لس ھالانی رد ءَ رھیم بکش ءِ لوگ ءَ دور کنوکیں مردمانی پشت ءُ پناھی سرکار ءَ اِنت ءُ آیاں لس نام ءَ سیاسی مردم ڈیتھ اسکواڈ ءِ نام ءَ گوش اَنت-

بلوچستان ءِ سیاسی مردمانی گوشگ اِنت کہ ڈیتھ اسکواڈ سرکاری چیریں ادارھانی چیردستی ءَ جوڑ بیتگ ءُ چریشی ءَ آئی ءَ سرجمیں واک دیگ بیتگ ءُ آ بلوچستان ءَ سیاسی ءُ لس مھلوک ءِ کُشت ءُ کوش ءُ دُزی ءُ دگہ چاگردی سلکاریاں دزمان اِنت-

گوستگیں سئے روچاں چہ بیگواھیں مردمانی کھولانی گورنر ھاؤس ءِ دیما زھرشانی ننداک برجاہ اِنت، ھما وھدءَ دومی نیمگ ءَ لشکریانی دستءَ زورانسری بیگواھیانی یکشلی ھم برجاہ اِنت، گوستگیں لھتیں روچانی نیام ءَ لشکریاں بلوچستان ءِ جتاھیں دمگاں چہ نیم درژن ءَ گیش مردم دزگیر کنگ ءَ پد بیگواہ کُتگ اَنت۔

نوکتریں ھالانی ردءَ پاکستانی لشکریاں ڈیرہ مراد جمالی ءَ چہ دگہ دو مردم دزگیر کنگ ءَ بیگواہ کُتگ اَنت، بیگواہ بیتگیں مردمانی پجار اکبر ء نواب خان ءُ جیسف ء نواب خان ءِ ناماں چہ بیتگ۔

یات بہ بیت کہ گوستگیں لھتیں روچاں چہ زورانسری بیگواھی ءِ وئیلانی تہءَ تیزی گندگ ءَ پیداک اِنت، گوستگیں روچاں خاران پرپیٹ ءِ جھمنند خلیل اھمد چہ کلان ءَ وتی دکان ءِ دیما چہ سی ٹی ڈی ءُ چیریں گلانی کارمنداں آوار جتگ ءُ بیگواہ کُتگ۔ چہ اِشی ءَ پیسر مھمد اسلم ء حاجی ابراھیم مینگل 18 جولائی ءُ غلام جیلانی ء مھمد امین 19 جولائی ءَ سی ٹی ڈی ءُ چیریں گلاں بیگواہ کُتگ اِت اَنت۔

گوستگیں روچاں بلوچستان ءِ دمگ کیچ ءِ ھنکین تمپ ءَ پاکستانی لشکریاں دو ورناہ سدیر ء رحیم بخش ءُ نوید ء حمید دزگیر کُتگ ءُ گوں وت بُرتگ اَنت۔ وھدیکہ گوستگیں روچاں بجار خان مری جھمنند کلی کمالو نامی مردمے لشکریاں چہ شال مری آباد ءَ دزگیر کنگ ءَ پد بیگواہ کُتگ۔

چہ مستونگ ءَ گوستگیں روچاں لشکریاں عطااللہ شاہوانی ءُ عبیداللہ شاہوانی ءُ آھانی سیاد مجیب الرحمن شاہوانی ءُ عبدالخالق شاہوانی لوگ ءَ بیڑ برگ ءَ پد دزگیر کُتگ اَنت بلے آ پدءَ یل دیگ بیتگ اَنت۔

زانگ بہ بیت گوستگیں روچاں زیارت ءَ لشکریاں بیڑ ءِ نیام ءَ پیسر ءَ چہ دزگیر کُتگیں بیگواھیں مردم دروگیں میڑے ءِ تہءَ کُشتگ اَنت کہ اِشی ھلاپ ءَ وائس فار بلوچ مسنگ پرسنز، نیشنل ڈیموکریٹک پارٹی، بلوچ یکجہتی کمیٹی ءِ سروکی ءَ بیگواھیں مردمانی کھول گوستگیں سئے روچاں چہ بلوچستان گورنر ھاؤس ءِ دیما زھرشانی ننداک ءَ نشتگ اَنت۔

نبشتانک: سیاست چے یے؟

نبشتہ کار: ابدلستار بُگٹی

دی بلوچستان پوسٹ

وھدے کہ 2004 ءَ من دوازدہ پاس کُت گُڑا من بلوچستان یونیورسٹی ءِ پولیٹیکل سائنس ءِ ڈیپارٹمنٹ ءَ اڈمیشن زُرت، یک ماھے ءَ لھتیں کلاس ءَ بھر زُرت ءُ انڈیائی کتابے ءِ پولٹیکل سائنس ءِ درونت ونتگ ءُ پد ءَ سرپد بیتگ آں کہ اے پولٹیکل سائنس من ءَ پاکستان ءِ تہ ءَ ھچ وڑیں پائدگے نہ دنت گُڑا من شال ءَ بیوٹمز یونیورسٹی ءَ ٹیل ءُ گیس ءِ انجینئرنگ ڈیپارٹمنٹ ءَ باسکی زُرت ءُ پیٹرولیم انجینئرنگ کُت۔ البت ھمے لھتیں ماہ ءَ پولیٹکل سائنس ءِ وانگ ءُ پد ءَ بلوچ نودربری گل( بی ایس او) ءِ تہ ءَ بوگ ءَ کمیں سرپد بیتگ آں کہ پولیٹکس چے ءَ گْوش اَنت۔ گِند ئے پولیٹکس یک لاتینی لبزے کہ مانا ئِے شھر ءِ جُنزینگ ئیگ اِنت۔ بزاں یک شھرے تو انچیں دابے ءَ پھریز ءُ ھزمت کن ئے کہ مھلوک ءَ شھر ءَ آپ، لائین(بجلی)، نادْراھجاہ ءُ وانگجاھاں ھوار ھر وڑیں آسراتی بہ رس ایت۔ پد ءَ ھمے کار چہ شھر ءَ در کپت ءُ مُلک ءِ ھزمت کنگ ءِ نام بیتگ۔ دُنیا ءِ مزنیں یونیورسٹیاں الیکٹریکل، مکینیکل، سیول انجینئرنگ، پیٹرولیم انجینئرنگ، کیمیکل انجینئرنگ، آئی ٹی، ایکونومکس ءُ ایم بی بی ایس ءِ وڑ ءَ پولیٹکل سائنس ءِ ڈیپارٹمنٹ ھم بنت کہ چہ اود ءَ دُنیا ءِ بلاھیں رھشُون ودی بنت۔

دُنیا ءِ ھر زُبان ءَ پولیٹکس ءَ وتی زگریں نامے بیت انچوشکہ نیپال، بنگالی ءُ ھندی ءَ راجنیتی، اربی، پارسی، پشتو، ترکمانی ءُ کُردی ءَ سیاست یا سیاسیہ ءُ بلوچی ءَ مُلکاری ءُ راجکاری ھم گْوشگ بیت۔ بزاں راجکاری تھنا راج ءُ مُلک ءِ ھزمت ءِ نام اِنت انچوش کہ ڈاکٹری، انجینئرنگ، ناھُدائی(Air Pilots)، لشکری(Military)، کارجاھی(industy)، بینکنگ ءُ زرکاری(Economy) ءِ وڑ ءَ راجکاری ھم زِند ءِ پھناتے (یک پروپشنل پیلڈے)، بلکیں یک پاک ءُ نیکیں کارے کہ آئی ءِ بُنکی مول ءُ مُراد پہ وتی راج ءُ مُلک ءِ ھزمت کنگ ئیگ انت۔ پہ بنی آدم ءَ سُکھ ءُ آسودگی ودی کنگی اَنت۔ دُنیا ءِ ھر مُلک ءَ راجکاری پاٹی بنت کہ ھر باسکے وتی پاٹی ءِ سسّا(Ideology) ءِ سر ءَ مُھکمی ءَ اوشت ایت۔ یک راجکارے ءَ وتی مُلک ءُ راج ءِ ھر مُشکلانی آسان ءُ جیڑھانی توجیلّ دیگ بودی ھم المی اِنت۔ گِرانبھائی ءِ سر ءَ کار، جنگ ءُ زرکاری ءِ بدھالی ءَ شریں سوڑگ(فیصلہ) زِیرگ ءُ راج ءُ مُلک چہ ھر وڑیں تباھی ءَ پھریزگی اَنت۔

گِند ئے راستیں درنگازی ءَ راجکاری مُلکاں چہ گُلامی ءَ آجوئی دنت ءُ آزاتیں راجاں دیمروئی دنت پمیشکا واجہ ولادیمر لینن ھم یک راجکارے اَت کہ 1918 ءَ روسی راج چہ زار باشاہ ءِ گُلامی ءَ آجو ئِے کنائینتگ، جوسپ اسٹالین ھم یک راجکارے اَت کہ وتی راج ءَ بے کساس دیمروئی ئِے دات ءُ جرمنی ءَ پْروش ئِے دیائینت۔ چی گویرا ءُ سُباش چندر بوس ھم راجکار اَت اَنت، گاندھی ءُ نھرو ھم راجکار ات اَنت۔ واجہ ابدلکلام آزات ھم ھندوستان ءِ راجکارے اَت کہ آئی ءَ ھمدوستان ءِ ایجوکیشن ءَ بلاھیں آشوبے داتگ، بانُک اِندرا گاندھی ھم یک راجکارے اَت، واجہ مَن موھن سنگھ ھم راجکارے کہ آئی ءَ ھندوستان ءِ زرکاری(Economy) ءَ بلاھیں دیمروئی داتگ، مرچیگیں روسی مھتر واجہ وِلادیمر پوٹن ھم راجکارے کہ چہ 1992 ءَ سوت یونین ءِ بھر ءُ بھانگ پد روس یک سُپر پاورے جوڑ کُت ئِے۔ واجہ نیلسن منڈیلہ ھم یک راجکارے اَت۔ مھتر یوسپ الیہ سلام ھم راجکارے ءَ اَت کہ مِسر چہ ڈُکّالی ءَ پھریز ات ئِے۔ مھتر مھمد ءُ مھتر اَلی ھم راجکار اِت اَنت۔

توری آسٹریلیا، نیوزی لینڈ، پِنلینڈ، سیوزرلینڈ، انگلینڈ، ملائیشا ءُ انڈونیشا بہ بیت یا توری جرمنی، روس، پرانس، امریکہ، جاپان، کوریا، چین، انڈیا ءُ بنگلادیش بہ بیت دُنیا ءِ ھر مُلک ءَ راجکار ھست اَنت ءُ چہ راجکاری ءَ رھشُون ودی بنت۔ ھمے رھشُون ءُ راجکارانی جُھد مُدام ھمے بیت کہ ما وتی مُلک ءُ راج ءِ ھزمت ءَ کن ایں، پہ مُلک ءِ سیت ءُ پائدگ ءَ پدکِنِزگی نہ اِنت بلکیں پہ کُربانی ءَ ساڑی بوگی انت۔ راجکاراں اوپار ءُ مِچورٹی سک باز بیت۔ دُنیا ءِ مُلکاراں دْروگ، دْروہ(دھوکہ) ءُ سِلکاری(کرپشن) یک سْیاسی وتکُشّی یے بیت۔ اگاں ما مرچیگیں زمانگ ءِ مُلکاراں گِند ایں گُڑا مارا چہ اِنڈیا ءَ واجہ نتیش کُمار، ھُدامُرزی اٹل بھیاری واجپائی، اروند کیجروال، بانُک میاوتی، یوگی ادھتیانات ءُ شری نرندر مودی ءِ وڑیں مُلکارانی بارو ءَ وانگ لوٹ ایت کہ اے چون بزگیں مردم اِت اَنت، چہ ایشاں بازیناں سوُر نہ کُتگ ءُ لھتیناں زھگ ودی نہ کُتگ بلکیں شپ داں روچ وتی پاٹی ءِ مُھکمی ءُ راج ءُ ملک ءِ ھزمت ءَ زِند اش گْوازینتگ۔ بنگلادیش ءِ مھتر بانُک شیک ھسینہ ھم یک مُلکارے کہ آئی ءَ وتی راج ءِ تہ ءَ نیکراھی سیاست ءُ پوج ءِ زورانسری ءَ لگام ئِے داتگ چریشی ءَ مرچی بنگلادیش ءِ جی ڈی پی پر کپیٹا 2400 ڈالر انت ءُ مُلک ءِ ڈنی مڈی(Forein Reseves) 60 بلین ڈالر اَنت۔

نی ما پاکستانی سیاست ءِ سر ءَ لھتیں ٹوک کن ایں کہ پاکستانی سْیاسداناں ناں چہ یونیورسٹیاں پولیٹکل سائنس ونتگ ءُ ناں کہ اکنومکس ءِ زانتے ھست انت اش۔ بلکیں پاکستانی سْیاسدان دْراہ سندھ ءِ وڈیرہ، لینڈلارڈ، پنجاب ءِ چوھدری، انڈسٹرالسٹ، پشتونستان ءِ مناپکیں مُلا ءُ بلوچستان ءِ لھتیں کاسگ چٹ ءُ وتگڑیں دمگی سردار، میر ءُ نواب اَنت ناں کہ پاکستانی سْیاستدان دُنیا ءِ دگہ راجکارانی وڑ ءَ راجدوست ءُ مُلکار اَنت۔ دُنیا ءِ سیاست ھمے وڑ ءَ نہ اِنت کہ پاکستان ءَ چہ 1948 ءَ بیگ ءَ اِنت۔ چوناھا پاکستانی سْیاست ءَ پوج کنٹرول کنگ ءَ اِنت۔ پاکستانی سْیاست ءَ دْروگ، دْروہ، دوتل پُستی(مُناپِکت)، سِلکاری المی انت۔ اگاں پاکستانی سْیاسداناں مُلکاری ءِ بودی یے بوتیں پاکستان ءَ 1962 ءَ اپریشن جبرالٹر ءِ وڑیں جنگی رَدی نہ کُتگ اِت اَنت، 1971 ءَ پْروش ئِے مہ وارتیں، پد ءَ 1980 تاں 1989ءَ پہ لب ءُ لالچ ءَ ماں اوگانستان ءَ امریکہ ءُ سوت یونین ءِ جنگ باسکی ئِے مہ زُرتیں، 1998-99 ءَ کارگِل جنگ ءَ پْروش ئِے نہ وارتگ اَت۔ پد ءَ 2001 تاں 2020 ءَ پہ ڈالر ءِ لالچ ءَ وتی 80 ھزار مردم ئِے نہ کُشائینتگ اَت۔ ھمے پاکستانی سْیاسدانانی نابودی ءِ آسر ءَ پاکستان پشتون ءُ بلوچ ولایتاں چیرجنگ ءِ آماچ اِنت۔ واپاری زرداری، مُلا ڈیزل، چوباز شریپ، مُناپک ءُ بُزدل امران ھان ءُ بے گیرتیں شاہ مھمود کریشی ءِ وڑیں پاکستانی مُلکاراں پاکستانی سْیاست ءَ سِلکاری ءُ دْروگ البار کنائینتگ ءُ مرچاں پاکستان ءَ سْیاست ھیرامنڈی ءِ نام اِنت پمیشکا مرچی پاکستان 140 بلین ڈالر ءِ وامدار اِنت، مرچیگیں روچ ءَ ڈالر ءِ نھاد 232 اِنت ئِے ءُ ڈنی مڈی 9.3 بلین ڈالر اَنت۔

البت چہ ھمے 9.3 بلین ڈالر ءَ 6.2 بلین چینی وام ءُ 4.7 سھودی اَرب ئیگ اَنت بزاں جِند ءَ کلدارے ھم نیست اِنت ئِے، ھزانگ ئِے ھالیگ اِنت۔ گِند ئے پاکستان مرچاں سد در سد سری لنکا ءِ وڑ ءَ کنگلا اِنت۔ پاکستانی ایمّیچور لیڈرانی وڑ ءَ پاکستانی مھلوک ھم بے سسّا اَنت۔ آیانی تہ ءَ ھچ وڑیں راجدوستی ءِ سسّا نیست کہ سری لنکا، ترکمانستان، مِسر ءُ تُرکی مھلوک ءِ وڑ ءَ وت ءَ پہ آشوب ءَ تیار کن ایں۔ لھتیں پاکستانیانی ٹوکاں کسے اشکُن ایت گُڑا کَندگ کیت گْوش اَنت “زرداری پاکستانی سْیاست ءِ بے تاج بادشاہ اِنت” گُڑا بی بی سی گْوش ایت “پہ زرداری ءِ سْیاست ءِ پھمگ پی ایچ ڈی کنگ لوٹ ایت”

بزاں ایشانی ھیال ءَ زرداری سْیاست کنگ ءَ اِنت! بلکیں اگاں کسے ءَ راجمستری(Democracy) ءُ راجکاری ونتگ گُڑا آ وت سرپد بیت کہ اِے سْیاست نہ انت بلکیں اِے راجدروھی انت چی ءَ کہ ھمے وڑیں سْیاست ءَ ناں مُلکے راج ءَ پائدگے رس ایت ءُ ناں کہ مُلک ءَ دیمروئی کنت بلکیں گھتر بیرانی بیت انت۔ راج ءِ رَد دیگ، بزگیں مھلوک ءِ ھک جنّگ، سِلکاری کنگ، پندل سازگ، سسّا ءَ گوں زراں بھا کنگ، دْروگبند ءُ دْروہ کنگ ءِ نام پاکستانی سْیاست اِنت۔ ٹوک ءِ ھلاسی ءَ گْوش آں بے رھبندیں پاکستان مرچاں بے رھشُون اِنت ءُ پاکستان ءَ مرچی ھچ بودی نیست کہ پہ وتی بزگیں راج ءَ وڑیں بہ کنت۔

پاکستانی سْیاست ءَ دُنیا ءِ نیک ءُ پاکیں راجکاری ءُ مُلکاری ءِ بدنام کُتگ باید اِنت ما سْیاست ءِ جِند ءَ پھم ایں کہ سْیاست چے ءَ گْوش اَنت، ما وت ءَ چہ ھمے وڑیں سْیاست ءَ دِیر بدار ایں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنل مومنٹ ءَ وتی شنگ کتگیں درشان ءِ تہ ءَ گوشتگ 23 جولائی ءَ بلوچ راجی زْرمبشت (بی این ایم) جرمنی ءِ نیمگ ءَ بون شھر ءَ پاکستانی لشکر ءِ دست ءَ بلوچستان ءَ دروگیں میڑانی تہ ءَ زورانسری بیگواھیں مردمانی کوش ءِ ویلانی تہ ءَ گیشی ءِ بگیری ءَ زھرشانی کنگ بیتگ۔زھرشانی کنوکاں بلوچستان ءَ زورانسری بیگواھی ءُ زورانسری بیگواھیں مردمانی دروگیں میڑانی تہ ءَ دزگیری کوش ءِ بگیری ءَ اوگام جتگ۔

گوں زھرشانی کنوکاں گپ جنان بی این ایم جرمنی تک ءِ کمک کارگشاد ءَ گْوشتگ پاکستان ءَ 11 بے میاریں مردم دروگیں میڑاں کشتگ ءُ رند ءَ ٹاپار جتگ کہ اے بی ایل اے ءِ باسک بیتگ اَنت بلے راستی ایش اِنت کہ آ زورانسری بیگواھیں بلوچ بیتگ اَنت کہ چد ءُ پیش پاکستانی لشکر ءَ آوار جتگ ءُ وتی آزارجاھاں بند کرتگ اَت اَنت۔

آئی ءَ دیمتر ءَ گْوشتگ کہ جھان پاکستانی لشکر ءِ اے کارپداں جنگی میارے بہ زانت ءُ اے میان استمانی تْرامگیج ءُ ڈیھانی زمہ واری اِنت کہ بلوچستان ءَ اے سنگینیں میارانی سر ءَ پاکستان ءَ جست بہ کن اَنت۔

بی این ایم نیدرلینڈز تک ءِ کارگشاد امران ھکیم ءَ ھم زھرشانی ءَ بھر زرتگ، آئی ءَ گْوشتگ کہ پاکستانی لشکر بلوچستان ءَ بلوچاں چکچین کنگ ءَ اِنت۔آ بلوچ شپانک،نودربر،ڈاکٹر ءُ انجنیراں کشگ ءَ اِنت۔ مروچی ھما ڈیھ ءُ تْرامگیج کہ پاکستان ءَ گزرانکی کمک کنگ ءَ اَنت آ باید پاکستان ءِ بارہ ءَ وتی شونداتانی سر ءَ چار ءُ بچار بہ کن اَنت پرچا کہ پاکستان اے کمکاں بلوچستان ءَ بے میاریں مردمانی کوش ءَ کارمرد کنگ ءَ اِنت۔

بی این ایم ءِ باسک اھمد ءَ گْوشتگ بلوچ ابید ء آمیدگس ءِ پرماناں آوار جنگ بیگ ءَ اَنت ، آ در مردمی آزار دیگ بیگ ءَ اَنت ءُ زورانسری بیگواھیں مردم دروگیں میڑانی تہ ءَ کشگ بیگ ءُ آ ناشرکار لیکگ بیگ ءَ اَنت ، نی اے نوکیں ربیتے جوڑ بیتگ۔

بدل ، بی این ایم۔ این آر ڈبلیو بنزہ ءِ کارگشاد ءَ اے دم ءُ درگت ءَ گْوشتگ پاکستان ناشرکاریں ریاستے کہ بے میاریں مردماں دروگیں میڑاں کشگ ءَ اِنت ءُ چہ مردماں زھرشانی ءِ اگبال ءَ پچ گرگ ءَ اِنت۔

بی آر پی ءِ رسانکدری تْرامکار جلیل ءَ گوں زھرشانی کنوکاں گْوشتگ پاکستانی لشکر وتی چیریں واکانی دست ءَ پنچ یا چہ دس سال ءَ گیش زورانسری بیگواھیں مردماں کشگ ءَ اِنت۔اے میان استمانی تْرامگیجانی زمہ واری اِنت کہ پاکستان ءَ کمک مہ دئے اَنت ءُ یورپی سنت پاکستان ءِ جی پلس اسٹیٹس ءَ آسر بہ کنت۔

بلوچ نیشنل موومنٹ جرمنی ءِ باسک امجد ءَ گْوشتگ کہ جھان پاکستانی لشکر ءِ دست ءَ بلوچانی چکچینی ءِ نیمگ ءَ دلگوش بہ کنت۔

سادک ءَ گْوشتگ زورانسری بیگواھیں بلوچانی پاکستانی لشکر ءِ دست ءَ کشگ بلوچانی چکچینی ءِ دْرچ اِنت۔ اے میان استمانی ادارھانی زمہ واری اِنت کہ پاکستان ءَ کمک مہ دئے اَنت۔

شال ءَ زیارت وئیل ءِ بگیری ءَ زھرشانی کنوکاں سرکار ءَ لوٹانی منّگ ءِ ھاتر ءَ سَے شمبے ءِ کرار داتگ – درانگاز کنوکانی گوشگ ات کہ تاں سَے شمبے ءَ لوٹ منّگ نہ بوت اَنت گڑا سرجمیں بلوچستان ءَ زھرشانی ءِ درچ ءِ بندات بیت اِنت –

وائس فار بلوچ مسنگ پرسنز، نیشنل ڈیموکریٹک پاٹی، بلوچ یکجھتی کمیٹی ءِ چیردستی ءَ مروچی سَے روچ انت کہ بیگواھیں مردمانی کھول بلوچستان گورنر کارگس ءِ دیم ءَ زھرشانی ءَ نشتگ انت –

زھرشانی ءَ نشتگیں درنگاز کنوکاں اھوالکاراں گوں تران کنان ءَ گوشتگ کہ ھمے ماہ ءِ چاردہ ءُ پانزدہ جولائی ءِ میانی شپ ءَ پھازگی لشکر ءَ زیارت ءَ نُھ مردمانی دیم پہ دیمی میڑ ءَ جنگ ءِ ٹاہ داتگ وھدیکہ جنگ بوتگیں مردمانی جون سول نادراھجاہ ءَ آرگ بوتگ انت ءُ آھانی اکس شنگ کنگ بوتگ انت گڑا بیگواھیں مردمانی کھول سرپد بوتگ انت کہ اے لشکر کشی ءَ ھما مردمانی جون دست کپتگ انت کہ پیش ءَ ریاستی ادارھانی بندیگ بوتگ انت –

آھانی گوشگ ات کہ وھدیکہ بیگواھیں مردمانی کھولاں وتی دوستیگیں مردمانی شوھاز بندات کتگ گڑا اولسر ءَ پنچ مردمانی پجار بوتگ کہ آھانی تہ ءَ انجینئر ظہیر بلوچ، ڈاکٹر مختیار بلوچ، شھزاد بلوچ، شمس ساتکزئی ءُ سالم کریم ھوار بوتگ انت آھانی کھول ءِ مردماں وتی دوستیگیں مردمانی پجار کتگ ءُ آھانی زورانسری آوار جنی ءِ سبوت ھم دیما آؤرتگ انت آھانی تہ ءَ ظہیر ءُ شھزاد ءِ کھول ءَ بازیں ماہ بوتگ کہ شال پریس کلب ءِ دیم ءَ وتی دوستیگیں مردمانی یل کنائینگ ءِ ھاتر ءَ زھرشانی ءَ بوتگ انت –

زھرشانی کنوکانی گوشگ ات کہ وھدیکہ اشاں پد دگہ دو جمعہ خان مری ءُ شاہ بخش مری ءِ پجار بوتگ انت کہ زورانسری آوار جنگ ءُ بیگواہ کنگ بوتگ چہ ایشی ءَ اے گپ پدر بوتگ کہ زیارت ءَ ھما مردم دورگیں میڑ ءَ جنگ ءُ چگل دیگ بوتگ انت کہ پیش ءَ زورانسری آوار جنگ بوتگ انت – اے وئیل ءَ پد ھزاراں بیگواھیں مردمانی کھول ھمے ازیت ءِ تہ انت کہ آھانی دوستیگیں مردم ھمے وڑ شھید کنگ مہ بنت –

اھوالکاراں گوں تران کنان ءَ بیگواھیں مردمانی کھول ءِ گوشگ انت کہ اے وئیل وت اے گپ ءِ گواھی ءَ دنت کہ بیگواھین مردم پھازگی لشکر ءِ بندیگجاھاں بند انت ءُ آھانی زند ھترہ ءِ تہ ءَ انت-

زھرشانی کنوکانی گوشگ ات کہ اے اولی وئیل نہ انت اشی ءَ پیش ھم بلوچستان ءِ بازیں دمگاں دورگیں میڑ ءِ نام ءَ بیگواھیں مردم کُشگ بوتگ انت ھمے زوتاں بوتگیں اے درکانودی انسانیت کُشیں وئیل ءِ بگیری ءَ بلوچ سیاسی پاٹی ءُ بیگواھیں مردمانی کھولاں کہ زھرشانی ءُ ننداک جنگ ءِ پیسلہ کتگ گڑا اشی ءِ دارگ ءِ ھاتر ءَ پولیس ءِ نیمگ ءَ زوراکی کنگ بوتگ بلے اے زلم زوراکیاں ابید ھم اے نندانک سروزیر ءُ گورنر کارگس ءِ دیم ءَ برجاہ انت –

گورنر ہاؤس دیم ءَ نشتگیں درنگاز کنوکانی گوشگ انت کہ مئے سَے بنکی لوٹ انت کہ زیارت وئیل ءِ سر ءَ جوڈیشل کمیشن ءِ اڈ دیگ، درسیں بیگواھیں مردمانی یل کنگ ءُ بیگواھیں مردمانی کھولاں باور کنائینگ کہ دیمتر ءَ آھانی دوستیگیں مردم دروگیں میڑ ءِ نام ءَ جنگ نہ بنت – بلے بژنی گپ یے کہ بلوچ راج ءِ اے زوراکی ءِ بگیری ءَ انچو زھرشانیان پد ھم ھچ گامگیج زورگ بوگ ءَ نہ انت – آھاں وزیر داخلہ ضیا لانگو پریس کانفرنس ترندی ءَ گوں ایرجتگ کہ آئی ءَ بیگواھیں مردم ناشرکار گوشگ ءِ جھد کتگ –

آھانی گوشگ ات کہ بژنی گپ یے سَے روچ انت کہ گورنر کارگس ءِ دیم ءَ زھرشانی کنگ ءَ انت بلے سرکاری ھچ وڑیں ٹولی ءَ سنجیدگی ءَ گوں گند ءُ نند کنگ ءِ جھد نہ کُتگ – آھاں گوشتگ کہ ما چہ بلوچ راج ءَ لوٹ کنیں کہ اے زلم زوراکیانی بگیری ءَ سرجمیں بلوچستان ءَ زھرشانی بہ کن انت –

زھرشانی زیارت ءَ جنگ بوتگیں مردمانی کھول، بیگواھیں مردمانی کھول، وائس فار بلوچ مسنگ پرسنز، نیشنل ڈیموکریٹگ پاٹی، بی ایس او ءِ نیمگ ءَ کنگ بوگ ءَ انت وھدیکہ نندانک ءِ سروکی ءَ ماما قدیر بلوچ ءُ نصراللہ بلوچ کنگ ءَ انت –

زھرشانی کنوکانی گوشگ ات کہ ما سرکار ءَ سَے شمبے تاں وھد دے ایں اگاں آھاں نندانک ءِ ھکیں لوٹ نہ منّ اِتان گڑا سَے شمبے ءِ روچ ءَ چہ سرجمیں بلوچستان ءَ زھرشانیانی درچ ءِ بندات کنگ بیت ءُ جاورھانی ھرابی زمہ واری پھازگی ادارہ ءُ بلوچستان ءِ سرکار ءِ سر ءَ انت –