TBP Balochi

اے رندی ما یک المی ستکے کرتگ آیانی دروگیں تسلیانی سر ءَ نیائنت ءُ زھرشانی نندانک داں گڈی آسری ءَ برجاہ بیت اِنت اے گپانی درشانی وائس فار بلوچ مسنگ پرسنز ءِ رھشون سمی دین بلوچ ءَ چاگردی ترامجاہ ءَ کتگ اَنت-

زیارت وئیل ءِ ھلاپ ءَ شال ءَ نندانک پنچمی روچ ءَ سر بیتگ – ھورانی گورگ ءَ پد ھم بیگواھیں مردمانی کھولاں وتی زھرشانی برجاہ داشتگ زھرشانی ءِ اولی روچ ءَ زھرشانی کنوکاں پولیس ءِ آنسو گیس ءُ لٹ ءُ کُٹانی دیمپانی کنگ کپتگ ات-

زھرشانی نندانک ءَ جاڑیگیں سمی دین بلوچ ءَ وتی لیکہ درشان کنان ءَ گوشتگ نودربر گل، سیاسی پاٹی ءُ بیگواھیں مردمانی کھول شال ءَ ریڈ زون ءَ نندانک ءَ پنچمی روچ ءَ نشتگ اَنت بلے داں انگت ءَ سرکار ءِ نیمگ ءَ ھچ رنگیں مردم گپ ءُ تران ءَ نیتکگ اَنت-

آئی ءَ گُشتگ یک نیمگے ءَ دروگیں دیم پہ دیمی جنگ ءِ نام ءَ مئے لس بے گناھیں مردماں جن اَنت دومی نیمگ ءَ ما پُرایمنیں رنگے ءَ زھرشانی کن ایں وتی مردمانی یل کنگ ءِ لوٹ ءَ کن ایں گڑا مارا دروگیں تسلی دے اَنت یل کنگ ءِ زبان ءَ کن اَنت وتی کتگیں بازیں زباناں شموش اَنت-

سمی دین ءَ گُشتگ اَت بلے اے رندی یک المی رنگے ءَ ما شور کتگ آیانی دروگانی سر ءَ نیائنت زھرشانی نندانک ءَ داں گڈی آسری ءَ سرجم کن ایں –

شال ءُ بلوچستان ءِ دگہ جاھاں ھورانی گورگ ءِ درچ برجاہ اِنت ءُ جعفر آباد ءَ لوگے ءِ کود ءِ کپگ ءَ زالبول ءُ یک زھگے بیران بیتگ اَنت ءُ ھمے رنگ ءَ ڈیرہ مراد جمالی ءَ کرنٹ ءِ لگگ ءَ دو مردم بیران بیتگ اَنت-

بلوچستان ءُ کراچی ءِ سیمسری شھر ھب ءَ توپانی آپاں شال ءُ کراچی ءِ راہ ءَ یک پُھلے پرشتگ ءُ چریشی ءِ آسر ءَ شال ءُ کراچی ءِ راہ بند بیتگ، دگ ءِ ھردوکیں نیمگاں سدانی کچ ءَ مردم مھتل اَنت – شال ءَ پی ڈی ایم اے رد ءَ یک شمبے ءَ داں شال ءَ ھوار اُستان ءِ دگہ ھنداں بیرانیانی کچ یک سد ءُ دو ءَ سر بیتگ اَنت، بلوچستان ءَ سبک ءُ ترندیں ھورانی درچ چاردہ جولائی ءَ بندات بیتگ اَنت کہ وھد وھد ءَ برجاہ اَنت –

دومی نیمگ ءَ بارکھان ءَ ترندیں ھوراں توپانی کتگ، گوستگیں سَے روچاں وھد وھد ءِ سر ءَ بوتگیں ھوراں شھریانی واستا ساہگرے جوڑ بیتگ – ھورانی سبب ءَ بازیں لوگانی دیوال ءُ ھشتی لوگانی کپگ ءِ گمان اِنت کشارانی تہ ءَ آپ ءَ جل اتگ کرپاس ءُ مرچ ءُ دگہ کشاراں تاوان باری بیتگ –

گوستگیں بیست ءُ چار ساھتاں برجاھیں ھوراں ڈیمانی پُر بوگ ءَ کش ءُ گوری میتگ ترس ءِ آماچ اَنت ھمے وڑ کوہ سلیمان ءِ کوھی ھنداں لینڈ سلائیڈنگ مزن شھدگ بند کنگ بیتگ ءُ مساپراں جنجالانی دیمپانی اِنت-

مھکمہ موسمیات ءِ نیمگ ءَ مروچی ھورانی گوارگ ءِ گمان داتگ – مھکمہ موسمیات ءِ رد ءَ داں انگت ءَ بارکھان ءَ یک سد ءُ پنجاہ ملی میٹر ءَ گیش ھور بیتگ اے وھد ءَ شھر ءَ درستاں گیشتریں جنجال آپانی جلگ اِنت اود ءَ آپانی جلگ ءَ شھریاں ٹوھیں جنجالانی دیمپانی اِنت-

نبشتانک: ساہ ءَ سر گْوَستگیں جنگول

نبشتہ کار: بورتاچ بلوچ

شھید فاروق بلوچ ءِ شھادت ءِ ھشتُمی سالروچ

دی بلوچستان پوسٹ

آئی لیکہ اِنت کہ ۔۔۔!

ساہ ءَ سرگْوَستگیں جنگول ءَ را گوں مرگ ءَ مِھر اِنت؟ بلئے منی لیکہ اِنت کہ ۔۔۔! یک شرّیں جنگولے ءَ را گوں وتی زند ءَ سک مھر اِنت؟ مرچی اولی بر ءَ مئے تب چہ یکّے دومی ءَ جتاہ اِنت ۔۔۔ باریں پرچا؟

چیر جنگی ءِ تہ ءَ ساہ ءَ سرگوزگ ءُ وت ءَ را پہ راجی جُھد ءَ کُربان کنگ زند ءِ تہ ءَ چہ دُرسیں چکّاساں گرانتریں چکّاس اِنت۔ اے یک انچیں پیسلہ ئے کہ ایشی تہ ءَ ملکموت ءَ را ھرجاہ ءَ چو ساھِگ ءِ پیم ءَ ھمراہ کنگی اِنت بلئے یک شرّیں جنگولے مُدام وتی زند ءَ گیش ارزِشت دنت، زندگ بے کار کُت کن ئے، دیم ءَ جُنز اِت کن ئے دُشمن ءَ پُروش دات کن ئے، جون واریں آشوب ءِ جتائیں رھبند انت۔

آشوب ءِ زندگ دارگ ءَ ھون پکار اِنت پد ءَ ھون واریں آشوب وتی چُکّاں وت وارت ءُ پہ وتی زندگ دارگ ءَ آیانی منت ءَ گپت ءُ شھید ءِ نام ءَ نامین اِیت اِش ءُ ماتیں گلزمین ءِ کُٹ ءَ واپینیت اِش۔ راجدپتر ءِ تہ ءَ آیانی کسہ آں گوں ھوناں نبشتہ کنت ءُ گُش ایت، “دائم ءَ ماں راجدپتر ءِ تاکاں ابدمان اِت”۔

ھمے کسہ آں وانان اِت اَنت کہ رمضان ءِ ماہ ءَ 24 ءِ شپ ءَ سھور ءِ وھدا اکس نہ کش ءُ بے سوتیں گوانکو ءَ یک sms ءِ اتک کہ جنگول فاروق بلوچ گوں بْرات رنگیں دشمن ءَ گوں دیم پہ دیمی جنگ ءَ شھید کنگ بوتگ ۔ فاروق بلوچ ھما سنگت اَت کہ مُدام پہ جنگ ءَ سرگپتگ اَت بس یک گوانکے ءِ ودار ءَ اَت ۔

نہ زاناں آرا گوں مرگ ءَ مِھر اَت یا ساہ ءَ سر گْوَستگ ات بلئے یک چیزے ھست ات نہ تُرُس ات ئے ‘ نہ پد کِنز اِت ‘ نہ جان بڈی ءِ کُت ‘ نہ دگہ سنگتے ءِ نیمگ ءَ دست ءِ ٹال کُت بس مُدام ڈڈرے پچ کُت ءُ دیم ءَ اَت ۔ بس ساہ ءَ سر گْوَستگیں جنگول فاروق بلوچ ءَ را دُشمن پیشدارگی اَت ۔ سک مھروان اَت راجی کارے تک بوتیں یا سنگتے ءِ زاتی کار ۔ بس پہ یک گوانکے ءَ وداریگ اَت ۔ جُست آئی ءِ دپ ءَ نیست اَت ۔ کُجا من آئی دپ ءَ ھجبر اِش نہ کُت ۔ نزاناں ھمے کُجا آئی نہ تُرُسی ءَ چیر ترّینتگ اَت یا آرا پہ وتی بھادُری ءُ دلاوری ءَ شات نہ بوت ۔

مِدام گوں سنگتاں راجی ءُ زاتی کارانی تھا دزگٹ ات بلئے بچکند آئی ءِ لُنٹانی زیبائی ات، بس مُدام پہ یک گوانکے ءَ وداریگ اَت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پشتونخواملی عوامی پارٹی ءِ بنجاھی درشان ءّ سرکار ءِ نیمگ ءَ زیارت ءُ دگہ دمگ ءُ ھندانی تہ ءَ دروگیں میڑانی تہ ءَ سالاں چہ بیگواھیں مردمانی کوش ءِ سر ءَ درد، گم ءُ بژن ءِ درشان کنان ءَ گُشتگ کہ ابید کانود ءُ رھبند کوشان ترندی ءَ گوں ایر جنیں۔

درشان ءَ گُشگ بیتگ کہ ملک ءَ یک من اِتگیں رھبند ءُ کانودی سرکار ءِ بیگ ءَ پد ھم مھلوک ءِ دوستیں مردم ابید رھبندی وڑ ءَ بازیں سالاں بیگواہ کنگ ءُ اگاں ایم این اے علی وزیر ءِ پئیم ءَ دروگیں بھتامانی سوب ءَ جیل ءَ دارگ کجام ھم پئیم ءَ ملک ءِ ھذمت یا اگاں ملک ءِ سلامتی ءِ ھاتر ءَ جوانیں گامگیج زانگ بیت نہ کن اَنت۔ اے پئیم ءَ کہ اے ابید چہ کجام نہ کُتگیں میاریں سوب ءَ کہ آھانی بیگواھی ءِ سالاں پد دیما اتکگ اَنت رھبند ءَ ابید وڑ ءُ پئیم کارمرز کنگ ءُ کُشگ ءُ دور دیگ ملک ءِ ھذمت ءُ سلامتی ءَ ءِ ھاتر ءَ جوانیں گام گُشگ بیت نہ کن اَنت۔

درشان ءَ گُشگ بیتگ کہ ملک ءِ شرپ مندیں شھریاں چہ آھانی رھبندی، کانودی زھرشانی ءِ سوب ءَ گداری ءِ بھتام جنگ ءُ کُشگ ءِ رویش چہ دھکاں برجاہ اِنت، ملک ءِ تہ ءَ آمید گِس اَست ءُ بازیں مردمانی ھلاپ ءَ کجام ھم کیس کہ بیت آھانی آمید گِس ءِ دیما آرگ آھانی سر ءَ جرمکاری سابت کنگ سرکار ءُ واکدارانی زمہ واری اِنت۔

چہ مدتی ءَ شال ءُ پرگینگ ءِ دگہ دمگانی بار کوٹیانی دیما وتی دوستیگیں مردمانی اکساں گوں نشتگیں مردین، جنین کُکار کنگ ءَ بیتگ اَنت کہ آھانی دوستیگیں مردمانی درگت ءَ گُشگ بہ بیت بلے سرکار ءُ واکدار زمہ واری پیلو کنگ ءَ سرجم ءَ بے سوب بیتگ اَنت ءُ دروگیں ءُ وتگڑیں میڑانی تہءَ آھانی لاش نادراھجاہ ءَ ایر کنگ ڈیھہ رھبند ءُ کانودانی پامالی ءَ ابید دگہ ھچ نہ اِنت۔

درشان ءِ تہءَ گیشتر گُشگ بیتگ کہ ملک چہ پیسر ءَ رھبندی، سیاسی ءُ ترندیں معاشی جیڑھانی آماچ اِنت ملک ءِ سرپدیں سیاسی جمھوری رھشوناں لوٹ اِت کہ آ اے جیڑہ ءُ جنجالی جاورانی تہءَ رھشونی ءِ کرد ءَ پیلو بہ کن اَنت ءُ ملک ءِ تہءَ پشتون، بلوچ ءُ دگہ راجانی ءُ لس مھلوک ءِ ابید رھبند ءُ قانود کوش ءَ بہ دار اَنت ءُ ملک ءِ کجام ھم ادارگ ءَ ابید قانود مردمانی کُشگ ءِ پرمان گون مہ بیت ءُ درستیں بیگواھیں مردم دیما آرگ بہ بنت ءُ آھانی کھول ءَ آیانی درگت ءَ سرپدی دیگ بہ بیت۔

درشان ءَ گُڈ سر ءَ گُشگ بیتگ کہ پشتونخوامیپ زیارت، وزیرستان دروگیں ءُ وتگڑیں میڑانی ءُ دگہ قانود ءُ رھبنداں ابید کُشگ بیتگیں مردمانی کھولاں گوں آھانی درداں ھوار اِنت۔ پارٹی کُشگ بیتگینانی کھولاں گوں یکجاھی درشان اِت ءُ واھگ داریت کہ ھاوند آھاں صبر جمیل بہ دنت۔

پاکستان تحریک تالبان ءِ جارکش محمد خراسانی ءَ وتی درشان ءِ تہ ءَ گوشتگ کہ پاکستان شوربندی ءَ گوں بلوچ ءِ چکچینی ءَ کنگ ءَ اَنت، بلوچستان ءِ تہ ءَ ریاستی ادارھاں درکانودی کشت ءُ کوشانی درچ برجاہ داشتگ اَنت- ھمے زوتاں بلوچستان ءِ دمگ زیارت ءَ نُھ بے گناھیں بلوچ دروگیں میڑ ءِ نام ءَ شھید کرتگ اَنت کہ آھانی تہ ءَ گیشتر ھما بلوچ انت کہ چہ زانشجاھاں آوار جنگ ءُ بیگواہ کنگ بوتگ اَنت –

محمد خراسانی ءَ گوشتگ کہ اے ھما جنگی کتکاریانی درچ اَنت کہ پاکستانی پوج گوستگیں چاردہ سالانی تہ ءَ کنان ءُ پیداک اِنت ءُ اے درچ ھنگت برجاہ اَنت –

جارکش ءَ گوشتگ کہ اے گپ پدر بوتگ کہ بلوچ ءِ چکچینی شوربندی ءِ رِد ءَ کنگ بوگ ءَ اِنت بلوچ راج ءِ زبھر کنگے ھاتر ءَ یک نیمگے بلوچ سرڈگار ءِ مال ءُ مڈی پُلگ بوگ ءَ اَنت وھدیکہ دومی نیمگ ءَ بلوچ راج ءِ وانندہ ءُ زانتکاراں چیریں ادارھانی کارمند ءُ پوج آوار جنت ءُ بیگواہ کنت ءُ پدا چیزے وھد ءَ پد آھانی زانگولیں جوناں دگ ءُ ویرانگاں چگل دنت –

جارکش ءَ گوشتگ کہ بلوچ راج ءِ گوم ءَ ریاستی دژمنی بس ھمدا ھلاس نہ بیت مدامی اے ھم گندگ بیت اِنت کہ ھما شھیدانی کھولاں انساپ دیگ ءِ بدل ءَ زھرشانی کنوکانی سر ءَ ریاست ادارہ ارسی گیس جن اَنت ءُ آھاں لٹ شاپ کن اَنت چوش کہ سر ءَ سر زوراکی یے –

محمد خراسانی ءِ رِد ءَ تحریک تالبان پاکستان، پاکستان ءِ درسیں راج ھاس بلوچ راج ءِ پھازگ ءَ وتی پرز لیکیت ءُ اشی ءِ ھاتر ءَ مدامی ساڑی اِنت – آئی ءَ گوشتگ کہ ما شھیدانی کھولانی گماں گوں ھوار ایں چہ ھاوند ءَ دوا کنیں کہ اے کھولاں سبر ءُ اوپار ءِ ھاٹیگ بہ دنت –

جارکش ءَ گڈسر ءَ گوشتگ کہ تحریک تالبان پاکستان کول کنت کہ اے شھیدانی کُشندھاں بیمناکیں سزا دنت –

بلوچ آجوئی لوٹوکیں رھشون ءُ بی ایل ایف ءِ کماندار ڈاکٹر اللہ نذر بلوچ ءَ طاھر خان ھزارہ ءِ بیرانی ءِ سر ءَ وتی گونڈیں کلوھے ءَ ٹوئٹر ءَ نبشتگ کتگ ءُ گُشتگ کہ من انسانی ھقانی کارکن ءُ بلوچ وطن ءِ فرزند واجہ طاہر ہزارہ ءِ بیرانی ءَ سک دلپدرداں۔

آئی ءَ دیمتر ءَ گُشتگ کہ اللہ ھُدا مُرزی ءَ بھشت ءَ کنات ءُ آئی ءِ پشپداں سبر ءُ برداشت بہ دنت۔

ھمے پئیم ءَ پشتون تھفظ مومنٹ ءِ سروک منظور پشتین ءَ وتی ٹوئیٹر ءَ شنگ کُتگیں پدردی درشانی ءِ تہ ءَ گُشتگ کہ بزگ ءُ لاچاریں مردمانی دوزواہ طاھر ھزارہ چہ اے جھان ءَ رپتگ، آ زوراکی ءِ ھلاپ ءَ اوشتاتگ، سامراجیت ءِ بگیری ءَ گھگیری ءِ چیدگ بیتگ۔ آئی ءَ دیمتر ءَ گُشتگ ما طاھر ھزارہ ءِ دلیری، گھگیری ءُ کار ءُ ھذمتاں پہ ستاشانی درشان کنیں۔

منظور پشتین ءَ گُڈ سر ءَ گُشتگ ما آئی ءِ کھول ءُ سرجمیں ھزارہ کمیونٹی درداں ھوار اِنت۔

بلوچ نودربر رھشون ڈاکٹر ماھرنگ بلوچ ءَ طاھر ھزارہ ءِ بیرانی ءِ درگت ءَ نبشتگیں ٹوئیٹ یے ءِ تہ ءَ گُشتگ کہ کامریڈ طاھر ھزارہ یک گھگیریں کارست ءِ بیتگ۔ آ اے مناپک ءُ یک دومیگ ءَ پدی کنوکیں اھدے تہ ءَ ھم وتی اسول ءُ ھل ءَ گوں اوشتوک بیتگ۔ بزگانی ھاتر ءَ مدام آ دیم پہ دیم ءَ اوشتاتگ بیتگ۔ ڈاکٹر ماھرنگ ءَ گُشتگ طاھر خان ھزارہ ءِ اناگتی بیرانی پدمنتگیں راجانی ھاتر ءَ یک مزنیں تاوانے۔

بلوچ یکجھتی کمیٹی اسلام آباد ءِ نیمگ ءَ زیارت ءَ پاکستانی پوج ءِ آپریشن ءِ دروگیں میڑ ءِ بگیری ءَ زھرشانی روانک ءِ کشگ بوتگ – 

زھرشانی ءَ بلوچ نودربراں ھوار مزنیں کچ ءَ سول سوسائٹی، سندی ءُ پشتون نودربراں ھم بھر زرتگ –

درانگازی کنوکاں لوٹ کتگ کہ میاں استمانی انسانی ھکانی گل ترسناکیں انسانی ھکانی لگتمالیانی سرءَ گامگیج بہ زور انت پرچاکہ اے وھد ءَبلوچستان ءِ تہ ءَ ریاست ءِ زلم زوراکی سک باز بوتگ انت بلوچ گوستگیں دو دھکاں چہ ریاستی چکچینی ءِ آماچ انت- زورانسری آوار جنی،درکانودی کشت کوش،  زانگولیں جون ءُ دروگیں میڑاں بیگناھیں مردمانی کُشگ کُشت کوش ءُ چکچینی ءِ درچ ءَ کائینت – 

آھانی گوشگ ات کہ مدامی وڑءَ گوستگیں روچاں پاکستانی پوج ءَ دروگیں میڑ ءِ نام ءَ زیارت ءَ نُھ مردم کُشتگ انت کہ آھانی تہ ءَ تنی وھدی ھپتمردمانی پجار بوتگ انت کہ آھانی درسیں منانک سی سی ٹی وی تامر ءَ ھست انت – 

ترانکارانی گوشگ ات کہ یک نیمگے زورانسری آوار جنی،  درکانودی کشت کوش ءُ زورانسری آوار جنی ءُ زانگولیں جونانی چگل دیگ درچ برجاہانت – دومی نیمگ ءَ بیگواھیں مردمانی کھولاں ھم زھرشانی کنگ ءَ نیلگ ءَ انت – گوستگیں روچ ءَ شال ءَ  تپلیں زھگ ءُ زالبولانی سر ءَ ارسی گیسجنگ بوتگ کہ پدردی کارے کہ ما آئی ءَ ترندی ءَ گوں ایر جن ایں –

درانگازی کنوکاں میاں استمانی ھکانی ادارھاں چہ لوٹ کتگ کہ اشی ءِ سر ءَ گامگیج بہ زور انت پٹ پولی ءِ ھکم ءَ بہ دنت تانکہ بیگواھیںمردماں دروگیں میڑ ءَ کشت کوش ءِ درچ بند کنگ بہ بیت –

بلوچستان ءِ تیاب دپی شھر گوادر ءَ ناشناسیں مردماں لشکریانی سرءَ دستی بمب ءَ گوں اُرش کُتگ۔ 

اھوالانی ردءَ گوادر پورٹ ءِ بنجاھی گیٹ ءِ سرءَ بستگیں نیوی ءِ بنجل ناشناسیں مردماں دستی بمب اُرش ءَ نشانگ کُتگ۔

سربیتگیں ھالانی ردءَ اے اُرش ءِ تہءَ لشکریاں تاوان رستگ، بلے داں انگت اے درگت ءَ واکدارانی نیمگ ءَ ھچ پئیمیں درشان دیما نئیتکگ۔  

یات بہ بیت کہ سی پیک ءِ بنجاہ سرپد بیوکیں شھر گوادر ءَ لشکریانی سرءَ مدام اُرش بنت ءُ اے اُرشانی زمہ واریاں بلوچ آجوئی لوٹوکیں گل منانت بلے داں انگت مروچیگیں اُرش ءِ زمہ واری ھچ گل ءَ نہ زرتگ۔ 

بلوچ سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ ماں رسانکدر ءَ وتی شِنگ کرتگیں درشان ءِ تہ ءَ گوشتگ کہ مئے سرمچاراں شمبے بیست ءُ سَے جولائی ءَ کیچ ءِ بُنجاہی شھر تربت شاہ پور ھوٹل ءِ نزّیک ءَ پاکستانی پوج ءِ چیریں ادارہ ایم آئی ءِ اپسر نِشانگ کُرتگ- چہ تیرگواری ءَ آ ٹپّی بوتگ-

جارکش ءَ گوشتگ کہ آئی ءِ ھمراھی ءَ یک دِگہ لس مردُمے ھم ٹپّی بوتگ کہ آئی درگت ءَ گل ءَ را مارِشت ھست ءُ ما گوں آئی کھول ءَ ھمدردی ءِ درشان ءَ کن اِیں- بلے چہ لس مھلوک ءَ دزبندی اِنت کہ آ اے پیمیں مردُم ءُ دُژمِنیں پوج ءِ نزّیک ءُ گْور ءَ چہ آھگ ءَ وت ءَ بِہ پھریز اَنت-

جارکشّ میجر گْوھرام بلوچ ءَ دیمتر ءَ وتی درشان ءِ تہ ءَ گْوشتگ کہ پاکستانی پوج ءِ چیریں ادارہ ایم آئی ءِ اپسر سرجم ءَ کیموفلاج ءِ دْروشم ءَ نہ تھنا تربت ءَ یک پرپٹ میکینکے ءِ رنگ ءَ کار کنگ ءَ بوتگ، بلکیں آ بازیں لشکرکشّیاں ھم گِندگ بوتگ- اے درگت ءَ گل ءِ انٹیلی جنس ونگ ءِ مزنیں مُدّتے ءَ آئی سر ءَ نِگاہ بوتگ-

آئی ءَ گْوشتگ کہ پانزدہ جولائی ءَ شپ ءِ ادار ھشت ءَ سرمچاراں گوگدان ءَ ریاست ءِ چارِیگ برکت ء شھدوست دزگِیر کنگ ءِ جُھد کُتگ کہ آئی سرمچارانی سر ءَ تیرگواری کُتگ، پمشکا آ چہ پسّھی کاروائی ءَ ٹپّی بوتگ- ریاست ءِ چارِیگ برکت مُلّا عمر ٹولی ءِ یک ھاسیں باسکے، ءُ آ گومازی ءَ ھوار کیچ ءِ جتا جتائیں ھند ءُ دمگاں بلوچ راجی آجوئی جُنز ءِ بگیر ءَ گُشاد ءُ چاڑِکّہ بوتگ- چہ سرمچاراں آ رکّگ ءِ ھاتِر ءَ تربت ءَ شُتگ ءُ مرچاں ھمود ءَ جھمنند اِنت-

بلوچستان لبریشن پرنٹ ءِ جارکشّ میجر گْوھرام بلوچ ءَ وتی درشان ءِ گُڈُی ءَ سرپدی دیان ءَ گْوشتگ کہ زُورگِریں دُژمِن ءَ را کُمک کنوکیں ھِچّ مردُم بکشگ نہ بنت-