TBP Balochi

بلوچ لبریشن آرمی ءَ گوستگیں روچ ءَ تُربت ءَ بیتگیں بمب تراک ءِ زمہ واری من اِتگ۔ بی ایل اے ءِ جارکش جیئند بلوچ ءَ ناشناسیں جاھاں چہ شنگ کُتگیں درشان ءِ تہ ءَ گُشتگ کہ بی ایل اے ءِ سرمچاراں گوستگیں روچ ءَ کیچ ءِ دمگ ءِ بنجاھی شھر تُربت ءَ زور گیریں پاکستانی پوج ءِ اپسرانی ءُ آھانی ھندی چاریگ پرپٹ ءَ جتگیں ریموٹ کنٹرول بمب تراکے ءَ نشانگ کُتگ اَنت۔

آئی ءَ گُشتگ کہ بی ایل اے ءِ سرمچاراں فٹبال اسٹیڈیم ءَ ڈن میجر ءُ کیپٹن رینک ءِ دو اپسر ءُ آھانی ھندی کارمند ھما وھد ءَ نشانگ کُتگ اَنت وھدے آ فٹبال میچ چارگ ءِ ھاتر ءَ سربیتگ اَنت، تراکے ءِ زد ءَ اتکگیں دژمنیں پوجی کارمنداں جانی تاوان چِست کنگ کپتگ وھدیکہ آھانائی اولاک ءَ ھم باز تاوان رس اِتگ۔

جارکش ءَ گُشتگ کہ سرمچاراں شور بندیانی سوب ءَ لس مھلوک ءِ تاوان ءَ رکگ ءِ ھاتر ءَ مھلوک ءَ چہ دیر دژمن نشانگ کُتگ۔ دومی نیمگ ءَ زورگیریں پوج ءَ مدامی پئیم ءَ وتی تاوانانی چیر دیگ باز کوشست کُتگ۔

جئیند بلوچ ءَ گیشتر گُشتگ کہ اے ٹورنامنٹ دژمنیں پوج ءِ سروکی ءَ وتگڑیں آزاتی ءِ روچ ءِ شاتکامی ءِ رد ءَ برجاہ دارگ بیتگ، کہ اِشی ءِ بنگیج آئی جی ایف سی ءَ بی آر سی کالج ءَ کُتگ اَت۔ بلوچ لبریشن آرمی زورگیریں پوج ءُ آئی ءِ داشتگیں مردمانی سر ءَ گیشتر ترندی ءَ گوں ارشاں برجاہ داریت پمیشکا گوں لس مھلوک ءَ دزبندی اِنت کہ آ زورگیریں پوج ءِ چیردستی ءَ بیوکیں کجام ھم مراگش ءَ بھر مہ زیر اَنت۔ چُشیں کجام ھم مراگش ءَ بھر زیرگ زورگیریں دشمن ءَ گوں یکجاھی بیت، پمیشکا چُشیں مراگشانی بھرزیروکیں مردم وتی جانی ءُ مالی تاوانانی زمہ وار وت بنت۔

مرحوم مراد جان ناک آؤٹ کرکٹ ٹورنمنٹ برجاہ، گوستگیں روچ ءِ بیگاہ ءَ کوارٹر فائنل ءِ دومی گوازی کنگ بوتگ – کوارٹر فائنل گوازی ءَ شھید دودا جان ٹیم ءَ نُھ وکٹانی تاوان ءَ گوازی کٹ اِتگ –

گوستگیں روچ ءِ گوازی شھید دودا جان شے کھن ءُ ممتاز ھپتو ءِ میان ءَ کنگ بوتگ ـ ھردو ٹیماں جوانیں گوازی پیش داشتگ –

کوارٹر پائینل ءِ دومی گوازی ءَ شھید دودا جان شے کھن ءَ اولسر ءَ بیٹنگ کُتگ ءُ نُھ وکٹانی تاوان ءَ چاردہ آورانی تہ ءَ یکسد ءُ بیست ءُ ھشت رن جوڑ کرتگ انت کہ ممتاز ھپتو ءِ لیبی ٹارگٹ پروشگ ءَ بے سوب بوتگ انت ءُ گوازی شھید دودا جان ءِ لیبیاں کٹ اِتگ – شھید دودا جان لیبیانی تہ ءَ مراد حاصل ءَ درساں گیش سِی ءُ چار، عابد ءَ بیست ءُ نُھ رن جوڑ کرتگ ءُ بالرانی تہ ءَ سفر ءَ چار وکٹ ءُ عبدالعزیز ءَ سَے وکٹ گپتگ انت –

ممتاز ھپتو نیمگ ءَ چاردہ آوورانی تہ ءَ ھشت وکٹانی تاوان ءَ یکسد ءُ سَے رن جوڑ کنگ بوتگ اَنت کہ آھانی تہ ءَ درسان گیس عارف ءَ بیست ءُ سَے ءُ وسیم ءَ بیست ءُ دو رن جوڑ کرتگ وھدیکہ بالرانی تہ ءَ ماجد ءَ سَے ءُ وقار جان ءَ دو وکٹ گپتگ انت – ھمے وڑ شھید دودا جان شے کھن ءَ بیست ءُ پنچ رناں گوازی کٹ اِتگ –

گوازی ءِ جوانتریں لیبی عابد یار بوتگ آئی ءَ چہ گچینی مھماناں داد گپتگ –

زانگ بہ اے ٹورنمنٹ سرجمی ءَ چِل ٹیماں بھر زرتگ کہ آھانی تہ ءَ اے ون اسٹار بگ ءُ گلزمین گودی، شھید دودا جان ءُ ممتاز ھپتو، نالی پیری کھن ءُ رند تگران ءَ جوانی ءَ گوازی کنان ءَ وت ءَ کوارٹر فائنل ءَ سر کتگ – کوارٹر فائنل ءِ اولی گوازی اے ون اسٹار ءُ گلزمین گودی ءِ میان ءَ بوتگ کہ گلزمین گودی ءَ سِی ءُ ھشت رناں گوازی کٹ اِتگ بوتگ –

اے ٹورنمنٹ بنام ءِ مرحوم واجہ مراد جان ءِ نام ءَ شھید دودا جان ٹیم ءِ چیردستی ءَ شے کھن ءَ ایر کنگ بوتگ – کوارٹر فائنل ءِ سیمی گوازی مروچی شھید دودا جان گراؤند ءَ نالی پیری کھن ءُ رند تگران میان ءَ کنگ بیت اِنت –

بلوچستان ءَ بشی ھورانی تباہ کاری اوشتگے نام ءَ نہ زان انت بلوچستان ءِ دمگ نوشکی، چاگی ءُ مستونگ ءَ دگہ مردمانی بیرانی ءِ ھال انت –

بشی توپانی ھوراں مستونگ ایندگے دمگاں ھوار گردگاپ ءَ ھم تباھی کتگ –

مستونگ ءِ دمگ گردگاپ ءَ ھار ءَ لیوز ءِ کارمند ءَ ھوار سَے مردم بُرتگ انت، آھانی تہ ءَ دو مردمانی جون کچگ بوتگ انت کہ آھانی پجار لیویز کارمند سمیع اللہ ء حاجی شیر خان ءُ عبدالغفار ء عبدالصمد ءِ ناماں چہ بوتگ انت وھدیکہ کبیر احمد ء استاد ہاشم ھنگت گار انت آئی ءِ شوھاز برجاہ انت –

اھوالکار ءِ رِد ءَ ھر سَئیں مردم وتی دگہ ھمراھانی ھواری ءَ کوھ ءَ پکنک ءَ شُتگ بوتگ انت کہ ھر سَے کور ءَ پسِتگ انت کہ ھار اتکگ ءُ سئین بُرتگ انت – دومی نیمگ ءَ ھار کلی مل سرپرہ ءَ سربوتگ –

چاگی ءِ دمگ دشت گوران ءَ ھال آھگ ءَ انت کہ سَے جنکو کڈ ءَ کپتگ ءُ بیران بوتگ انت بیران بوتگیں زھگانی تہ ءَ پانزدہ سالی حافظہ ء عبدالسلام، سینزدہ سالی نائلہ ء عبدالقدوس ءُ یانزدہ سالی عاصمہ ء محمد ہاشم ھوار انت –

نادراھجاہ ءِ بنشون ءِ رِد ءَ ھر سَئیں گونڈو کنڈ ءَ کپتگ ءُ بیران بوتگ انت –

دومی نیمگ ءَ نوشکی ءَ خیصار کور ءَ مرزا خان نامی مردمے ءِ جون دست کپتگ کہ دو روچ ساری پٹی ءَ ھار بُرتگ –

آئی ءِ جون دستگرگ بوتگ ءُ نادراھجاہ ءَ سر کنگ بوتگ ءُ آودا اژدری چار ءُ ٹپاس ءَ پد جون کھول ءِ دست ءَ دیگ بوتگ –

بلوچستان ءِ دمگ کیچ ءِ بنجاھی شھر تربت ءَ اسٹیڈیم ءِ ڈن ءَ بمب تراکے بیتگ-

تراک تربت اسٹیڈیم ءِ ڈن ءَ پارکنگ ءَ ھما وھد ءَ بیتگ فٹبال گوازی برجاہ بیتگ – تراک ءِ آسر ءَ سَے مردم زدگ بیتگ کہ اشانی اسپورٹس ءِ آفیسر ءِ زدگ بیگ ءِ ھال اِنت-

پولیس ءِ رد ءَ تراک ءِ شورو پرپٹے ءَ بندوک بیتگ اَنت تراک ءَ پد کُکار مچ اتگ اَنت زدگ بیتگیناں یک پولیس کارمندے ھوار اِنت-

آئی ءِ گوشگ ات کہ زدگ بیتگیں مردم ھسپتال ءَ برگ بیتگ اَنت پولیس ءُ فرنٹیئر کور ءِ کارمنداں دمگ انگیر ءَ کرتگ ارشکارانی پٹ ءُ پول بندات کتگ-

دمگی مردماں ٹی بی پی ءَ گوِ گوشتگ کہ اے ٹورنامنٹ پاکستانی پوج ءِ نیمگ ءَ چاردہ اگست ءِ درگت ءَ آئی جی ایف سی ءِ گچینی ءَ بیتگ گڈی میچ ءَ مزنیں آفیسرانی آیگ نہ بیتگ-

بلوچِستان لبریشن پرنٹ ءَ ریاستی چارِیگ ءُ کُشندہ ٹولی ءِ کارمَند زپر ءِ کوش ءِ زِمّہ واری منّ اِتگ۔

بلوچِستان لبریشن پرنٹ ءِ جارکشّ میجر گْوھرام بلوچ ءَ ناشُناسیں جاھے ءَ ماں رسانکدر ءَ وتی شِنگ کُرتگیں درشان ءِ تہ ءَ گْوشتگ کہ ریاستی کُشندہ ٹولی ءِ کارمَند زپر ء مھمد جان جھ مِنند زامُران انوگیں گیبُن ڈلّ بازار سرمچاراں کیچ ءِ ھند کلاتُک مینو ءَ نِشانگ کُرتگ ءُ کُشتگ۔

آئی وتی درشان ءِ تہ ءَ دیمتِر ءَ گْوشتگ کہ زپر زُورگِریں ریاست ءِ نیٹ ورک ءِ کارمندے بوتگ کہ آئی بلوچ راجی آجوئی ءِ جُنز ءِ بگیر ءَ وتی یک نیٹ ورکے جوڑ کُرتگ۔ ناسِر آباد، کوہ شورماہ بند ءُ اے دِگہ کش ءُ گْور ءِ ھندانی پانپاہی ءُ آئرا پاکستانی لشکر ءَ ھاسیں ٹاسک داتگ۔ آ گوں وتی اے بدّیں کارپد ءَ مُدام چاڑِکّہ ءُ اے ھند ءُ دمگاں گوں لشکر ءِ ھمراھی ءَ آپریشناں ھوار بوتگ۔

کُشندہ ٹولی ءِ اے کارمند ریاست ءِ کُمکّ ءَ دُزّی ءُ ڈُنگی، نِشا ءِ بھا کنگ ءُ زمینانی کْوزہ کنگ ءَ ھور اے دِگہ چاگِردی سِلکاریانی بھر بوتگ۔ راجی گُناھکار زپر ءِ بْرات ھم، ھمے کارپدانی واھُند ءُ جُرم ءَ شریدار اِنت۔

گل ءِ انٹیلی جنس ٹیم ءَ مزنیں مُدّتے ءَ زپر ءُ آئی نیٹ ورک ءِ سِلّیں کارپد گوں جْوانی ءَ چار اِتگ اَنت۔ چہ چار ءُ تپاس ءَ رند زِی سرمچاراں شپ ءِ ادار ھشت ءَ کاروائی کُتگ ءُ زپر ء مھمد جان کُشتگ۔

بلوچستان لبریشن پرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ شیوار کنان ءَ اے ھم گْوشتگ کہ زُورگِریں لشکر ءَ را کُمکّ کنوکیں ھِچّ مردُم بکشگ نہ بیت۔

دراھیں تیل ءُ گیس ءِ شوھاز کنوکیں کمپنیاں گوں دزبندی کن ایں آ زورگر ءِ لُٹ ءُ پلی کمپنیاں چہ گستا بہ بنت- دوستین بلوچ

بلوچ ریپبلکن گارڈز ءِ جارکش دوستین بلوچ ءَ وتی شنگ کرتگیں درشان ءِ تہ ءَ گوشتگ کہ بی ار جی ءِ سرمچاراں گوستگیں شپ ءَ ڈیرہ بگٹی ءِ ھند سوئی ءَ کراچی ءَ روکیں گیس پائپ لائن شورواں گوں تباہ کرتگ چریشی ءِ آسر ءَ کراچی ءَ روکیں گیس پائپ لائن بازیں کچے ءَ تاوانباری رس اتگ-

آئی ءَ گُشتگ ڈیرہ بگٹی ٹوبہ ءَ تیل ءُ گیس ءِ شوھاز کنوکیں کمپنیاں بیھار دے آ زورگر ءِ لُٹ ءُ پُلی پروجیکٹاں دزکش بنت اگاں ناں وتی دگہ تاوانانی زمہ وت بہ بنت-

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ چاگردی ترامجاہ ٹوئٹر ءَ وتی شنگ کرتگین یک لڑیں درشانے ءَ گشتگ کہ ظہیر بلوچ ءِ یل کنگ ءِ درگت ءَ مھلوک ءِ رپینگ ءُ وائس فار بلوچ مسنگ پرسنز ءَ بھتام جنگ ءِ جھد ءَ کنگ ءَ اَنت-

آئی ءَ گوشتگ کہ گوستگیں سال ءَ ظہیر بلوچ ءِ کھول ءَ مارا رھوت کرتگ ءُ گوشتگ آ روچ ء رھمانی شال ءِ بالی پٹ دگ ءَ آوار جنگ بیتگ چشکہ ما یک کمکاری گلے ءِ دروشم ءَ مئے بنکی کار بیگواھیں مردمانی کھولانی کمک کنگ اِنت چشکہ ما جھد کتگ آیانی کمک کتگ –

ظہیر بلوچ ءِ کھول ءَ وت ایف آئی آر ھم کتگ ءُ ھائی کورٹ ءَ سی پی فائل کتگ ما بس آئی ءِ واستا مھم ھلائینتگ کہ لس بیگواھیں مردمانی واستا کتگ ما آئی ءِ کیس بیگواھیں مردمانی کمیشن ءَ رسینتگ –

چشکہ ظہیر بلوچ ءِ کھول وت وانندگ اَنت ءُ وشھال اَنت مارا مھم ءَ ابید آئی ءِ واستا ھچی کنگ نہ کپتگ زیارت ءِ وئیل ءَ پد آئی ءِ کھول ءَ یک میتے ءِ پجار ءِ گپ جتگ کہ اے ظہیر بلوچ ئیگ اِنت نانکہ من کدی ظہیر ءَ گوں دُچار کپتگ اَنت نانکہ من آئی ءَ را زاناں ما بس آئی ءِ اکس دیستگ اے وڑ ءَ ما ھچبر آئی ءَ جاہ آورت نہ کن ایں –

کھول ءَ گُشتگ اے ھما اِنت ما تپاک کتگ – آ میت برگ بیتگ ءُ کل ءُ کسارت کنگ بیتگ پد ءَ نی اے دگہ پندلے ءَ سر کش اتگ- ظہیر بلوچ زندگی ءَ اتکگ مئے واستا یک داد ءُ وش ھبری یے ءَ کم نہ اِنت بلے مھلوک ءِ ریپینگ ءُ وی بی ایم پی ءَ بھتام جنگ نا انساپی یے –

آئی ءَ گُشتگ ظہیر بلوچ ءِ کھول کہ پولیس، آمیدگس ءُ دگہ واکدارانی گور ءَ شتگ اَنت ظہیر ءِ مستریں برات ءَ ایف آئی آر در کتگ نی آ جست کنگ بہ بیت پرچا آئی ءَ چُش کتگ ھا ما آئی ءَ را اے وڑ کنگ ءَ لاچار کتگ؟

ماما قدیر ءَ گشتگ کہ نِی ظہیر واتر اتکگ گڑا جوڈینشل کمیشن ءِ جج جست بہ کنت آ کجا بیتگ اگاں ایران ءَ بیتگ گڑا کجام جرم ءَ دزگیر بیتگ اگاں بارڈر ءِ کراس کنگ ءِ وھد ءَ گرگ بیتگ آ پرچا دہ ماہ ءَ زنداناں بندیگ بیتگ لس وڑ ءَ گیر کانونی ءَ دزگیر بیتگیں زوت واتر ڈی پورٹ کنگ ءُ پاکستان ءِ واکدارانی دست ءَ دیگ بنت آ کمیشن ءَ بہ گوش ایت آ کجام ادارہ ءِ گور ءَ رسینگ بیتگ ءُ کدی؟