TBP Balochi

بلوچستان ءِ تیاب دپی دمگ گوادر، پسنی ءُ دگہ دمگان مروچی یکشمبے ءِ روچ ءَ زمین چنڈ بوتگ –

بلے تنی وھدی زمین چنڈ ءَ ھچ وڑیں جانی ءُ مالی تاوان ءِ ھال نیست اِنت –

بلوچستان ءِ دمگ پسنی ءِ جنوب مشرق ءَ زِر ءِ تہ ءَ زمین چنڈ ءِ گیشی 5.5 نبشتہ کنگ بوتگ – گوادر ءُ بلوچستان ءِ ایندگہ تیاب دپی دمگان ھم زمین چنڈ بوتگ –

سربوتگیں ھالانی رِد ءَ بلوچستان ءِ بنجاھی شھر شال ءَ دو جتائیں جاھاں بمب تراک بوتگ انت –

ھالانی رِد ءَ ولی جیٹ ءَ سریاب دگ ءَ بوتگیں دزبمب اُرش ءَ پاکستانی پوج فرنٹیر کور ءِ یک کارمند ءِ سک باز زدگ بوتگ –

پوج ءِ بنشون ءِ رِد ءَ ناشناسیں مردماں پوج ءِ گاڑی ءِ سر ءَ دز بمب ءِ چگل داتگ ءُ در شُتگ انت – پوج ءَ زدگ بوتگیں کارمند نادراھجاہ ءَ سرکتگ ءُ کتکارانی شوھاز برجاہ انت –

اشی ءَ پیش شال ءَ اسپینی دگ ءِ سر ءَ ناشناسیں مردماں پٹرول پمپ ءِ نزیک ءَ دز بمب ءِ چگل داتگ ءُ در شتگ انت، تراک ءَ دو مردم زدگ بوتگ انت کہ ھما دمان ءَ اے مردم نادراھجاہ ءَ سر کنگ بوتگ انت – بلے تنی وھدی زانگ نہ بیت کہ اے تراک ءِ ٹارگٹ کئے بوتگ –

ھال ءِ سر بوگ ءَ پھازگی لشکر ءَ دمگ وتی انگر ءَ کتگ وھدیکہ دمگ ءَ گیشیں اُرشانی پژدر ءَ پھازگی ترند کنگ بوتگ انت –

شال ءَ بوتگیں اُرشانی زمہ واری تنی وھدی ھچ گل ءَ نہ منّ اِتگ انت بلے چدوپیش اے دابیں اُرشانی زمّہ واری بلوچ آجوئی لوٹوکیں سلاہ بندین گلاں منّ اِتگ انت –

زانگ بہ بیت گوستگیں روچ ءَ کیچ ءِ بنجاھی شھر تربت ءَ فٹبال پٹ ءَ ڈن تراک ءِ بوتگ ات آ تراک ءِ زمہ واری بی ایل اے ءَ من ّ اِتگ ات –

گل ءِ جارکش ءَ گوشتگ ات کہ مئے سرمچاراں فٹبال اسٹیڈیم ءَ ڈن میجر ءُ کیپٹن رینک ءِ دو اپسر ءُ آھانی ھندی کارمند ھما وھد ءَ نشانگ کُتگ اَنت وھدے آ فٹبال میچ چارگ ءِ ھاتر ءَ سربیتگ اَنت-

سربوتگیں ھالانی رِد کاؤنٹر ٹررزم ڈیپارٹمنٹ ءَ ورنایے زورانسری آوار جتگ ءُ بیگواہ کتگ –

گیشیں ھالانی رِد ءَ ڈیرہ مراد جمالی ءَ وارڈ نمبر چاردہ ءَ سی ٹی ڈی ءَ نوفل بگٹی نامیں مردمے ءِ گِس ءَ بیڑ برتگ ءُ آئی ءِ زھگ محمد رفیق بگٹی آوار جتگ ءُ گوں وت برتگ –

ڈیرہ مراد جمالی ءَ ھمے ماہ ءَ سَے مردم زورانسری آوار جنگ بوتگ انت، بیست ءُ چار جولائی ءَ پھازگی لشکر ءَ ڈیرہ مراد جمالی ءَ دگہ دو مردم زورانسری آوار جتگ ءُ بیگواہ کتگ انت کہ آھانی پجار اکبر ء نواب خان ءُ جیسف ء نواب خان ءِ ناماں بوتگ انت –

بلوچستان ءِ بازیں دمگے ءَ سی ٹی ڈی ءَ وتی کار تیز کتگ انت کاؤنٹر ٹیررزم ڈپارٹمنٹ ءَ ھمے سال ءِ جولائی ماہ ءَ بلوچستان ءِ دمگ ھاران ءَ دو مردم آوار جتگ ءُ بیگواہ کتگ انت کہ ھنگت بیگواہ انت –

چہ ھاران ءَ آوار جنگ بوتگیں مردمانی پجار اسلم مینگل ءُ غلام جیلانی حسین زئی ءِ ناماں بوتگ انت وھدیکہ بیگواھیں مردمانی کھول زھرشانی کنگ ءَ انت –

چہ ھاران ءَ سی ٹی ڈی ءِ دست ءَ زورانسری آوار جنگ بوتگیں مردمانی کھولاں ھمے بھتام جتگ کہ ھاران ءُ کش ءُ کری دمگاں سی ٹی ڈی ءَ بازیں بیگناھیں مردمے درکانودی آوار جتگ ءُ بیگواہ کتگ انت وھدیکہ آھانی دزگیری ءَ پد آ دیم ءَ آرگ نہ بنت چہ ھاران ءَ ھنگت بازیں مردمے سی ٹی ڈی بندیگ جاھاں بند انت –

زانگ بہ بیت سی ٹی ڈی ءَ اشی ءَ پیش بلوچستان ءِ بازیں دمگاں مردم آوار جتگ ءُ پدا دروگیں میڑ ءِ نام ءَ کُشتگ انت گوست ءَ آوار جنگ ءُ یا دروگیں میڑ ءَ جنگ بوتگیں مردمانی پجار ھما مردمانی ناماں بوتگ انت کہ پیش ءَ زورانسری آوار جنگ ءُ بیگواہ کنگ بوتگ انت –

ھمے ماہ ءِ ھژدہ جولائی ءَ سی ٹی ڈی ءَ بی ایل اے ءَ سیادی داروکیں یک مردمے دزگیری ءِ ٹاہ داتگ ات کہ آئی ءِ پجار غوث بخش ء علی خان لانگانی مری جھمنند مری کیمپ ہزار گنجی شال ءِ نام ءَ چہ بوتگ ات –

بلے پدا ھم دومی نیمگ ءَ دی بلوچستان پتر ءَ سربوتگیں ھالانی رِد ءَ غوث بخش پاکستانی پوج ءَ نُھ اگست سال دوھزار بیست ءُ یک ءَ یک شمبے ءِ روچ ءَ شھرگ ءَ آوار جنگ ءُ بیگواہ کنگ بوتگ –

بلوچ راجی زْرمبشت (بی این ایم) ءِ سرکماش ءَ ھم سنتیں راجانی مزن کارگشاد انتونیو گوتریش ءَ نمدی نبشتگ ءُ چہ آئیءَ بلوچستان ءَ ناگیگیں مردمی اگبالانی جاورانی سر ءَ دزمانجنی کنگ ءِ دزبندی کرتگ۔

آئی ءَ وتی نمدی ءَ بلوچستان ءِ سر ءَ پاکستان ءِ زورگری ءُ بلوچستان ءَ مردمانی اگبالانی ناگیگیں جاورانی بارہ ءَ گپ جنان ءَ گْوشتگ من چہ بلوچ راج ءِ نیمگ ءَ بلوچستان ءَ پاکستان ءِ لشکرکشی ءُ مردمی اگبالانی سنگینیں بگیریانی زیتیں گر ءُ دار ءَ میان استمانی دزمانجنی ءِ دزبندی کن آں۔

آئی ءَ گْوشتگ بلوچاں مردمی اگبالانی بگیری ءُ چہ ریاست ءِ نیمگ ءَ زندانیانی کوش رنگیں گامگیجانی گر ءُ دار ءَ درسیں راہ ءُ در کارمرد کرتگ اَنت داں ایشی ءِ گر ءُ دار ءِ راھبندی راھے در بئیت۔سانمند بیتگیں مردمانی کھول گْوستگیں بیست سالاں مزدانک ءِ بندیں دروازگاں ٹکگ ءَ اَنت ءُ ایشی ءِ پد ءَ آ بے وسی ءُ نا امیتی سما کنگ ءَ اَنت۔

آئی ءَ گْوشتگ نوزدھمی سدھک ءَ وتواکیں بلوچستان ءَ گوں برتانیائی تاج ءَ مسام کرتگ ءُ 11 اگست 1947 ءَ آجوئی گیپتگ۔اے مسام ءِ رد ءَ برتانیائی لشکر ءَ چہ کلات ءِ چیردستیں دمگاں سرجمی ءَ در کپگی اَت۔ بلے بلوچستان ءِ آجوئیں راجے ءِ بستار ءَ برجاہ بیگ ءِ اگبال چہ پاکستانی لشکر کشی ءِ پارست ءَ 27 مارچ 1948 ءَ پچ گرگ بیتگ۔

ڈاکٹر نسیم ءَ گْوشتگ نی وھد اتکگ کہ اے زوراکیانی بگیری ءَ کارروائی کنگ بہ بیت ءُ راجے چہ سرجمیں بیرانی ءَ پھازگ بہ بیت۔

’’ بلوچستان ءِ نوک آبادی چیردستی ءَ آجوئی ءُ راجمستری ءِ منوگریں آجوئیں راج ءِ بستار ءَ پرایمنیں دیمروی ھم سنتیں راجانی ءِ ’اگبالانی مسام ‘‘ ( چارٹر آف رائٹس ) ءِ بگیری کنان لپاشگ بیتگ۔‘‘

ڈاکٹر نسیم ءَ وتی نمدی ءِ نبشتگ بلوچستان ءَ مردمامی اگبالانی ناگیگیں جاور ءَ مردمی زند بے ارزشت بیان اِنت۔ بلوچ ءِ شھرمنند گْوستگیں دو دھکاں پاکستانی لشکر ءِ زوراکیانی بگیری ءَ بے وسی سما کنگ ءَ اَنت۔ بلے بلوچ راج ءِ اگبالانی لگتمالی، ربیدگی، چکچینی، چاگردی، گزرانکی ءُ ابرمی مڈیانی بے کچیں لٹ ءُ پل ریاست ءِ تْرام اتگیں رپک ءُ راھے۔مئے زمین ءُ مئے تیاب پہ لشکرجاہ جوڑ کنگ ءَ چینی ریاست ءِ کارپوریشنزاں بھا کنگ بیگ ءَ اَنت۔دریا ورد چہ آیانی لوگ ءُ گزرانکی پارستاں زبھر کنگ ءُ پہ لڈگ ءَ لاچار کنگ بیگ ءَ اَنت۔

آئی ءَ وتی نمدی ءَ نبشتگ کہ بلوچستان مزنیں کچے ءَ تاوانباریں جنگ ابزار چکاسگ ءِ جاہ جوڑ بیتگ۔28 مئی 1998ء ءَ پاکستان ءَ بلوچستان ءِ ھند چاغی ءِ ’راسکوہ‘ ءِ ٹک ءَ پنچ ایٹمی چکاس کرتگ چہ ایشی ءَ ھمود ءَ نندوکیں مردم ابید چہ زند ءِ آسراتی دیگ ءَ بلوچستان ءِ گیابیں ھند ءُ دمگاں لڈگ ءَ لاچار بیتگ اَنت۔چہ ایشی ءَ ابید مردم، دلوت، درچک ءُ دار ءُ آپانی کمب ءُ ھوٹگاں کپتگیں تابکاری گند ءِ سبب ءَ کشاورد ءُ شپانکانی جاندْراھی ءُ گْواپزم (Gwaapzam /گوات+آپ+زمین بزاں Environment ) ءِ سلی ءِ جیڑہ ودی کرتگ۔

آئی ءَ وتی نمدی ءَ نبشتگ کہ بلوچستان ءِ زمین چیری مادنانی ابرمی مڈی کاپر(مِس)، سھر ءُ ابرمی گیس ءَ پاکستانی لشکر گْوستگیں ھپت دھک اِنت کہ لٹ ءُ پل کنگ ءَ اِنت۔جنرل مشرپ ءِ لشکری رجیم ءِ باریگ ءَ پاکستان ءَ بلوچستان ءِ ھند ریکوڈک ءُ چاگی ءَ جھان ءِ ششمی کاپر ءُ سھر ءِ کھن شوھاز کرتگ ءُ پہ لٹ ءُ پل ءَ گوں دری ڈیھانی کھن روپیں کمپنیاں چیریں مسام کرتگ ، چہ اے کمپنیاں کینڈا ءِ کمپنی بیرک گولڈ ھم گون اِنت۔

ڈاکٹر نسیم ءَ وتی نمدی ءَ نبشتگ بلوچستان ءَ برجاھیں جیڑہ ءُ بلوچانی بگیری ءَ پاکستانی لشکر ءِ زوراکی، کشت ءُ کوش ، جنگی میار ءُ مردمگری ءِ بگیری ءَ میار انچیں جاور اَنت کہ میان استمانی تک ءَ ءُ باز راجی کارپورشینزاں لشکر ءِ چیردستیں دمگاں باپار کنگ ءَ مہ کن کن اَنت۔ اے درساں ابید گوں زورگریں لشکر ءَ چیریں مسامانی پارست ءَ مئے ابرمی مڈی پلگ ءُ بلوچستان ءَ جنگ ءُ مردمی اگبالانی لپاشگ ءِ کارپد سکین دیگ بیگ ءَ اَنت۔

آئی ءَ وتی نمدی ءَ اے لوٹ کرتگ کہ باز راجی کارپوریشنزانی کمک ءَ اے بے سر ءُ بے وتیں لٹ ءُ پل ءُ مردمانی چہ وتی زمین ءُ مڈیانی سر ءَ ’ واھندی ءِ اگبال‘ ءِ بگیری بندکنگ بہ بیت۔

بلوچستان ءِ دمگ ھاران ءُ کیچ ءَ دو جتا جتائیں وئیلاں یک مردمے بیران ءُ یکے زدگ بیتگ-

گیشیں ھالانی رد ءَ ھاران ءِ دمگ شاپنگ روڈ ءِ نزد ءِ رضا ٹینٹ سروس ءِِ نزیک ءَ ناشناسیں مردماں تیرگواری کتگ ءُ یک مردمے کُشتگ-

بیران بیتگیں مردم ءِ پجار مھراب ھان کبدانی ءِ نام ءَ زانگ بیتگ –

دومی نیمگ ءَ کیچ ءِ دمگ ناسر آباد ءَ تیرگواری ءِ یک وئیلے ءَ انعان حسین ء غلام حسین نامیں مردمے زدگ بیتگ –

ھردوکیں وئیلانی بارو ءَ تنی وھدی دگہ سرپدی نہ بیتگ اَنت-