کمبر منی رھشون-یحییٰ بلوچ

کمبر منی رھشون

نبشتہ کار: یحییٰ بلوچ

دی بلوچستان پوسٹ

2000ءَ پد کہ بلوچ ءِ جنگ یکبرے پد ءَ گوں ترندی ءَ دیم ءَ اتکگ ات گڑا مئے ھندانی تہ ءَ ھم ایشی ءِ سان درا ات انت ءُ کسان ءُ مزنیں آشوبی ماھولے جوڑ ات بلکیں بلوچ راجی جنز ءِ تہ ءَ چوشیں مزنیں امل نہ بوتگ ات بلے پہ من اے ماھولے سکیں مزنین ارزشتے دار ایت پرچا کہ ھمے ماھول ات کہ من ءَ گوں کمبر ءَ آشا یے کتگ ات۔

اے زمانگ ءَ مئے ھلک ءِ سرجمیں بیٹگ گوں شھید یا بندیگیں سیاسی ورکرانی اکساں سمبھیتگ ات انت۔ من وتی زند ءِ بنداتی سر ءَ چہ ھمے بیٹکانی اکساں شھید دلجان، ڈاکٹر خالد، ماسٹر یحیٰ زانتگ ات انت۔

یکروچے میتگ ءَ ابیتکی یے کپتگ ات ھمے ھال شنگ ات کہ کمبر بیگواہ کنگ بوتگ ھر کس ءَ کہ ھمے گپ جت داں تکانسر ات ءُ من ھم ھمے میان ءَ تکانسر بوت آں بلے من انگت سرپد بوگ ءَ نہ اتاں کہ اے میتگ ءِ گوما کمبر ءِ چونیں سیادی یے یا منی گوں کمبر ءَ چونیں سیادی یے کہ من ءَ چو بے چین کنگ ءَ ات۔ ءُ نو بیٹکانی دیوالاں سبزیں ورنایے ءِ اکساں ھم لگوک ات کہ بچکندگ ءَ ات انچو بچکندگ ءَ ات کہ تو دروازگ ءَ پُترگ ءَ بوت این ئے تو گُشت ترا گندگ ءَ ایں پمیشکا بچکندگ ءَ انت۔

پسانی سر دیگ ات، لیب ءُ گوازی ات کودکی ات کہ پد ءَ ھالے شنگ بوت کہ کمبر چہ جیل ءَ یل کنگ بوتگ ءُ سیاسی تر ءُ تابے ءَ نزیکیں ھلک ءَ اتکگ ءُ بی ایس او آزاد ءِ مچی یے اڈ داتگ ئے ءُ باندا گرد ءُ تر ءُ اے کوہ ءُ کورانی دیدار ءَ مئے میتگ ءَ کیت۔ دل گل ءَ بال ات کہ ھما کمبر ءَ باندا من دیم پہ دیم گندگ ءَ اتاں کہ پیسر ءَ تھنا اکسانی تہ ءَ بچکندگ ءَ دیستگ ات۔

جی پہ کودکی کہ شپ ءِ وپسگ ءَ گوں ہرچی بے ھیال کتگ ات ءُ سھب ءَ بے سمائی ٹئیر ءُ چنگ زرتگ ات انت ءُ ٹئیر ءَ تاچان ءَ کور ءَ یلہ ات آں۔ دور چہ میتگ ءِ کنڈگ ءَ دو ورنا دیم پہ کور ءَ ایر کپاں ات انت ءُ گورم ءِ نیمگ ءَ پیداک ات انت کہ مئے میتگ ءَ سھبانی سر ءَ مردم جان ءِ شودگ ءَ ھمے کور ءِ گورمانی تہ ءَ کاینت۔ من چاران اتاں کہ نزیک ءَ آیان ات انت بلے من پجا آرگ اش نہ اتاں گڑا من وتی ھمراہ ءَ را گُشت کہ اے درامد انت بیا رویں چیر بیں بلے ما چو کت کہ رویں چیر بیں یکے ءَ گوں وتی دست ءَ مارا اشارہ کت کہ بہ اوشت ات۔ من کہ گوں ھورتی ءَ چار ات داں گُشے پورہ من دیستگ ءُ کمو کہ نزیکتر ءَ اتک داں اے ہما ورنا انت کہ بیٹک ءِ دیوال ءَ لگوکیں اکس ءِ تہ ءَ بچکندگ ءَ بوتگ بلے کمبر انگت ہما وڑ بچکندگ ءَ ات۔ ما تچان ءَ کِرے شُت ایں مارا امبازاں زُزت ئِے۔

لھتیں وھد ءَ پد من دگہ میتگے ءَ پہ وانگ ءَ شُت آں۔ مئے کرا ھال ءُ اھوالے آسراتی نیست ات کہ نہ زانت چی بوگ ءَ ایں چی نہ بوگ ءَ ایں۔ یکروچے چہ وانگ جاہ ءَ موکل کتگ ات ءُ راہ ءِ سر ءِ دکان ءَ پہ چیزے زورگ ءَ مانتر اتاں گڑا دکان ءَ گپ ات کہ کمبر ءُ الیاس نزر ءِ ژانگولیں جون مرگاپ ءَ کپتگ انت۔ برے برے وَسر ءَ پُریں آزمان کپ ایت۔ آزمان سر ءَ کپتگ ات ناکو ءِ لوگ ءِ تھنائیں کشک ات ءُ نئیکہ لوگ ءَ ہمسروکے ھست ات کہ وت ماں وت کسہ بیاریں ءُ وت ءَ را تسلہ بہ دے آں ۔ من بے چین اتاں تکانسر اتاں بلے انگت زانگ ءَ نہ اتاں کہ گوں کمبر ءَ چونیں سیادی یے۔ بلے زند ءِ تہ ءَ انچیں وھدے اتک من زانت کہ اے سیادی گلامی ءِ سیادی بوتگ میتگ ءُ ھلک پہ کمبر ءَ پمیشکا تکانسر بوتگ انت کہ کمبر پہ ھمیشاں سپر ءَ بوتگ، جھد ءَ بوتگ، آزار سگگ ءَ بوتگ داں شھید بوتگ۔ نو من زانت کہ راج کمبر ئیگ انت ءُ کمبر راج ئیگ انت۔