جُھد ءِ راستیں ٹیلگ
نبشتہ کار : سنگین بلوچ
دی بلوچستان پوسٹ
کریمہ یَک اَنچیں جُھدکارے اَت کِہ ھما کار مردیناں سر زاھری کُت نہ کُت انچُش کِہ سیاست بِہ بیت مُلگِر ءِ تُرس ءَ ھمے کار کریمہ یک جوانیں دابے ءَ گوں دلیری وتی جند ءِ میتگ ءِ تہ ءَ بِنا کُتگ اَت سیاسی درس دیگ، مھلوک ءَ را سرپد کنگ کِہ سیاست چی یے، پرچا سیاست الّم اِنت پہ بلوچ ءَ ءُ گھگیری کُجام داب ءَ کنگ بیت اِے درستیں سرپدی کریمہ یک سکیں لاجوابیں رنگے ءَ مارا سرپد کُت ءُ شُت۔
من کریمہ چے پد سیاستدان ندیستگ ۔ کریمہ پہ وت جنگ ءَ نہ اَت آ پہ راج ءَ جنگ ءَ اَت پہ راج ءِ پھاز ءَ پہ کومیت ءَ مُدامی اوگان جنان اَت، دگّانی سرا در اَتکگ اَت کوکار ءَ اَت۔ نُک ءُ نادوکاں ھشک اَت ءُ مدامی تو بِہ دیستیں آئرا وتی جند ءِ پِگر نیست اَت ءُ ناکہ پہ اِے ھاتِر ءَ جھد ءَ اَت کِہ کسے بزانت کِہ کریمہ راج ءِ گم دِل ءَ اِنت۔ پہ کریمہ بلوچ ءِ جنگ ءُ بلوچیت اَچ درستیں چیزاں بالا اَت من داں ھوش داراں من کریمہ پہ گھگیری ءَ دیستگ۔ پہ بلوچاں اوشتگ ءَ دیستگ منی نِزّ ءَ کریمہ یک فرد ءِ اِناہ بلکیں یک سوچ ءُ پِگرے ءِ نام اَت۔ ھما سوچ ءُ پِگر کِہ ھمُک بلوچ ءِ دِل ءُ مجگ ءِ مٹین اِنت اَنت ءُ آھانی دل ءَ بلوچ ءِ مھر ءُ دردے رودینت۔
دوھزار ءُ ھژدہ ءَ اولی رند اَت کِہ من گوں کریمہ ءَ دیوانے کُتگ اَت ءُ گوں ھمے یکیں دیوان ءَ منی مجگ ءَ پہ کریمہ یک گِستائیں کِشکے جوڑ بوتگ اَت من سما کُتگ اَت کِہ کریمہ اگاں چیز بِہ بیت آئی مٹ دوبر ودی نہ بیت بِلّے سَتَر مئے راج ءِ توک ءَ زالبول بْیا اَنت، سیاست بِہ کن اَنت، بلے کریمہ کنڈ مدامی ھالیگ بیت ھما سوچ ءُ پگر کِہ کریمہ ءَ گون اَت ءُ ھما تربیت کِہ کریمہ بوتگ اَت کِہ آئی توک ءَ وتن پرستی، ھاک ءِ مِھر، وتی راج ءِ درواری ھست اَت آ مئے توک ءَ کدی بوت نہ کنت۔
اِے گپ راستیں کِہ بلوچ ءِ زمین سنٹ نہ اِنت ھزاراں کریمہ ودی کُتگ ئے بلے انگت من جزم گوشاں کریمہ ءِ کنڈ ءِ پُر کنگ دھرے پکار اِنت باور کن من وَت نہ زاناں چیّا من اِے داب ءَ جیڑگ ءَ اِت آں، کریمہ آ ساھتاں زندگ اَت، ھست اَت، جھد ءَ اَت گڑا من چیّا اِے داب ءَ چُرت جنگ ءَ اِت آں کِہ اگاں کریمہ ءَ چیزے بِہ بیت تَہ نہ مان اِیت پہ بلوچ ءُ جُھد ءَ ھِچّ! دیوان گوں جوانیں رنگے ءَ دیم ءَ شُت، سیاست، بلوچ، بزگی، اِے درستیں جیڑھانی پِگر کریمہ ءَ ھست اَت۔ کُجام جاہ ءَ کُجام کار کُجام وھد بِہ بیت اِے کُلیں ھبرانی چُرت اَت۔تمپ ءِ میتگ، شال ءِ جلواہ، بلوچستان زیبائی ءُ جنگ ءَ آماچیں زمین کِہ آئی زھگ اَت کریمہ اِے درستانی بابت ءَ آئرا انچیں مِھرے دِل ءَ اَت کِہ ھمُک گپ ءَ چے رند، ھمُک دیوان ءَ رند تو سما کُت کِہ آ بھانہ سازگ ءَ اِنت کِہ چونی ءَ بیرگ ءَ آ وتی زمین ءِ کسھاں بیار اِیت۔
دسمبر اَت گوں سارتیں بوم ءَ وتی سرجمیں آتراپ ءِ پتاتگ اِت اَنت، سال ءِ گُڈسر اَت ھمُک بنی آدم گوں وتی درد ءُ رنجاں دسمبر ءَ ڈوبارگ ءَ اَت کسے ءَ وتی دوستدار ءِ درد دل ءَ اَت کسے ءَ ماتے ءِ روَگ ءِ گم کُشگ ءَ اَِت ءُ کسے وتی رپتگیں بیلی ءِ یاتاں زَرَگ ءَ اَت ناگتہ تئی رپتن ءِ ھال مارا انْدر ءَ چے پروش دات ءُ گیدی ءِ ھمُک ندارھانی رنگ مٹ اِت امبری ئیں دسمبر ءَ چے پد کَس ءَ آیوکیں دسمبر ءِ چُرت ءَ وتی روچانی ھساب نہ داشت پہ راجے ءَ چِد ءُ مستریں روچ نئیتکگ اَت بیرگ ءَ ھمُک رنگ بدجلواہ ھمُک بچکند زدگ ءُ ھمُک کندگ زیمیگ۔
من داں دومی دیوان ءِ ھیال ءَ کپتاں کِہ اَچ تئی مرگ ءَ ساری یک روچے بوگّی اَت داں من پچلرز اِت آں کِہ ناگتہ جھد ءِ دیوال چو اے داب ءَ پروشت کنت، بیرگ ءَ بلوچ ءِ زمانگ چونی ءَ تھار بوت کنت، اِے وَ گپے نہ بوت کِہ نوں سیاسَت ءِ ڈیل ءُ بالاد کروتگ اَنت اِے ھم باوری دانکے نئے کِہ نوں سیاسی پتر چو ناگتہ پتاھگ بہ بنت پہ من وَ تئی رپتن ھَم کدی باسمائیں پیسلھے نہ اَت من مُدام جیڑاں کہ شرّیں ءُ نگدیں مردُم ءَ بائدے مرگ ءَ را شات مہ بنت پہ وت ءَ پرچا کِہ جھان ءِ سازوک نگدیں مردُم اَنت ءُ راجانی پھازوک بانوکیں بالادانی کار اِنت بلے بدکستمی ءَ بچار مئے! اِے کُلیں ھبرانی تھا دروگ تھنا ھمیش اَت کِہ من گوں وتی ھیالاں بندگ ءَ اِت آں کِہ کریمہ مُرت نہ کنت کریمہ مرگی نہ اِنت ءُ مرگ ءَ ھم کریمہ پہ وت ءَ شات نہ بیت ءُ راستی جار جنگ ءَ اَت کہ کریمہ مُرتگ ءُ دیر اِنت ساھے چہ باتِن ءَ لگوشتگ۔
کورے ءِ نیام ءَ برپ بستگیں جونے دیستگ ءُ ناگتہ مردُماں منّ اِتگ کِہ کریمہ بوتگ ما ھما موسُمی راج ءُ راج ءِ اوبادگ کِہ ما ھم باور کُت کہ ھو مَرگ راہ ءِ ھک اِنت ءُ ھو کریمہ ھم مُرتگ۔ دژمن اِے داب ءَ لگوری کنت کہ آئرا اَچ جنین ءِ ھستانک تُرس بئیت گڑا تَہ بزان کِہ کریمہ چونیں ارشی ٹُکرے بوتگ! مُلگِر ءَ مُدامی اَچ آ مردُم بیم کئیت کِہ آ وت ءَ چے گیش راج ءِ سوڑگ ءِ ھبر ءَ کنت کریمہ مرگ اِے ھبر ءِ پدری ءَ کنت کِہ آ راج ءِ یک راستیں ٹیلکگے بوتگ لُمہ ءَ چہ پد گُڑا نا شال ءِ آبشاراں کدی آئی ٹھکانی توار اَت ءُ ناکہ تمپ ءِ دمکاں سیاسی درسگاہ آباد بوت اَنت کریمہ کِہ رپت تَہ زمانگے رپت گوں آئی جُنزگ ءَ ءُ ما بَس تھنا لھتیں جون پشت کپتگیں کہ وت ءَ راج ءِ دروار لیکیں۔ سیاست ءِ نام ءَ ھزاراں سلکاری کن ئے ءُ نام ءَ دئے کِہ ما سیاست کنگ ءَ اِیں، ما دیوان اڈ دیگ ءَ اِیں ۔
بلے لُمہ گوں تو ھُنر کُت نہ کناں ءُ ترا ھال دیگ لوٹاں ھما کشک کِہ تو راست کُت ءُ شُت ئے آئی توک ھزاراں چپ ءُ چوٹی اَتکگ ھزاراں ھُنر ءُ ھیلہ ما کنگ ءَ اِنت بلوچ ءِ نام ءِ پُشتہ جاھے پہ وتن دوستیں ءُ جاھے ما روتگ بُریں تئی ھک ءُ ھلاریں کشک ءِ میان ءَ بازیں نوکیں کارِست ودی بوتگ کِہ تھنا پہ وھد ءُ موسم گِندگ ءَ کا اَنت ءُ من کِہ اِشاں گِنداں تَہ جیڑاں اِے ساھتاں تو اِد ءَ بوتین اِت ئِے تو الّم ءَ راہ گیشین اَنت ءُ مارا سوڑگ ءِ نیمگ ءَ بُرتگ اَت ءُ مئے گُلامی ءَ را زُبانے داتگ اَت کِہ دپ وت جار بِہ جتین ئے کہ من نیزور بوگ ءَ آں ـ کریمہ پھل کن کِہ منی اِے نبشتہ تئی بالاد ءِ ستاہ ءَ کمے ھَم کنگ ءَ نہ اِنت ۔
“تو پہ سرانی گُڈگ ءَ زند ءِ ھیالاں” “کُش ئے پہ سندگ ءَ داشت کن ئے پُلاں چہ بو تالانی ءَ “
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-