بلوچستان ءَ ھورانی گوارگ ءَ توپانی ھار ءُ گروک ءِ کپگ ءَ سے مردم بیران بیتگ انت

ھورانی سبب ءَ بازیں لوگ کپتگ اَنت، دگ بند بوتگ اَنت ءُ وئیلانی تہ ءَ بازیں پس ءُ گوک ھم مرتگ اَنت ۔

یک رندے پد ءَ بلوچستان ءَ ھوراں تباھی کتگ ءُ چہ بلوچستان ءَ بازیں دمگ چپ ءُ چاگرد مانپتاتگ انت۔

اے وھد ءَ بلوچستان ءِ دمگ چمن ءُ قلعہ عبداللہ ھور ءَ چہ گیشتر تاوان بار بیتگ انت ءُ ھور ءِ سبب ءَ لوگانی تہ ءَ آپ اتکگ ءُ سولر پینل ھم گوریچانی گوات ءَ پروشتگ انت وھدیکہ جاپر آباد ءَ بجلی ءِ ڈنڈی کپتگ انت ءُ شال چمن ءُ نوشکی ءَ ریلوے ءِ لین آپ ءِ آپ بڈینتگ ۔ ایشی ءِ آسر ءَ ٹرین ءِ سروس بند کنگ بوتگ-

ھور ءِ سبب ءَ جتا جتائیں وئیلاں چہ 10 مردم ٹپیگ بوتگ انت۔

مستونگ ءَ ھئور ءَ پد جوڑ بوتگیں توپانی آپانی سبب ءَ بازیں دمگاں لوگاں تاوان رس اتگ ۔ ءُ کردگاپ ءِ ھند ءَ ھار ءَ زالبولے برتگ ءُ بیران بیتگ کہ آئی ءِ لاش کشگ بیتگ-

دومی نیمگ ءَ مَچ ءَ ھور ءِ سبب ءَ بولان مزن شھدگ ءِ نزوریں دمگ آپ ءَ بڈینتگ انت کہ ایشی ءِ آسر ءَ توپانی ءِ آپ ءَ سبب ءَ ہرک کازوے ءَ بازیں مھتل بیتگ انت-

این ایچ اے ءِ کارندہ گشگ ءَ انت کہ سیلاب ءِ سبب ءَ چہ بلوچستان پاکستان ءِ دگہ دمگاں کُٹگ بوتگ۔

چہ ایشی ءَ ابید بلوچستان ءِ ھزدار ءِ دمگ ءَ ھور ءِ وھد ءَ سرونا کوڈیانک ءَ ھور ءِ سبب ءَ عمران دینارزی ءُ محمد اسماعیل دینارزئی مینگل نامیں دو دو شوانگ گروک ءَ گپتگ ءُ بیران بیتگ انت-

عمران ءُ اسماعیل نامیں دو مردم گوں وتی دلوتاں وتی لوگ ءَ واتر بوھگ ءَ بوتگ اَنت ھما جاہ ءَ گروک ءَ گپتگ ءُ بیران بوتگ اَنت ءُ یازدہ پس ءُ گوک ھم ھما جاہ ءَ مرتگ انت-

نوشکی ءِ شھر ءَ گوں ھمگرنچیں مستریں پُل آپ ءَ پروشتگ ءُ شھر ءِ زمینی راہ بند بیتگ-

دومی نیمگ ءَ محکمہ موسمیات ءَ آیوکیں لھتیں روچاں گیشتر ھئور ءِ پیشگوئی کتگ، وھدیکہ شھریانان جتاجتائیں دگاں سپر کنگ ءَ چہ مکن کنگ بوتگ انت-