وانگ چے ءَ گْوش اَنت؟
نبشتہ کار : نازیہ بلوچ
دی بلوچستان پوسٹ
یک نبشتگیں چیزے ءِ چارگ، سرپد بوگ ءُ پد ءَ آئی ءِ توارینک کنگ ءَ وانگ گْوش اَنت۔ چوناھا وانگ ءِ سے کاریچ ءُ بھر اَنت۔ البت چہ اے سےئیں کاریچاں اولی دوئیں کاریچ لازُم ءُ مستریں بھر گْوشگ بنت۔ انی ما وانگ ءِ سے بھراں دلگوش کن ایں۔
گالانی چارگ: اے بھر ءَ وانوک وتی چماں کارمرز کنت، نبشتہ ءِ گالاں چار ایت ءُ نبشتگیں گالرِد ءِ گالانی پجّارگ ءِ جُھد کنت، بزانکہ گال ءَ گِند ایت۔
سرپدی زُورگ: وانگ ءِ دومی بھر ءَ وانوک وتی اگل، بزانکہ کہ مجگ ءَ کارمرز کنت۔ اے بھر ءَ وتی چار اتگیں گالانی سرپد بوگ ءِ جُھد کنت کہ چے نبشتہ اِنت؟ بزانکہ گال ءُ سرجمیں گالرِد ءَ پھم ایت ءُ سرپدی زُور ایت۔ ماں وانگ ءِ کار ءَ اے بھر یک بلاھیں ارزشتے دار ایت پرچا کہ اگاں وانوک گالانی چارگ ءُ پجّارگ ءَ پد سربد بوگ ءُ زانگ ءِ جُھد نہ کنگ ءَ اِنت گُڑا بزان کہ وانگ ناسرجم اِنت۔ وانگ ءِ نیم بھر سرپدی زورگ ءُ زانگ ئیگ اِنت۔ اگاں ما وانگ ءِ کار ءَ سرپد نہ بوگ ءَ ایں گُڑا بزانکہ ما نہ وانگ ءَ ایں پمیشکا وانگ ءِ تہ ءَ سرپدی زورگ المی اِنت۔
توار کنگ: وانگ ءِ سیمی ءُ گُڈی بھر ءَ بنی آدم وتی دپ کارمرز کنت۔ اِے بھر ءَ وانوک وتی چار اتگ ءُ پجّار اتگیں گال ءَ توار کنت کہ دیم پہ دیم ءَ ساڑی ئیں مردم نبشتہ ءَ بہ اشکُن اَنت ءُ دِگہ مردم ھم سرپد بہ بنت۔
اے بھر وانگ ءِ لازمی بھرے نہ اِنت پرچا کہ لھتیں مردم کتاب ءُ ھالتاکاں ھاموشی ءَ وان اَنت۔ وھدیکہ ما گِند ایں کہ مئے کِر ءُ کَش ءَ کسے واب اِنت گُڑا ما کتاب ءُ دِگہ نبشتھے تھنا چار ایں ءُ وان ایں۔ ایشی ءِ مستریں درور ویش اِنت کہ گُنگ ھم بے تواری ءَ وان اَنت۔
انی ما وتی نبشتانک ءِ گُڈی بھر ءَ بلوچ نودربراں سرپدی دیگ لوٹ ایں کہ مئے راجی زُبان بلوچی ماں وانگجاھاں وانینگ نہ بیت پمیشکا بلوچ نودربر ءُ وانِندہ بلوچی وانگ ءَ نزور اَنت یا وانگ ءِ وھد ءَ سک اشتاپ کن اَنت پمیشکا ما گوں بلوچی وانوکیں نودربراں دزبندی کن ایں کہ پیسر بلوچی دَرونتاں بہ وان اِت کہ سرپدی چہ وانگ ءَ رس ایت۔
اگاں ما وتی راجی زُبان ءِ شریں نبشتہ کار، جُھدکار ءُ سرمچار بوگ لوٹ ایں گُڑا باید اِنت ما چہ دُرستاں پیسر بلوچی دَرونتاں سرجمی ءَ بوان ایں، بلوچی رنگ گال(یں ءُ ئیں)، تپورگال(ءِ ءُ ءَ) ءُ کُمکّارگالاں دلگوش بہ کن ایں، چہ دَرونتانی وانگ ءَ پد نامداریں بلوچ نبشتہ کارانی زبان دوستی ءُ راجدوستی نبشتانک وانان کن ایں کہ سرپدی چہ وانگ ءَ رس ایت۔ ھچبر اشتاپ مہ کن ایں بلکیں نبیسّگ ءَ پد مُدام وتی نبشتگیناں دوبر وت ھم بوان ایں ءُ چمشانک بدے ایں کہ مئے نبشتگیں گالرِدانی توک ءَ ردی مہ بیت، پرچا کہ دُنیا ءِ تہ ءَ ھر زُبان ءِ اُستاد، نودربر ءُ نبشتہ کار وتی نبشتگیں چیزاں دو بر وت وان اَنت ءُ وتی بے ھیالی رَدیاں راست کن اَنت۔
چہ ایشی ءَ ھوار نبشتہ کاراں اِے (، ۔؟:!“/:”;) لبزانکی چیدگ، ٹک ءُ نشان ماں راستیں جاھاں کارمرز کنگی اَنت کہ اِے لبزانکی چیدگ دُنیا ءِ ھر زُبان ءَ کارمرز بنت۔ اگاں ما اے لبزانکی چیدگاں سرپد نہ ایں گُڑا باید اِنت ما ایشاں بزان ایں۔ چوناھا ما اے لبزانکی چیدگاں چہ ھر وڑیں زبانے ءِ کتاب، ھالتاک ءُ نبشتانکاں ھم ھیل کُت کن ایں پرچا کہ توری دُنیا ءِ ھر وڑیں زبانے بہ بیت نبشتھی دْروشم دُرستینانی یک اَنت۔ چہ ایشی ءَ ابید ما گْوں شما دزبندی کن ایں کہ پہ بلوچی وانگ ءُ زانگ ءَ ھچبر بد مہ مار اِت، مُدام چہ بلوچ نبشتہ کاراں دبرگ ءِ جُھد بہ کن اِت، بلوچی درونتاں وانان ءَ وت ءَ راجی زبان ءِ نبشتہ کار جوڑ بہ کن اِت، بلوچی وت بہ وان اِت ءُ راج ءَ ھم بہ وانین اِت۔
بلوچ راج شالا زبان دوست، راجدوست ءُ یکمُشت بہ بات۔ پہ راجی زُبان ءِ دیمروی ءَ بلوچ راج ءِ وانِندہ، اُستاد ءُ نودربر وت ماں وت تپاک، ھمگام ءُ ھمکوپگ بہ بنت۔
دلگوش: ما راجی زبان ءِ جُھد ءَ اے مار اتگ کہ یک انچیں نبشتانکے تیار بہ کن ایں آ زِند ءِ ھر پِڑ ءَ بلوچ واِنندہ ءُ نودربراں پائدگ بہ دنت پمیشکا گوں شما دزبندی اِنت کہ مئے اِے نبشتانک ءَ دیم ءَ ھم روان بہ کن اِت کہ چہ ایشی ءِ وانگ ءَ راج ءَ ھم پائدگ بہ رس ایت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔