ایرانی صدر ءِ پاکستان ءَ سئے روچ ءِ دورہ ءُ بلوچ راجی جُنز
نبشتہ کار: یحییٰ بلوچ
دی بلوچستان پوسٹ
19 اپریل ءَ ایران سرکار ءِ نیمگ ءَ جار پرینگ بوتگ ات کہ ایرانی صدر ابراھیم رئیسی سئے روچ ءِ گند ءُ نِندی ءَ پاکستان ءَ کیت۔ آیگ ءَ یک روچے پیسر 21 اپریل ءَ بی بی سی اردو ءَ رپورٹے شنگ بوتگ اَت کہ اے میان ءَ ابراھیم رئیسی گوں پاکستان ءِ وزیر اعظم شھباز شریف، صدر آصف علی زرداری ءُ گوں فوج ءِ سروک عاصم منیر ءَ گوں مُلاقات کنت۔
رپورٹ ءَ جتا جتائیں ایجنڈا مان اِتاں کہ دوئیں مُلکانی نیام ءَ باوست کنگ بنت ءُ اے ایجنڈھانی تہ ءَ یکے بلوچ آجوئی لوٹوکیں جُنز اِنت۔ دگہ یک تجزیہ یے دیر اِنت کہ ھست اِنت کہ پاکستان ءُ ایران ءِ سیادی ھما وھد ءَ ھراب بوتگ اَنت وھدے ایران ءَ پاکستان ءِ ایردستیں بلوچستان ءِ سر ءَ اُرش کُتگ ءُ ھمئے داوا کُتگ کہ آئی ءَ ناشرکارانی ھلاپ ءَ کاروائی کُتگ ءُ ایشی ءِ پَسو ءَ پاکستان ءَ ایران ءِ ایردستیں سیستان ءُ بلوچستان ءَ اُرش کُتگ ءُ ھمئے داوا کُتگ کہ آئی ءَ ناشرکارانی ھلاپ ءَ کاروائی کُتگ۔
بگندے دنیا ءِ چماں اے پاکستان ءُ ایران ءِ نیام ءَ جنگے بوتگ بلے بلوچ ءِ نگاہ ءَ اے دوئیں استانانی شوربندی یے کہ دوئیں نیمگ ءَ بلوچ ءِ چُکچینی ءَ بہ کنیں پرچاکہ چہ اے کاروائیاں نہ پاکستان ءَ نُکس ءُ تاوانے رس اتگ نئیکہ ایران ءَ بلکیں دوئیں نیمگ ءَ بلوچ مُرتگ انت کہ بلوچ ءِ مِرگ دوئیں استانانی شوربندی یے ءُ دوئیں استان جتا جتائیں شوربندیاں گوں بلوچ ءِ چکچینی ءَ کنگ ءَ اَنت۔ یک نیمگے پاکستان گار ءُ بیگواہ کنت ءُ پد ءَ ژانگولیں جوناں ماں ویرانگاں دور دنت ءُ یک نیمگے ایران بارت ءُ پھانسی دنت۔ بازیں تجزیہ کارے اے گند ءُ نِند ءَ میان استمانی سیاسی جاورھالانی مٹ ءُ بدلی ءِ ھساب ءَ چار اَنت بلے پاکستان ءُ ایران ءِ سیادیانی سر ءَ ھورت چاروکیں تجزیہ کار کوئنسی انسٹٹیوٹ فار رسپانسبل سٹیٹ کرافٹ ءِ میڈل ایسٹ پروگرام ءِ ڈپٹی ڈائرکٹر ایڈم وینسٹائن ءِ گُشگ اِنت کہ ایران ءُ پاکستان بیپاری ءُ سکیورٹی ءِ جیڑھانی آماچ اَنت۔
ھمے رنگ ءَ ڈاکٹر کامران بخاری ءِ گُشگ اِنت کہ میدل ایسٹ ءِ سیاست ءَ گیش اے گند ءُ نِند گوں دوئیں مُلکانی سکیورٹی ءِ جیڑہ ءِ گِش ءُ گیوار کنگ سر ءَ بیت۔ اد ءَ یک چیزے یات کنگ بہ بیت کہ اے سال ءِ بندات ءَ پاکستان ءِ ھلاپ ءَ بلوچ سلاھبندیں جُنز گوں تیزی ءَ دیم ءَ اَتکگ انچو کہ 29 فروری ءِ شپ ءَ بی ایل اے ءِ فدائی ونگ مجید برگیڈ ءَ ھوار فتح اسکوڈ ءُ اسپیشل ٹیکٹیکل آپریشنل اسکواڈ بلوچستان ءِ شھر مچ ءِ سر ءَ اُرش کن اَنت ءُ داں شپے ءُ روچے 72 کلومیٹر ءِ ریڈیئس بی ایل اے ءِ کبزہ ءَ بیت۔
ھمے سال ءِ سیمی ماہ مارچ ءَ بلوچ فدائی گوادر ءَ ہائی سکیورٹی زونے ءَ سر بوئگ ءَ سوبمند بنت ءُ داں چار کلاک ءَ جنگ دار انت ءُ بازیں فوجی ءَ ھوار، ایم آئی ءُ آئی ایس آئی ءِ کارندگاں کُش اَنت ءُ ھمئے ماہ ءَ دگہ فدائی اُرشے تربت شھر ءَ پاکستان نیول اسٹیشن (پی این ایس) صدیق ءِ سر ءَ کنگ بیت کہ داں سرجمیں شپے ءَ اے اُرش برجاہ بیت ھمے ڈول ءَ 4 اپریل ءَ جیش العدل مزنیں آپریشنے ایران ءِ ایردستیں بلوچستان ءِ دمگ چابھار ءُ راسک ءَ بندات کنت ءُ دومی روچ ءَ آپریشن ءِ ھلاسی ءِ جار ءَ جنت ءُ مزنیں کساسے ءَ ایرانی سُپاھیانی کُشگ ءِ داوا ءَ کنت۔
اے جاورھالانی نیام ءَ دوئیں مُلکانی نیام ءَ گِند ءُ نِند نوکیں شوربندیانی شُبین ءَ دنت۔ اے گند ءُ نند انچیں وھدے ءَ بوئگ ءَ اَنت کہ پاکستان ءِ صدر آصف علی زرداری اِنت ءُ چوناھیگا اے کول (پیپلز پارٹی) ءِ سیادی گوں ایران ءَ بُندپتری اَنت انچو کہ زُلفقار علی بھٹو ءِ زمانگ ءَ 1970ءِ دھک ءَ بلوچستان ءَ مزنیں فوج کَشی یے بندات بیت داں گندگ بیت ایران پاکستان ءَ گوں مزنیں بالی گراب ءُ جنگی جھازاں ایف-16 آں ھوار مالی کُمک کنت پد ءَ 2013 ءَ وھدے آصف علی زرداری پاکستان ءِ صدر بیت پاکستان ءُ ایران ءِ نیام ءَ یک منّگ نامہ یے کنگ بیت ءُ گیس پائپ لائن ءِ سر ءَ کار بندات کنگ بیت کہ اے انو مزنیں وھدے ءَ داں اوشت آماچ بوتگ ءُ انو پد ءَ زرداری ءِ صدر بوئگ ءَ گوں ایران ءِ صدر پاکستان ءِ سئے روچ ءِ گند ءُ نندے ءَ پاکستان ءَ اتکگ ءُ گیس پائپ لائن ھم باوستانی یک ایجنڈا یے۔ اے رنگیں جاورھالاں دوئیں مُلکانی نیام ءَ گند ءُ نِند ءَ چہ بلوچ ءَ شیوار بوئگی انت ءُ ایران ءُ پاکستان ءِ نیام ءَ بوتگیں شوربندی پوہ بوئگی اَنت داں اے ھند ءَ وتی راجی جُنز ءَ گوں گیش تیزی ءَ دیم ءَ بہ بارت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔