سرمچار چو گُلزمین ءَ تئی مِھراں پھاز ایت
نبشتہ کار: کمبر اسماعیل
دی بلوچستان پوسٹ
انسان ءِ کہ لانک پہ زمین ءِ پھازگ ءَ بند ایت وتی ساہ ءُ سرے پرواہ ءَ نَہ کنت۔وتی زند ءِ سرجمیں وشیاں پہ زمین کربان کنت۔مھر ءُ وپا ءِ گُڈّی سیمراں چی ھم گواز ایت۔آئی ءِ ساہ گوں زمین ءَ بندوک بیت اِنت ۔زمین ءِ بزگی ءَ چو ماتی ءَ دل ءَ بند ایت ۔اِشکریں درداں زمین ءِ وتی اندر ءَ جاگہ دنت۔گلزمین ءَ چی دیم کَس ءَ نہ جیڑ ایت۔گڑا نوں گلزمین ءِ پھازوک ءُ سرمچارے گوشگ بیت اِنت۔
منی گوں زمین ءَ مھرے کّسہ سک دیر اِنت کہ منی اندر ءَ رُستگ ءُ مزن بوتگ ۔تِپلیں کسانی ءَ گر دانکہ ورنائی ءِ بھاراں بیا زمین ھر رنگ ءَ درپشان اِنت ءُ چو کندیل ءَ رُوک اِنت۔من باز رندا جیڑ اتگ چونیں مھری پہ زمین ءَ کہ باز رند ءَ ما ایشی ءَ شمار کُت نہ کن ایں یا مارا سماء نہ بیت اِنت زمین ءِ مھر کُجام چیز ءِ نام اِنت بازیں پٹ ءُ پول ءَ پد من وتی در کسانی ءَ گر دانکہ ورنائی ءِ بھار ءَ بیا ھر رنگ ءَ ،ھر دُروشم ءَ ،ھر ساھتاں ءُ ھر وھد ءُ پاس ءَ زمین ءَ گِنداں کہ گوں من ءَ گون اِنت۔
آ منی مات ءِ شپانی پاس ءَ پہ من ءَ لیلو ءِ الھان بہ بِیت،یا گرم ءُ تبدیں روچاں مات ءِ سَریگ ءِ ساھگ، مات ءِ گیمرتگین بچکند بہ بِنت یا درداں گوں بستگیں پریات ۔گُھاروکانی لاڑین مھر بہ بنت یا وشیان پہ وداریں چم گُھارانی دُرست منی زمین ءِ رنگ اَنت۔درست من ءَ گوں زمین ءَ بندوک کن اَنت۔ پت ءِ چیر داتگیں مھر بنت یا کہ کماش ءِ دیستگیں واب ۔براتانی مھکمین کُوپگ بنت یا آئی ءِ سنگتی مھر ،دُرست زمین ءِ رنگ ءَ اَنت درست من ءَ زمین ءَ گوں نزدیک کن اَنت۔
مئے میتگ ءِ پِیرین کُنر بیت ،یا ھما کور دیم ءِ لیب جاہ ،کسانی ءِ کُودکین واب بنت ،یا چہ جھان ءَ بے سُودی ، دُرست من ءَ زمین ءِ مھراں پیشداراں در کسانی ءَ چہ زمین مارا رُودین ایت ءُ ورنا کنت۔پد ءَ مرگ ءَ پد ھم وتی ھمبازاں زُور ایت،اے مھراں چون کسّے بے ھیال کرت کنت؟۔
سرمچار زمین ءِ واستا زندگی ءَ دمانی ھم نچار ایت۔وتی درستیں وشیان کربان کنت ۔اگاں زمین ءِ راہ ءَ مَرگ اُشتوک بہ بیت گڑا مَرگ ءَ گوں گل ءُ شاد وش آھت کنت ءُ زمین ءِ ھمبازاں زور ایت۔
من پد ءَ مدام زمین ءِ رنگ شوھاز کتگ اَنت کہ ھمے رنگانی توک ءَ من ملار بُوگ لوٹ اتگ منی وشی گوں ھمے رنگاں بندوک بوت اَنت من ساہ زُرتگ گڑا پیسر ءَ زمین اتک ءَ۔زمین ءِ زیبائی منی دیم ءَ چو بانوری ءَ سمبھیتگ اَنت من ءَ مدام زمین ءَ منی مھروانیں شرکنیں مھرانی ترانگ دنت۔
مھروان منی زند ءِ ھما بھر اِنت کہ آئی ءَ ابید منی زند گوش ئے نا سرجم اِنت یک انچیں موڑے ءَ مھروان منی زند ءَ اتک ءَ کہ اے ساھتاں،من وتی زمین ءَ سک نزدیک ءَ چہ گندگ ءَ اتاں مئے سنگتی سک مھکم ات،ءُ من ودار اتاں کہ کَدین زمین ءِ زَنسراں سر ءَ ایر بہ کناں بلے اے ساھتاں کہ مھروان ءَ منی دست گِپت گڑا من زانت،نوں بگندے مئے وشی کربان بنت۔ودارانی گرانیں ساھت ھر روچ چو آس ءَ سوچنت۔بلئے مئے سپر پہ زمین ءَ ات ءُ زمین مئے مھر ءِ گواھی ءَ الّم دنت۔اے دیدار ءِ تلب ،اولی نگاھانی زیبائی ، تئی زانسران دردانی درشان کنگ،کل ناسرجم بوت اَنت بلے ءِ کوہ زان اَنت اے کُمبانی آپ ،روچ زرد ءِ ندارہ کل مئے مھر ءِ گواھی ءَ دے اَنت-
من جنگ ءِ تہ ءَ گورتگیں تیرانی اندر ءَ تئی آواز اُشکُتگ،من تئی زیبائی ھر رنگ ءِ تہ ءَ مار اتگ تو منی پُروشتگیں واباں مدام اتکگے ءُ منی پیشانی چَک اتگ ءُ من ءَ دنیا ءُ جھان ءَ چہ آزاد کتگ۔مرچی کوہ ءِ دلبند ءَ کہ من ترا پہ لبزاں ندر کنگ ءَ آں ۔من ءَ انچو سما بیت تو منی سر وتی دلبند ءَ ایر کتگ ءُ مُودان پلگارگ ءَ ئے من چمے ترا چارگ ءَ آں ءُ پد ءَ بچکندے ءَ گوں پہ ترا لبزاں سینگارگ آں۔
بیگاہ ءِ وھد کہ سر ءَ ساھگ کنت گڑا الّم تو کائے منی ھیالانی اندر ءَ دُور کن ئے۔من تو ھوار نندیں تُپنگ ءُ تیراں سَاپ کن ایں تو ٹھک دے ءُ کندے من ءَ مزاک کن ئے من ھم ترا چاراں ءُ بچکنداں ۔
بیگاہ کہ کُٹ ایت من سما کناں ءُ ھیالاں چی پَچ گُڑا۔کوھانی چپ ءُ چاگرداں چاراں کس نیست بس تئی زھیر ءُ وشبو شِنگ اِنت دگہ ھچ نیست پد ءَ منی ودار بندات بیت پہ شپ ءِ تھنائی ءَ کہ تو الّم کایے منی واباں منی زھیراں کم کن ئے گڑا من سک گل باں۔سرجمیں شپ بس من ،تو ،زمین دیوان اِنت روچ کہ سُھب ءِ سرا ٹک دنت گڑا پد ءَ تو من ءَ دست گِرے ءٗ گلزمین ءِ زیبائیں ندارھانی چارگ ءَ بَرے۔
یک روچے ھم تو اگاں منی ھیالاں مَیایے زمین وت من ءَ تئی کُلوہ ءَ دَنت،کہ مھروان ترا باز جیڑگ ءَ اِنت۔گڑا من پہ تَچگ تئی ھمبازاں کایاں۔من زاناں ترا باز گِلگ چہ من ءَ ھست اِنت۔بلے مئے یک مھروانیں دیدارے کُل زھر ءُ دلگرانی ءَ چی آزات کنت۔ بس من ترا گوشگ لوٹاں جھان مارا زانت یا نزانت ءِ مئے درد سر نہ اِنت۔بس گلزمین زانت گڑا زمین مارا وت وتی دلبند ءَ جاگہ دنت۔تو پہ من چو منی گلزمین ءَ نزدیک ءُ مھروان ئے ،ءُ من ترا گوں وتی بھشت رنگیں زمین ءَ ھوار داں گڈی ساہ ءَ پھریزاں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔