اکساں زبان رُودینتگ
نبشتہ کار: سمیر بلوچ
دی بلوچستان پوسٹ
اے ھبر راست اِنت سرور جان پنام کمانچر بلوچ یک دل پھک ءُ تچکیں بامردے اَت ایشی ءَ ابید اکسکاری ءِ پڑ ءَ کمانچر ءَ ھما اکس کش اِت اَنت کہ مروچیگیں ایردستیں اھد ءَ آئی ءِ نام کرنانی کرن مان اِیت۔ اکسکار باز اِنت ڈولداریں ءُ براھداریں اکساں چہ آوانی گیلری ءُ اکسانی لڑاں چارگ ءَ دمبر ئے۔ یکیں ھند ءُ یکیں داب ءِ اکس مردمانی واست کوھنیں چیز بنت بلے کمانچر ءَ وتی اکسکاری ءِ دورشُم ءَ کمال کُتگ اَت آئی ءِ اکساں وڑ وڑیں چاڑ ءُ ابیتکی گُون اَت، درتہ پُچّی ءُ چمداریں زند ءِ گوناپ سھرا اَت۔ اگاں کسے اے اکساں گند ایت گڑا ھما اکسانی ءِ تہ ءِ چیریں کسہ ءَ ھم پھم اِیت۔
کمانچر ورناھیں اکسکار ئے آئی ءِ اکسانی بالاد سک پزور اَنت منی وڑیں بے کردیں مردمانی توسیپ ءُ ستا ءِ مھتاج نہ اِنت۔ منی کدّ اینکس نہ اِنت کہ کمانچر ءِ اکس ءُ ندارگانی کدّ ءَ نبشتہ بہ کن آں۔ تئی رپتن سک تورناک اِنت اے انچیں سھتاں مُردم تھنا بے وس بیت اھو بے وسی اِنت درد ءُ اندو اَنت۔ باید اِنت اے در ما دیری پچ کُتیں ھما کہ مئے راجی مڈّی اَنت اکسکار بہ بنت یا تامُر ساچ ءُ گشندھ چُشیں مردمانی ازمی بالاد ءِ سر ءَ ھما کدّ نبشتہ بوتیں تانکہ ھما اکسکار، تامُر ساچ ءُ گشندھاں ھمے بہ مار اِتیں مئے چاگرد ءَ اکسکارانی اکسانی سر ءَ گپ جنوک ھست، تامُرانی چارگ ءَ پد دلبڈی ءُ ایراد گِرگ ءِ بودشت ھست، گشندھانی وش الھانی ءُ شئرانی گچینی ءِ بابت جیڑگ ءُ نبشتہ کنگ ءِ توکل ءُ توان دار ھست-بلے پھلی لوٹاں ھما رپتگیں ھزمتکار، اکسکار، تامُر ساچ، شائر ءُ گشندھاں چہ ما ایوک ءَ آوانی مرگ ءِ ھال ءَ پد سوب کن ئے۔
اے ھبر منّگی اِنت کمانچر ءَ وتی ایردستیں راج ءِ ھما بزّگی پیشداشتگ اَنت مرچی آئی ءِ ھاترا ھر ھند ءُ دمگ موتک آرگ ءَ اَنت ءُ آئی ءَ ستک شانی ندر کنگ ءَ اَنت۔ دگہ جیڑھے گیشینگ لوٹ آں مئے کِرا مین اسٹریم میڈیا Main Stream Media ءِ دست رس نیست، ھمے رِد ءَ ڈنی ءُ در ملکیاں بہ گر داں بلوچستان ءِ جتا جتاھیں دمگاں نندوکیں بلوچ راج اکسانی ندارہ کنگ ءَ پد جیڑ ایت یک تچکیں اکسکارے چہ پیئم ایردستی ءِ مانا کنگ ءَ کردارے پیلو کنت۔ اے ورناھیں بالاد ءُ نہ گیگیں جاور ھال ءُ ناجوڑی ءَ ابید کمانچر ءَ وتی سلاہ بڈا بوتگ۔ بلوچ بوھگ گران اِنت اگاں گرانیں بھر ءَ ارزان کنگ لوٹ ئے گڑا ھر مردم ءَ وتی کار زانگی اِنت، کمانچر ءِ درور زُورگ کپ اِیت چیاکہ آئی ءَ وتی اکسانی دروشُم ءَ دژمن ءِ گُپتمان پر ریتکگ اَنت۔
اکسانی زبان ءَ ھچ تاکت بے توار ءُ بے برمش کُت نہ کنت زوراک اکس کش ءَ کُشت کنت بلے اکس ءَ کُشت نہ کنت۔ اکس پھازگی اَنت اے ایوک ءَ اکس نہ اَنت ایشانی اندر ءَ زُوراک ءِ زوراکی ءُ زالمی ءِ داستان بندوک اَنت۔
کمانچر مھروان ءُ مھر درنزیں ندارگانی زیبائی ءِ نام اِنت چُشیں ڈولداری مردم ءِ تب ءَ وشنود کنت۔ کمانچر ھچبر شموشگ نہ بیت اگاں کمانچر ءَ شموش ئے گڑا مارا آئی ءِ ندارگ المّ ءَ آئی ءِ ترانگ ءَ گیج اَنت کہ چُشیں اکسکارے مئے زمین ءِ وارس بوتگ کہ آ مند ءِ جامنند اَت بلے مرچی نہ ایوک ءَ مند پُرسیگ اِنت بلکیں تیوگیں بلوچستان درد ءُ اندوھاں دوچار اِنت۔ کمانچر ءِ واھگ اَت من تیوگیں بلوچستان ءِ زیبائیاں ءَ گُوں اکساں دیم ءَ کاراں بلے کمانچر ءَ وتی وس ءُ واک ءَ کمک کُتگ اَت۔ نوں اے کار اوشت ءِ آماچ نہ بیت ناکو کمانچر دل ءَ سدک اِنت کہ ایندگہ بلوچ اکسکار چہ بلوچستان ءَ بیھال نہ بنت آ درھیں اکسکار وتی سلاھاں بند اَنت ھما کارست ءُ ندارگاں دیم کارنت کہ وھد ءِ مُجاں چیر تر اِتگ اَنت اُمیت کناں کہ مئے اکسکار چو ارزانی کمانچر ءِ واھگ ءُ واھشتاں اشکندی نیل اَنت۔
ناکو کمانچر ءُ کسان سالیں دلدار ءِ لُکیں تامُر:
کسان سالیں دلدار کہ جیگ ئے پچ اِنت دپ ءُ لُنٹاں چہ ھُشک اِنت۔ آئی ءِ گُشگ اِنت من وانگ ءَ نہ اَنت ھمے وڑا تامُر ءِ تہ ءَ دلدار کسّہ کنت من وتی پِت ءِ مستریں بچ اَنت منی پِت پیر اِنت ءُ کار ءُ کٹ ءِ رُج ءَ نہ اِنت بُوٹ پالش کنگ ءُ کستریں برات ءُ گُھارانی لاپ ءِ زمہ واری من وتی نزوریں کوپگاں زُرتگ۔ دلدار گُشیت کہ من پنجاہ ءُ سد کلدار ءَ بُوٹ پالش کناں، روچ ءِ کٹ ءُ کمائی چار سد ءُ پنچ سد ءِ کَچّ ءَ کیت۔ دلدار گپے زان ئے مئے بھت ءَ انچیں دژمنے کپتگ کہ آ ھچبر نہ لوٹیت کہ دلدار گونگیں گونڈل بوان اَنت۔ آئی ءِ جُھد ھمیش اِنت کہ بلوچ ءِ زھگ گیش گُوں انچیں جیڑاھاں دوچار بہ بیت تانکہ وتی راستیں راہ ءَ شوھاز اِت مہ کنت۔کمانچر ءِ توکل ءُ ھاٹیگ ءَ دُروت ندر کناں کہ چُشیں جارواں مارا مئے جیڑاھانی نیمگ ءَ دلگوش گور کنگ ءِ سیکین اِش دات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔