زاھر جان منی اھد ءِ جُنزوکیں کامریڈ
نبشتہ کار: سعودنؔاز
دی بلوچستان
چوناھا مرگ انسان ءَ چہ گوانزگ ءَ گون اِنت ءُ پیداک اِنت ھما روچ ءَ کہ مات ءِ کُٹ ءَ مردم رُدوم زور ایت بلئے لھتیں اَنچیں کوہ گردیں ءُ مھروانیں سر بنت کہ پہ ڈگار ءُ پہ وتی راج ءَ زندگی کن اَنت ءُ زند ءِ کتاب ءَ وتی گُڈّی تاک ءَ پہ جوانمردی نبشتہ کن اَنت ءُ رُکست بنت، کامریڈ زاھر جان ھم ھمے سر ءَ چہ یکے اَت کہ چاگرد ءَ نشتگ اَت مدامی وانگ ءَ اَت ، راجی نودربر ئے ءِ بستار ءَ سنگتانی سیاسی تربیت ءَ بگر داں راجی سنچ ءِ ودی کَنگ ءَ مدام ساڑی اَت ءُ لانک ءِ بستگ اَت ءُ جنزان اَت ، چُشیں سرانی پہ ناگتی روْگ پہ بلوچستان ءَ زنڈیں تاوانے بلئے کار ءِ کہ ھُدا بکنت وَ دست نہ رس ایت ، ھون چکاریں دگ بہ بنت یا پاھو ءِ رنگ ءَ نوجوانانی وت کُشی بہ بنت کجام ھم دروشم ءَ اَستان اَستیں وھد ءَ بلوچ ءِ کُشگ ءَ پہ ھچ وڑا چک ءُ پد نہ بیت ءُ وڑ وڑیں پندل ساز ایت زاھر جان گوں وتی نمیرانیں سنگتاں ھم ھمے رنگ ءَ دگ وئیل ءَ شھید بیت ءُ اَچ ما جسمانی سورت ءَ رُکست بیت ،بلئے چُشیں کار کنوکیں ءُ وانوکیں نوجوان پہ اَبد نمیران بنت چیا کہ آیانی توک ءَ راجی سِنچ ءُ بود مان بوتگ ءُ مدام پہ وتی لگتمالیں راج ءَ جیڑگ ءُ جنزگ ءَ بوتگ اَنت ، مردم وَ ھرچ رنگ ءَ یک روچے مِر ایت بلئے چُشیں مرگ انسان ءَ تَھ پُروش کنت-
من ءَ یات اِنت سال دو ھزار ءُ بیست ءُ چار ءِ اول سر اَت کہ من گُڈّی رندا زاھر ءَ گوں اھوال کُتگ اَت کہ پنجاپ ءِ یونیورسٹیانی ایڈمیشن کہ کایاں گڑا من ءَ ھال بکن ءُ منی ایڈمیشن ءَ بکناھین من ءَ شرّیں وڑ ئے ءَ سر ءُ سوج ءِ کُتگ ءُ گُشتگ اَت ئے کہ من انّی کراچی ءَ آں شال ءَ کہ سرکپ ایت گڑا نیاد ءِ کناں بلئے ھردیں کہ ڈیک وارتگ اَت اگاں کُلوہ ءِ کُلوہ ءِ دیمے داتگ اَت تاں مردم ءَ مارِ اتگ اَت کہ واکی زاھر بلوچ تَب ءِ بِچک ءِ مھروانیں ءُ راج دوستیں انسان ءِ ، چوناھاں من مدامی زاھر ءَ گوں نیادئے ءَ دلمانگ اِت آں بلئے واھے ایردستی کہ مئے نیاد پروم ءَ گوں زاھر جان ءِ نُگرھیں کُنٹ ءَ بوتگ اَت کہ دل پہ لاپ وپتگ اَت لُنٹانی سر ءَ پُر مِھریں بچکند ءِ تالان اَت ءُ من ءَ چارگ ءَ اَت منی دپ ءَ بس ھمنچو درتک کہ اڈے واجو تو ھم ۔
ءُ ھمے رنگ ءَ منی دویں چمانی اَرساں شل دات ءُ من وتی پیشانی لتارت ءُ جیڑگ ءَ لگّ اِت انت کہ یار ما پرچا چُش اِیں تھنا بلوچ پرچہ زان ئے زاھر جان ءَ اَنگت زندگی ءِ بازیں تب ءُ میل ءِ سرپد بوگی اَت ءُ جنزگی اَت شوک شوک ءَ کارا اَت پروم ءُ پَنجگُور بہ بنت یا کہ بھاولپور ءِ شھدربر جاہ بہ بیت زاھر جان ءَ گوں جوانمردی ءَ وتی بلوچ بوھگ ءِ کِرد پیلو کُرتگے مدامی سنگتانی ھیلکاری کُرتگ ءُ سنگتاں سیاسی رنگ ءَ وانینتگ ءُ سرپد کناھینتگ کہ مارا شُماراں درستاں کنگی اِنت وانگی اِنت ءُ وتی راج وانینگی اِنت ، بلوچستان ءَ سک ءِ بازیں وانندہ اِیں سر ءِ زلورت اِنت ءُ چُشیں وانندہ اِیں سر پہ راج ءِ آھوکیں پدریچ ءَ درپشوکیں اِستال بنت ءُ پہ ایمانداری وتی کِرد ءَ پیلو کن اَنت-
من سما کُتگ کہ سنگتانی گِستاھی ءَ پد بازیں چیز ءِ پش کپتگ زاھر جان ءُ آئی ءِ سنگتانی گِسر کپگ ءَ رند وھدے من ایدگے سنگت دیستگ اِت اَنت نودربر سیاست دیستگ اَت آیانی کُھول ءِ مردم دیستگ اِت انت بلکیں سرجمیں بلوچستان کہ من وتی چماں چاریتگ اَت تاں من ءَ سما کپتگ کہ واکی سنگتانی نمیران بوھگ پہ راج ءَ زنڈیں تاوان ءِ بلکیں آیانی جاہ پہ مدامی ھالیگ اِنت ، سالونکیں سر کہ رُد انت ءُ ورنا بنت وانگ ءُ زانگ ءَ بنت پہ آیاں بازیں اُمیت ءِ واھگے راج ءِ دل ءَ وتی بیت بلئے ما یک اَنچیں اھد ئے ءَ زند گوازینگ ءَ لاچاریں کہ اِدا پہ مارا نَپس ءِ کَشّگ اوں سک ءَ گران ءُ مُشکِل اِنت ، باھد اِیں ما کُل ھمے سنگتانی داتگیں دیمونی ءُ آیانی راجکاری آں یات بکن اِیں ءُ ھمایانی کِرد ءَ وتی کوپگاں بزوریں ءُ جنزان بہ بیت ، دگ ءِ ویل ءُ مرگ پہ بلوچ ءَ نوکیں گپے نہ اِنت بلئے نی منی ءُ تئی سر ءَ اِنت کہ من تو کجام رنگ ءَ وتی راجی کِرد ءَ پیلو کنیں ءُ چو نمیرانیں زاھر جان ءِ رنگ ءِ وتی راج ءِ توک ءِ سیاسی ءُ وانگی بود سِنچ ودی کنیں ءُ جنزاں بہ ایں ، رَپتگیں ھمبل بلوچ ءِ ھر اَھد ءُ آیوکیں پدریچ ءَ پہ اَبد نمیران اَنت ءُ مئے ایمان اِنت کہ آیانی دیستگیں واب ءُ ھمے کِشک پہ مدامی جنزان کنت ءُ بلوچ وتی وانگ ءُ زانگ ءُ راجی تپاکی ءَ پہ مدامی کار کنت ءُ جُنزیت-
نمیرانیں سنگتانی جاہ وش بات ءُ شالا راج یک مُشت بات ءُ واناں بات ، جنزاں بات ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔