ایران ءِ سر ءَ جیش العدل ءِ اُرش
ٹی بی پی شونگال
سئے ءُ چار اپریل ءِ شپ ءَ روکپتی بلوچستان ءِ تیاب دپی شھر چابھار ءَ ایرانی لشکریانی بُن دوار کرنل کوچزئی پولیس اسٹیشن، کرنل مسرت پولیس اسٹیشن ءُ راسک ءُ سرباز ءَ ایرانی پاسداران انکلاب ءِ بُن دوارانی سر ءَ تُرندیں اُرش کنگ بیتگ اَنت کہ اِیشانی زمہ واری جیش العدل ءَ من اِتگ اَنت۔ ایران ءَ سیزدہ کارِندھانی کُشگ بئیگ ءِ ھال راست کُتگ بلے ھندی اھوالانی رد ءَ تاوانانی کِساس گیشتر اَنت۔
جیش العدل یک دھکے ءَ چہ روکپتی بلوچستان ءِ تہ ءَ پاسداران انکلاب ءِ سر ءَ اُرش کنگ ءَ اِنت بلے زاھدان ءِ ھونیگیں آدینگ ءَ پد اے ارشانی تہ ءَ گیشی اَتکگ ءُ ایرانی لشکریانی سر ءَ مزنیں ءُ ھترناکیں اُرش کنگ بئیگ ءَ اَنت۔ جیش العدل ءِ انیگیں اُرش بی ایل اے ءِ نیمگ ءَ جنوری ءَ بیتگیں مچھ اُرش ءِ ھم گونگ بیتگ، اُرش ءَ بیست پدائیانی ھوار بئیگ ءَ گوں اے پدر اِنت کہ جیش العدل ءَ وتی پوجی تاکت مزنیں کچے ءَ ودینتگ اَنت ءُ ایران ءِ سر ءَ ترندیں ءُ ھترناکیں اُرش کنگ ءِ تاکت داریت۔
ایران چاریں نیمگ ءَ چہ جنجالانی آماچ اِنت، چہ امریکہ ءِ نیمگ ءَ ترندیں زرکاری بندشانی دیمپان اِنت، شام ءِ تہ ءَ اسرائیل برپارو آئی ءِ مپاداں نشانگ کنگ ءَ اِنت ءُ داعش ھم ایران ءِ تہ ءَ اُرش کنگ ءَ اِنت۔ اِے جاورانی تہ ءَ سیستان ءُ بلوچستان ءِ تہ ءَ جنگ ءَ چہ ایران ءِ جاورھال گنتر ناگیگ بنت۔
سیستان ءُ بلوچستان، ایران ءِ درستاں پدمنتگیں پرگینگانی تہ ءَ ھوار اِنت ءُ ھندی مردم چہ ڈیھی پالیسیاں سک ناوش اَنت۔ زاھدان ءِ ھونیگیں آدینگ ءِ تہ ءَ سد ءَ چہ گیش مردمانی بیرانی ءَ پد روکپتی بلوچستان ءَ دو سالاں چہ زھرشانی زرمبشت برجاہ اِنت۔ اے جاورانی تہ ءَ جنگ ءِ شدت ءِ گیشتر ودگ ءَ چہ سیستان ءُ بلوچستان ءِ جاور گیشتر ھراب بنت ءُ ایران ءَ دیمپانیں جنجالانی تہ ءَ سک باز گیشی کئیت اِنت۔