نبشتانک: بیگواھیں بلوچانی کھول ءُ اسلام آباد ءِ نودربر
نبشتہ کار: یحییٰ بلوچ
دی بلوچستان پوسٹ
وھدے کہ 1948 ءَ پاکستان بلوچستان ءَ کبزہ کنت گُڑا چہ اولی روچ ءَ آغا عبدالکریم ءِ دُروشم ءَ پاکستان بلوچ گھگیری ءِ دیمپان بیت ھمے ڈول ءَ جتا جتائیں رنگ ءَ بلوچ ءِ گھگیری گوں بازیں جھل ءُ بُرزیاں برجاہ مان ایت بلے چہ 2000 ءَ پد سکیں مُھکمیں رنگے ءَ دیم ءَ کیت پمیشکا آ بلوچستان ءَ وتی زورگری ءِ مُھکم کنگ ءِ واستا جتاجتائیں پَندَل ساز ایت۔ زورانسری گار ءُ بیگواھی اِستان ءِ ھمے پندلاں چہ یَکے کہ وھد ءِ گون ءَ جتا جتائیں رنگ ءَ کار مرز کنگ ءَ اِنت۔ اے پالیسی ءِ بُنیات ءَ بازیں بلوچ ورنا 1970 ءِ دَھک ءَ گار ءُ بیگواہ کنگ بیت انت۔ بنداتی مردُمانی تہ ءَ احمد بلوچ ءُ اسد مینگل اوار بنت اِنت کہ چہ کراچی ءَ زورانسری گار ءُ بیگواہ کنگ بنت ءُ تا روچ ء مرچی آیانی ھال ءَ کس سرپد نہ اِنت کہ اِستانی آزارجاھاں بندیگ اَنت یا کُشگ ءُ مُچّانکی کبر ءَ کل کنگ بوتگ اَنت یا ملتان ءَ نشتر نادراجاہ ءَ سرا ھشک ءُ سڑونکیں کُنٹاں ھوار دور دیگ بوتگ اَنت۔
ھمے پالیسی 2009 ءَ نوکتریں دُروشمے ءَ دیم ءَ کیت کہ گار ءُ بیگواھیں مردم چِست کنگ بنت، آزار جاھاں بَرگ ءُ چہ زند ءَ بے زند کنگ بنت۔ لھتیں وھد ءَ پد لاش اِش جنگل ءُ دگانی سر ءَ دور دِیگ بنت۔ کہ اے kill and dump policy ءِ نام ءَ زانگ بیت اِنت۔ آیانی لاشاں جتاجتائیں آزارانی ٹپ پِر بنت اِنت۔ کسے ءِ سینگ چاک بیت، کسے ءِ دست پِر نہ اِنت، کسے ءِ سر پِر نہ اِنت ءُ اِنچو آزار ءَ پد باز وھد ءَ لاشانی پَجار کنگ ھم نہ بوتگ ءُ بازیں وھداں پَجار نہ بوئگ ءِ سَبب ءَ بے وارسانی ھساب ءَ کَل کنگ بوتگ اَنت۔ ھمے پالیسی کہ دیم ءَ روت چہ مھلوکے گھگیری ءِ سَوب ءَ استاں لاچار بیت کہ اے پالیسی ءَ نرمی بیار ایت بلے پد ءَ ھمے پالیسی ءَ استان جتاجتائیں دُروشماں دیم ءَ کار ایت کہ ھمے زورانسری بیگواھیں بلوچاں دروگیں میڑ ءَ سی ٹی ڈی ءِ نام ءَ جنت ءُ دُور دنت۔ بلے بلوچستان ءَ زُلم ءِ ھلاپ ءَ مُدام جتا جتائیں جاھاں مھلوک ءَ جُنز جُنزگ ءَ بوتگ اَنت۔ اے جُنزانی تہ ءَ بلوچ مات ءُ گُوھارانی مزنیں کِرد ءِ بوتگ ءُ انگت ھم ھست اِنت۔
گوستگیں لھتین سال اِنت کہ ھمے مات پہ وتی گار ءُ بیگواھیں بچ ءُ براتانی آجوئی ءَ پاکستان ءِ جتاجتائیں شھراں زھرشانی کنگ ءَ اَنت ءُ زھرشانی گدان جَنگ ءَ اَنت کراچی بہ بیت یا شال ءُ اسلام آباد بہ بنت۔ ھمے مات ءُ گوھار 2020 ءَ اسلام آباد ءَ اَتکگ اَنت ءُ ڈی (D) چوک اِش بند کُت ءُ زھرشانی اش کُت ۔ ھمے رنگ ءَ پد ءَ ھمے سال ءَ سائرہ بلوچ اَتک ءُ اسلام آباد پریس کلب ءِ دیم ءَ سے روچی زھرشانی گدان ءِ جت ئِے۔ ھمے داب ءَ یکبرے پد ءَ سائرہ بلوچ ءُ راشد ھُسین ءِ مات ءَ ھوار جھانزیب بلوچ ءُ سعید بلوچ ءِ مات ءِ ھواری ءَ آ دگہ گاریں بلوچانی کھول پد ءَ اَتکگ ءُ اسلام آباد پریس کلب ءِ دیم ءَ زھرشانی گدان اِش جَتگ ءُ نِشتگ اَنت۔
اے کھول وھدے اسلام آباد ءَ کایاں گڑا اسلام آباد ءِ بلوچ نودربرانی مزنیں کَچے ایشاں گوں آوار اَنت۔بازیں براں اے کھولانی مردُم کہ نودربرانی مِنت ءَ گِر اَنت کہ ایشانی ھمراداری ءَ کنگ ءَ اَنت، من پَشل باں پرچا کہ منی ھیال ءَ ما اے کھولانی مِنت ءَ بہ گِریں چیا کہ ما اسلام آباد ءِ بُرزیں ماڑی ءُ وشیانی تہ ءَ کپ ایں چہ وتی لَس مھلوک ءُ راجی جُنز ءَ بے ھال بہ ایں، ھمے مات ءُ گوھار اَنت کہ چہ بلوچستان ءَ پند بُر اَنت ءُ کایاں اسلام آباد ءَ مارا ھمے مارِشت ءَ دے اَنت کہ شُما جنگ آماچیں زمینے ءَ چہ سیادی دار اِت، شُمئے ھزاراں ورنا ءُ کماش اِستانی آزارجاھاں بندیگ اَنت ءُ شُمئے راجی پَجار اَچ شُما پَچ گِرگ بوئگ ءَ اِنت۔ ءُ اے پیریں ماتانی سِتک اِنت کہ آ مارا سِکین دے اَنت کہ پہ شُمئے وشھالی ءَ جُنزے جُنزگ ءَ اِنت ءُ شُما ھم ھمے جُنز ءِ بھر بہ بیت ءُ وتی راجی ھستانکی ءَ بہ رکیں اِت۔ منی ھیال ءَ ما کدی ھم مہ جیڑیں کہ ما اے مات ءُ گُھارانی ھمراہ داری ءَ کنگ ءَ ایں بلکیں اے مئے راجی زمہ واری اِنت کہ اے راجی جُنز ءِ بھر بہ بہ ایں ءُ اے کُشندھیں نزام ءَ چہ وتی ڈیھ ءَ ولگوج کنگ ءَ پہ جُھد بہ کن ایں۔ بازیں نودربرے ھمے بُنیات ءَ اے کھولانی ھمراداری ءَ نہ کن انت کہ گار ءُ بیگواہ یا کُشگ مہ بنت بلے پہ اے تُرس آماچین نودربران شھید ھیات ءُ احتشام جان ءِ کوش چو روچ ءَ پَدر کنت کہ پہ گار بوئگ ءُ مِرگ ءَ بلوچ بوئگ بس انت۔ اے دویں ھما نودربر بوتگ انت کہ سیاسی چست ءُ ایر وتی جاہ ءَ سیاسی ترانانی ھم بھر نہ بوتگ انت۔ بلوچ ءَ اگاں چہ اے زُلم ءُ زوراکیانی رکگی انت گڑا وتی راجی جُنز ءِ بھر بہ بیت ءُ زوراکیانی ھلاپ ءَ بوشت اِیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔