بلدیاتی گچین کاری: راجدوستیں پاٹیانی بے سوبی
ٹی بی پی شونگال
بلوچستان نیشنل پارٹی ءُ نیشنل پارٹی ءِ ارول وتی پاٹیاں بلوچستان ءِ راجدوستیں پاٹی گُش انت ءُ وتی راجکاری ءِ بُن ھِشت بلوچ راجی جیڑہ ءَ گُش انت۔ آیانی راجکاری پجار پاکستان ءِ بنجاھی پاٹیاں چہ جتا اِنت بلے انیگیں بلدیاتی گچین کاریاں پاکستان ءِ بنجاھی پاٹیانی دیم ءَ پروش ورگ بلوچستان ءِ تہ ءَ آیانی راجکاری ءَ یک ھد ءَ داں بندوک کنگ ءَ اِنت۔
بلوچستان ءِ سی ءُ پنچ دمگانی تہ ءَ برجاہ بیتگیں بلدیاتی گچین کاریانی تہ ءَ بلوچستان نیشنل پارٹی ءُ نیشنل پارٹی تھنا لھتے دمگانی تہ ءَ سوبمند بیتگ اَنت۔ کیچ دمگ نیشنل پارٹی ءِ راجدوستیں راجکاری ءِ بُنجاہ اِنت اود ءَ دمگ کونسل ءِ چئرمین پاکستان پیپلز پارٹی ءِ نامزد کُتگیں امیت وار گچین کنگ بیتگ ءُ دومی نیمگ ءَ ھزدار دمگ کہ بلوچستان نیشنل پارٹی ءِ سروک ءِ بنجاھی دمگ اِنت، کہ چمود ءَ آ پاکستان ءِ راجی اسمبلی ءِ باسک اِنت اود ءَ ھم پیپلز پارٹی ءِ نامینتگیں امیت وار دمگ کونسل چئرمین ءِ گچین کاریاں سوبمند بیتگ۔
بلوچستان نیشنل پارٹی ءُ نیشنل پارٹی ءِ چپیں راجکاری ءَ پاٹی ءُ راجدوستیں راجکاری ءَ تاوان داتگ۔ بلوچستان نیشنل پارٹی ءُ نیشنل پارٹی ءِ لیکہ اِنت کہ آ وت واجھی ءُ پرگینگی وت واکی ءِ بُنکی لیکہ ءَ گوں سرکار ءِ پلہ مرزیں سردار، لینڈ مافیا، ڈرگ لارڈز ءُ گیر سیاسی تاکتانی راہ ءَ دارگ ءِ ھاتر ءَ پاکستان ءِ پارلیمنٹ ءِ تہ ءَ سیاست ءَ کَنگ ءَ اَنت ءُ بلوچ راجی جیڑہ ءِ گیواری ءِ ھاتر ءَ راجدوستیں راجکاری ءِ زندگ داشتگ اِش، بلے دویں پاٹیاں جتائیں وھداں ڈرگ مافیا، کُشندہ ٹولی ءُ گیر سیاسی تاکتاں گوں بندوکیں مردمانی ھاتر ءَ راجکاری ءَ ھوار بئیگ ءِ ھاتر ءَ کِشک جوڑ بیتگ اَنت۔ ( یا اگاں آیاں راجکاری ءَ آرگ ءِ کِشک جوڑ بئیگ بھتام جنگ بیتگ اَنت۔)
امریکی سروک براک اوباما ءِ نیمگ ءَ سال دو ءُ ھزار نھ ءَ نامینتگیں جھان ءِ چار مستریں منشیات ءِ سروکاں چہ یکے امام بزنجو نیشنل پارٹی ءَ وتی پاٹی ءَ ھوار کُتگ اَت ءُ دو ھزار ءُ ھژد ءِ گچین کاریانی تہ ءَ پی بی چِل ھزدار ءَ ڈیتھ اسکواڈ ءِ سروک ءُ ھشت لیویز کارندھانی کوشکار شفیق مینگل ءَ گوں گچین کاری ھمسَنَّتی جوڑ کُتگ اِیت اِش، وھدیکہ انیگیں بلدیاتی گچین کاریانی تہ ءَ بلوچستان نیشنل پارٹی کیچ دو ٹولیانی تہ ءَ بھر بیتگ اَت ءُ میجر جمیل دشتی ٹولی ءَ دمگی کونسل چیرمین ءِ نیاد ءِ ھاتر ءَ گمانی منشیات ءِ باپار ءِ سروک ھوتمان ءِ پلہ مرزی کُتگ اَت۔
جنگ زدگیں بلوچستان ءَ پاکستان ءِ تاکت وریں تک بلوچ راجی سیاست ءِ راہ پیسر ءَ چہ بستگ اَنت ءُ اگاں اے جاورانی تہ ءَ پاکستان ءِ بنجاہ ءِ سیاست کنوکیں بلوچ راجدوستیں پاٹیانی ھمے تَب برجاہ بہ مان اِیت گُڑا دیمتر ءَ بلوچستان ءَ راجدوست پاٹی تھنا پہ نام مان اَنت ءُ بلوچستان ءِ تہ ءَ پاکستان ءِ بنجاھی پاٹی واکداری ءِ نیادانی سر ءَ نندوک بنت کہ آیانی پالیسیانی تہ ءَ بلوچستان ءِ راجی جیڑھانی گیواری ھوار نہ اِنت۔