قاسم لبزانکی مجلس ءِ نیمگ ءَ قدیر ساگر ءِ کتاب ءِ دیمدراھی ءَ دیوان کنگ بیتگ

قاسم لبزانکی مجلس مند بلو ءِ نیمگ ءَ بلوچی زبان ءِ شائر قدیر ساگر ءِ شَیرانی اولی دپتر “مھر چو نود ءَ باتن ءَ شنز ایت ” دیمدراھی ءَ دیوان ءِ کنگ بیتگ –

دیوان ءَ لبزانکی تکاں بندوکیں مردماں بھر زرتگ ءُ وتی ازم ءِ درنگازی کرتگ اَنت –

دیوان ءِ اولی بھر ردانک ءُ دومی بھر شائری ءِ سر ءَ بیتگ ءُ شائر ءُ ردانکاراں وتی شیر ءُ ردانکانی سر ءَ لیکہ کرتگ اَنت –

دیوان ءِ جارچینی ءِ ڈبہ بلوچی زبان ءِ ورنائیں شائر گوھرام ارمان ءَ زرتگ ءُ دیوان ءَ یک یک ءَ شائر تلو ءِ سر ءَ توار کنان کرتگ ءُ آیاں وتی ازم درانگاز اِتگ –

دیوان ءِ اولی بھر ءَ ردانک ءِ سر ءَ مقبول مراد، گوھرام ارمان، سعداللہ ساحر، غلام حسین دیدار ءُ غنی ارمان ءَ قدیر ساگر ءِ شیرانی دپتر ءِ سر ءَ وتی ھیال درشان کرتگ اَنت ءُ چمشانک داتگ –

آیاں گوشت کہ قدیر ساگر ءِ شیرانی دپتر گیدی ءِ تہ ءَ یک نوکیں رنگے ءَ قدیر ساگر ءَ کماتک ءُ بلوچی لبزانک ءَ سوگات کرتگ کہ چریشی ءِ وانگ ءَ ھمے سما بیت مھر ءُ دوستی ءِ سر ءَ قدیر ساگر ءَ وتی شَیرانی ازمی دروشم ءَ شریں رنگے ءَ پیش کرتگ اَنت –

دیوان ءِ دومی بھر شائری بیتگ کہ چریشی ءَ مقبول مراد، گوھرام ارمان، سعد الہ ساحر، غلام حسین دیدار، غنی ارمان، پارس صوالی جنید گوھرام، راشد مجید، اللہ داد دیدگ، ریاض حمید، راشد ارمان، وارس گل، نور خان مندش، پیر جان مقبول ءَ وتی شَیر ونتگ اَنت ءُ چہ دیوان ءَ داد گپتگ اَنت –