پاکستانی پوج ءَ چہ ھب ءَ زورانسری آوار جنگ بوتگیں زالبول ءِ سرا وتکش تراک کنوکے ءِ بھتام جتگ ۔ وھدیکہ گوستگیں روچاں زورانسری آوار جنگ بوتگیں ھزرا گوں وتی زھگ ءَ یل کنگ بوتگ ۔
پوج ءِ واکدارانی رد ءَ یک ھب ءَ بیڑے ءِ میان ءَ وتکش کنوکیں زالبول ھیرالنساء ھوار آئی ءِ کمکار ھانی دزگیر کتگ انت وھدیکہ یک دگہ کمکارے پرید کہ چہ بلوچستان ءِ دمگ کیچ تجابان ءَ دزگیر کتگ.
پاکستانی پوج ءَ ٹاہ داتگ کہ اے مردم وتکش کنگ ءِ شور بندی ءَ ھوار بوتگ انت ، بلے پدا ھم آیانی دزگیری پد آیانی ھچ سرپدی نہ داتگ کہ کجا انت ۔
زانگ بہ بیت مروچی پاکستانی پوج ءَ ھب چوکی ءَ دارو ھوٹل ءِ نزیک ءَ گس ءِ سرا بیڑ برتگ ءُ آودا ساڑی ایں دو زالبول دزگیر کتگ ءُ بیگواہ کتگ انت ۔
چہ ھب ءَ آوار جنگ بوتگیں زالبولانی درگت ءَ آیانی کھول ءِ گوشگ انت اے وئیل شمبے ءِ روچ ءَ ھب چوکی ءِ دمگ گنجھی گوٹ ءَ دارو ھوٹل ءِ نزیک ءَ سھب ءِ ادار سے بج ءَ بوتگ ۔ کھول ءِ رد ءَ بیگواھیں مردمانی تہ ءَ ھبدہ سالی ھیرالنساءَ ءُ بیات ءُ ھپت سالی ھانی ھوار انت ۔
زانگ بہ بیت گوستگیں دو روچانی میان ءَ چہ ھب ءَ زالبولانی آوار جنی ءِ اے دومی وئیل انت وھدیکہ اے دمگ ءَ اے چارمی زالبول انت کہ زورانسری آوار جنگ بوتگ ۔
گوستگیں شپ ءَ پاکستانی پوج ءَ ھمے دمگ ءَ بیست ءُ ھپت سالی ھزارہ نامی زالبولے گوں ھمراہ ءِ زھگ براھمدگ ءَ آوار جتگ ءُ بیگواہ کتگ کہ پدا مروچی یل کنگ بوتگ انت ۔ اشاں ابید 22 نومبر ءَ پانزدہ سالی نسرین ھم آوار جنگ بوتگ کہ ھنگت گار ءُ بیگواہ انت ۔
بلوچستان ءَ زورانسری آوار جنی ءِ درچ ءِ تہ ءَ یکبرے پدا گیشی اتکگ کہ ھستیں وھد ءَ زالبول ھم مزنیں کچے ءَ آوار جنگ بوگ ءَ انت ۔
ھمے ماہ ءِ یک رمس ءَ چہ ھزدار ءَ پرزانہ نامیں زالبولے ءُ چہ دالبندین ءَ رھیمہ گوں ھمراھے برات ءَ آوار جنگ بوتگ انت کہ ھنگت یل کنگ نہ بوتگ انت ۔
ھمے وڈا ھمے سال ءِ مئی ماہ ءَ زورانسری آوار جنگ بوتگیں نودربر ماہ جبین بلوچ ھنگت بیگواہ انت ۔