TBP Balochi

بلوچ رھشون ءُ سیاسی پاٹیاں گوستگیں روچ ءَ بلوچستان ءِ بنجاھی شھر شال ءَ بلوچ نودربرگل آزات ءِ نمیرانیں رھشون رزا جھانگیر ءِ چکانی مات زُھرہ بلوچ ءِ سر ءَ بوتگیں اُرش ترندی ءَ گوں ایرجتگ ءُ دومی نیمگ ءَ بلوچ یکجھتی کمیٹی ءَ مروچی چار اگست بیگاہ ءِ ادار پنچ ءَ شال ءَ گورنر کارگس ءِ دیم ءَ زھرشانی ءُ پریس کانفرنس کنگ ءِ جار پرینتگ –

بلوچ یکجھتی کمیٹی ءِ جارکش ءَ رسانکدراں وتی شنگ کرتگیں درشان ءِ تہ ءَ اے اُرش ترندی ءَ گوں ایرجتگ ءُ گوشتگ ما اے وئیل ءِ گیرجانبدار پٹ ءُ پول کنگ ءِ لوٹ ءَ کن ایں –

جارکش ءَ گوشتگ کہ سیاسی درگت ءَ کھولانی زالبولاں اے وڑ روچ ء رھمانی نشانگ کنگ بلوچستان ءِ چاگردی ءُ سیاسی روایتانی بگیری دارگ انت کہ اشی ءِ ترندیں رزلٹ ءِ در اتک کنت –

جارکش ءَ گوشتگ کہ بلوچستان اے وھدی نازکیں جاورھالاں گون گوزگ انت اے وڑ ھر وڑیں گیرزمہ واریں کار جاورھالاں گیشتر ھراب کت کنت –

بلوچستان ءِ تہ ءَ بازیں وھدے بیت کہ یکجاھی سزایے درچ برجاہ انت کہ سیاسی باسکانی کھول نشانگ کنگ بوگ ءَ انت اے کار ناکہ تھنا گیر کانوی ءُ بے رھندی یے بلکیں گیراخلاقی ءُ انسانی ھکانی بگیری دارگ انت –

جارکش ءَ گڈسر ءَ سوبائی سرکار ءُ بلوچستان ھائی کورٹ ءَ چہ لوٹ کتگ کہ اے وڑیں وئیلانی گر ءُ دار ءَ وتی کرد ءَ پیلو بہ کن انت ءُ اے وئیل ءِ درگت ءَ گامگیج بہ زور انت – بلوچ زالبولانی سر ءَ اے دابیں اُرش ءُ سیاسی باسکانی کھولاں یکجاھیں سزا دیگ ھچ وڑ اوپار کنگ نہ بیت –

ھمے وڑ بلوچ نودربر گل آزاد ءِ جارکش ءَ رسانکدراں وتی شنگ کرتگیں درشان ءِ تہ ءَ نمیرانیں رزا جھانگیر ءِ چکانی مات زُھرہ بلوچ ءِ سر ءَ بوتگیں اُرش ایرجتگ ءُ گوشتگ کہ شھیدانی کھول ءُ سیاسی باسکانی سر ءَ زوراکی ریاست ءِ نیمگ ءَ یکجاھیں سزایے پالیسی ءِ درچ یے –

آئی ءَ گوشتگ کہ رزا جھانگیر بی ایس او آزاد ءِ گوستگیں سیکرٹری جنرل بوتگ کہ سال دوھزار ءُ سیزدہ ءِ چاردہ رمس ءَ پاکستانی پوج ءَشھید کتگ آ سیاسی چست ءُ ایرانی سوب ءَ شھید کنگ بوتگ آئی ءِ شھیدی ءَ پد ھما انت کہ آئی ءِ کھول ازاب ءِ تہ ءَ انت –

آئی ءَ گوشتگ کہ بلوچستان ءِ تہ ءَ سیاسی باسک ءُ آھانی وارسانی زورانسری اوار جنی ءُ زندانانی تہ ءَ بند کنگ ءُ آھانی شھید کنگ ءِ درچ یکشل ءَ برجاہ انت اشی ءِ تہ ءَ گیشی آیگ ءَ انت – ما چہ اقوام متحدہ ءُ دگہ ھیومن رائٹس ادارھاں گوں لوٹ کن ایں کہ بلوچستان ءَ انسانی ھکانی بگیری دارگ ءِ سر ءَ چہ پاکستان ءَ جست بہ گر انت –

ھمے وڑ بی این ایم ءِ انسانی ھکانی ادارہ پانک ءَ چاگردی ترمجاہ ٹویٹر ءَ تہ ءَ گوشتگ کہ ما بلوچ نودربر سروک شھید رزا جھانگیر ءِ لوگبانک زھرہ ءِ سر ءَ پاکستانی کشندہ ٹولی ءِ کارمندانی اُرش ءَ ایر جنیں۔ شال ءَ بلوچستان زانشتجاہ ءِ نزیک ءَ زھرہ ءِ سر ءَ پرپٹ ءَ سواریں دو اُرشکاراں تیرگواری کرتگ یک تیرے ءَ آئی ءِ سر سپُتگ ءُ زدگ کرتگ-

آئی ءَ گوشتگ کہ چاردہ اگست دوھزار ءُ سیزدہ ءَ پاکستانی لشکر ءُ چیریں ادارھانی کارمنداں امداد بوھیر ءِ گِس ءَ بیڑ برتگ ءُ امداد بوجیر ءُ آئی ءِ ھمراہ رزا جھانگیر کہ یک نودربر باسکے بیتگ، امداد ءِ ھواری ءَ شھید کرتگ انت –

آئی ءَ گوشتگ کہ بیست ءُ ھشت اگست سال دوھزار چاردہ ءَ پاکستانی پوج ءِ جوڑ کرتگیں کشندہ ٹولی ءِ کارمنداں زھرہ ءِ ناکو شھید بختیار ءِ سر ءَ ھم اُرش کرتگ کہ آ بیران بوتگ – انسانی ھکانی گلاں پاکستان ءِ برجاھیں یکجاھیں سزا ءِ زوراکی ءِ گِر ءُ دار کنگ لوٹ ایت۔

دومی نیمگ ءَ بلوچ رھشون ڈاکٹر اللہ نزر بلوچ، محمد علی تالپور، بی این ایم ءِ گوستگیں سرکماش خلیل بلوچ دگہ بازیں رھشون ءُ باسکاں زُھرہ ءِ سر ءَ بوتگیں اُرش ریاست ءِ نیمگ ءَ یکجاھی سزا ءُ زوراکی ءِ گوشتگ ءُ ترندی ءَ گوں ایرجتگ-

ڈاکٹر اللہ نزر بلوچ ءَ چاگردی ترامجاہ ٹویٹر ءِ تہ ءَ وتی ٹویٹ ءَ گوشتگ شھید رزا جھانگیر ءِ چکانی مات ءَ تیرانی آماچ کنگ ءُ آئی زدگ کنگ ءَ پد دنیا زانت کہ پاکستان ءَ بلوچانی چکچینی ءِ تہ ءَ گیشی آرتگ –

آئی ءَ گوشتگ کہ بلوچاں ھم ھک ھست انت کہ وتی چُک زالبول ءُ مردمانی پھازگ ءُ رکینگ ءِ ھاتر ءَ گامگیج بہ زور انت –

ھمے درگت ءَ محمد علی تالپور ءَ وتی ٹیوٹ ءِ تہ ءَ گوشتگ کہ اے اُرش بلوچ راج بگیری ءَ کنگ بوگ ءَ انت – آئی ءَ گشتگ کہ آ روچ کیت اِنت بلوچ اے سیاہ ءُ تھاریں شپ ءَ چہ چُٹ ایت ءُ یک شریں زندے ءِ واھند بیت کنت-

ھمے درگت ءَ بی ایس او آزاد ءِ گوستگیں سرکماش ءُ بی این ایم ءِ سنئیر جوائنٹ سیکٹری کمال بلوچ ءَ گوشتگ کہ پاکستانی پوج ءَ وتی زوراکی ءِ سرجمیں سیمسر سرگوز کتگ انت اے دژمن ءِ بگیری ءَ یکجاہ بوگی انت –

خلیل بلوچ ءَ گوشتگ کہ زُھرہ بلوچ سر ءَ ایجنسیانی اُرش یکجاھیں سزایے درچ یے – پاکستانی پوج بلوچ زرمبشت ءِ کاؤنٹر کنگ ءَ بے سوب بوتگ نوں چُک ءُ زالبولاں نشانگ کنگ ءَ انت – بلوچ رھشونانی کھولانی کُشت ءُ کوش ءَ بلوچ جھد دارگ نہ بیت –

زانگ بہ بیت گوستگیں روچ ءَ بلوچستان ءِ بنجاھی شھر شال ءَ بلوچستان شھدربرجاہ ءِ دیم ءَ سلاہ بندیں مردماں زُھرہ بلوچ ءِ سر ءَ تیر گواری کُتگ ءُ یک تیر ءِ آئی ءِ سر ءَ لگتگ ءُ شگوستگ چریشی ءَ آ زدگ بوتگ ءُ ھما دمان ءَ نادراھجاہ ءَ سرکنگ بوتگ –

بلوچستان ءِ تیاب دپی شھر گوادر ءَ پریس کلب ءِ مراگش ھال ایوال ءَ چہ گوستگیں وزیراعلیٰ بلوچستان ءُ نیشنل پارٹی ءِ بُنجاھی سروک ڈاکٹر عبدالمالک بلوچ ءَ تران کنان ءَ گْوشتگ کہ پاکستان ءِ مالی ءُ دگہ جاور دیم پہ چیر اَنت، آمیدگس، رسانکدر ءِ آجوئی ءِ ھاتر ءَ وکیل ءُ اھوالکار وتی کرد ءَ پیلو بہ کن اَنت-

آئی ءِ گْوشگ اِنت کہ رسانکدر پُلگ بوتگ اَنت، آمیدگس بیمانی سر ءَ چلگ ءَ اَنت- مالی جاور روچ پہ روچ گنتر بوان اِنت- گرانبھائی سر توک ءَ اِنت – تنگدستانیانی واستا یک کیلوے آرت ازاب جوڑ بوتگ بلے بلوچستان ءِ انّوگیں ھکومت ءَ راج ءِ ھچ گم نیست-

بلوچستان ءِ سرجمیں ادارہ نزور اَنت – ورناہ بے روزگار اَنت کار بھا بوگ ءَ اَنت – چپراسی ءَ بگر تاں انجنیئر ءَ ھوار اَنت- اے جاوراں راجدوست ءُ دگہ پارٹیانی مردم ھوار اَنت – اشانی منّانک ھست اَنت-

آئی ءَ گْوشتگ کہ بلوچستان ءَ یک نیمگے سیلاب آماچ اِنت ءُ اشاں انساپ رسگ ءَ نہ اِنت- تنگدستانی مڈی پس ءُ دلوت بوتگ اَنت- دُرست سیلاب ءَ دیمپان بوتگ اَنت بلے واکدارانی گوش ءَ مورے ھم نہ وارت-

آئی ءِ گْوشتگ کک وھدے آواران ءَ زمین چنڈ اَتکگ اَت من یک وزیراعلیٰ دروشمے ءَ دوزادہ روچ ءَ تاں اود ءَ بُنجل جتگ ءُ نشتگ اَنت- اے میان ءَ ھپت ارب ءِ یک پروجیکٹے بندات بوتگ- ھمے دگ جوڑ کتگ اَنت مردماں سولر سسٹم ءَ چہ لین پُجّارینتگ- اے روچاں جھاو دمگ ءَ ھچ پش نہ کپتگ- ما زمین چنڈ ءَ رکّگ ءِ چاردہ ھزار لوگ جوڑ کتگ ءُ مردم تلسی داتگ اَنت-

داکٹر مالک ءَ گْوشتگ کہ گودار یک بلاھیں نامے بلے بژن اِنت کہ گوادر ءِ ڈیم چہ آپ ءَ پُر اِنت بلے اشی ءِ جھمنند انّی ھم تُنیگ اَنت ھکومت گور ءَ ڈیزل ھاتر ءَ کلدار نیست اَنت – آپ ءِ تنگی، لین تنگی اِنت- 1993 ءَ بگر تاں 1996 ءَ وزیر تعلیم بوتگ بلوچستان ءِ بازیں میتگاں زانت شنگ کنگ ءِ ھاتر ءَ وانگجاھانی دام شنگ کتگ بلے مروچی بژن اِنت کہ اے وانگجاھاں وانینگ ءِ ھاتر ءَ استاد نیست- وانگجاہ ویران اَنت –

آئی ءَ گْوشتگ کہ گوستگیں توپانیں ھور ءُ سیلاب ءَ گوادر کھرآماچیں دمگے گوشگ بوتگ- بلے ھچ مردم ءَ جُست گرگ نہ بوتگ- انچش گمان بوگ ءَ اِنت کہ تیاب دپ ءِ مردمانی زر ءَ چہ اشاں پچّ گرگ ءَ اَنت- زر ءَ ٹالر مافیا ءِ رھم ءَ کرم ءَ یل داتگ- گوادر پورٹ دمگی مردمانی ھاتر ءَ نہ رؤکیں جاھے کنگ بوتگ-

آئی ءِ گْوشگ اِنت کہ ما پورٹ بگیر ءَ نہ ئے ، سی پیک ءِ درگت ءَ چہ مارا بازیں چیزانی تُرس الّمی اِنت- بُنجاھی ھکومت اے باور بہ کنائین اِیت راجی پجّار ءَ تاوان نہ رس اِتگ- اد ءَ ھرچ کار گوادر ءِ مردمانیگ اِنت اشانی ھک منّگ لوٹ اَنت – ما بلوچ تیاب ءُ مڈیانی ھچبر سودا نہ جتگ نانکہ کن ایں- ھچ کس اے پدر نہ کنت کہ سی پیک کجام پروجیکٹ ءَ مئے ھم دستھت نہ بیت- سیندک ءُ ریکورڈیک ءِ لب من آں ھم رس اِتگ بلے ما اے دراھیں نہ لب نہ زرتگ اَنت-

گوستگیں روچاں بلوچستان ءِ دمگ بیلہ ءَ ھیلی کاپٹر ءِ سر ءَ اُرش ءَ کورکمانڈر شال سرفراز ءِ مرگ ءَ پد آصف غفور نوکیں کورکمانڈ شال نامینگ بیتگ-

آصف غفور اے وھد ءَ جی ایچ کیو ءَ انسپیکٹر جنرل کمیونیکشن اینڈ ٹیکنالوجی ءِ اگدو ءَ بیتگ، کورکمانڈر ءِ بستار ءَ اے آئی ءِ بنداتی زمہ واری اِنت چریشی ءَ پیسر آ ڈی جی آئی ایس پی آر اگدو ءَ بیتگ –

آصف غفور نُھ ستمبر نوزدہ سد ءُ ھشتاد ءُ ھشت ءَ پاکستانی آرمی ءِ شاخ ھشتاد ءُ ھپت میڈیم رجمنٹ ءَ زیرگ بیتگ، پانزدہ دسمبر دوھزار ءُ شانزدہ ءَ آئی ءَ میجر جنرل عاصم سلیم باجوہ ءِ اگدو ءِ سرجم بیگ ءَ پد ڈائریکٹر جنرل آئی ایس پی آر دارگ بیتگ-

جنوری دوھزار ءُ بیست ءَ آئی ءَ اوکاڑہ ءَ جنرل آفیسر کمانڈنگ چِل ڈویژن ءِ بستار ءَ دارگ بیتگ – بیست ءُ پنچ نومبر دوھزار ءُ بیست ءَ آ لیفٹیننٹ جنرل ءِ اگدو ءَ دیمروئی دیگ ءُ انسپکٹر جنرل کمیونیکیشنز اینڈ انفارمیشن ٹیکنالوجی دارگ بیتگ –

آصف غفور ءِ درگت ءَ اے گپ باز نامدار اِنت کہ آ ترندی ءَ بلوچ ءُ پشتونانی بگیردار اِنت، آ وھدے ڈی جی آئی ایس پی آر نامینگ بیتگ گڑا آ وھد ءَ آئی ءَ بلوچ ءُ پشتونانی سر ءَ ترندیں زبان کارمرد کرتگ-

وھدیکہ آ ڈی جی آئی ایس پی آر بیتگ آئی ءَ پشتون تھپز مومنٹ ءِ کمکی زرانی سر ءَ برانزی کتگ ءُ گشتگ کہ آئی ءَ بازیں جاھاں زھرشانی کنگ ءَ انڈیا ءِ چیریں ادارہ آر اے ڈبلیو ءُ اوگانستان ءِ چیریں ادارہ این ڈی ایس ءَ چہ زر رس ایت-

آصف غفور ءِ کورکمانڈر ءِ دارگ ءَ پد بازیں پھناتاں اے درشان کنگ بیگ ءَ اِنت کہ آصف غفور کورکمانڈ شال ءِ پد بلوچستان ءَ برجاھیں ھونریچی ءَ گیشی اتک کنت-

بلوچستان ءَ زورانسری آوار جنگ بوتگیں مردمانی کھولاں مروچی چاردہ روچ سرجم انت کہ گورنر کارگس ءِ دیم ءَ نندانک ءِ جتگ ءُ نشتگ انت – بیگواھیں مردمانی کھولاں مروچی دو ھپتگ سرجم انت وھدیکہ نندانک ءَ دگہ بیگواھیں مردمانی کھول ھم آیگ ءُ بھر زورگ ءَ انت – آ چہ سرکار ءُ ھمے ادارھاں چہ وتی دوستیگیں مردمانی یل کنگ ءِ لوٹ ءَ کنگ ءَ انت –

مروچی چار شمبے ءِ روچ ءَ نندانک جاہ ءَ درنگاز کنوکاں زورانسری آوار جنیانی بگیری ءَ مراگش ءِ برجم داشتگ کہ اود ءَ نوابزادہ حاجی لشکری خان رئیسانی، پروفیسر منظور بلوچ، وائس فار بلوچ مسنگ پرسنز ءِ کمک سرکماش ماما قدیر بلوچ ایڈوکیٹ عمران بلوچ طاہر حبیب ءَ ھوار دگہ مردماں بھر زرتگ –

مراگش ءَ تران کنان ءَ آھانی گوشگ ات کہ زورانسری آوارجنی ءِ جیڑہ ءَ انسانی المیہ ءَ یے ھاسکر بلوچستان ءَ اے وڈیں وئیل راجی چکچینی ءِ نیمگ ءَ رؤگ انت کہ اود ءَ مزنیں کچ ءَ نودربر ءُ آھانی استاد ءُ ھر تک ءُ پھناتاں سیادی داروکیں مردم اے زوراکی ءِ آماچ انت ءُ اے درچ ھنگت برجاہ انت کہ اشی ءِ ھلاسی یک ترندیں جھد ءَ بوت کنت –

مراگش ءَ ھواریں مردماں بیگواھیں مردمانی کھول ءِ جھد دروت ندر کتگ – ترانکارانی گوشگ ات کہ بیگواھیں مردمانی کھول ءِ جُھد اے زوراکی ءِ دیم ءَ اُشتاتگ اگاں ناں ریاست ءِ زوراکیاں گیشیں تباھی آؤرتگ ات –

نندانک ءَ ھواریں ءُ مراگش ءَ بھر زوروکاں گوں تران کنان ءَ وائس فار بلوچ مسنگ پرسنز ءِ رھشون ءُ زورانسری آوار جنگ بوتگیں ڈاکٹر دین محمد ءِ زھگ سمی دین ءَ گوشتگ کہ بیگواھیں مردمانی درگت ءَ ھر وڈیں جھد ءُ کوشست ءَ مارا کسی منت گرگی نہ انت زورانسری آوارجنی ءِ جیڑہ راجی جیڑہ یے ءُ بحیثیت ءِ راج مئے سر ءَ پرز بیت کہ اشی ءِ بگیری ءَ جھد بہ کن ایں – مراگش ءَ اتکگیں مھمان اتکگ انت مارا دچار کپتگ انت آھانی آیگ نندانک ءَ نشتگیں کھولانی ھاتر ءَ شریں پیامے کہ آھانی ھمدرد ساڑی انت –

سمی دین ءِ گوشگ ات کہ منی پت سینزہ سال ساری آوار جنگ بوتگ اے سینزدھیں سال منی پانزدہ دمانی تران ءِ تہ ءَ درشان کنگ نہ بنت، سینزدہ سال انت کہ وتی پت ءِ وداریاں پہ انساپ ءِ ھاتر ءَ درسیں در ٹُکیتگاں بلے انساپ نہ رستگ –

سمی دین ءِ گوشگ ات کہ پت ءِ سینزدہ سالانی زورانسری آوار جنی ءُ بیگواھی پہ من ءُ منی کھول ءَ سینزدہ کرنانی کچ ءَ بوتگ انت –

ھمے وھد ءَ بیگواھیں شبیر بلوچ ءِ گھار سیما بلوچ ءِ گوشگ ات کہ ھمک روچ اد ءَ سرکار لھتے نمائندگ کائینت مارا دروگیں تسلی دینت – مارا بازیں سال ءِ بیت کہ اے وڈیں تسلہ گوشدارگ ءَ انت – وھدیکہ ما وتی زھرشانی ءَ برجاہ داریں گڈا مارا جست کنگ بیت کہ شمارا گِس نیست کہ دگانی سر ءَ نشتگ ات – مارا وڈ وڈا ترسینگ بیت زھرشانی ءِ ھلاس کنگے جھد کنگ بیت اِنت –

سیما بلوچ ءِ گوشگ ات کہ ما لاچار انت کہ وتی شیرواریں زھگاں گوں دگانی سر ءَ نشتگ انت مئے گور ءَ گِس ھست بلے مئے دوستیگیں مردماں یل بہ کن ات ما پدا دگبریں ھچبر دگانی سر ءَ نیا ایں –

بیگواھیں مردمانی کھولانی گوم ءَ تران کنان ءَ پروفیسر منظور بلوچ ءِ گوشگ ات مروچی شال ءِ تہ ءَ بلوچ مات بے وسی ءِ اکس جوڈ بوتگ انت – اے ماتانی جھد ءُ جنگ چہ کرناں برجاہ انت – بلوچ زالبولاں ھچ کرن ءَ زلم زوراکیانی بگیری ءَ ھاموش نہ بوتگ انت بلکنہ مدامی اے زوراکیانی بگیری ءَ اوشتاتگ انت –

ایچ ار سی پی شال ءِ رھشون طاہر حبیب ءِ گوشگ ات کہ دگہ ڈیھاں آمیدگسانی کار مردماں ھک ءُ انساپ دیگ انت بلے ادا آمیدگس ءُ کمیشن ترسینگے رند ءَ انت کہ ھر وڈیں شھری ءِ ھاتر ءَ انسانی ھکانی بگیری انت –

ترانکارانی گوشگ ات کہ انساپ گرگ ءِ ھاتر ءَ بلوچ راج ھاسکر سیاسی پاٹی بیگواھیں مردمانی یل کنائینگے ھاتر ءَ جھد ءِ تہ ءَ گیشی بیار انت تانکہ زورانسری آوار جنیانی درچ دارگ بہ بیت –

مراگش ءِ گڈسر ءَ بازیں بیگواھیں مردمانی کھولاں تران کنان ءَ وتی دوستیگیں مردمانی یل کنگے لوٹ کتگ – کھولانی گوشگ ات کہ آھانی نندانک تاں ھما وھد ءَ برجاہ بیت تانکہ آھانی لوٹ منّگ نہ بنت –

بلوچستان نیشنل پارٹی (مینگل) ءِ بنجاھی درشان ءِ تہ ءَ پاکستانی پوج ءِ لیفٹیننٹ جنرل سرفراز احمد ءُ آئی ھمراھانی مَرگ ءِ سر ءَ بژن ءُ پدردی درشان کنگ بیتگ۔

بلوچستان نیشنل پارٹی ءِ بنجاھی پدردی درشانے تہءَ گُشگ بیتگ کہ ھیلی کاپٹر وئیل ءِ تہءَ کور کمانڈر کوئٹہ لیفٹیننٹ جنرل سرفراز احمد ءُ آئی ھمراھانی مرگ ءِ سرءَ اپسوز ءِ درشان کنیں ءُ سانمندیں کھولاں گوں پدردی درشان کنان ءَ دعا کنیں ھاوند آھانی جاھاں وش بہ کنت ءُ پشت کپتگیناں سبر ءُ اوپار بہ دنت۔

گوستگیں روچ ءَ بلوچستان نیشنل پارٹی ءِ سروک سردار اختر جان مینگل ءَ ھم ٹوئٹ یے تہءَ مرتگیں کارندھانی ھاترءَ دعا کُتگ اَت۔

چارشمبے ءِ روچ ءَ پاکستانی پوج ءِ مستر چال ءَ آیگ ءِ وھدءَ ھیلی کاپٹر وئیل ءَ کُشگ بیتگیں لیفٹیننٹ جنرل سرفراز علی ءُ بریگیڈیئر محمد خالد نماز جنازہ ءَ ھوار بیتگ اَت۔

مرتگیں مزنیں پوجی اپسرانی نماز جنازہ ءَ سروزیر بلوچستان، گورنر، مزنیں پوجی ءُ سرکاری اپسراں نے بھر زرتگ رندترءَ پاکستانی آرمی چیف ءَ لیفٹیننٹ جنرل سرفراز علی ءُ بریگیڈیئر محمد خالد ءِ کھول ءَ گوں نیاد کُتگ ءُ پدردی درشان اِتگ۔

آئی ایس پی آر ءِ ردءَ آرمی چیف ءَ گوستگیں ماہ ءَ بلوچ لبریشن آرمی ءِ دستءَ دزگیری ءَ پد کُشگ بیتگیں لیفٹیننٹ کرنل لئیق بیگ مرزا ءِ کھول ءَ گوں ھم نیاد کُتگ۔

یات بہ بیت بلوچ سلاہ بندیں آجوئی لوٹوکانی ھواری گل بلوچ راجی آجوئی سنگر ءَ رسانکدر ءَ شنگ کُتگیں درشانے تہءَ گُشتگ کہ مئے سرمچارانی یک ٹولی ءِ نورانی ءِ کوھی دمگانی تہءَ جُنزگ ءَ بیتگ اَنت، کہ آھاں جھل بال کنوکیں دژمنے ھیلی کاپٹر دستگ اَت، سرمچاراں جھاز بگیریں سلاھاں گوں ھیلی کاپٹر نشانگ کُتگ، کہ اِشی سوب ءَ آئی سک باز تاوان رستگ ءُ ھیلی کاپٹر کپتگ ءُ سرجم ءَ تاوانبار بیتگ وھدیکہ آئی ءَ سواریں دژمنیں پوجے ششیں کارمند ھما دمان ءَ مُرتگ اَنت۔

براس ءِ جارکش بلوچ خان ءَ گُشتگ کہ کُشگ بیتگینانی تہءَ شالءِ کور کمانڈر لیفٹیننٹ جنرل سرفراز علی ھم ھوار بیتگ۔ آ بلوچستان ءَ ملٹری انٹیلجنس ( ایم آئی) ءِ ڈی جی ءُ آئی جی فرنٹیئر کور بلوچستان ساوتھ ھم بیتگ، جنرل سرفراز علی پدری ءَ بلوچ نسل کشی ءُ زورانسری بیگواھیانی تہءَ ھوار بیتگ۔

لندن: بی این ایم ءَ ماں برتانیا ءِ بنجاھی شھر لندن ءَ پاکستانی سپارتجاہ ءِ دیم ءَ زھرشانی کرتگ۔ اے زھرشانی پاکستانی لشکر ءِ دست ءَ ماں زیارت ءَ 11 پہ زور بیگواھیں مردمانی دروگیں میڑ ءُ دزگیری ءِ کوش ءِ بگیری ءَ ءُ بلوچستان ءِ بنجاھی شھر شال ءَ چہ گْوستگیں ھپتگے ءَ نندانک ءَ نشتگیں پہ زور بیگواھیں مردمانی کھول ءَ گوں ھمدلی ءِ درشان ءَ کنگ بیتگ۔اے زھرشانی ءَ مزنیں کچے ءَ مردماں بھر زرتگ۔اے مردمانی تہ ءَ ورلڈ سندھ کانگریس ءِ مزن کارگشاد ڈاکٹر لکو لوھانہ ءُ بلوچ راجی زْرمبش ءِ ابدللہ بلوچ ھم ھوار بیتگ اَنت۔

زھرشانی کنوکانی دست ءَ جرنبشت ءُ تاک نبشت بیتگ اَنت کہ آیانی تہ ءَ پہ زوریں بیگواھی ءُ دروگیں میڑانی بگیری ءَ ءُ پہ بلوچستان ءِ آجوئی ءِ پلہ مرزی ءَ اوگام نبشتہ بیتگ۔زھرشانی کنوکاں پہ زوریں بیگواھی ءُ بلوچ چکچینی ءِ بگیری ءَ اوگام جتگ۔ پر ایمنیں زھرشانی ءِ میان ءَ پاکستانی سپارتجاہ ءَ دزمانجنی کرتگ ءُ بھر زیروک بْرانز دیگ ءِ کوشست کرتگ اَنت بلے چہ ایشی ءَ ابید ھم بھرزیروکاں گوں پر ایمنی ءَ وتی زھرشانی برجاہ داشتگ۔

گوں زھرشانی کنوکاں گپ جنان بی این ایم ءِ کستریں کمک کارگشاد ھسن دوست ءَ گْوشتگ پاکستان ءَ 11 بے میاریں پہ زور بیگواھیں مردم ماں زیارت ءَ کشتگ ءُ آ سلاھبندیں گلے ءِ باسک پیش دارگ ءِ کوشست کرتگ اَنت بلے ما ءُ جھان اے گپ ءَ زان ایں کہ مزنیں کچے ءَ بلوچ، سندی ءُ پشتون پاکستان ءِ ناراھیں زندان ءَ اَنت۔ مروچی چاگردی رسانکدر ءِ باریگ ءَ پاکستانی دْروگ پاشک بیتگ۔پاکستان کوشست کنگ ءَ اِنت کہ بلوچ زْرمبشت ءَ گوں زوراکی ءَ آسر بہ کنت بلے من آیاں گْوشگ لوٹ آں کہ مروچی داں ھمینچک ءَ کہ چک ءُ جنین ھم آیانی دیم ءَ پہ بلوچ آجوئی ءِ زْرمبشت ءَ اوشتاتگ اَنت۔

آئی ءَ گْوشتگ پاکستان بلوچستان ءَ مردمی اگبالاں لپاشگ ءَ اِنت ءُ جنگی میارانی تہ ءَ گون اِنت۔ اے مئے لوٹ اِنت کہ ھم سنتیں راج الم دزمانجنی بہ کنت ءُ ماں بلوچستان ءَ وتی کرد ءَ پیلو بہ کنت۔

ڈاکٹر لکو لوھانہ ءَ گْوشتگ کہ ما مروچی چہ اد ءَ پاکستان ءَ اے گْوشگ لوٹ ایں کہ تو چکچینی کنگ ءَ ئے، تو بلوچستان ءَ مردمگری ءِ بگیری ءَ میار کنگ ءَ ئے ءُ تو بہ زان ئے کہ چہ تو پیش ھم اد ءَ رجیمے بیتگ ءُ آئی ءَ ھمے میار کرتگ اَنت۔پاکستان ءَ بلوچستان پہ زور گیپتگ ءُ راجے ءِ بستار ءَ بلوچ آجوئی لوٹ اَنت، اے چیردست دارگ نہ بیت۔پاکستان سک باز زوراک جوڑ بیتگ کہ وتی آزار جاھاں بندیں بے میاریں مردماں کشگ ءُ مارا ترسینگ لوٹ ایت۔

بلوچ راجی زْرمبش ءِ ابداللہ بلوچ ءَ تْران کنان ءَ گْوشتگ دروگیں میڑان بے میاریں مردمانی کوش جھان ءَ مزنیں جنگی میارے۔ھزارھاں بلوچ پاکستانی آزار جاھاں بند اِنت ءُ پہ مئے ترسینگ ءَ آ دروگیں میڑاں کشگ بیگ ءَ اَنت بلے مردمگری چہ آیانی ترس ءَ گیشتر توانمند اِنت۔

بی این ایم یوکے تک ءِ سرکماش منزور ءَ گْوشتگ پاکستان راجمستری ءِ منوگریں ڈیھے نہ اِنت بلکیں ناشرکاریں لشکر ایشی ءَ ھلائینگ ءَ اِنت۔ما اد ءَ پاکستانی سپارتجاہ ءِ دیم ءَ چہ آیاں چیزے ءِ لوٹگ ءَ زھرشانی کنگ ءَ نہ ایں بلکہ ما زان ایں کہ اے پاکستانی لشکر ءِ چانیگ پنڈ اَنت بلکیں ما جھان ءَ پاکستان ءِ راستیں چھرگ ءِ پیش دارگ ءَ اد ءَ یکجا بیتگ ایں۔

گڈی ءَ بی این ایم یوکے تک ءِ کارگشاد ءَ بھر زیروکیں مردمانی منت گیپتگ ءُ گْوشتگ کہ ما اد ءَ دروگیں میڑاں بے میاریں مردمانی کوش ءِ بگیری ءَ یکجا بیتگ این ءُ ما گوں پہ زوریں بیگواھیں مردمانی کھولاں ھمدلی درشان کنگ ءَ ایں۔ ما آیاں گْوشگ لوٹ ایں کہ آ اے جھد ءَ وتءَ ایوک سما مہ کن اَنت بلکیں سرجمیں بلوچ راج آیانی ھمراہ اِنت۔مئے بے ڈک ءُ بندیں پلہ مرزی گوں سانمندیں کھولان اِنت۔ما گوں میان استمانی واک گچینی ھم سنتیں راج، یورپی سنت، برتانیا ءُ گوں امریکا ءَ لوٹ کن ایں کہ آ پاکستان ءِ سر ءَ زیت پابندی بہ جنت ءُ پاکستان ءَ داں ھما وھدی کمک مہ دنت کہ پاکستان بلوچ ءِ چکچینی ءُ ماں بلوچستان ءَ مردمگری ءِ بگیری ءَ وتی بدیں کارپداں آسر مہ کنت۔ چہ ایشانی بے تواری ءَ پاکستان ءَ گیشتر زوراکی کنگ ءُ بلوچ ءِ چکچینی ءِ ھاٹیگ رس ایت۔

بلوچستان ءِ بنجاھی شھر شال ءَ مروچی چار شمبے ءِ روچ بی ایس او ءِ نیمگ ءَ بلوچستان شھدربرجاہ ءَ بامسار لٹریچر ءِ نام ءَ بُک اسٹال ءِ جنگی بوتگ کہ انتزامیہ ءَ آ رد کُتگ کہ اشی ءِ بگیری ءَ بی ایس او ءِ باسکاں زھرشانی کنان ءَ سریاب دگ بند کُتگ ءُ کتاب دگ ءِ سر ءَ ایر کُتگ ءُ زھرشانی کتگ –

ھمے وھد ءَ نودربرانی درگان درگان کنگے ھاتر ءَ پولیس ءَ لٹ شاپی ءُ شیلنگ کُتگ کہ پدا رند ءَ بُک اسٹال مزنیں گیٹ دپ ءَ برگ بوتگ ءُ ھمود ءَ زھرشانی کنگ بوتگ –

شھدربرجاہ رؤگ آھگے ھاتر ءَ ھنگت بند انت ھمے درگت ءَ بی ایس او ءِ باسکانی گوشگ ات کہ شھدربرجاہ ءِ انتزامیہ ءَ مارا توک ءَ اسٹال جنگ ءِ موکل نہ دنت گڈا مزنیں گیٹ پہ ھریکی ءَ بند بیت اِنت –

بی ایس او ءِ جارکش ءَ گوشتگ کہ کتاب مئے میراث انت ءُ شھدربرجاہ مئے ادارہ انت کہ آئی ءِ سر ءَ درساں پیش اختیار نودربرانی انت پہ یک مافیا ءِ گوشگے پد ءَ نودربر وتی زانشتی ءُ سیاسی کاراں نہ دار انت بی ایس او ءِ بک اسٹام دارگ ءُ نودربرانی سر ءَ لٹ شاپی شھدربرجاہ ءِ انتزامیہ ءِ گون زانت ءَ دژمنی ءِ گوشگ بیت کہ اشی ءِ بگیری ءَ مدام توار چست کن ایں- انکلابی رویش سر ءَ بندش جنگ ءَ نہ منّ ایں شھدربرجاہ ءِ تہ ءَ الم بک اسٹال جنگ بیت اِنت –

آئی ءَ گوشتگ کہ بی ایس او شال ھنکین ءِ گوشگ ءِ پد ءَ مروچی بامسار لٹریچر ءِ رِد ءَ شھدربرجاہ ءِ تہ ءَ بک اسٹال ءِ جنگ ءِ پیسلہ کنگ بوتگ – بامسار لٹریچر بی ایس او ءِ بنجاھی آرگن انت ءُ بلوچ ورنایانی تہ ءَ سیاسی زانت ءُ آھانی ہگر گیش کنگے کمپئین یے – اے کمپئین ءَ بی ایس او سرجمین بلوچستان ءَ تالان کنگے جھد ءَ کنت تانکہ کتاب دوستی پگری گپ جنگ ءَ راج وتی دیمروی ءَ کت بہ کنت ءُ چاگرد ءِ تہ ءَ جوانیں بدلی بیاریت بلے بلوچستان ءِ تہ ءَ زانت ءُ زانشت ءِ دیم ءَ برگ ءُ آئی ءِ سر ءَ کار کنگ یونیورسٹی شھدربرجاہ ءُ آئی ءِ واجھاں ھچ وڈ دوست نہ بیت ءُ اشی ءِ سر ءَ نودربراں ترسینگ ءُ آھانی سر ءَ زوراکی کنگ ھچ وڈ منّگ نہ بیت –

آئی گوشتگ کہ بلوچستان شھدربرجاہ ءِ تہ ءَ بی ایس او ءَ مراگش ءِ اڈ داتگ گڈا شھدربرجاہ انتزامیہ ءِ گنڈایاں نودربرانی سر ءل بیڑ برتگ ءُ آھانی راہ داشتگ کتاب توک ءَ برگ ءَ نہ اشتگ انت کہ پدا رند ءَ نودربراں سریاب دگ بند کتگ ءُ کتاب دگ ءِ سر ءَ ایرکرتگ ءُ وتی کمپئین کتگ ءُ بلوچستان شھدربرجاہ ءِ رکینگے ھاتر ءَ دگ ءِ سر ءَ زھرشانی انت – بی ایس او اے گپ ءِ سر ءَ باور کنت کہ یک کیڈر ساز راجی ادارہ ءَ راجی پگر وتی انکلابی بھر مان کنگی انت ءُ ورنا سائنسی زانت ءَ چہ لیڈر جوڈ بہ کنت کہ راجی جھد ءِ تہ ءَ وتی کرد ءَ پیلو بہ کن انت – ھمے درگت ءَ سٹڈی سرکل بہ بنت یا ورک شاپ نیشنل سکول بہ بنت یا کونسل سیشن بی ایس او ءِ درسیں ادارہ کیڈر سازی ءَ مھکم کنگے ھاتر ءَ جوانیں کار کنگ ءَ انت ھمے وڈ بامسار لیٹریچر ھم گل ءِ جھد یے –

ھمے زانشت واھشت ءَ نودربراں مروچی پد ءَ لٹ وارتگ ءُ زوراکی ءِ دیم ءَ اوشتاتگ انت بلوچستان ءَ نوک آبادی نزام ءِ تباہ کاری ءَ زانشتی، مالی ءُ سیاسی ادارھان سک باز تاوان داتگ بلوچستان ءِ درسیں ادارہ زورگیرانی دست ءَ انت کہ بس شھدربرجاہ ءِ مڈیاں پُلگ لوٹ انت ءُ زانشت ھلاس کنگ ءِ جھد ءَ انت – بلوچستان شھدربرجاہ کہ بلوچستان ءِ مستریں ادارہ زانگ بیت ءُ اے زورگیرانی نشانگ انت ادا انتزامیہ ءِ نام ءَ فاشسٹ ھاکمی بوھگ ءَ انت کہ آئی ءِ لوٹ انت شھدربرجاہ ےِ زانشتی پگری ءُ تنکیدی کرد ھلاس بہ بیت –

النگیں سنگر

آبدرھشون

دی بلوچستان پوسٹ

النگیں سنگر ءِ بامرد کہ مکّ اِنت ماتکوھاں
پھازین ایت ءُ پھریز ایت زمین ءِ نازبوھاں

بساچ چہ مھنوئیں انجیری سرشاھاں کمانے
بہ نندءُ شلسریں تیرءُ سگاراں کن تو سوھان

وپا ءِ شورہ سبزین اَنت وتن مات ءَ بلے تو
وتی بورءَ پُگاں پَش بند تئی گیرینک اِنت جوھان

زمین ءِ آشکیں بچّانی ارواھے ترہ ایت چوں
چہ جنگی تیھراں جند ءِ من ھمراھاں بہ دروھاں

کجا جلّ ایت مڑاھانی اے ملّیں سر پہ رھشون
گُریلا جنگ ایشاں وانتگ درھیں رھبنداں پوھاں

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ شنگ کرتگیں وتی درشان ءِ تہ ءَ گُشتگ سرمچاراں گوستگیں شپ ءَ شال ءُ تربت ءَ دو جتائیں اُرشاں پاکستانی پوج ءُ پولیس نشانگ کتگ ءُ دو پانگس تباہ ءُ چار کارندہ ٹپی کتگ اَنت-

جارکش جیئند بلوچ ءَ گوشتگ کہ اولی اُرش شال ءَ کمبرانی دگ ءِ سر ءَ پولیس کارندھانی سر ءَ کتگ، کارندہ گوں دست بمب ءَ نشانگ کتگ اَنت، چریشی آسر ءَ دو کارندہ ٹپی بوتگ اَنت-

ھمے وڑ تربت ءِ دمگ آپسر ءَ فرنٹیئر کور آبدروک چوکی سر ءَ دست بمب اُرشے کتگ، چوکی ءِ تہ ءَ تراک ءِ آسر ءَ دُژمن ءِ دو کارندہ سک ٹپی بوتگ اَنت-

بلوچ لبریشن آرمی دوئیں اُرشانی زمہ واری ءَ منّ اِیت- آجوئیں ڈیھ ءِ وتواجھی ءَ مئے اُرش برجاہ بنت-

بلوچستان ءِ بنجاھی شھر شال ءَ ناشناسیں سلاہ بندیں مردمانی تیرگواری ءَ چہ رضا جھانگیر ءِ چکانی مات زدگ –

رضا جھانگیر ءِ چکانی مات ءِ سر ءَ بلوچستان شھدربرجاہ ءِ دیم ءَ تیرگواری ءِ نشانگ کنگ بیتگ – زدگیں جاوراں ھسپتال ءَ سر کنگ بیتگ –

دمگی مردمانی رد ءَ ناشناسیں پرپٹ سواریں مردماں تیرگواری کتگ ءُ تتکگ اَنت ءُ آئی ءِ جاور ناگیگی ءَ چہ گھتر اَنت-

دمگی مردمانی رد ءَ آئی ءَ را دو تیر جنگ بیتگ یک تیرے آئی ءِ سر ءَ لگ اتگ ءُ دراتکگ –

زانگ بہ بیت رضا جھانگیر بی ایس او آزاد ءِ سیکریٹری جنرل بیتگ کہ آ چاردہ اگست ءَ دو ھزار ءُ سیزہ ءَ تربت ءَ پوج ءَ بی این ایم ءِ رھشون امداد بوجیر ءِ لوگ ءَ بیڑی ءِ وھد ءَ ھردوک کُشتگ اَنت-