TBP Balochi

بلوچستان لبریشن فرنٹ ءَ شال ءِ ھند ھزارگنجی ءَ السادت مارکیٹ نزّیک ءَ پولیس کارمَندانی سر ءَ ریمونٹ کنٹرول بمب (Command activated IED) اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شنگ کُرتگیں درشان ءِ تہ ءَ گْوشتگ کہ شش ساچان ( 6 اگست ) گنجان ءِ روچ ءَ مئے سرمچنڈاں بلوچستان ءِ بُنجاھی شھر شال ( کوئٹہ ) ءِ ھند ھزار گنجی ءَ السادت مارکیٹ ءِ نزّیک ءَ پولیس کارمَندانی سر ءَ ھما ساھت ءَ گوں ریمونٹ کنٹرول بمب (Command activated IED) ءَ اُرش کُرتگ کہ آئی مُدامیگیں وتی پٹّ ءُ پولی ( سرچ گشت ) گشت ءَ بوتگ۔

میجر گْوھرام بلوچ ءَ وتی درشان ءِ تہ ءَ دیمتِر ءَ گْوشتگ کہ اے اُرش ءِ آسر ءَ سئے پولیس کارمَند ٹپّی ءُ یکّے مُرتگ، چوش کہ تْراک ءِ زد ءَ اتکگیں یک رھگِیرے ھم ٹپّی بوتگ کہ آئی درگت ءَ ما ارمانی اِیں،

بلے بلوچستان لبریشن فرنٹ پوج ءُ آئی کُمکّارانی سر ءَ گوں تْرندی ءَ وتی اے اُرشاں برجاہ دار اِیت ءُ چہ بلوچ راج ءَ دزبندی کنت کہ آ پوج ءِ میڑ ءُ مُچّی، پانگِس ءُ چہ اے دِگہ سُر ءُ پُراں وت ءَ دُور بِہ دار اِیت۔

جارکشّ میجر گْوھرام بلوچ ءَ دیمتِر ءَ گْوشتگ کہ اے اُرش بلوچستان لبریشن فرنٹ ءِ ایکسپلوزو اسکواڈ (explosive squad) ءِ نیمگ ءَ چہ کنگ بوتگ، گوں اربن چیرجنگی ( گوریلہ تکنیک ) رِپکانی کاگِرگ ءَ پد مئے سرمچنڈ پہ دْرواہ ءُ سلامتی درکپگ ءَ سوبین بوتگ اَنت۔

گُڈّسر ءَ بلوچستان لبریشن فرنٹ ءِ جارکشّ میجر گْوھرام بلوچ ءَ گْوشتگ کہ کْوزہ گیریں ریاست ءِ بگیر ءَ اے اُرش دانکہ ایردستیں بلوچستان ءِ آجوئی ءَ گوں تْرندی ءَ یکشل ءَ برجاہ بَہ اَنت-

بلوچستان ءِ بنجاھی شھر شال ءَ چہ بلوچی اکیڈمی ءِ نیمگ ءَ (بلوچی کسہ) ازم ءُ بُن گپ ءِ سرھال ءِ سر ءَ یک دو روچی مراگشے برجم دارگ بیتگ-

مراگش ءَ بلوچی زبان ءِ نامداریں پولکار ءُ زانت کاراں وتی پولکاری نوشتانک ونتگ انت۔ اے مراگش اگست ءِ 5 ءُ 6 رمس ءَ ماں بلوچی اکیڈمی ءِ کمپلکس ءَ بوتگ۔

دو روچی مراگش ءَ بلوچی کسہ ءُ فکشن ءِ ازم، کسہ ءُ داستان ءِ نیام ءَ تپاوت، بلوچی کسھانی تب ءُ دپتر، کسھانی کردار، بُن گپ ءُ سرھالانی باروا نوشتانک وانگ بوتگ اَنت-

نیاد ءَ بلوچی زبان ءِ نامداریں پولکار کہ چہ آیاں علی گوھر، رازق راج، عبداللہ دشتی، اقبال ظہیر، مقبول ناصر، الطاف ناصر، چندن ساچ، بانُک ثانیہ امجد، رفیق چاکر، امین ضامن، فضل بلوچ، ڈاکٹرغفور شاد، ممتاز یوسف، ڈاکٹر عبدالصبور بلوچ ءُ ڈاکٹر واحد بزدار ءَ گوشتانک دات ءُ پولکاری نوشتاک ونتگ اَنت –

اے مراگش ءَ ورنا ءُ زند ءِ ایدگہ پڑاں وانوک ءُ زانتکاراں بھر زُرتگ۔ ایشی ءَ ابید اے مراگش ماں فیس بُک (سوشل میڈیا) ءَ لائیو پیش دارگ بوتگ۔ اکیڈمی ءِ کماش سنگت رفیق ءَ تران کُت ءُ گوشتگ کہ بلوچی اکیڈمی گر وھد ءَ چوشیں مراگش جم دار ایت کہ چرائی ءَ بلوچی زبان ءُ لبزانک ءَ نپ بہ رس ایت اے پولکاری نوشتانکاں بلوچی کسہ ءِ باروا انچیں سرپدی ھست انت کہ آ چد ءُ ساری دیم ءَ نیاتکگ انت ءُ اے نوشتانکی ماں کتابی رنگ ءَ چھاپ کنگ ءِ مول ءُ مراد ھمیش انت کہ اے پولکاری نوشتانک گیشتر وانوکاں سر بہ بنت۔ مراگش ءَ نندوکیں مردماں گوشتگ کہ باید انت اے وڑیں مراگش مدام جم دارگ بہ بیت تاں کہ وانوک ءُ لبزانک ءِ ھب ناکیں مردم بلوچی زبان ءُ لبزانک ءِ بابت ءَ سرپد بہ بنت۔

زورانسری آوار جنگ بوتگیں بیگواھیں مردمانی کھولانی گوم ءَ بے سنچی ءَ پیش بوگ شھری انسانی ھکانی لگتمالی یے – بلوچ وومن فارم (سمو راج)

بلوچ وومن فارم ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ انسان نیستی یے آماچ انت انسانی ھکانی لگتمالی تیزی ءَ گوں برجاہ انت، زورانسری اوارجنی ءِ جیڑہ دلگوش دیگی انت ءُ اشی ءِ گیشگیوار کنگی انت – ھزاراں کھولانی زند گوں ھمیشی ءَ بندوک انت چریشی ءَ زھگ زالبول گیشتر اثرمند انت کہ ماژگی ازاب ءُ دلسیاھی، مالی ءُ چاگردی اڈوجنجالانی دیمپانی کنگ ءَ انت –

جارکش ءَ گوشتگ کہ زیارت ءِ وئیل ءَ پد بیگواھیں مردمانی کھول گیشتر ماژگی ازیت ءِ آماچ انت بازیں بیگواھیں مردمانی کھولاں مروچی ھژدہ روچ سرجم انت کہ گورنر کارگس ءِ دیم ءَ نندانک ءِ جتگ ءُ نشتگ انت بلے تنی وھدی سرکار ءَ آ گوش نہ داشتگ انت –

جارکش ءَ گوشتگ کہ بیگواھیں مردمانی کھولانی گوم ءَ سرکار ءُ ملکی ادارھانی اے دابیں رویش زوراکی یے – زھرشانی ءِ اولی روچ ءَ چُک ءُ زالبول ءُ پرایمنیں زھرشانی کنوکانی سر ءَ لٹ شاپی ءُ ارسی گیس ءِ شیلنگ شرمناکیں کار ءِ بوتگ – پاکستان ءِ کانود زھگ ءُ زالبول ءُ پرایمنیں زھرشانی کنوکانی سر ءَ زوراکی کنگ ءِ موکل ءَ نہ دنت ءُ ناکہ پولیس ءَ اے موکل دنت کہ زالبولانی گُشان ءَ دیر کن ءُ آھاں بد رد بہ کن – پولیس ءِ زوراکی ءُ سیل چاروک ھمنکس ایرجنگ بہ بنت کہ کم انت –

جارکش ءَ گوشتگ کہ چُک ءُ زالبولانی شپ ءُ روچ پچیں آزمان ءِ چیر ءَ انساپ ءِ ھاتر ءَ نندگ سرکار ءِ بے بسی ءَ پیش داریت – دومی نیمگ ءَ وتگڑیں سیاسی لیڈر بیگواھیں مردمانی کھولاں بیدے زبانی تسلی ءَ دگہ ھچ دات کرت نہ کناں –

جارکش ءَ سرکار ءِ سر ءَ تنکید کتگ ءُ گوشتگ کہ سرکار ءِ نیمگ ءَ نندانک ءِ ھلاس کنگے ھاتر ءَ زور دیگ ءِ جھد بوگ ءَ انت بلے کھولانی گوشگ انت کہ آھان ہر فورم ءِ تہ ءَ وتی زھرشانی نبشتہ کنائینتگ – سالانی سال دگانی سر ءَ درپہ در انت بلے آھاں انساپ نہ رستگ – کھولانی رِد ءَ نندانک ھلاس کنگے ھاتر ءَ آھان گون سرکار ءَ ھچ وڈیں معاہدہ نہ کُتگ – دانکہ آھانی لوٹ منّگ نہ بنت ما آھانی نندانک ءَ آھانی ھمراہ داری کن ایں تان ھما وھد ءَ اے نندانک ھلاس نہ بیت وھدیکہ لوٹ منّگ نہ بنت –

بلوچ وومن فورم ءِ جارکش ءَ گڈسر ءَ وتی درشان ءِ تہ ءَ گوشتگ کہ ما وفاقی سرکار ءُ بلوچستان ءِ سرکار ءَ گوں لوٹ کن ایں کہ زوتاں زوت بیگواھیں مردمانی کھولانی لوٹ منّگ بہ بنت ءُ زورانسری آوارجنی ءِ جیڑھے گیشگیوار ءَ گامگیج زورگ بہ بیت –

بلوچستان ءِ شھر شال ءَ تراک ءِ آسر ءَ یک مردمے بیران وھدے کہ پولیس کارندہ ءَ ھوار دگہ دو مردم ٹپی بوتگ اَنت-

تراک شال ءِ دمگ ھزار گنجی ءَ السادات مارکیٹ ءِ نزیک ءَ ٹائم ڈیوائس سر ءَ کنگ بوتگ-

تراک ءِ آسر ءَ پولیس کارندہ ءَ ھوار سے مردم ٹپی بوتگ اَنت ءُ پد ءَ یک مردمے ءَ ٹپانی درد نہ سگ اِتگ ءُ نادُراھجاہ ءَ بیران بوتگ-

سرکاری واکدارانی نیمگ ءَ انگت پدر نہ بیت تراک ءِ نشانگ کے بوتگ-

بلوچستان ءِ دمگ کیچ ءَ مروچی سھب ءَ بندات بیتگیں پوجی بیڑ برجاہ اِنت۔

بیڑ کیچ دمگ ءِ تمپ ھنکین ءِ ھند گومازی ءُ ملانٹ ءِ کوھی ھند ءَ برجاہ اِنت، کہ اِشی ءِ تہ ءَ مزنیں کساسے ءَ پندی پوجی ٹولی گون اَنت۔

ھندی اھوالانی رد ءَ مروچی لشکری کوھی ھند ءَ روگ ءَ گندگ بیتگ اَنت بلے داں انگت لشکریانی واتر بئیگ ءِ ھچ پئیمیں ھال سر نہ بیتگ اَنت۔

بیڑ ءِ نیام ءَ ھچ پئیمیں جانی تاوان اگاں دزگیری ءِ ھال دیما نئیتکگ ءُ نانکہ سرکار ءِ لیکہ اَے رد ءَ داں انگت دیم ءَ اتکگ۔

اوگانستان ءِ بنجاھی شھر کابل ءَ بیتگیں تراک ءِ تہءَ 22 مردم ٹپی بیتگ اَنت۔

درانڈیھی رسانک ایجنسی ءِ ردءَ تراک کابل ءِ گسی ایں باپاری ھند ءَ بیتگ کہ اِشی تہءَ 22 مردم ٹپی بیتگ اَنت، چم دیستگیں مردمانی گوشگ اِنت کہ تراکءِ مردمانی بیران بئیگ ءِ ھم تُرس اِنت۔

اوگان تھی کارانی وزارت ءِ جارکش ءِ ردءَ تراک جاہءَ پھازگی لشکر سربیتگ اَنت ءُ بنداتی کمکی کارانی پجیگ ءَ پَٹ ءُ پول کنگ ءَ اَنت۔

عاشورہ ءَ پیسر بیتگیں اُرش ءِ زمہ واری داں انگت ھچ گل ءَ نہ من اِتگ۔

یات بہ بیت کہ گوستگیں روچ ءَ ھم کابل ءَ یک تراکءِ بیتگ اَت کہ آئی آسر ءَ ھشت مردم بیران ءُ 18 ٹپی بیتگ اِت اَنت، آ اُرش ءِ زمہ واری نیکراھی ناشرکاریں گل داعش ءَ زرتگ اَت۔

داعش ءَ ٹاہ داتگ اَت کہ اُرش تہءَ 20 مردم بیران ءُ بازیں ٹپی بیتگ اَنت وھدیکہ اوگان پولیس ءَ 8 مردمانی بیرانی ءِ ھال راست کُتگ اَت۔

روکپتی بلوچستان ءَ استاداں سرباز ءُ استادانی دیگری ءِ بگیری ءَ زھرشانی کتگ، استاداں سیستان و بلوچستان ءِ وانگجاہ بند کتگ ءُ گشتگ کہ اے دیگری ءِ میان چی اِنت کہ ما نیم بھر چارگ بیگ ءَ ایں-

روکپتی بلوچستان ءِ دمگ ھاش ءَ سربازانی وانینوکیں استاداں گشتگ کہ مئے لشکری کارندھانی میان ءَ پرچا دیگری آرگ بیتگ آیاں سرکار چرپیں نگاھاں چار ایت ءُ مارا بدیں نگاھاں اے وڑ مہ بیت-

آیاں گشتگ ما ھمے واستا کمتریں نگاھاں چارگ بیگ ءُ ڈالچار کنگ بیگ ءَ اِنت ما بلوچ اِنت ءُ چریشی ءَ مئے ڈالچاری مارا گیشتر دلپروش کنت-

آیان گشتگ سربازیاں سِی روچ موکل رس ایت ءُ مارا پانزدہ روچ پرچا؟ اے دیگری ءُ ڈالچار دور کنگ بہ ببت آیاں گشتگ سربازیاں سِی روچ ءِ ھرچ ءُ درچ رس ایت مارا پانزدہ روچ ءِ پرچا رس ایت –

آیاں گُشتگ کہ مئے لوٹ اِنت مزنیں واکاں اے وڑیں ڈالچاریانی سر ءَ گامگیج بہ زور اَنت چوشیں کرداں بہ دار اَنت-

ھالکاراں گوشتگ کہ پانزدہ روچ ءِ ھرچ ءُ درچ دَہ ملیار تومان اِنت باید اے دیگ بہ بنت ءُ آیانی ھک ءُ موز اَنت-

آیاں گشتگ کہ سربازی استاداں سیستان و بلوچستان ءَ بازیں وانگ جاہ ھست اَنت بند اَنت ءُ نیستی ءِ آماچ اَنت اے وڑی ءَ اگاں ڈالچار کنگ بیت اَنت گڑا اے ڈالچاری ءَ بازیں وانندگیں مردمانی وانگ زوال ءِ نیمگ ءَ شت کنت-

وانگ ءُ زانگ ءِ گوستگیں وزیر حمید رضا رخشانی ءَ گشتگ کہ سیستان و بلوچستان ءَ دوازدہ ھزار چار سد ءُ سی ءُ چار استاد اَنت کہ اشانی توک ءَ اے مردم اود ءَ جاڑیگ نہ اَنت چریشی ءَ چل ءُ ھشت ھزار زھگ چہ وانگ ءُ زانگ ءَ پشکپتگ اَنت-