TBP Balochi

چمن ءَ گاڑی ءِ کلٹی بوگ ءَ چار مردم بیران بیتگ اَنت-

گیشیں ھالانی رد ءَ بلوچستان ءِ دمگ چمن ءِ شھدگ ءَ ترند روکیں گاڑی ءِ بریک فیل نیتگ اَنت چریشی ءَ گاڑی کپتگ ءُ گاڑی ءَ سواریں سَے زھگاں ھوار چار مردم بیران ءُ دو زدگ بیتگ اَنت-

دمگدار ءُ ریسکیو ٹیم وئیل جاہ ءَ سر بیتگ اَنت ءُ زدگ بیتگیں درمانی ءَ شال ءَ برگ بیتگ اَنت گاڑی والا مردہ کاریز ءِ نیمگ ءَ دیم پہ شھر ءَ روگ ءَ بیتگ اَنت ناگتی گاڑی ءِ بریک فیل بیتگ اَنت گاڑی کپتگ-

چمن انتزامیہ ءَ اژدری چار ءُ ٹپاس ءَ پد بیران بیتگیں مردمانی لاش کھولانی ھوالہ ءَ داتگ اَنت-

راسک ءَ ایرانی چیریں ادارہ “اطلاعات ” ءِ دست ءَ یک مردمے آوار جنگ ءَ پد بیگواہ

گیشیں ھالانی رد ءَ روکپتی بلوچستان ءِ دمگ راسک ءَ ایرانی چیریں ادارہ اطلاعات ءَ یک مردمے آوار جنگ ءَ پد بیگواہ کرتگ-

آوار جنگ بیتگیں مردم ءِ پجار عبدالسلام زارعی ء خالد جھمنند بیدلد راسک ءِ نام ءَ زانگ بیتگ-

دمگی مردمانی رد ءَ عبدالسلام یک نودربرے کہ آوار جنگ ءَ پد زاھدان ءَ ناشناسیں زنداناں برگ بیتگ ءُ چریشی ءَ پد آئی ءِ درگت ءَ ھچ ھال نیست-

ایرانی واکداراں آئی ءِ گرگ ءِ بارو ءَ دگہ بھتام پدر نہ کرتگ اَنت نانکہ آئی ءِ بارو ءَ دگہ گپ کھول ءِ دست ءَ داتگ-

زانگ بہ بیت روکپتی بلوچستان ءَ گرگ ءُ برگ ءُ زنداناں کنگ یکشل ءَ برجاہ اَنت سال دوھزار ءُ بیست ءُ یک ءَ بگر تنی وھدی یک سد ءُ سِی ءُ نُھ مردم گرگ بیتگ اَنت –

واکدارانی رد ءَ یوکرین ءِ سر ءَ روس ءِ گپتگیں جاھاں پد ءَ روس ءِ پوج ءِ روگ ءَ پد آ جاھاں چار سد ءُ چل ھواریں لاش “گوریں مانش ” دزکپتگ اَنت-

ھالرسان روئٹرز ءَ دمگی پولیس ءِ درور دیان ءَ گوشتگ یکجاھیں مانش ازیوم ءِ ھند ءَ گندگ بیتگ کہ اود ءَ لھتے روچ ءَ پیسر روسی پوج ءِ پشتکنزی بیتگ اَت-

گوستگیں یکشمبے ءَ یوکرینی وکداراں ٹاہ داتگ اَت روس ءِ ھزارانی پوجی اے دمگاں چہ دراتکگ ءُ شتگ اَنت کہ آ بازیں وھداں لاجسٹک ءِ بنجل ءَ کارمرد ءَ بیتگ اَنت-

پولیس ءِ سروک سرھیف بالوینوف ءَ سکائی نیوز ءَ گوشتگ ’ من اے گوش آں اے آجو کرتگیں جاھاں دزکپتگیں مستریں مانشجاہ اِنت ‘ آئی ءِ تہ ءَ چار سد ءُ چل لاش دزکپتگ اَنت چریشانی تہ ءَ لھتے زمینی تیرگواری ءُ لھتے برزی تیرگواریان بیران بیتگ اَنت‘-

روئٹرز ءَ لس مھلوک ءِ نیمگ ءَ اے گپ تنی وھدی راست نہ کتگ نانکہ روسی واکدانی نیمگ ءَ چوشیں گپ دیم ءَ اتکگ اَنت-

ھمے وڑ یوکرین ءِ سروک ولادیمیر زیلنسگی ءَ روسی لشکر ءِ روگ ءَ پد اناگتی ازیوم ءِ تر ءُ تاب کتگ ءُ یوکرینی پوجیانی کرد ساڑاتگ –

آئی ءَ یکجاھیں لاشانی دزکپگ ءَ پد روس ءِ سر ءَ بھتام جتگ کہ اشی ءَ زانگ بیت اِنت دمگ ءَ چی بیتگ ھا اے بنجاھی کیئف ءِ دمگاں ھوار اِنت کہ اود ءَ اُرشانی بندات ءَ روسی پوج پتریتگ –

یوکرین ءُ آئی ءِ روکپتی ھمسنتاں روس ءِ سر ءَ جنگی جرمابی بھتام جتگ آیاں گوشتگ کہ اپریل ءَ ماریوپول ءَ بیتگیں اُرش ءَ ھزارانی کچ ءَ لس مھلوک جنگ بیتگ اَنت-

مھتر زیلنکسی ءَ پشمبے ءِ روچ ءَ یک تامر بندے ءَ تران کنان ءَ گوشتگ ’ روس ءِ روگ ءَ پد اے مرگ اش یلو کتگ اشانی زمہ وار روس ءِ سر ءَ لڈگ بہ بیت ‘-

دومی نیمگ ءَ روس ءَ ھم لس شھریانی کُشگ ءِ ھال رد کتگ ت

یوکرین ءِ نیمگ ءَ زرباری دمگاں سوبمندی ءَ یک ھپتگے ءَ پد یوکرینی واکداراں گوشتگ ات کہ روس وتی پھریزگی ءَ مھکم کنگ اِنت ءُ دیم ءَ جنزگ باز مشکل بیت اِنت-

روسی سروک پوتن ءِ نیمگ ءَ تنی وھدی پوجی تاوان ءُ آیانی پشتکنزیانی بارو ءَ ھچ گپ نہ جتگ –

یوکرینی واکدارانی گوشگ اِنت نُھ ھزار کلومیٹر (3400 میل) اے کچ ءَ جاہ واتر دستیگ کتگ اَنت-

روئٹرز ءِ نیمگ ءَ کپیانسگ ءِ دمگاں پشمبے ءِ روچ ءَ گپتگیں اکسان گندگ بیت اِنت ماڑی پرشتگ ءُ ستکگ اَنت-

دمگ ءَ ھواریں مردمے ءَ روئٹرز ءَ گوشتگ ’ بجلی نیست ناکہ دگہ رھوتی چیز نا دگہ آسراتی اگاں مئے گور ءَ چوشین ازباب بوتیں کم چہ کم وتی لوگ ءِ مردمانی ھالپرسی کتگ ات ‘-

زانگ بہ بیت روس ءَ بیست ءُ چار فروری ءَ وتی ھمساھگیں ڈیھ یوکرین ءِ سر ءَ بیڑ برتگ ات چریشی ءَ پد یکشل ءَ جنگ برجاہ اِنت چریشی ءَ ھزارانی کچ ءَ جان زوال بیتگ اَنت، امریکہ ءُ روکپتی ڈیھ یوکرین ءِ ھمراھداری ءَ کنگ ءَ اَنت ءُ روس ءِ سر ءَ زرکاری ءِ بندش ءَ ھم جنگ ءَ اَنت –

یوکرین ءِ سروک زیلنسکی ءِ گوشگ اِنت سلاھاں ھچ رنگ ءَ چگل نہ دے ءُ روس ءِ سروک ولادیمیر پوتن ءِ گوشگ گڈی سوبمندی ءَ جنگ برجاہ بیت اِنت-

نبشتانک: تھزیب داریں سْیاداں گْوں یک دیدارے

نبشتہ کار: ڈاکٹر زاھد گُل بلوچ

رجانک: ڈاکٹر شکیل بلوچ

دی بلوچستان پوسٹ

سُھب ءِ مَاھلّہ وھدے کہ چہ واب ءَ بُست کرت چار آں مات ءِ تَب وش نہ اِنت، من وتی مات زُرت چہ وتی میتگ ءَ سداں مِیل دور کراچی ءِ نیمگ ءَ رھادگ بوت آں، پانزدہ ھَزار لیٹر ڈیزل ءَ چہ سرکیلیں بَس ءِ سِیٹ ءِ سر ءَ نندگ ءُ بیست ءُ چار کلاک ءَ پد ما اِسلامی ملک پاکَستان ءِ مزنیں شَھر کراچی ءَ سر بوت اَیں، مات ءِ جاور سک نگیگ اِت اَنت، اِے بْیگاہ ءِ وھد اَت، اشتاپ اشاپ ءَ من یک ٹیکسی یے باڑہ کرت ءُ دیم پہ نادراھجاہ ءَ رھادگ بوتاں، راہ ءَ سداں چَکر ما پُلوس ءِ پْوشاک ءِ تہ ءِ بدماشانی دپ ءَ وڑ وڑیں زاہ ءُ دژمان اِشکنان ءَ پاکَستان ءِ نامی ئیں نادراجاھے ءَ رس اِتاں، آھود ءَ ھر یکے وتی جِند ءِ اُلاکانی سر ءَ نادراجاہ ءِ گیٹ ءَ پُترگ ءَ اَت، بلے مارا گْوشگ بُوت کہ ٹیکسی ءِ پُترگ ءِ موکل نیست۔ من وتی مات دست ءَ گپت ءُ اولی منزل ءَ رس اِت آں، ڈاکٹر نِندوک اَت۔

من وتی مات ڈاکٹر ءِ کْوٹی ءِ ڈَنّ ءَ نِندارینت پرچے کہ کْوٹی ءِ تہ ءَ اُلس مُچ اَت، رش کش اَت، من جْیڑ اِت کہ لمبرے گِر اِیں واتر کا اِیں، وھدے کہ من ڈاکٹر ءِ کْوٹی ءِ تہ ءَ شُت آں کاؤنٹر ءِ کِرّ ءَ سر بوت آں چار اِت کہ آھود ءَ بے کساس مردم اوشتوک اَنت، من ھم ودار کرت اوشتات آں ءُ وتی دویں دست ٹیبل ءِ سر ءَ اْیر کرت آں کہ منی باری بیت، بازیں اوشتگ ءَ چہ من سک ءَ دمبرتگ اَت ءُ وتی پاد ءِ لَنکک ماں کْوٹی ءِ پرش ءِ سر ءَ لَتارگ ءَ اِت آں کہ اناگت ءَ چہ پُشت ءَ کسّے ءَ منی پاد ءِ چْیر ءَ گْوں زور ءَ من ءَ لگَتّے جَت من سِٹّ اِت اوں وتی چَک ترّینت ءُ چار اِت کہ یک نیم اُمریں مردے ءَ را پینٹ ءُ پتلون ءِ پوشاک گْور ءَ اِنت ءُ اوشتاتگ، مَردک شکل ءَ چْو ھاندانی ئیں پنجاپی ءِ چھرگ ءَ جنَگ ءَ اَت ءُ آئی ءِ رِیش ءُ بروت ساتَگ اِت اَنت چَرپ چَرپ اَت ءُ من ءَ روک روک ءَ چارگ ءَ اَت۔ من جُست کنگی اِت آں کہ من ءَ تو پرچے ءَ لَگت جتَگ، بلے منی گپّ ءَ چہ پْیسر آ منی سر ءَ بْرانز گپت ءُ گْوشت ئِے اِے! بلوچی اود ءَ بِہ چار اِے وڑ چے ءَ چارگ ءَ ئے؟
تمیز ءِ سر ءَ اوشتات نہ کن ئے؟
پَرش ءِ سر ءَ ترا پادانی لتارَگ وش بیت ؟ جاھلیں بلوچی نہ اوشتگ زان اَنت،نہ گپ زان اَنت نہ نِندگ زان اَنت،نہ پُچ ءُ پوشاک ءِ گْور ءَ کنگ زان اَنت ءُ نہ کہ چمپل ءِ پاد ءَ کنگ زان اَنت۔

آ ھمے پیم ءَ یکیں دِرچ ءَ من ءَ ھبَر ءُ بَد گْوشان اَت، کَش ءُ کِرّ ءَ نادراہ ءُ نرس گْوں اجبیں نِگاھاں روک روک ءَ من ءَ چارَگ ءَ اِت اَنت، آیانی نْیم چَڑّی ءُ بنین پوشاکیں ءُ ھازَگیں زالبول من ءَ ھمے پیم چارَگ ءَ اِت اَتاں گْوش ئے زاناں من یک اجبیں جناورے آں ھمے مھلوک کہ مُدام مارا کاپِر ءُ روکپتی کارندہ (مغربی ایجنٹ) گْوشگ ءَ ساھتے ھم دَم نہ بر اَنت بلے وت اِد ءَ ھازگ (ننگاہ) ءَ گردگ ءَ اتاں من یک کسانیں نِگاھے وتی سر ءَ شانک دات ءُ وت ءَ را چار اِت کہ تاں منی گْور ءِ پُچ ڈیزلین اِتاں، ڈیزل ءِ بْو انگت منی پُوشاکاں چہ آیگ ءَ اَت، منی پُچّانی سر ءَ جاھے جاھے ءَ سْیاھیں نِشان ھم ھست اَت، بیست ءُ چار کلاک ءِ سپَر ءُ پانزدہ ھزار لیٹر ڈیزل ءِ سر ءَ نِندگ ءُ پُچّ ءُ پْوشاکانی پَھک ءُ ساپی ءِ اُمیت دارگ یک اجب ءُ ھیرانے گپّے اَت۔

منی شلوار ءِ پادگ دِرتگ اَت، سَر ءِ مُود وتی پیم ءَ ٹال ٹال ءَ یلہ اِتاں من بُوژان بانژ اِت آں، دیم ھاک ءُ دنزین اَت، دو روچ اَت کہ من جان نہ شُشتگ اَت، دیم ءَ مردے ءُ جَنے بَزّگ بَزّگ ءَ من ءَ چارَگ ءَ اِتاں، زالکار ءِ مرد ءَ وتی ءَ دست منی نیمگ ءَ ٹال کُرت ءُ وتی کسانیں چُک ءُ جن ءَ را گْوشگ ءَ اَت کہ “اِے بلوچی مردم اَنت، بے چارگاناں اللّہ ءَ ھِچ نہ داتگ، نماز نہ زان اَنت، گپ کنگ نہ زان اَنت، ایشانی تہ ءَ برداشت نیست، نبشتہ کنگ ءُ وانگ نہ زان اَنت، بے کساس جاھل اَنت”۔ مرد ءِ جن ءَ وتی دَپ ءَ را چْوٹ کرت ءُ گْوشت کہ “اللّہ ایشاناں آباد بہ کنت، وش نسِیب اَنت کہ مُسلمانیں اِستانے ءَ نشتگ اَنت”۔ اِے ساھت ءَ کسّے منی سر ءَ کندگ ءُ مسکر ءَ کنگ ءَ اَت، کسّے من ءَ اِکلاکیات ءِ دروَنت دیگ ءَ اَت، کسّے من ءَ تَھزیب سْوج دیگ ءَ اَت۔

کمتری ءِ مارِشت منی اندر ءَ ودّان اَت، من روگ ءَ لْوٹگ ءَ اِت آں، منی پادانی واک در اتکگ اَت، بلے من اِے تیوگیں نِدارگ بے کِمار کرت ءُ دل ءَ چہ درکرت اَنت ءُ کاؤنٹر ءَ را جُست کرت کہ ڈاکٹر ساھب نِشتگ ؟ کاؤنٹر ءِ نشتگیں مرد ءَ یک بلاھیں ٹَھکے جَت ءُ گْوشت کہ “اِد ءَ ھچ وڑیں ھِلاج مِلاج نیست، تو اِد ءَ چہ در ءَ بِہ رو، تیوگیں مردم اَبکّہ ءُ ھیران اَنت کس نہ زانت کہ اِے چْونیں مردم اَنت ءُ چہ کُج ءَ پیداک اَنت مئے مگزانی ورَگ ءَ ” منی اَرس شیپ گران اِت اَنت، من گِریواں گِریواں چہ کْوٹی ءَ ڈَنّ در آیگ اِت آں، اِے ساھتاں ھر یکے من ءَ گنوک ءُ ابدالے پھمگ ءُ بے کِمار کنگ ءَ اَت۔ من وتی چمّانی اَرس پھک کرت اَنت ءُ ڈنّ ءَ در اھت آں، منی چمّانی دراتکگیں ارس منی مات ءَ دیست اَنت، من ءَ مات ءَ گْوشت کہ “ابّا تو پَرچے گریو ئے؟ من وَش بہ اِیں”۔

منی مات ھمے سرپد بوگ ءُ پھمگ ءَ اَت زاناں بلکیں ڈاکٹر پہ ھلاج ءِ واست ءَ گْیش کلدار لْوٹگ ءَ اَنت۔ مات پہ ھِلاج ءَ مکن کنگ ءَ اَت کہ من وت ءَ ھِلاج نہ کن اِیں۔ من وتی مات ءَ را ھما جاہ ءَ نِندار اِینت دیم پہ کینٹین ءَ شُت آں کہ ورگی ئیں آپے کار اِیں وھدے کہ من چہ کینٹین ءَ در اتک آں ءُ چار اِت کہ ڈَنّ ءَ اُلس مُچّ اِنت، رش کش اِنت، یک چیزے مردمانی دیم ءَ کپتگ ءُ ایر اِنت، لس مھلوک ءَ وتی گْوانکو کش اِتگ اَنت ءُ تامُر جْوڑ کنگ ءَ اَنت۔ من ھم وتی گْوانکو چہ کِیسگ ءَ کش اِت مردمانی مُچّی ءِ کِرّ ءَ سَر بوت آں چار آں کہ ھاک پہ سر منی مات زمین ءِ سر ءَ کپتگ، آئی ءِ سر ءَ چہ ھْون پِیزُران اِنت، لس مھلوک آئی ءِ اکس ءَ کَشگ ءَ اِنت۔ آھود ءَ ساڑی ئیں لھتیں ھازگیں جَنک کُوکار کنگ ءُ مات ءَ را گْوشگ ءَ اِتاں کہ “شَھادت بہ وان، شھادت بہ وان کہ تو جَھندم ءِ آس ءَ چہ رکّ ئے”مات بے توار اَت ، آئی ءِ جْون سارت بُوت مات ءِ سر ءِ کِرّ ءَ اوشتاتگیں یک زالبولے ءَ وتی دیم گْوں چپّ ءُ چاگرد ءِ لس مھلوک ءَ کُرت ءُ گَپ ئِے بِنا کرت، “اِے بلوچی مردم اَنت، اِے مدام ھمے پیم اَنت، پریشانی ءِ ھچ گپّے نہ اِنت، اِے تِیوگ ءَ گنوک ءُ ابدال اَنت، بس ایشانی واست ءَ دوا بہ کن اِت کہ اللّہ ایشاناں ھْوش ءُ اگل بہ دنت”چہ کْوٹی ءِ چَت ءَ جُپ جنت، الّم مِر اِیت” زالبول ءَ اِے گپّ گْوں زور ءِ پُرّ ءَ گْوشت ءُ آ جاہ ءَ چِہ رھادگ بوت ءُ شُت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھئور ءُ ھارانی سوب ءَ کساس ھپت لک مردم اسرمند بوتگ انت اے دمگاں مھلوک ھنگت پیشی وڈا زند گوزینگ ءَ نہ انت –

بلوچستان ءِ دمگ ڈیرہ غازی خان ءَ ھپت لک ءَ گیش مردم چہ توپان ءَ اسرمند بوتگ اَنت، ھمے زوتاں بوتگیں ھئور ءُ ھاران بلوچ دمگ درساں گیش اسرمند بوتگ انت کہ آھانی تہ ءَ راجن پور ءُ ڈیرہ غازی خان ھم ھوار اَنت –

ڈی جی خان ءُ راجن پور ءَ یک نیمگے مردم چہ وتی زند ءَ زبھر بوتگ اَنت ءُ دومی نیمگ ءَ وانگ جاہ، شھدربرجاہ ھسپتال ءُ دگہ انفرا اسٹرکچر ھم سرجمی ءَ تباہ بوتگ اَنت –

رپورٹ ءِ رِد ءَ توپانی ھئور ءُ ھاراں چہ ڈی جی خان ءَ ھپت لک ءَ گیش مردم اسرمند بوتگ ءُ سَے سد ءُ چِل ءُدو میتگ آپ ءَ برتگ اَنت وھدیکہ پنجاہ ءُ ھشت کچا ءُ پکائیں گس کپتگ اَنت – ڈیرہ غازی خان ءَ شست ءُ چار مردماں گیش مردم وتی زند ءَ زبھر بوتگ اَنت ءُ ھار ءَ برتگ اَنت، یانزدہ لک ایکڑ ءَ گیش زمین آپ ءَ بُرتگ ءُ ھپت لک ایکڑ ءَ گیش کشتگیں کشار سرجمی ءَ تباہ بوتگ اَنت –

ڈی جی خان ءَ دو ھزار ءُ سَے سد ءُ شست ءُ چار کلومیٹر دگ تباہ بوتگ اَنت ءُ شش پھل ھم آپ برتگ اَنت – توپان ءَ شش سد ءُ پنجاہ ءُ شش سرکاری وانگجاہ چار شھدربرجاہ، چِل ءُ ھپت جانسلامتی مرکز وھدیکہ ھپت وٹرنری نادراھجاہ ھم کپتگ اَنت –

اے دمگاں ھار ءِ آھگ ءَ پد مردم وتی پرشتگیں گس ءُ میتگاں واتر روگ ءَ اَنت ءُ شر کنگے چن ءُ لانچ ھم بوگ ءَ اِنت بلے پدا ھم جانسلامتی ءِ واکدارانی گوشگ اِنت کہ اے دمگاں اگاں زوتاں زوت سرکار ءِ نیمگ ءَ گامگیج زورگ نہ بوت گڈا زمستان ءَ مردم گیش بیران بوت کنت –

شال ءِ زھرشانی نندانک ءِ گند ءُ نند ءَ پد اڈ داتگیں کمیٹی ءِ مروچی اولی دیوان برجم دارگ بوتگ –

اسلام آباد ءَ وفاقی وزیر ءِ کانود ءُ انساپ ءِ سینیٹر آعظم نزیر تارڈ ءِ چیردستی ءَ زورانسری آوار جنگ بوتگیں مردمانی درگت ءَ اڈ داتگیں کابینہ ءِ جھلی کمیٹی ءِ دیوان برجم دارگ بوتگ کہ اودا وفاقی وزیر داخلہ رانا ثناء اللہ، وفاقی وزیر ءِ سائنس ءُ ٹیکنالوجی آغا حسن بلوچ، وفاقی وزیر وزیر تخفیف غربت شازیہ مری، وفاقی وزیر ءِ بحری امور فیصل سبزواری ءُ سنیٹر کامران مرتضی ھم ھوار بوتگ انت –

کمیٹی ءَ زورانسری آوار جنگ بوتگیں مردمانی درگت ءِ دیوان ءَ آئی جی اسلام آباد پولیس، ڈی آئی جی بلوچستان، ڈی آئی جی سندھ ھم لوٹارینتگ انت – وفاقی وزیرانی کمیٹی بیگواھیں مردمانی درگت ءَ گامگیج زورگے سر ءَ دیوان کن انت –

کمیٹی ءَ گوستگیں روچاں شال ءَ بیگواھیں مردمانی گوم ءَ گند ءَ نند ءَ پد مروچی آ ھم دیوان ءَ لوٹارینتگ انت کہ اود ءَ بیگواھیں مردمانی کھولانی نیمگ ءَ پروفیسر منظور بلوچ ءُ بیگواھیں ڈاکٹر دین محمد بلوچ ءِ زھگ ءُ وائس فار بلوچ مسنگ پرسنز ءِ رھشون سمی دین بلوچ ءَ ھم دیوان بھر زرتگ –

زانگ بہ بیت بازیں بیگواھیں مردمانی کھولاں شال ءِ گورنر کارگس ءِ دیم ءَ نندانگ جتگ بوتگ کہ پنجاہ روچاں نندانک ءُ زھرشانیاں پد گوستگیں ماہ ءَ وفاقی وزیرانی یک کمیٹی ءَ بیگواھیں مردمانی کھولاں گوں گند ءُ نند کتگ ءُ زھرشانی ھلاس کنائینتگ –

کھولانی رِد ءَ وفاقی وزیرانی کمیٹی ءَ کول کتگ کہ آھانی لوٹانی سر ءَ گامگیج زورگ بیت اِنت کہ پدا بیگواھیں مردمانی کھولاں وتی زھرشانی ھلاس کتگ، کہ ھمے میان ءَ وزیر کانود ءَ شال ءِ نندانک ءِ درنگاز کنوکانی منت گپتگ کہ آھاں زھرشانی ھلاس کتگ ءُ کمیٹی ءِ سر ءَ اوست داشتگ –

سمی دین ءِ رِد ءَ وفاقی سرکار ءِ کمیٹی ءِ گوم ءَ مارا بازیں امیت ءِ ھست کہ ھمے سوب ءَ نندانک ءَ نشتگیں بیگواھیں مردمانی کھولاں شال ءِ نندانک ھلاس کتگ، دیوان ءِ برجم کنوک وزیر کانود ءَ گوشتگ کہ بیگواھیں مردمانی کھول ھاسکر ھمے واست ءَ لوٹارینتگ انت کہ زانگ بہ بیت کیس کجام ھساب انت –

ھمے وھد ءَ چہ اسلام آباد ءَ بیگواہ کنگ بوتگیں اھوالکار مدثر مھمود نارو ءِ مات ءُ پت ھم دیوان ءَ ھوار بوتگ انت ءُ آھاں وتی زھگ ءِ بیگواھی ءِ سرجمیں ھال کمیٹی ءِ دیم ءَ داتگ انت –

دیوان ءَ پد وفاقی وزیر ءِ کانود ءُ انساپ ءِ سنیٹر اعظم نزیر تارڑ ءِ گوشگ ات کہ مئے ھمے جھد انت کہ دیمتر ءَ زورانسری آوار جنیانی تہ ءَ کمی بہ ایت چریشی ءَ بہ رک ایں ءُ ھما بیگواھیں مردم دست کپ انت آھاں تاں سر بوت بہ کن ایں –

سنیٹر اعظم نزیر تارڑ ءِ گوشگ ات کہ مئے ھمے جھد انت کہ دیمتر ءَ زورانسری آوار جنی ءِ درچ گر ءُدار کنگ بہ بیت مارا بیگواھیں مردمانی کھول گم دردانی مارشت ھست انت ما گوں نیک نیتی ءَ اے جیڑہ ءَ سر ءَ دیما روگ لوٹ ایں –

بولان ءَ دو پوجی کارندھانی کوش ءِ زمہ واری ءَ منّیں – جیئند بلوچ

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشانی ءَ گوشتگ کہ سرمچاراں بولان ءِ دمگ مارگٹ ءِ ھند کیرکینڑ ءَ یک آئی ای ڈی اُرشے ءَ زورگریں پوج ءِ دو کارندہ کشتگ اَنت-

جارکش ءَ گوشتگ کہ دشمنیں پوج ءِ بمب ڈسپوزل اسکواڈ ءِ کارندہ ھما وھد ءَ نشانگ کتگ اَنت آ اے دمگ ءَ زورگریں پوج ءِ پکٹ سیکورٹی ءِ واستا یک سنگرے ءِ ٹپاسگ ءَ بیتگ اَنت – اشی ءَ پیسر آ تراکناکیں شوروانی نشانگ کتگ اَنت-

بلوچ لبریشن آرمی اے اُرش ءِ زمہ واری ءَ من ایت ءُ سرجمیں بلوچستان ءِ آجوئی ءَ داں مئے اُرش برجاہ بنت-