TBP Balochi

ھاش ءَ گاڑی ءِ سر ءَ تیرگواری بیتگ چریشی ءَ یک شش سالی ئیں جنکوے بیران بیتگ-

گیشیں ھالانی رد ءَ روکپتی بلوچستان ءِ دمگ ھاش ءَ ناشناسیں مردمانی تیرگواری ءَ یک کودکے بیران بیتگ-

بیران بیتگیں جنکو ءِ پجار سمیہ ریگی ء یونس جھمنند اللہ آباد ھاش ءِ نام ءَ زانگ بیتگ-

ھالانی تہ ءَ گوشگ بیتگ جنکو گوں وتی کھول ءِ ھمراھی ءَ ھاش ءِ شھر ءَ روگ ءَ بیتگ کہ سربستگیں سلاہ بنداں گاڑی ءِ سر ءَ تیرگواری کرتگ ءُ چریشی ءَ زھگ بیران بیتگ-

ھالانی تہ ءَ گوشگ بیتگ تیرگواری کنوکانی تیر زھگ ءِ سینگ ءَ لگ اتگ ءُ چریشی ءَ زھگ ھما جاہ ءَ بیران بیتگ-

لس مردمانی گوشگ اِنت اے دز بیتگ اَنت ایرانی اطلاعات ءِ نیمگ ءَ لس مردماں سلاہ دیگ بیتگ ءُ چریشی ءَ چہ اے سلاھاں لس مھلوک ءُ دزی ءِ سر ءَ کارمرد کنگ ءَ اَنت-

ایرانی بنجاھی شھر تھران ءَ ایرانی پولیس ءِ دست ءَ دزگیر بیتگیں مھسا امینی ءِ دزگیر کنگ بیتگ ءُ دو روچاں پولیس ءِ بندیگی ءَ پد آ ناگیگیں جاوراں نادراہ جاہ ءَ برگ بیتگ-

مھسا امینی ایرانی کردستان ءِ دمگ سکتیز جھمنند بیتگ ءُ آ تر ءُ تاب ءَ تھران ءَ اتکگ بیتگ ءُ پولیس ءَ دزگیر کتگ –

دمگی مردماں بھتام جتگ کہ مھسا امینی پولیس ءَ بے کساس جتگ ءُ چریشی ءِ سبب ءَ آ بیران بیتگ-

مھسا امینی ءِ ناگتی کوش ءِ ھلاپ ءَ مروچی تھران ءَ زھرشانی بیتگ ءُ اود ءَ زھرشانی کنوکانی شنگ ءُ شانگ کنگ ءَ زھرشانی کنوکانی سر ءَ تیرگواری ھم کرتگ –

زھرشانی کنوکانی سر ءَ پولیس ءِ تیرگواری ءَ چہ زالبول ءُ یک مردینے زدگ بیتگ اَنت –

ھمے وڑ ءَ مھسا امینی ءِ ناگتی کوش ءِ ھلاپ ءَ ایمنسٹی انٹرنیشنل ءَ ھم پدردی درشان کتگ-

ایمسنٹی انٹرنیشنل ءَ گوشتگ کہ مھسا امینی ءِ کوش ءِ پژدر ءَ دلجمیں پٹ ءُ پول کنگ بہ بیت –

آئی ءَ گوشتگ کہ مھسا یک بیست ءُ دو سالی جنکے بیتگ ءُ پولیس ءَ انسانی اگبال لگتمال کتگ ءُ مھسا بے کساس لٹ ءُ کٹ کتگ ءُ چریشی ءِ سر ءَ آ بیران بیتگ –

ایمنسٹی انٹرنیشنل ءَ مھسا امینی ءِ کھول ءِ گون ءَ پدردی ھم درشان کتگ –

بلوچستان ءِ ھک دو زرمبشت ءِ سروک مولانا ھدایت الرحمان بلوچ ءَ گوشتگ کہ بلوچستان ءَ گوستگیں ھور ءُ توپاناں دھکانکارانی کشار ءُ باگ توپان ءَ وتی ارجان جتگ اَنت، ھزارانی کچ ءَ مھلوک توپان ءَ چہ اسرمند بیگ ءَ چہ توپانی ھاراں بلوچستان ءِ دو سد پُھل پروشتگ اَنت بلوچستان ءَ ایریگشن ءِ جوڑ کرتگیں ڈیماں ھم باز تاوان رس اتگ-

آئی ءِ گوشگ ات کہ من بلوچستان ءِ بازیں جاھاں تر ءُ تاب کرتگ صحبت پور ءُ ڈیرہ اللہ یار شکارپور ءِ بازیں جاھاں توپان ءَ اسرمند بیتگیں مردم مروچی ھم دگانی سر ءَ نشتگ اَنت-

آئی ءَ گوشتگ اے کہ توپان ءِ اسرمندیں مردم داں انگت ءَ بے کسی ءَ نیشتگ اَنت ھچ ھالپرسان نیست اَنت مئے ھاکم پرچا اے مشکلیں وھد ءَ بیگواہ اَنت بژن اِنت-

آئی ءَ گوشتگ کہ سرکار ءَ مئے گور ءَ نا پیسر ءَ شرین ھسپتال نا اسکول ءِ داتگ مئے مردم کراچی ءِ ھسپتالاں دگانی سر ءَ چمبندنی ءَ سپر کنان ءَ جاندراھی ءَ رو اَنت –

آئی ءَ گوشتگ من گوست ءَ لسبیلہ ءِ تر ءُ تاب ءَ گوشتگ ات اد ءِ نامینتگین نمائندگ جام کمال خان ءُ اسلم بھوتانی ءَ چہ دزبندی کتگ وتی اسرمندیں مردمانی واستا ساھگے جوڑ کن بلے داں انگت ءَ ھچ نہ بیتگ مھلوک ءَ راشن ءُ ٹینٹانی درکاری اِنت – مئے سرکار لوٹ ایر ڈنی ڈیھ کہ اسرمندیں مردمانی کمک ءَ پوڑی دیگ ءَ اَنت آ اسرمندیں مردماں دیگ بہ بنت نیزگاریں مردماں لوگ جوڑ کن ات بہ دے ات دانکہ راج وتی پادانی سر ءَ اوشتات بہ کنت-

شال ءِ شھر ءَ کُچگی دمگاں یک رندے پد ءَ گیس ءِ نہ بوگ ءِ ھلاپ ءَ شھریاں سریاب سونا خان چوک ءَ زھرشانی کتگ ءُ شال ءُ کراچی ءَ روکیں مزن شھدگ بند کتگ-

چریشی ءِ سبب ءَ مساپراں بازیں جنجالانی دیمپانی کنگ کپگ اِنت – گوشگ بیگ اِنت دمگ ءَ بازیں وھداں گیس نیست اِنت چریشی ءَ شھریاں گیس ءِ بندش ءِ سبب ءَ زھرشانی کتگ-

زھرشانی کنوکانی رد ءَ سونا خان تھانہ ءِ بازیں میتگاں بازیں روچاں چہ گیس نیست اِنت ءُ بازیں وھداں گوشگ ءَ ابید ھم گیس پچ کنگ نہ بیتگ ءُ چریشی ءِ سبب ءَ مھلوک ءَ بازیں مشکلانی دیمپانی اِنت-

آیاں چہ سرکار ءَ لوٹ کرتگ ءُ گیس ءِ پچ ءَ سرجمی ءَ گامگیج بہ زور اَنت-

زانگ بہ بیت بلوچستان ءَ اگست ءِ ماہ ءَ بیوکیں بشی ھوراں پد شال ءَ ھوار دگہ دمگاں سَے ھپتگاں گیس بند بیتگ ات چریشی ءِ سبب ءَ شھریاں بازیں جیڑھانی دیمپانی کنگ کپتگ ات-

نبشتانک: لَبز ءِ سما

نبشتہ کار: شاھد اھمد

دی بلوچستان پوسٹ

چہ شومّک ءَ گنتریں چیز لَبز اَنت ھما لَبز کہ مارا پَھزیگی اَنت بلے مارا سُد ئِے نیست ھمے لبزاں باریں چِنکیاس راست کُشتگ ءُ گار کُتگ اَنت باید وَ ھمے بہ بیت کہ مارا زبان وَ ھست اِنت گڑا بَلد بوگ ءَ ھچ چَک ءُ پد مہ بَہ ایں چارگ کرز اِیت! ھر یک راجے ءَ زبان ھست بلے آ راجاں چون وتی زبان پَھریز اِتگ اَنت؟ زبان ءِ دوستی ءَ ھما وھد ءَ بہ کن کہ آ وھد ءَ تئی زبان ءِ ھر یک لَبزے ءِ گِیشینگ ءَ در ببر اِت بلے اے وھد ءَ ترا وتی مارشت گوں وتی زبان ءِ گیشینگ ءَ تاھیر بدی اَنت-

زبان ءَ زانت ءِ وازمَنْدگ الّم بوگ لوٹ اِیت چیاکہ بید ء زانت ءَ زبان براھدار نہ بیت زبان زانت ءَ پہ وتی راج ءِ ٹوھینگ ءَ شِینگ ءُ تالان کنت زانت ءِ کجام پِڑ بہ بیت بلے ھمے زبان ایشاں براھدار ءُ ڈولدار کنت۔

تو کہ بلوچے ئے یا دِرت ءَ پُچّے ئے ءُ ھر چیزے بہ بَئے بلے من ءَ تو وَ دوست بَہ ئے۔ ھمے بلوچ پوسّگ مئے وتی جند ءِ چُکّ اَنت باید اِنت ما وتی آؤکیں باندات ءِ چراگاں روک بوگ ءَ سکین بدی اِیں ءُ چیاکہ بلوچ بلوچی زبان ءَ دربر اِیت ءُ اگاں دری راجے مئے زبان ءَ دربارت گڑا آ مئے زبان ءِ دربرگ ءَ پائدگ ءُ نپ چست کنت بلے وھدے کہ یک بلوچے وتی جندے زبان ءَ کہ دربر اِیت گڑا آ گیشتر پَھم اِت کُت کنت ءُ چہ ایشی ءَ آئی ءِ مھر پہ وتی زبان ءَ گیشتر بوان کنت چی ءَ کہ آ بلوچے ءُ بلوچ ھچبر وتی راجی زبان ءَ شموشت نہ کنت۔

بلوچی وت یک زگریں زبانے ءُ بلوچ راج ایشی ءِ واھُند اِنت بلے بے سمائی ءَ بلوچ وتی جند ءِ سوڑگ ءَ کُت نہ کنت ایشی ءِ بازیں سَوَب بوت کن اَنت: یکے ایش اِنت کہ بلوچ ءَ چہ آسراتیاں زَبر کنگ بوتگ ءُ ایشی ءِ مستریں سبب لَبّ ءُ لالچ اِنت ءُ دومی مستریں سبب بلوچ گلامیں راجے ءِ بستار ءَ زانگ بیت ایشی ءِ وت واجھی چہ دستاں پَچ گرگ بوتگ چمیشکا وتی راجی زبان ءَ پَھریز کُت نہ کنت۔

بید ء زبان ءَ راج زندگ نہ بیت اگاں شما لوٹ اِت کہ ما زندگ بہ بہ ایں گڑا وتی راجی زبان ءَ بہ وان اِت، نبشتہ بہ کن اِت ءُ گپ بہ کن اِت گڑا شما شالا وتی آجوئی ءِ باندات گِند اِت بلوچ راج ءُ بلوچی زبان تپاکی زندگیں راج ءِ نشان اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءَ دگہ پنچ مردم بیران بوتگ انت ، ھئور ءُ ھاراں بیران بوتگیں مردمانی کچ نوکیں کساساں ھوار سرجمی ءَ دو سد ءُ نود ءُ نُھ مردم بیران بوتگ انت –

پی ڈی ایم اے ءِ بنشون نیمگ ءَ شنگ بوتگیں رپورٹ ءِ رِد ءَ بلوچستان ءِ تہ ءَ ھار آماچیں دمگاں دیوالانی کپگ ءِ سوب ءَ چہ جعفرآباد ءَ دو، چمن ءَ یکے ءُ سوراب ءَ دو مردم وتی زند ءَ زبھر بوتگ انت کہ چریشاں پد سینزدہ جون بگر تاں مروچی سرجمیں بلوچستان ءَ بیران بوتگیں مردمانی کچ سرجمی ءَ دو سد ءُ نود ءُ نُھ ءَ سربوتگ انت – ھئور ءُ ھاراں بیران بوتگیں مردمانی تہ ءَ یک سد ءُ سِی ءُ شش مردین، نود زھگ ءُ ھپتاد ءُ سَے زالبول ھوار انت –

بلوچستان سرکار ءِ نیمگ ءَ شنگ بوتگیں رپورٹ رِد ءَ ھئور ءُ ھاراں بلوچستان ءِ تہ ءَ سینزدہ ءَ لک ءَ گیش مردم بے گس بوتگ انت – یک لک ءُ ھشتاد ءُ پنچ ھزار ءَ گیش گس کپتگ انت یا آھاں سک باز تاوان بوتگ – بلوچستان ءَ بوتگیں بشی ھئور ءُ ھاراں تنی وھدی مردم پیشی وڈا زند گوازینگ ءَ نہ انت –

زانگ بہ بیت ترندیں ھئور ءُ ھاراں بلوچستان ءَ ایمرجنسی ءِ جاور جوڈ بوتگ کہ اودے جھمنندیں مردماں بازیں جانی ءُ مالی تاوان ءِ دیمپانی کنگ کپتگ ءُ ھار آماچیں مھلوک بازیں نادراھیانی آماچ بوتگ انت –

ھار آماچیں دمگاں سر بوتگیں کار کنوکیں پیرامیڈکس ءِ گوشگ انت کہ ھر ھما جاہ ءَ ھار ءِ آپ اوشتوک انت اودا وڈ وڈیں نادراھی پیدا بوگ ءَ انت – ھار آماچیں مردم گیسٹرو، ملیریا، لاپ درد ءُ دل ءُ لاپ نادراھی ءِ آماچ بوان انت –

بلوچستان ءَ ھئور ءُ ھاراں ھزارانی کچ ءَ وانگ جاہ ھم سانمند بوتگ انت گوستگیں روچ ءَ زانت ءِ بنشون ءِ نیمگ ءَ شنگ بوتگیں رپورٹ ءِ تہ ءَ گوشگ بوتگ کہ بلوچستان ءَ دوھزار ءُ ھشت سد ءُ پنجاہ ءُ نُھ وانگ جاہ سانمند بوتگ انت ھار آماچیں اے وانگجاھاں سَے لک ءُ ھشت ءُ شش ھزار ءُ ھپسد ءُ ھشت نودربر وانگ ءَ بوتگ انت –

بلوچستان ءَ ترندیں ھئور ءُ ھاراں سِی ءُ پنچ دمگ سانمند بوتگ انت کہ اودا تنی وھدی مردم پیشی وڈا زند گوازینگ ءَ نہ انت –

کمکی کاراں دلگوشیں در سرکاری ادارھانی رِد ءَ اے دمگاں راہ ءُ درانی پُرشت پروش ءِ سوب ءَ کمکی کارانی تہ ءَ ھم بازیں دلسیاھی بوگ ءَ انت بلے ھار آماچیں دمگاں جانی ءُ مالی تاوان کہ بوتگ آ سرکاری کچ ءُ کساس ءَ چہ سک باز گیشتر انت –

بلوچستان لبریشن فرنٹ ءَ کیچ ءِ ھند مند ءَ سئے ایس ایس جی کمانڈو ءِ کوش ءُ یکّے ءِ ٹپّی کنگ ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ نُھ تُومشان (9 ستمبر) آدینگ ءِ روچ ءَ ادار ھپت ءَ کیچ ءِ ھند مند، مزن بند ءِ کوھی دمگ گریبیں کَور ءُ آئی کش ءُ گْوراں چہ پاکستانی پوج ءِ نیمگ ءَ مئے سرمچارانی جاھاں پہ لشکرکشّی ءِ مول ءَ اے دمگ ءِ جتا جتائیں نیمگ ایس ایس جی کمانڈواں انگراں کُتگ۔ مئے سرمچاراں ھما ساھت ءَ جْوانیں دیمپانی ءِ جنگی پیشبندی کار گِپتگ اَنت ءُ آئی سر ءَ اُرش کُرتگ۔

جارکشّ ءَ وتی درشان ءِ دیمتِر ءَ گْوشتگ کہ اُرش ءِ آسر ءَ پاکستانی پوج ءِ سئے ایس ایس جی کمانڈو مُرتگ ءُ یکّے ٹپّی بوتگ۔ مئے سرمچاراں پاکستانی پوج پد کِنِزینتگ ءُ وت پہ دْرواہ ءُ سلامتی درکپگ ءَ سوبین بوتگ اَنت۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّی ءَ گْوشتگ داں زُورگِپتیں بلوچستان ءِ آجوئی ءَ مئے اے اُرش دُژمِنیں پوج ءِ سر ءَ گوں تْرندی ءَ برجاہ بَہ اَنت-