TBP Balochi

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ ھپسد ءُ شست ءُ پنچ روچ سرجم بوتگ انت، مروچی دلپدردی درشان کنگ ءَ چہ کوہ ءِ سلیمان ءَ نودربرانی ٹولی ءِ اتکگ کہ آھانی تہ لطیف بلوچ، صدام بلوچ، اسفند جان بلوچ ءُ سلیم بلوچ ھم ھوار بوتگ انت –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ بلوچ ءِ پُرایمنیں جھد وتی دوستگیں مردمانی یل کنائینگے ھاتر ءَ مھکمی ءَ گوں برجاہ انت ، پاکستانی ریاست وتی پروش ورگ ءَ چہ ترس آماچ انت کہ بے کساس زلم زوراکی کنگ ءَ انت پنجاہ ھزار ءَ گیش بلوچ آوار جتگ انت ءُ وتی زنداناں بندیگ کتگ انت ءُ آھانی سر ءَ زوراکی کنگ ءَ انت – بیست ھزار ءَ گیش بلوچ راجداریں باسک، زانتکار، نودربر، ڈاکٹر ءُ وکیل زورانسری آوار جتگ ءُ پدا آھانی ژانگولیں جون چگل داتگ انت ، پوجی لشکر کشیانی سوب ءَ لکانی کچ ءَ بلوچاں وتی جاہ ءُ دوار یل داتگ ءُ در پہ دری زند گوازینگ ءَ لاچار کنگ بوتگ انت ءُ لشکر کشی ءِ تہ ءَ گیشی آرتگ –

آئی ءَ گوشتگ یکشلیں زلم زوراکیاں ابید ھم پاکستان ءِ وتگڑیں انسانی ھکانی گل، سول سوسائیٹیز، رسانکدر ءُ وتگڑیں آمیدگسانی گوشاں مور ءِ ھم نہ وارت ، بلے بلوچ پرزندانی پاکیں ھوناں میان استمان لاچار کتگ کہ آ بلوچانی توار ءَ اش بہ کن انت ھمے ھاتر ءَ میان استمان ءَ اے وتگڑیں جمھوری ریاست ءِ سرا ءَ ترندیں گامگیج زورگے نوٹس دیم داتگ – بلوچ پرزندانی دیمھونیاں سوب ءَ بلوچ پرزندانی یل بوگے وش شادمانی روچ زوت در کیت اِنت –

ماما قدیر بلوچ ءَ دیمتر ءَ گوشتگ کہ ما چہ اقوام متحدہ ءُ میان استمانی گلاں گوں لوٹ کن ایں کہ بلوچستان ءِ تہ ءَ پاکستانی زلم زوراکی ، ناشرکاری، انسانی ھکانی لگتمالی گر ءُ دار ءَ گامگیج بہ زوریت ءُ بلوچانی زورانسری آوار جنی، مھلوک ءِ سر ءَ بمبگوری، آوارجنی ءَ پد ژانگولیں جونانی چگل دیگے گر ءُ دار ءَ پاکستان سر ءَ زور دیگ بہ بیت، پاکستان ءِ کمک دارگ بہ بیت پرچاکہ پاکستان سرجمیں دنیا ءَ تریت ءُ پنڈیت ءُ ھرچ پنڈگے کہ رسیت آئی وتی شد ءِ ھلاس کنگے ھاتر ءَ بلوچستان ءِ بزگریں مھلوک سر ءَ بمبگواری کنت –

بلوچستان ءِ ضلع کیچ ءَ گوستگیں شپ ءَ ناشناسیں مردماں پاکستانی پوج ءِ چوکی نشانگ کتگ-

سربوتگیں ھالانی رِد ءَ گوستگیں شپ ءَ تربت ءِ دمگ ڈی بلوچ ءَ پُھل نزیک ءَ برجاھیں پاکستانی پوج چوکی ناشناسیں مردماں گوں دزبمب ءَ نشانگ کتگ ءُ تتکگ اَنت-

سرکاری واکداراں انگت اے درگت ءَ درشان شنگ نہ کتگ-

زانگ بہ بیت اے دمگ ءَ آجوئی لوٹوکیں سلاہ بندیں گل ھست اَنت بلے اُرش زمہ واری انگت ھچ گل ءَ نہ زرتگ-

آئینی رد ءَ ھرکس ءَ سیاست ءِ ھک نیست اِنت آ ڈیھ ءِ تہ ءَ سیاست کنگ اِنت، مروچی ھم آئین ءِ تہ ءَ نشتگ ءُ وتی ھکانی واستا گپ کنگ ءِ اجازت نیست اِنت، سیاسی لوٹ پرستی ءِ سبب ءَ جمھوریت نیزرو بیگ ءَ اِنت – سردار عطاء اللہ مینگل ءِ یات ءَ برجم داشتگیں نیاد ءَ تران کنوکانی تران

نیاد ءَ تران کنوکاں تران کنان ءَ گوشتگ رھبند آئین ءُ ھکانی واستا جنگ ءَ کماشیں سیاستدان سردار عطاء اللہ مینگل ءِ جاہ کار نیست اِنت ڈیھ ءَ عطاء اللہ مینگل ءِ وڑیں دانائیں سیاستدانانی درکاری اِنت، آئینی رنگ ءَ ھما کس ءَ سیاست کنگ ءِ ھک نیست اِنت آ ڈیھ ءِ تہ ءَ سیاست کنگ ءَ اَنت – مروچی ھم آئینی پتر ءَ نیشتگ ءُ وتی ھکانی واستا گپ کنگ ءِ ھک نیست اِنت سیاسی وتپرستی ءِ سبب ءَ جمھوریت نیزور بیگ ءَ اِنت – اے منگ لوٹ ایت نی ڈیھ مزن دستانی دست ءَ اِنت یا بس لھتے تکانی سر ءَ آئین ءِ مزن دستی ءِ جیڑہ ھلاس نہ بنت چارٹر آف ڈیموکریسی ءُ چارٹر آد اکانومی ءَ پیسر سیاست ءَ ھواری ءِ دزمانجنی چارٹر ءِ سر ءَ تپاک بیگی اِنت سی پیک ءِ منوک امریکہ ءِ دشمن ءُ بگیر داریں امریکہ ءِ دوستداری بیگ ءَ اِنت – بلوچستان ءَ دیمروئی ءِ ٹاہ دیگ بیتگ اَنت بلوچستان ءِ مڈی دمگی مردمانی واستا ھک دیگ نہ بیتگ –

اے گپانی درشانی بلوچستان نیشنل پاٹی ءِ سروک سردار اختر مینگل، پی ڈی ایم ءِ سروک ءُ جے یو آئی ءِ رھشون مولانا فضل الرھمان، مسلم لیگ (ن) ءِ سیکرٹری جنرل وفاقی وزیر احسن اقبال، پختونخواہ ملی عوامی پاٹی ءِ سروک محمود خان اچکزئی، سندھ یونائیٹڈ پاٹی ءِ سروک جلال محمود شاہ، پیپلز پاٹی سندھ ءِ سروک سینیٹر نثار کھوڑو، سپریم کورٹ بار ءِ گوستگیں سروک یاسین آزاد، علی احمد کرد، کلانی اھوالکار مظھر عباس، بلوچ کواس مھمد علی ٹالپور ءُ دگہ مردماں دمگی ھوٹل ءَ سردار عطا ء اللہ مینگل ءِ سالگشت ءَ برجم داشتگیں نیاد ءَ تران کرتگ اَنت-

جتا جتائیں سیاسی پاٹی، رجدوست رھشون، وکیلانی سول سوسائٹی ءِ رھشوناں پرسی سالگشت ءَ بھر زرتگ ءُ کماشیں سیاستدان ءِ ستاشانی کرتگ-

سروکی تران کنان ءَ بلوچستان نیشنل پاٹی ءِ سروک سردار اختر مینگل ءَ گوشتگ چارٹر آف ڈیموکریسی ءُ چارٹر آف اکانومی ھما کچ ءَ بے مانا دار اِنت دانکہ سیاست ءَ ھوار بیوک چارٹر ءِ سر ءَ تپاک نہ کن اَنت یک تکے ءِ گلام اِنت ءُ آئین ءَ نیشتگ ءُ وتی ھکانی واستا گپ جت نہ کن ایں ڈیھ ءِ دیم ءَ بروکیں دراھیں ادارھاں وتی کچ ءَ نندگ ءُ کار کنگی اِنت ما زیردست اِنت ءُ نیزگاری ھم ھست اَنت دانکہ من ءَ اے باوری کنگ نہ بیت کہ من واکدار نھاں منی زیردستی ھلاس نہ بیت اِنت –

آئی ءَ گوشتگ کہ اے گوشگ بیت اِنت بلوچستان ءَ مھلوک جنگ کنگ ءَ اِنت بلے اے جست نہ کن اَنت پرچا جنگ کنگ ءَ اَنت کسان لاپ اے جست ءَ کن اَنت پرچا جنگ ءَ اَنت ھا سپریم کورٹ کدی بلوچستان ءِ جاورھالانی سر ءَ شریں گامگیج زرتگ – بلوچستان ءَ چہ انگریزاں جوڑ بیتگیں ریل ءِ نزام دیم ءَ برگ نہ بیتگ مئے دیمروئی ءِ راز ھمیش اِنت –

پی ڈی ایم ءِ سروک مولانا فضل الرحمان ءَ گوشتگ مروچی ڈیھ ءَ درستاں مستریں سیاسی ھاکماں وتی دست یک کنگ ءِ زلوری اِنت سیاسدانانی وتپرستی ءَ جمھوریت روچ پہ روچ نیزور بیگ ءَ اِنت آئی ءَ گوشتگ ھما کہ سی پیک ءِ منوک اَنت آ امریکہ ءِ دشمن ءُ بگیر دار آیانی دوست اَنت ما انڈیا ءِ گون ءَ کار ءُ باری تکاں جوڑ بہ کن ایں ڈیھ لوٹ دیم ءَ بنت ایران ءُ پاکستان ءِ میان ءَ جوانتریں گپ بیت اِنت بلے اجازت نیست اِنت ڈنی پالیسی ڈیھ ءِ لوٹانی تہ ءَ بہ بنت-

مسلم لیگ ن ءِ سیکرٹری جنرل وفاقی وزیر احسن اقبال ءَ گوشتگ کہ سردار عطاء اللہ مینگل سیاسی وزڈم ءِ زر اِنت، آئی ءَ ساپ ءُ پلگار ءُ زانتی تکاں سیاست کتگ، اے ڈیھ کہ ھماھی ءِ ڈی این اے بیلٹ بیتگ آ بیلٹ ءِ راہ ءَ دیر کنگ بیتگ، پاکستان ءِ بیلٹ ءُ ووٹ ءِ تھریک ءَ ایوب خان راہ ءَ چہ دور کتگ اے منگ لوٹ ایر نی ڈیھ مزن دستانی آئین ءَ شتگ یا لس مردمانی، آئین ءِ مزندستی ءِ جیڑہ ءَ سرجم بیگ ءَ جیڑہ ھلاس نہ بنت-

آئی ءَ گوشتگ کہ بلوچستان ءَ بیگواھیں مردمانی جیڑہ ءَ ریاست چیلنج کتگ، بنجاھی سرکار ءَ اے جیڑہ ءِ بنکی گیشنگ لوٹ ایت-

پختونخواہ ملی عوامی پاٹی ءِ سروک محمود خان اچکزئی ءَ گوشتگ کہ سردار عطاء اللہ مینگل ءِ سسائیں جد ءُ جھد مئے واستا یک مھکمیں دیوالے ما پاکستان ءِ گون ءُ اِنت ءُ بہ ایں – مارا انساپ لوٹ ایت پنڈگ ناں آئین ءِ پتر ءَ چست کنوک وتی سرپاں بہ بنت ءُ کار بہ کن اَنت انیگیں جاورھالانی سر ءَ سینٹ ءِ برجم کنگ زلوری اِنت-

سندھ یونائیٹڈ پاٹی ءِ سروج جلال مھمود شاہ ءَ گوشت کہ سردار عطاء اللہ مینگل ءِ سروکی ءَ راجدوستیں پاٹی ھمسنت بیتگ اَنت سیمی پدریچ ءَ داں آئی ءِ سیادی برجم بیتگ مروچی پاکستان ءَ فڈریشن جوڑ نہ بیتگ اگاں ھمے جاور ھال بیت اَنت گڑا دیم ءَ ھم یک راجے جوڑ نہ بیت اِنت-

پیپلز سندھ ءِ سروک سینیٹر نثار کھوڑو ءَ گوشتگ سردار عطا ء اللہ مینگل جمھوریت ھیرو بیتگ ون یونٹ ءِ ھلاپ ءَ جد ءُ جھد ءَ سردار عطاء اللہ مینگل ءَ مزنیں کرد پیلو کرتگ اَنت –

آئی ءَ گوشتگ کہ ھر تک ءَ ڈیھی دیمروئی ءِ واستا یکین راہ آئین ءِ منگ اِنت مھلوک ءُ مھلوک ءِ نمائندگاں نیزور کنگ ءُ بدنامی ءِ جنگ ھلگ ءَ اِنت ھمک وھد ءَ آئین ردی ءِ سپتاں کنگ بیتگ پی سی او شنگ کنگ بیت اِنت، پاکستان کسی پیروکی ملکے نہ اِنت راج پھازگ لوٹ ایت چارٹر آف اکانومی ءِ وھد ءِ درکار اِنت-

سپریم کورٹ بار ءِ گوستگیں سروک یاسین آزاد ءَ گوشتگ کہ سردسر عطاء اللہ مینگل ءَ ھما رنگ ءَ دستور آئین ءُ ھکانی واستا جنگ کتگ آئی ءِ جاہ ءَ کس بیت نہ کنت بلوچانی سر ءَ گداری ءِ بھتام گل ءُ بے بن اِنت، آئینی رنگ ءَ ھما تاکت ءَ ڈیھ ءِ تہ ءَ سیاست کنگ ءِ ھک نیست اِنت ھما سیاست کنگ ءَ اَنت اشاں چہ رکگ ءَ دراھیں سیاسی پاٹیاں یک جاہ ءُ یکیں بنگپ ءَ آیگی اِنت-

کلانیں نائب سروج نیشنل پاٹی ءِ سینیٹر کبیر مھمد ءَ گوشتگ کہ عطاء اللہ مینگل بلوچستان ءِ یک مھکمیں توارے بیتگ، گوادر ءِ سر ءَ ڈیموگراف ءِ بدل کنگ ءِ دست چست اَنت بلوچستان ءِ سیاسی نزام مروچی ھم لپاشگ بیگ اِنت شپ ءِ شپ پاٹی جوڑ بنت ءُ بلوچستان ءِ مڈیانی ھک دیگ بیت اِنت-

نامی ئیں سیاستدان علی اھمد کرد ءَ گوشتگ منی ڈیھ ءِ سی ءُ پنچ سال ءَ زوراکی بیتگ درست یکجاہ بہ بنت پجار بہ کن اَنت زالم کے اِنت نی وھد گوستگ بہ ترسین اَنت کے انت کجام مردن اَنت کہ اے ڈیھ ءَ زلم کنگ ءَ اَنت-

کلانیں اھوالکار مظھر عباس ءَ گوشتگ زیردستیں مھلوک ءِ واستا عطاء اللہ مینگل ءَ جان ءِ دیمونی داتگ ھما ورنایاں مروچی باگی گوشگ ءَ اَنت آ باگی نہ اَنت یازہ ھمسنتیں پاٹی ءِ بیگ ءَ ابید ھم مروچی زانگول کرتگیں جون دزکپگ ءَ اَنت طالبان ءَ گوں گپ بیت اِنت اے مردماں گوں پرچا نہ بیت اِنت اشانی واستا پھلی ءِ جار جنگ بہ بیت اِنت –

بلوچستان لبریشن فرنٹ ءَ کیچ ءِ ھند تُمپ ءَ پاکستانی لشکر ءِ پانگِس ءِ سر ءَ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ ھژدہ تُومشان (18 ستمبر) یکشمبے ءِ بیگاہ ءَ ادار پنچ ءَ کیچ ءِ ھند تُمپ اپسی کھن، دُزراہ ءُ ماتبند ءِ کوھاں مئے سرمچاراں پاکستانی لشکر ءِ پانگِس ءَ یک لشکری کارمندے گوں اسنائپر (رائفل) تُوپکّ ءَ نِشانگ کُرتگ ءُ کُشتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ داں زیردستیں بلوچستان ءِ آجوئی ءَ مئے اے اُرش دُژمِنیں لشکر ءِ سر ءَ گوں تْرندی ءَ برجاہ مان اَنت۔

بلوچستان ءِ دمگ سوراب ءَ ناشناسیں سلاہ بندین مردماں ڈی ایس پی ءُ ایس ایچ او ءِ گاڑی ءِ سر ءَ تیرگواری، تیرگواری ءَ ھردوکیں آفیسر رک اتگ اَنت-

تیرگواری ءِ وئیل مزن شھدگ ءَ بنجاھی چاراہ ءَ پیش اتکگ، دمگی مردمانی رد ءَ ناشناساں پولیس دیستگ ءُ آیانی سر ءَ تیرگواری بنا کرتگ ءُ پشت اشتگ ءُ شتگ اَنت-

وئیل ءِ درگت ءَ دگہ سرپدی نہ بیتگ اَنت پولیس ءَ دمگ انگیر ءَ کرتگ ءُ اُرشکارانی شوھاز بندات کرتگ-

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھپسد ءُ شست ءُ چار روچ سرجم بوتگ انت – مروچی این ڈی پی ءِ بنجاھی سرکماش رشید بلوچ، اشفاق بلوچ ءُ ثناء بلوچ ءَ بنجل ءَ اتکگ ءُ گل ءِ کمک سرکماش ماما قدیر گوم ءَ نشتگ انت –

ھمے وھد ءَ ماما قدیر بلوچ ءَ گوشتگ کہ بلوچانی زورانسری آوار جنی ءُ بیگواھیں مردمانی یل کنائینگ ءِ ھاتر ءَ مئے گل ءُ بیگواھیں مردمانی کھولانی پُرایمنیں جھد برجاہ انت، اے دراجکشیں ءُ مھکمیں جھد ءَ چہ ریاست ترس ءِ آماچ انت ، تنی وھدی پنجاہ ھزار ءَ گیش مردم زورانسری آوار جنگ بوتگ انت کہ ریاست ءِ بندیگ جاھاں بند انت، بلوچ پرزندانی سرڈگار چہ دیمھونیاں سر ریچ انت –

ڈیھے شیدا ءُ شھید ھردو بلوچ جھد ءِ ھیرو انت کہ چہ ھماھانی دیھونیاں بلوچ ءُ بلوچستان ءَ دنیایے ھر کنڈ ءَ پجار ءِ ھست اِنت –

آئی ءَ گوشتگ کہ بلوچستان ءَ زورانسری آوارجنی ءِ ھلاس کنگ ءُ بیگواھیں مردمانی یل کنائینگے ھاتر ءَ بیگواھیں مردمانی کھولانی ھمراہ داری کنگ لوٹیت ھر جاہ ءَ آھانی توار جوڈ بہ بہ ایت –

آئی ءَ گوشتگ کہ بلوچانی سر ءَ زلم زوراکیانی دارگے ھاتر ءَ میان استمانی ادارھاں جوانیں گامگیج زورگی انت، وفاقی کمیٹی ءِ باور کنائینگ ءَ پد ھم بلوچستان ءَ زورانسری آوارجنیانی درچ دارگ نہ بوتگ، ما مدامی ھمے گوش ایں تاں ھما وھد ءَ ھمے ادارہ پہ جواب تلبی ءَ لوٹارینگ نہ بنت گڈا اے درچ ھمے وڈ برجاہ بیت اِنت –

سر بیتگیں ھالانی رد ءَ گوستگیں شپ ءَ ناشناسیں سلاہ بندیں مردماں پاکستانی لشکر ءِ سر ءَ اُرش کرتگ ءُ لشکر ءِ جانی تاوان ءِ ھال اِنت۔

گیشین ھالانی رد ءَ سلاہ بندیں مردماں آواران ءِ ھند بزداد ءِ پمپ ءَ پھازادریں لشکری کارمندانی سر ءَ مزن ءُ کسانیں سلاھانی گوں ءَ اُرش کرتگ ءُ اُرش داں دیر برجاہ بیتگ، اُْرش ءَ پاکستانی لشکر ءِ جانی تاوان ءِ ھال اِنت۔

ھمے وڑ پرندوشی ناشناسیں سلاہ بندیں مردماں آواران ءِ ھند مالار کھن ءَ پاکستانی لشکر ءِ بنجل ءِ سر ءَ گوں مزنیں سلاھاں اُرش کرتگ، اُرش ءَ پاکستانی لشکر ءَ را تاوان داتگ-

ھردوکیں اُرشانی درگت ءَ لشکری بنشونانی نیمگ ءَ تنی وھدی دگہ ھال دیم ءَ نیتکگ اَنت ناکہ اے دویں اُرشانی زمہ واری انگت ھچ گَل ءَ نہ زْرتگ اَنت –

اے دمگ ءَ گیشتر بلوچ آجوئی لوٹوکیں سلاہ بندیں گل پرکار اَنت کہ ھروھد ءَ مدامی یکشل ءَ ُاُرش بوگ ءَ اَنت-