سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں نیو سریاب پولیس تانہ ءِ سر ءَ دز بمب ءِ چگل داتگ ءُ در شُتگ انت- دزبمب اُرش ءَ جانی ءُ مالی تاوان بوتگ-
دومی نیمگ ءَ بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ-
جارکش ءَ گوشتگ کہ مئے سرمچاراں نیو سریاب پولیس تانہ دز بمب اُرش ءِ نشانگ جوڈ کتگ، اُرش ءِ آسر ءَ دژمن پوج ءَ جانی ءُ مالی تاوان ءِ دیمپانی بوتگ-
سندھ ءَ 20 جون ءَ بگر داں 19 ستمبر ءِ نیام ءَ سیلاب ءِ سوب ءَ 701 مردم بیران وھدیکہ 8 ھزار 422 ٹپی بیتگ اَنت۔
پرگینگ ءَ سیلاب ءِ تباکاریانی درگت پروینشل ڈیزاسٹر مینجمنٹ اتھارٹی (پی ڈی ایم اے) سندھ ءَ رپورٹ شنگ کُتگ۔
پی ڈی ایم اے سندھ ءِ رپورٹ ءِ ردءَ بیران بیتگینانی تہءَ 277 مردین، 131 جنین ءُ 293 چُک ھوار اَنت۔
رپورٹ ءِ تہءَ پی ڈی ایم اے سندھ ءَ گیشتر گُشتگ کہ پرگینگ ءَ بشامی ھورانی بندات ءَ بگر داں انگت 8 ھزار 422 مردم جتاھیں وئیلانی تہءَ ٹپی بیتگ اَنت۔
پروینشل ڈیزاسٹر مینجمنٹ اتھارٹی (پی ڈی ایم اے) سندھ ءِ رپورٹ ءَ اے ھم گُشگ بیتگ کہ اے ٹپی آنی تہءَ 2 ھزار 954 مردین، 2 ھزار 211 جنین ءُ 3 ھزار 247 چُک ھوار اَنت۔
بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ ھپسد ءُ شست ءُ شش روچ سرجم بوتگ انت – مروچی بلوچ راجدوستیں راجدار ءُ بی ایس او ءِ گوستگیں کمک سرکماش مہیم خان بلوچ، چہ نوشکی ءَ بیگواھیں نصیب اللہ بادینی ءِ کھول ءَ ھوار دگہ مردماں بنجل ءَ اتکگ ءُ دلپدردی درشان اِتگ –
ھمے وھد ءَ وی بی ایم پی ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءَ لس مھلوک، نودربر ءُ سیاسی باسکاں ھوار سیاسی رھشون ھم نشانگ کنگ بوگ ءَ انت کہ آ زورانسری آوار جنگ بوتگیں مردمانی کھولانی ھیرواہ بوتگ انت – پاکستانی پوج ءَ ھزارانی کچ ءَ بلوچ آوار جتگ ءُ بیگواہ کتگ انت کہ آھانی تہ ءَ زھگ ءُ زالبول ھم ھوار انت – ھزارانی کچ ءَ زورانسری آوار جنگ بوتگیں مردم تیرآماچ کنگ ءَ آھانی ژانگولیں جون بلوچستان ءِ جتا جتائیں ھند ءُ دمگاں دور دیگ بوتگ انت –
آئی ءَ گوشتگ کہ پاکستان ءِ درسیں ادارہ رسانکدر باں شر یا پارلمنٹ ءُ آمیدگس دراہ پاکستانی پوج ءِ چیریں ادارھاں گوں ھوار انت کہ آھاں بلوچ راج بس یک دژمن ءِ زاھر کتگ – پاکستان ءِ پارلیمنٹ، آمیدگس میان ءِ استمان ءِ درسیں ادارہ ءُ گلاں پرایمنیں جھد ءِ درگت ء گمراہ کنگ انت – ھزارانی کچ ءَ بلوچ پاکستان ءِ چیریں ادارھانی زندانانی تہ ءَ زوراکی سگگ انت – پاکستانی پوج دنیایے دیم ءَ وتی کتکاریانی چیردیگ ءِ ھاتر ءَ وڈ وڈیں ھُنر ءُ ھیلا کنگ ءَ انت بلے راستی ھمیش انت کہ بلوچ بیگواہ نہ انت بلکنہ پاکستانی پوج ءِ چیریں ادراھانی زنداناں بندیگ انت – سال دوھزار ءَ بگر تاں روچ مروچی پاکستانی پوج ءَ بازیں بلوچ زانتکار ءُ سیاسی باسک ءُ رھشون شھید کتگ انت –
آئی ءَ گوشتگ کہ پاکستانی پوج چوں وتی زلم ءُ زوراکی، کتکاریاں چیردات کنت کہ آئی بلوچ ءِ سر ءَ کتگ انت – اے راستی ءِ کہ بلوچ وتی رکینگ ءِ ھاتر ءَ کانود ءُ رھبندانی رِد ءَ جنگ کنگ ءَ انت – پاکستانی پوج بازیں بلوچاں ناشرکار گوشگ جھد انت – پاکستان بلوچانی بگیری ءَ دنیایے کمک ءَ کارمرز کنگ انت – نون میان استمان ءَ وتی چم پچ کنگی انت ءُ بلوچ جیڑہ ءَ چارگی انت – ریاست ءِ پاکستان تھنا اے دمگ ءِ تہ ءَ ناں بلکنہ سرجمیں دنیایے واست ءَ ھترہے –
ماما قدیر بلوچ ءَ گوشتگ کہ ما چہ اقوام متھدہ ءَ لوٹ کن ایں آ زورانسری آوار جنگ بوتگیں بلوچانی جیڑو ءَ شری ءَ چار ٹپاس بہ کنت ءُ میان استمانی کانودانی رِد ءَ چہ اے کھولاں سرجمیں راستی ءُ ڈٹیلاں دست بہ گپت تانکہ اشانی دوستیگیں مردم یل کنگ بہ بنت –
بلوچ اسٹوڈنٹس فرنٹ ءِ نیمگ ءَ روس ءُ یوکرین ءِ جیڑہ روس ءُ یوکرین ءِ میان ءَ برجاھیں جیڑہ ، جنگ ءُ چوپ ءِ پُژدر چے اِنت ؟ آ کُجام جیڑہ بوتگ کہ روس ءَ را لاچار کُتگ کہ یوکرین ءِ سر ءَ اُرش بہ کنت؟ اے درگت ءَ بنجاھی پتر ءِ باسکاں وتی ھیال درشان کرت ءُ گْوشت اگاں روس ءُ یوکرین ءِ راج دپتر ءَ چمشانکے بہ دیاں دوئیں استانانی راج دپتر، دودمان یکیں دْورشم ءَ گندگ ءَ کاینت ءُ نُھمی سدی ءَ تک ھستیں یوکرین ءِ بُنجاھی ھکومت (دارلھکومت)) کیئف روس ءُ یوکرین ءِ دارلھکومت بوتگ کہ آئی بنیاد سکانڈینیوینز ءِ یک ٹولی یے ءَ ایر کُتگ ۔
نیاد ءَ دیمتر ءَ گوشگ بیتگ کہ 11می سَدی ءَ ولادیمیر نامیں بادشاھے بیت کہ آئی ءِ ھکمرانی جُنزگ ءَ بیت آ ولادیمیر اول زانگ بیت کہ آ دویں استانانی بادشاہ بیت آئی سُلتنَت بیت کہ آئی نام” رس سُلتنَت ” ءِ نام ءَ زانگ بیت۔ 13مئی سَدی ءَ رس سُلتَنَت ءَ منگول سُلتنَت چیردست کنت 14مئی سَدی ءِ گُڑ سر ءَ تاں برجاہ بیت ۔
نیاد ءَ تران کنوکاں گوشتگ کہ ھمے وڑ ءَ ما گند ایں بازیں بادشاہ بنت کہ آوانی ھکمرانی ھستیں یوکرین ءُ روس ءِ سر ءَ بیت دویں یک جاہ بنت۔ ھمے وھداں یوکرین ءِ زبان ءِ سر ءَ وانگ ءُ نبشتہ کنگ ءَ پابندی لگ ایت گُڑا لس مھلوک ءِ تہ ءَ راجدوستی ءِ لیکہ گیش مھکم بیت مردم وت ءَ را یوکرینی لیکگ بندات کن اَنت ءُ روس ءَ چہ جتا بوگ ءِ یک جُھد ءُ کوشستے بیت آ یک ھدّے ءَ تاں سوبمَنْد بیت۔
نیاد بھر زیروکاں گوشتگ کہ جھانی جنگانی گُڈسر ءَ روس ءِ ھکمران جوزف اسٹالن یوکرین ءَ سرجم ءَ وتی دست ءَ کنت 1930 ءِ دِھک ءَ جوزف سٹالن انچیں بے روزگاری یے کار ایت کہ مھلوک پہ نان ءِ چُنڑے ءَ گّژن ءَ مِر اِیت ءُ بازینے دراں ڈیھ بیت۔
آیاں گوشتگ کہ جوزف سٹالن یک سرشونی یے جوڑ کنت کہ روسی مھلوک ءَ گیش یوکرین ءِ تہ ءَ آباد کنت تاںکہ یوکرین ءِ مھلوک اکلیّت ءِ تہ ءَ بدل بِہ کنت ءُ وتی راہ ءَ ھموار کرت بہ کنت۔
ھمے وڑ ءَ وھد روان کنت 1917 ءَ تاں روس ءِ تہ ءَ بادشاھی سرکار بیت لس مھلوک بزّگ ءُ بدھال بیت، روس بادشاھیت ءِ بگیری ءَ آشوبی رھشون ولادمیر لینن وَت مہ وتی جنگے(Civil War) بندات کنت راجمستری آشوبے کار ایت آ اکتوبر آشوب ءِ نام ءَ زانگ بیت آ وتی جھد ءَ سوبمند بیت ءُ روس ءَ یک سوشلسٹ ریپبلکے جوڑ کنت آ USSR سوویت یونین ءِ جوڑ بیت کہ شش ملک آئی ءِ تہ ءَ ھوار بیت بیلاروس، روس، یوکرین، Trans Cocation کہ سے ملک یکیں نام ءَ زانگ بنت اے وھد ءَ روس ءُ روس ءَ ھواریں ڈیھ جْوانیں رنگے ءَ سائنس ءُ ٹیکنالوجی ءِ پِڑ ءَ دیمروی کن اَنت۔
آیاں گوشتگ کہ ایشی ءَ چہ پد 1929 ءَ تاجکستان ءُ 1936 ءَ اُزبکستان ءُ کرگستان ( کہ بُندر ءَ جتائیں راج ءُ اسلامی ڈیھ اَنت) آ گوں وتی منشاہ ءُ رزاہ ءَ گوں سویت یونین (USSR) ءَ ھوار بنت۔ وھدے کہ نزّیک ءُ گْور ءِ ڈیھاں دیست سویت یونین راجمستری رھبنداں گوں تیزی ءَ دیمروی کنگ ءَ اِنت گڑا یورپ ءِ دِگہ ھم کَسان کَسانیں ڈیھ چوشکہ (لِٹیویا ، پولینڈ ، رودراتکی جرمنی ءُ مولڈوا )پہ سائنس ءُ ٹیکنالوجی ءِ پِڑ ءَ دیمروی کنگ ءِ ھاتِر ءَ 1940 ءَ کا اَنت گوں روس ءَ ھوار بہ اَنت ءُ روس روچ پہ روچ پِراہ ءُ شاھِگاں بوگ ءَ بیت ءُ روس دگنیا ءِ تہ ءَ یک مزنیں تاگتئ جْوڑ بیت، روس ءِ پِراہ ءُ شاھِگاں بوگ ءَ چہ امریکہ پہ وتی نَپ ءُ سیتاں یک مزنیں تاوانے سرپد بیت، گڑا 1949 ءِ دومی جھانی جنگ ءَ چہ پد امریکہ ، کینیڈا ،برتانیہ ءُ پرانس دِگہ ھم لھتیں یورپی ڈیھاں گوں ھوار روس ءِ بگیری ءَ 1949 ءِ وھد ءَ نیٹو ءِ نام ءَ یک جنگی گلے جوڑ کنت دانکہ روس ءَ گیشاں چہ گیش پِراہ ءُ شاھِگاں بوگ ءَ مئیل اِیت۔
تران کنوکاں گوشتگ کہ نیٹو ءِ رھبند ءِ پنچمی شِکّ ءِ تہ ءَ اِے گپّ ءَ ھوار کن اَنت کی کجام اِستان ءَ نیٹو ءِ ھواریں اِستانے ءِ سر ءَ اُرش کرت گُڑا نیٹو ءِ ھواریں تیوگیں اِستان آئی ءِ گُھگیری ءَ کن اَنت ءُ اُرش کنوکیں استان ءِ بگیری ءَ پاد کا اَنت۔ ھمے پیم ءَ اگاں وھدے کہ روس یا آئی ءِ ھمسنتیں ڈیھ نیٹو ءِ کجام ھم باسک ءِ سر ءَ ارش کنت گڑا نیٹو وتی باسکانی رکّینگ ءِ ھاتِر ءَ گوں سویت یونین ءَ جنگ کنت۔
آیاں گوشتگ کہ وھدے کہ دگنیا دو بلاک ءِ نیمگ ءَ روَگ ءَ بیت گڑا ھمے زمانگ ءَ دگنیا ءِ تہ ءَ بے تواریں جنگ بزانکہ کولڈوار بنگیج بیت گڑا ھمے زمانگ ءَ بزاںکہ 1955 ءَ سویت یونین وتی نزّیکیں ڈیھاں چوشکہ البانیا ، پولینڈ ، چیکوسلواکیہ ، ھنگاری ، بلگاری ، رومانیہ ءُ رودراتکی جرمنی ءِ ھواری ءَ امریکہ ءُ نیٹو ءِ بگیری ءَ ” وارسا پیکٹ ” ءِ نام ءَ یک جنگی گلے جوڑ کنت ۔ اے زمانگ پہ انسانی ھستانک ءَ بلاھیں تاوانے کہ روچِ مروچی برجاہ اِنت۔ اے زمانگ ءَ کروز میزائل ، پلاسٹک میزائل ءُ ایٹم بمب ءُ دِگہ بازیں انسان تاوان کاریں سلاہ جوڑ کنگ بیت۔
آیاں گوشتگ کہ 1980 ءِ وھد ءَ سویت یونین ءَ ھمے مار اِت کہ جنگی جیڑہ زرّ ءُ مالی زوالی یے گڑا سویت یونین ءِ کارمستر میکائل گورباچو ءِ سرکماشی ءَ سویت یونین ءَ گوں امریکہ ءَ سھل ءُ تراں کرت وتی جیڑھانی کم کم ءَ ھلاس کنگ ءِ جھد کرت پد ءَ دیمتر ءَ پہ سارتیں جنگ (کولڈوار) ءِ ھلاس کنگ ءِ ھاتِر ءَ امریکی کارمستر رونالڈ ریگن ءُ سویت یونین ءِ کارمستر میکائل گورباچو ءَ 8 دسمبر 1987 ءَ وت مہ وت ءَ سُھل ءُ تران کرت کہ ما کولڈوار ءَ ھلاس کن ایں یورپ ءُ امریکہ ءِ بگیری ءَ جوڑ کرتگیں سلاھاں ھم ناکارہ کن ایں دیمتر ءَ چُشیں سلاہ جوڑ نہ کن ایں۔ ایشی ءَ پد 8 پروری ءَ سویت یونین ءِ کارمستر میکائل گورباچو چہ امریکی سیکریٹری ءَ ھمے زمانت گپت کہ شما وتی 12 ڈیھی نیٹو جنگی گل ءَ ھلاس بہ کن اِنت ما شمے بگیری ءَ وتی جوڑ کرتگیں گل ” وارسا پیکٹ ” ءَ ھلاس کن ایں۔ اے کُلّیں گامگیج پہ دگنیا ءِ امن ءُ ایمنی ءِ واست ءَ چہ سویت یونین ءِ نیمگ ءَ زورگ بوت اَنت۔ اے زمانت گِرگ ءَ چہ پد میکائل گورباچو وتی کولانی سر ءَ اوشتات ءُ جولائی 1991 ءَ ” وارسا پیکٹ ” پُروشت پد ءَ دسمبر 1991 ءَ سویت یونین پُرشت میانی ایشیائی بازیں ڈیھاناں وتواجھی دات نوں ھما اِنت روچ مروچی تک روس ، بیلہ روس ، رومانیہ ، آزربائیجان ، تاجکستان ، اُزبکستاں ءُ کازکستان دِگہ ھما ڈیھ کہ سویت یونین ءِ بھر بوتگ اَنت آیانی وت مہ وت ءَ جْوانیں ءُ پُرایمنیں سْیادی یے ھست۔ بلے دومی نیمگ ءَ امریکہ ءُ یورپی ڈیھاں وتی نیٹو نامیں جنگی گل نا تھنا برجم داشتگ بلکیں یک یک ءَ کْوھنیں سویت یونین ءِ جنگی گل ” وارسا پیکٹ ءِ باسک البانیا ، پولینڈ ، چیکوسلواکیہ ، ھنگاری ، بلگاری ، رومانیہ ءُ جرمنی وتی جنگی گل نیٹو ءَ ھوار کرتگ اَنت کہ پیسر ءَ روس ءِ دوست بوتگ اَنت۔ نوں نیٹو روچ پہ روچ مزن بوان اِنت مروچی نیٹو باسک 30 گوریچی امریکہ ، یورپ ءُ ایشیائی ڈیھ اَنت کہ روس ءَ وتی دژمن لیکھ اَنت۔
نیٹو سویت یونین ءِ بھر ءُ بانگ کنگ ءَ چے پد ھم آیانی تہ ءَ جیڑہ ودی کرت ءَ ءُ یکشل ءَ کنگ ءَ اِنت پیسر ءَ 2001 ءَ روس ءُ جورجیا پد ءَ 2014 ءَ روس ءُ یوکرین ءِ میان ءَ جنگی جیڑہ ودی کرتگ۔ روس ءُ امریکہ اول روچ ءَ دژمن بنت پرچہ کہ امریکہ کیپیٹل ازم ءِ منوگر اِنت روس سوشل ازم ءِ 1917 ءِ انقلاب بیت آ سوشل ازم ءِ آرگ ءَ سوبمند بیت۔ اکتوبر ءِ آشوب ءَ پد سوویت یونین وتی سیمسراں مزن کناں کنت سوشل ازم گیش مھکم بوان بیت 1979 ءَ سوویت یونین اوگانستان ءِ سر ءَ ارش کنت گُڑا امریکہ چار ایت روس سنٹرل ایشیا ءَ سوشل ازم ءَ مھکم بہ کنت من ءَ گیش بیوار کنت گُڑا آ پاکستان ءُ سئودی ءِ کُمک ءَ تالبانائزیشن ءَ بندات کنت تاںکہ پروکسی ءِ ھساب ءَ سوویت یونین ءَ بہ پروش اِیت۔ تالبان ءِ روس ءِ جنگ چل ایت 1990 ءِ دھک ءَ روس باز کمزور بیت روس ءِ تھی جیڑہ باز بنت 1991 سوویت یونین اوگانستان ءَ یل دنت تالبان وتی ھکومتی ءَ کار ایت ۔
آیاں گوشتگ کہ 24اگست 1991 ءَ یوکرین چہ سوویت یونین ءَ وتی جتائی ءِ جار ءَ جنت 1 دسمبر 1991 ءَ وتی ریفرنڈم ءَ کنت وت یک وت واجھیں استانے بیت۔ ما گند ایں روس ھچ وڑ ءَ وش نہ بیت کہ منی پیسر ءَ ھواریں ملک گوں نیٹو ءَ ھوار بہ بنت گُڑا 2014 ءَ پیش یوکرین ءِ کماش وکٹوریانووچ بیت آ سک روس ءِ منوگرے بیت آ نیٹو ءَ ھوار بوگ ءِ ھک ءَ نہ بیت ھمئے وھداں چہ یورپی ڈیھاں یک افرے کیت کہ یوکرین گوں یورپی ڈیھاں یک معاشی ڈیلے بکن بلئے یوکرین ءِ کماش وکٹوریانووچ ایش ءَ نہ مّن ایت گوں روس ءَ معاہدہ کنت۔ گُڑا یوکرین ءِ لس مھلوک آئی ءِ بیگری ءَ زھرشانی کن اَنت آئی ھکومت ءِ بیگری ءَ رو اَنت، آئی ءِ ھکومتی ھلاس کنگ بیت آ تچ ایت روس ءَ روت گُڑا نوکیں کماش کہ کیت ولادیمیر زیلنسکی بیت کہ مروچی تک یوکرین ءِ کماش اِنت اِے روس ءِ دژمنیں مردمے بیت، 2014 ءِ وھداں روس ءُ یوکرین ءِ سیمسرانی کر ءَ روس ءِ پوج ءِ سر ءَ ارش کنت، گُڑا روس ءَ را یک نیمون ءُ بھَانھے رس اِیت، روس اِے اُتش ءِ بگیری ءَ گھگیری جنگے بِندات کنت ءُ یوکرین ءِ سر ءَ اُرش کنت، 2014 ءَ روس کریمیا ءِ سر ءَ اُرش کنت کریمیا ءَ وتی دست ءَ کنت بازیں جنگ ءُ چوپے بیت ھزارانی کساس مردم مَرگ ءِ آماچ بیت۔ گُڑا پد ءَ روس ءُ یوکرین ءِ میان ءَ “منسک امن معاہدہ ” ءِ نام ءَ مھائدھے بیت ۔
دیمتر ءَ روس یوکرین ءِ دو اِلاکہ ڈونیسک ءُ لوھانسک ءِ تہ ءَ باگی گروپ جوڑ کنت تانکہ یوکرین ءِ بگیری ءَ جنگ بہ کن اَنت آوان ءَ مالی ءُ پوجی کمک کنت ۔ یوکرین ءِ ھستیں کماش ءِ کوشش ھست کہ آ گوں نیٹو ءَ ھوار بہ بیت اگاں نیٹو ءَ ھوار بوت پہ روس ءَ دگہ دردِ سرے بیت گُڑا روس وتی رکّینگ ءِ واست ءَ 2022 ءَ ولادیمیر پیوٹن درشان کنت کہ ڈونیسک ءُ لوھانسک دو جُتائیں ءُ وت واجھیں استاں اَنت آوانی وت واجھی ءَ مّن ایت ھمدا چہ جیڑہ گیش بنت روس ءُ یوکرین ءِ میان ءَ تانکہ مروچی برجاہ اَنت۔
بلوچستان لبریشن فرنٹ ءَ ھُزدار ءِ ھند زھری ءَ لیویز تانہ ءِ سر ءَ دستی بمب اُرش ءِ زِمہ واری منّ اِتگ۔
بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ نوزدہ تُومشان دوشمبے ءِ روچ ءَ مئے سرمچاراں ھُزدار ءِ ھند زھری ءَ لیویز تانہ ءِ سر ءَ دستی بمب اُرشے کُتگ، اُرش ءِ آسر ءَ لیویز تانہ ءَ را تاوان بوتگ ءُ بازیں کارمندے ٹپّی بوتگ۔
جارکشّ ءَ دیمتِر ءَ گْوشتگ کہ لیویز ءِ کارمند پاکستانی پوج ءِ گْوشگ ءِ پد ءَ بلوچ جُھدکارانی بگیر ءَ چاڑِکّہ اَنت، ءُ آ زُورگِپتیں بلوچستان ءَ زُورگِریں پاکستان ءِ کْوزہ ءَ مُھکم ءُ کُمک کنگ ءَ اَنت۔
بلوچستان لبریشن فرنٹ ءِ جارکشّ میجر گّوھرام بلوچ ءَ وتی درشان ءِ گُڈّسر ءَ گْوشتگ کہ داں زُورگِپتیں بلوچستان ءِ آجوئی ءَ دُژمِنیں پوج ءُ آئی کُمکّارانی سر ءَ مئے اُرش گوں تْرندی ءَ برجاہ مان اَنت۔
میان اُستمان ءِ گوشگ اِنت میانمار ءَ یک اسکولے ءِ سر ءَ برزی اُرش ءَ یازدہ زھگ بیران بیتگ اَنت-
ھالرسانیں ادارہ اے ایف پی ءِ رد ءَ میان اُستمان ءِ ادارہ یونیسف ءَ اے اُرش ترندی ءَ ایر جتگ ءُ دومی نیمگ ءَ میانمار ءِ پوج ءِ نیمگ ءَ درشان دیگ بیتگ کہ اے دمگ ءَ جنگول جاڑیگ بیتگ اَنت آیانی نشانگ کنگ ءِ جھد کتگ-
میانمار ءَ گوستگیں سال ءَ چہ جاور ناگیگ اَنت پوجی واکداں ڈیھ گپتگ ءُ وتی دست ءَ کتگ-
یک دمگی مانیٹرنگ گروپے ءِ گوشگ اِنت چریشی ءَ پد سرکار ءِ سر ءَ ایراد گروکانی ھلاپ ءَ زمین تنک کنگ بیتگ داں انگت ءَ دو ھزار ءُ سَے سد ءِ کچ ءَ شھری بیران بیتگ اَنت –
گوستگیں وئیل ڈیھ ءِ زرباری روکپتی دمگ ساگاینگ ءَ پیش اتکگ کہ اود ءَ پیسر ءَ سرکار ءِ بگیر دار ءُ پوج ءِ میان ءَ جنگ ءُ چوپ بیتگ اَنت اے دمگ ءَ یک ھنچیں بیڑے برگ بیتگ کہ اود ءَ سرجمیں میتگ ماندارگ بیتگ-
میان اُستمان ءِ ھواریں ادارہ یونیسف ءِ نیمگ ءَ وئیل ءَ پد گوشگ بیتگ ’ 16 دسمبر ءَ برزی ارش ءَ اسکول ءَ یازدہ زھگ بیران بیتگ اَنت دمگ ءَ مزنیں آسے چست بیتگ‘-
دمگی گروپ ءِ نیمگ ءَ شنگ کنگ بیتگیں اکسانی تہ ءَ گندگ بیت اِنت یک وانگی کوٹی ءِ پرش ءِ سر ءَ ھون رتکگ اَنت چھت پرشت ءُ پروش ءُ یک زالبولے وتی زھگ ءِ لاش ءِ سر ءَ گریوگ ءَ اِنت-
دومی نیمگ ءَ میانمار ءِ پوج کہ آئی ءَ لس نام ’جنتا ‘ گوش اَنت راست کتگ کہ آئی ءِ نیمگ ءَ اے میتگ ءَ ھیلی کاپٹر دیم دیگ بیتگ اَنت کہ اود ءَ ھال سر بیتگ اے جاہ ءَ جنگول جاڑیگ اَنت ءُ اے جاہ ءَ سلاہ آرگ ءَ اَنت-
پوج ءِ نیمگ ءَ اے بھتام جنگ بیتگ جنگول لس مھلوک ءِ پیم ءَ کارمرد کنگ ءَ اَنت اود ءَ سلاھانی دزکپگ ءِ ھم ٹاہ دیگ بیتگ –
سیو دی چلڈرن ایشیا ءِ ریجنل ڈائریکٹر حسن نور ءَ وئیل ایر جتگ ءُ گوشتگ کہ میان اُستمان سرجمی ءَ گامگیج بہ زور ایت ءُ اگاں ناں گڑا آئی ءَ بازیں وئیلانی ودار کنگ کپ ایت –
بلوچستان ءِ دمگ چاگی ءَ بلوچستان اسمبلی ءِ باسک دگ ءِ وئیل ءَ گوں وتی ھمراھاں زدگ بیتگ –
گیشیں ھالانی رد ءَ بلوچستان اسمبلی ءِ باسک زاھد علی ریکی ءِ گاڑی نوکنڈی ءِ نزیک ءَ کزا ءِ آماچ بیتگ ءُ چریشی ءَ آ وتی ھمراھانی ھمراھی ءَ زدگ بیتگ-
وئیل ٹرالر گاڑی ءِ ٹکر ءَ چہ پیش اتکگ، وئیل ءَ میر زاھد ریکی، آئی ءِ ھمراہ ءُ یک لیویز کارمندے زدگ بیتگ-
دمگی مردمانی رد ءَ بلوچستان اسمبلی ءِ باسک چہ دالبندین ءَ دیم پہ ماشکیل ءَ روگ ءَ بیتگ کہ وئیل ءِ آماچ بیتگ وئیل ءَ زدگ بیتگیں زاھد ریکی ایف سی ھسپتان نوکنڈی ءَ بنداتی درمان ءَ پد پرنس فھد ھسپتال دالبندین ءَ برگ بیتگ ءُ اود ءَ سرجری ءَ پد ایئرایمبولنس ءِ سر ءَ کراچی ءَ برگ بیتگ-
نبشتانک: بے بانزلیں مرگ
نبشتہ کار: پرویز دیدگ
دی بلوچستان پوسٹ
دیگر ءِ وھد اَت کہ من وتی لوگ ءِ راستیں کش ءَ روچ برکت ءِ نیمگ ءَ یک درچکے ءِ چیر ءَ نندوک اِت آں، من ءَ اسلم شاہ ءِ کتاب (Dumb Girlگنگیں جنک)گون اَت من اولی باب (Chapter) ھلاس کُتگ اَت ءُ دومی باب وانگ بندات کُتگ اَت کہ اناگت ءَ یک کسانیں بالی مرگے ءِ پِیسکگ ءِ توار منی گوشاں کپت، اے یک انچیں دردناکیں توارے اَت کہ اے توار من ءَ سک ءَ بے چاڑ کنگ ءَ اَت، من ءَ یک سیاھْیں چادرے گون اَت، من چادر بُن ءَ ایرکُت ءُ کتاب چادر ءِ سر ءَ دور دات۔ من ھمے درچک ءِ سر ءَ لِکّپت اوں، چار اِت تاں درچک ءِ یک بزیں ٹانبے ءِ سر ءَ مرگے ءَ کُدویے بستگ اَت۔ من کُدو ءِ نزیک ءَ شت اوں چار اِت، کُدو ءَ گوں یک کسانُکیں چُورویے اَڑ اِتگ اَت، من جلد جلدی ھمے کسانیں چورو ءَ را دست ءَ کُت کہ بن ءَ مہ کپ اِیت من چورو کُدو ءِ تَہ ءَ ایرکت ءُ چورو ءِ پیسکگ بند بوت۔ من جھل ءَ ایر کپت اوں ءُ جیڑگ ءَ لگت اوں من جْیڑ اِت ھمے ساھت ءَ کہ چورو چہ کُدو ءَ کپگ ءَ اَت اے ساھت ءَ چورو باز بے وس ءُ لاچار اَت۔
ھمے جیڑگ ءِ تَہ ءَ من ءَ ھما گونڈل ءِ ھیال اتک کہ آ ھم چو ھمے چورُو ءِ وڑ ءَ بزّگ، بےوس ءُ لاچار اَت۔ اِے دوھزار ھبدہ (2017) ءِ گپّے کہ من گوں وتی سنگتاں تربت ءَ پہ وانگ ءَ شت اوں سے رَمس اَت آدینگ ءِ روچ ءِ ساھَت یک ءُ نیم ءِ وھد اَت، من چہ وتی کوٹی ءَ دراَتک آں دیم پہ مسیت ءَ جُماہ ءِ نماز ءِ وانگ ءِ واست ءَ روان بوت آں، نماز ءِ وانگ ءَ چہ پد مسیت ءِ مزنیں گیٹ ءَ چہ در آیگ ءِ ساھت ءَ منی چم یک گونڈلے ءَ کپت اَنت، آ گیٹ ءِ دپ ءَ اوشتوک اَت ءُ آئی ءِ نرم ءُ نازرکیں دست پہ پنڈگ ءَ ٹال اِت اَنت بلے بے ستک ءُ بےباوریں گپ اِش اِنت کہ سرجمیں مردم چہ مسیت ءَ درشُت اَنت بلے کس ءَ یک کلدارے ھم اے گونڈل ءَ را نہ دات اے مردمانی سنگ دلی ءَ را دیست من ھیران اِت آں، من ھمے سرپد بوت آں کہ اے دنیا متلب ءِ اِنت، اِد ءَ کَسّ کسّے ءِ بزّگی ءَ نہ چار ایت ھرکس تھنا وتی لاپ ءِ پِگر ءَ کنت ءُ ایوک ءَ وتی لاپ ءَ چنت ءُ مان کنت۔
مھلوک دومی ءِ بزّگی ءُ بے وسی ءَ نہ چار اِیت، اگاں کسّے ءَ دومی ءِ بزّگی ءُ بے وسی بہ چار اِتیں گُڑا مروچی نہ دُزّی بوتگ اَت، نہ یکّے دومی دُژمن جْوڑ بوتگ اَت، اِے دُگنیا ءُ تہ ءَ مارا یکّے دومی ءِ دست گِرگی اِنت، وتی بزّگ ءُ بے وسیں مھلوک ءَ را کمک کنگی اِنت، کجام مردم کہ اڑ ءُ جنجالانی تہ ءَ کپتگ گُڑا باید ھمیش اِنت کہ ما آئی ءِ بزّگی ءُ لاچاری ءَ بہ مار اَنت ءُ اِے گْرانیں ساھتاں آئی ءَ را دست بِہ گِر اَنت تاںکہ دیمتر ءَ آ پہ وت ءَ راھے ءَ درگپت کرت بِہ کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچستان ءِ بنجاھی شھر شال ءُ خضدار ءَ دو جتاجتائیں پئیمیں بمب تراکاں لیویز لشکری ءُ سی ٹی ڈی کارمند نشانگ کنگ بیتگ اَنت۔
سی ٹی ڈی ءِ کارمند شال ءِ ھند روکپتی شھدگ ءَ مینگل آباد ءِ نزیک ءَ نشانگ کنگ بیتگ اَنت۔ اھوالانی رد ءَ تراک ءَ دو کارمند ٹپی بیتگ اَنت کہ آ ٹپیگیں جاوارانی تہ ءَ نادراھجاہ ءَ برگ بیتگ اَنت۔
دومی نیمگ ءَ خضدار ءِ دمگ ءِ زھری ھنکین ءَ چہ اھوال اِنت کہ لیویز اسٹیشن دستی بمب تراک اُرش ءَ نشانگ کنگ بیتگ۔
لیویز ءِ رد ءَ تراک ءَ ھچ پئیمیں تاوانانی دیمپانی کنگ نہ کپتگ وھدیکہ اُرشکار تچگ ءَ سوبمند بیتگ اَنت۔
زانگ بہ بیت ھردویں اُرشانی زمہ واری داں انگت ھچ گل ءَ نہ من اِتگ اَنت۔
بلوچ لبریشن آرمی ءِ جارکش جیئند بلوچ ءَ وتی شنگ کُتگیں درشانے تہءَ گُشتگ کہ قوضہ گیریں پاکستانی پوج ءِ سرءَ اُرش ءِ زمہ واری ءَ بی ایل اے من اِیت۔
جیئند بلوچ ءَ گُشتگ کہ بلوچ لبریشن آرمی ءِ سرمچاراں گوستگیں شپ ءَ کیچ ءِ بنجاھی شھر تربت ءِ ڈی بلوچ روڈ ءَ بستگیں پھل ءِ نزیک ءَ قوضہ گیریں پاکستانی پوج ءِ یک چیک پوسٹ ءِ دستی بمب ءِ اُرش ءَ نشانگ کُتگ۔
جارکش ءَ گُشتگ کہ اُرش ءِ آسرءَ دژمنیں پوج ءِ دو کارمند ٹپیگ بیتگ اَنت ءُ اے اُرش ءِ زمہ واری ءَ بی ایل اے من اِیت۔
