TBP Balochi

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی ءَ چار ھزار ءُ ھپسدو ءُ شست ءُ ھپت روچ سرجم بوتگ انت – مروچی چہ نوشکی ءَ امیر محمد بلوچ، داد محمد بلوچ ءُ دگہ سیاسی ءُ چاگردی باسکاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی میان ءَ تران کنان ءَ گل ءِ کمک سرکماش ماما قدیر بلوچ ءِ گوشگ ات کہ ھنچوش کہ شما گندگ ءَ ایت کہ زورانسری آوار جنگ بوتگیں مردمانی یل کنائینگے ھاتر ءَ برجاھیں جھد یکجاہ مھکم بوان انت ھمے درچ ءِ ھمراھی ءَ ریاست پاکستان ءِ زلم زوراکیانی تہ ءَ گیشی آیگ ءَ اِنت – چہ ھپتاد سالاں برجاھیں کبزہ بگیری ءَ توار چست کنوک ءُ جھد ءَ لوگ پہ لوگ ءَ سرکنوکیں ھزارانی کچ ءَ رھشون ءُ باسک آوار جنگ ءُ بیگواہ کنگ بوتگ انت بازینے شھید کنگ بوتگ انت ءُ ریاست ءِ اے درچ برجاہ انت ھزارانی کچ ءَ جھد ءِ ھیرواہ مروچی ھم ریاست ءِ زندانانی تہ ءَ بندیگ انت ءُ زوراکی سگگ انت –

ماما قدیر بلوچ ءَ گوشتگ کہ ھزاراں بلوچ باسکانی گس ماندارگ بوتگ انت لٹ ءُ پُل کنگ بوتگ انت زھگ ءُ زالبول کم شرپ کنگ بوتگ انت – وی بی ایم پی ءِ گور ءَ اے گپ ءِ گواہ ھست انت ءُ ریاست ءِ نیمگ ءَ اے زوراکیانی تہ ءَ ھچ کمی نہ اتکگ ءُ وتی کبزہ ءِ برجاہ دارگے ھاتر ءَ آ بلوچانی سلو جینو سائیڈ ءِ تہ ءَ گیشی کاریت اے زلم زوراکیانی گندگ ءَ پد ھم بلوچ ءُ رھشون ءُ باسکانی پاد نہ لرز انت –

ماما قدیر بلوچ ءَ گوشتگ کہ فردانی بدل ءَ گل ءُ ادارھانی مھکم کنگے زمہ داری بلوچ راج ءِ سر انت – ریاستی زلم زوراکیانی تہ ءَ ھمک روچ گیشی آیان انت ءُ اے کار زورگیرانی میان ءَ کسان انت بلے ھما کہ بلوچیت ءِ داواہ دار انت کہ پارلمنٹ ءِ تہ ءَ نشتگ انت یا ریاست ءِ زورگیری ءِ بھر انت آھاں پگر کنگی انت کہ پاکستان ءُ آئی ءِ پوج ءَ بلوچ ءِ ننگ ءُ ناموس ءَ ھچ کار نیست آ بس بلوچانی مال مڈیانی تلبگار انت –

ماما قدیر بلوچ ءَ گوشتگ کہ اے سپر ھمینچو دراجتر بیت انت ریاست ھمے وڑ بلوچ مات ءُ گھارانی ننگ ءُ ناموس ءَ لگتمال کنان کنت – مروچی بلوچ راج ءَ گوں دلیری ءَ اے پُرایمنیں جھد ھما جاہ ءَ آرتگ ءُ سر کتگ اشی ءِ واستا المی انت کہ ھر تک ءُ پھناتاں سیادی داروکیں مردم وتی ننگ ءُ ناموس ءُ بیگواھیں مردمانی ھاترءَ دژمن ءَ پجا بیاریت پرایمنیں جھد ءِ تہ ءَ وتی کرد ءَ پیلو بہ کنت ءُ دژمن ءِ ھُنر ھیلاں سرپد بہ بیت –

میان اُستمان ءِ یک ھالے ءِ رد ءَ پاکستان ءَ ھپتاد لک ءَ گیش مردم چہ توپان ءَ بے لوگ بیتگ اَنت کہ انی تمبوانی توک ءَ لاچار اَنت – بازیں مردم ھست اَنت آیاں ساپیں پہ ورگ ءَ رسگ ءَ نہ اِنت-

فرانسیسیی ھالرسان اے ایف پی ءِ رد ءَ پاکستان ءَ بشی ھوراں ڈیھ ءِ مزنیں بھرے توپان ءَ وتی ارجان جتگ کہ چریشی ءَ کچ ءَ کساس شانزدہ سد مردم بیران بیتگ اَنت-

میان اُستمان ءِ انسانی ھکانی ھمددری ءِ کوآرڈینیٹر جولین ھارنیس ءَ گوشتگ کہ ’ پاکستان ءَ ڈینگی، ملیریا، دل ءُ لاپی نادراھی ءِ ھواری ءَ وردنی ءِ نہ بوگ ءِ وڑیں کھرانی دیمپان اِنت –

آئی ءَ اسلام آباد ءَ چارشمبے ءِ روچ ءَ تران کنان ءَ گوشتگ ’ من ءَ درد اِنت آپاں چہ ودی بیتگیں نادراھی، بے وردنی ءَ بیران بیتگیں مرگاں چریشی ءَ گیش تاوان اَنت ما ھما کساس ءَ دیستگ اَنت-

یونیسیس فیلڈ آپریشنز ءِ سروک اسکاٹ ھولری ءَ گوشتگ کہ ’ پنچ سد زھگ توپان ءَ بیران بیتگ اَنت‘ –

بلوچستان ءِ دمگ ڈیرہ بگٹی ءَ تیرگواری وئیلے ءَ دو کس بیران بیتگ اَنت-

گیشیں ھالانی رد ءَ ڈیرہ بگٹی ءِ دمگ سنگسیلاھ ءَ دو ٹولیانی جنگ ءُ چوپ ءَ تیرگواری ءِ وئیل ءَ دو کس بیران بیتگ اَنت-

لیویز واکدارانی گوشگ اِنت وئیل شکار ءِ وھد ءَ پیش اتکگ کہ اود ءَ شکار ءِ وھد ءَ توپگ ءِ ناگتی نشانگ ءَ یک مردمے بیران بیتگ چریشی ءَ دومی ٹولی ءَ تیرگواری کرتگ ءُ شکاری کشتگ-

وئیل ءِ درگت ءَ لیویز ءَ ارزی نبشتگ کرتگ ءُ گیشیں پٹ ءُ پول بندات کتگ اَنت-

بلوچستان ءِ جتا جتائیں وئیلاں چار شمبے ءِ روچ ءَ پیش اتکگیں دگ ءِ وئیل ءَ دگہ ناوشیں وئیلاں چار مردم بیران ءُ ھژدہ ٹپی بیتگ اَنت-

وئیل پنجگور، سوراب، ماشکیل ءُ گوادر ءَ پیش اتکگ اَنت – پنجگور ءَ سر بیتگیں ھالانی رد ءَ دزناپ ءَ سلاہ بندیں مردماں تیرگواری کرتگ ءُ دَھمی تبک ءِ نودربر مشتبہ ء پرویز نامیں ورنایے کشتگ-

دو نیمگ ءَ سوراب ءَ مساپر بریں کوچ کپتگ ءُ پانزدہ مردم زدگ بیتگ اَنت، وئیل کوچ ءِ ڈرائیور ءِ واب کپگ ءِ سبب ءَ پیش اتکگ –

دگہ یک وئیلے ماشکیل ءَ پیش اتکگ کہ اود ءَ منگوچر ءَ اجتماع ءَ روکہں گاڑی وئیل ءِ آماچ بیتگ دو مردم بیران ءُ سَے زدگ بیتگ اَنت –

جیونی ءَ دیم پہ کراچی ءَ روکیں کرولا گاڑی مکران ءِ مزن شھدگ ءَ شتنگی ءِ ھند ءَ وئیل ءِ آماچ بیتگ-

وئیل ءَ شرافی گوٹھ کراچی ءِ جھمنند مھمد علی ء مھمد رھیم ھما جاہ ءَ بیران بیتگ ءُ جیونی ءِ جھمنند مبین زدگ بیتگ ءُ آ زدگیں جاوراں آر ایچ سی پسنی ءَ برگ بیتگ –

ھندوستانی وشکند ءُ ازمکار راجو شری واستو پنجاہ ءُ ھشت سال ءِ اُمر ءَ بیران بیتگ-

ھندوستانی رسانکدر ءِ رد ءَ راجو شری واستو ءِ کھول ءَ آئی ءِ بیرانی ءِ ھال راست کرتگ-

راجو شری واستو دہ اگست ءَ جِم ءَ ورزش ءِ وھد ءَ دلبند ءَ ناگتی دردے ءَ گپتگ ءُ نیو دھلی ھسپتال ءَ برگ بیتگ-

ھال ءِ تہ ءَ گوشگ بیتگ راجو شری واستو جاندراھی ءِ ھاتر ءَ وینٹی لیٹر ءَ برگ بیتگ-

ھندوستانی رسانکدر ءِ رد ءَ راجو شری واستو ءِ بیرانی ءِ وھد ھندی وھد ءُ پاساں دَہ ءَ بیست دمان ءَ بیتگ ءُ چل ءُ یل روچاں نادراہ جاہ ءَ جاندراھی ءِ تھت ءَ بیتگ-

راجو شری واستو نوزدہ سد ءُ ھشتاد ءَ انٹرٹینمنٹ انڈسٹری ءَ کار ءَ بیتگ آئی ءِ دیمروئی ھما وھد ءَ بیتگ کہ سال دوھزار ءُ پنچ ءَ آئی ءَ ھندوستانی یک وشکند مراگشے ءَ بھر زرتگ –

راجو شری واستو ءَ ھندوستانی لھتے تامراں ھم ازمکاری کرتگ-

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءِ تہ ءَ اُرشانی زمہ واری منّ اتگ ءُ گوشتگ کہ شانزدہ ستمبر ءَ آدینگ ءِ روچ ءَ مئے سرمچاراں آواران ءِ دمگ بزداد ءَ پمپ ءِ نزیک ءَ پوجی سر ءُ مانسرانی واستا جوڑ بیوکیں دگ ءِ سر ءَ کارکنوکانی پھزداریں پوجی کارمندانی ءُ کار کنوک سنائپر توپگ ءُ ایل ایم جی ءُ دگہ وتکارانی سلاھانی گون ءَ اُرش کرتگ اَنت- اُرش ءَ بازیں کارندہ مرتگ ءُ زدگ بیتگ اَنت ءُ پوج ءَ مالی تاوانانی دیمپانی کنگ کپتگ-

جارکش ءَ گوشتگ کہ شانزدہ ستمبر ءَ ھم آدینگ ءِ روچ ءَ آواران ءِ دمگ مالار ءَ کھن ءِ ھند ءَ سرمچاراں پاکستانی پوج ءِ چوکی ءِ سر ءَ راکٹ ءُ وتکاریں سلاھانی گون ءَ چریشی ءِ آسر ءَ پاکستانی پوج ءَ جانی ءُ مالی تاوانانی دیمپانی کنگ کپتگ-

جارکش میجر گوھرام بلوچ ءَ گشتگ کہ ما دمگی ٹھیکیداراں پیسر ءَ اے سرپدی بیھار سر کرتگ آ وتی لوٹانی ھاتر ءَ پاکستانی پوج ءِ آسراتی کمکاریاں دزکش بہ بنت اگاں دزکش نہ بوت اَنت گڑا آیانی گون ءَ ھم جرم ءِ ھواری ءَ ھما رنگ کنگ بیت اِنت آ وتی جان ءُ مالانی تاوان ءِ زمہ وار وت اَنت-

میجر گوھرام بلوچ ءَ گوشتگ مئے اُرش زیردستیں بلوچستان ءِ آجوئی ءَ داں برجاہ بنت-

پاکستانی بنجاھی وزیر داخلہ رانا ثناءاللہ ءَ وتی ٹوئیٹر درشانے ءِ تہ ءَ گُشتگ کہ پہ ریاست ءَ شرم ءِ گپ اَنت کہ مردماں کانودی راہ ءَ آرگ ءَ ابید بیگواہ کنگ بنت ءُ پد ءَ آیانی جون دز کپ اَنت۔

آئی ءَ سرکاری نزوری من نبشہ کُتگ کہ سرکارانی اے درگت ءَ چنچو تاکت اِنت اے درست زان اَنت۔ آئی ءَ گُڈ سر ءَ گُشتگ کہ باوری دیاں کہ ما جیڑھانی نیمگ ءَ رؤگ ءَ ابید گوں جوانی ءَ جیڑھانی گیش ءُ گیوار کنگ ءِ جھد کنگ ءَ اِنت۔

رانا ثناءاللہ ءَ پسہ دیان ءَ سمی دین ءَ ٹوئٹ کُتگ ءُ گُشتگ کہ رانا ثناءاللہ تئی منتواریں کہ تو بیگواھیں مردمانی جیڑہ ءَ گیوار کنگ لوٹ ئے کہ اِشی ءِ درگت تو شال ءَ کھولاں گوں نندانک ھلاس کنگ ءِ مسام ءَ بیگواھیں مردمانی یل کنائنگ ءِ باوری داتگ اَت۔

سمی دین ءَ دیمتر ءَ گُشتگ کہ من تر ءَ اے ھم یات گیجگ لوٹاں کہ اے تو وزیر داخلہ ءُ سرکار شمئے ئیگ اِنت ءُ ریاست ءَ سرکار دیم ءَ بارت۔

زانگ بہ بیت گوستگیں دو ماھانی کچ ءَ بیگواھیں مردمانی کھولاں بلوچستان ءِ بنجاھی شھر شال ءَ گورنر ھاؤس ءِ دیم ءَ زھرشانی نندانک ءَ نشتگ بیتگ اَنت ءُ آیاں سَے ماہ ءِ وھد ءِ زورگ ءَ پد وتی زھرشانی ھلاس کتگ اَت-

چریشی ءَ پیسر ھم بازیں سرکارانی وھداں بیگواھیں مردمانی کھول باوری کنائینگ بیتگ اَنت بلے چرا سرکارانی ھلاسی ءَ پد کھولانی باوری ناسرجم بیتگ اَنت –