TBP Balochi

بلوچستان لبریشن فرنٹ ءَ کیچ ءِ دمگ کولواہ ءَ پاکستانی پوج ءِ گشتی ٹولی ءِ سر ءَ تراکناکیں شورانی اُرش ءِ زمہ واری من اتگ-

بلوچستان لبریشن فرنٹ ءِ جارکش میجر گوھرام بلوچ ءَ شنگ کرتگیں درشانی گوشتگ بیست ستمبر ءَ سَے شمبے ءِ روچ ءَ ساھت شش ءَ مئے سرمچاراں کیچ ءِ دمگ کولواہ گراڈی بازار ءَ سی پیک دگ ءِ سر ءَ پاکستانی پوج ءِ گشتی ٹولی کاروان ءِ سر ءَ تراکناکیں شوراں گوں اُرش کرتگ – چریشی ءَ کاروان ءَ ھواریں گاڑیاں یک گاڑی بمب ءِ زد ءَ اتکگ چریشی ءَ سواریں پوجی مرتگ ءُ زدگ بیتگ اَنت-

میجر گوھرام بلوچ ءَ گوشتگ کہ زیردستیں بلوچستان ءِ آجوئی ءَ داں مئے اُرش ترندی ءَ برجاہ بنت-

بلوچ نیشنل مومنٹ ءِ کارگشاد دلمراد بلوچ ءَ وتی درشان ءَ گْوشتگ پنجگور ءَ ساز ءُ زیملی مراگشے ءَ اے گْوشگ ءُ نہ ھلگ کہ اے مراگش مئے ربیدگانی بگیر اِنت ، مئے چہ سالاں برجاھیں بے تاھیریاں گواچن کنت کہ پاکستان پہ وتی بد ءُ بیرانیں مولاں مزھب ءُ مزھب ءِ نام ءِ سر ءَ جوڑ کرتگیں توپکی رمباں پہ بلوچ راجی زْرمبش ءِ بگیری ءَ کارمند کنگ ءِ شوندات ءِ سر ءَ گامجن اِنت۔زورگریں ریاست مزھب ءَ پہ بلوچ دود ءُ ربیدگ ءِ آسر کنگ ءُ آیانی رنگ ءُ دْروشم ءِ مٹائینگ ءَ کارمرد کنگ ءَ اِنت۔ اے سری رند نہ اِنت کہ پنجگور ءَ چوشیں کارے کنگ بیگ ءَ اِنت بلکیں پیش ءَ ھم ’فرقان الاسلام‘ ءِ نام ءَ آئی ایس آئی ءِ رودینتگیں مردماں اسکولانی سر ءَ ارش کرتگ ءُ جنکیں زھگانی چہ وانگ ءِ دارگ ءِ کوشست کرتگ۔

دلمراد بلوچ ءَ گْوشتگ پنجگور ءَ 24 ستمبر ءَ التاپ ساجد اکیڈمی ءِ چیردستی ءَ ساز ءُ زیملی مراگشے ایر کنگ بیتگ اَت کہ ایشی ءِ دیم ءَ ’عالمانی نام ‘ ءِ سر ءَ سرکاری کاسگ چٹ ءُ ریاستی لشکر ءِ مردم کشیں چیرک میلانک بوت اَنت ءُ ناں ایوک ءَ ساز ءُ زیملی مراگاہ دارگ بوت بلکیں سرکاری کاسگ چٹاں تامرے پیت بند ءُ کرت شکسات کہ آئی ءِ تہ ءَ اے ساز ءُ زیملی مراگاہ ننگ ءِ سر ءَ ارش لیکگءُ مراگاہ ءِ چارگزار کوش ءِ بیھار دیگ بیتگ اَنت۔

آئی ءَ گْوشتگ اگاں نام ءِ آلم اسلامی ءُ بلوچی دودانی گپ ءَ جن اَنت گڑا آیاں چہ درساں پیش پاکستانی رستری ءُ زوراکیانی بگیری ءَ پاد آیگ لوٹ ایت کہ آ روچ ء رامانی لوگانی سر ءَ ارش کن اَنت ، جنین، چک ، کماش ءُ ورنایاں آوار جنگ ءَ پد زور بیگواھی ءِ آماچ کن اَنت۔ اگاں آ وت ءَ دودمانانی پانک سرپد اَنت گڑا آیاں نورجان ءِ زوریں بیگواھی ءُ ملکناز رنگیں بے میاریں جنین آدمانی شھیدی ءِ سر ءَ باھند کنگی اَت۔ما شر زان ایں کہ چوشیں کارانی سر ءَ آ ھچ نہ گْوش اَنت پرچا کہ چہ ایشی ءَ آیانی واجہ دل ءَ کار اَنت۔

آئی ءَ گْوشتگ زبان ءُ دود ءُ ربیدگ ءِ دیم ءَ آرگ ءَ زیمل ءُ گشندھانی مزنیں کردے بیت۔اے رنگیں جاورے ءَ کہ رسانکدر ءَ بلوچ راج، بلوچ دود ءُ ربیدگ ءِ بارہ ءَ ھچ رنگیں سرپدی درشان کنگ نہ بیت ، اے وڑیں مراگش دود ءُ ربیدگانی دیمروئی ءَ مزنیں کردے پیلو کن اَنت ایشانی دارگ ربیدگی چکچینی اِنت۔

بی این ایم ءِ کارگشاد ءَ گْوشتگ ، ما چہ تچکیں مزھبی راھشوناں دزبندی کن ایں کہ آ بلوچ چکچینی، بلوچ ربیدگی چکچینی ءِ پجیگ ءِ مردمگری ءِ بیگری ءَ پاکستان ءِ میارانی سر ءَ ’علماء حق ‘ ءِ کرد ءَ پیلو بہ کن اَنت ءُ پاکستان ءِ دست ءِ لیبوک ءِ بیگ ءِ جاہ ءَ بلوچ راجی زْرمبش ءِ کوپگ بہ بہ اَنت۔ ما شیوار کن ایں ، اگاں راجی زْرمبش ءُ راجی ربیدگ مہ مان اَنت گڑا آ روچ مئے راجی مرگ ءِ برابری بیت اِنت۔

بلوچستان ءَ ھار آماچیں دمگاں بازیں وبائی نادراھی ءِ تالان بوتگ کہ ھپتگے ءِ میان ءَ ڈائریا، دل ءُ لاپ، ملیریا، چم ءُ پوست ءِ نادراھی ءَ ھوار ساہ ءِ نادراھی ءُ دگہ نادراھیانی سِی ءُ ھشت ھزار کیس رپورٹ بوتگ انت –

بلوچستان سرکار ءِ کچ ءُ کساس ءِ رِد ءَ بلوچستان ءَ ھار آماچیں سِی ءُ یک دمگاں وبائی نادراھی اتکگ انت ءُ اشانی تہءَ درساں گیشتر لسبیلہ، نصیر آباد، کچھی، جھل مگسی،صحبت پور، شال، قلعہ سیف اللہ، نوشکی، ھزدار، ڈیرہ بگٹی، چمن، قلعہ عبداللہ ءِ مردم نادراھیانی آماچ انت کہ اے نادراھی تیزی ءَ گوں شنگ تالان بوگ ءَ انت –

سرکاری کچ ءُ کساس ءِ رِد ءَ بلوچستان ءَ ھار آماچیں دمگانی تہ ءَ پانزدہ ستمبر ءَ بگر تاں بیست ءُ دو ستمبر ءَ ڈائریا ءِ دہ ھزار ءُ شش سد ءُ شست، دل ءُ لاپ ءِ شش سد ءُ ھپتاد ءُ چار، ساہ ءِ یانزدہ ھزار ءُ یک سد ءُ ھشت، پوست ءِ دھ ھزار ءُ چارسدءُ سِی ءُ پنچ، چمانی انفیکشن یک ھزار ءُ دوسد ءُ سِی، ملیریا ءِ سَے ھزار ءُ شش سد ءُ ھشتاد ءُ شش، ٹائیفائیڈ ءِ یکسد ءُ بیست ءُ چار، زردویگ ءِ سِی ءُ سَے وھدیکہ ڈینگی نادراھی ءِ دہ کیس رپورٹ بوتگ انت –

رپورٹ ءِ رِد ءَ جانسلامتی ءِ واکدارانی نیمگ ءَ ھار آماچیں دمگاں میڈیکل بنجل اڈ دیگ بوگ ءَ انت تنی وھدی سرجمی ءَ دوھزار ءُ یک سد ءُ چِل ءُ ھپت بنجلاں پنچ لک ءُ دوازدہ ھزار مردمانی الاج بوگ ءَ انت –

زانگ بہ بیت ھئور ءُ ھاراں بلوچستان ءَ سِی ءُ پنچ دمگ سانمند بوتگ انت – پی ڈی ایم اے ءِ رِد ءَ بلوچستان ءَ توپان ءِ سوب ءَ سَے سد مردم بیران بوتگ انت بلے سرکاری رپورٹ ابید بلوچستان ءَ ھئور ءُ ھاراں بیران بوتگیں مردمانی کچ گیش انت –

سرکار ءِ رِد ءَ بلوچستان ءَ ھئور ءُ ھاراں سینزدہ لک ءَ گیش مردم بے گس بوتگ انت – یک لک ءُ ھشتاد ءُ پنچ ھزار ءَ گیش گس کپتگ انت یا آھاں سک باز تاوان بوتگ – بلوچستان ءَ بوتگیں بشی ھئوراں پد ھار آماچیں دمگانی مھلوک تنی وھدی پیشی وڈا زند گوزینگ ءَ نہ انت –

ھمے زوتاں بوتگیں ھئوراں چی بلوچستان درساں گیشتر اثرمند بوتگ بلے پدا ھم سرکار ءُ واکدارانی کار سستی ءِ آماچ انت ھئور ءُ ھارانی سوب ءَ بلوچستان ءَ بیران بوتگیں مردمانی کچ تنی وھدی سرجمی ءَ پکا نہ بوتگ انت وھدیکہ چہ بلوچستان ءَ دومی جاھاں رؤگے ھاتر ءَ ریل ءِ پاٹک ءُ دگ تنی وھدی شر کنگ نہ بوتگ انت اے درگت ءَ واکدار سرجمی ءَ بے سوب انت –

بلوچستان ءِ دمگ کیچ ءِ ھنکین کولواہ ءَ پاکستانی پوج ءِ نیمگ ءَ بیڑ برجاہ اِنت۔

اھوالانی ردءَ کولواہ ءِ ھند شاپکول ءُ جھت ءَ پانی بیڑ سھب ءَ چہ برجاہ اِنت کہ آودہ پوج مزنیں کساس ءَ کوہ ءَ دمگ ءَ دیمروی کنگ ءَ اِنت ءُ مردمانی رپت ءُ آمد دارگ بیتگ اَنت۔

ھنکین ءَ موبائل نِیٹورک ھم بند کنگ بیتگ چریشی ءِ سوب ءَ پہ وھد گیشتریں اھوال سر نہ بیتگ اَنت۔

داں انگت ھچ پئیمیں جانی ءُ مالی تاوانانی ھال نیست ءُ پوجی واکدارانی نیمگ ءَ ھم پئیمیں درشان ءِ دیما نئیتکگ۔

زانگ بہ بیت کہ ھمے دمگانی تہءَ گوست ءَ بیتگیں پوجی بیڑانی تہءَ لس مھلوک ءَ جانی ءُ مالی تاوانانی دیمپانی کنگ کپتگ۔

بلوچستان ءِ راجدوستیں گل ءُ انسانی ھقانی ادارگ بیڑانی نیام ءَ مردمانی زورانسری بیگواھی، کُشگ ءُ لُٹ ءُ پُل ءِ بھتام ءَ پاکستانی پوج ءِ سرءَ جن اَنت۔

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ چار ھزار ءُ ھپسد ءُ شست ءُ ھشت روچ سرجم بوتگ انت – مروچی چہ نوشکی ءَ امین اللہ بلوچ، علاوہ الدین بلوچ ءُ بی ایس او پجار ءِ جوائنٹ سیکرٹری ابرار بلوچ ءُ دگہ مردماں بنجل ءَ اتکگ ءُ دلپدردی دتشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ جھد ءِ تہ ءَ فرد وتی شھیدی ءَ ادارہ جوڈ کن انت ءُ سرگوست ءُ راجدوستی ءِ جزبگاں وتی پشت ءَ یل کن انت ءُ رو انت –

آئی ءِ گوشگ ات کہ مارا بازیں سال ءِ بیت کہ وتی دوستیگیں مردمانی یل کنائینگے ھاتر ءَ پُرایمنیں جھد کنگ ءَ انت بلے پاکستانی پوج ھمک روچ مردماں آوار جنگ ءُ بیگواہ کنگ ءَ انت –

آئی ءِ گوشگ ات کہ راجی جھد ءَ پہ ھنر ھیلاں ھلاس کنگ ناممکن انت ریاست توپک ءِ زور ءَ چہ بلوچ باج برگ ءِ بدل ءَ سیاسی رویش وتیگی بہ کنت –

ماما قدیر بلوچ ءَ گوشتگ کہ اے وھدی بلوچستان ءَ زورانسری آوار جنی ءِ جیڑہ سک باز نگیگ بوان انت – درسیں سیاسی ءُ نودربرگلاں یکجاہ بوگ ءُ اے در انسانی امل ءِ بگیری ءَ جھد کنگی انت ءُ بیگواھیں مردمانی کھولانی ھمراہ داری کنگی انت –

بلوچستان ءَ پاکستانی پوج ءَ یک مردمے زورانسری آوار جتگ ءُ بیگواہ کتگ وھدیکہ یک بندیگیں مردمے یل بوتگ ءُ وتی گِس ءَ سر بوتگ –

گیشیں ھالانی رِد ءَ گوستگیں روچاں پاکستانی پوج ءَ بلوچستان ءِ بنجاھی شھر شال ءَ یک مردمے زورانسری آوار جتگ ءُ بیگواہ کتگ، کہ آئی پجار سلمان ء ظہور احمد کردگاپ مستونگ جھمنند انت –

دومی نیمگ ءَ چہ کیچ ءَ ھمے ھال آیگ ءَ انت کہ ھمے سال ءِ بیست ءُ نُھ اگست ءَ پوج ءِ دست ءَ زورانسری آوار جنگ بوتگیں آسف یل بوتگ ءُ وتی گِس ءَ سربوتگ –

زانگ بہ بیت پوج ءَ آسف ءِ گِس ءَ بیڑ برتگ ءُ آ زورانسری آوار جتگ ءُ گوں وت برتگ کہ مروچی یل کنگ بوتگ –

ماتویں چاگرد

نبشتہ کار: سیپ بلوچ

اولی بھر

دی بلوچستان پوسٹ

سمُل میتگ ءِ زبیا ءُ شوکتریں جنک اَت گوں گِردیں آسکی چماں ءُ کْوشیں رنگ ءُ جلْوناکیں میتگ ءِ زبیائی ءِ مُهرگ اَت سمل ءَ زندگی ءِ آجوئی ءِ هچ وڑیں رنگ ءُ دْروشم نہ دیستگ اَت پرچا کہ سمل ءَ میتگ ءِ وانگ جاه ءُ دیم ءِ کْوچگ ءَ اَبید هچ جاه نہ دیستگ اَت ، وهدے سهب ءَ کہ مھلہ پاد اتک گڑا سمل ءِ هیال گوں وانگ جاه ءَ اَت کہ زوت ءَ زوت وت ءَ وانگ جاه ءَ گوں دزگْوهاراں سر کت بہ کن آں ،سمل ءَ وانگ ءُ زانگ ءِ هنچیں شوکے گون اَت کہ سمل ءِ میتگ ءِ هچ چشیں چک ءَ گون نیست ات ، همے کہ سمل چہ وانگ جاه ءَ ساهت ءِ دو ءَ سر بوت سمل ءِ کماش کوچگ ءِ آدیمی ڈگارانی کاراں گوں گلائیش اَت سمل ءِ مات ءَ بس همے ودار اَت کہ سمل چہ وانگ جاه ءَ بئیت کہ نانان ئِے دیان بروت پہ کُوچگ ءِ ڈگاران ، همئے کہ سمل ساهت ءِ دو ءُ نیم ءَ گس ءَ سر بوت هنچو سمل ءَ اِل چتگ اَت کہ گژنگیں لاپ ءَ بروت گوں دهکانیں پت ءِ نان بہ وارت-

اے ساهت ءَ سمل گس ءَ اتک یکْوئی گوں مات ءَ همے گپ ءِ سر ءَ جنگ ئِے کت کہ اماں من نوں مزن آں کوچگ دور اِنت ، ءُ دومی منی وانگ جاه ءِ کار من ءَ کنگی اَنت ، تو وت چے ءَ ابا ءں ناناں نہ برئے؟ گڑا سمل ءِ مات زهر گپت کہ من تئی پت ءِ نوکر نہ آں اگاں تو چشیں گپ کن ئے من تئی پت ءِ گور ءَ تئی ‌شکایت ءَ کن آں گْوش آن ئِے ترا وانگ ءَ نیل ایت ، همے گپے دائمی سمل ءَ را ترس اَت پرچا کہ سمل ءَ را وانگ ءُ زانگ ءِ سک شوک اَت پمیشکا انچو گپ ءُ هبر اوپارے کتگ اَت-

چوناها سمل چورهے اَت سمل ءَ سئے سال بیت سمل ءِ مات چکے ءِ سر ءَ بیران بیتگ ات کہ سمل ءِ رودینگ ءِ هاتر ءَ سمل ءِ دهکانیں پت ءَ دگہ آروسے کتگ اَت پہ سمل ءَ ماتوے آؤرتگ اَت سمل ءِ ماتو ءَ اوں مزن امری ءِ وجہ چک نہ بوتگ ات سمل گوں ماتو ءَ وتی زند ءِ وش ءُ گرانیں روچاں گوں دچار ات-

اے دور ءَ سمل وتی وانگ جاه ءَ پنچمی تبک ءَ وانگ ءَ ات پہ ششمی تبک ءِ چکاس ءَ پہ دلمانگ اَت کہ ششمی چکاس ءَ سوبین بہ بیت گڑا دیم پہ مزنیں میتگ ءَ بہ روت ءُ شش ءِ وانگ ءَ بندات بہ کنت ، وهد جنزن اَت داں سمل ءَ وتی شش ءِ چکاس دات گوں شریں لمبراں پاس بوت وهدیکہ چکاس گْوست اَنت وانگ بندات بوت سمل گوں دزگْوهارانی همراهی ءَ مزنیں میتگ ءَ شت ، لهتے روچ گْوزگ ءَ رند کہ سمل ءِ آیگ ءُ سر بوگے ءِ وهد گیش بوان اِت اَنت ماتو ءَ را برداشت نہ بوت هروچ کہ سمل چہ مزنیں میتگ ءِ وانگ جاه ءَ چہ واتر اِت سرجمیں ساهتے گْوست سمل ءِ ماتو ءَ را نان کْوچگ ءَ برگی بوت اَنت ، همے ماتو ءَ نان کْوچگ ءَ برت اَنت سمل ءِ کماش ءِ گْور ءَ سمل ءِ بهتام جت کہ سمل گوں بچکانی همراهی ءَ روت وانگ ءَ برے دیگر ءَ کیت برے مگرب ءَ تو چو کن سمل ءَ میل وانگ ءَ سمل نوں رُستگ مزن اِنت سمل ءِ کماش ءَ درائینت من کایاں شپ ءَ سمل ءَ مکن کن آں پہ وانگ ءَ پرچاکہ من گریب ءُ دهکانے آں چو نہ اِنت وهد من ءَ وتی پاگ ءِ سرجهلی ءِ بهتام ءَ ایر بہ جنت-

روان اِنت —

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یوکرین ءِ سروک ولادیمیر زیلنسکی ءَ میان اُستمان ءَ چہ لوٹ کتگ روس ءَ یوکرین ءِ سر ءَ بیوکیں اُرشانی سزا ءَ بہ دنت آئی ءَ مالی ملام ءُ ماسکو ءَ سلامتی کونسل ءَ ویٹو پاور ءَ ھلاس کنگ ھوار اَنت-

برطانوی ھبر رساں ادارہ روئٹرز ءِ رد ءَ میان اُستمان ءِ نیمگ ءَ برجم داشتگیں پتر ءَ باوست کنوکاں سروک زیلنسکی ءِ اے گپ چار شمبے ءَ روسی سروک ءِ درشان ءَ پد دیم ءَ اتکگ کہ آئی ءَ یوکرین ءَ گیش پوج ءِ آرگ ءُ زھرناکیں سلاھانی کارمرد کنگ ءِ بیھار داتگ-

مھتر زیلنسکی ءَ میان اُستمان ءِ پتر بند ءَ گوشتگ ’ یوکرین ءِ ھلاپ ءَ جرمانی بندگ بیتگ اَنت ما سرجمی ءُ روس ءِ واستا سزا ءِ لوٹ ءَ کن ایں ‘-

آئی ءَ گوشتگ ’ مئے ریاست ءِ ھلاپ ءَ بیوکیں زلمانی دارگ ءِ سر ءَ روس ءِ ھلاپ ءَ میان اُستمان گچینی یک کمیٹی ءِ جوڑ بہ کنگ روس ءَ تاوان دیگ ءَ بہ دار ایت سلامتی کونسل ءِ باسکے ءُ ویٹو ءِ پاور ءَ ھم ھلاس بہ کنت ‘-

فرانسیسی ھالرسان اے ایف پی ءِ رد ءَ یک مزنیں واکے ءِ رد ءَ یورپی یونین ءِ وزیراں اژدری نیادے ءَ روس ءِ سر ءَ نوکیں پابندیانی جنگ ءِ سوڑگ کرتگ-

یورپی یونین ءِ دری شوربندیانی سروک جوزپ بوریل ءَ نیاد ءَ پد اھوالکاراں گوں تران کنان ءَ گوشتگ ’ ما دراھیں پھناتانی سر ءَ اژدی چاریں ھردوکیں نیمگاں پابندیانی جنگ ءِ واستا ٹپاسگ بیت اِنت ءُ المی کنگ بیت اِنت ‘-

آئی ءَ گوشتگ کہ ھردوکانی سر ءَ جوانیں گامگیجانی درکاری اِنت –

زانگ بہ بیت روسی سروک پوتن ءَ چار شمبے ءَ وتی درشان ءَ گوشتگ دگہ سَے لک پوجی جنگ ءَ ھوار کنگ بنت-

آئی ءَ گوشتگ اگاں روکپتی زور زھرناکیں سلاھانی گپ ءَ جن اَنت گڑا ماسکو وتی دراھیں سلاھاں کامرد تاکت ءِ گون ءَ کامرد کنت پسو دنت –

آئی ءَ گوشتگ کہ روس ءِ گور ءَ پسو دیگ ءَ درستیں سلاہ جاڑیگ اَنت –

ھمے وڑ ءَ روسی سروک ءَ یوکرین ءَ ماسکو ءِ نیمگ ءَ زیردستیں جاھاں ریفرنڈم کنگ ءِ جار ھم جتگ ات-