TBP Balochi

بلوچستان ءِ باپاری شھر حب چوکی ءَ دیما اتکگیں یک دگ ءِ وئیلے ءَ دو مردم بیران بیتگ اَنت وھدیکہ سئے ٹپی بیتگ اَنت۔

دگ ءِ وئیل حب چوکی ءِ ھند بھوانی ءِ نزیک ءَ دیما اتکگ، کہ آودہ کار گاڑی ءُ ٹرک ءَ ڈِک وارتگ۔

اھوالانی ردَ کار گاڑی ءَ سواریں یک مردمے ھما دمان ءَ بیران بیتگ، رندترءَ لاش ءُ ءُ ٹپی بیتگیں مردم حب چوکی سول نادراھجاہ ءَ برگ بیتگ اَنت۔

زانگ بہ بیت کہ بلوچستان ءَ دیما اتکگیں دگانی وئیلانی تہءَ ھمک روچی ردءَ بازیں مردم ٹپی ءُ بیران بنت۔ گوستگیں روچاں دگے وئیل ءَ بلوچستان اسمبلی ءِ یک باسک ءِ ھم باز ٹپی بیتگ اَنت۔

درستیں تیل ءُ گیس درگیجوکیں کمپنیاں گُشگ لوٹیں کہ زورگرءِ لُٹ پُلی پراجیکٹاں چہ دور بہ بنت۔ دوستین بلوچ

بلوچ ریپبلکن گارڈز ءَ ڈیرہ بگٹی ءَ گیس پائپ لائن تراکے ءِ تہءَ تراکینگ ءِ زمہ واری زُرتگ۔ بی آر جی ءِ جارکش دوستین بلوچ ءَ درشانے تہءَ گُشتگ کہ مئے سرمچاراں گوستگیں شپ ءَ ڈیرہ بگٹی ءِ ھنکین سوئی ءِ نزیک ءَ کراچی ءَ رؤکیں گیس پائپ لائن تراکناکیں شورو کُڈ کُتگ ءُ ریموٹ کنٹرول ءَ گوں تراکینتگ، کہ اِشی سوب ءَ کراچی ءَ رؤکیں گیس پائپ لائن ءَ مزنیں تاوان ءِ رستگ۔

آئی ءَ گُشتگ کہ زورگپتگیں بلوچستان ءَ تیل ءُ گیس شوھاز کنوکیں درستیں کمپنیاں گوں ترندی ءَ گشیں کہ آ قوضہ گیر ءِ درستیں لُٹ ءُ پُل کنوکیں پراجیکٹاں چہ دزکش بہ بنت، اگں نہ وتی تاوانانی زمہ وار وت بنت۔

نیشنل ڈیموکریٹک پاٹی ءِ بنجاھی جارکش ءَ وتی شنگ کرتگیں درشانی ءَ گشتگ پاٹی ءِ رھشون ڈاکٹر جمیل بلوچ بارکھان ءَ بیست ءُ سَے پروری ءَ ساھت دو ءِ نزیک ءَ زورانسری آوار جنگ ءُ بیگواہ کنگ بیتگ ءُ ڈاکٹر جمیل ءِ آوار جنگ ءِ دومی روچ ءَ ڈاکٹر جمیل ءِ دو ھمراہ ھم بیگواہ کنگ بیتگ اَنت کہ بارکھان بوگس لوکل ڈومیسائل ءِ جیڑہ ءِ سر ءَ سیاسی رنگ ءَ درستاں پیسر بیتگ اَنت – لھتے وھداں پد ھردوکیں ورناہ دیم ءَ آرگ بیتگ اَنت بلے پاٹی ءِ رھشون تنی وھدی بیگواہ اِنت –

ڈاکٹر جمیل بلوچ ءِ زورانسری آوار جنی ءَ ھپت سرجم بیتگ بلے داں انگت ءَ دیم ءَ آرگ نہ بیتگ سیاسی باسکاں چو بیگواہ کنگ پاکستان ءِ آئین ءَ ھوار میان اُستمانی ھکانی رھبند ءِ لگتمالی اِنت –

ڈاکٹر جمیل ءِ یل کنائینگ ءَ پاٹی ءُ آئی ءِ کھول ءَ بازیں رنداں زھرشانی کتگ کہ چریشاں پریس کلب ءِ دیم ءَ زھرشانی، پریس کانفرنس ءُ پریس ریلیز شنگ کتگ ءُ جمھوری ءُ آئینی رنگاں جنز اتگ اِت اِنت بلے زورانسری اوشت ءِ جاہ ءَ ابید دیم ءَ جنزگ ءَ اَنت-

بلوچی زبان ءَ بندوکیں نامی ئیں پبلشر لالا فھیم بلوچ ھم گوستگیں ماہ ءَ چہ کراچی ءَ بیگواہ کنگ بیتگ کہ آئی ءِ آوار جنگ ءَ پولیس ءِ پوشاکانی کارندہ سی سی ٹی وی ءِ گندگ ءَ اکس چارگ بیتگ اَنت آئی ءِ کھول ءُ آئینی رنگ ءَ ایف آئی آر نبشتگ کتگ ءُ ڈیھی آمیدگس ءِ سر ءَ اوست داشتگ ءُ ودار کنگ ءَ اَنت لس شھری بنکی ھکانی سر ءَ زبھر کنگ بیتگ ءُ ابید ارزی گرزی ءَ مردمانی آوار جنگ سنگینیں جرمانی لڑاں کاینت اگاں کانونداریں ادارھاں وتی دیک تچک نہ کت زورانسری آوار جنیانی دارگ نہ کت گڑا اشی ءَ مھلوک ءِ برانز کھر کار ایت ءُ اشی ءِ رکگ مشکل اِنت ھمے واستا گیر آئینی رنگ ءُ ترز ءَ پھریزگ ءُ ڈاکٹر جمیل ءُ لالا فھیم ءَ ھوار درستیں بیگواھیں مردم دیم ءَ آرگ بہ بنت-

ھئور ءُ توپان نزور تر اِتگیں گس ءُ دیوال کپگ ءَ انت دگہ سینزدہ مردم بیران بوتگ انت – ھئور ءُ توپاناں بیران بوتگیں مردمانی کچ نوکیں کساساں ھوار سرجمی ءَ سَے سد ءُ بیست ءُ سَے ءَ سر بوتگ انت –

سوبائی ڈیزاسٹر مینجمنٹ اتھارٹی بلوچستان ءِ توپان ءَ بوتگیں تاوانانی رپورٹ رِد ءَ بلوچستان ءِ دمگ کچھی ءَ ھمے زوتاں بوتگیں ھئورانی سوب ءَ دگہ پنچ زالبول، چار مردیب، سَے زھگ بیران بوتگ انت، وھدیکہ بارکھان ءَ یک مردمے ءِ بیرانی ءُ دو مردمانی زدگ بوگ ءِ ھال اتکگ انت – اے بیران بوتگیں مردماں ھوار بلوچستان ءَ ھئور ءُ ھارانی سوب ءَ سرجمی ءَ سَے سد ءُ بیست ءُ سَے مردم بیران بوتگ انت ءُ یک سد ءُ ھشتاد ءُ شش زدگ بوتگ انت –

رپورٹ ءِ رِد ءَ بلوچستان ءَ سرجمی ءَ ھپتاد ءُ دوھزار ءَ گیش لمب اِتگ انت کہ آھانی تہ ءَ کساس بیست ھزار سرجمی ءَ لمب اتگ انت وھدیکہ پنجاہ ءُ دوھزار ءِ کچ ءَ گساں تاوان بوتگ اَنت –

پی ڈی ایم اے ءِ رپورٹ ءِ رِد ءَ بلوچستان ءَ بشی ھئورانی سوب ءَ سَے لک ءُ ھژدہ ھزار دلوت مرتگ انت ءُ دو لک ءَ ایکڑ ءَ گیش زمینانی سر ءَ کشتگیں کشار سانمند بوتگ انت – وھدیکہ ھور ھاراں چہ توپانی جاورھالاں دو ھزار ءُ یک سد ءُ نود ءُ ھشت کلومیٹر دگ ءُ بیست ءُ چار پھل تباہ بوتگ انت –

زانگ بہ بیت ھئور ءُ توپان بلوچستان ءَ سِی ءُ پنچ دمگ سانمند بوتگ انت -وھدیکہ ھار آماچیں دمگاں وبائی نادراھی شنگ تالان بوتگ انت – ھپتگ ءِ میان ءَ ڈائریا، دل لاپ، ملیریا، چم ءُ پوست ءِ انفیکشن ءُ دم ءِ نادراھیاں ھوار دگہ نادراھیانی آماچ بوتگیں سِی ءُ ھشت کیس رپورٹ بوتگ انت –

ھمے زوتاں بوتگیں ھئوراں چی بلوچستان درساں گیشتر اسرمند بوتگ اَنت بلے پد ءَ ھم سرکار ءُ واکدارانی کار سست روی ءِ آماچ انت ھئور ءُ ھارانی سوب ءَ بلوچستان ءَ بیران بوتگیں مردمانی کچ تنی وھدی سرجمی پکا نہ بوتگ انت وھدیکہ چہ بلوچستان ءَ دومی جاھاں رؤگ ءِ ھاتر ءَ ریل پٹی ءُ دگ تنی وھدی شر کنگ نہ بوتگ انت اے درگت ءَ واکدار سرجمی ءَ بے سوب انت-

وائس فار بلوچ مِسنگ پرسنز ءِ شُد ھڑتالی بنجل ءَ 4769 روچ سرجم بیتگ، سیاسی ءُ چاگردی جھدکار میر بیگ، ظفر بلوچ، داد محمد بلوچ ءُ دگہ مردماں بنجل ءَ اتکگ ءُ یکجاھی درشان اِتگ۔

وی بی ایم پی ءِ وائس چیرمین ماماقدیر ءَ گُشتگ کہ بلوچ ءِ جھد کنوکیں مردماں زورانسری بیگواہ کنگ ءُ لٹ ءُ کُٹ کنگ ءَ پد جونانی دور دیگ ءَ ابید ھم بلوچ جدوجھد ءِ ھلاس نہ بیگ ءَ پد زورگیر وتی کاونٹر انسرجنسی ءِ پالسیاں یکشلی ءَ گوں جتائیں دروشم ءَ گوں کارمرز کنان پیداک اِنت۔ بلے بلوچ راجی شھید ءُ جھدکارانی مزن شانیں دیمھونی ءَ زوراک ءِ ھمک یک گامے بے سوب کُتگ، زورگیر ءِ ودی کُتگیں ٹولی بلوچ راجی ھستی ءِ جدوجھد ءَ میان استمان ءِ دیم ءَ زورانسریں بیگواھی، اھساس مھرانی ءُ بزگی ءُ بے واری نامینگ ءُ بلوچ راجی مُزاں تاوان بار کنان ءَ راجی جھد ءَ ھلاس کنگ لوٹ انت۔

ماما قدیربلوچ ءَ گشتگ کہ ریاست ءِ نیمگ ءَ بیگواھیں بلوچانی جونانی دور دیگ ءِ درچ یک شلی برجاہ اَنت۔ زورانسری بیگواھیانی درگت ءَ جھانی انسانی ھقانی گل اقوام متحدہ ، یورپی یونین ءَ ھوار دگہ گلاں چہ دزبندی کنیں کہ آ 55000 ھزار ءَ چہ گیشتر زورانسری بیگواھی ءِ آماچیں مردمانی یل کنگ ءِ تہ ءَ وتی کرد ءَ پیلو بہ کن اَنت۔

سندھی راجدوست باسک عاقب چانڈیو کوش ءِ راستی کھول ءَ سندھی راجدوستیں گل ءَ کتگ-

رسانکدر ءَ شنگ بوتگیں تامُر تران ءَ سندھی باسک عاقب چانڈیو ءِ گْھار شازیہ چانڈیو ءَ گْوشتگ کہ گوستگیں روچاں دزکپتگیں لاش آئی برات عاقب چانڈیو ئیگ اِنت – شازیہ چانڈیو ءَ دزبندی کتگ کہ آئی برات لاش آئی ءَ دیگ بہ بیت-

شازیہ چانڈیو ءَ گْوشتگ کہ آ گوستگیں روچاں رسانکدر ءَ چہ گستا بوتگ چریشی ءِ سوب ءَ آئی ءَ زوت ھال سر نہ بوتگ وھدے آئی ءَ لاش اکس دزکپتگ گڑا آئی ءَ برات ءِ چھرگ ءُ گُداں چہ پجّار کتگ- شازیہ چانڈیو گْوشگ اِنت کہ اگاں آئی ءِ برات کُشتگ اِت گڑا آئی ءِ لاش ءَ بدے اَنت-

زانگ بہ بیت ھمے ماہ ءِ یک ستمبر ءَ دی بلوچستان پوسٹ ھال سر بوتگ کہ ایران سیمسر نزیک ءَ یک لاشے دزکپتگ ءُ دمگی انتزامیہ ءَ نادُراھجاہ ءَ برتگ کہ اود ءَ ٹی بی پی ءَ گوشگ بوتگ لاش سے رند ءَ بیگواہ کنگ بوتگیں سندھی راجدوست باسک عاقب چانڈیو ئیگ اِنت-

بلے لاش ءِ شریں اکس دیم نیاھگ ءُ ھمے دمگ ءِ پدری نہ بوگ اڑانیں درشان دیم ءَ اَتکگ اَنت وھدے کہ کھول نیمگ چہ اشی ءِ پدری ءُ نا پدری گپ دیم ءَ نیتکگ-

عاقب چانڈیو ءِ نزیکیں مردمے ءِ رِد ءَ عاقب چانڈیو ھمے سال ءِ چار جولائی ءَ پوج ءُ چیریں ادارھانی کارندھاں بلوچستان ءِ دمگ ھب چوکی ءَ چہ آوار جنگ ءَ پد گوں وت برتگ، دو ماہ ءَ بیگواہ کنگ ءَ پد عاقب چانڈیو لاش ایران سیمسر نزیک ءَ دزکپتگ-

عاقب چانڈیو سندھی آجوئی لوٹوکیں راجدوستیں گل ءَ چہ سیادی دارگ ءِ پُشدر ءَ اشی ءَ ساری دو رند ءَ زورانسری آوار جنی ءِ نشانگ کنگ ءَ پد یل کنگ بوتگ ، بندات ءَ آ 2018 ءَ چہ سندھ لاڑکانہ پوج ءَ آوار جتگ ءُ یک سالے چاہ ماہ بیگواہ کنگ ءَ پد ستمبر 2019 ءَ یل کتگ-

عاقب چانڈیو دومی رند ءَ جولائی 2020 ءَ کراچی گلستان جوھر ءَ آئی گھار ، لوگ بانُک ءُ مات دیم ءَ چیریں ادارہ ءُ رینجرز کارندھاں آوار جتگ ءُ وتی ھمراھی ءَ برتگ اے وئیل تامُربند ھم دیم ءَ اَتکگ اَت-

دومی رند ءَ زورانسری آوار جنی ءَ پد فروری 2021 ءَ یکرندے پد ءَ عاقب چانڈیو آجو بوتگ وھدے کہ گُڈی رند ءَ ھال سر بوتگ کہ عاقب چانڈیو ھمے سال جولائی ءَ چہ ھب چوکی ءَ آوار جتگ-

سندھی آجوئی لوٹوکیں گل جسمم ءَ عاقب چانڈیو راجی شھید نام داتگ ءُ درشان شنگ کتگ کہ عاقب چانڈیو ریاست ءَ یک شوربندی ھساب ءَ کُشتگ- درشان ءَ گْوشگ بوتگ کہ گل سرجمیں سندھ ءَ عاقب چانڈیو ءِ غائبانہ نماز جنازہ وانگ ءِ جار ءَ جنت-

زانگ بہ بیت بلوچستان دروشم ءَ سندھ ءَ ھم راجدوستیں سیاسی باسکانی زورانسری آوار جنی ءِ گیشتر رپورٹ دزکپتگ اَنت سندھ ءِ سیاسی ءُ انسانی ھکانی گل اے زورانسری آوار جنی ءَ پاکستانی چیریں ادارہ ءُ دگہ لشکر ءِ دزمانجنی ءَ گوشگ ءَ اَنت-

سندھ ءَ زورانسری آوار جنی ءِ بگیری ءُ بیگواھی سندھیانی یل کنائینگ ھاتر ءَ کار کنوکیں گل وائس فار مسنگ پرسنز آف سندھ رِد ءَ تاں انو درزنانی سندھی باسک بے کانودی ءُ کانود پھازوکی ادارھانی نیمگ ءَ چہ سندھ ءِ جتائیں دمگاں چہ آوار جتگ اَنت ئے وھدے کہ اشانی تہ ءَ بازینے ءِ ٹپ ءُ ٹوریں لاش دزکپتگ اَنت-

وائس فار مسنگ پرسنز آف سندھ رِد ءَ کاؤنٹر ٹیررزم ڈپارنمنٹ سندھی باسکانی آوار جنگ ءُ دروگیں میڑاں کُشگ ناشرکاری ءَ پدر کنگ ءَ اِنت-