TBP Balochi

پاکستان ءِ اُستان خیبرپختوانخواہ ءَ سَے ماھانی وھد ءَ ناشرکاری ءِ 193 پیش اتکگ اَنت اے کاروائیاں چل ءُ چار مردن جنگ بیتگ اَنت شست زدگ بیتگ اَنت –

مھکمہ داکلہ ءِ رد ءَ خیبرپختونخواہ ءَ گوستگیں سَے ماھانی وھد ءَ وتکش تراکاں ھوار ناشرکاری ءِ یک سد ءُ نود ءُ سَے وئیل پیش اتکگ اَنت – سوات ءَ ھوار اُستان ءِ جتا جتائیں جاھاں یازدہ آئی ای ڈیز تراک پانزدہ ھینڈ گرنیڈ دستی بمب اُرش بیتگ اَنت –

پولیس ءُ شھریانی سر ءَ تیرگواری ءَ 30 نشانگی 7 وئیل رپورٹ بیتگ اَنت-

اے اُرشاں چل ءُ چار مردم بیران ءُ شست ءِ کچ ءَ زدگ بیتگ اَنت –

ھوراں پد توپانی جاورھالاں چہ ھزاراں وانگی ادارہ اسرمند بیتگ اَنت-

مھکمہ تعلیم بلوچستان ءَ توپان ءَ اسرمند وانگجاھانی رپورٹ شنگ کرتگ- رپورٹ ءِ رد ءَ گوستگین ھوراں پیداک بیتگیں توپانی سبب ءَ بلوچستان ءَ2ہزار ءُ 859 اسکول اسرمند بیتگ اَنت درستاں گیش لسبیلہ ءَ 321 اسکول تباہ بیتگ اَنت-

ترندیں ھور ءُ توپاناں بلوچستان ءِ دراھیں دمگ اسرمند اَنت ءُ بازیں جاہ داں انگت ءِ توپانی آپ ءَ اَنت-

مھکمہ ءِ تعلیم ےِ رد ءَ ھوراں وانگی تک سرجم ءَ اسرمند کتگ اَنت بنجاھی شھر شال ءَ دوسد ءُ چار اسکول ھوراں چہ اسرمند بیتگ اَنت بلوچستان ءَ اسرمندیں اسکولانی شش ھزار ءُ پنچ سد ءُ شست ءُ پنچ کوٹی کپتگ اَنت ءُ ھوراں چہ یک ھزار ءُ سشت ءُ ھشت اسکولانی دیوال کپتگ اَنت-

توپان ءَ اسرمندیں اسکولاں سَے لک ءُ ھشتاد ءُ شش ھزار ءُ ھپت سد ءُ ھشت نودربر وانگ ءَ بیتگ اَنت مھکمہ ءِ رد ءَ توپان ءَ ڈریتگیں اسکولانی زری تاوانانی کچ ءُ کساس بیگ ءَ اَنت-

زانگ بہ بیت توپانی ھوراں چہ بلوچستان ءِ سی ءُ پنچ دمگ اسرمند بیتگ اَنت استانی ڈیزاسٹر مینجمنٹ اتھارٹی ءِ رد ءِ بلوچستان ءَ توپانانی سبب ءَ دو سد ءُ ھپتاد ءُ ھشت مردم بیران بیتگ اَنت بلے ھور ءُ توپان ءَ بلوچستان ءَ بیران بیتگیں مردمانی کچ گیر سرکاری تکاں گیش اَنت-

بلوچستان ءِ سرکار ءِ رپورٹ ءِ رد ءَ ھور ءُ توپاں بلوچستان ءَ سیزدہ لک ءَ گیش مردم بے لوگ بیتگ اَنت، یک لک ءُ ھشتاد ءُ پنچ ھزار ءَ گیش لوگ کپتگ اَنت یا آیاں باز تاوان رس اتگ بلوچستان ءَ بیتگیں ھوراں پد بازیں مردمانی زند ءِ وشھالی دوبر واتر نہ بیتگ اَنت-

گوستگیں ھوراں بلوچستان درستاں گیش اسرمند بیتگ بلے سرکار ءُ آئی ءِ ادارھانی نیمگ ءَ بلوچستان ءِ کمک سست آماچی ءِ دیمپان اَنت ءُ بلوچستان ءَ ھور ءُ توپاناں بیرانی سرجمیں کچ زانگ نہ بیتگ اَنت بلے بلوچستان ءَ ھوار گیجوکیں دگ ءُ ریل پٹی انگت ءَ سرجم نہ بیتگ اَنت-

اوگان تالباناں پاکستانی پوج سر ءَ اُرش کتگ ءُ سے پاکستانی کارندہ مرتگ اَنت-

وئیل ضلع کرم ءِ ھند ءَ سے شمبے روچ ءَ بوتگ، پاکستان وزرات ھارجہ ءُ پاکستان پوج ءِ جارکش ءَ اے درگت ءَ گْوشتگ کہ اُرش ءَ اوگان ھاک کارمرز کنگ بوتگ-

دومی نیمگ ءَ تالبان جارکش بلال کریمی ءَ ٹاہ جتگ کہ پاکستان سیمسر ءِ نزیک ءَ پوجی پانگس ءِ جوڑ کنگ ءِ جُھد کتگ اِت کول آیانی ئیگ ءَ راھبندانی بگیری اِنت-

کریمی ءِ اے ھم گْوشگ اِنت کہ اسلامی امارات کارندہ گپ ءُ رپ ھاتر ءَ سیمسر نزیک ءَ شتگ اَنت بلے آیانی سر ءَ پاکستانی نیمگ ءَ چہ تیرگواری کنگ بوتگ ءُ دوئیں نیمگاں چہ جانی تاوان بوتگ-

وھدے کہ پاکستان گوشگ اِنت ناشرکاراں اوگان ھاک کارمرز کتگ-

روکپتی بلوچستان ءَ ناشناساں تیرگواری کرتگ ءُ یک مردمے کشتگ –

روکپتی بلوچستان ءِ دمگ بمپور ءَ سلاہ بندیں مردمانی تیرگواری ءَ یک مردمے بیران بیتگ –

وئیل بمپور ءَ پیش اتکگ کہ اود ءَ سلاہ بنداں تیرگواری کرتگ ءُ یک مردمے کشتگ ءُ تتکگ اَنت-

بیران بیتگیں مردم ءِ پجار یوسف دامنی ء شھدور جھمنند چکر آباد نوک جوب بمپور ءِ نام ءَ زانگ بیتگ-

روکپتی بلوچستان ءَ مردمانی کشگ ءُ زدگ کنگ ءِ درچ یکشل ءَ برجاہ اَنت سال دوھزار ءُ بیست ءُ یک ءَ داں انیگ ءَ یک سد ءُ پانزدہ مردم کشگ ءُ زدگ کنگ بیتگ اَنت کہ اشانی تہ ءَ پنچ کس زھگ ءُ چار زالبول ھوار اَنت-

پاکستانی لشکری ایف سی ءَ ایران ءَ بندوکیں بلوچستان ءِ دمگ دشت کپکپار ءَ سیمسری باپار پچ کنگ ءِ جار جنان ءَ یک مسامے شنگ کُتگ کہ آئی ءِ رد ءَ ھندی کماش ءُ سروکیں مردمانی پد ما پد دزبندیاں پد سرکاری ادارگانی کوشستاں پد کپکپار کراسنگ پوائنٹ سیمسری باپار ءِ ھاتر ءَ پد ءَ پچ کنگ بئیگ ءَ اِنت دانکہ تُربت ءُ دشت ءِ مھلوک سیمسری ءِ باپار ءِ سوب ءَ روزگار کُت بہ کن اَنت ءُ پرایمنیں باپارءِ مھاشی مُزاں چہ پائدگ بہ زیر اَنت۔

مسام ءِ رد ءَ کپکپارکراسنگ پوائنٹ، سیمسری باپار ءِ ھاترءَ تھنا ھمے کول ءِ سر ءَ پچ کنگ بیت اِنت کہ ھندی کماش ءُ سروکیں مردم سرجمیں دشت ھنکین ءَ کجام ھم پئیمیں سلاہ بندیں کاروائی نہ بئیگ ءِ مانزبانی بہ دے اَنت۔ اِشی ءَ ابید دگہ ھم نبشتگیں ٹکانی سر ءَ ھم سرجمی ءَ گامگیج زیر اَنت۔

مسام ءِ رد ءَ ھندی کماش ءُ سروک لس مھلوک ءِ پجیگ ءَ سرجمیں دشت ءَ نانکہ کجام ھم آجوئی لوٹوکاں نہ باھوٹی دے اَنت ءُ نانکہ آیانی کمک ءَ کن اَنت۔

ایف سی ءَ گُشتگ کہ ھندی سروک ءُ لس مھلوک بلوچ آجوئی لوٹوکانی ھند ءَ بئیگ ءِ وھد ءَ زیت ءَ زیت لشکریاں ءُ دگہ ادارگاں ھال دیگ ءِ زمہ وار بنت۔ وھدیکہ ھما ھندی مردمانی درگت ءَ ھم اھوال دیگ ءِ زمہ وار بنت کہ آ آجوئی لوٹوکاں آسراتی دے اَنت۔

مسام ءِ تہءَ کول ھوار کنگ بیتگ کہ پیسر ءَ چہ ھنداں جھمنندیں بلوچ آجوئی لوٹوکانی کھول اے گپ ءِ زمہ وار کنگ بہ بنت کہ آ زیت ءَ زیت وتی زھگاں پد ءَ واتر بہ لوٹائن اَنت۔ اگاں سیمسری باپار ءَ ھواریں کجام ھم مردم یا آئی ءِ سیادیں گوں اجوئی لوٹوکانی گوما کجام ھم وڑیں کمک ءِ کنت اگاں رھوت داریت گُڑا آھانی گاڑی پچگرگ بنت ءُ آ قانود ءِ رد ءَ سزا دیگ بیت اِنت۔

اے مسام ءِ رد ءَ اگاں دیمتر ءَ سرجمیں دشت ءَ چونیں ھم سلاہ بندیں کاروائی ءِ بہ بیت گُڑا کپکپار کراسنگ پوائنٹ پہ سیمسری باپار ءَ داں ھما وھد ءَ بند کنگ بیت دانکہ سرکاری واکدار کاروائی ءَ ھواریں جرمکار ءُ آھانی کمکاراں دزگیر مہ کنت۔

گیشتریں ایر کُتگیں شرتانی رد ءَ کراسنگ پوائنٹ بند بئیگ ءِ سوب ءَ ھچ پئیمیں زھرشانی کنگ نہ بیت ءُ اگاں زھرشانی ءِ راہ کارمرز کنگ بہ بیت گُڑا زھرشانی ءَ ھواریں مردمانی بگیر ءَ قانودی گامگیج زیرگ بیت۔

دومی نیمگ ءَ سیمسری باپار ءَ ھواریں مردماں اَے مسام بلوچ روزگار کُش نامینتگ ءُ گُشتگ کہ پھازگی لشکر ءُ ادارگ وتی بے سوبیاں چیر دیگ ءِ ھاتر ءَ لس مھلوک ءَ کارمرز کنگ ءُ اِد ءَ جاوراں گنتر ھراب کنگ لوٹ ایت۔

وھدیکہ سیمسری باپارءِ سرءَ ٹوکن سسٹم ءِ دیما آرگ ءَ گوں پاکستانی لشکر ءِ نیمگ ءَ کروڑانی روپیہ کَٹگ ءِ ھم گپ دیم ءَ اتکگ۔ سیمسری باپار ءَ ھواریں مردمانی گُشگ اِنت کہ اے پئیم ءَ کارمرز کنان ءَ یک ٹوکنے لکھانی کلدار ءَ بھا بیت وھدیکہ قانودی رد ءَ اِشی ھچ پئیمیں ڈس ءُ نشان نیست۔

بلوچ اسٹوڈنٹس آرگنائزیشن پجّار ءِ بُنجاھی جارکش ءَ رسانکدر ءَ وتی شنگ کتگیں درشان ءِ تہ ءَ گْوشتگ کہ بولان میڈیکل کالج ءَ بلوچستان ءِ نزگاریں نودربرانی کلدار چو آپ پیم ءَ ریتکگ اَنت بلے میڈیکل نودربرانی نندانکجاھی ھاسٹلز ء جاور ننداگ کابل نہ اَنت کالج سر ءَ ھرچ بوتگ پنڈ کرپشن دیمپان بوتگ-

جارکش رِد ءَ راجدپتر ءَ درستاں چہ گیش پنڈ گوستگیں ھژدہ ماہ ادارہ ءِ واستا ایر کپتگ اَنت بلے ادارہ شری جاہ ءَ تباھی ءِ نیمگ ءَ برگ بوتگ کالج انتزامیہ ادارہ بربادی نندارگ چارگ ءَ اَنت نودربرانی جیڑہ ھمکروچ گیش بوان اَنت کالج انتزامیہ میڈیکل نودربرانی واستا وانگی در بند کنگ بوگ ءَ اِنت-

بی ایس او جارکش گْوشگ اِنت کہ مئے گل صوبہ کابلیں نزگاریں نودربر ھکانی پھازگ ءَ زان اَنت نودربرانی ھکانی پلّکوکانی ھساب ءَ گر ایں-

جارکش ءَ دیمتر ءَ گْوشتگ مزنیں واکدار ءُ ھکومت زوت گامگیج بزور اَنت نابودیں انتزامیہ ءِ بگیری ءَ زوت گامگیج بزور اَنت تانکہ ادارہ ءَ گیش تباھی ءَ بہ رکین آں اگاں ناں گڑا انتزامیہ ءِ کرپشن بگیری ءَ تُرندیں زھرشانی کن ایں-