TBP Balochi

گوستگیں روچ ءَ کیچ ءِ دمگ بلیدہ زیردان ءَ سلاہ بندیں مردماں پاکستانی پوج ءِ کاروان ءِ سر ءَ اُرش کتگ-

اُرش زیردان ءَ ھما وھد ءَ کنگ بیتگ کہ اود ءَ سلاہ بندیں مردماں پاکستانی پوج ءِ پرپٹانی سر ءَ روکیں کارندہ نشانگ کتگ انت-

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ اُرش ءِ زمہ واری من اتگ ءُ شنگ کتگیں درشان ءِ تہ ءَ گوشتگ کہ مئے سرمچاراں گل ءِ انٹیلجنس ونگ ءِ ھال دیگ ءَ ھژدہ نومبر ءِ نیمروچ دوازدہ ءِ نزیک ءَ بلیدہ ءِ دمگ زیردان ءَ سنگر گپتگ یک اُرشے ءَ زورگریں پوج ءِ پرپٹ ءَ سواریں کاروان نشانگ کتگ انت-

جارکش ءَ گوشتگ موٹر سائیکل نزیک ءَ چہ نشانگ کتگ چریشی ءِ آسر ءَ موٹر سائیکل ءَ سواریں دو کارندہ جاہ پہ جاھی مرتگ اَنت- سرمچاراں کاروان ءَ ھوار دومی موٹر سائیکلانی سر ءَ ھم اُرش کتگ چریشی ءِ آسر ءَ دُژمن ءَ گیش جانی ءُ مالی تاوان چست کنگ کپتگ-

جارکش ءَ گوشتگ بلوچستان لبریشن فرنٹ بلیدہ ءَ زورگریں پوج ءِ سر ءَ اُرش ءَ دو پوجی کارندھانی کوش زمہ واری ءَ منّ اِیت-

زانگ بہ بیت بلوچستان سرکار ءَ یازدہ نومبر ءَ بہ گر داں ھژدہ نومبر ءَ بلوچستان ءَ دامگی ھال ءُ مزنیں ٹرانسپورٹ روانی بند کتگ انت ءُ ھمے وڑ داں سِی نومبر ءَ دفعہ 144 جتگ ءُ بلوچستان ءَ پنچ ءَ گیش یکجاہ بیوکیں مردمانی ھلاپ ءَ کاروائی کنگ ءِ کڈنی داتگ ءُ مچیانی سر ءَ ھم بندش جتگ-

سرکار ءِ اے دابیں بندشاں سلاہ بندیں اُرشکارانی اُرشانی توک ءَ کمی گندگ نہ بیتگ بلکین ھما مردم گیش سانمند بیتگ انت آیانی واپار گوں اونلائن ءُ یا وانگی نودربر چہ انٹرنیٹ ءِ بندش ءَ سانمند بیتگ انت-

بازیں نودربرانی گوشگ انت کہ سرکار ءِ نیمگ ءَ انٹرنیٹ ءِ بندش ءِ سبب ءَ مئے وانگ ءُ زانگ ءِ سر ءَ سان کپگ انت کہ چریشی ءِ سبب ءَ ما بازیں اونلائن کورس ءُ دگہ نوکیں چیزاں زبھر بوگ ءَ انت-

اپوزیشن پاٹی ءُ دگہ لس مردمانی نیمگ ءَ سرکار ءِ اے دابیں گامگیجانی سر ءَ یکشل ءَ چاگردی ترامجاھاں ایراد گِری ھم گندگ ءَ آیگ ءَ انت-

شَٹّر

نبشتہ کار :زبیر گلاب بلوچ

دی بلوچستان پوسٹ

آ شپ ءَ داں دیر ءَ آگاہ اَت (جاگہ) بسترانی سر ءَ اینگو آنگو باز سُرپُر ءَ رند ھم بلے آئی ءِ چمّانی واب باریں کُجا شُتگ اَت آئی ءَ جیڑ اِت کہ مرچی منی واب کُجا شُتگ بلے اے اولی رند نہ اَت یک شپے پیسر ءَ ھم آئی ءَ واب نیتک بلے آ شپ ءَ کُچکاں سکّ باز چانگ اِت مرچی کہ آئی ءَ واب نیایگ ءَ اِنت کہ شپ سک ھاموش اِنت زمستان اِنت آ کتاب وانگ ءَ اَت ( Kafka) ءِ کتاب (کلات) آئی ءِ دست ءَ اَت بلے وانگ ءَ نہ اِت ئِے بے وار اَت آئی ءِ کشّ ءَ یک سنگتے واب اَت واب ءِ ھما گُڈّی آسر ءَ داں شُتگ اَت سک گَرّگ ءَ اَت ءُ کسّی سما ئِے پِر نیست اَت وتی وابانی تہ ءَ آزاد اَت بلے چوناھا ھرکس وتی ھیالانی تہ ءَ آزاد اِنت بادشاہ اِنت بلے اسل ءَ گوں سانکلاں بندیگ اِنت آئی ءَ کتاب سرجاہ ءِ کش ءَ دُور دات آ پاد اَتک ڈنّ ءَ دراتک پہ مِسّے ءَ داں چار اِت ئِے کہ ماہ بہ کِساس رُژنا اِنت آئی ءَ گُوشت “ماھکانیں شپ مُدام بانور اِنت “ کموک اُوشتگ ءَ رند آ ھیال ءَ کپت کہ من پہ مسّے ءَ دراَتکگاں زمستانی شپ اَنت شپ ھم مزّن اَنت آئی ءَ جوڑی یے چمّپل پاد ءَ اَت ءُ چمپل ھم تَرّ اِت اَنت آئی ءِ پاد بہ کساس سرد اِت اَنت ءُ آ درھینگ ءَ اَت درھینان ءَ داں کوٹی ءَ اتک آ دلمانگ اَت کہ ٹالے سگریٹ بہ کشّاں بلے سگریٹ ھم نیست اَت سنگتاں کشِّتگ اِت اَنت آئی ءَ کمّبل سر ءَ داں پاداں پِر دات بلے ھچ ءُ ھچ ھما وڑّ ءَ چمّاں بند کنت گُوش ئے چمّ پچ اَنت آئی ءَ سما کُت کہ من ءَ دُکان ءَ روگی اِنت سُھب ءَ ماھلّہ بلے کُل واب اَنت گُڑا منی واب کُج اِنت؟ کُجا شُتگ؟ بازیں سُرپُراں رند باریں چون واب کپت۔

آ واب ءَ پاد اتک تاں وھد نُھ بَج اَت آ اشتاپ اشتاپی ءَ گوں در اتک آپ سرد اِت اَنت گُوریچ ءَ ھم دنز کُتگ اَت ءُ گُونڈلانی کُوکار اِنت سنگتے ءَ نورھان ءِ گانایے پِرکُتگ اَت “لوٹ اِت کہ وتارا وت بکشاں جاھے من پہ وت درگپت نہ کُت” بلے کسّ ءَ کُوٹ گور ءَ نہ اِنت اے سال ءِ اولی روچ اِنت کہ ناکو گُوریچ ءَ دنز کُتگ، آئی ءَ جانشُودگی اَت بلے آپ سَک سرد اِت اَنت بس چمّ ءُ دیم ئِے شُشت اَنت داں سنگتاں چاہ ھم جُوڑ کُتگ اَت بلے وھد گوستگ اَت آ پشک ءِ گور ءَ کنگ ءَ گوں چاہ ءِ ترماس ءَ چارگ ءَ اَت ءُ سنگتے ءَ گُشت “جان چاھے ایریچاں؟”آ اناں یار بے وھد اِنت دُکان ءَ رواں چاہ ورگ ءَ آئی ءَ پشک ءِ گور ءَ کنگ ءَ رند کباڑ پچ کُت گوستگیں سال ءِ یک واسلی یے ایر اَت آئی ءَ زرت ءُ کمُوک وتی لُنٹاں مُشت کہ آئی ءِ لُنٹ ھُشک اِت اَنت دُکان ءِ چابیانی زیرگ ءَ پد آئی ءَ وتی پرپٹ چالو کُت بلے بدکسّمتی ءَ پرپٹ ءَ پٹرول ھم مانیست اَت آئی ءَ چُوک کُت جَت کِکّے چالو بوت پرپٹ ءَ روگ بندات کُت راہ ءَ روان چُوک کنان داں بازار ءَ سر بُوت تیل مان کُت دیم پہ دُکان ءَ وھد نُھ ءَ پانزدہ گُوستگ اَت بازار نوکی پَچ بیگ اَت لھتیں وتی دُکانانی دپ ءَ روپگ ءَ اَت آئی ءَ جیڑ اِت دُوشی زاناں دُرستاں واب نہ یتکگ؟ اگاں شپ ھاموش بُوتگ؟ یا کہ ناں کُچاں چانگ اِتگ ایشانی لوگاں؟ آئی ءَ شَٹّر ءِ کُبل پچ کُت اَنت اشتاپ اشتاپ ءَ شَٹر ئِے چِست کُت شَٹّر کمّو چِست بیت پَس اِت اے اولی رند نہ اَت کہ دُکان ءِ شَٹر پسّ اِتگ اَت یک روچے پیسر ءَ ھم اے جیڑہ گوں آئی ءَ بُوتگ اَت آ جیڑگ ءَ اَت تاں ناکو(ویرینگ والا) ءَ گوشت “ھاں بَچک پچ بیگ نہ اِنت جھل ءَ بر ئِے پد ءَ چست ئِے کن باریں” دو رند ءَ جھل ءُ بُرز کُت ئِے چست نہ بیت اینچوک ءَ داں آئی ءِ سجیں ھمساھگ اَتک اَنت ناکو کاہ والا ءَ آواز دات “ابّا شَٹّر ءَ کمّوک زُور بدئے ئِے ءُ چست ئِے کن پچ بیت اِنت” داں ھمے ساھت ءَ شَٹّر ءَ توار کُت آ گُڑ اِت آئی ءَ چار اِت داں مردُم باز اَنت ءُ آیاں شَٹّر پچ کُتگ۔

آئی ءَ جیڑ اِت اگاں ھمے وڑ ءَ درست یک جاہ بہ باں تاں چی چی کُت کناں پد ءَ آئی ءَ جیڑ اِت بلے بہ باں آ گوں وت ھبر کنگ ءَ اَت داں ناکو کاہ والا ءَ دست آئی ءِ چپّی کوپگ ءِ سر ءَ ایر اَت ءُ گوشت ئِے “ ابا کمّوک آئیل پچگر شَٹرّ ءَ کمّوک آئیل بہ جن” آئی ءَ گوشت “ ھاں ھو ناکو” ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

تربت شاپک ءِ نندوکیں زالبولاں سئے شمبے ءِ روچ ءَ تربت پریس کلب ءَ پریس کانفرنس کنان ءَ گشتگ کہ 28 اگست ءَ مئے پنچیں زھگ شال ءِ چہ عیسیٰ نگری ءِ دمگ ءَ یکجاہ ءَ برگ بوتگ انت کہ آھانی بابت ءَ انگت ءَ ھچ وڑیں سرپدی رسگ ءَ نہ انت۔

آھاں گشتگ کہ چہ شال ءَ برگ بوتگیں بچکانی تہ ءَ شاہ بیک ء ماسٹر اسلم، قدیر ء للہ ، اکرم ء ماسٹر تکسیر، قدیر ء پھلین ءُ محمد یاسین ء مسکان ھوار انت وھدیکہ صدام ء مھراب چہ جولائی ءَ جوسک ءِ دمگ ءَ برگ بوتگ۔

زالبولاں گْوشتگ کہ ما باز رند ءَ ڈپٹی کمشنر، کمشنر ءُ دگہ سیادی داروکیں واکداراں گوں گند ءُ نند کتگ ءُ وتی زھر ءُ زھم ھم سر کتگ اَنت بلے چار ماہ ءِ گوزگ ءَ پد ھم زھگانی جان سلامتی ءُ آیانی جاور ھال ءِ بابت ءَ ھچ وڑیں سرپدی دیگ نہ بوتگ۔

آھاں گشت کہ مئے زھگ ھما نودربر انت کہ شال ءَ وانگ ءَ بوتگ انت۔ ما زھرشانی کنان کنان ءَ دمبرتت ۔ اگاں سئے روچ ءِ تہ ءَ مئے چُک یل نہ بوت اَنت ما ایجوکیشن چوک، کمشنر روڈ ءُ اے دگہ ھاسیں شھدگانی بند کنگ ءَ لاچار بئیں۔

بلوچستان ءِ دمگ کیچ ءَ چار زالبولاں ھوار دوازدہ مردم پاکستانی پوج ءَ آوار جتگ ءُ بیگواہ کتگ انت-

سر بیتگیں اھوالانی رد ءَ بلوچستان ءِ دمگ کیچ ءَ پورسز ءَ چار زالبول ءُ یک کماشے ءَ ھوار 12 مردم آوار جتگ ءُ بیگواہ کتگ انت-

آوار جنگ بیتگیں مردمانی توک ءَ لال بخش، فرزانہ، میمل، شربانو ءُ شیرین ھوار انت-

ھمے وڑ ءَ چہ ھُزدار ءَ دوازدہ سال ءَ بیگواھیں پت ءِ یل کنائینگ ءِ ھاتر ءَ زھرشانی کنوکیں چُک ڈیتھ اسکواڈ کارندھانی دست ءَ بیگواہ –

ھالانی رِد ءَ گوستگیں ماہ 30 اکتوبر سرکاری پلامرزی ڈیتھ اسکواڈ ءِ کارندھاں بلوچستان ءِ دمگ واشک ءِ تھسیل چہ بسیمہ ھُزدار ءَ تھسیل نال ءِ جھمنند محمد عارف آوار جتگ-

دمگی مردمانی گوشگ اِنت کہ دمگی ڈیتھ اسکواڈ ءِ دست ءَ آوار جنگ ءَ پد ورنا دیم ءَ آرگ نہ بیتگ-

زانگ بہ بیت محمد عارف ءِ پت دوازدہ سال ءَ ساری پاکستانی پوج ءِ دست ءَ زورانسری آوار جنی ءِ نشانگ کنگ بیتگ- زاکر اسماعیل یازدہ فروری دوھزار ءُ سیزدہ ءَ زورانسری آوار جنی ءِ نشانگ کنگ بیتگ –

محمد عارف وتی پت ءَ ھوار دگہ بیگواھیں مردمانی یل کنائینگ ءِ ھاتر ءَ زھرشانی ءُ نندانک ءَ بھر ئِے زرتگ، آئی ءِ کھول ءِ رِد ءَ پت ءَ پد چُک لوگ ءِ یکیں لاپ دیوک بیتگ کہ آ ھم بیگواہ کنگ بیتگ-

زانگ بہ بیت کہ گوستگیں یک ماھے ءِ میان ءَ چہ نال ءَ شش مردم پاکستانی پوج، سی ٹی ڈی ءُ دمگی ڈیتھ اسکواڈ ءِ دست ءَ زورانسری آوار جنی ءِ نشانگ کنگ بیتگ اَنت بلے اشانی تہ ءَ سے مردم دیم ءَ آرگ بیتگ اَنت-

زورانسری آوار جنی ءِ نشانگ بیتگیں محمد عارف ءِ کھول ءَ گوشتگ کہ ما انسانی ھکانی گل ءُ نال ءِ سرجمیں سرپدیں مردماں چہ دزبندی کن ایں کہ آ عارف بلوچ ءِ واستا توار چست بہ کن اَنت اے زُلم ءِ ھلاپ ءَ یکجاہ بہ بنت-

بلوچستان ءِ دمگ کیچ ءِ بُنجاھی شھر تربت ءَ پسنی ءِ دگ بانک کنڈگ ءِ نزیک ءَ دو ورنایانی لاش دزکپتگ اَنت-

دزکپتگی لاشانی پجّار ظریف ء لعل بخش جھمنند بلور کولواہ ءُ فاروق ء نعیم نام ءَ چہ بیتگ اَنت-

زانگ بہ بیت ظریف ءِ ھمراھی ءَ وحید احمد مولابخش ءُ یاسر بلوچ ء الاھی بخش 30 ءُ 31 میانی شپ ءَ کیچ ءِ دمگ بھمن ءَ آوار جنگ ءُ بیگواہ کنگ بیتگ انت آ دوئیں تنی وھدے بیگواہ ءَ اَنت ظریف بلوچ ءِ لاش دور دیگ بیتگ-

بلوچستان ءِ جتاجتائیں دمگاں پاکستانی پوج ءِ سر ءَ بیتگیں اُرشانی زمہ واری بی ایل اے ءُ بی ایل ایف ءَ منّ اِتگ اَنت-

بلوچستان لبریشن پرنٹ ءِ جارکش میجر گوھرام بلوچ ءَ رسانکدر ءَ وتی شنگ کُتگیں درشان ءِ تہ ءَ گوشتگ کہ بی ایل ایف ءِ سرمچاراں شانزدہ نومبر ءَ نیم روچ ءِ ساھت دوازدہ ءِ نزیک ءَ کیچ مند ءِ ھند شند ءُ دریا چم ءِ میانی دمگ ءَ زورگریں پاکستانی پوج ءِ کاروان ءِ پھازداری کنوکیں دو کارندہ اُرش ءِ نشانگ کُتگ ءُ کُشتگ اَنت ۔

جارکش ءَ گوشتگ کہ ھمے ھند ءَ چہ گستایے ءَ سرمچاراں زورگریں پاکستانی پوج ءِ کاروان ءِ اولی گاڑی چہ نزیک ءَ نشانگ کُتگ چریشی ءِ آسر ءَ دگہ دو کارندہ مُرتگ ءُ یکے ٹپی بیتگ ۔ میڑ کساس نیم ادار ءَ برجاہ بیتگ۔ ھمے میان ءَ پوج ءِ کمک دو ھیلی کاپٹر ھم اتکگ ءُ سر بیتگ اَنت بلے سرمچار کاروائی ءَ پد وتی اوتاک ءَ سر بیتگ اَنت ۔

جارکش ءَ دیمتر ءَ گوشتگ کہ ھمے روچ ءَ یک دگہ کاروائی ءَ نیم روچ ءِ ساھت دو ءَ مند ءِ ھند شیپچار ءِ کوھی دمگ ءَ زورگریں پاکستانی پوج ءِ چیک پوسٹ ءِ سر ءَ بی ایل ایف ءِ اسنائپرز ءِ ٹولی ءَ زورگریں پاکستانی پوج ءِ کارندہ ھما وھد ءَ اُرش ءِ نشانگ کُتگ اَنت وھدیکہ آ چہ وتی چوکی ءَ ڈن ءَ در اتکگ اَنت ۔ اُرش ءِ آسر ءَ پوج ءِ یک کارندھے جاہ پہ جاھی مُرتگ ءُ یکے سک ٹپی بیتگ ۔

جارکش ءَ گوشتگ دگہ کاروائی یے 14 نومبر ءَ کوہ ڈگار ءِ دمگ مند تُربَت شھدگ ءِ سر ءَ برجاھیں پُھلے گوں تراک ءَ تباہ کُتگ ءُ چریشی ءِ آسر ءَ پُھل سرجم ءَ تباہ بیتگ-

ھمے وڑ بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گوشتگ کہ بی ایل اے ءِ سرمچاراں پنجگور ءُ جعفر آباد ءَ دو جتاجتائیں بمب اُرشاں زورگریں پوج ءُ پولیس کارمند نشانگ کتگ اَنت۔

جارکش ءَ گوشتگ کہ بی ایل اے ءِ سرمچاراں مرچی پنجگور ءِ ھند راھی نگور ءَ سی پیک دگ ءَ زورگریں پوج ءِ یک گاڑی یے گوں چیر کتگیں شورھاں نشانگ کتگ چریشی ءِ آسر ءَ زورگریں پوج ءَ جانی تاوان بیتگ۔

جارکش ءَ گوشتگ کہ بی ایل اے ءِ سرمچاراں دوشی جعفر آباد ءَ شاھی چوک ءَ پولیس ءِ چوکی گوں دستی بمب ءَ نشانگ کتگ، چریشی ءِ آسر ءَ یک کارندھے سک ٹپی بیتگ۔

وتی درشانانی گُڈی ءَ دو گلاں پاکستانی پوج ءِ سر ءَ بیتگیں اُرشانی زمی واری منّ اِتگ اَنت-

بلوچستان ءِ بنجاھی شھر شال یک نیمگی پھازگی گامگیجانی سوب ءَ سیکیورٹی زونے ءِ دروشم ءَ انت ، سیکیورٹی شک ءِ نام ءَ شھر ءِ شھدگ بید ھال دیگ ءُ مھلوک ءِ شوربندی ءَ بند کنگ بنت چریشی ءَ مھلوک ءِ ھمک روچی زند سک باز سانمند بوگ ءَ انت ۔

لس مھلوک ءَ سوبائی سروزیر سرپراز پگٹی ءِ سرا ترندی ءَ گوں نگد کتگ ءُ گوشتگ کہ سرکار ءِ بے سوبیانی بار لس مھلوک ءِ سرا لڈگ بوگ انت ءُ مردمانی زند لنگڑ کتگ اشتگ ۔

گوستگیں روچ ءَ شنگ بوتگیں سیکیورٹی تھریٹ الرٹ ءَ پد مردم تر ءُ گرد ءَ دارگ بوتگ وھدیکہ شھر ءِ انٹرنیٹ سروس ھم ھر سھت ءُ دمان بند ءُ پچ کنگ بیت ۔

مردمانی گوشگ انت کہ انسکمب دگ ءَ انگت ءَ یک نیمگ ءَ کنگ ءَ سیول نادراھجاہ ءَ ایمبولنس ءُ اشتاپی نادراھانی ھما دمان ءَ سر نہ بوگ ءِ جیڑہ ءُ جنجال گیش بوتگ انت ۔

ھمے دگ ءِ سرا برجاھیں کوئٹہ کچہری، سیشن کورٹ، کمشنر کارگس ءُ ڈپٹی کمشنر ءِ کارگس ءَ رؤک ، وکیل، سرکاری کاردار ءُ لس مھلوک ھم جنجالانی دیمپان انت ۔

مردماں اھوالکاراں گوں تران کنان ءَگوشتگ کہ سروزیر ءِ کارگس ءِ کش ءِ دگ ءُ ماڈل ٹاؤن ءَ بند کنگ ءِ سوب ءَ ٹریفک نزام سرجمی درگان درگان انت ۔

آیاں چہ آمیدگس ءَلوٹ کتگ کہ آ مردمانی بنکی ھکانی بگیرداروکانی بگیری ءَ گامگیج بہ زور ایت سانمندیں دگاں پچ کنگ ءِ ھکم بہ دنت ۔

اشی ءَ ابید بلوچستان ءُ دگہ دمگاں ھاسکر کراچی ، لاھور ءُ پشاور میان ءِ ریل گاڑی ءَ بازیں ماھے بیت کہ بند انت۔ مساپر بسانی سرا بندش ءِ سوب ءَ مساپر سک باز جیڑہ ءُ جنجالانی دیمپان انت ۔

جاپر ایکسپریس کہ گوست ءَ باز رند ءَ بلوچ آجوئی لوٹوکیں سلاہ بندیں گلانی نشانگ بوتگ بازیں ماھے بیت کہ بند انت ھمے وڈ بولان ایکسپریس ھم کراچی تاں شال ءِ سربوگ ءَ بے سوب بوتگ

گوستگیں ھپتگ ءَ بلوچستان سرکار ءَ شال تاں کراچی ءُ دگہ دمگاں رؤکیں مساپر کوچانی سرا بندش جتگ بوتگ ۔ سرکار ءِ گوشگ بوتگ کہ سینزدہ نومبر ءَ ارش ءِ ترس بوتگ بلے پدا ھم مھلوک ءِ زوریں گوشگ ءِ پدا سرکار وتی پیسلہ واپس زرتگ بلے پدا ھم کوچانی روگ ءِ وھد بدل کنگ بوتگ انت ۔

مردمانی گوشگ انت کہ ارش ءِ ترس ءَ سرجمیں بلوچستان بند کنگ بوتگ ۔ مردم چہ وتی گس ءُ بازار ءَ شت نہ کن انت شال ءَ ھوار دگہ مزنیں شھراں انٹرنیٹ ءُ دامگ بند ءُ پچ کنگ بوتگ انت ۔

دومی نیمگ ءَ بلوچستان ءِ سروزیر ءَ رسانکدرے ءَ وتی گلگدار ءَ گوشتگ کہ بلوچستان ءِ تہ ءَ انٹرنیٹ ریاست بگیرداری ءِ کاراں پہ کارمرز بوگ ءَ انت ءُ ناشرکارِیں ارش ءُ پرپیگنڈہ ءَ ھم چہ ھمیشاں کمک زورگ بوٗگ ءَ انت ۔

آئی ءَ ٹاہ داتگ کہ انٹرنیٹ ءِ بندی ءُ دگہ پھازگی گامگیجانی سوب ءَ ارشانی تہ ءَ کمی اتکگ ۔

بلے پدا ھم لس مھلوک ءُ سیاسی تکاں سیادی داروکاں سر وزیر ءِ اے گپ نہ من اتگ ءُ گوشتگ کہ جیڑہ پہ چیر دیگ ءَ ناں گیشگیواری ءَ جاور شرتر بوت کن انت وھدیکہ سرکار سھولت ءِ دیگ ءِ بدل ءَ مردماں گیشتر دلسیاہ کنگ ءَ انت ۔

مردماں گوشتگ کہ سوبائی سرکار پھازگی بے سوبیاں پد درکانودی گامگیجانی سوب ءَ مھلوکانی جیڑھاں گیشتر کنگ ءَ انت ۔

بلوچ اسٹوڈنٹس ایکشن کمیٹی اسلام آباد ءِ نیمگ ءِ ھمک سالی لبزانکی ءُ زانشتی مراگش ءِ برجم دارگ بوتگ ، اے چارمی سال ءِ مراگش بوتگ کہ نمیرانیں نواب ھیر بکش مری ءِ پگرءُ پلسپہ”ءِ نامءَ برجم دارگ بوتگ ۔

چارُمی سال ءِ لبزانکیءُ زانشتی مراگش بنام ءِ بابا ھیر بکش مری ءِ پگر ءُ پلسپہ” 8 نومبر 2025 ءَ سوبمندی ءَ گوں برجم دارگ بوتگ ، اے مراگش ءَ بابا ھیر بکش مری ءِ تمردیں کِرد ءُ مزن پگری، دمگی سیاست ءِ ھستیں سُر ءُ پُرانی ھمرائی ءَ میاں اُستمانی سیاست ءِ مدار ءِ تہ ءَ بوتگیں مٹّی ءُ بدلیاناں المی ءُ سیاسی بُنیاداں بالگیں رنگے ءَ دیم ءَ آرتگ انت ۔

یک روچی ئیں اے مراگش ءَ پینل ڈسکشن ، باوست، نبشتگیں تاک، ڈاکیومنٹری، تران، پریزنٹیشن، تھیٹر پلے، ریسرچ پیپر، پروجیکٹ اسٹال ءُ کتاب اسٹال ءَ ھوار دود ءُ ربیدگی اسٹال ھوار بوتگ اَنت۔

بی ایس سی ءِ چارُمی سالی مراگش ءَ نودربراں بلائیں کچےءَ بھرزُرتگ ءُ مراگش سوبین کُتگ ۔

بلوچستان ءِ دمگ نصیر آباد ءُ روجان ءَ سلاہ بندیں مردماں پورسز ءُ گیس پائپ لائن نشانگ کتگ انت- چریشی ءَ گیس پائپ لائن ءُ پورسز ءَ تاوانانی دیمپانی کنگ کپتگ انت-

دومی نیمگ ءَ بلوچ ریپبلکن گارڈ ءِ جارکش دوستین بلوچ ءَ اُرشانی زمہ واری من اتگ انت-

دوستین بلوچ ءَ گوشتگ گوستگیں شپ ءَ مئے سرمچاراں نصیر آباد ءِ دمگ نوتال ءِ نزیک ءَ زورگریں پوج ءُ لشکری کمپنی ءِ سر ءَ کسان ءُ مزنیں سلاھانی گون ءَ اُرش کتگ –

آئی ءَ گوشتگ چرے اُرش ءَ پوج ءَ جانی تاوانانی دیمپنی کنگ کپتگ-

جارکش دوستین بلوچ ءَ گوشتگ دگہ یک اُرشے روجان ءِ ھند میر ھزار ءِ نزیک ءَ ڈیرہ بگٹی ءِ دمگ چہ سوئی ءَ پنجاپ ءَ روکیں سِی ءُ شش انچی گیس پائپ لائن تراکناکیں مواداں گون نشانگ کتگ-

آئی ءَ گوشتگ گیس پائپ لائن گوں تراکناکیں شورواں تراکینتگ ءُ چریشی ءَ چہ گیس ءَ تاوان رس اتگ-

دوستین بلوچ ءَ گوشتگ اے دوئیں اُرشانی زمہ واریاں مئے گل من ات ءُ داں بلوچستان ءِ آجوئی ءَ اُرش برجاہ مان انت-

زانگ بہ بیت بلوچستان ءِ سرکار ءَ سرجمیں بلوچستان ءَ پھزداری ءِ ترس ءَ دامگی اھوال بند کتگ انت بلے ایشی ءَ ابید ھم اود ءَ سلاہ بندیں گلانی پرکاری برجاہ بوگ ءَ گندگ آیگ ءَ انت-

بلوچستان ءَ پولیس ءِ سلاھانی برگ، چاریگانی کوش ءُ ریل سر ءَ بیتگیں اُرشانی زمہ واری بی ایل ایف ءُ بی آر جی ءَ منّ اِتگ اَنت-

بلوچستان لبریش پرنٹ ءَ وتی شنگ کرتگیں درشان ءِ تہ ءَ گوشتگ کہ بی ایل ایف ءِ سرمچاراں 13 نومبر ءِ نیمروچ ءِ ادار دو ءَ کچھی ءِ ھند ھاجی شھر ءَ برجاھیں پولیس تھانہ انیگر کرتگ ءُ کارندہ دزگیر کرتگ اَنت ءُ تھانہ ءَ ھستیں سرجمیں سرکاری سلاہ ءُ سامان دستیگ کرتگ اَنت ءُ تھانہ مانداشتگ۔

جارکش ءَ گوشتگ کہ بی ایل ایف ءِ سرمچاراں چہ گل ءِ انٹیلجنس ونگ ءِ ھال دیگ ءِ بنیاد ءَ کاروائی کرتگ ءُ ھپت نومبر ءَ ایم آئی ءِ کارندہ سناء اللہ ء شفی محمد جھمنند کڈی کلات دزگیر کرتگ۔ باز روچ ءِ جست ءُ پرس ءَ آئی من اتگ آ تچکی ءَ چہ پوج ءِ پرمان ءَ بے میاریں بلوچانی کوش ءَ ھوار بیتگ کہ ایشی جاہ ءَ آئی ءَ لکانی کچ ءَ زر دیگ بیتگ۔ گل ءِ کر ءَ آئی سرجمیں منانک ایر اَنت ءُ زوت رسانکدر ءَ شنگ کنگ بنت۔

جارکش ءَ گوشتگ کہ دگہ یک کاروائی یے ءَ بیست شش ستمبر ءَ بی ایل ایف ءِ سرمچاراں سمی اللہ نیچاری ء مھمد جھمنند محمد تاواہ کلات دزگیر کرتگ۔ جست ءُ پرس ءِ میان ءَ آئی وتی میارباری بلوچ زرمبشت ءِ بگیری ءَ ُپرکاری ءُ پہ پاکستانی پوج ءَ لس بلوچ ءُ آجوئی زرمبشت ءِ ھلاپ ءَ کار من اتگ اَنت۔

جارکش ءَ گوشتگ کہ سرمچاراں دوئیں ریاستی چاریگانی ھلاپ ءَ دزکپتگیں منانک ءُ منگ ءَ پد ھپت نومبر ءَ کلات ءَ نشانگ کرتگ اَنت۔

ھمے وڑ بلوچ ریپبلکن گارڈز ءِ جارکش دوستین بلوچ ءَ وتی شنگ کرتگیں درشان ءِ تہ ءَ گوشتگ کہ بی آر جی ءِ سرمچاراں مرچی نصیر آباد، ربی ءَ جعفر ایکسپریس گوں چیر کرتگیں شورھاں نشانگ کرتگ۔ تراک ءِ آسر ءَ باز کارندہ مرتگ ءُ ٹپی بیتگ اَنت ءُ ریل ءَ باز تاوان رس اِتگ۔

گُڈی ءَ دوئیں گلاں اُرشانی زمہ واری منّ اِتگ ءُ گوشتگ کہ مئے اُرش داں بلوچستان ءِ وتواجھی ءَ برجاہ بنت-