TBP Balochi

بلوچستان ءِ جان سلامتی ءِ محکمہ ءَ بولان میڈیکل کالج ءَ نودربرانی ترسینگ ءُ آیانی گون ءَ نا انساپیانی پٹ ءُ پول کنگ ءِ کڈنی کتگ-

بلوچستان ءِ جان سلامتی ءِ محکمہ ءَ بولان میڈیکل کالج شال ءَ فیکلٹی ءِ باسک ءِ نیمگ ءَ نودربر ءِ سر ءَ زوراکی وئیل ءِ نوٹس زرتگ ءُ زوت پلگاریں پٹ ءُ پول ءِ ھکم داتگ-

اے درگت ءَ محکمہ ءِ نیمگ ءَ 13نومبر 2025 ءَ پرنسپل بولان میڈیکل کالج ءَ را سرکاری نمدی دیم داتگ ۔

محکمہ جان سلامتی ءِ نیمگ ءَ چہ شنگ بوتگیں نمدی ءِ تہ ءَ گشگ بوتگ کہ سوشل میڈیا ءَ شنگ بوتگیں ھالانی رد ءَ یک فیکلٹی ءِ سر ءَ نودربرے ءَ را آزار دیگ ءِ بھتام جتگ۔ اے وئیل ءِ بابت ءَ بنداتی زانتکاری ءِ کاپی ھم نمدی ءِ ھمراھی ءَ ھوار کنگ بوتگ۔

محکمہ جان سلامتی ءَ بولان میڈیکل کالج ءِ پرنسپل ءَ را کڈنی کتگ کہ آ اے وئیل ءِ سرجمیں، تچک ءُ پلگاریں پٹ ءُ لوٹ ءَ بہ کنت ءُ پٹ ءُ پولی رپورٹ ءَ گوں گچینی رنگے ءَ سئے روچ ءِ تہ ءَ محکمہ جان سلامتی ءَ روان بہ دنت دانکہ گیشیں گامگیج زورگ بہ بیت۔

نمدی ءِ تہ ءَ گیش اے گپ پدر کنگ بوتگ کہ اے جیڑھ سکیں سنگینے جیڑھے پمیشکا ایشی ءَ گوں زوت ءُ اژدری بنیاد ءَ کار کنگ بہ بیت۔

زانگ بہ بیت گوستگیں روچ ءَ بولان میڈیکل کالج ءِ نودربراں انتزامیہءِ نیمگ ءَ زوراکیانی ویل ءُ ادارہ ءَ آسراتی نہ بوھگ ءِ ھلاپ ءَ زھرشانی ءِ جار جتگ اَت۔

اے درگت ءَ نودربراں لوٹ کتگ کہ آھاں یک ایمنیں وانگ ءُ ھاسٹل ءِ چاگرد ءِ پجارینگ بہ بیت، ویوا پیٹرن ءَ بہ بیت ءُ ھما مردم کہ نا مناسبیں رھبند ءَ پیش دار اَنت آھاں کانون ءِ تکا سزا دیگ بہ بیت۔

میکسیکو ءِ شھر ءَ سروک ءِ جرمانی ھلاپ ءَ بازیں کچے ءَ زھرشانی سَد ءَ گیش مردم ٹپی ءُ بیست دزگیر کنگ بیتگ انت-

فرانسیسی ھال سر کنوکیں ادارہ اے ایف پی ءِ رد ءَ شمبے ءِ روچ ءَ ھزاراں مردماں بنجاھی شھر ءِ گوستانکی چوک زرکالو ءَ روانک کش اتگ-

اے زھرشانی ءِ سروکی ورنایاں کتگ کہ سرجمیں دنیا ءَ جنریشن زی ءِ زھرشانی زرمبشتاں سانمند بیتگ انت-

زھرشانی ءَ ’سومبریرو موومنٹ‘ ءِ پلامرزی کنوک ھم ھوار بوتگ انت۔ اے جنبش چہ یک شھردارے کوش ءَ پد پیداک بوتگ کہ آئی ءَ وتی شھر ءَ مھکمیں رنگے ءَ توار چِست کتگ ءُ گھگیری کتگ-

اے ایف پی ءِ رد ءَ جتا جتائیں اُمرانی مھلوک سروک ءِ ماڑی ءِ دیم ءَ زھرشانی ءَ ھوار بیتگ انت- اود ءَ سروک کلاؤڈیا شینباوم نندوک بیتگ ءُ اود ءَ کار ءَ بیتگ-

لھتے زھرشانی کنوکاں پہ سروک ءِ ماڑی ءِ رکینگ ءَ ایر کنگ بوتگیں دھاتی بندش ٹُکّر ٹُکّر کتگ اَنت ءُ پولیس ءِ سر ءَ سنگ جنگی کتگ۔ اے ایف پی ءِ اھوالکاراں ھال داتگ کہ پولیس ءَ زھرشانی کنوکاں شنگ ءُ تالان کنگ ءِ ھاتر ءَ آنسو گیس ءِ کارمرد کنگ ءَ پسو داتگ۔

میکسیکو شھر ءِ سیکورٹی سروک پابلو واسکز ءَ اھوالکاراں گوں تران کنان ءَ گْوشتگ: زھرشانی بازیں کلاکاں امن ءُ ایمنی ءَ برجاہ بوتگ بلے پد ءَ یک گلے ءَ زوراکی ءِ کار بندات کتگ۔

آئی ءَ گْوشتگ کہ 20 زھرشانی کنوک ءُ 100 پولیس ءِ کارندہ ٹپیگ بوتگ اَنت ءُ 40 کارندہ ٹپیگ بوھگ ءِ سبب ءَ نادراھجاہ ءَ سر کنگ بوتگ اَنت۔

بلوچستان ءِ دو جتاجتائیں دمگ پنجگور ءُ کیچ ءَ پاکستانی لشکر ءِ دست ءَ چار مردم آوار جنگ ءُ بیگواہ کنگ بیتگ اَنت-

بیگواہ کنگ بیتگیں مردمانی پجّار ھاجی منیر احمد ء محمد بخش، ماجد ء قدیر احمد، عباس ء بھار ءُ مھران ء ھاجی اکبر نام ءَ چہ بیتگ اَنت-

کھول ءِ رِد ءَ ھاجی منیر احمد کار ءُ بار مردمے آ مروچی پنجگور ءِ دمگ چہ چتکان ءَ پاکستانی پوج ءَ آوار جتگ- دومی نیمگ ءَ ماجد پنجگور ءِ دمگ چہ عیسی ءَ آوار جنگ ءِ ھال اِنت-

ھمے وڑ دگہ دو مردم، عباس ءُ مھران پانزدہ نومبر ءَ کیچ ءِ دمگ چہ بلیدہ میناز ءَ پاکستانی لشکر ءَ آوار جتگ ءُ بیگواہ کتگ- دمگی اِھوالکار ءِ رِد ءَ آوار جنگ ءَ پد آئی ءِ ھچ وڑیں ھال سر نہ بیتگ-

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت تھی ءُ میان استمانی ادارہ ھر وھد ءَ لوٹ ءِ کتگ کہ زورانسری آوار جنی وئیلانی پٹ ءُ پول کنگ بہ بیت بیگواھیں مردمانی یل کنائینگ ءِ ھاتر ءَ گامگیج بزور اِیت-

دومی نیمگ ءَ چہ سبی ءُ شال ءَ ھم پوج ءَ کاروائی کتگ، لشکر کشی ءُ لوگاں بیڑبرگ ءِ ھال سر بیتگ، بلے اے دمگاں تنی وھدے دزگیری یا جانی تاوان ھال سر نہ بیتگ-

بولان میڈیکل کالج ءِ نودربراں کالج ءِ تہ ءَ بنکی آسراتی، چکاس ءِ رھبند ءُ آزار دیگ ءِ ھلاپ ءَ پرایمنیں زھرشانی ءِ جار جتگ-

نودربرانی گوشگ انت کہ کالج ءَ ھاسٹل ءِ نا شریں آسراتی، بے انساپیں ویوا پیٹرن ءُ استادانی زاتی مپادانی بنیاد ءَ کارروائیانی سبب ءَ آ مدام مازگی جیڑھانی آماچ انت۔

نودربرانی گشگ ءِ رد ءَ اے جیڑہ چہ بازیں سالاں ھست اَنت بلے انتزامیہ ءِ بے دلگوشی ءُ بے وسی ءِ سبب ءَ باز براں ھاموشی برجاہ بوتگ۔ اے سال ءَ پیتھالوجی ڈیپارٹمنٹ ءِ اسکینڈل ءَ نودربراں سکیں بے تاھیری یے پیداک کتگ، البت آھانی گشگ ءِ رد ءَ اے ایوک ءَ یکیں ویل نہ اِنت بلکیں کالج ءِ تہ ءَ برجاھیں زور ءُ ناانساپی برجاہ اَنت۔

آھاں گوشتگ کہ ناانساپیں ویوا پیٹرن ءِ باوجود سپلائی ءِ ماملھانی تہ ءَ وت مانی ءُ انٹرنلز ءِ تہ ءَ مزنیں نمبر ءِ باوجود استادانی نیمگ ءَ چہ زور ءُ دھمکی ءِ رد ءَ دود ءُ ربیدگ جوڑ بوتگ۔

پد ءَ کالج ءِ تہ ءَ گچ وڑیں فنکشن، اسپورٹس یا دگہ کارانی اجازت نہ دیگ ءِ سبب ءَ نودربرانی چاگردی ءُ اِلمی دیمروئی ھم سانمند بوگ ءَ انت۔

نودربراں جار جتگ کہ دوشمبے ءِ روچ ءَ کالج ءَ پرامن زھرشانی کنگ بیت کہ ایشی ءِ تہ ءَ آ وتی جائزیں لوٹاں انتزامیہ ءِ دیم ءَ پیش کن اَنت۔

نودربرانی لوٹانی تہ ءَ مھکمیں وانگ ءُ ھاسٹل ءِ چاگرد ءِ آرگ، ویوا پیٹرن ءِ تہ ءَ استلاھات ءُ ھما مردمانی ھک ءُ انساپ ھوار اِنت کہ آ نا مناسبیں رنگ ءَ دروشم کن اَنت۔

نودربراں اے گپ ءِ سر ءَ زور داتگ کہ اے زھرشانی سرجم ءَ پرامن بیت ءُ ھچ وڑیں زوراکی ءِ اجازت دیگ نہ بیت۔ ایشانی یکیں مول ءُ مراد ایش انت کہ بولان میڈیکل کالج ءَ پہ وت ءُ آیوکیں نودربراں شرتریں، ایمن ءُ کمکی وانگ ءُ زانگ ءِ ادارہ جوڑ بہ کن انت۔

سربوتگیں ھالانی رد ءَ بلوچستان ءِ دمگ گوادر ، کیچ ءُ پنجگور ءَ چار جاھاں پاکستانی پوج ءِ سر ءَ اُرش کنگ بوتگ انت ءُ پاکستانی پوج ءَ جانی ءُ مالی تاوانانی دیمپانی کنگ کپتگ ۔

گیشیں ھالانی رد ءَ گوستگیں شپ ءَ سلاہ بندیں مردماں پنجگور ءِ دمگ رکشان ءَ پاکستانی پوج ءِ پانگس ءِ سر ءَ اُرش کتگ ، ھمے وڑ سینزدہ نومبر ءَ پنجگور ءِ دمگ راھی نگور ءَ ھم پاکستانی پوج ءِ پانگسے ءِ سر ءَ اُرش کنگ بوتگ ۔

ھالانی رد ءَ سلاہ بندیں مردماں دھ نومبر ءَ گوادر ءِ دمگ پسنی شادی کئور ءَ ھم پاکستانی پوج ءِ بنجاھی بنجل ءِ سر ءَ اُرش کتگ ۔ سلاہ بندیں مردماں یک دگہ اُرشے کیچ ءِ دمگ سامی ءَ پاکستانی پوج ءِ پانگسے ءِ سر ءَ کتگ ۔ ھر چاریں اُرشاں پاکستانی پوج ءَ جانی ءُ مالی تاوانانی دیمپانی کنگ کپتگ ۔

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ اے چاریں اُرشانی زمہ واری من اتگ ءُ گوشتگ کہ مئے سرمچاراں پنجگور ، گوادر ءُ کیچ ءَ پاکستانی پوج ءِ سر ءَ اُرش کتگ ءُ تاوان داتگ ۔

جارکش ءَ گوشتگ کہ مئے سرمچاراں گوستگیں شپ ءَ پنجگور ءَ رکشان پھل ءَ برجاھیں زورگریں پاکستانی پوج ءِ پانگسے ءِ سرا بازیں راکٹ لانچر ءِ گولہ ءِ آس داتگ ءُ وتکاریں سلاھاں گوں اُرش کتگ ۔ اے اُرش ءَ زورگرِیں پوج ءِ کم چہ کم دو کارمند مرتگ ءُ دو زدگ بوتگ انت ۔

جارکش ءَ گوشتگ کہ بی ایل اے ءِ سرمچاراں 13 نومبر ءَ پنجگور دمگ راھی نگور ءَ زورگریں پاکستانی پوج ءِ پانگسے ءِ سر ءَ اُرش کتگ ءُ پوج تاوان داتگ ۔

جارکش ءَ گوشتگ کہ سرمچارانی یک دگہ ٹولی ءَ زورگریں پوج ءِ نیمگ ءَ کل کتگیں چاریگی کیمرہ ھم نشانگ کتگ ءُ تباہ کتگ انت ۔

جیئند بلوچ ءَ گوشتگ کہ سرمچاراں دہ نومبر ءَ گوادر ءِ دمگ پسنی شادی کئور ءَ ھم پاکستانی پوج ءِ بنجاھی بنجل ءِ سر ءَ اُرش کتگ ءُ پوج تاوان بار کتگ ۔

جارکش جیئند بلوچ ءَ گوشتگ کہ سرمچاراں یک دگہ اُرشے ھپت نومبر ءَ کیچ ءِ دمگ سامی کلگ ءَ زورگریں پاکستانی پوج ءِ پانگسے ءِ سر ءَ کتگ اے اُرش ءَ ھم پاکستانی پوج تاوان بار کتگ ۔

بلوچستان ءِ جتا جتائیں جاھاں پوج ءُ گیس پائپ لائن ءِ سر ءَ ناشناسیں سلاہ بنداں اُرش کتگ انت، گیس پائپ لائن تراک ءَ تباہ بوتگ-

بلوچستان ءِ دمگ پنجگور ءَ پاکستانی پورسز ءِ بنجل ءِ سر ءَ سلاہ بندیں مردماں اُرش کتگ

پورسز ءِ بنجل ءِ سر ءَ اُرش گوستگیں شپ ءَ پنجگور ءِ دمگ رخشان پھل ءِ ھند ءَ ھستیں بنجل کنگ بوتگ کہ اود ءَ اُرش کنوکاں بازیں راکٹ ءُ دگہ سلاھاں گوں تیر گواری کتگ۔

اُرش ءَ پد مرچی سھب ءَ دمگ ءَ ھیلی کاپٹر ھم بال کنگ ءَ گندگ بوتگ اَنت۔

واکداراں اے اُرش ءِ سبب ءَ بوتگیں تاوانانی بارو ءَ ھچ وڑیں ھال ءُ اھوال نہ داتگ ءُ انگت ءَ ھچ گل ءَ اے اُرش ءِ زمہ واری نہ زرتگ بلے اے دمگ ءَ بلوچ سلاہ بندیں آجوئی ءِ گل پرکار اَنت۔

ھمے وڑ ءَ چہ شال ءَ شکارپور ءَ روکیں ھژدہ انچ گیس پائپ لائن مچ ءِ نزیک ءَ تباہ کنگ بیتگ-

گیس پائپ لائن ءِ تباھی ءَ پد گیس ءِ سپلائی مھتل بیتگ ءُ سوئی سدرن گیس کمپنی ءِ رد ءَ پائپ لائن ءِ جوڑینگ ءَ داں گیس مھتل بیت انت-

ایس ایس جی سی ءِ رد ءَ سیکورٹی کلیئرنس ءِ رسگ ءَ پد گیس پائپ لائن ءِ جوڑینگ ءِ کار بندات کنگ بیت انت-

بلوچستان ءِ جتا جتائیں دمگ کیچ، مستونگ ءَ پاکستانی پوج ءَ دو براتاں ھوار براھوئی زبان ءِ شائرے آوار جنگ ءَ پد بیگواہ کتگ ءُ رھگوزی مردمانی سر ءَ تیرگواری کتگ ءُ چریشی ءَ یک مردمے بیران ءُ یکے ٹپی بیتگ-

گیشیں ھالانی رِد ءَ سیزدہ نومبر ءِ شپ ءَ پاکستانی پوج ءَ کیچ ءِ تھسیل بلیدہ میناز ءَ یک لوگے ءِ سر ءَ بیڑبرتگ دو برات آوار جتگ ءُ بیگواہ کتگ اَنت-

زورانسری بیگواہ کنگ بیتگیں مردمانی پجّار زھیر ء رھیم جان، وسیم ء رھیم جان ءِ ناماں بیتگ اَنت-

کھول ءِ رِد ءَ دوئیں برات وتی کھول ءِ زمینانی سر ءَ کار ءَ بیتگ اَنت کہ ھچ وڑیں سیاسی پارٹی یاکہ گل ءَ چہ ھمگرنچ نہ بیتگ انت – آیاں وتی مردمانی یل کنگ ءِ لوٹ کتگ-

اشی ءَ اِبید ھپت نومبر ءَ پاکستانی پوج ءَ براھوئی زبان ءِ شائر عطا انجم چہ مستونگ ءَ آئی ءِ لوگ ءَ آوار جنگ ءَ پد ناشناسیں جاھے ءَ برتگ-

وائس فار بلوچ مسنگ پرسنز ءَ آئی ءِ زورانسری آوار جنی ایر جنان ءَ گْوشتگ کہ ڈیھی کانود ءَ شھریانی ھکانی ھلاپ ورزی کتگ، ھکومت ءَ چہ دزبندی کتگ کہ آ براھوئی زبان ءِ شائر درکانودی دزگیری ءَ گامگیج بزور اِیت، آئی ءِ پہ سلامتی یل کنائینگ ءَ دلجمی دیگ ءَ وتی کرد ءَ پیلو بکنت-

تربت ءَ سینٹرل جیل تربت ءِ وارڈن چنگیز امام ء محمد امام گوستگیں سے روچ ءَ چہ بیگواہ ءَ اِنت – کھول رِد ءَ یازدہ نومبر ءِ کساس نیمروچ ءِ یک ءَ آ وتی لوگ بَگ تربت ءَ چہ موٹر سائیکل ءِ سر ءَ ڈیوٹی ءِ واستا سینٹرل جیل ءَ روگ ءَ بیتگ بلے آ جیل ءَ سر نہ بیتگ-

کھول ءِ گوشگ اِنت کہ چنگیز امام موٹر سائیکل ھم دز نہ کپتگ ءُ چہ تربت بازار ءَ ھال بند بیتگ چریشی ءَ پد آ گار اِنت-

کھول ءَ شھریاں چہ دزبندی کتگ کہ آ کسے ءِ کر ءَ وارڈن چنگیز امام ءِ درگت ءَ سرپدی ھست گڑا آ نزیکیں پولیس ءَ تھانہ یا ھمگرنچیں ادارہ ءَ ھال بدنت دانکہ آ یل کنگ بہ بیت-

ھمے وڑ تربت ءَ پاکستانی پوج ءِ تیرگواری ءَ چہ یک مردمے بیران، یکے ٹپی بیتگ-

کیچ ءِ بُنجاھی شھر تربت سی پیک روٹ ایم 8 بلیدہ کراس ءَ پاکستانی پوج ءِ تیرگواری ءَ چہ یک مردمے بیران، یکے ٹپی بیتگ-

چمّگدانی رِد ءَ ایف سی کارندھاں موٹر سائیکل سوار دیستگ اَنت تیرگواری بندات کتگ-

تیرگواری ءِ آسر ءَ عبیداللہ ء بشام جھمنند ھوشاپ جاہ پہ جاھی بیران بیتگ وھدے کہ آئی ءِ ھمرہ جنید ء غفور جھمنند ھوشاپ ٹپی بیتگ- لاش ءُ ٹپی گیشیں چار ءُ تپاس ءَ پد نادُراھجاہ ءَ برگ بیتگ اَنت-

پاکستانی سرکار ءِ گوشگ اِنت کہ آئی ءَ اسلام آباد ءِ سیکٹر جی الیون ءَ تراک ءِ تہ ءَ گمانی ھواریں ٹی ٹی پی ءِ چار باسک دزگیر کتگ اَنت۔

پاکستان سرکار ءِ ایکس اکاؤنٹ ءَ شنگ بیتگیں درشان ءِ رد ءَ انٹیلیجنس بیورو ڈویژن ءُ سی ٹی ڈی ءِ ھواریں کاروائی ءِ آسر ءَ جوڈیشل کمپلیکس جی 11 اسلام آباد ءِ سر ءَ اُرش ءَ ھواریں ٹی ٹی پی ءِ ناشرکاری ءِ سیل ءَ چار کارندہ دزگیر کتگ انت-

زانگ بہ بیت کہ ھمے گوزوکیں ھپتگ ءِ سئے شمبے ءِ روچ ءَ اسلام آباد ءَ جی ون ءِ آمیدگس ءِ دپ ءَ وت کُشیں اُرشے ءَ 12مردم بیران بوتگ انت ۔

بیان ءِ رد ءَ جست ءُ پرس ءِ وھد ءَ وت کُش اُرش کنوک ءِ ھنڈلر ساجد اللہ عرف شینا ءَ من اِتگ کہ ٹی ٹی پی ءِ کمانڈر سعید الرحمن عرف داداللہ ءَ ٹیلی گرام ءِ بنشون ءَ گوں آئی ءَ رھوت کتگ ءُ چہ آئی ءَ لوٹ کتگ کہ آ اسلام آباد ءَ وت کُشیں اُرشے بہ کنت دانکہ کانون سازگار کنوکیں ادارگاں تاوان بہ رس ایت۔

بیان ءِ رد ءَ داد اللہ عرف ’شینا‘ ءَ وت کُش اُرش کنوک عثمان عرف ’قاری‘ ءِ اکس راہ داتگ کہ پاکستان ءَ دست بہ گپت-

بیان ءِ تہ ءَ اے ھم گْوشگ بیتگ کہ وت کُشیں اُرشکار عثمان عرف ’قاری‘ ءِ سیادی چہ شینواری ٹک ءَ اِنت ءُ اوگانستان ءِ شھر اچین، ناگرھار ءِ نندوک اِنت۔

بیان ءِ رد ءَ وھدے وت کُشیں اُرشکار اوگانستان ءَ چہ پاکستان ءَ سر بوتگ گڑا ساجد اللہ عرف ’شینا‘ ءَ آئی ءَ را اسلام آباد ءِ نزیک ءَ یک دمگے ءَ داشتگ۔

‘اوگانستان ءَ ٹی ٹی پی ءِ کمانڈر داد اللہ ءِ ہدایت ءِ سرا ساجد اللہ عرف ‘شینا’ ءَ پشاور ءِ اکھن بابا قبرستان ءَ چہ وت کُشیں جیکٹے زرتگ ءُ اسلام آباد ءَ برتگ۔ تراک ءِ روچ ءَ ساجد اللہ ءَ وت کُشیں جیکٹ وت کُشیں بمب تراک کنوکیں عثمان عرف ’قاری‘ ءِ سر ءَ ایر کتگ۔‘‘

پاکستانی سرکار ءِ رد ءَ اوگانستان ءَ ٹی ٹی پی ءِ مزنیں سروکی ھر گام ءَ نیٹ ورک ءِ رھشونی ءَ کنگ ءَ اَت۔

‘اے ویل ءِ تہ ءَ ھواریں سرجمیں سیل دستیگ کنگ بوتگ۔ آپریشنل کمانڈر گوں وتی سئے ناشرکاریں ھمراھاں دزگیر کنگ بیتگ۔ پٹ ءُ پول برجاہ اِنت ءُ گیشتریں پدر کتگ ءُ دزگیر کنگ ءِ گمان اِنت۔

مادریں ھنکین

نبشتہ کار: مُھسن دیدگ ساجدی

دی بلوچستان پوسٹ

مرچی من اگاں دُور ءُ درا بہ باں گُڑا من ءَ دُرستاں چہ پیسر مادریں ھنکیں سک یاد کیت پرچا کہ من وتی کسانی ھمود ءَ گوں شوکیں وڑے ءَ گوازینتگ کہ آ جاہ کدی پراموش کنگ نہ بیت وتن دیوانگیں بچاں وتی جان داتگ پہ مادریں ھنکیں ءَ اے ھما ھنکیں اِنت کہ منی دل ءَ ھچ بر یل کنگ ءَ نہ گُشتگ بلے ھنچیں نہ گیگیں جاور کیت کہ مادریں ھنکیں ءَ یل کناں رواں داں زندگاں پد ءَ جیڑاں پرچا وتی ھنکیں یل داتگ بلے راستیں ھبر ھمیش اِنت من تُرس ءِ آماچ بوتگاں وتی کسانی ءِ لیب جاھ یل کتگ اَنت ۔

منی مادریں ھنکیں ھما زیبا ءُ جلوناکیں دیار اِنت کہ آئی ءِ زید ءُ کھچرانی ندارگ ءَ ھچبر دَم نہ بر ئے دوست ءُ سنگتانی دیوان کماش کوھنیں کسھاں گُش اَنت ھانی ءُ شے مرید ءِ داستان ھمل ء جیند ءِ کسہ گُڑا آ دیار ھچبر بے ھیال کنگ نہ بیت دیدگیں گریشگ ھما ڈولداریں زمین اِنت من ءَ چہ ساہ ءُ دیدگاں دوستر بیت سک زھیر کنت بلے سکیں وانگ ءُ زانگ لوٹ اِیت ھمے ھاتر ءَ یل کتگ وتی ھنکین باگ ءُ بادگیر، درچکانی وشیں چنال، انگورانی بَر کاہ، ءُ کھچرانی زیبداری، شوانگانی شیر چا، شیر ءُ شیلانچ ءِ ورگ، پنیر باد ءُ ھینزک گوں بستگیں شیراں، وتی مٹ وت اَنت کوری ماھیگ، تاپگی نان، بیگاھاں گوں سنگتاں نندگ ءُ گپ ءُ تران وشیں دیوان کماشانی لیکو گوں وشیں توار ءَ گُوشدارگ برائیت ۔

پد ءَ نندگ وانگ ءِ سر ءَ جست ءُ پسہ پد ءَ استاد منھاج مکتار ءِ ءُ میر اھمد ءِ ءُ نامدرایں استاد نور ھان بزنجو ءِ ءُ آرپ بلوچ ءِ سوتانی گوشدارگ، پد ءَ مگرب ءِ وھد ءَ پسانی گِر ءُ چیر ءَ وتن وتی مَٹ وت اِنت بلوچستان ھما زیبائیں دیار اِنت آ زمین ءِ سر ءَ بلوچ نشتگ اَنت ھُزدار ءِ شوکیں بازار، نال ءِ ڈولداریں شھر ءُ میتگ، آروسانی سر ءَ ڈُھل ءُ بلوچی چاپ، زگر ءُ نماز، ھر چیزانی وتی زیبائی یے، منی مادریں ھنکیں ءَ۔

َکَسے وانگ ءَ روت کَسے وتی پَس ءُ گوکانی کاہ ءُ آپ ءَ روت کَسے وتی زمینانی سر ءَ دِھکانکاری ءَ کَسے وتی ھنکیں ءِ سیل ءُ سواد ءَ روت شوانگ وتی پَساں چارینگ ءَ بارت پد ءَ روان ءُ جُھان بھری بَٹائی کنگ مدام شیرکِنیں بچکندگ دپ ءَ زیب دنت  بلکیں کسے ءَ اے نام باز کم اِشکتگ( گریشگ) بلے لھتیں مردم ھمے نام ءَ (گریشہ) گُش اِیت ھمے وڑ ءَ کَس بلکیں نہ پھم اِیت ھما دیار اِنت اگاں مردم پہ سیل ءُ سواد ءَ بہ روت پد ءَ ھر وھد ءَ دل گُش اِیت یار گریشگ ءِ ندارگ بہ کرتیں پرچا کہ آ دیار ءِ مردم سک مھروان اَنت آ پہ مھر ءَ ھُدوک اَنت ھنچو کہ شُما سکی ساوڑ ءِ نبشتانک ونتگ اَنت بزاں کہ مھروانی کجا بنگیج بوتگ پد ءَ شوکیں نبشتہ کار  ھم ھست شائر ھست گُڑا کسان سالیں وزیر الم  ھما ھنکیں ءِ نوک رُستگیں چنال اِنت کہ مدام وتی بلوچی دود ءُ رَبیدَگانی رندگیری ءَ کنگ ءَ اِنت، پد ءَ مھروانیں پوٹوگراپ ھاکم تاھر ھما ڈولداریں ھنکین ءِ بچ اِنت بازیں جُھد کار ھست اَنت کہ نام نبشتہ کنگ ھم نہ بنت مادریں ھنکیں وتی مھروانیں بچانی دیار اِنت کہ ھچبر بے ھیال کنگ منی وس ءَ نہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ ھوار سرجمیں جھان ءَ نشتگیں بلوچاں مروچی 13 نومبر ءِ روچ نمیرانیں بلوچانی یات ءَ داشتگ ، اے روچ ءَ بلوچ راج وتی ھما درسیں پرزنداں دروت ندر کنت کہ آیاں راجی آجوئی ، پجار ءُ ھکانی ھاتر ءَ وتی جانانی دیمھونی داتگ ۔

زانگ بہ بیت نمیرانیں بلوچانی روچ دارگ ءِ بندات بلوچ نودربر گل بلوچ اسٹوڈنس آرگنائزیشن آزاد ءَ سال دوھزار دھ ءَ ایرکتگ کہ ھما وھدے سرکماش بشیر زیب بلوچ ءِ سروکی ءَ گل ءِ بنجاھی پتر ءَ اے شئور جنگ بوتگ کہ 13 نومبر درسیں نمیرانیں بلوچانی یات ءَ دارگ بیت ۔

اے درگت ءَ بلوچستان ءِ بازیں ھند ءُ دمگاں ھوار دری ڈیھاں ھم مراگش ، روانک ءُ مچی برجم دارگ بوتگ کہ اودا بلوچ باسک ءُ مھلوک ءَ نمیرانیں سر دروت ندر کتگ انت ۔

چاگردی ترامجاھاں ھم نمیرانیں بلوچانی نام ءُ دیمھونی یات کنگ ءُ آ دروت ندر کنگ بوتگ انت ۔

بلوچ شہدا کمیٹی ءِ چیردستی ءَ نمیرانیں سرانیں یات ءَ برجم دارگ بوتگیں مراگش ءَ تران کنان ءَ ترانکاراں گوشتگ کہ سینزدہ نومبر بلوچ راج ءِ دیمھونی ءُ یکشلیں گھگیری ءِ چیدگ جوڈ بوتگ ، کہ آوکیں پدریچ ءَ وتی پجار ، ھک ءُ آجوئی ءِ جھد ءِ بررجاہ دارگ ءِ کلوہ ءَ دنت

ترانکاراں گوشتگ کہ نمیرانیں بلوچانی منگھیں دیمھونیانی برورد انت کہ مروچی بلوچ راجی زرمبشت وتی منزل نیمگ ءَ گام جنان انت ، بلوچ ورنا ءُ زالبول مروچی وتی سرڈگار ، بلوچ ھاک ءِ پھازگ ءِ ھاتر ءَ وتی جانانی دیمھونی ءَ دیگ ءَ انت ۔ اے نمیرانیں سرانی پاکیں ھون بلوچ سرڈگار ءِ سرا زورگیراں کلوہ دنت کہ بلوچ سرڈگار ءِ سرا بید بلوچ ءِ مرزی ءَ ھچ چیز منگ نہ بیت ۔

آیاں گوشتگ کہ پاکستان یک زورگیرے دروشم ءَ بلوچستان ءِ سرا کپتگ ءُ آئی جوڈ کتگیں وتگڑیں نمائندگ مروچی بلوچستان ءِ تہ ءَ وتی پیسلہ ءِ منارینگ ءِ ھاتر ءَ پوجی تاکت ءِ سھارہ زورگ ءُ ھمے گوشگ انت دراہ شر انت بلے جھان راستی ءَ سرپد انت کہ ریاست وتی تاکت ءِ کارمرز کنگ ءَ ابید ھم بے سوب انت ۔

ترانکاراں گوشتگ کہ نمیرانیں بلوچانی پاکیں ھون ءِ نھاد یک آجو ءُ وشھالیں بلوچستان ئے ، ءُ بلوچ راج ءِ سرا پرز انت کہ آ نمیرانیں سرانی مشن منزل ءَ سرکنگ ءِ ھاتر ءَ جھد ءَ وتی بھر ءَ مان بہ کن انت

اشی ءَ ابید نمیرانیں بلوچ پسگانی یات ءَ بلوچی دیوان برجم دارگ بوتگ کہ اودا بلوچی ءُ براھوئی زبان ءِ وش الھانیں گشندہ میر اھمد بلوچ ، ساول کندیل ، میرل بلوچ ءُ سرپراز واھد ءَ وتی وشیں توار ءَ گوں بلوچی ءُ براھوئی شائری ءَ نمیرانیں پسگ دروت ندر کتگ انت ۔