TBP Balochi

بلوچستان ءِ تیابدپی دمگ پسنی ءِ نزیک ءَ شتنگی ءِ ناشناسیں سلاہ بندیں مردماں راہ بستگ ءُ پٹ ءُ پول کتگ۔

چمدیستگیں مردماں گشتگ کہ سلاہ بندیں مردماں ناکہ بندی ءِ وھد ءَ گیس ءِ ٹرک ءَ ھوار بازیں گاڑی داشتگ ءُ لھتیں گاڑیاں تاوان رس اتگ۔

چوشکہ دگہ جانی ھچ وڑیں تاوان ءِ ھال ءُ اھوال نہ بوتگ۔

دمگی مردمانی رد ءَ سلاہ بندیں مردم لھتیں وھد ءَ جاہ ءَ بوتگ اَنت ءُ پد ءَ شتگ اَنت وھدے کہ انگت ءَ کس ءَ اے وئیل ءِ زمہ واری نہ زرتگ۔

بلوچستان ءِ تیابدپی شھر گوادر ءَ پاکستانی سیکورٹی ادارھانی انوگیں سیکورٹی جاور ھال ءِ سر ءَ دمگی دریا وردانی سر ءَ نوکیں بندش جتگ کہ ایشی ءِ چیر دستی ءَ شپ ءَ لھتیں دمگاں زِر ءَ روگ ءُ ماھیگ ءِ گرگ ءِ سر ءَ سرجمیں بندش جنگ بوتگ۔

مھکمہ ماھی گیری ءِ نیمگ ءَ شنگ بوتگیں سرپدی ءِ رد ءَ گوادر ریڈ زون، بندرگاہ ءِ دمگ، پاکستان کوسٹ گارڈ کیمپ ءُ زر ءَ ھواریں یک ناٹیکل میلے ءِ ھَد ءَ شپ ءَ ھچ وڑیں ماھیگ گیری ءِ اجازت نہ بیت۔ ھچ ماھی گیر ءَ اے ھَد ءِ تہ ءَ شپ ءِ ماھی گیری ءِ کاراں گوں بندوک بوگ ءِ اجازت نہ بیت۔

دریا ورد سرپد کنگ بوتگ انت کہ آ ماھی گیری ءِ وھد ءَ وتی نوکیں ماھی گیری لائسنس، راجی پجار کارڈ، ماھی گیری کارڈ ءُ دگہ المی ئیں کاگداں گوں وت برگ بہ بنت۔ سیکورٹی کارندھانی نیمگ ءَ چہ داتگیں ھرچ سنگنل یا ھشدار ءِ سر ءَ زوت امل کنگ بہ بیت۔

واکداراں بیھار داتگ کہ اے سرپدیانی ھلاپ ورزی کنوکیں مردمانی ھلاپ ءَ ھمگرنچیں کانودانی رد ءَ سکیں کانونی کارروائی کنگ بیت کہ ایشی ءِ ھلاپ ورزی کنوکیں مردم سرجمیں زمہ وار بیت۔

دومی نیمگ ءَ دمگی دریا ورداں اے پیسلہ رد کنگ ءِ وھد ءَ ترندیں زھر ءِ درشانی کتگ۔ آھاں گْوشتگ کہ آ پیسر ءَ چہ سکیں سیکورٹی گامگیج ءُ بے ھالیں بندشانی آماچ اَنت ءُ نوں شپ ءِ ماھی گیری ءِ بندش ءَ چہ آھانی زندمان گیشتر تاوان رس اِیت۔

دریا ورداں لوٹ کتگ کہ سیکورٹی ادارہ ناجائزیں ٹرالنگ ءِ ھلاپ ءَ گامگیج بہ زور اَنت کہ آھانی رد ءَ اے دمگی زندمان ءِ ھاترا مزنیں ھترہ یے ۔

زانگ بہ بیت کہ سیکورٹی ادارھانی رویش ءِ سر ءَ پیسر ءَ ھم دمگی دریا ورداں زھرشانی کتگ۔ آھانی گشگ انت کہ کوسٹ گارڈ ءُ دگہ ادارھانی نیمگ ءَ چہ زگرشانی ءُ یکشلیں بندشاں آھانی زرکاری جاورھال سانمند کتگ انت۔

اے گامگیج ھنچیں وھدے ءَ زورگ بوتگ کہ لھتیں روچ پیسر بلوچ لبریشن آرمی ءَ وتی بھری ونگ ”ھمل میری ٹائم ڈیفنس فورس (HMDF)“ ءِ جوڑ کنگ ءِ جار جتگ ءُ گوادر ءِ کش ءُ گوراں کوسٹ گارڈ ءِ سر ءَ اُرش ءَ سئے کارندہ بیران بوتگ اَنت۔

بلوچستان ءِ تیابدپی شھر گوادر جیونی ءَ گوستگیں شپ ءَ پاکستانی پوج ءَ بیڑ برتگ ءُ اود ءَ لوگانی دروازگ پرشت ءُ پروش کنگ ءِ ھواری ءَ یک ورنایے آوار جتگ ءُ برتگ-

گیشیں اھوالانی رد ءَ جیونی پانوان ءَ گوستگیں شپ ءَ پاکستانی پوج ءَ یک لوگے ءِ سر ءَ بیڑ برتگ ءُ اود ءَ علی اصغر ء نور محمد نامیں ورنایے آوار جتگ ءُ برتگ-

دمگی مردمانی رد ءَ گوستگیں شپ ءَ پوج ءَ بیڑ برتگ ءُ اود ءَ لوگانی پٹ ءُ ھنڈ کنگ ءِ ھواری ءَ لوگانی دروازگ پروشتگ ءُ ساز ءُ سامان شِنگ ءُ شانگ کتگ انت-

زانگ بہ بیت بلوچستان ءِ جتا جتائیں جاھاں پاکستانی پوج یکشل ءَ آپریشن کنگ ءَ انت گوستگیں روچ ءَ مستونگ ءَ آپریشن ءِ وھد ءَ پوج ءِ تیرگواری ءَ دو مردم زدگ بیتگ ات انت- ھمے وڑ چِد ءُ پیش ھم بارکھان ءَ پوج ءَ یک گاڑی ءِ سر ءَ تیرگواری کتگ ات ءُ چریشی ءَ یکیں کھول ءِ زھگ ءُ زالبولاں ھوار دوازدہ مردم بیران بیتگ ات انت-

بلوچستان ءِ دمگ مستونگ ءِ ھند کردگاپ گرگینہ ءَ مروچی سھب ءَ چہ پاکستانی پوج ءِ آپریشن برجاہ ءَ اِنت، اے میان ءَ پوج ءِ تیرگواری ءَ چہ دو ورنا سکا ٹپی بیتگ اَنت-

گیشیں ھالانی رِد ءَ آپریشن ءِ میان ءَ کردگاپ ءِ دمگ کلی مینگی ءِ نزیک ءَ پوج ءَ تیرگواری کتگ دو ورنا، فاضل خان ءُ ظاھر سکا ٹپی کتگ اَنت سول نادُراھجاہ شال ءَ برتگ اَنت، اود ءَ آیانی الاج کنگ بیگ ءَ اِنت-

اِھوالکار ءِ رِد ءَ ٹپی بیتگیں دو ورنا بے میار بیتگ اَنت ءُ وتی ڈگاراں کار ءَ بوتگ اَنت وھدے آیانی سر ءَ تیرگواری کنگ بیتگ- دوئیں مردم وت ماں وت سیاد اَنت-

گیشیں ھالانی رِد ءَ دمگ ءَ مزنیں کچے ءَ پوجی ءِ کارندہ ءُ تاکت کارمرز کنگ ءَ اِنت-

ھمے وڑ ھزدار ءِ دمگ زھری ءَ گوستگیں روچ ءَ چہ جاور ناگیگ اَنت، پاکستانی پوج ءُ ڈیتھ اسکواڈ سر ءَ اُرش جانی تاوان دیمپانی-

زھری ءِ دمگ سوھندہ ءَ پاکستانی پوج ءُ آیانی پلامرزی سلاہ بند ٹولی، ڈیتھ اسکواڈ، سلاہ بندیں مردماں سنگر گپتگ اُرش ءِ نشانگ کتگ چریشی ءِ آسر ءَ آیانی جانی تاوان ءِ دیمپانی کنگ کپتگ-

اِھوالکار ءَ ٹی بی پی ءَ ڈیتھ اسکواڈ ءُ پوج ھما وھد ءَ نشانگ کتگ وھدے آ لَس آبادیاں نشانگ کنگ ءَ پد واتر آیگ ءَ بیتگ- واکدار ءَ تنی وھدے درگت ءَ ھچ وڑیں ھال دیم ءَ نیتکگ-

بلوچستان ءِ دمگ کیچ ءِ ھند مند ءَ پاکستانی لشکر ءَ دگہ دو ورنا زورانسری بیگواہ کتگ انت۔

گیشیں ھالانی رد ءَ 13 اپریل 2026 ءِ شپ ءِ سئے بج ءَ فرنٹیئر کور ءِ کارندھاں مند ءِ دمگ کلگ ڈن ءَ یک لوگے ءِ سر ءَ اُرش کتگ ءُ نصیر ءِ 20 سالی ئیں زھگ خورشید مراد دزگیر کتگ ءُ ناشناسیں جاھے ءَ برتگ ۔ خورشید مراد ءِ کار ءُ کسب یک ڈرائیورے۔

دومی وئیل ھمے روچ ءَ سھب ءِ چار ءُ نیم ءَ بوتگ کہ ایف سی ءِ کارندھاں کیچ ءِ شھر گیاب مند ءَ لوگے ءِ سر ءَ اُرش کتگ ءُ یونس ءِ 21 سالی ئیں زھگ شیرا زورانسری ءَ دزگیر ءُ بیگواہ کتگ۔ شیرا ءِ دھکانی ءَ بیتگ ءُ کشت ءُ کشاری ءِ کار ءَ بیتگ۔

کھول ءِ گشگ ءِ رد ءَ چہ وتی لوگاں دستگیر کنگ ءَ پد دوئیں ورنایانی بابت ءَ ھچ وڑیں ھال ءُ اھوال دیگ نہ بوتگ کہ ایشی ءَ پد کھول ءِ مردم سکا پریشان بوتگ اَنت۔

کھولاں چہ واکداراں لوٹ کتگ کہ اے دوئیں مردم زوت دیم ءَ آرگ بہ بنت۔

زانگ بہ بیت کہ بلوچستان ءِ جتاجتائیں دمگاں زورانسری بیگواھی ءِ کیسانی تہ ءَ یکشل ءَ گیشی بوگ ءَ اَنت کہ ایشی ءِ سر ءَ انسانی ھکانی گلاں باز رند ءَ دلپدردی درشان کتگ۔

بلوچستان ءِ دمگ مستونگ ءِ ھند کردگاپ ءَ بازیں تراک ءُ مزنیں تیرگواریانی توار بوتگ انت۔

دمگی مردمانی رد ءَ کردگاپ ءُ آئی ءِ کش ءُ گوراں پاکستانی لشکر ءِ مزنیں آپریشنے ءِ ھال ھست۔ دمگی مردمانی گشگ انت کہ آپریشن ءِ وھد ءَ وھد وھد ءَ تراکانی توار بوتگ ءُ ھمے وھد ءَ فورسز ءُ سلاہ بندیں مردمانی نیام ءَ جنگ ءُ چوپانی اھوال ھم رس اتگ انت۔

بلے چوشکہ تنی وھدی اے ھال انگت ءَ چہ واکداراں سرکاری رنگ ءَ پدر نہ بوتگ اَنت۔

دومی نیمگ ءَ سرجمیں مستونگ ءِ نادراھجاھاں ایمرجنسی ءِ جار جنگ بوتگ۔ دمگ ءِ جانسلامتی ءِ افسر مستونگ سلیم اکبر رئیسانی ءِ نیمگ ءَ چہ جاڑی بوتگیں بیان ءِ رد ءَ کردگاپ تھسیل ءَ گمانی ایمرجنسی ءِ سبب ءَ سرجمیں سرکاری ہسپتال ہائی الرٹ جنگ بوتگ انت۔

بیان ءِ تہ ءَ گوشگ بوتگ کہ دمگ ءِ سرجمیں بنجاھی جان سلامتی بنجل ءُ دگی جان سلامتی بنجلانی سر ءَ ھم ایمرجنسی ےِ جار جنگ بوتگ، ایشی ءِ تہ ءَ نواب غوث بخش رئیسانی میموریل ھسپتال، ضلعی ہیڈ کوارٹر ھسپتال مستونگ ھوار اَنت۔ دراھیں ڈاکٹر، پیرامیڈیکل اسٹاف ءُ دگہ کارندھاں کڈن کنگ بوتگ کہ آ زوت وتی وتی پوسٹاں رپورٹ بہ کن انت۔

بلوچستان ءِ بُنجاھی شھر شال ءَ ایگل اسکواڈ بمب تراک ءِ نشانگ کتگ-

شال ءِ قمبرانی دگ سر ءَ اللہ والا مسیت ءِ نزیک ءَ ایگل اسکواڈ پرپٹ سواریں کارندہ بمب تراک ءِ نشانگ کتگ اَنت-

اِھوالکار ءِ رِد ءَ تراک ھما وھد ءَ بیتگ وھدے ایگل اسکواڈ ءِ کارندہ پرپٹ ءِ سر ءَ گوزگ ءَ بیتگ اَنت-

تُرندیں تراک ءَ کارندھاں تاوان چست کنگ ءِ ھال اِنت بلے پوج ءَ دمگ انگیر ءَ کتگ وئیلجاہ ءَ روگ ءَ نیلگ ءَ اِنت-

زانگ بہ بیت ایگل اسکواڈ سر ءَ درکانودی بندیگ، لَٹ ءُ لُٹ کوش ءَ ھوار دروگیں میڑاں بلوچ ورنایانی کوش ءِ بھتام ءِ تہ ءَ گیشی اتکگ-

سے روچ ساری ایگل اسکواڈ ءِ کارندھاں شال ءَ یک ورنایے خالد ساسولی ھما وھد ءَ تیرگواری کتگ کشتگ وھدے کہ آ ھون دیگ ءَ پد نادُراھجاہ ءَ چہ واتر آیگ ءَ بیتگ-

ھمے وڑ گوستگیں ھپتگ ءَ یک ورنایے اسرار احمد درکانودی دزگیری لَٹ ءُ کٹ کتگ کشتگ- اسرار احمد ء پت محمد انور ءَ گوشتگ کہ آئی ءِ چک شش روچ ءَ ساری ایگل اسکواڈ کارندھاں آوار جتگ، بلے آئی ءِ دزگیری ءِ ھچ تھانہ پدر نہ بیتگ-

آئی ءَ گوشتگ کہ اشی ءَ پد آئی ءَ ایس پی سریاب نیمگ ءَ چہ فون اتکگ کہ گوشگ بیتگ آئی ءِ چک ءَ وتی شلوار ءِ آنجگ ءَ چہ وتکشی کتگ-

بلے پد ءَ آئی ءِ لاش سر ءَ ٹپ ءُ ٹور پر بیتگ-

بلوچستان ءِ دمگ ھاران ءَ پاکستانی لشکر آپریشن بندات کتگ، آپریشن ءَ ھواریں کارندہ سلاہ بندیں مردماں اُرش ءِ نشانگ جوڑ کتگ انت، وھدیکہ دمگ ءَ ڈرونانی بال برجاہ انت۔

مرچی سھب ءِ ساھت ءَ ھاران ءِ دمگ المرک، کسان ءُ کش ءُ گوری دمگاں پاکستانی لشکر ءِ گاڑیانی بازیں کاروان ءَ دیم ءَ جنزگ ءِ جھد کتگ۔ ھمے وھد ءَ پورسز ءِ دہ گاڑیانی کاروان ءِ سر ءَ پیش ءَ سنگر گپتگیں سلاہ بندیں مردماں اُرش ءِ نشانگ جوڑ کتگ ءُ ایشی ءَ پد جنگ ءُ چوپ بندات بوتگ۔

دمگ ءَ ڈرون ءِ بالی گراب گندگ بوتگ انت بلے انگت ءَ واکداراں آپریشن ءُ جنگ ءُ چوپ ءِ بابت ءَ ھچ وڑیں ھال ءُ اھوال نہ داتگ۔

گوستگیں روچ ءَ خضدار ءِ زہری دمگ ءَ پاکستانی لشکر ءَ ھما وھد ءَ جانی تاوانانی دیمپانی کنگ کپتگ کہ اولی رند ءَ سوھندہ ءِ دمگ ءَ بمبتراک ءِ تہ ءَ ءُ پد ءَ سلاہ بندیں اُرش ءَ لشکر نشانگ جوڑ کنگ بوتگ اَنت۔

ھالانی ردا ءَ.زھری ءَ داں شپ ءِ دیر ءَ یکشلیں جنگ ءُ چوپ برجاہ بوتگ انت ءُ دمگ ءَ ڈرون ءِ بالی گندگ بوتگ انت۔

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ 3 اپریل ءَ بگر داں 14 اپریل ءَ بلوچستان ءِ جتا جتائیں دمگاں 14 جتا جتائیں اُرشاں زورگیریں پاکستانی لشکر ءِ 29 کارندہ کُشتگ ءُ بازینے ٹپیگ کتگ اَنت۔ اے کاروائیاں زوگریں پورسز ءِ چوکیاں ھوار ءُ دگ بندی کتگ انت ءُ 13 لیویز ءُ پولیس ءِ کارندہ دستگیر کتگ انت۔ اے اُرشانی تہ ءَ زورگیریں لشکر ءِ رسد ھم دو جاگھاں ​نشانگ جوڑ کتگ ءُ تباہ کتگ انت۔ زورگیریں لشکر ءِ گون ءَ ترندیں جنگ ءُ چوپاں بی ایل اے ءِ سئے سرمچار سلیم پنام ءِ قاضی نوید، علی دوست پنام ءِ ذاکر ءُ سمیع اللہ پنام ءِ ھکل ءَ دلیری ءَ جنگ کنان ءَ وتی جان ندر کتگ انت۔

اُرشانی سرجمیں اھوال انت:

3اپریل: سوراب ءِ انجیرہ کراس ءَ بی ایل اے ءِ سرمچاراں چہ کراچی ءَ شال ءَ برگ بوھوکیں سرکاری مزنیں مشینری سوتکگ ءُ تباہ کتگ انت ءُ دو ایکسیویٹر ءُ یک ٹرالرے ھوار اَنت۔

6اپریل: سوراب ءِ ‘فارم’ ءَ سرمچاراں زورگیریں لشکر ءِ سر ءَ ترندیں اُرشے کتگ کہ ایشی ءِ آسر ءَ دژمن ءِ 7 کارندہ مرتگ اَنت۔ ھمے جنگ ءَ سنگت سلیم جتک پنام ءِ قاضی ، سنگت علی دوست پنام ءِ ملا ذاکر ءُ سنگت سمیع اللہ شاہوانی پنام ءِ ھکل ماتیں وتن ءِ پھریزگ ءَ شھید بوتگ اَنت ۔

8اپریل: بی ایل اے سرمچاراں ھاران بیسمہ دگ ءُ ھاران نوشکی روڈ ءَ یکیں وھد ءَ چیک پوسٹ جوڑ کتگ ءُ سرچ آپریشن (اسنیپ چیکنگ) بندات کتگ انت۔ دومی نیمگ ءَ نوروز کلات ءَ پولیس ءِ گاڑی ءَ چیک پوسٹ ءِ پروشگ ءُ تچگ ءِ کوشست کتگ کہ سرمچاراں نشانگ جوڑ کتگ۔ اے اُرش ءَ چہ دو کارندہ ٹپیگ بوتگ اَنت۔ دومی نیمگ ءَ ساروان ءَ سرمچاراں ناکہ بندی ءِ وھد ءَ لس مچی ءَ گوں تران ھم کتگ۔

واشک ءَ بی ایل اے ءِ سرمچاراں زورگیریں پاکستانی لشکر ءِ چار گاڑیانی کاروان ءِ تہ ءَ یک گاڑی یے ءَ را ریموٹ کنٹرول آئی ای ڈی تراک ءِ نشانگ جوڑ کتگ ءُ پد ءَ دگہ گاڑیانی سر ءَ اُرش کتگ۔ اے کارروائی ءَ زور گیریں لشکر ءِ 8 کارندہ مرتگ اَنت وھدیکہ دو گاڑی سرجم ءَ تباہ بوتگ اَنت۔

مستونگ ءِ دشت ءِ دمگ ءَ سرمچاراں زورگیریں لشکر ءِ کاسگ چٹ ءُ وتگڑیں وزیر عاصم کرد گیلو ءِ پناہ گاہ ءِ سر ءُ اُرش کتگ ءُ اود ءُ سنگر ءُ مشینری تباہ کتگ انت۔

9اپریل: بی ایل اے ءِ برزی اُرش ڈرون جنگی یونٹ ”کھر“ ءَ مستونگ ءِ دمگ اسپلینجی ءَ ڈرون اُرش ءَ زورگیریں پاکستانی لشکر ءِ مزنیں بنجل نشانگ جوڑ کتگ۔ اے نوکیں اُرش ءِ آسر ءَ زورگیریں لشکر ءِ 2 کارندہ مرتگ ءُ 2 ٹپی بوتگ اَنت ءُ دژمن ءَ را مزنیں کچے ءَ مالی تاوان رس اتگ۔

10اپریل: بی ایل اے ءِ سرمچاراں اتھل شھر ءَ سلاہ بندیں دیم پہ دیم بوھگ ءِ تہ ءَ ملٹری انٹیلی جنس ءِ کارندہ عادل ارشد (خانیوال، پنجاب ءِ نندوک) کُشتگ ۔

11اپریل: بی ایل اے ءِ سرمچاراں ھاران ءِ چنال ءِ دمگ ءَ زورگیریں لشکر ءِ 7 گاڑیانی کاروان ءِ سر بستگ ءُ اُرش کتگ۔ دژمن ءِ چار گاڑی دیم پہ دیم تیرانی نشانگ بوتگ اَنت کہ یکے سرجم ءَ تباہ بوتگ۔ اے میان ءَ زورگیریں لشکر ءِ دگہ چار گاڑی چہ المرک ءَ دیم ءَ روگ ءِ جھد ءَ بییتگ اَنت کہ سرمچارانی دگہ دگی ٹولے ءَ دیم داشتگ ءُ ترندیں اُرشے کتگ۔ اے اُرشانی تہ ءَ سرجم ءَ زورگیریں لشکر ءِ 9کارندہ مرتگ ءُ بازینے ٹپیگ بوتگ اَنت۔

مستونگ ءِ دشت ءِ دمگ کمبلا ءَ سرمچارانی ناکہ بندی ءِ وھد ءَ زورگیریں لشکر ءَ سول گاڑی ءِ تہ ءَ ٹپ اتگ ءُ دیم ءَ روگ ءِ جھد کتگ کہ وھد ءِ سر ءَ کارروائی ءِ تہ ءَ نشانگ جوڑ کنگ بوتگ ءُ اے اُرش ءِ تہ ءَ دژمن ءِ دو کارندہ جاہ ءَ مرتگ اَنت۔

جھل مگسی ءِ لانڈی ءُ سفراڑی ءِ دمگاں سرمچاراں لیویز ءِ پوسٹ گپتگ ءُ سرجمیں کارندہ دزگیر کتگ ءُ سلاہ برتگ اَنت۔ بلے پد ءَ دمگی پیرینانی لوٹ ءُ دزبندی ءِ سر ءَ کارندہ چہ ھال ءُ اھوال ءَ پد یلہ کنگ بوتگ اَنت۔

12اپریل: ھاران ءِ دمگ گرُک ءَ سرمچاراں زورگیریں پاکستانی لشکر ءِ واستا تیل ءِ پجارینوکیں یک ٹرکے گوں ساماناں دستیگ کتگ۔ جست ءُ پرس ءِ وھد ءَ ڈرائیور ءَ من اتگ کتگ کہ تیل چہ کراچی ءَزور گیر فوج ءِ کیمپ ءَ آرگ ءَ بیتگ انت۔

پنجگور ءِ پروم (کیلکور) ءِ دمگ ءَ سرمچاراں زورگیریں لشکر ءِ سامان ءِ برگ ءِ گاڑی ھما وھد ءَ نشانگ جوڑ کتگ اَنت کہ آ یک فوجی کاروانے ءِ پھریزگ ءَ روگ بیتگ اَنت۔ سرمچاراں کاروان ءِ میان ءَ یک سپلائی گاڑی یے سوتکگ ءُ دومی گاڑی ءَ را سک باز تاوان رس اتگ ءُ چہ اود ءَ تچگ ءَ سوبین بوتگ۔

سوراب ءِ بینچہ ءِ دمگ ءَ سرمچاراں مین ھائی وے ءِ سر ءَ زورگیریں لشکر ھما وھد ءَ نشانگ جوڑ کتگ کہ آ گاڑیانی تہ ءَ دیم ءَ روگ ءِ جھد ءَ بیتگ ۔ اے اُرش ءَ زورگیریں لشکر ءَ را تاوان ءُ مالی تاوان رس اتگ۔

14 اپریل: سرمچاراں خاران ءِ دمگ شیروزی ءَ پولیس ءِ کارندہ دزگیر کتگ ءُ آیانی سلاہ ءُ دگہ جنگی سامان پچگپتگ اَنت ءُ کارندہ چہ کڈنی بیھار ءَ پد یلہ کنگ بوتگ اَنت۔

جارکش جیئند بلوچ ءَ گوشتگ بلوچ لبریشن آرمی چہ اے انوگیں کارانی زور ءَ اے گپ ءَ پدر کنت کہ مئے ماتیں گلزمین ءِ رکّینگ ءِ جنگ نوں یک ٹھینوکیں پڑے ءَ اتکگ کہ اود ءَ زمین، شھدگ ءُ زِر ھم پہ دژمن ءَ تنگ بوگ ءَ انت۔ مئے سرمچارانی مزنیں کربانی کہ اے وڑانی تہ ءَ وتی سر ندر کتگ اَنت، آیانی بے دروریں مھکمی ءُ وتن ءِ گوں وپاداری ھما ابدی کِسّہ اِنت کہ پہ بلوچ راج ءِ آیوکیں پدریچاں رژن ءِ چراگ ءِ چراگے مان اِنت۔ ایشانی ھون ھمے زرمبشت ءِ رُژن اِنت کہ مئے راہ ءَ داں آجوئی ءِ مول ءُ مراد ءَ رُژنائی ءَ دار اِیت۔ ما یک رندے پد ءَ زورگیریں پاکستانی لشکر ءِ سپاھیگاں ھال دئیں کہ اے بے دودیں ءُ زوراکیں زورگری برانز جوڑ بوھگ ءَ یل بہ کن اِت ءُ بلوچ دژمنی ءِ بنیاد ءَ اے نوآبادیاتی جنگ ءِ بھر جوڑ بوگ ءَ وتی زند ءَ زوال مہ کن اِت۔ تو ایوک ءَ یک مزدورے ءِ کرد ءَ پیلو کنگ ءَ ئے کہ یک زورگیریں ریاستے ءِ نیمگ ءَ پہ وتی وتمانی ءِ لڑ ءَ کارمرز کنگ بوھگ ءَ ئے ءُ بے وارسی ءَ یل بوگ ءَ ئے۔ اے پہ شما شرتر اِنت کہ شما اے ناکامیں زوراکی ءِ جھد ءَ یل بہ کن اِت ءُ وتی لوگاں واتر بہ بئے ءُ پنجاب ءَ شرپداریں زند گوازین اِت، دانکہ شما گوں وتی ھاندان ءَ امن ءُ ایمنی ءِ زند گوازین اِت، اگاں ناں بلوچستان ءِ اے سُتکگیں سرزمین پہ شما گیشتر تنگ بیت کہ چہ اود ءَ پد ءَ واتر بوھگ ءِ یکیں راہ تابوتاں بیت۔