گوادر ءَ دریا وردانی سر ءَ شپ ءَ زِر ءَ روگ ءِ سر ءَ بندش جنگ بوتگ

بلوچستان ءِ تیابدپی شھر گوادر ءَ پاکستانی سیکورٹی ادارھانی انوگیں سیکورٹی جاور ھال ءِ سر ءَ دمگی دریا وردانی سر ءَ نوکیں بندش جتگ کہ ایشی ءِ چیر دستی ءَ شپ ءَ لھتیں دمگاں زِر ءَ روگ ءُ ماھیگ ءِ گرگ ءِ سر ءَ سرجمیں بندش جنگ بوتگ۔

مھکمہ ماھی گیری ءِ نیمگ ءَ شنگ بوتگیں سرپدی ءِ رد ءَ گوادر ریڈ زون، بندرگاہ ءِ دمگ، پاکستان کوسٹ گارڈ کیمپ ءُ زر ءَ ھواریں یک ناٹیکل میلے ءِ ھَد ءَ شپ ءَ ھچ وڑیں ماھیگ گیری ءِ اجازت نہ بیت۔ ھچ ماھی گیر ءَ اے ھَد ءِ تہ ءَ شپ ءِ ماھی گیری ءِ کاراں گوں بندوک بوگ ءِ اجازت نہ بیت۔

دریا ورد سرپد کنگ بوتگ انت کہ آ ماھی گیری ءِ وھد ءَ وتی نوکیں ماھی گیری لائسنس، راجی پجار کارڈ، ماھی گیری کارڈ ءُ دگہ المی ئیں کاگداں گوں وت برگ بہ بنت۔ سیکورٹی کارندھانی نیمگ ءَ چہ داتگیں ھرچ سنگنل یا ھشدار ءِ سر ءَ زوت امل کنگ بہ بیت۔

واکداراں بیھار داتگ کہ اے سرپدیانی ھلاپ ورزی کنوکیں مردمانی ھلاپ ءَ ھمگرنچیں کانودانی رد ءَ سکیں کانونی کارروائی کنگ بیت کہ ایشی ءِ ھلاپ ورزی کنوکیں مردم سرجمیں زمہ وار بیت۔

دومی نیمگ ءَ دمگی دریا ورداں اے پیسلہ رد کنگ ءِ وھد ءَ ترندیں زھر ءِ درشانی کتگ۔ آھاں گْوشتگ کہ آ پیسر ءَ چہ سکیں سیکورٹی گامگیج ءُ بے ھالیں بندشانی آماچ اَنت ءُ نوں شپ ءِ ماھی گیری ءِ بندش ءَ چہ آھانی زندمان گیشتر تاوان رس اِیت۔

دریا ورداں لوٹ کتگ کہ سیکورٹی ادارہ ناجائزیں ٹرالنگ ءِ ھلاپ ءَ گامگیج بہ زور اَنت کہ آھانی رد ءَ اے دمگی زندمان ءِ ھاترا مزنیں ھترہ یے ۔

زانگ بہ بیت کہ سیکورٹی ادارھانی رویش ءِ سر ءَ پیسر ءَ ھم دمگی دریا ورداں زھرشانی کتگ۔ آھانی گشگ انت کہ کوسٹ گارڈ ءُ دگہ ادارھانی نیمگ ءَ چہ زگرشانی ءُ یکشلیں بندشاں آھانی زرکاری جاورھال سانمند کتگ انت۔

اے گامگیج ھنچیں وھدے ءَ زورگ بوتگ کہ لھتیں روچ پیسر بلوچ لبریشن آرمی ءَ وتی بھری ونگ ”ھمل میری ٹائم ڈیفنس فورس (HMDF)“ ءِ جوڑ کنگ ءِ جار جتگ ءُ گوادر ءِ کش ءُ گوراں کوسٹ گارڈ ءِ سر ءَ اُرش ءَ سئے کارندہ بیران بوتگ اَنت۔