TBP Balochi

بلوچ لبریشن آرمی ءِ میڈیا ونگ ھکل ءَ گل ءِ ھواریں زری پورس ”ھمل میری ٹائم ڈیفنس“ ءِ لوگو شنگ کتگ ءُ گوشتگ کہ ایشی ءِ تہ ءَ (نشان) گل ءِ زور ءُ تاکت ، فوجی تیاری ءُ زِر ءِ پھریزگ ءِ ازم ءِ درشان انت۔ اے نشان ءِ جتا جتائیں بھر ءُ بانگ ءِ تہ ءَ گھتریں بزانت ھست کہ آ گل ءِ ھیال ءُ لیکہ ءُ زمہ واریاں پدر کن اَنت۔

“لوگو ءِ تہ ءَ پیشدارگ بوتگیں اسپیدیں چمب دریائی یے شاھین چار ءُ گزاری، یکشل ءَ ھژاری ءُ درستیں نشانگ جوڑ کنگ ءِ چیدگ انت، کہ پورس ءِ پھریزی ھِکمت املی ءُ زوت پسو ءِ سنچ ءِ پدراھی یے۔

“لنگر زِر ءِ سیمسرانی سر ءَ مھکمیں کنٹرول، استھکام ءُ بے مٹیں موجودگی ءِ نمائندگی ءَ کنت، وھدے کہ ساد مھکمیں زری زانتکاری، رھبند ءُ درستیں کارروائیانی سر ءَ یک مھکمیں دزپنجگی ءِ پدراھی ءَ کنت۔

“ نشان ءِ تہ ءَ کمان کتگیں توپک، پھریزی ازم ءُ ھروھد ءَ جنگی چن ءُ لانچ ءِ پدراھی ءَ کنت، کہ فورس ءِ سیکورٹی زمہ واری ءِ سنچ ءَ پدر کنت۔”

“ھمے رنگ ءَ کمپاس نیویگیشن ءِ زانشت، دیمروئی کتگیں نیویگیشن ءِ توانائی ءُ آپریشنل اسکوپ ءِ چیدگ اِنت ، ھمے وڑ استار جوانیں کارانی کنگ، شَری ءُ راجی مول ءُ مرادانی نیمگ ءَ رھشون کنوکیں رھبندانی نمائندگی ءَ کنت۔

“نشان ءِ تہ ءَ کارمرز بوتگیں رنگانی ھم گچینی ھست انت۔ سیاہ دیمیں سبز رنگ جھلانکیں زر ءَ گوں بندوکی، زری تاکت ءُ زانتکاری ءِ پجار ءَ پدر کنت انت، ھمے وڑ اسپیتیں رنگ پلگاری، تچکی ءُ بھنشت ءِ درستی ءِ چیدگ انت، کہ ادارہ ءِ راہ ءُ رھبندانی بنیادانی پدراھی انت۔

گل ءِ رد ءَ اے نشان کساسی ”ھمل میری ٹائم ڈیفنس پورس“ ءِ جَزم، زانتکاری ءِ تاکت ءُ زر ءِ پھریزگ ءَ آئی ءِ بے دروریں بندوکی ءِ یکجاھی ءَ پدر کن انت۔

زانگ بہ بیت ھمے ماہ ءَ بی ایل اے ءَ پہ بلوچ زر ءِ رکینگ ءَ وتی سرجمی ءَ وتی نیول ونگ ”ھمل میری ٹائم ڈیفنس فورس“ ءِ جوڑ کنگ ءِ جار جتگ ات۔ اے نوکیں ذیلی فورس ءَ وتی اولی آپریشنل کارروائی 12 اپریل 2026 ءَ سھب ءِ 10 ءِ نزیک ءَ گوادر ءِ دمگ جیونی ءِ ’مِل تیاب‘ ءِ جاہ ءَ کتگ ات کہ اود ءَ پاکستانی بحریہ ءِ گشت ءِ کشتی سلاہ بندیں اُرش ءَ نشانگ جوڑ کنگ بوتگ ات۔

اے اُرش ءَ کشتی ءِ سر ءَ سوار نیوی ءِ سئے کارندہ نائیک افضل، سپاھی جمیل ءُ سپاھی عمر ھما جاہ ءَ بیران بوتگ ات انت۔

بلوچ نودربر گل بلوچ اسٹوڈنٹس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ سید ظہور شاہ ہاشمی ءِ بوتن ءَ سد سال سرجم بوگ ءَ آ ستک ءُ شانی ندر کتگ ءُ گوشتگ کہ سید یک سیاسی کواسے بوتگ ءُ آ روچ مروچی لبزانکی ءُ سیاسی تکاں مئے رھشونی ءَ کنگ ءَ انت ۔

بنجاھی جارکش ءَ گوشتگ کہ واجہ سید ظہور شاہ ھاشُمی 21 اپریل 1926 ءَ واجہ سید مھمد شاہ ءِ گِس ءَ ماں گوادر ءَ ودی بوتگ۔ واجہ ءِ نام ظہور اھمد اِنت ءُ ھاشُمی آئی ءِ پنام اِنت۔ واجہ وتی بنداتی وانگ ماں گوادر ءَ سرجم کنت ءُ ھمے میان فارسی ءُ اربی زبان ھم در بارت۔ واجہ ءَ پہ بلوچ، بلوچی ءُ بلوچستان ءَ گوھرے بوتگ کہ آئی ءَ وتی سرجمیں زند پہ بلوچی ادب ءُ بلوچستان ءِ ھاتر ءَ ندر کتگ، آئی ءِ زانت ءُ پگر چو گوادر ءِ زِر ءَ جھلانک اَت، کہ وتی سرجمیں زِند ئِے پہ بلوچی ءِ رکینگ ءَ گوازینت۔

جارکش ءَ گوشتگ کہ ‏سید بلوچی زبان ءُ لبزانک ءِ ھمک نوکیں پھناتانی سازوک اِنت، آئی ءَ بلوچی زبان ءَ بِنداتی زبان ءِ رھبند، اولی گِدار نازُک، اولی بزانت بلد سید گنج، نِمدیانی نبیسگ ءِ رواج، سپرنامگ نبیسگ ءِ بِنداتی رواج ءَ ھوار بلوچی لبزانک ءِ جتائیں پھناتاں بِنداتی سازوک بیتگ۔ یک ءُ تھنائیں مرد ءَ گِدار، آزمانک، سپرنامگ، نِمدی، نگد، چمشانک، شئیر ءُ ایدگہ تھرانی لبزانک نبیس اِتگ، اشاں ھوار ماھتاک، روتاک، ریڈیو، تامر ءُ ایدگہ پِڑاں کار کنگ ءَ ھوار پہ بلوچ ءَ لبزانکی ءُ راجمانی ادارہ ئِے ھم جوڑ کتگ۔ اے کُلیں پِڑ ءُ تھراں آئی ءَ ناں تھنا کار کُتگ بلکیں وتی دل ءُ جان ءَ گوں سرجمیں زِند ءِ کٹ ءُ کمائی پہ بلوچ ءُ بلوچی ءَ ھرچ کتگ ءُ نوکیں چِزانی بُن ہشت ئِے ایر کتگ۔ آئی ءِ زِند ءِ مال ءُ متا تھنا بلوچ ءُ بلوچی اَت، آئی ءَ نپری بستار ءَ یک سرجمیں ادارہ یے کار کُتگ اَنت۔

سید ءَ وتی ماتی زبان ءَ گوں ھمنچو مھر اَت کہ آئی ءَ پہ بلوچی زبان ءَ بلوچ ءِ میتگ میتگ ءُ کوچگ کوچگ گول ایت ءُ لبزانی امبار شوھاز کُت۔ مردماں سید ءَ وڑ وڑیں نام بست ءُ گوْشت کہ آ گنوک اِنت، شیپتال اِنت بلے سید ءَ دمانے ھم اے تھمت کِمار نہ کُت اَنت ءُ پہ بلوچی زبان ءَ جھد کنگ ءِ میار وتی کوپگاں زُرت۔ آئی ءَ مھلوک جورجوابی ءَ درائینت ءُ گوشت کہ نہ بیتگ مادنیں راہ ءَ کسے گار، نہ تَراں ھرکس ءَ پھکا جواب اِنت،ھمے جورجوابی ءُ وتی جھد ءُ مادنیں راہ ءِ سر ءَ آئی ءِ سِتک اَت کہ ایشی ءِ برورد ءَ بلوچی زُبان ءُ لبزانک ءِ باندات گِش اِت ءُ وت ءَ بلوچ راج دپتر ءَ داں ابد نمیران کُت۔

آئی ءَ گوشتگ ‏اے کلیں کاراں چہ پد سید ءَ تھنا لبزانکی تک ءَ بند کنگ آئی ءِ کتگیں کار ءُ آئی بستار ءَ جھل کنگ انت۔ سید یک سیاسی کواسے بوتگ بلکیں مروچی اوں لبزانکی ءُ سیاسی تک ءَ مئے رھشونی ءَ کنگ ءَ انت، آ سیاسی سِنچ ءَ گوں سرَیچ وتی زِند ءَ ھمک وڑیں اڈاندانی دیمپان بوتگ، آ مھلوک ءَ بد ءُ رد کُت، آئی ءَ گنوک ءُ گژدال لیک ایت، ھزار بُھتام اِش جت، شگانانی زَد ءَ اَت بلے اے دلیر ءُ دیرچاریں مرد ءَ کس بئے نہ کُت، گوشان ءِ مورے ءَ ھم نہ وارت پرچاکہ آ باسما اَت، آئی ءَ زانتگ اَت اے توم ءَ کہ آ کِشگ ءَ اِنت چہ ایشی ءِ براں راج ءَ نپ ءُ پائدگ رس ایت ءُ بانداتیں پدریچ ءِ ھستانک رک ایت کنت۔ ھما مردم کہ آ وھد ءَ سید ءِ پُچوکاں کپتگ اِت اَنت، سید ءَ آیاں تچک ءَ گوشتگ کہ آیاں پھک ءَ جواب اِنت بلے آ وتی راجی جھد ءَ پُشت کِنز نہ بیت۔ ھمے پھک ءَ جواب دیگ ءُ راجی لیکہ ءَ گوں مھکمی ءَ اوشتگ ءِ سوب ءَ مرچی بلوچ ءُ بلوچی لبزانک مرگ ءِ دیناں چہ رک اِتگ۔

جارکش ءَ گوشتگ کہ واجہ سید ظہورشاہ ھاشُمی ءَ وتی دراھیں زند ءَ پہ بلوچی ءُ بلوچستان ءَ ندر کت، 4 مارچ ھما شُمّیں روچ اَت کہ واجہ ءَ اے کوڑھیں امروز ءَ یل کُت ءُ نمیران بوت۔ بلے مروچی ایں روچ ھما روچ انت کہ سد سال پیش سید ودی بیت ءُ پہ بلوچ ءُ بلوچی لبزانک ءَ یک گوھرے جوڑ بیت۔ آئی ءِ سد سالی بوتن روچ ءَ گل آئی ءَ ستک شانی ندر کنان ءَ آئی ءِ کتگیں کار ءُ راجی جھد ءَ پھر ءِ نگاھاں چار ایت۔ سید یک سرجمیں راجدوستے اَت ءُ آئی ءَ بگندئے مرچی جسدی رنگ ءَ مارا یل کتگ بلے آئی ءِ جھد ءُ پگر انگت ھمک بلوچ ءِ دل ءَ زندگ اِنت، پمیشکا ورنایاں لوٹ ایت کہ سید ءَ بہ وان اَنت، بہ پھم اَنت ءُ چہ آئی ءِ جہد ءُ زانت ءَ در بہ بر اَنت ءُ پہ بلوچ ءُ بلوچی ءَ وتی راجی بھرشت ءَ بہ دیے اَنت۔

بلوچستان ءِ جتاجتائیں دمگاں بیتگیں اُرشانی زمہ واری بی آر جی ءُ یو بی اے ءَ منّ اِتگ اَنت-

بلوچ ریپبلکن گارڈز ءِ جارکش دوستین بلوچ ءَ گوشتگ کہ سرمچاراں بلوچستان ءِ دمگ کچھی ءِ ھند ھاجی شھر ریلوے اسٹیشن ءِ نزیک ءَ ریل ٹریک تراکناکیں شورو پٹ کتگ ءُ تراک ءَ چہ تباہ کتگ-

ھمے وڑ یونائیٹڈ بلوچ آرمی ءِ جارکش مزار بلوچ رسانکدر ءَ شنگ کتگیں درشان ءِ تہ ءَ گوشتگ کہ مئے سرمچاراں گوستگیں شپ ءَ کچھی ءَ بُنجاھی شھر ڈھاڈر ءَ برجاہ ڈپٹی کمشنر کارگس دستی بمب اُرش ءِ نشانگ کتگ-

یو بی اے ءِ جارکش ءِ درشان ءِ رِد ءَ تراک ءِ آسر ءَ ڈپٹی کمشنر کارگس ءِ ماڑی ءَ تاوان رس اِتگ وھدے کہ اود ءَ ساڑی بازیں کارندھے ڈپٹی ءُ سرکاری ماڑی ءَ ھم تاوان رس اِتگ-

گُڈی ءَ دوئیں گلاں بیتگیں اُرشانی زمہ واری منّ اِتگ اَنت گوشتگ کہ بلوچستان ءِ وتواجھی ءَ تاں مئے اُرش برجاہ بنت-

پاکستانی لشکر ءَ داد شاشانی چہ کراچی ءَ آوار جتگ ءُ ناشناسیں جاھے ءَ برتگ۔

کراچی ءَ سیادی داروکیں بلوچ جھدکار ءُ بلوچ یکجھتی کمیٹی کراچی ءِ باسک فوزیہ بلوچ شاشانی ءَ گْوشتگ کہ ریاستی ادارگاں آئی ءِ برات داد بلوچ شاشانی چہ گس ءَ دزگیر کتگ ءُ بیگواہ کتگ۔

فوزیہ بلوچ ءِ گْوشگ ءِ رد ءَ پاکستانی فورسز ءِ کارندہاں آئی ءِ لوگ ءَ چھاپہ جتگ ءُ برات گران کتگ ءُ گوں وت برتگ ۔

فوزیہ بلوچ ءَ گْوشتگ کہ ھمے وھد ءَ وھدے کہ آئی ءَ ایف آئی آر ءُ دگہ کاگد لوٹ اِتگ اَنت گُڑا آئی ءَ را دھمکی دیگ بیتگ ءُ آئی ءِ برات بے وارنٹ ءَ برگ بیتگ۔

آئی ءَ گْوشتگ کہ اے وئیل ءَ پد ھال ءُ اھوال ءِ ھاترا تھانھاں روگ ءَ ابید ھم آئی ءِ ھچ ھال ءُ اھوال نہ رس اتگ۔

فوزیہ بلوچ ءَ گشتگ کہ اے دومی رند انت کہ سرکاری ادارگاں آئی ءِ برات بیگواہ کتگ، آ پیسر ءَ زوراکیں بیگوابی ءِ آماچ بوھگ ءَ پد یل کنگ بوتگ۔

آئی ءَ گْوشتگ کہ ریاست اے وڑیں گیر آئینی پندلانی زور ءَ آئی ءُ آئی ءِ کھول ءَ را ترسینگ لوٹ اِیت، البت آ وتی برات ءِ زورانسری بیگواھی ءِ ھلاپ ءَ سکا زھرشانی کنت۔

آئی ءَ چہ سیاسی ءُ انسانی ھکانی گلاں لوٹ کتگ کہ آئی ءِ برات ءِ جان سلامتی ءِ ھاترا توار چست بہ کن اَنت۔

پنجگور ءِ دمگ پروم ءَ ناشناسیں سلاہ بندیں مردمانی تیرگواری ءَ یک مردمے بیران بوتگ۔

بیران بوتگیں مردم ءِ پجار اختر انور ءِ نام ءَ بوتگ۔

مردمانی گوشگ اِنت کہ اختر انور گوستگیں زمانگ ءَ گوں بلوچ جنگولیں گلے ءَ ھمگرنچ بیتگ۔ آئی ءَ وتی یک سنگتے ءِ کوش ءَ پد پاکستانی لشکر ءِ دیم ءَ سرنڈر کتگ۔

اے وئیل ءِ مول ءُ مراد زانگ نہ بوتگ اَنت۔

بلوچ لبز زانت، لچہ کار ءُ زبان زانت سید زھور شاہ ھاشمی ءِ بوتن ءِ سدمی سال روچ ءِ درگت ءَ ماں گوادر ءَ آر سی ڈی کلب گوادر ءِ نیمگ ءَ دیوانے اڑ دیگ بوتگ-

دیوان ءَ لبزانکی مھلوک ءَ ھوار زالبولاں بازیں کچے ءَ بھر زرتگ ءُ اود ءَ سیاسی ءُ چاگردی مھلوک ھم گندگ ءَ اتکگ انت-

دیوان ءَ بلوچی زبان ءِ لبزنکاراں ھم بازیں کچے ءَ بھر زرتگ ءُ اود ءَ زبان دوست حاجی فدا حسین دشتی، اشرف حسین، ریٹائرڈ جسٹس شکیل اھمد بلوچ بی ایس او پجار ءِ گوستگیں چیئرمین بوھیر صالح بلوچ، آل پارٹیز کیچ ءِ ڈپٹی کنوینئر فدا جان بلیدی، بجار بلوچ، گوادر یونیورسٹی ءِ پی آر او نصیر بلوچ، تربت ءَ ڈاکٹر عبدالمالک بلوچ ـ جان مھمد بلیدی، گلزار دوست، اے آر داد بلوچ، ڈاکٹر رحیم مھر ءَ ھوار بازیں کچے ءَ مھلوک ءَ بھر زرتگ-

اود ءَ مھلوک ءَ تران کنان ءَ گوشتگ سید ھاشمی لبزانک ءِ ھما رژنائیں چراگ بیتگ کہ آئی ءَ بلوچی لبزانک ءُ زبان ءَ یک راھے ءِ شون داتگ- مھلوک ءَ گوشت سید ھاشمی بیتگ کہ آئی ءَ پہ بلوچی لبزانک ءَ جوانتریں راہ گچین کتگ انت-

دیوان ءَ ساز ءُ زیملی ءَ سید ھاشمی ءِ شَیر ءُ لچہ گشگ بیتگ انت کہ اود ءَ زیمر کاراں مھلوک ءِ دلگوش وتی نیمگ ءَ کتگ –

دیوان ءَ کتاب ءِ میلہ برجم دارگ بوتگ کہ اود ءَ جتا جتائیں کتاب ایر بیتگ انت-

سید زھور شاہ ھاشمی

نبشتہ کار : ایم شکاری

دی بلوچستان پوسٹ

واجہ سید ھاشمی 21 اپریل 1926 ءَ گنجیں گوادر ءَ واجہ سید مھمد شاہ ءِ لوگ ءَ ودی بوت. سید ءَ اربی ءُ پارسی چہ وتی آریپیں پت ءَ دربُرت. نمیرانیں سید اُردو ءُ انگریزی ءَ هم زانتکار بوتگ ، بلوچ ءِ راجدپتر شاھد اِنت کہ واجہ ءِ دل پہ ماتیں زبان ءُ پہ راج ءَ سُتکگ .
1946 ءَ کہ گوادر مشکت ءِ ایر دست اَت، واجہ ءَ انجمن اسلاہ ء بلوچاں ءِ نام ءَ تنزیمے ءِ بندات ایر کُرت. همے نیمون ءَ بلوچی دیوان ءِ بنگیج ئِے ایر کُرت. آئی ءَ جدّ ءُ جُھد ءِ نام ءَ یک روتاکے (اخبارے) ھم شنگ کُت، بلے مشکت ءِ اگدہ دار ءُ واگداراں واجہ ءِ اے کار دوست نہ بو ت۔۔چیزے وهد ءَ رند سید ءِ جھدانی دیم گِرگ بوت ، انجمن پْرشت ءُ سید چہ گوادر ءَ درانڈیھ کنگ بوت.1949 ءَ واجہ سید پہ ڈاکٹر جاهین سڈا سر ءِ گْوشگ ءَ هندوستان ءَ شُت کہ بلوچی زبان ءِ بارہ ءَ گیشتر پٹ ءُ پول بہ کنت .
ءُ اود ءَ واجہ ءَ پہ بلوچی زبان ءَ بازیں پٹ ءُ پولے کت۔ پد ءَ 1950 ءَ واجہ کراچی ءَ اتک، اد ءَ ریڈیو ءِ کار مستر جوڑ کنگ بوت واجہ ءَ اے ریڈیو ءِ تُرو ءَ بلوچ راج ءُ بلوچی زبان ءِ سک باز ھزمت کت . مردمے کہ لوٹ اِیت منی زبان مدام دیمتر ءَ کِنزان بہ کنت گڑا مدام ھمے ھیال ءَ بیت کہ کجام ناں کجام وڑ ءَ بلوچی زبان دیم ءَ بہ رَوت پمیشکا واجہ ءَ 1952 ءَ گوں وتی اے دگہ بلوچ دوزواھاں (بلوچی سَرچمگ) ءِ نام ءَ زبان ءِ دیمروی ءِ هاتر ءَ یک انجمنے بنگیج کُرت-

سید ءَ پہ (سَر چمگ) ءُ بلوچی زبان ءِ دیمروی ءِ هاتر ءَ بلوچستان ءِ گیشتریں هند ءُ دمگاں دو ماہ ءَ پُرّیں ترّ اِت ءُ گول اِت بلے بژن چہ وت ماں وتی ناتپاکیاں سَر چمگ نہ سبز اِت ءُ سرچمّگ ءِ تاک لیمّراں بوت اَنت . بلوچی زبان ءِ اے شھزانت چہ بلوچانی اے ناتپاکی ءَ دل پروش نہ بوت . واجہ ءَ گوں وتی نزوریں کوپگاں بلوچی جھد برجم داشت، بلے 1955ءَ شومیں رنج ءِ نادْراھی ءَ واجہ گْور جَت
گوں ھمے نادْراھی ءَ کہ واجہ ئِے روچ پہ روچ نزور کنان کُرت بلے انگت چہ بلوچ ءُ بلوچی ءَ بے هال نہ بوت مدام گوں بلوچی ءَ سَر ءُ چیر اَتئ

بلوچی زبان ءِ پٹ پول ءَ بلوچستان ءِ گیشتریں هند ءُ دمگاں پاد شپاد ءَ یک یک گالوارے ءِ هاتر ءَ تَرّ اِت کہ بلوچی گوهر کیمتی لبزاں پَٹ ءُ پول بہ کنت سید ءِ ھاشمی ءِ چہ درستاں مستریں کار بلوچی لبز بلد (ڈکشنری) “سید گنج” ءِ نبیسگ اِنت کہ بلوچی زبان ءِ اولی لبزبلد زانگ بیت. ءُ سید ءَ بلوچی زبان ءِ سْیاھگ (رسم الخط ) ءِ بارہ ءَ ھم باز جُھد کتگ، اے بارہ ءَ سید ءَ دو جْوانیں کتاب نبشتگ یکے “بلوچی سْیاھگ ءِ راست نبیسگ” ءُ دومی “بلوچی بنگیجی پہ رستگیناں”- پہ زبان ءِ گھبودی ءَ ھمک تھر ءَ کتاب نبیسگ ءُ شنگ کنگ ھم سک زلوری اِنت اے رِد ءَ سید ءِ ھما کتاب کہ چاپ ءُ شنگ بوتگ اَنت ایش اَنت:

وانگی:
1: سِستگیں دستونک
2: انگر ءُ تْرونگل
3: بْرتکگیں بیر
4: تْراپکنیں تْرمپ
5: بلوچی بنگیجی
6: بلوچی سْیاھگ ءِ راست نبیسگ
7: جُز عمّ بلوچی
8: میر گند
9: نازک
10: بلوچی زبان و ادب کی تاریخ
12: سِچکانیں سسّا
13: شکّلیں شھجو
14: اوستا ءِ بنگیج ءُ پیشگال
15: شھلچّہ کار (ملا پازل ءِ زند ءُ ازم ءِ بارہ ءَ نبشتگیں کتاب )
16: چکّاسنگ
17: گسدگْوار
18: سید نمدی
19: سید گنج
20 :سید آزمانک

ءُ ھما کتاب کہ نبشتگ ءُ ایر اَنت بلے پہ چاپگ ءُ سرجم کنگ ءَ مھتل اَنت، ایش اَنت:
21۔بلوچی دربر
22-پاپولر پوئٹری آف بلوچ
23۔گورکی ءِ مات ءِ بلوچی
24۔ زوت گِر ءُ دیر ھٚلّ
25: سستگیں دستونک (اردو)
26: شھگوستن شاھار
27:بلوچی دلپسندیں لچھکاری

ءُ ھما کتاب کہ سید ءَ وتی زند ءَ گْوشتگ کہ من ءَ ارادہ ھست کہ اے کتاباں بہ نبیساں (بلے ملکموت ءَ گیگ نہ دات ءُ نبیسگ نہ بوتگ اَنت ) ایش اَنت:
1-کلام اللہ ءِ بلوچی رجانک
2- انگریزی بلوچی بزانت بلد
3- بلوچی دربری درسی سرجَمیں کتاباں
4-بلوچی کْوھنیں رم ءُ لچّھانی درگیجگ ءُ یکجاہ کنگ

ءُ ھما کار کہ سید ءِ واھگ بوتگ کہ کنگ بہ بنت ایش اَنت:
1- بلوچی وانینگ ءَ دربرجاہ پچ کنگ
2-بلوچی کتاباں چاپ کنگ
3-بلوچی ءَ اَلّمیں ماھتاک کشّگ
4: پہ رُستگیناں دربرجاہ پچ کنگ
5: پہ بلوچی زبان ءِ الّمی ءَ جوانیں دیوان پچ کنگ
6-بلوچی کتاباں چاپ کنگ
7-بلوچی ءَ اَلّمیں ماھتاک کشّگ
8-پہ رُستگیناں دربرجاہ پچ کنگ
9-پہ بلوچی زبان ءِ الّمی ءَ جوانیں دیوان پچ کنگ۔ واجہ گْوش اِیت کہ من ءَ اے گم نہ اِنت کہ پہ منی مرگ ءَ منی چُک چورہ بنت، ھَو من ءَ اے گم ھست اِنت کہ من مُرتاں بلے پہ بلوچی ءَ ھچ نہ کت۔ 4 مارچ 1978 ءَ واجہ ءَ اے کوڑھیں امروز یلہ دات، اللہ واجہ ءِ مانش ءَ روژنا کنات۔ واجہ ءِ درستی اُمر 52 سال بوتگانچوش سما بیت کہ گْوش ئے زاناں اللہ ءَ سید بس پہ بلوچی زبان ءِ ھاتر ءَ ودی کتگ۔

“بیا پد ءَ شتکیں تلارانی دل ءَ دِرّاں کنیں”
“گرانبھائیں دوستی ءُ مھر ءُ پد ءَ ارزاں کنیں”

دور نہ اِنت منزل ھزار ناز ءُ ھزار گنجیں سید
ھمبلاں زوریں چو کور ءَ دور سریں رُمباں کنیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

چہ کراچی ءُ بلوچستان ءَ یک زالبولے ھوار دو مردم زورانسری بیگواھی ءِ وئیل رپورٹ بیتگ اَنت-

گیشیں ھالانی رِد ءَ چہ آواران ءَ سیادی داروکیں حسینہ بلوچ، کہ کراچی ءِ دمگ نیول ءَ جھمنند بیتگ، 16 اپریل 2026 ءِ شپ ءَ پاکستانی پوج ءِ کارندھاں آوار جتگ ءُ بیگواہ کتگ-

دومی نیمگ ءَ سے مارچ 2026 ءَ سھب ءَ کیچ ءِ بُنجاھی شھر تربت ءَ بلوچ ھسپتال ءِ نزیک ءَ پاکستانی پوج ءِ چیریں ادارھانی کارندھاں عبدالباسط ء محمد سعید کہ یک ڈرائیورے آ آوار جتگ ءُ بیگواہ کتگ-

بلوچستان ءَ زورانسری آوار جنی ءِ درچ یکشل ءَ برجاہ ءَ اِنت دو ورنا آوار جنگ ءُ سے یل کنگ بیتگ اَنت وھدے کہ کیچ ءَ بیگواھیں مردمانی کھول ءِ زھرشانی-

گیشیں ھالانی رِد ءَ کیچ ءِ دمگ چہ گوکدان تربت ءَ دو مردم، بیست نُھ سالی ئیں نعمان ء حاجی عیسیٰ ءُ بیست ھپت سالی ئیں اکرام ء حاجی عیسیٰ ھژدہ اپریل ءِ شپ ءَ ساھت یک ءَ چہ لوگ ءَ فرنٹیئر کور (ایف سی) کارندھاں آوار جتگ ءُ بیگواہ کتگ- نعمان یک دکاندارے وھدے کہ اکرام یک نودربرے-

ھمے وڑ چہ سوراب کراچی ءَ زورانسری بیگواہ کنگ بیتگیں سے مردم یل کنگ بیتگ اَنت کہ آیانی تہ ءَ محمد اشرف ء اللہ بخش ء عبدالکریم ھوار اَنت ھشت اپریل ءَ چہ سوراب ءَ آوار جتگ اَت ءُ پانزدہ اپریل ءَ سوراب پولیس اسٹیشن ءَ یل کنگ بیتگ-

ھمے وڑ بلال ء خیر محمد کہ کراچی ءِ دمگ شرافی گوٹھ ءِ جھمنند اِنت آھم ھشت اپریل ءَ آوار جنگ ءَ پد پانزدہ اپریل ءَ صدر کراچی ءَ یل کنگ بیتگ-

دومی نیمگ ءَ کیچ ءَ یک ورنایے زورانسری آوار جنی ءِ ھلاپ ءَ کھول ءَ مروچی زھرشانی کنان ءَ سی پیک دگ بند کتگ-

بالگتر ءِ جھمنند بیست پنچ سالی ئیں عبدین کہ یک دھکانکارے، نوزدہ اپریل 2026 ءِ بیگاہ ءِ کساس ھپت چہ ءَ کیلکور دگ ءَ زورانسری بیگواہ کتگ-

کھول ءِ گوشگ اِنت کہ عبدین پاکستانی پوج ءِ نیمگ ءَ چہ آوار جنگ ءُ بیگواہ کنگ بیتگ چریشی ءَ پد آئی ءِ درگت ءَ ھچ وڑیں گپ دیم ءَ نیتکگ-

مروچی سانمندیں کھول ءَ دمگی مردماں زھرشانی کنان ءَ سی پیک دگ بالگتر ءِ ھند ءَ نندانک داتگ گاڑیانی واستا بند کتگ-

کھول ءَ گوشتگ کہ آ اے وھد ءَ سک زھنی گم ءَ رنج ءِ تہ ءَ گوزگ ءَ اَنت ءُ ھمگرنچیں ادارھاں چہ دزبندی کن ایں کہ عبدین ءِ یل کنگ ءِ ھاتر ءَ گامگیج بزور اَنت-

نوکیں ھالانی رِد ءَ اے وھد ءَ عبدین کھول ءُ انتزامیہ ءِ میان ءَ گپ ءُ دیوان سوبمند بیتگ ءُ چریشی ءَ پد کھول ءَ نندانک ھلاس کتگ ءُ دگ پہ گاڑیانی واستا پچ کتگ-

بلوچستان ءِ دمگ کیچ ءِ ھند زامران ءَ پاکستانی پوج ءِ آپریشن یکشل ءَ برجاہ ءَ اِنت-

دمگی اِھوالکار ءَ گوستگیں دو روچ ءَ چہ برجاہ اے آپریشن ءِ میان ءَ دمگ ءَ پاکستانی پوج ءِ سُر پُرانی تہ ءَ گیشی گندگ اَتکگ-

ھال اِنت کہ آپریشن ءِ میان ءَ تیرگواریں ھیلی کاپٹراں چہ جتاجتائیں ھندانی سر ءَ شیلنگ کتگ وھدے کہ دمگاں ڈرون اُرشانی ھم ھال اِنت-

دومی نیمگ ءَ واکدار ءَ اے آپریشن ءِ درگت ءَ ھچ وڑیں سرکاری درشان دیم ءَ نیتکگ-