TBP Balochi

بلوچ اسٹوڈنٹس ایکشن کمیٹی ءِ اوتھل ھنکین ءِ جنرل باڈی نیاد ھنکینی کمک سرکماش حمیدہ بلوچ ءِ چیردستی ءَ برجم دارگ بوتگ – نیاد گچینی مھمان گل ءِ کمک سرکماش شبیر بلوچ ءُ بنجاھی انفارمیشن سیکرٹری عارف بلوچ بوتگ انت – نیاد ءَ بنجاھی سرکیولر، گوستگیں اھوال، شرگداری، گل ءِ کار، ھندی ءُ میان استمانی راجکاری ءُجاورھالانی سر ءَ تران ءَ پد آؤکیں گامگیج ءِ بنگپانی سر ءَ کابینھے گچین کنگ بوتگ انت – نوکیں کابینہ ءَ شھزاد بلوچ سرکماش ءُ بشیر بلوچ ھنکینی جنرل سیکرٹری گچین کنگ بوتگ انت –

دیوان ءَ تران کنان ءَ گل ءِ سرکماش شبیر بلوچ ءِ گوشگ ات کہ بلوچستان مروچی ھما چار راھے سر ءَ اوشتوک انت کہ بلوچ راج بازیں اڈ ءُ جنجالانی دیمپان انت چریشی ءَ بلوچ ورنا بازیں چاگردی سلکاری ءِ اماچ انت – بلوچستان ءَ نشہ ءِ باپاری روچ پہ روچ گیش بوان انت ءُ ورنا گیشتر اشی ءِ آماچ بوان انت – ورنایانی چاگردی سلکاریانی آماچ بوگ ءِ مستریں سوب زانشجاہ ءِ نہ بوگ انت –

آئی ءَ گوشتگ کہ بلوچستان ءَ اے وھدی زانت نیستی ھساب انت بلوچستان اے وھدی ھما دمگانی تہ ءَ ھوار انت کہ وانندگی نیست – شھدربرجاہ نیستی ھساب انت – بلوچستان ءَ ھرچی کہ وانگجاھے ھست انت آ پوجی بنجل دروشم انت ءُ ورنا زانت دربرگ ءَ زبھر انت – راجی لوٹانی پیلو کنگ ءَ مارا لوٹ ایت زانت ءُ زانشت ءِ ھاتر ءَ وتی جھد برجاہ دارگی انت ءُ ھما پندل کنوکیں مردم پجاہ آرگی انت کہ مارا چہ زانت دور دارگ انت –

دیوان ءَ تران کنان ءَ بنجاھی انفارمیشن سیکرٹری عارف بلوچ ءِ گوشگ ات کہ بلوچ اسٹوڈنٹس ایکشن کمیٹی ءَ اولی روچ ءَ چی نودربرانی ھک ءِ ھاتر ءَ جھد کنگ ءَ انت بلوچ نودربر گل ءِ بستار ءَ مئے جھد ھمیش بیت اِنت کہ نودربرانی میان راجکاری ءُ زانشتی باوست ءِ بندات بہ کن ایں ھمے سوب ءَ گل ھیلکاری بندات کنگ بوتگ ءُ نوشت ءِ دروشم ءَ یک ھنچیں راجکاری لٹریچر ءِ اڈ دیگ ءِ جھد کتگ کہ بلوچ ورنایاں زانت ءُ زانشتی درگت ءَ گیشتر مھکم بہ کنت – اتل ھنکین ھمیشی ءَ برجاہ بہ داریت ھر ھپتگ ھیلکاری سرکل برجم بہ داریت نوشت ءِ درسیں آرٹیکلاں درسیں باسک بہ وان انت –

دیوان ءَ مرکزی سرکیولر، گوستگیں کار، شرگداری، گل ءِ کار، ھندی ءُ میان استمانی راجکاری ءُجاورھال ءُ آؤکیں گامگیج ءِ بنگپانی سر ءَ گپ ءُ تران ءَ پد نوکیں کابینھے گچین کنگ بوتگ انت کہ شھزاد بلوچ سرکماش، سدرہ بلوچ کمک سرکماش، بشیر بلوچ جنرل سیکرٹری، علی حیدر بلوچ ڈپٹی جنرل سیکرٹری ءُ شوکت بلوچ ھنکینی انفارمیشن سیکرٹری گچین کنگ بوتگ انت –

دیوان ءِ گڈسر ءَ بنجاھی اگدہ داراں نوک گچین کنگ بوتگیں کابینہ سوگند گپتگ ءُ آھاں کول کتگ کہ گل ءِ کارانی دیم ءَ برگ ءَ ھر وڈیں جھد کن انت –

ایس ایس ٹی فورم ءِ ھمک سالی دیوان مروچی شمبے ءِ روچ ءَ کیچ ءِ بنجاھی شھر تربت ءَ ماڈل ہائی سکول ءَ فورم ءِ دمگی کوارڈینیٹرامداد ملک ءِ چیر دستی ءَ برجم دارگ بوتگ – کہ اودا ایس ایس ٹی ءِ جنین ءُ مردیناں مزنیں کچے ءَ بھر زرتگ –

دیوان ءَ فورم ءِ دمگی کوارڈینیٹر امداد ملک، ڈپٹی کوارڈینیٹر ظہور احمد بلوچ ءُ ڈپٹی ڈسٹرکٹ ایجوکیشن تربت ءِ ناصر پھلان، محمد اکبر ءُ شبیرہ بلوچ ءَ تران کتگ –

ترانکارانی گوشگ ات کہ اے فورم گوستگیں سال ءِ شانزدہ نومبر اڈ دیگ بوتگ اشی ءِ مول ایس ایس ٹی آنی دیمروئی ءُ آھانی جیڑھاں واکداراں سر کنگ ءُ آھانی گیشگیوار کنگ – بنجاہ ء پہ دیمروئی درگت ءَ مئے سروکاں جوانیں کرد پیلو کتگ – کیچ ءَ یک سال ءِ میان ءَ ایس ایس ٹی یکجاہ کتگ ءُ فورم ءِ مولانی درگت ءَ سرپدی داتگ کہ اشی ءِ تہ ءَ مارا سوبمندی بوتگ – سرکاری تبک ءَ وزیراں بگر تاں سیکرٹریاں ما وتی کلوہ سر کتگ –

آھانی گوشگ ات کہ اے یک یونین، یا ایسو سیشن ءِ نہ انت بلکنہ یک فورم یے کہ اشی ءِ ایجنڈہ بس ماسٹرانی دیمروئی – سرکار ءِ نیمگ ایس ایس ٹی آں پہ ھبدہ گریڈ بگر ھبدہ گریڈ تاں دیمروئی بس پراڈی یے مئے جھد ءِ مول مراد ھبدہ گریڈاں ھژدھمی گریڈ ءَ پرموشن دیائینگ – پرچاکہ ایس ایس ٹی چِل ءُ پنجاہ سالانی میان ءَ بس ھمے یکیں گریڈ ءِ سر ءَ کار کنگ ءَ انت –

آھانی گوشگ ات کہ بیوروکریسی ایس ایس ٹی ءُ ایندگہ کار کنوکانی دیما بلاھیں اڈاند یے بیوروکریسی ءِ گوم ءَ جوانیں شوربندی ءَ گوں آئی دیم ءَ داریں – آھانی گوشگ ات کہ فورم ءِ جھد ءِ سوب ءَ کیچ ءَ یکسد ءُ پنچ ٹیچر پرموٹ بوتگ انت – درسیں ایس ایس ٹی ءَ آنی زمہ واری انت آ اے فورم ءِ ھمراہ داری ءَ بہ کن انت ءُ اشی ءَ.مھکم بہ کن انت تانکہ اشی ءِ برورد زوت مارا سر بہ بنت – فورم ءَ پھال کنگ ءِ ھاتر ءَدرسیں ایس ایس ٹی مالی کمک بہ کن انت –

روکپتی بلوچستان ءَ دو بندیگیں مردم ایرانی آمیدگس ءِ پرمان ءَ پاھو دیگ بیتگ اَنت-

مروچی روکپتی بلوچستان ءِ بنجاھی شھر دزاپ ءِ مزنیں جیل ءَ ایرانی آمیدگس ءِ پرمان ءَ دو بندیگیں بلوچ پاھو داتگ اَنت-

پاھو دیگ بیتگیں مردمانی پجار جمعہ گمشادزئی ء رمضان ءُ ھابیل شھنوازی حسین زئی ء عباس ءِ ناماں زانگ بیتگ اَنت-

ھالانی رد ءَ شھنوازی سَے سال ءَ پیش نشہ باپاری ءِ بھتام ءَ گرگ بیتگ ءُ آئی ءِ سر ءَ پاھو اتک – ھمے وڑ گمشادزئی دو سال پیش گرگ بیتگ –

سال دوھزار ءُ بیست ءُ یک ءَ داں انیگ ءَ پنجاہ چوشیں وئیل رپورٹ بیتگ اَنت اشانی توک ءَ ھپتاد ءُ نُھ کس پاھو دیگ بیتگ –

پاھو دیگ بیتگیں مردمانی توک ءَ سی ءُ چار نشہ باپاری، ھپت کوشانی پژدر ءَ، چار سیکورٹی پورسز ءِ سر ءَ ارشانی پژدر ءَ، سَے کس ناشریں ٹولیانی کمکاری ءِ پژدر ءَ ءُ دو کس وت ماں وتی جنگانی پژدر ءَ پاھو دیگ بیتگ اَنت-

روکپتی بلوچستان ءَ گوستگیں روچ ءَ آدینگ ءِ نماز ءَ پد زھرشانی کنگ بیتگ ءُ سے کس ھم بیگواہ کنگ بیتگ-

روکپتی بلوچستان ءِ بنجاھی شھر دزاپ ءَ گوستگیں روچ ءِ آدینگ ءِ نماز ءَ پد مھلوک ءَ سی ستمبر ءَ پوج ءِ دست ءَ جنگ بیتگیِں مردم ءُ شھر ءَ سیکورٹی ءِ ترندیانی ھلاپ ءَ زھرشانی کتگ-

زھرشانی روانکانی دروشم ءَ شھر ءِ جتا جتائیں دمکاں تران بیتگ ءُ اود ءَ آیاں سیکورٹی ءِ ترندی ءِ ھلاپ ءَ اوگام ءُ مردمانی کوش ءِ بگیری ءَ اوگام جتگ-

زھرشانی کنوکاں ھما جاہ ءَ گیشتر اوگان جتگ کہ گوستگیں ماہ ءِ سی ستمبر ءَ پولیس تھانہ ءِ دیم ءَ پولیس ءِ تیرگواری ءَ بازیں مردمے کُشگ بیتگ ات-

آیاں گوشتگ کہ ایرانی لشکر ءَ پرامنیں زھرشانی کنوکانی سر ءَ تیرگواری کتگ ءُ مردم کشتگ ءُ زدگ کتگ اَنت ءُ اشی ءَ ابید ھم آئی ءَ شھر سیکورٹی ترند کتگ ءُ چریشی ءَ شھری سک ءَ تکانسر اَنت-

دومی نیمگ ءَ اطلاعات ءَ پنجاہ ءُ چار مردمانی دزگیری ءِ ھال بیتگ بلے اے گپ ءِ توک ءَ دگہ گیشیں ھال پدر نہ بیتگ اَنت-

ھمے وڑ ءَ سَے مردم دزگیر کنگ ءُ پد ءَ یک کسے یل کنگ بیتگ-

ھالانی رد ءَ گوستگیں روچ ءَ شعیب سلھشور برنا ء شریف، ایوب شاھ بکش ء ھانی بھادر ےُ فرشید نوتانی ء حکیم بلوچ ءِ ناماں زانگ بیتگ اَنت-

اشانی توک ءَ شعیب پد ءَ مروچی یل کنگ بیتگ ءُ آ دگہ دو کسانی باور ءَ ھچ ھال نیست اِنت-

زانگ بہ بیت روکپتی بلوچستان ءَ چھبار ءَ پولیس ءِ آفیسر ابراھیم کوچکزئی ءِ دست ءَ پانزدہ سالی جنکوے ءِ گون ءَ سلکاری ءَ پد روکپتی بلوچستان ءَ یک برانزے چست بیتگ ات چرے برانز زھرشانی ءَ مٹ بوت ءُ یک ھونی دروشمے ءَ دیم ءَ اتک-

اے زھرشانیانی درچاں سد ءِ کچ ءَ شھریانی ساہ ءُ جان ارجان بیت اَنت ءُ سَے سد ءِ کچ ءَ شھری زدگ ءُ زامبیل بیت اَنت –

چرے زھرشانیاں پد روکپتی بلوچستان ءِ مردم ھمک آدینگ یک سیاہ ءُ ھونریچی ءِ رنگ ءَ زھرشانی کنگ ءَ گندگ بیگ ءَ اَنت-

سر بیتگیں ھالانی رد ءَ ھاران پولیس ءِ ڈی آئی جی رخشان نزیف اھمد کرد ءُ ایس پی مھمد آصف حلیم ءِ گوشگ ءِ سر ءَ سٹی تھانہ ھاران پولیس ءِ ایس ایچ او مھمد قاسم بلوچ ءَ ایڈیشنل ایس ایچ او سدھیر اھمد ءِ ھمراھج ءَ دزانی ھلاپ ءَ بیڑ برتگ ءُ دزگیر کتگ اَنت-

پولیس ءِ رد ءَ دزانی گور ءَ دز اتگیں پرپٹ ءُ دگہ چیز دزکپتگ اَنت کہ چریشی ءَ آ دزگیر کنگ ءُ بند کنگ بیتگ اَنت-

پولیس ءِ رد ءَ گپتگیں دز چار کس اَنت کہ اشانی نام پولیس ءَ اے وڑ ءَ پدر کتگ اَنت، نوید ء ماسٹر منظور، حبیب اللہ ء رمضان، اظھر الدین ء مھمد علی ءُ ھالد ء عبدالمالک ءِ ناماں زانگ بیتگ اَنت-

ایس ایچ او مھمد قاسم ءِ رد ءَ اے دزاں شھر ءَ بازیں پرپٹ ءُ دگہ چیزانی دزگ ءِ ھال سر بیتگ اَنت ءُ چریشی ءَ پولیس ءَ آیانی پشتگیری کتگ-

آئی ءَ گشتگ کہ اشانی گور ءَ دو ھنڈا ءُ سَے سیون ٹی پرپٹ دز کپتگ اَنت ءُ گمان ھمے بوگ ءَ اِنت کہ اشاں گیش چیز دزی کتگ –

پولیس ءِ رد ءَ اے دز شھر ءَ دزی ءُ ڈنگی ءُ شھر ءَ دگہ ناشریاں ھوار بیتگ اَنت-

آئی ءَ گشتگ کہ اشانی ھلاپ ءَ ارزی نبشتگ کنگ بیتگ ءُ گیشیں پٹ ءُ پول کنگ بیگ ءَ اِنت-

ھاران ءِ رنگ ءَ بلوچستان ءِ دگہ جاھاں ھم دزی ءُ ڈنگی یکشل ءَ رپورٹ بوگ ءَ اَنت-

سیاسی لس مھلوک ءِ گوشگ اِنت کہ بلوچستان ءَ دُزانی پشتگیری کنوک کہ آیاں لس توپک ءُ دگہ سلاہ دیگ بیتگ اَنت ءُ آیاں لس نام ءَ گیشتریں دُزاں ’ ڈیتھ اسکواڈ ‘ ءَ بندوکی گوشگ ءَ اَنت-

سیاسی مھلوک ءِ گوشگ اِنت کہ ’ڈیتھ اسکواڈ‘ بلوچ زرمبشت ءِ بگیری ءَ جوڑ کنگ بیتگ ءُ چریشی ءِ سر ءَ آئی ءَ ھرچ وڑیں سلکاری ءُ دُزیانی ھم مھار گٹ ءَ دیگ بیتگ اَنت-

روکپتی بلوچستان ءَ سلاہ بندیں مردماں یک مردمے تیرگواری کتگ ءُ کشتگ-

ھالانی رد ءَ روکپتی بلوچستان ءِ دمگ سراوان ءَ سلاہ بندیں مردماں تیرگواری کرتگ ءُ سپاہ ءَ بندوکیں یک مردمے کشتگ –

کشگ بیتگین مردم ءِ پجار امین سیاھانی ء رضا جھمنند سراوان ءِ نام ءَ زانگ بیتگ-

ھالانی تہ ءَ گوشگ بیتگ کہ کشگ بیتگین مردم ءِ پت سراوان ءَ سپا ءِ بنجلے ءِ کماندار اِنت ءُ آئی ءِ زھگ ءِ سیادی گوں سپاہ ءَ ھم بیتگ –

کوش ءِ سبب تنی وھدی زانگ نہ بیتگ نانکہ دگہ گپ دیم ءَ اتکگ اَنت-

یک امریکی زالبولے ءَ کاسمیٹکس ءِ کمپنی لوریئل ءِ سر ءَ بھتام جتگ کہ آئی ءَ مودانی تچک کنوکیں کِریم ءِ کارمرد کنگ ءَ پد شومک ءِ نادراھی ءِ گمان بیتگ-

فرانسیسی ھبر رساں ادارہ اے ایف پی ءِ رد ءَ جینی مچل نامیں زالبولے ءَ ارزی نبشتہ کنائینتگ کہ آئی ءَ دو دھکاں گیش داں لوریئل (یو ایس اے) ءِ کِریم کارمرد کتگ پد ءَ آئی ءِ پژدر ءَ شومک ءِ نادراھی ءَ گپتگ ءُ چریشی ءِ سبب ءَ آئی ءَ آپریشن ءِ سبب ءَ بیضہ دانی کشگ کپتگ-

اے ارزی نامہ نیشنپ کینسر انسٹی ٹیوٹ ءِ جرنل ءَ یک پٹ ءُ پولے ءِ وھد ءَ لھتے روچ ءَ پد دیم ءَ اتکگ چریشی ءَ مودانی تچک کنوکیں کِریم ءَ کیمیائی چیز کارمرد بیتگ ءُ بیضہ دانی ءَ کینسر ءَ گوں جوڑینتگ-

پٹ ءُ پول ءَ گوشگ بیتگ کہ ھما زالبول سال ءِ توک ءَ چار رند ءَ گیش اے کرِیم ءَ کارمرد کنت گڑا کارمرد نہ کنوکیں زالبول ءَ گیش کینسر ءِ بوگ ءِ دو کچ گیش بیت اِنت-

بیضہ دانی کینسر اگاں چہ اینکس نامان نہ اِنت بلے اشی ءِ وئیل امریکہ ءَ گیشتر سیاہ پوستیں زالبولاں گیش بیگ ءَ اِنت-

اسرمندیں زالبول مچل ءِ وکیل بین کرمپ ءَ یک درشانے ءَ گشتگ کہ سیاہ پوستیں زالبول بازیں وھداں اے کریم ءِ آماچ بیتگ ءُ چریشی ءَ چہ آئی ءَ زرتگ بیتگ-

آدینگ ءِ روچ ءَ کنگ بیتگیں ارزی نامہ ءَ دگہ کمپنیانی ابید فرانسیسی کاسمیٹکس ءِ مزنیں کمپنی لوریئل ءِ امریکہ شاک ءَ چہ درایگ ءِ لوٹ کتگ-

کرمپ ءَ گوشتگ کہ ما گمانی اشی ءِ سر ءَ سرپدی زرت کن ایں کہ جینی مچل ءِ ناوشیں کیس ھما کیساں چہ یکے اے کمپنیانی ناپرواھی ءِ رنگ ءَ سیاہ پوستیں زالبولاں وتی نپ ءِ چست کنگ ءَ آیاں تاوان دے اَنت ءُ لوریئل کمپنی ءِ نیمگ ءَ تنی وھدی اے ارزی ءِ بارو ءَ دگہ گپ دیم ءَ نیتکگ اَنت –

لوریئل کمپنی نامی ئیں کمپنیانی توک ءَ یک کمپنی یے کہ آئی ءَ گیشتریں کار ءُ کسب لوشن کریم، دگہ چیزانی توک ءَ بندوک اَنت-

اے مودانی تچک کنوکیں لوشن کریم دابیں یک کِریمے کہ لس رنگ ءَ ھما بوڑی لوشن ءُ جِل داب ءَ اِنت ءُ چریشی ءَ گیشتر مردم ھما زور اَنت کہ آیانی مود چنگ اَنت ءُ وتی مودانی تچک کنگ بلے اے سما آیاں نہ کپ ایت کہ اے کریم لوشن ءِ کارمرد کنگ ءَ چنکس آ تاوان بار بنت ءُ وتی زند ءَ چہ زبھر بوت کن اَنت-

یوکرین ءِ جنگ ءِ درگے ءَ روس ءُ امریکہ ءِ وزرا ءِ دفاعانی میان ءَ گوانکو رھوت بیتگ چریشی ءَ میان اُستمانی پھزداری ءِ درگت ءَ باوست بیتگ اَنت-

ھبررساں ایجنسی اے ایف پی ءِ رد ءَ اے رھوت یک ھنچیں وھدے ءَ بیتگ کہ وھدیکہ یوکرین ءِ مفتوحہ شھف خیرسن ءِ زورگری ءَ روس ءِ واکدار زرباری شھر ءَ میتگ ءِ مٹ کنگ ءِ جار جتگ ات-

کیئف ءِ لشکر خیران ءَ روس ءِ زورگری ءِ ھلاس کنگ ءَ پیشگامی کنگ ءَ اَنت- ھردوکہں وزرایانی اے رھوت ءِ بارو ءَ دگہ گیشیں گپ دیم ءَ نیتکگ اَنت بلے ھردوکہں ڈیھانی اے رھوت ءَ چہ ھمے زانگ بیت اِنت اے ھردوک یوکرین ءِ بارو ءَ گپ ءَ بیتگ اَنت-

روس ءِ وزارت ءِ دفاع ءَ وتی درشان ءَ گشتگ کہ میان اُستمانی پھزداری ءِ درگت ءَ باوست بیتگ ءُ اشی ءِ توک ءَ یوکرین ءِ جاورھال ھوار اَنت-

امریکی پوج ءِ جارکش ءِ درشان ءِ رد ءَ وزیر دفاع آسٹن ءَ یوکرین ءِ ھلاپ ءَ برجاھیں جنگ ءِ وھد ءَ رھوت ءِ دارگ جوان لیک اتگ-

فروری ءَ یوکرین ءُ روس ءِ بندات بیتگیں اے جنگ ءِ وھداں ھردوکیں وزیرانی دومی بر ءِ رھوتی اِنت اشی ءَ پیسر مئی ءِ ماہ ءَ امریکی وزیر دفاع ءَ ماسکو ءَ چہ سرجمی ءَ جنگ ےِ بند کنگ ءِ لوٹ کتگ –

روس ءِ لشکر ءِ نیمگ ءَ یوکرین ءِ بنجاھی شھر کیئف ءِ سر ءَ پیش کدمی ءِ وھد ءَ گھگیری ءَ ماسکو ءِ لشکر ءَ پشت کنزی کنگ کپتگ ءُ چریشی ءَ پد ماسکو ءِ لشکر ءَ رودراتکی ڈنباس ءُ خارکیف ءِ دمگاں سوبمندی بیتگ اَنت ءُ یوکرین ءِ سر ءَ وتی مھکمی ءِ منانک اِنت-

بلوچ اسٹوڈنٹس ایکشن کمیٹی (بساک) ءِ بنجاھی آرگن “نوشت ” ءَ پد پہ زھگاں تاک “گام ” ءِ چن لانچ بوتگ زوت پہ زھگ ءُ وانوکاں سر بیت انت اے درشانی بساک ءَ وتی تندجاھاں کرتگ ءُ آئی ءَ تاک ءِ پیش تاک ھم تالان کتگ –

تاک گام بلوچی ءُ براھوئی زبان ءِ تہ ءَ انت ءُ آئی ءِ تہ ءَ زھگانی نبشتہ کتگیں نکان شنگ کنگ بنت –

زھگانی تاک گام ءِ درگت ءَ بساک ءِ بنجاھی مزن کارگشاد آصف بلوچ ءَ گُشت کہ گام بلوچ اسٹوڈنٹس ایکشن کمیٹیءِ ھما ھیلکاری کارانی درچ اِنت کہ بِندات ءَ چہ گل ءَ گون اِنت۔ سال دوھزار ءُ نوزدہ ءَ چہ گل ءِ بنجاھی پتر ءِ نیمگ ءَ پیسلہ زورگ بوتگ کہ گل ءِ سَے ماھی ھیلکاری آرگن “نوشت” چاپ ءُ شِنگ کنگ بیت- ھمے رد ءَ چہ گل ءِ نیمگ ءَ بنجاھی سَے ماھی آرگن نوشت چاپ ءُ شنگ کنگ برجاہ اِنت –

آئی ءَ دیمتر ءَ گُشت کہ ھمے سال ءَ بزاں دوھزار بیست ءُ دو ءَ گل ءِ سئیمی بنجاھی پتر ءِ دیوان ءَ پیسلہ زورگ بوتگ کہ گل پہ زھگاں تاکبند گام چاپ ءُ شِنگ کنت – جار جنگ ءَ رند چہ زھگانی نیمگ ءَ نبشتہ بوتگیں نبشتانک، کسہ ءُ شائری ءِ یک مزنیں مواد ءِ گل ءَ روان دیگ بوتگ ءُ گل ءِ لبزانکی کمیٹی ءَ چِن ءُ لانچ ءَ پد نبشتانک تاکبندءِ دروشم ءَ دیم ءَ آؤرتگ انت –

آئی ءَ گُشت کہ بساک پہ بلوچی ءُ براھوئی دویں زباناں کار ءَ اِنت – چوش کہ نوشت ھر دوئیں زباناں چاپ ءُ کنگ بوتگ ءُ ھمے پیم ءَ گام ھم بلوچی ءُ براھوئی دوئیں زباناں اِنت –

راج ءِ وش بھتی اِنت کہ بلوچ زھگ مرچیگیں وھد ءَ بلوچی ءُ براھوی ءَ نبشتہ کنگ ءَ اَنت۔ مئے جُھد اِنت کہ آوکیں پدریچ درآمدی زباناں نبشتہ مہ کن اَنت ءُ وتی شھدیں زبان بلوچی ءُ براھوی ءَ نبشتہ بکن اِنت – گام ھمے جُھد ءِ یک کسانیں بھر یے –

بلوچ اسٹوڈنٹس ایکشن کمیٹی ءِ نیمگ ءَ تاک ءِ گڈی پیج ءَ پہ زھگاں بلوچی ءُ براہوئی زبان ءِ تہ ءَ کلوہ ءِ نبشتگ کہ زھگاں! تاک گام پہ شما شمئے ماتی زبانانی وانگ ءُ ھیلکاریاں بگر تاں نبیسگ ءَ کسانیں جُھدے – بندات ءَ مارا امیت نہ ات شما مئے اولی جار ءَ پہ تاک ءَ چشیں جوانیں نکان راہ دئیت – چہ شمے نکاناں سما بوت کہ شمارا وتی زبان، لبزانک ءَ گوں ھُب ءُ ھدوناکی ھست اِنت – بس ھمے بودناکی شوھازگی انت – البتہ شمے نبشتانکانی بنرھبند ءَ زبان ءِ جیڑہ بوتگ انت بلے چوش کہ شمے بنداتی سپر انت اے جیڑہ ءِ نہ انت – امیت اِنت کہ شما وتی ردیاں مار ایت ءُ دیم رند ءَ گھتر نبشتہ کنگ ءِ جھد ءَ کن ایت – گام ءِ در پہ ھمک بلوچ زھگاں پچ انت – بیا ات وتی ماتی زباناں بوان ات ءُ نبشتہ کنگ ءَ ھیلدار بہ بیت –

دومی نیمگ ءَ چاگردی ترامجاھاں بساک ءِ نیمگ ءَ شنگ بؤکیں زھگانی تاک گام ءِ ستا کنگ ءَ بوگ انت کہ اے تاک پہ زھگاں ماتی زبان ءَ وانگ ءُ نبشتہ کنگ ءِ سکین ءَ دنت –

بلوچ لبریشن آرمی ءَ دزگیر کُتگیں دو پاکستانی لشکری کارمند فرنٹئیر کورپس ایف سی ءِ جی سی او کلیم اللہ ءُ ملٹری انجلینس (ایم آئی) ءِ اپسر فیصل بشیر ءِ تامری کلوہ شنگ کُتگ۔

بلوچ لبریشن آرمی ءِ رسانک ھکل ءِ نیمگ ءَ شنگ بیتگیں یک لکیں تامر ءِ تہ ءَ گندگ بیت کہ دو پاکستانی لشکری کارمند کلیم اللہ ءُ فیصل بشیر بی ایل اے ءِ دزگیری ءَ اَنت ءُ چہ پاکستانی سرکار ءَ دزبندی کنگ ءَ اَنت کہ آیانی یل کنائنگ ءِ ھاتر ءَ جھد کنگ بہ بیت ءُ بی ایل اَے لوٹ منگ بہ بنت۔

بیست ءُ پنچ ستمبر دوھزار بیست ءَ بلوچ لبریشن آرمی ءَ ھاسیں آپریشن ءِ تہ ءَ ھرنائی ءَ دگ بستگ اَت ءُ دو پاکستانی پوجی کارمند دزگیر کُتگ اِت اَنت۔ دزگیر بیتگیں کارندھانی تہ ءَ یک یے ءِ پجار ایف سی ءِ جونیئر کمیشنڈ اپسر کلیم اللہ ءِ نام ءَ بیتگ اَت ءُ دومی ءِ پجار فیصل بشیر ءِ نام ءَ بیتگ اَت کہ آئی ءِ سیادی گوں ایم آئی ءَ گون اِنت۔ بی ایل اے ءِ شنگ کُتگیں درشانے ءِ رد ءَ دویں دزگیر کُتگیں کارندہ بلوچستان ءِ تہ ءَ پاکستان ءِ زورگیریں پالیسیانی دیم ءَ برگ بلوچ ورنایانی دزگیری سرمچاری بگیر ءَ بیڑانی تہ ءَ ھوار بیتگ اَنت۔

بی ایل اے ءَ دیمتر ءَ گُشتگ اَت کہ گل ءِ سنئیر کمانڈ کونسل ءَ پیسلہ کُتگ کہ اے دویں کارندھاں بلوچ جنگی بندیگانی گوں مٹ کنگ ءُ اشاں یل دیگ ءَ ساڑی اَنت۔

بی ایل اے ءِ نیمگ ءَ شنگ بیتگیں درشان ءَ پد گندگ بیتگ کہ فیصل بشیر ءِ کھول ءَ آئی ءِ یل کنگ ءِ ھاتر ءَ زھرشانی کُتگ ءُ چہ بی ایل اے ءَ دزبندی کُتگ کہ آیانی مردم ءَ یل بہ کن اَنت ءُ سرکار ءَ چہ لوٹ کُتگ اَت کہ بی ایل اے ءِ لوٹاں بہ من اَنت۔

مروچی شنگ بیتگیں تامر بند ءِ تہ ءَ گندگ بیت کہ کلیم اللہ چہ وتی کھول ءَ دزبندی کنگ ءَ اِنت کہ سرمچارانی دست ءَ آھانی یل کنگ ءِ ھاتر ءَ بہ رو انت اسلام آباد ءُ دگہ شھراں زھرشانی بہ کن اَنت ءُ سرکار ءَ گُش ایت کہ بی ایل اے لوٹاں بہ من اَنت۔ دومی نیمگ ءَ کلیم اللہ چہ وتی کماش ءَ دزبندی کنت کہ آ وتی دومی زھگ ءَ پد ءَ توار بہ کنت ءُ درستیں ایف سی ءُ پوجی کارمنداں گُش ایت کہ بلوچستان ءَ ڈپٹی کنگ ءَ ابید پوج ءَ یل بہ کن اَنت ءُ دگہ کار بہ کن اَنت اگاں نہ آ ھم بی ایل اے دست ءَ نشانگ بیت کن اَنت۔

ھمے پئیم ءَ فیصل بشیر ھم چہ وتی کھول ءَ دزبندی کنگ ءَ اِنت کہ سرکار ءَ گوں زھرشانی بہ کن اَنت دانکہ سرکار بی ایل اے گپاں بہ من اِیت ءُ آ یل کنگ بہ بنت۔

زانگ بہ بیت بی ایل اے نیمگ ءَ ھمے سال ءِ تہ ءَ اے دومی انچیں انٹیلجنس اُرش ءِ بیتگ کہ پوجی کارندہ دزگیر کنگ بیتگ اَنت چد ءُ پیسر دوازدہ جولائی دوھزار بیست دو ءَ پاکستانی پوج ءِ یک کرنل ءِ لئیق مرزا بی ایل اے ءِ تک اسپیشل ٹیکٹیکل آپریشنز سکواڈ ءَ چہ زیارت ءِ نزیک ءَ بیگواہ کُتگ اَت، وھدیکہ کرنل لئیق بی ایل اے ءَ لھتے روچاں پد چاردہ جولائی ءَ مرگ ءِ سزا داتگ اَت ءُ کُشتگ اَت۔

اے گپ تنی وھدی پاکستانی واکدارانی نیمگ ءَ پدر نہ بیتگ کہ آ بی ایل اے ءِ لوٹاں سرجم کنت یا نہ کنت بلے آئی ءَ داں تنی وھدی اے مردم بی ایل اے ءَ داشتگ اَنت-