TBP Balochi

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ ھپت سد ءُ نود ءُ نھ روچ سرجم بوتگ انت – مروچی بلوچ اسٹوڈنٹس پجار ءِ سرکماش زبیر بلوچ گوں وتی سنگتاں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگین مردمانی میان ءَ تران کنان ءَ وی بی ایم پی ءِ سرکماش ماما قدیر بلوچ ءَ گوشتگ کہ بلوچ راج جنگ ءِ تہ ءَ انت ءُ نازکیں دور ءَ گوزگ انت – بلوچ ورنایانی آوار جنی ءَ روچ پہ روچ گیشی آیان انت – پنجاپ ءِ نادراھجاھاں بلوچانی ژانگولین جونانی امبار انت کہ بے سیاد وارس کنگ بوتگ انت –

ماما قدیر بلوچ ءِ گوشگ انت سی ٹی ڈی ءَ بلوچستان اسمبلی رزا گون انت کہ بلوچ ءِ چکچینی ءَ بہ کنت کہ اودا گوشگ بوتگ سی ٹی ڈی ءِ کار دیما برگ بہ بنت ءُ آسراتی دیگ بہ بیت –

آئی ءَ گوشتگ کہ اے وھد شخصیت پرست ءُ ھیروازم ءِ نہ انت بلوچ راجداراں یک مشت بوگی انت ریاست ءِ زوراکی دارگی انت – یکے دومی ءَ اوپار نہ کنگ ءُ یکجاہ نہ بوگ بلوچ راج بدبھتی انت – وتی ھستی ءِ رکینگے ھاتر ءَ مارا یکجاہ بوگ ءَ جھد کنگی انت –

ماما قدیر بلوچ ءَ گوشتگ کہ مروچی بلوچستان ءُ کراچی ءَ ھم بلوچ پھریز نہ انت گوستگیں ماہ ءِ بیست ءُ شش رمس ءَ چہ کراچی ءَ دو ورنا چیریں ادارھانی کارمنداں آوار جتگ ءُ برتگ انت کہ آھانی کھولاں آوار جنی ءِ ھبر راست کتگ انت آھانی پجار گلشاد ء دلوش ءُ سراج اصغر ءِ ناماں چہ بوتگ انت –

ماما قدیر بلوچ ءِ گوشگ ات کہ چہ کراچی ءَ زورانسری آوار جنگ بوتگیں ھردو نودربر انت اگاں آھاں جرمے کتگ گڈا آمیدگس ءَ آرگ بہ بنت –

رژن اسلامی مجلس کیچ ءِ چیردستی ءَ مدرسہ دارالعلوم آپسر تربت ءَ بلوچی زبان ءِ رسم الخط ءِ بنگپ ءِ سر ءَ مراگش ءِ برجم دارگ بوتگ- مراگش ءَ ملا ءُ دینی وانگجاھانی نودربراں مزنیں کچے ءَ بھر زرتگ آھانی تہ ءَ مفتی سرفرازساجد، مفتی ظہیر احمد، مولانا جاسم مجید، مولانا خورشید احمد، مولانا میران، عبدالرزاق آسکانی دگہ مردم ءُ نودربر ھوار بوتگ انت –

مراگش ءَ بلوچ ادیب ءُ بلوچستان اکیڈمی ءِ سرکماش ءُ تربت شھدربرجاہ ءِ اسکالر ڈاکٹر غفور شاد، رژن اسلامی مجلس کیچ ءِ سرکماش یلان زامرانی ءُ مدرسہ ءِ مدیر مفتی فضل الرحمن قاسمی ءَ تران کتگ –

اے درگت ءَ ڈاکٹر غفور شاد ءَ بلوچی زبان ءِ سر ءَ تران کنان ءَ گوشتگ کہ زبان ھر راج ءِ پجار انت، ھاوند ءَ جھان ءِ تہ ءَ بازیں زبان ءَ گپ جنوک ودی کتگ انت، ھر زبان ءِ دیمروئی ءَ مزھب ءُ دین ءِ بلاھیں کرد ءِ ھست اِنت – آئی ءَ گوشتگ کہ مرچی اگاں عربی زبان مھکم انت گڈا آئی ءِ پُشت ءَ اسلام ءِ دابیں دین ھست اِنت مرچی عربستان ءَ ھوار جھان ءِ ھر کنڈ ءَ عربی ھمے واست ءَ دربرگ بیت اِنت پرچہ کہ اشی ءِ تہ ءَ دین ءِ اسلام ھست اِنت ءُ پدا چہ عربی ءَ جھان ءِ دگہ زباناں اسلام شنگ تالان کنگ بیت – آئی ءِ گوشگ ات کہ بلوچی زبان ءِ رواج دیگ ءِ کار بندات ءَ ملایاں کتگ مکتب درخانی ءَ برجمی ءَ پد وھدیکہ بلوچ ملایاں دیستگ دگہ مزھبانی کتاب بلوچی ءَ رجانک ُ شنگ کنگ بوگ ءَ انت گڈا آھاں اے درگت ءَ کُران مجید ءَ ھوار ھدیث ءُ دگہ دینی کتابانی رجانک بندات کتگ کہ چریشی ءَ یک نیمگ ءِ دین ءَ پائدگ رستگ ءَ دومی زبان ءَ ھم پائدگ رستگ – ھمے ھاتر ءَ زبان ءِ زانگ اژدری انت زبان مئے ءُ شمے درسانی میراث انت ایش مارا وتی پدریچ ءَ سر کنگی انت تانکہ اے پھازگ بہ بیت –

ھمے وھد ءَ یلان زامرانی ءَ تران کنان ءَ گوشتگ کہ بلوچی زبان ءِ بنداتی کرن ءَ بلوچ ملایاں بلوچی زبان ءُ لبزانک ھاتر ءَ جوانیں کرد پیلو کتگ کہ آھانی تہ ءَ ملا حضور بخش جتوئی، ملا فاضل درخانی، ملا عبدالغفور درخانی ءُ بابائے بلوچی ملا خیر محمد ندوئی، ملا داد رحمان سلیمی، ملا عبدالغفار زامرانی ءُ مفتی احتشام الحق آسیابادی ءَ ھما کار کتگ انت کہ راجدپتر ءِ تہ ءَ نبیسگ بنت – بلے ھستیں وھدے ملا بلوچی زبان ءُ لبزانک ءِ نیمگ ءَ دلگوش دیگ ءَ نہ انت چریشی سوب ءَ بلوچی زبان ءِ تہ ءَ دینی کتاب ھسابی انت – ھمے ھاتر ءَ ملا ءُ دینی نودربرانی زمہ واری انت کہ آ گوں زبان ءَ وتی سیادی مھکم بہ کن انت –

ھمے درگت ءَ مدرسہ ءِ مدیر ملا فضل الرحمن قاسمی ءَ تران کنان ءَ گوشتگ کہ بلوچی زبان مئے شمے درسانی میراث انت ملایاں لوٹیت کہ آ بلوچی زبان در بہ بر انت اشی ءَ داوت ءُ تبلیغ بہ کن انت تانکہ مئے گپ مئے راج ءَ شریں وڈی ءَ سر بہ بنت – آئی ءَ بلوچستان اکیڈمی ءِ سرکماش ءُ نامداریں لبزانت ڈاکٹر غفور شاد ءُ یلان زامرانی ءِ منت گپتگ ءُ گوشتگ کہ ما آھانی منت ءَ گریں کہ آھاں اے مراگش برجم داشتگ ءُ مئے کمک کتگ ءُ ما دیمتر ءَ ھم ھمے وڈیں مراگش برجم داریں –

ھمے وھد ءَ ڈاکٹر غفور شاد ءَ مرگش ءَ بھر زورکانی دیم ءَ بلوچی زبان ءِ رسم الخط ءِ درگت ءَ لھتے بنکی شک دیم ءَ آؤرتگ انت –

مراگش ءِ گڈسر ءَ دینی وانگ جاہ ءِ مدیر مفتی فضل الرحمان قاسمی ءَ گچینی مھمان کتاب داتگ انت –

ٹی ٹوئنٹی گوازی آسٹریلیا ءَ برجاہ اَنت، مدامی دژمنیں ٹیم پاکستان ءُ انڈیا سپر 12 گوازی ءَمروچی دیم پہ دیم بیتگ اَنت، انڈیا ءَ ٹاس کٹگ ءَ پد پیسر ءَ باؤلنگ ءِ پیسلہ کُتگ۔

پاکستان پیسر ءَ بیٹنگ کنان ءَ بیست اورزانی آسر ءَ ھشت وکٹانی تاوان ءَ 159 رنز اڈ کُتگ ءُ ھندوستان ءَ پہ باج بر بیگ ءَ 160 رنز ءِ ٹارگٹ داتگ۔

چہ پاکستان ءِ نیمگ ءَ جوانیں بیٹنگ کنان ءَ شان مسعود ءَ 52 رنز اڈ کُتگ وھدیکہ افتخار احمد ءَ 51 رنز اڈ کُتگ، وھدیکہ ھندوستان ءِ نیمگ ءَ جوانیں بالنگ کنان ءَ ھرش دیپ سنگھ ءُ ھاردیک پانڈیا ءَ سئے سئے وکٹ زرتگ اَنت۔

ھندوستان ءِ بیٹنگ ءِ وھدءَ بنداتی لیبیگ ھندوستان ءِ کپتان ءَ ھوار زیت آوٹ بیتگ اَنت ءُ انچو گمان بیگ ءَ بیتگ کہ پاکستان اے گوازی ءَ وتی نام ءَ کنت، بلے ھندوستان ءِ نامداریں بیٹسمین ءُ پیسرگیں کپتان ویراٹ کوھلی ءُ ھاردیک پانڈیا ءِ ھواریں لیب ءَ ھندوستان ءِ جاہ پدءَ لیب ءِ تہءَ مھکم کُتگ۔ ھندوستان ءِ نیمگ ءَ ویراٹ کوھلی ءَ 82 رنز اڈ کُتگ ءُ داں گُڈ سرءَ وتی وکٹ ءِ سرءَ اوشتوک بیتگ، وھدیکہ ھاردیک پانڈیا ءَ 40 رنز اڈ کُتگ۔ ھندوستان ءَ پاکستان ءِ دیما ھترناکیں جاورانی دیمپانی کنگ ءَ پد ھم لیب گُڈی بال شش وکٹانی تاوان ءَ وتی نام ءَ کُتگ ءُ پاکستان پروش داتگ۔

چہ پاکستان ءِ نیمگ ءَ جوانیں باؤلنگ کنان ءَ حارث رؤف ءُ محمد نواز ءَ دو دو وکٹ گپتگ۔

ھندوستانی بیٹسمین ءُ مروچیگیں گوازی ءِ کٹارینوکیں ویراٹ کوھلی ءَ پلیر آف دی میچ ءِ داد دیگ بیتگ۔

مروچی ٹی ٹوئنٹی ورلڈ کپ ءِ دومی میچ ءَ سری لنکا ءَ آئرلینڈ ءِ دیما باج بر بیتگ۔ آئرلینڈ ءَ بیست اورزانی آسر ءَ 8 وکٹانی تاوان ءَ 128 رنز اڈ کُتگ وھدیکہ سری لنکا ءَ یک وکٹ ءِ تاوان ءَ 15 اورزانی تہءَ ٹارگٹ سرجم کُتگ ءُ لیب وتی نام ءَ کُتگ۔

بلوچستان ءِ بنجاھی شھر شال ءَ پاکستانی پوج ءِ کاروان ءِ سرءَ سلاہ بندیں مردماں اُرش کُتگ۔ بلوچستان ءِ دمگ بلیدہ ءَ پاکستانی پوجءِ چیردستی ءَ کارکنوکیں کشندہ ٹولی ءِ کاروان ءِ سرءَ اُرش کنگ بیتگ۔ دوھیں اُرشانی تہءَ پاکستانی پوج ءُ کشندہ ٹولی ءِ کارندھاں جانی تاوان ءِ دیمپانی کنگ کپتگ۔

واکدارانی ردءَ شال ءِ نزیکیں ھند مارگٹ ءَ فرنٹیئر کور بلوچستان ءِ اسپیشل آپریشن ونگ ءِ گاڑیانی کاروان ءِ سرءَ گوستگیں بیگاہ ءَ سلاہ بنداں اُرش کُتگ۔

واکداراں دو کارندھانی کُشگ بیگ ءُ صوبیدار ءَ ھوار سئے کارندھانی ٹپی بیگ ءِ ھال راست کُتگ۔

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءَ شال اُرش ءِ زمہ واری زرتگ ءُ گُشتگ کہ اُرش ءِ تہءَ شش پوجی کارندھانی کُشتگ اَنت۔

بلوچ لبریشن آرمی ءِ جارکش جیئند بلوچ رسانکدراں شنگ کُتگیں درشانے تہءَ گُشتگ کہ بی ایل اے سرمچاراں شال ءِ ھند زرغون ءَ یک اُرش یے تہءَ قوضہ گیریں پاکستانی پوج ءِ یک کاروان ئے نشانگ کُتگ ءُ دژمنیں پوجءِ شش کارمند کُشتگ اَنت ءُ صوبیدار ءَ ھوار چار کارندہ ٹپی کُتگ اَنت۔

آئی ءَ گُشتگ کہ قوضہ گیریں پوج ءَ 21 اکتوبر 2022 ءَ زرغون، مارگٹ، بولان ءُ ہرنائی ءِ جتاھیں میتگ ءُ بازارانی تہءَ زوراکی بندات کُتگ۔ ھمے نیام ءَ زیکیں روچ ءَ زرغون گھاٹ ءِ ھند ءَ بی ایل اے ءِ اسپیشل ٹیکٹیکل آپریشنز اسکواڈ (ایس ٹی او ایس) ءَ پہ وھد کاروائی کُتگ ءُ ھما وھدءَ دشمن ءِ سر بستگ ءُ اُرش کُتگ کہ آیانی دہ گاڑیانی کاروان ھمے ھندءَ گوزگ ءَ بیتگ اَنت۔

آئی ءَ دیمترءَ گُشتگ کہ اُرش ءِ تہءَ دژمنیں پوج ءِ شش کارمند کُشگ ءُ صوبیدار اختر جان ءَ ھوار چار کارمند ٹپی بیتگ اَنت وھدیکہ مزنیں سلاھانی آماچ بیگ ءَ چہ دژمن ءِ دو گاڑی تاوانبار بیتگ اَنت۔

جارکش ءَ گُڈ سرءَ گُشتگ کہ بلوچ لبریشن آرمی اے اُرش ءِ زمہ واری ءَ من اِیت ءُ قوضہ گیریں پوج ءِ درکپگ ءَ داں مئے اُرش ترندی ءَ گوں برجاہ مان اَنت۔

ھمے پئیماں بلوچستان ءِ دمگ بلیدہ ءَ یک اُرش یے تہءَ ریاستی چاریگانی کشگ ءِ زمہ واری بی ایل ایف ءَ من اِتگ۔

بلوچستان لبریشن فرنٹ ءِ جارکش میجر گھرام بلوچ ءَ گُشتگ کہ آدینگ یِ روچ ءَ سھب بام ءَ بلیدہ ءَ سرمچاراں ریاستی چاریگانی یک سلاہ بندیں ٹولی ءِ پرپٹ سواریں کاروان ءِ سرءَ اُرش کُتگ کہ اِشی تہءَ سئے کارندہ مرتگ اَنت۔ اے ٹولی مسلح دفاع نامیں گل ءِ پلیٹ فارم ءَ چہ پاکستانی پوج ءِ کمک کاری کنگ ءَ اِنت۔

جارکش ءَ گُشتگ کہ اُرش ھما وھدءَ کنگ بیتگ کہ وھدے استانی سلاہ بندیں ٹولی ءِ ھپت پرپٹانی سر ءَ بندوکیں کاروان گَشت کنگ ءَ بیتگ۔

میجر گھرام بلوچ ءَ گُشتگ کہ گل ءِ سرمچاراں پیسر ءَ چہ دگ بستگ بیتگ ءُ ریاستی کشندہ ٹولی ءِ سرءَ وتکاریں سلاھاں گوں اُرش کُتگ کہ اِشی ءَ شہ سئے چاریگ مرتگ ءُ بازیں ٹپی بیتگ اَنت۔ اُرش ءَ پد پاکستانی پوج مزنیں کساس ءَ اُرش جاہ ءَ رستگ۔

جارکش ءَ گڈسر ءَ گُشتگ کہ بلوچستان ءِ آزادی ءَ داں دژمنیں لشکر، ریاستی ڈیتھ سکواڈ ءُ آیانی کمکارانی بگیر ءَ اُرش برجاہ مان اَنت۔

گوریچان وزیرستان ءَ پاکستانی پوج ءِ سر ءَ بیتگیں اُرش ءَ بنداتی ھالانی رِد ءَ چار کارندہ سک ٹپی بیتگ اَنت-

پوج ءِ سر ءَ بیتگیں اُرش گوریچان وزیرستان ءِ دمگ سپین وام ھند ءَ بیتگ-

اِھوالکارانی رِد ءَ تھسیل سپین وام ءَ پاکستانی پوج ءِ گاڑی ءِ نزیک ءَ وتکش تراکے بیتگ، وتکش تراک ءَ چار کارندہ ٹپی بیتگ اَنت دو ءِ جاور نگیگ گْوشگ بیگ ءَ اَنت-

ٹپی بالگرد ءِ سر ءَ سی ایم ایچ بنوں ءَ برگ بیتگ اَنت-

دومی نیمگ ءَ خیبر ءِ دمگ شلوبر ءَ شپ ءِ وھد ءَ ایف سی چیک پوسٹ ءِ سر ءَ اُرش ءَ سرکاری واکدارانی رِد ءَ ایف سی ءِ یک کارندھے ٹپی بیتگ، پوج ءِ پسّھی اُرش ءَ تھریک تالبان پاکستان ءَ چہ سیادی داروکیں واصف ءِ جنگ ءِ ٹاہ اش جتگ-

تامرکاری ءِ نامی ئیں ازمکار کترینہ کیف ءَ وتی تامرکاری ءِ بندات ءِ سنچ ءَ ھنچیں روچ ءُ مردمانی دیمپانی کنگ کپتگ کہ آئی ءَ تامرکاری ءِ تہ ءَ دارگ ءِ جاہ نہ رس ایت ’تو وَ یک تامرکارے جوڑ بیت نہ کن ئے ‘-

انڈین ویب سائٹ کوئی موئی ءِ رد ءَ یک گوستگیں گلگدارے ءَ کترینہ کیف ءَ اے پدر کرتگ کہ آ جان ابراھم تامر ءَ چہ کشگ بیتگ ءُ اشی ءِ ھواری ءَ باز نادلکشیں گپ اشکنگ بیتگ اَنت-

کترینہ کیف ءِ سوجکار انوراگ باسو ءِ تامر سایہ ءِ درگت ءَ گپ کنان ءَ گوشتگ کہ جان ابراھم ءِ گون ءَ ھما وھد ءَ سپر ھٹ تامر ’پردیس ‘ ھیروئن ماھیما چوھدری ءَ جوانیں کرد پیلو کرتگ-

کترینہ کیف ءَ گوشتگ تامر ءِ واستا بس یک یک شاٹ شوٹنگے بیتگ ءُ آ دیر کنگ بیتگ ءُ دگہ ازمکارے دارگ بیتگ-

یک شاٹ شوٹنگے ءَ پد نا ایوک ءَ یک روچے ءِ شوٹنگ بلکیں یک شاٹے ءَ پد من کشگ بیتگ اَنت – ھما وھد ءَ من ءَ سما بیتگ کہ منی زند ھلاس اِنت ءُ منی سنچ ھم ھلاس بیتگ-

تامر فون بوتھ ءِ ازمکار کترینہ کیف ءِ گوشگ ات کہ ھر ھما مردم ءَ نہ منگے ءِ دیمپانی کنگ کپ ایت بلے ھمے وھد ءَ ھمت ودی کنگ لوٹ ایت-

گیشتر ازمکاراں نہ منگی اشکنگ کپ ایت ھمے واستا ترا ھمت ودی کنگ لوٹ ایت وھدیکہ من اے کار بندات کتگ گڑا مردماں منی دیم ءَ شھمات کتگ کہ تو ازمکارے بوت نہ کن ئے ءُ تئی تہ ءَ ھچ شریں سنچ نیست اِنت –

کترینہ کیف ءِ گوشگ ات کہ وھدیکہ من وتی بارو ءَ اے وڑیں گپ اشکتگ اَنت گڑا من سک گریتگ ءُ چریشی ءَ چہ من سک تکانسر بیتگ آں –

گریوگ ءَ من ءَ ھم سکین رس اتگ وھدیکہ تو وتی زانت ءَ گوں بہ ٹکرے گڑا جھد گیشتر کت کن ئے ھمے واستا ترا ھمت ءِ پنچگ دارگی اِنت –

کترینہ کیف ءَ تامرکاری ءِ دنیا ءَ سال دوھزار ءُ سَے ءَ تامر بوم ءَ وتی گام ایر کتگ اَت ءُ ھرچی بیتگ ات پد ءَ آئی یَ تامر سرکار “میں نے پیار کیا ” نمستے لندن”یکے بیتگ ات ٹائگر ءِ وڑیں تامر ءَ موکل رس اتگ کہ باکس آفس ءَ سوبمند بیتگ اَت-

ھندوستان ءِ اُستان اترپردیش ءَ چار مسلمانیں مردماں ٹرین ءَ نماز وانگ ءِ تامر ءِ شنگ بیگ ءَ پد پولیس ءَ آیانی ھلاپ ءَ دگہ مساپراں راہ ءَ دارگ ءِ پٹ ءُ پول بندات کتگ-

انڈیا ٹوڈے ءِ رس ءَ سوشل میڈیا ءَ شنگ بیتگیں تامر اترپردیش ءِ پارلیمنٹ ءِ باسک دیپ لعل بھارتی ءَ ھما وھد ءَ جوڑ کرتگ کہ وھدیکہ ٹرین کھڈا ریلوے اسٹیشن ءَ دارگ بیتگ-

پارلمینٹ ءِ باسک ءِ گوشگ اِنت اے تامر آئی ءَ ستیاگڑاھ ایکسپریس ءَ بیست اکتوبر ءَ جوڑ کرتگ کہ چار مردم ٹرین ءِ تہ ءَ نماز وانگ ءَ بیتگ اَنت ءُ چریشی ءَ چہ مھلوک ءَ تکانسری بیتگ-

آئی ءَ دیمتر ءَ گوشتگ کہ ’ مردماں ھمے تکانسری بیتگ مھلوک ٹرین ءِ تہ ءَ آیگ ءُ روگ ءَ دیری بیتگ – آ چون یک مھلوکے ءِ مچ گوزی ءَ نماز ونت کن اَنت؟ اے رد اِنت –

دیپ لعل بھارتی ءَ گوشتگ کہ اے وئیل شکایت انڈین ریلوے ءِ گور ءَ یاداشت کتگ –

انڈین نیوز ایجنسی اے این آئی ءِ رد ءَ سینیئر پولیس آفسر اوادیش سنگھ ءِ گوشگ اِنت ’ اے وئیل ءِ پٹ ءُ پول ءَ پد بیڑ برگ بیت اِنت ‘-

زانگ بہ بیت ٹرین ءَ نماز وانوکیں پارلمینٹ ءِ باسک دیپ لعل ءِ سیادی سر وزیر نریندر مودی ءِ پاٹی ءَ اِنت –

روکپتی بلوچستان ءَ بندوکیں بندیگیں بلوچے ماں زابل ءَ زندان ءَ ایرانی آمیدگس ءَ پاھو داتگ

سر بیتگیں اھوالانی رد ءَ روکپتی بلوچستان ءُ اوگانستان ءِ سیمسراں بندوکیں دمگ زابل ءَ ایرانی آمیدگس ءِ پرمان ءَ یک بلوچے نشہ باپاری ءِ بھتام ءَ پاھو دیگ بیتگ-

پاھو دیگ بیتگیں مردم ءِ پجار مھمد زرکزئی ء عبداللہ ءِ نام ءَ زانگ بیتگ کہ آ مروچی ایرانی آمیدگس ءَ پاھو داتگ-

روکپتی بلوچستان ءَ یکشل ءَ مردمانی پاھو دیگانی درچ یکشل ءَ برجاہ اَنت کہ اشانی توک ءَ گیشتریں مردم بلوچ اَنت-

مھمد زرکزئی ایرانی سال نود ءُ ھشت ءَ ما زابل ءَ نشہ باپاری ءِ بھتام ءَ گرگ بیتگ ات-

ھمے وڑ ءَ گوستگیں روچ ءَ ماں زاھدان ءَ ھم دو مردم پاھو دیگ بیتگ ات اَنت-

روکپتی بلوچستان ءَ پاھوانی درچ بازیں وھداں چہ برجاہ اَنت ءُ اود ءَ انسانی ھکانی گلاں ھم وتی زھر ءِ لیکہ درشان کتگ ءُ ایرانی آمیدگسانی سر ءَ ایراد گپتگ بلے ایرانی آمیدگس یکشل ءَ اے گپاں رد کنگ ءُ پاھو دیگ بیتگیں مردماں ڈیھ ءِ سلکار ءُ ناشر کرار دیگ ءُ آیاں پاھو دیگ اِنت-

دومی نیمگ ءَ لس مھلوک ءِ رد ءَ ایرانی آمیدگس گپتگیں مردماں آمیدگس ءَ لس آجوئیں ھیالانی درشانی ءِ موہ ءَ دیگ ءَ نہ اِنت چریشی ءَ چہ آ پاھو دیگ اِنت-

گروپ سیون ءِ باپاری ڈیھاں روس ءِ نیمگ ءَ جوھری پاور پلانٹ زاپوریژیا ءِ کارمند ءِ آوار جنگ ءِ ایرجنی بیتگ ءُ پلانٹ ءِ کنٹرول سرجم ءَ یوکرین ءَ واتر کنگ ءِ لوٹ بیتگ-

باطونوی ھبررساں ایجمسی روئٹرز ءِ رد ءَ جی سیون ءِ گچینی یے سلاہ ءُ گچینداری ءِ تک ءِ ڈائریکٹر جنرل ءَ یک درشانے ءَ گشتگ ’ ما روس ءِ نیمگ ءَ چہ یوکرین ء نیو کلیئر پاور پلانٹ ءُ آئی ءِ کارمند ءِ آوار جنگ ءَ ترندی ءَ ایر جن ایں –

آئی ءَ گوشتگ ’ ما روس ءَ کڈن کن ایں آ زوت زاپوریژیا ءِ کنٹرول ءَ سرجن ءَ واتر وت واجھیں ڈیھ یوکرین ءِ دست ءَ بہ دنت ‘-

فروری ءِ ماہ ءَ بندات بیتگیں یوکرین ءِ اُرش ءِ بنداتی روچاں روس ءِ پوج ءَ یورپ ءِ درستاں مستریں جوھری پلانٹ ءِ سر ءَ اُرد کتگ اَت-

زاپوریژیا یورپ ءِ درستاں مستریں جوھری جاہ اِنت کپ گوستگین روچ ءَ جنگ ءِ بنجل جوڑ بیتگ –

دومی نیمگ ءَ روس ءَ یوکرین ءِ رُگ وٹی جاھانی سر ءَ میزائل اُرش کرتگ ءُ چریشی ءَ ڈیھ ءِ بازیں پھناتاں شپ تھار بیتگ-

دومی نیمگ ءَ یوکرین ءِ مھتر ولودومیر زیلینسکی ءَ گوشتگ کہ روس ءَ بازیں کچے ءَ اُرش کتگ آئی ءَ اے اھد ءِ درشان کتگ یوکرینی پوج وتی ھمسنتانی کمک ءَ روس ءِ سر ءَ مزنیں میزائل ءِ دور دیگ ءِ زور ءَ دار ایت-

آئی ءَ گوشتگ کہ مئے گور ءَ سد درسد روسی میزائل ءُ ڈرون ءِ دور دیگ ءِ تکنیکی زور نیست اَنت بلے کم کم ءَ وتی ھمراھانی ھمراھی ءَ اے کار ءَ سرجم کن ایں-

آئی ءَ گوشتگ کہ شمبے ءِ روچ ءَ یوکرینی پوج ءَ بیست میزائل ءُ دہ ءَ چہ گیش ایرانی ڈرونز دور داتگ اَنت-

توانائی بنجلانہ سر ءَ اُرش ءِ سبب ءَ دَہ لک ءَ گیش شھری سیاہ شپ ءَ کپتگ اَنت بلے زیلینسکی ءَ زوت بجلی شر کنائینگ ءِ سدکی داتگ اَنت-

کیئف ءِ انتزامیہ ءِ نائب سروک پیٹرو پانٹیلیف ءَ گوشتگ کہ روسی اُرشانی سبب ءَ بازیں روچ ءُ ھپتگاں بجلی ءُ ھیٹنگ ءِ نزام اسرمند بیت کنت-

اشی ءَ ھوار ھوات خیرسن ءِ زیردستیں جاھاں جاور ناگیگ اَنت ءُ روسی واکداراں شھرانی یل کنگ ءِ پرمان کتگ-

روسی واکداراں کلوہ شنگ کتف کہ جاورانی ناگیگی ءِ سبب ءَ شھر ءَ بازیں کچے ءَ تیرگواری ءَ ناشری اُرشانی ترس اِنت چوشکہ شھری سرجم ءَ شھر ءَ یلو بہ کن اَنت-

دومی نیمگ ءَ یوکرینی پوج ءَ خیرسن ءِ زرباری جاھاں پیشگامی ءُ دو میتگانی واتر کنگ ءِ ٹاہ داتگ-

یوکرین ءِ جنرل اسٹاف ءَ گوشتگ کہ خیرسن ءِ اے جاھاں دیم ءَ روگ ءَ ایں کہ روسی پوج ءَ گپتگ اَنت ءُ پد ءَ یلو کتگ اَنت-

بلوچ لبریشن آرمی ءِ دست ءَ دزگیریں ایف سی ءِ کارندہ کلیم اللہ پت ءَ تامُربند کلوہ شنگ کتگیں ءُ گْوشتگ کہ پاکستان ءِ مزنیں واکداراں گوں دزبندی کتگ چُک ءِ یل کنائینگ ءِ ھاتر ءَ کرد ءَ پیلو بہ کن اَنت-

شنگ کتگیں تامُربند ءَ کلیم اللہ ءِ پت ءَ گْوشتگ کہ کلیم اللہ وتی چوٹی ھلاس کتگ ءُ واتر روگ ءَ بیتگ کہ آ چست کنگ بیتگ نی مارا ھچ سرپدی نیست آ کجا اِنت ءُ چی ھال تہ ءَ اِنت-

آئی ءَ پاکستان ءِ وزیراعظم، آرمی چیف، آئی جی ایف سی ءُ وزیراعلیٰ بلوچستان ءَ چہ دزبندی کتگ کہ آ کلیم اللہ یل کنائینگ ءَ وتی کرد ءَ پیلو بہ کن اَنت-

زانگ بہ بیت گوستگیں ماہ ءَ بلوچ لبریشن آرمی ءَ پاکستان پوج ءِ دو کارندہ دزگیر کنگ ءِ زمہ واری منّ اِتگ-

جارکش جیئند بلوچ ءَ گْوشتگ کہ اے بیڑ چیریں ھالانی رِد ءَ بی ایل اے اسپیشل ٹیکٹیکل آپریشنز اسلواڈ ءَ کتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل اے سینئر کمانڈ کونسل ءَ اے گپ ءَ موکل داتگ کہ بین الاقوامی کنونشنز ءُ عالمی جنگی راہ رھبندانی پاسداری کنان ءَ پاکستانی پوج ءِ گوم ءَ بندیانی مٹ ءُ سٹ ءِ کرد بندات کنگ بیت-

بلے تنی وھدے ھکومت نیمگ ءَ بندیانی بدلی ءِ درگت ءَ ھچ وڑیں درشان دیم ءَ نیتکگ وھدے کہ اشانی کھول زھرشانیانی ھمراھی ءَ واکداراں چہ دزبندی کنگ ءَ اَنت-

دزگیریں پوج کلیم اللہ ء کھول ءُ دمگ مردماں اے درگت ءَ زھرشانی جار شنگ کتگ –