TBP Balochi

کیچ تربت ءَ مکران ءِڈائریکٹر ایجوکیشن وانگجاھانی کرپشن ءِ درگت ءَ مراگش ءِ برجم دارگ بوتگ کہ اودا کیچ، پنجگور ءُ گوادر ءَ سیادی داروکیں پوزیشن ہولڈر جنک ءُ بچکیں نودربراں بھر زرتگ –

مراگش ءَ ترانکاری مکابلہ ءَ بختاور گورنمنٹ گرلز ماڈل اسکول تربت، جان محمد گورنمنٹ بوائز ہائی سکول گوادر جدید، شاہ نور گورنمنٹ بوائز ہائی سکول خدا بادان پنجگور، ماہ تاپ نعیم گورنمنٹ گرلز ہائی سکول تسپ، گنج بخش گورنمنٹ بوائز اسکول کہدہ یوسف محلہ آپسر تربت، ساچان نواز گورنمنٹ گرلز ہائی سکول ہوشاپ، مسکان اسلم گورنمنٹ گرلز ہائی سکول ملا بند گوادر، ماریہ اسلم گورنمنٹ گرلز ہائی سکول چتکان پنجگور، مھناز گورنمنٹ گرلز ہائی سکول ہوشاپ، حمد اللہ گورنمنٹ بوائز ہائی سکول خدابادان پنجگور نودربراں بھر زرتگ –

مراگش ءَ گچینی مھمان مکران ءِ زانت ڈویژنل ڈائریکٹر غفور احمد دشتی ءَ تران کنان ءَ گوشتگ کہ زانت ءِ واکدارانی چیردستی ءَ جنک ءُ بچکانی میان ءَ اے دابیں مراگش آھانی زانت ءِ تہ ءَ گیشی آرگ ءُ آئی ءِ مول نودربراں نشہ ءُ کرپشن ءِ وڈیں سلکاریانی درگت ءَ سرپدی دیگ انت – زھگ مئے باندات انت مارا آدرونت دیگی انت کہ آھاں پہ باندات ءَ چی کنگی انت چونیں ماھول ءِ جوڈ کنگ ءَ جھد کنگی انت – آئی ءَ گوشتگ کہ کرپشن ءُ نشہ چاگرد ءَ نزور کنت ءُ چاگرد ءِ مردم وت ماں وت گرءُ چل بنت ھمے ھاتر ءَ مارا ھوار بوگ ءَ کرپشن ءِ بگیری ءَ کار کنگی انت –

ھمے وھد ءَ ڈسٹرکٹ ایجوکیشن ءِ پنجگور ءِ اپسر عابد حسین ءَ گوشتگ کہ کرپشن ءَ انسان چہ وت ءَ بندات کنت پدا وتی کھول ءِ تہ ءَ سر کنت – ھر وڈیں جیڑو ءَ وت ءَ دومی ءَ چہ مستر لیکگ ھم کرپشن ءِ بھرے –

اے مراگش ءَ ڈی ای او تربت ءِ شائستہ حاصل خان، گورنمنٹ بوائز ہائی اسکول تربت ءِ پرنسپل علی جان بلوچ ءُ گورنمنٹ بوائز ہائی اسکول گوادر جدید ءِ ھیڈ ماسٹر دلمراد ساجد ءَ ھم تران کتگ –

مراگش ءَ اردو ترانکاری ءِ مکابلہ ءَ اولی پوزیشن گورنمنٹ گرلز ہائی سکول چتکان پنجگور ءِ ماریہ اسلم دومی پوزیشن گورنمنٹ گرلز ہائی سکول ملا بند گوادرمسکان اسلم ، سیمی پوزیشن جان محمد گوادر جدید ءُ گنج بخش کہدہ یوسف محلہ آپسر ءِ نودربراں گپتگ انت – وھدیکہ انگریزی مکابلہ ءَ اولی پوزیشن گورنمنٹ گرلز ہائی سکول ہوشاپ چہ ساچان نواز، دومی پوزیشن گورنمنٹ گرلز ہائی سکول ہوشاپ چہ ماہ ناز ءُ سیمی پوزیشن گورنمنٹ بوائز ہائی سکول خدابادان پنجگور ءِ نودربر حمداللہ گپتگ انت –

ترانکاری مکابلہ ءِ پیسلہ کنوک کیچ سوشل ویلفئیر ڈپٹی ڈائریکٹرقدیر لقمان ءُ تربت شھدربرجاہ ءِ بلوچی لکچرار طارق رحیم بوتگ انت – وھدیکہ مراگش ءَ ڈپٹی ڈی ای او تربت ءِ ناصر پھلان، ڈپٹی ڈی ای او دشت ءِ مہوش نعمت، ڈپٹی ڈی ای او تربت ءِ جنت عزیز، ایڈیشنل ڈائریکٹر مکران ڈویژن ءِ صابر دانش، اسسٹنٹ ڈائریکٹر آڈٹ اینڈ اکاؤنٹ ءِ امداد ملک، ڈپٹی ڈی ای او دشت ءِ شیرجان بلوچ، اسسٹنٹ ڈائریکٹر ممتاز بلوچ، ڈی ایم سی آر ٹی ایس ایم کیچ ءِ عبدالحلیم، گورنمنٹ بوائز ہائی ہوشاپ ءِ ہیڈماسٹر احمد علی، گورنمنٹ بوائز ہائی سکول ڈگاری کھن ءِ ہیڈ ماسٹر مولا بخش ءُ ڈی ڈی ایم ای ایس پی یونیسف کیچ ءِ فیض الرحمن ھم ھوار بوتگ انت –

مراگش ءَ اے ڈی او تربت وارث بشیر ءُ ماسٹر شھزاد احمد اسٹیج سیکرٹری پرز پیلو کتگ –

نبشتانک :میان اُستمان ءُ بلوچانی توار

نبشتہ کار: سمیر بلوچ

دی بلوچستان پوسٹ

جوزیف بیرول یوروپی یونین ءِ سکیورٹی کونسل ءِ کارمستر ءَ چہ یکیں،جوزیف بوریل ءَ یوروپی سکیورٹی کونسل ءِ گُشتانک تہ ءَ گُشتگ

“Europe is a garden we built a garden and rest of the world is not,Most of the rest of the world is a jungle”

اے تھنا جوزیف ءِ پکر نہ اِنت یوروپ ءِ زوراکیں توامیں مُلک ھمے پکر ءِ واھند انت، ھمے سبب اِنت کہ کس بلوچ راج ءِ واھی ءُ پِریاتاں اش نہ کنت ءُ کس بلوچ ءِ چُکچینی ءَ دُشمن ءَ جُست نہ گیپت-

زوراک تھنا ھما راجے ئِے گپ ءَ ایش کن اَنت کہ آھانی سیاسی زمینی پائدگے مان بیت اِنت ءُ ھما راج ءَ گوں سیادی کن انت کہ وتی زوراکی ءَ پیش دار انت ھما راج کہ تاکتے دار اَننت، تو پانزدہ سالے پِریات ءُ واہ ءُ زاری کُتگ ترا کس بہ ئے نہ کنت، وتی سر ءَ بیوکیں ءُ آوکیں، زوراکیانی دیم ءَ اُوشت،جنگی بہ بو، وتی زھرگ ءَ پیشدار، ارسیگ مہ بہ ئے۔ “مزاحمت زِندگی ہے” اے اوگام وش اِنت بلے امل ھوں لوٹ ایت، شاری ءَ ھمے اوگام ءِ سر ءَ امل کُت، ارس ءُ پِریات نہ کُت، شاری ءَ بلوچ راجی زھرگ کار بست ءُ سرجمیں دُنیا ءَ پیشداشت کہ بلوچ سرمچاری ءِ مانا چی اِنت؟ مزاحمت زندگی اِنت یاکہ مرگ اِنت اے پدر کُت، مروچی ایران ءِ تھ ءَ مھسا امینی کہ آئی ءَ وتی کُردی نامے ایر کنگ ءِ ھوں ھک نیست ات آئی ءِ کُوش ءَ کُرد راج ءَ چے کُت، کُردی زھرگ پیش داشت اگاں پِریات ءُ وائی کُت؟ کُرد زان انت کہ بزگی ءُ پِریاتی ارسیگ بیّگ ءَ ھچ دست نہ کپ ایت، آھانی زالبولانی پوجے جوڑ کُت مروچی توامیں کُردی ریجن ءَ وتی دُشمن ءِ دیم ءَ سنگر اش داشتگ ، لبرل پارسی وتی چاگردی ھکانی ھاتر ءَ گون انت بلے آھانی سر ءَ کُرداں ھوں ھچ اوست نہ بستگ پرچہ کہ آ وتی مُلک ءِ پروش ءِ ھکاں نہ انت، بلے کُردانی جُھد ءَ گِندے زانگ بیت اشاں اے گپ ءِ زانگ ھست کہ زوراکی ءِ جواب ءَ وتی راجی زھرگ چے پیم کارمرز کنگی اِنت،
مھسا امینی ءِ شھادت ءَ توامیں ایران بُن داتگ، کُردی اِزمکاراں وتی وتی اِزمی پِڑا اے زھرشانی ءِ پدراھی کُتگ ءُ توامیں دُنیا ءَ وتی زھرگ گوں وتی اِزمکاری ءَ پیش داشت، چوشیں زوراکیانی سر ءَ مزاحمت بیت، واہ ءُ پِریات نہ بیت، من نہ گُشاں کہ وتی جزباتاں بُہ کُش ات، اِنا! جزبات جُھد ءِ بُن ھِشت اِنت بے جزباتاں ھِچ جُھد پاد نئیت، بلے دُنیا ءِ سیاست ءَ بِزان زوراورانی سیاست ءَ بِزان دنیا ءِ آجوئیں مُلک زوراکیں مُلکاں آوکیں سداں سالانی پلاننگ کُتگ ءُ چوناھا ما پشت کپتگیں راج ءَ چہ سداں سال دیم ءَ چاگردی زِند ءِ گؤازینگ ءَ انت آھانی چم ءُ گوش ءُ پکر ءِ واتر کنگ ءُ انسانی ھکانی نیمگ ءَ آرگ ءَ لھتیں انچیں کار کنگ کپیت کہ آ لاچار بِہ بنت کہ مئے جیڑھاں درگُزر مہ کن انت- بلوچ بلوچی بلوچستان، ابدمان بات انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ ھاش ایرانی لشکر ءَ یک وانگجاھے ءِ سر ءَ بیڑ برتگ ءُ اود ءَ جنکانی پٹ ءُ پول کتگ۔

گیشیں ھالانی رد ءَ ایرانی لشکر ءَ ھاش ءَ جنکانی دو وانگجاہ دبیرس دشتی ءُ رضائی وانگجاھانی سر ءَ بیڑ برتگ ءُ اود ءَ جنکانی گوانکو ، بیگ ءُ دگہ دگہ چیز پٹ ءُ ھنڈ کتگ اَنت ۔

ھالانی تہ ءَ گوشگ بیتگ کہ ایرانی لشکر ءَ گوشتگ کہ شما روکپتی بلوچستان بیوکیں زھرشانی ءُ دگہ ناشریاں ھوار ات۔

نودربرانی گوشگ اِنت کہ لشکر ءَ ابید ء گوشگ ءَ وانگجاہ انگیر کتگ ءُ بیڑ برتگ چریشی ءَ ڈیھی کانودانی چپ اِنت اگاں آئی ءَ مئے پُرکاریانی چیزے دیستگ ات گڑا آ باید کانودی رنگ ءَ بیتک اِنت ءُ مارا پت ءُ پول اش بہ کرتیں۔

زانگ بہ بیت روکپتی بلوچستان ءَ چھبار ءَ کسان سالیں جنکوے گون ءَ ایرانی پولیس آفیسر ءِ زرواکی ءَ پد اود ءَ گیشتر زالبولانی سر ءَ نگاہ ایر کنگ بوگ ءَ اِنت ۔

سراوان ءَ ایرانی لشکر ءَ یک گاڑی ءِ سر ءَ تیرگواری کنان ءَ یک زھگے بیران بیتگ-

گیشیں ھالانی رد ءَ سراوان ءِ دمگ آسپیچ ءَ ایرانی لشکر ءَ یک گاڑی ءِ سر ءَ تیرگواری کتگ، چریشی ءَ چہ یک زھگے بیران بیتگ-

بیران بیتگیں جنکو ءِ پجار مونا نقیب کہ آئی ءِ عمر ھشت سال گوشگ بیتگ ءُ مراد ءِ زھگ اِنت ءُ آسپیچ سراوان ءِ جھمنند اِنت –

ھالانی تہ ءَ گوشگ بیتگ کہ ایرانی پولیس ءَ گاڑی ءِ رندگیری کتگ ءُ چریشی ءَ آئی ءَ گاڑی ءِ سر ءَ تیرگواری کتگ، ھمے میان ءَ زھگ ءَ تیر سر ءَ لگ اتگ ءُ ھما جاہ ءَ بیران بیتگ-

روکپتی بلوچستان ءَ ھمک وھد ءَ چوشیں وئیل پیش بیگ ءَ اَنت ءُ چریشی ءَ چہ بازیں کچے ءَ ھم زوال بوگ ءَ اَنت-

سندھ ءِ شھر کراچی ءَ سی ٹی ڈی ءِ دست ءَ دو ورناہ زورانسری آوار جنگ ءَ پد بیگواہ کنگ بیتگ اَنت-

سربوتگیں ھالانی رِد ءَ گوستگیں ماہ ءِ 26 ستمبر 2022 ءَ کراچی ءِ دمگ لیاری سرگوات ھند ءَ سی ٹی ڈی ءَ ورناہ گُلشاد بلوچ ء دلوش ءُ سراج ء اصغر زورانسری آوار جتگ ءُ ناشناسیں جاھے ءَ برتگ اَنت-

دمگی مردمانی رِد ءَ گُل شاد گوں وتی سنگت ءِ ھمراھی ءَ ھما وھد ءَ آوار جنگ بیتگ اَنت وھدے کہ آ ملیر ءَ چہ واتر لیاری ءَ آھگ ءَ بیتگ اَنت کہ نیم راہ ءَ سی ٹی ڈی کارندھاں آوار جتگ اَنت-

زانگ بہ بیت بلوچستان ءَ اَبید کراچی ءِ جتاجتائیں جاھاں مزنیں کچے ءَ ورناہ زورانسری آوار جنی ءِ نشانگ کنگ بیتگ اَنت یک دھکے بیت کہ زورانسری آوار جنی نہ کُٹوکیں دْرچ یکشلہ برجاہ ءَ اِنت –

بلوچستان ءَ یک نیمگے بیگواھیں مردمانی ھاتر ءَ توار چست کنوکیں گل بلوچ وائس فار بلوچ مسنگ پرسنز ءِ چیئرمین ماما قدیر شُدکُشیں بُنجل ءِ نندانک برجاہ ءَ اِنت دومی نیمگ ءَ پاکستانی پوج ءُ سی ٹی ڈی ءِ زورانسری آوار جنی برجاہ ءَ اِنت –

اشی ءَ ساری سی ٹی ڈی دست ءَ آوار جنگ بیتگیں مردم دروگیں میڑانی نام ءَ کُشگ بیتگ اَنت ءُ اے دْرچ انگت برجاہ ءَ اَنت بلوچستان ءِ جتاجتائیں جاھاں سی ٹی ڈی ءِ دروگیں میڑ ءَ بیگواھیں مردمانی کُشگ ءِ بگیری ءَ زھرشانی ءُ روانک کشگ بیت-

امریکہ، برطانیہ ءُ فرانس ءَ روس ءِ اے ٹاہ رد کتگ یوکرین ڈرٹء بمب ءِ کارمرد کنگ ءِ چن ءُ لانچ کنگ ءَ ایں –

فرانسیسی ھبر رساں ایجنسی اے ایف پی ءِ رد ءَ ھردوکیں ڈیھاں ماسکو بیھار داتگ ءُ گوشتگ کہ آ جنگ ءَ برانز ءِ نیمگ ءَ بھانگ جوڑ مہ کنت-

روسء وزیر دفاع سرگئی شوئیگو ءَ روکپتی دفاعی سروکاں گوں گوانکو ءَ رھوت کنان ءَ گوشتگ کہ ناگتی ڈرٹی بمب ءِ اُرش ءِ بھتام جنگ بیتگ-

امریکہ مھکمہ ءِ ھارجہ ءُ برطانوی ءُ فرانسیسی سرکار ءِ گون ءَ یکجاھیں درشانے ءَ گوشتگ کہ مئے ڈیھاں تچک کتگ ما روس ءِ اے گپ ءَ تچک ءَ رد کن ایں کہ یوکرین وتی سرڈگار ءِ سر ءَ ڈرٹی بمب ءِ چن ءُ لانچ ءَ کنگ ءَ اِنت-

درشان ءَ گوشگ بیتگ کہ دنیا اے بھتام ءَ برانزی ءِ زوراکی ءِ رنگ ءَ چار ایت اِنت-

ڈرٹی بمب تابکاری مواداں گوں دنز ءُ موجانی رنگ ءَ ڈیزائن کنگ بیتگ کہ شھراں باز جاور ناگیگی دیمپان کنگ کپ اَنت – اے بمب ایٹمی تراکاں ھوار بیت نہ کنت-

یوکرین ءِ مھتر ولادیمیر زیلنسکی ءَ روس ءِ ٹاہ ترندی ءَ رد کتگ ءُ ایر جتگ اَنت ءُ اے بھتام ماسکو ءَ وتی ھمساھگ ءِ سر ءَ جنگ ءِ ترند جنگ ءَ پندلے ساز اتگ-

آئی ءَ سوشل میڈیا ءَ یک تامربندے ءَ گوشتگ کہ دنیا ھر رنگ ءَ ترندین لیکہ درشان کنگ لوٹ انت ءُ اگاں روس گوش ایت یوکرین جوڑ کنگ اِنت گڑا اشی ءِ راستی ایش اِنت کہ روس ءَ پیسر ءَ جوڑ کرتگ-

روسی وزیر دفاع سرگئی شوئیگو ءُ برطانیہ، فرانس ءُ ترکی ءِ گون ءَ گوانکو ءُ رھوت کرتگ-

روسی وزارت دفاع ءَ گوشتگ کہ گوانکو رھوت ءَ سرگئی شوئیگو ءَ ڈرٹی بمب ءِ کارمرد ءَ چہ یوکرین ءِ نیمگ ءَ گمانی رنگ ءَ کارمرد کنگ ءِ گمان ھست اَنت-

زانگ بہ بیت یوکرین ءَ ٹاہ داتگ کہ روس ءَ ایرانی ٹک چتگیں یک سد ءُ سی ءُ شش ڈرون کارمرد کنان ءَ بنجاھی شھر کئیف ءِ سر ءَ اُرش کتگ بلے ایران ءَ روس ءِ ڈرونانی دیگ ءِ گپ رد کتگ ءُ برطانیہ، فرانس ءُ جرمنی ءَ چہ لوٹ کتگ کہ روس ءِ نیمگ ءَ یوکرین ءِ سر ءَ اُرش ءَ ایرانی ٹک چتگیں ڈرونانی کارمرد کنگ ءَ میان اُستمان پٹ ءُ پول بہ کنت-

بلوچستان ءِ دمگ نوشکی ءُ پنجاپ ءِ شھر لاھور ءَ بلوچ یکجھتی کمیٹی ءُ بی ایس او پجار ءِ چیردستی ءَ سی ٹی ڈی ءِ دست ءَ دروگیں میڑاں زورانسری آوار جنگ بوتگیں مردمانی کوش ءُ ملتان نشتر نادراھجاہ ءَ ناشناسیں جونانی دست کپگ ءِ بگیری ءَ زھرشانی ءُ روانک کشگ بوتگ –

لاھور ءَ بلوچ یکجھتی کمیٹی ءِ نیمگ ءَ چہ لبرٹی چار راہ ءَ زھرشانی روانک ءِ کشگ بوتگ کہ اودا جنین ءُ مردیناں مزنیں کچے ءَ بھر زرتگ – درنگاز کنوکانی دست ءَ بیگواھیں مردمانی اکس ءُ پلے کارڈ بوتگ انت کہ آھانی سر ءَ بلوچ چکچینی ءِ بگیری ءَ نارہ نبشتہ بوتگ انت –

درنگاز کنوکاں نشتر نادراھجاہ ءَ دست کپتگیں ژانگولیں جونانی ڈی این اے کنگ ءُ پٹ پولی کمیشن ءِ جوڈ کنگ ءُ راستی ءِ دیما آرگے لوٹ کتگ –

لاھور ءَ بلوچ درنگاز کنوکانی گوشگ ات کہ گوستگیں دو دھکاں وڈ وڈا بلوچ ءِ کُشت کوش کنگ بوگ ءَ انت ما گمان کنگ ءَ انت کہ نشتر نادراھجاہ ءَ دست کپتگیں جون بیگواھیں بلوچانی بوت کن انت ھمے ھاتر ءَ ما لوٹ کن ایں کہ آھانی پجار کنگ بہ بیت ءُ اشی ءَ ھواریں درسیں مردمانی بگیری ءَ کانودی کار کنگ بہ بیت – بلوچ ءِ کُشت کوش ءِ اولی وئیل نہ انت چدوساری سال دوھزار چار ءَ توتک ھزدار یکجاھیں کبرے ءَ یکسدو شست ءُ نُھ جون دست کپتگ انت کہ روچ مروچی آھانی پجار نہ بوتگ ءُ ناکہ اے کشت کوشاں ھواریں کتکار شزا دیگ بوتگ انت بلکنہ آ گیشتر مھکم کنگ بوتگ انت –

درنگاز کنوکانی گوشگ ات کہ گوستگیں دو دھکاں وڈ وڈا بلوچ ترسینگ بوگ ءَ انت بلوچ ءِ چکچینی بوگ ءَ انت – سی ٹی ڈی ءِ دست ءَ زورانسری آوارجنگ بوتگیں مردمانی کوش ءِ تہ ءَ گیشی آیگ انت – چدوپیسر زیارت ءَ نُھ بیگواھیں بلوچ دروگیں میڑ ءَ کشگ بوتگ انت ھمے گوشگ بوتگ کہ سلاہ بند بوتگ انت کہ سرا سر دروگ انت اے درگت ءَ سرکار ءَجوڈیشل کمیشن ھم جوڈ کنگ بوتگ بلے آئی ءِ ھچ وڈیں انکوائری نہ بوتگ ءُ ناکہ کتکار شزا دیگ بوتگ انت بلے اے درچ ءِ گیشی آرگ بوتگ –

آھانی گوشگ ات ھمے ماہ ءَ اکتوبر ءَ مستونگ ، نوشکی ءُ ڈیرہ مراد جمالی ءَ دروگیں میڑے نام ءَ سینزدہ زورانسری آوار جنگ بوتگیں مردمانی جون چگل دیگ بوتگ انت – ما ھمے پھمیں اگاں اے کُشت ءُ کوشانی سر ءَ توار چست کنگ نہ بوت بلوچ چکچینی ءِ ھمے وڑ ءَ برجاہ بیت اِنت –

دومی نیمگ ءَ بلوچستان ءِ دمگ نوشکی ءَ بی ایس او پجار ءِ چیر دستی ءَ زورانسری آوار جنگ بوتگیں مردمانی دروگیں میڑ ءَ کوش ءِ بگیری ءَ زھرشانی کنگ بوتگ –

زھرشانی ءَ مزنیں کچے ءَ مردماں بھر زرتگ – ترانکارانی گوشگ ات کہ جونانی چگل دیگ ءَ راج ھلاس نہ بنت ھمے ھاتر ءَ اے درچ بند کنگ بہ بیت – وھدیکہ ریاست وت وتی کانوداں لگتمال کنت گڈا آ ریاست ءِ تہ ءَ ایمنی نہ ایت درکانودی سیاسی باسکانی آوار جنگ ءُ دروگیں میڑاں آھانی کُشگ کانودانی لگتمالی یے –

آھانی گوشگ ات کہ سی ٹی ڈی کانودانی لگتمالی ءُ کشت کوشی ءِ ادارھے جوڈ کنگ بوتگ کہ بے نپیں گامگیج یے –

آھانی گوشگ ات کہ تابش وسیم ءِ جرم ھمے بوتگ کہ آ سیاسی باسک ءُ شائرے بوتگ کہ آئی ءَ زانت لوٹ اتگ کہ گوستگیں روچاں اوار جنگ ءُ پدا جون چگل دیگ بوتگ –

آھانی گوشگ ات کہ جنرل مشرف ءَ ھما آس بلوچستان ءَ روک کتگ ھما آس ءِ جمبور کنگ ءَ دورگیں میڑاں مردم کشگ بوگ ءَ انت کہ سرا سر زلم انت – اے ورنایانی ھونانی زمہ کئی سرا کئیت کئیا چہ ھساب گرگ بہ بیت – ھما وفاقی وزیر نمائندگاں کہ کھولانی نندانک ءَ کائینت ءُ کول کن انت کہ نوں جون دست نہ کپ انت یا ھما وتگڑیں اسمبلی ءَ کہ سرکار بھر انت –

آھانی گوشگ ات کہ بلوچستان ءِ جیڑہ پہ لاشانی چگل دیگ گیشگیوار نہ بنت – بلوچستان ءِ جیڑو سیاسی جیڑویے آ پہ ٹیبل ٹاک ءَ گیشگیوار بیت اِنت بلے وتگڑیں ھاکماں گوں بلوچاں ناں بلکنہ بلوچ ءِ مال ءُ مڈیانی زلورت انت –

لاھور ءُ نوشکی ءِ درنگاز کنوکاں انسانی ھکانی گلاں چہ لوٹ کتگ کہ آ بلوچ چکچینی ءِ ھاتر ءَ گامگیج بہ زور انت ءُ آوار جنگ بوتگیں مردمانی یل کنائینگ ءَ وتی کرد ءَ پیلو بہ ہن انت –

آل مند مُلا پازل لیگ فٹبال ٹورنمنٹ ءِ مروچی فائنل گوازی کنگ بوتگ کہ بلبل بلوچستان ءَ دو پہ زیرو ءَ باج برتگ –

ملا پازل لیگ ءِ مروچی فائنل گوازی ینگ اسٹار بلوچ آباد ءُ بلبل بلوچستان ءِ میان ءَ کنگ بوتگ کہ بلبل بلوچستان ءَ جوانی ءَ گوازی کنان ءَ دو گولاں گوازی کٹ اِتگ وھدیکہ ینگ اسٹار ءِ نیمگ ءَ ھچ گول اسکور کنگ نہ بوتگ –

لیگ ءِ ٹاپ اسکورر شکاری فٹبال کلب گوبرد ءِ میران ازیر ءُ بلبل بلوچستان ءِ زبیر بلوچ بوتگ انت –

زانگ بہ بیت اے لیگ واجہ نور فٹبال کلب سورو ءِ چیر دستی ءَ بنام ءِ ملا پازل مند بوائز ہائی سکول پٹ ءَ ایرکنگ بوتگ کہ اودا مند ءِ جتا جتائیں ھندانی فٹبال ٹیماں بھر زرتگ ءُ وتی گوازی پیش داشتگ –