TBP Balochi

روکپتی بلوچستان ءِ بنجاھی شھر دزاپ ءَ ایرانی چیریں ادارھانی دست ءَ دزاپ شاھدربرجاہ ءِ میڈیکل سائنسز ءِ نودربر بیگواہ-

گیشیں ھالانی رد ءَ گوستگیں روچ ءَ روکپتی بلوچستان ءِ بنجاھی شھر دزاپ ءَ میڈیکل سائنسز ءِ نودربر آوار جنگ ءَ پد بیگواہ کنگ بیتگ-

آوار جنگ بیتگیں نودربر ءِ پجار نادر آسکانی ء موسیٰ آسکانی ءِ نام ءَ زانگ بیتگ کہ زاھدان یونیورسٹی آف میڈیکل سائنسز ءِ نرسنگ ءِ ھشتمی سیمسٹر ءِ نودربرے ءُ سراوان ءِ جھمنند گوشگ بوگ ءَ اِنت-

روکپتی بلوچستان ءَ چست بیتگیں زھرشانی برانزاں پد بازیں کچے ءَ مردم گرگ ءُ بیگواہ کنگ بیتگ اَنت –

نادر ءِ بیگواھی ءَ پد آئی ءِ درگت ءَ دگہ گیشیں ھال نہ بیتگ اَنت ءُ نانکہ سرکار ءِ چیریں ادارھانی کارمنداں آئی ءِ درگت ءَ دگہ گپ دیم ءَ آورتگ اَنت-

روکپتی بلوچستان ءِ بنجاھی شھر دزاپ ءَ سلاہ بندین مردماں تیرگواری کنان ءَ ایرانی لشکر ءِ دو کارمند کشتگ اَنت-

ھالانی رد ءَ اشانی سر ءَ ھما وھد ءَ تیرگواری کنگ بیتگ کہ اشاں وتی کار ءَ موکل کتگ ءُ دیم پہ گس ءَ روگ ءَ بیتگ اَنت کہ ناشناساں کشتگ اَنت-

کشگ بیتگیں کارمندانی پجار مھدی ملاشاھی ءُ جواد کیخا ءِ ناماں زانگ بیتگ اَنت-

وئیل راستی انتزامیہ ءَ کرتگ ءُ گوشتگ کہ سلاہ بندانی تیرگواری ءَ دو لشکری کارمند بیران بیتگ اَنت –

تنی وھدی تیرگواری ءَ کشگ بیتگین لشکریانی کوش ءِ زمہ واری کس ءَ پہ وت ءَ نہ زرتگ بلے زاھدان ءِ وئیل ءَ پد روکپتی بلوچستان ءَ لشکریانی سر ءَ اُرش گیشی ءَ گندگ ءَ اتکگ اَنت-

سربوتگیں ھالانی رِد ءَ بلوچستان ءِ دمگ ھاران ءُ سبی ءَ دو براتاں ھوار چار مردم پاکستانی پوج ءَ زورانسری آوار جتگ ءُ بیگواہ کتگ – یک مردمے چہ زنداناں یل بوتگ ءُ گِس ءَ سر بوتگ –

بلوچستان ءَ یکرندے پدا پاکستانی پوج ءِ دست ءَ زورانسری آوار جنیانی تہ ءَ گیشی اتکگ –

ھمے ھپتگ ءَ بلوچستان ءِ جتا جتائیں ھند ءُ دمگاں دوازدہ ءَ گیش مردمانی زورانسری آوار جنی ءِ ھال سربوتگ انت، نوکتریں ھالانی رِد ءَ دگہ چار مردم پاکستانی پوج ءَ زورانسری آوار جتگ ءُ بیگواہ کتگ انت –

اھوالکار ءِ رِد ءَ چہ ھاران ءَ پاکستانی پوج ءَ دو برات زورانسری آوار جتگ ءُ بیگواہ کتگ انت – آوار جنگ بوتگیں مردمانی پجار یوسف بادینی ءُ پرویز بادینی ء فیض محمد بادینی ءِ ناماں بوتگ انت –

اھوالکار ءِ رِد ءَ آوار جنگ بوتگیں مردمانی تہ ءَ یوسف بادینی کہ ھاران بازار ءَ چیف چار راہ ءِ نزیک ءَ آئی ءَ دان ءِ دکان ءِ بوتگ گڈا ایف سی والھاں آ گوشتگ کہ بنجل ءَ دان سر بہ کن – آ وتی بچک ءِ ھمراھی ءَ بنجل ءَ شتگ کہ ھمودا پوج ءَ آوار جتگ ءُ آئی ءِ ھمراہ یل داتگ –

اشی ءَ پد پوج ءَ ھاران کلان مولوی مجید مسیت ءِ نزیک ءَ یوسف بادینی ءِ گِس ءَ بیڑ برتگ – گِس پٹ پول کتگ انت ءُ آئی ءِ دومی برات پرویز بادینی ھم آوار جتگ ءُ بیگواہ کتگ –

زانگ بہ بیت ھاران ءَ بیست ءُ چار ادارانی میان ءَ زورانسری آوار جنیبءِ پنچ ھال سربوتگ انت – گوستگیں شپ ءَ پاکستانی پوج ءَ سَے مردم زورانسری آوار جتگ ءُ بیگواہ کتگ انت – آوار جنگ بوتگیں مردمانی تہ ءَ جابر یلانزئی ء پزیر احمد، نجیب اللہ یلانزئی ء محمد حسین ءُ شفقت یلانزئی ء عبدالرحیم ھوار انت –

ھمے وڈ سبی ءَ پاکستانی پوج ءَ دو مردم زورانسری آوار جتگ ءُ بیگواہ کتگ انت کہ آھانی پجار مٹھا خان ء مالو مری، حفیظ ء روزی خان ءِ ناماں چہ بوتگ انت –

اھوالکار ءِ رِد ءَ ھردو شانزدہ اکتوبر ءَ سبی ءِ دمگ کوٹ منڈائی ءَ آوار جنگ ءُ بیگواہ کنگ بوتگ انت کہ ھنگت بیگواہ انت –

دومی نیمگ ءَ چہ کراچی ءَ ھمے ھال آیگ ءَ انت کہ سال دوھزار نوزدہ ءَ ملیر شرافی گوٹھ ءَ پاکستانی پوج ءِ دست ءَ زورانسری آوار جنگ بوتگیں سخی بخش ء بالاچ جاھمنند سردشت کلانچ مروچی چہ کراچی ءَ یل بوتگ –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ ھشت سد ءُ یک روچ سرجم بوتگ انت – مروچی بی ایس او ءِ گوستگیں سرکماش معین خان، این ڈی پی ءِ کنوینئر ایڈوکیٹ شاہزیب بلوچ، نظر بلوچ، ظفر بلوچ ءُ زالبولیں وکیل صبا بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءِ تہ ءَ ریاست ءِ زلم ءُ زوراکی سک باز گیش بوتگ انت ، زانگ نہ بیت کہ چینچو زال جنوزام بوتگ انت، چینچوک ءِ مردین بیگواہ انت ءُ چینچوک ءِ جون ماں گیابان ءَ کپتگ انت –

آئی ءِ گوشگ ات کہ آھاں وتی بھر ءِ پرز پورا کتگ نوں مارا چیزے کنگی انت – شھیداں گوں وتی ھوناں ھما چراگ کہ روک کتگ آ چہ سیاہ گوات ءُ توپاناں رکینگی انت – مروچی مئے انا پرستی، دوستی نا دوستی، قباہلیت، ہیروازم ءُ بے زانتی ءِ کار چراگ ءَ سیاہ گوات ءُ توپانانی آماچ کتگ مروچی ھزارانء کچ ءَ بلوچ پرزندانی ژانگولیں جون یا آھانی اکس مئے دیم انت –

ماما قدیر بلوچ ءَ گوشتگ کہ مارا پاکستان ءِ زلم زوراکیانء بگیری ءَ یکجاہ بوگ ءُ جھد کنگی انت –

روکپتی بلوچستان ءِ دمگ میرجاوہ ءَ یک بلوچے دزگیر کنگ ءَ پد بیگواہ کرتگ-

گیشیں ھالانی رد ءَ گوستگین روچ ءَ ایرانی لشکر ءَ میرجاوہ ءِ شھر ءَ یک بلوچے دزگیر کرتگ ءُ ناشناسیں جاھے ءَ برتگ-

آوار جنگ بیتگیں مردم ءِ پجار یاسر ریگی ءِ نام ءَ زانگ بیتگ – ھالانی تہ ءَ گوشگ بیتگ کہ یاسر نیمساریں مردمے ءُ چریشی ءَ آبید آ گرگ ءُ برگ بیتگ-

ھالانی تہ ءَ گوشگ بیتگ کہ گرگ ءِ وھد ءَ یاسر ریگی کہ نیمساریں مردمے لٹ ءُ کُٹ کنگ بیتگ ءُ آ پہ زورانسری جرم ءَ ھوار بیگ ءَ لاچار کرتگ-

روکپتی بلوچستان ءَ سی ستمبر ءَ بیتگیں زھرشانی ءَ بازیں کچے ءَ مردمانی بیرانی ءَ پد باز مردم گرگ ءُ بیگواہ کنگ بیتگ اَنت-

چریشانی توک ءَ لھتے مردم ھنچیں ھم گرگ بیتگ اَنت آ نادراہ جاھاں وتی ٹپانی درمانی ءَ بیتگ اَنت-

روکپتی بلوچستان ءَ سیاسی مردمانی نیمگ ءَ یکشل ءَ سرکار ءِ سر ءَ ایراد برجاہ اَنت ءُ بیتگیں وئیل ءِ پٹ ءُ پول ءِ لوٹ ءَ کنگ ءَ اَنت –

کمیونسٹ پاٹی ءِ کانگریس ءَ چینی سیاست ءِ سر ءَ یک گچینی نیادے ءَ تچک کتگ کہ کم چہ کم یک دراجیں دھکے ءَ اولی رند ءَ اے وڑ بوت کک بیست ءَ چار مردماں ھواریں ایگزیکٹیو کمیٹی (پولیٹبرو) ھچ زالبول نیست اِنت-

ھبر رساں ادارہ اے ایف پی ءِ رد ءَ وھدیکہ چینی سروک چی جن پنگ ءُ آئی ءِ ھمسنتانی دلگوش واک ءِ نیمگ ءَ سانمند بوتگ ءُ گڑا پاٹی ءِ مزنیں اگدو ءَ بندوکیں زالبول ریٹائرڈ بیتگ-

نامی ئیں سیاست دان سن چون لان کہ نائب وزیر اعظم بیتگ ءُ جانسلامتی پالیسانیانی چار ءُ گزار بیتگ بلے شمبے ءِ روچ ءَ چین ءِ بنجاھی کمیٹی ءِ لڑاں آئی ءِ نام جاڑیگ نہ بیتگ گڑا چریشی ءَ چہ زانگ بیت اِنت آ دزکش بیتگ-

دنیا ءِ توک ءَ درستاں مستریں پاٹی کہ آئی ءِ توک ءَ نُھ کروڑ ءُ شست باسک ھوار اَنت بلے ابکہ کنوکیں گپ ایش اِنت کہ اشی ءِ توک ءَ زالبولانی ھچ کرد دیم ءَ گندگ نہ بیت اِنت –

پاٹی ءِ نوکیں دو سد ءُ پنچ رکنی بنجاھی کمیٹی ءَ بس پنچ درسد زالبول ھوار اَنت بلے چین ءِ مستریں تاکتوریں پاٹی ءِ ھپت رکنی پولیٹبرو اسٹینڈنگ کمیٹی ءَ ھچ زالبول نیست اِنت اے پاٹی بس شی جن پنگ ءِ سروکی ءَ بس مردیناں گوں ھوار اِنت-

ھپتاد ءُ دو سالی ئیں سن چون لان ایگزیکٹیو کمیٹی ءِ بس یکیں زالبول بیتگ-

سن چون لان ءَ گیشتر ھما شھرانی تر ءُ تاب کتگ کہ اود ءَ کرونا وائرس ءَ آ اسرمند بیتگ اَنت ءُ ایشی ءِ دیمپانی ءَ ترندیں گامگیج زورگ ءِ پرمانے کتگ-

سڈنی یونیورسٹی ءِ کلانیں لیکچرر منگلو چن ءَ گوشتگ کہ چین ءِ کمیونسٹ پاٹی ءَ زالبولانی ھکانی واستا کرد منی نز ءَ بس زالبولانی زرکاری ءِ ھکانی دیمروئی ءَ بس ھست اِنت-

آئی ءَ گوشتگ کہ راستی ءَ ھمے وڑ اِنت ھنچش زالبولاں ابید شَئے ءَ لیبر فورس ءَ ھوار کنگ اِنت-

یو سی سین ڈیاگو ءَ سیاست ءِ پروفیسر وکٹر ءِ بارو ءَ گشتگ کہ ژے زیانگ ءُ پوجیان ءَ چہ سروک چی جن پنگ ءِ بازیں سنگت ایگزیکٹیو کمیٹی پولیٹبرو ءِ باسک اَنت بلے اشی ءَ ھچ زالبول ھوار نہ اَنت ءُ ناکہ اوستانی اگدو دار –

سال نوزدہ سد ءُ چل ءُ ھشت ءَ داں انیگ ءَ بس شش زالبولیں پولیٹبرو جوڑ بیتگ بس اشانی توک ءَ بس سے نائب وزیراعظم ءِ اگدو ءَ سر بیتگ اَنت-

بلوچستان ءَ ھوار پاکستان، یورپ، رودراتکی پھنات، گوریچان ءُ زرباری ایشیا ءَ سال ءِ توک ءَ دومی بر اِنت کہ روچ ءَ روچگر بوگ سَے شمبے ءِ روچ ءَ گندگ بوگ ءَ اِنت –

بلوچستان ءِ وھد ءُ پاسانی رد ءَ ساھت سَے چل ءُ چار ملیٹ ءَ روچگر بیت ءُ ساھت ءِ چار ءُ پنجاہ ءُ سَے دمان ءَ پرزور بیت اِنت ساھت پنچ ءُ پنجاہ ءُ یک ءَ ھلاس بیت اِنت-

کراچی ءَ ساھے سَے ءُ پنجاہ ءُ ھپت ملیٹ ءَ بندات بیت اِنت ساھت پنچ ءَ ءُ یک ملیٹ ءَ پر زور ءُ ساھت ءِ پنچ ءُ پنجاہ ءُ شش ملیٹ ءَ ھلاس بیت اِنت –

ھمے وڑ پشاور ءَ ساھت سے ءُ چل ءُ یک دمان ءَ بندات بیت اِنت چار ءُ چل ءُ نُھ ملیٹ ءَ پر زور ءُ ساھت پنچ ءُ بیست ءُ ھشت دمان ءَ ھلاس بیت اِنت-

ھمے وڑ ءَ اسلام آباد ءَ ساھت سَے ءُ چل ءُ سَے ملیٹ ءَ ندات بیت اِنت ساھت چار ءُ پنجاہ ملیٹ ءَ پرزور ءُ ساھت پنچ ءُ بیست ءُ دو دمان ءَ ھلاس بیت اِنت-

کیچ میوزیم تربت ءِ اسسٹنٹ ڈائریکٹر ایاز ہاشم ءَ بلوچی اکیڈمی ءِ ترّ ءُ تاب کُتگ گوں اکیڈمی اگدہ داراں تران کتگ – ھمے وھد ءَ اکیڈمی ءِ نائب کماش ہیبتان عمر ءُ کابینہ ءِ باسک ممتاز یوسف ءَ آ وش اَتک کتگ –

دیوان ءَ ایاز ہاشم ءَ کلچرل کمپلکس تربت ءَ کیچ میوزیم ءُ کیچ کلچر سینٹر ءِ کارانی درگت ءَ ھم سرپدی داتگ – آئی ءَ گوشت کہ آرکیالوجی ءِ پڑءَ کیچ ءَ انچیں ھند ءُ دمگ است کہ آ ہزاراں سال کوھن انت کہ آہانی باروا سرجمی ءَ پولکاری کنگ لوٹیت انت – نائب کماش ہیبتان عمر ءَگوشت کہ بائدیں آرکیالوجی ءِ پڑ ءِ زانوگر اے پڑاں کار بہ کن انت ءُ اگاں پولکار بلوچستان ءِ ھند ءُ دمگانی پولکاری کن انت ءُ ایشاناں ڈاکومنٹ کنگ لوٹ انت گڑا اکیڈمی ماں کتابی دروشم ءَ آہانی کاراں چھاپ کنت-

اے درگت ءَ اکیڈمی ءِ پیسریگیں کماش ءُ کابینہ ءِ باسک ممتاز یوسف ءَ گوشت کہ کلچر ءُ آرکیالوجی ڈیپارٹمنٹ پہ میوزیم ءَ سواری ءُ آسراتی ءُ پہ کلچر سینٹر ءَ آرٹ ءُ موسیک ءِ استاد بہ داریت ءُ ماں پریشاں سرکاری پوسٹ ودی بہ کنت- آئی ءَ گوشتگ کہ مکران ڈویژن ءِ دراھیں پبلک لائبریریاں کتاب، الماری ءُ ایدگہ آسراتی دئیگ بہ بنت تاں اے کتابجاہ پہ وانوکاں پچ بہ بنت – ممتاز یوسف ءَ گوشت کہ گوادر ءُ پنجگور ءِ میوزیم ءُ کلچر سینٹرز پھال کنگ بہ بنت-

ھمے درگت ءَ ایاز ہاشم ءَ سرپدی دیان ءَ گوشتگ کہ اے وھداں کیچ میوزیم تربت ءَ یکسدو شست ءُ یک آرکیالوجیکل سائیٹس آنی نام ءَ ھست انت کہ ایشانی پولکاری کار لوٹیت، بلے چوشکہ ڈیپارٹمنٹ ءِ گورا مالی مڈی کم انت پمیشا اے پڑ ءَ کار سُست انت- نائب کماش ہیبتان عمر ءَ گوشت کہ اکیڈمی ءِ واکدار زوت گوں کلچر ڈیپارٹمنٹ ءِ سیکریٹری ءُ ایندگہ واکداراں گند ءُ نند کن انت ءُ اے جیڑوانی درگت ءَ گپ جن انت –

آئی ءَ گوشت کہ انچوش کہ کیچ کلچر سینٹر تربت ءَ آرٹ ءِ کلاسز بندات کتگ انت ، ہمے وڑ ءَ بایدیں بلوچی زبان ءِ وانینگ ءِ بندات کنگ بہ بیت ءُ پریشی ءَ کلچر ڈیپارٹمنٹ بلوچی ءِ استاد بہ داریت ءُ پوسٹ ودی بہ کنت –

بلوچستان ءَ ھوار سرجمیں جھان ءَ ہندو وتی دینی تھوار دیوالی وش شاتکامی ءَ گوں دارگ انت –

ھالانی رِد ءَ ہندوانی نیمگ ءَ دیوالی وش ءُ شاتکامی ءَ گوں دارگ بوگ ءَ انت اے درگت ءَ لسبیلہ ءُ بلوچستان ءِ دگہ ھند ءُ دمگانی مندراں دیوالی ءِ درگت ءَ بازیں چن ءُ لانچ بوگ ءَ انت –

لسبیلہ ءَ ھندوانی نیمگ ءَ دیوالی ءِ درگت ءَ مراگش برجم دارگ ءَ ھوار دیوالی شاتکامی ءَ پہ چن لانچ بوتگ –

دیوالی ھندوانی گچینی تہوار یے ءُ اے رژن ءِ تہوار نام ءَ زانگ بیت اِنت – ھندو اے تہوار ءَ ڈیوا ءُ چراگ روک کن انت کہ رژنائی ءِ تھاری سرا ءُ شری ءِ ھرابی ءَ نشان پھمگ بیت اِنت –

بلوچستان ءِ جتا جتائیں ھند ءُ دمگاں نشتگیں ھندو اے روچ ءَ جوانی ءَ گوں دار انت ءُ وھدیکہ اے روچ ءَ وڈ وڈیں مراگش برجم دارگ بیت اِنت –

سے روچاں برجاھیں اے تہوار ہندو ازم، جین ازم، سکھ ازم یکیں وڈا چارگ بیت اِنت – ہندو روایتانی رد ءَ اے روچ دولت ءِ دیوی لکشمی نام ءَ کنگ بوتگ کہ ھندوانی تہ ءَ گچینی یے –

بلوچستان ءُ کراچی ءَ پاکستانی پوج ءَ پنچ مردم زورانسری آوار جنگ ءَ پد بیگواہ کنگ بیتگ اَنت-

بلوچستان ءِ ضلع ھاران ءَ گوستگیں شپ ءَ پاکستانی پوج ءَ سے مردم آوار جتگ ءُ ناشناسیں جاھے ءَ برتگ اَنت-

بیگواہ بیتگیں ورناھانی پجّار جابر یلانزئی ء پزیر احمد ، نجیب اللہ یلانزئی ء محمد حسین ءُ شفقت یلانزئی ء عبدالرحیم ناماں چہ بیتگ اَنت-

اِھوالکارانی رِد ءَ پوج ءِ کارندھاں گوستگیں شپ ءَ ھاران ءَ یک ھوٹلے ءَ نشتگیں سئیں ورناھانی رندگیری کتگ ڈن دراھگ ءَ پد آیانی لوگانی نزیک ءَ آوار جتگ ءُ گوں وت برتگ اَنت-

بیگواھیں ورناھانی کھول ءَ پولیس تھانہ ءِ رپورٹ نکش کتگ ءُ کمشنر رخشان ءُ دگہ واکداراں چہ آیانی یل کنگ ءِ دزبندی کتگ-

ھمے وڑ شال ءِ دمگ سیزل دگ ترخہ رئیسانی میتگ ءَ گوستگیں شپ ءَ پاکستانی پوج ءَ بیڑبرتگ ءُ یک ن۔میٹرک نودبرے زورانسری آوار جتگ ءُ بیگواہ کتگ-

آوار جنگ بیتگیں نودربر ءِ پجّار فیصل ء رمضان نام ءَ چہ بیتگ-

دومی نیمگ ءَ کراچی ءَ پاکستانی پوج ءَ یک ورنایے زورانسری آوار جتگ ءُ گوں وت برتگ-

آوار جنگ بیتگیں ورنائے پجّار چاکر جھمنند کیچ نام ءَ چہ بیتگ –

اِھوالکارانی رِد ءَ چاکر پاکستانی پوج ءَ ھما وھد ءَ آوار جتگ وھدے کہ آ وتی مات الاج ھاتر ءَ کراچی ءَ بیتگ-

زانگ بہ بیت بلوچستان ءُ کراچی ءَ پاکستانی پوج نیمگ ءَ مردمانی زورانسری آوار جنی ءِ دْرچ یکلشہ برجاہ ءَ اِنت –