TBP Balochi

بلوچ لبریشن آرمی ءَ دزگیر کُتگیں دو پاکستانی لشکری کارمند فرنٹئیر کورپس ایف سی ءِ جی سی او کلیم اللہ ءُ ملٹری انجلینس (ایم آئی) ءِ اپسر فیصل بشیر ءِ تامری کلوہ شنگ کُتگ۔

بلوچ لبریشن آرمی ءِ رسانک ھکل ءِ نیمگ ءَ شنگ بیتگیں یک لکیں تامر ءِ تہ ءَ گندگ بیت کہ دو پاکستانی لشکری کارمند کلیم اللہ ءُ فیصل بشیر بی ایل اے ءِ دزگیری ءَ اَنت ءُ چہ پاکستانی سرکار ءَ دزبندی کنگ ءَ اَنت کہ آیانی یل کنائنگ ءِ ھاتر ءَ جھد کنگ بہ بیت ءُ بی ایل اَے لوٹ منگ بہ بنت۔

بیست ءُ پنچ ستمبر دوھزار بیست ءَ بلوچ لبریشن آرمی ءَ ھاسیں آپریشن ءِ تہ ءَ ھرنائی ءَ دگ بستگ اَت ءُ دو پاکستانی پوجی کارمند دزگیر کُتگ اِت اَنت۔ دزگیر بیتگیں کارندھانی تہ ءَ یک یے ءِ پجار ایف سی ءِ جونیئر کمیشنڈ اپسر کلیم اللہ ءِ نام ءَ بیتگ اَت ءُ دومی ءِ پجار فیصل بشیر ءِ نام ءَ بیتگ اَت کہ آئی ءِ سیادی گوں ایم آئی ءَ گون اِنت۔ بی ایل اے ءِ شنگ کُتگیں درشانے ءِ رد ءَ دویں دزگیر کُتگیں کارندہ بلوچستان ءِ تہ ءَ پاکستان ءِ زورگیریں پالیسیانی دیم ءَ برگ بلوچ ورنایانی دزگیری سرمچاری بگیر ءَ بیڑانی تہ ءَ ھوار بیتگ اَنت۔

بی ایل اے ءَ دیمتر ءَ گُشتگ اَت کہ گل ءِ سنئیر کمانڈ کونسل ءَ پیسلہ کُتگ کہ اے دویں کارندھاں بلوچ جنگی بندیگانی گوں مٹ کنگ ءُ اشاں یل دیگ ءَ ساڑی اَنت۔

بی ایل اے ءِ نیمگ ءَ شنگ بیتگیں درشان ءَ پد گندگ بیتگ کہ فیصل بشیر ءِ کھول ءَ آئی ءِ یل کنگ ءِ ھاتر ءَ زھرشانی کُتگ ءُ چہ بی ایل اے ءَ دزبندی کُتگ کہ آیانی مردم ءَ یل بہ کن اَنت ءُ سرکار ءَ چہ لوٹ کُتگ اَت کہ بی ایل اے ءِ لوٹاں بہ من اَنت۔

مروچی شنگ بیتگیں تامر بند ءِ تہ ءَ گندگ بیت کہ کلیم اللہ چہ وتی کھول ءَ دزبندی کنگ ءَ اِنت کہ سرمچارانی دست ءَ آھانی یل کنگ ءِ ھاتر ءَ بہ رو انت اسلام آباد ءُ دگہ شھراں زھرشانی بہ کن اَنت ءُ سرکار ءَ گُش ایت کہ بی ایل اے لوٹاں بہ من اَنت۔ دومی نیمگ ءَ کلیم اللہ چہ وتی کماش ءَ دزبندی کنت کہ آ وتی دومی زھگ ءَ پد ءَ توار بہ کنت ءُ درستیں ایف سی ءُ پوجی کارمنداں گُش ایت کہ بلوچستان ءَ ڈپٹی کنگ ءَ ابید پوج ءَ یل بہ کن اَنت ءُ دگہ کار بہ کن اَنت اگاں نہ آ ھم بی ایل اے دست ءَ نشانگ بیت کن اَنت۔

ھمے پئیم ءَ فیصل بشیر ھم چہ وتی کھول ءَ دزبندی کنگ ءَ اِنت کہ سرکار ءَ گوں زھرشانی بہ کن اَنت دانکہ سرکار بی ایل اے گپاں بہ من اِیت ءُ آ یل کنگ بہ بنت۔

زانگ بہ بیت بی ایل اے نیمگ ءَ ھمے سال ءِ تہ ءَ اے دومی انچیں انٹیلجنس اُرش ءِ بیتگ کہ پوجی کارندہ دزگیر کنگ بیتگ اَنت چد ءُ پیسر دوازدہ جولائی دوھزار بیست دو ءَ پاکستانی پوج ءِ یک کرنل ءِ لئیق مرزا بی ایل اے ءِ تک اسپیشل ٹیکٹیکل آپریشنز سکواڈ ءَ چہ زیارت ءِ نزیک ءَ بیگواہ کُتگ اَت، وھدیکہ کرنل لئیق بی ایل اے ءَ لھتے روچاں پد چاردہ جولائی ءَ مرگ ءِ سزا داتگ اَت ءُ کُشتگ اَت۔

اے گپ تنی وھدی پاکستانی واکدارانی نیمگ ءَ پدر نہ بیتگ کہ آ بی ایل اے ءِ لوٹاں سرجم کنت یا نہ کنت بلے آئی ءَ داں تنی وھدی اے مردم بی ایل اے ءَ داشتگ اَنت-

بلوچستان ءِ جتاجتائیں دمگ ڈیرہ بگٹی ، کیچ ، ھُزدار، نوشکی ءُ مستونگ ءَ جتاجتائیں وئیلاں سے مردم بیران دو ٹپی ءُ یکے بیگواہ کنگ بیتگ-

سربوتگیں ھالانی رِد ءَ ضلع کیچ ءِ دمگ تحصیل مند ءِ ھند کھنک ءَ زاھد ء مستری ملنگ نامیں مردمے بیران بیتگ-

دمگی اِھوالکارانی رِد ءَ اے مرد ءِ بیرانی ءِ سبب شراب ءُ گولی یکجاہ ورگ ءِ بیتگ-

زاھد ءِ درگت اے ھم گْوشگ بوگ ءَ اِنت کہ آ یک لگوریں سرمچارے بیتگ ءُ چاگردی بازیں سلّکاریاں آئی ءِ دزمان بیتگ-

دومی نیمگ ءَ چہ نوشکی ءَ ھال انت تاڈیز ءَ گاڑی ءُ پرپٹ میان ءَ ڈک ورگ ءَ پرپٹ سواریں مرد بیران بیتگ-

ھمے وڑ چہ مستونگ ءَ ھال سر بیتگ کہ کھڈکوچہ سلاہ بندیں مردماں پت انگر ءَ کتگ ءُ آئی ءِ ھشت سالی ئیں چُک چست کتگ-

اِھوالکارانی رِد ءَ محمد اسلم ء رھیس درانی کہ مستونگ ءَ چہ کھڈکوچہ وتی ھشت سالی ئیں چُک ءِ ھمراھی ءَ روگ ءَ بیتگ کہ مکہ ھوٹل نزیک ءَ پرپٹ سواراں ٹپی کنگ ءَ پد چُک چست کتگ ءُ گوں وت برتگ، وھدے کہ چُک ءِ پت لیویز فورس ءَ نواب غوث بخش رئیسانی نادُراھجاہ برتگ-

دومی نیمگ ءَ بلوچستان ءِ ضلع ڈیرہ بگٹی ءِ دمگ سوئی ءَ یک مردمے ءَ وتکشی کتگ ءُ وتی زندمان وتی دست ءَ چہ کُٹینتگ-

وتکشی ءِ وئیل سوئی چاکر واہ نزیک ءَ بیتگ کہ اود ءَ ڈاڈا بگٹی ء پٹھان ھوتکانی نامیں مردمے ءَ تیر جتگ ءُ وت ءَ کُشتگ-

اِھوالکارانی رِد ءَ اے مرد ءَ لوگ جیڑہ سبب ءَ برات گوم ءَ اَڑ اِتگ ءُ چریشی ءِ آسر ءَ آئی ءَ وتکشی کتگ-

زانگ بہ بیت بلوچستان ءَ ھمے سال ءَ بازیں مردمے ءَ وتکشی کتگ، ھمے ھپتگ ءَ نکش بیتگیں دومی وئیل اِنت، اشی ءَ ساری شال ءِ دمگ رودتکی بائی پاس ءَ ھاسل نامیں مردمے ءَ وتی گُٹ ءَ ساد مان کتگ ءُ وتکشی کتگ-

پاکستان اکادمی ادبیات اسلام آباد ءِ سرکماش ڈاکٹر یوسف خُشک ءَ بلوچستان ءِ بنجاھی شھر شال ءَ بلوچی اکیڈمی ءِ ترّو تاب کتگ ءُ گوں اگدہ دار ءُ باسکاں گپ ءُ تران کتگ- اے دیوان ءَ پشتو اکیڈمی، براھوئی اکیڈمی، ہزارگی اکیڈمیانی سرکماش، اگدہ دار ءُ ایدگہ لبزانت ءُ زانتکاراں ھم بھر زرتگ –

دیوان ءَ کماش سنگت رفیق ءَ ڈاکٹر یوسف خشک ءِ آیگ ءَ شاتکامی درشان کتگ ءُ گوشتگ کہ پاکستان اکادمی ادبیات ملک ءِ مستریں لبزانکی ادارہ انت باید انت اے ادارہ ملک ءِ درستیں ادارھاں ءُ ھاس بلوچی اکیڈمی ءَ را مالی کمک بہ کنت- آئی ءَ گوشتگ کہ اکیڈمی ءَ پہ بلوچی زبان ءُ لبزانک ءِ دیمروی ءَ بازیں پراجیکٹانی پی سی ون جوڑ کتگ انت بلے اکیڈمی ءِ گورا چوشیں مالی واک نیست کہ آ اے پروجیکٹاں پیلو بہ کنت- بلوچی اکیڈمی چہ اکادمی ادبیات ءَ لوٹ کنت کہ آ اے درگت ءَ مالی کمک بہ کنت –

سنگت رفیق ءَ دیمتر ءَ گوشتگ کہ اکادمی ادبیات ایوارڈ کمیٹیاں ءُ ماں اسلام آباد ءَ سیمینار ءُ مراگشاں گوں بلوچی اکیڈمی ءَ شور ءُ سلاہ نہ بیت، بائدیں بلوچی زبان ءُ لبزانک ءِ باروا ھر وڑیں سیمینار یا مراگشے اڑ دیگ بیت انت بلوچی اکیڈمی ءَ شور ءُ سلاہ گرگ بہ بیت۔ ھمے وڑا وھدے اکادمی ادبیات پہ بورڈ آف گورنر ءَ چہ بلوچستان ءَ مردم نامینیت، اے درگت ءَ ھم گوں اکیڈمی ءَ ھم شور ءُ صلاہ گرگ بہ بیت- آئی ءَ دیمتر ءَ گوشتگ کہ بائدیں بلوچی اکیڈمی ءِ سالینہ گرانٹ ودّینگ بہ بیت پرچا کہ انّوگیں گرانٹ اکیڈمی ءِ ھرچ ءُ درچاں پیلو نہ کنت –

اکادمی ادبیات ءِ کماش ڈاکٹر یوسف خشک ءَ اکیڈمی ءِ باسکانی منّت گپتگ ءُ گوشتگ کہ بلوچی اکیڈمی پہ لبزانت ءُ زانت کاراں یک مزنیں پلیٹ فارمے – آئی ءَ گوشتگ کہ بلوچی اکیڈمی ءِ پہ بلوچی لبزانک ءُ زبان ءَ جُھد ستاء کرز انت ءُ اُمیت کناں کہ اکیڈمی ءِ باسک وتی جھداں ھمے وڑا برجم دار انت –

آئی ءَ دیمتر ءَ گوشتگ کہ اکادمی ادبیات ءَ کساس سِی ءُ دو لبزانکی ادارہ رجسٹر انت کہ آھاناں سالانہ گرانٹ رسیت۔ مئے ھر وھد ءَ جُھد ھمیش انت کہ ادارگاں آھانی جھدانی رِداں گرانٹ دیگ بہ بیت –

ڈاکٹر یوسف خُشک ءَ گوشتگ کہ اکادمی ادبیات بلوچی اکیڈمی ءَ را رجانکاری ءِ تَک ءَ کمک کنت۔ اکادمی ادبیات ملک ءِ دراھیں راجانی لبزانکی انسائیکلوپیڈیا ءِ سرءَ کار ءَ انت، بلوچی اکیڈمی پہ بلوچی لبزانک ءِ پولکاری ءَ مئے کمک ءَ بہ کنت-

آئی ءَ دیمتر ءَ گوشتگ کہ پہ اسکالرشپ یا ایوارڈ کمیٹیاں مردمانی نامینگ ءَ بلوچی اکیڈمی وتی شور ءُ سلاہاں دیم ب دنت، ایشانی سرا گامگیج زورگ بیت۔ ڈاکٹر یوسف خشک ءَ گوشت کہ بائدیں اے وڑیں دیوان ہر وہد ءَ جم دارگ بہ بیت ءُ لبزانت ءُ زانتکار یک پلیٹ فارمے ءِ سرا یکجا بہ بنت ءُ وتی جیڑھاں بہ گیشین انت –

دیوان ءِ گڈ سر ءَ بلوچی اکیڈمی ءِ کماش سنگت رفیق ءَ ڈاکٹر یوسف خشک ءَ را چھاپ کتگیں کتابانی سیٹ ئے سوگات کُتگ –

ڈپٹی کمشنر کیچ میجر بشیر بڑیچ ءَ آدینگ ءَ رسانکدرتربت : بیگواھیں نودربر حیات بلوچ ءِ دزگیری ءِ پدر کتگ

ڈپٹی کمشنر کیچ میجر بشیر بڑیچ کی آدینگ ءَ رسانکدر ءَ شنگ کتگیں درشان ءِ تہ ءَ ٹاہ جتگ کہ سی ٹی ڈی تربت ءَ حیات ء اسلم نامیں مردمے دزگیر کتگ-

آئی ءَ گْوشتگ کہ سی ٹی ڈی ءَ بیڑبرتگ ءُ کیچ ءِ جتائیں وئیل ءُ سرکاری ماڑی تاوان ءِ دیگ پُشدر ءَ محمد حیات ء محمد اسلم دزگیر کتگ-

آئی ءَ گْوشتگ کہ آ شھر ءَ یک کارے ءَ دلمانگ بیتگ کہ زوت دزگیر کتگ ءُ ًآمیدگس ءَ پیش کنگ بیت ءُ آمیدگس آئی ءَ سزا دنت – بلے آئی ءَ اے نہ گْوشتگ کہ اے کد ءُ کجا چہ دزگیر کنگ بیتگ-

زانگ بہ بیت بلوچستان یونیورسٹی تربت ءِ نودربر محمد حیات 13 اکتوبر ءَ زورانسری آوار جنگ بیتگ-

بلوچستان ءَ زورانسری آوار جنی ءِ بگیری ءَ پُرکاریں گل وائس فار بلوچ مسنگ پرسنز ءَ 14 اکتوبر ءَ شنگ کتگیں یک درشانے ءِ تہ ءَ گْوشتگ کہ بلوچستان ءِ دمگ چہ کیچ ءَ دو نودربر ءَ ھوار شش مردم پاکستانی لشکر ءَ بیگواہ کتگ-

آیانی تہ ءَ تربت یونیورسٹی نودربر حیات ء اسلم ، عبدالستار ء رحیم بخش گوستگیں روچ ءَ چہ تربت بیگواہ کتگ ءُ قمبر ء امید، عزیز ء مولا بخش، اسد ء موسی ءُ انس ء ملا برکت ھوار اَنت-

مرچی محمد حیات ءِ دزگیری پدر کتگ وھدے کہ سے مردم قمبر امید، عزیز مولا بخش ءُ انس ملا برکت یل کنگ بیتگ اَنت-

سربوتگیں ھالانی رِد ءَ بلوچستان ءِ دمگ کلات ءَ ناشناسیں مردماں پاکستانی پوج ءِ گاڑی ءِ تراکناکیں شوروانی نشانگ کنگ بوتگ چریشی ءَ پاکستانی پوج ءَ جانی ءُ مالی تاوان ءِ دیمپانی بوتگ – دومی نیمگ ءَ بلوچستان ءِ دمگ ھزدار ءَ ناشناسیں مردماں حفیظ اللہ نامیں مردمے تیرباران کتگ ءُ کُشتگ –

بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ منّ اِتگ ءُ گوشتگ کہ مئے سرمچاراں کلات ءِ دمگ جوھان ازبوتکی ءَ پاکستانی پوج ءِ کاروان ءَ ھواریں یک گاڑی ءِ تراکناکیں شوروانی نشانگ جوڈ کتگ، چریشی ءَ گاڑی سرجمی ءَ تباہ بوتگ ءُ آئی ءَ سواریں چار کارمند ھما دمان ءَ مرتگ انت ءُ دو زدگ بوتگ انت –

جارکش ءَ گوشتگ کہ یک دگہ اُرش ءَ بلوچ لبریشن آرمی ءِ سرمچاراں ھزدار ءِ دمگ زھری ءَ پاکستان ءِ چیریں ادارہ ایم آئی ءِ کارمند حفیظ اللہ کُشتگ –

جارکش ءَ گوشتگ کہ اے مرد زھری ءُ کش ءُ گوراں بلوچ ورنایانی آوار جنی ءَ پاکستانی پوج ءِ ھمراہ بوتگ – بلوچ لبریشن آرمی اے گپ ءَ پدر کنت کہ وڈ وڈیں پوشاکانی تہ ءَ چیریں کمک کاراں حفیظ اللہ ءِ داب ءَ وتی گڈی انجام سر کنگ بنت –

جارکش ءَ گڈسر ءَ وتی درشان ءِ تہ ءَ گوشتگ بلوچ لبریشن آرمی ھردو اُرشانی زمّہ واری ءَ منّیت – سرڈگار ءِ آجوئی ءَ تاں مئے جھد ھمے داب ءَ برجاہ مانیت –

بلوچستان ءِ بنجاھی شھر شال ءَ بلوچ سالویشن فرنٹ ءِ چیردستی ءَ میر قادر بلوچ ءِ یات ءَ مراگش ءِ برجم دارگ بوتگ

مراگش ءَ بلوچ پیپلز کانگریس ءِ رھشون ڈاکٹر حکیم لہڑی، بلوچ سالویشن فرنٹ ءِ گوستگیں بنجاھی سرکماش سعید یوسف بلوچ، پشتون تحفظ مومنٹ ءِ زبیر شاہ، حوران بلوچ ءُ بلوچ وطن پاٹی ءِ میر حیدر ءَ وتی ھیال درشان اِتگ انت –

آھانی گوشگ ات کہ میر قادر ءَ وتی زند راجی آجوئی جھد کنان ءَ نوآبادیاتی تاکتانی بگیری ءَ داں گڈی ساہ ءَ بکشاتگ – آئی درسیں کرد بلوچ، پشتون ءُ سندھی ءِ ایردستیں راجاں روکیں چراگ ءِ بستار ءَ دار انت آ آؤکیں بازیں پدریچانی رھشونی ءَ کنت آئی ھر لپز راجدپتر ءِ تاکاں نبشتہ کنگ بیت اِنت –

آھانی گوشگ ات کہ زرمبشت ءِ تہ ءَ آئی ءِ سمبولک ءُ اکیڈمک کرد ءِ بوتگ – آئی واب ءُ واھشت ءِ جھد پہ بلوچستان ءِ آجوئی ءَ بوتگ بلے آئی ءَ وت آجوئی ندیست بلے آئی ءَ پہ آجوئی ءَ بازیں اڈوجنجالانی دیمپانی کتگ – بلوچ گوستانک آئی ءَ مدامی یات داریت آ یک جوانیں رھشون ءِ دروشم ءَ گوستانک ءِ بھرے آئی ءِ برات سفر خان ءَ ھمے آجوئی ءِ جھد ءَ شھیدی نوشتگ – بلے آئی ءِ کرد ءُ امل ءَ میر ءِ کاروان نوکیں راہ ءِ پیش داشتگ آ میر ءِ کاروان بوتگ راجدپتر مدامی اے وڈیں تمرد ءُ ایمانداریں پسگانی سر ءَ پھر کنت – آ ڈیھ ءُ ھاک ءِ پھر انت – آئی ءَ زند فلسفہ ءِ داتگ کہ زند ھر ھال ءَ گوزیت بلے زند ھما انت کہ مرگ ءَ پد زندگ بہ بئے – میر ءَ وت ءَ نمیران کتگ آ وتی پگر امل ءُ جھد ءَ چہ مروچی ھم زندگ انت – مروچیگیں اے دیوان اے گپ ءِ گواھی ءَ دنت کہ آ گار نہ انت بلکنہ نمیران انت – آئی ءِ ھیال ءُ درشان آجوئی ءِ جھد ءِ تاکت جوڈ بنت –

ترانکارانی گوشگ ات کہ ریاست گوستگیں شست دہکاں بلوچ، پشتون ءُ سندھی راج ءِ سرڈگار ءُ مال ءُ مڈیانی سر ءَ کبزہ کتگ آھانی آجوئی پچ گپتگ پجار گار کتگ – بلوچستان ءِ تہ ءَ انسان نیستی آرتگ ھمک روچ جونانی چگل دیگ اسرائیل ءَ ھم گوں پلستین ءَ چشیں زوراکی نہ کتگ کہ بلوچستان ءِ سر ءَ بوگ ءَ انت – میان استمان ءُ اقوام متحدہ کجا انت راجی آجوئی ءِ جست انسانانی برابری جست انت ما ھچ وڈیں ریشنز، یورپی، کالونیلسٹ راجاں چہ کمتر نہ انت بلے مئے آجوئی پجار، آجوئی ءِ جھد ءُ چکچینی ءِ سر ءَ جھان ھچ گوشگ ءَ نہ انت –

پاکستان ءِ الیکشن کمیشن ءَ تحریک انصاف ءِ چیئرمین ءِ ھلاپ ءَ توشہ خانہ ریفرنس ءَ پیسلہ کنان ءَ عمران خان نابود کتگ-

پیسلہ ءِ رد ءَ عمران خان’ کرپٹ پریکٹسز ے ‘ گوشگ بیتگ – الیکشن کمیشن ءَ عمران خان ءِ جاہ ھالیگ کتگ-

پیسلہ ءَ پد تحریک انصاف ءِ رھشون فواد چوھدری ءَ الیکشن کمیشن ءَ ڈن رسانکدراں گوں گپ کنان ءَ گوشتگ کہ اے پیسلہ منگ نہ بیت اِنت ات عمران خان ءِ سر ءَ ناں بلکیں پاکستان ءِ آئین ءُ ادارھانی سر ءَ اُرش اِنت-

آدینگ ءِ روچ ءَ پیسلہ ءِ وھد ءَ تحریک انصاف ءِ رھشون شاہ محمود قریشی، شیرین مزاری، فیصل جاوید ءُ دگہ جاڑیگ بیتگ اَنت –

انتزامیہ ءِ ترندیں پھزداری بیتگ ءُ ریڈ زون ءِ روکیں راھاں پولیس ءِ گیشین کارندہ دارگ بیتگ اَنت-

ھمے سال ءِ اگست ءِ ماہ ءَ الیکشن کمیشن ءَ پاکستان ڈیموکریٹک مومنٹ (پی ڈی ایم) ءِ ایم این ایزاں دزبندی ءِ سر ءَ اسپیکر قومی اسمبلی ءِ راجا پرویز اشرف ءَ الیکشن کمیشن ءَ عمران خان ءِ نہ منگ ءَ یک ریفرنسے روان داتگ ات-

ریفرنس ءَ گوشگ بیتگ کہ عمران خان ءَ وتی مڈیانی توک ءَ توشہ خانہ ءِ واستا برگ بیتگیں مچ کرتگیں ءُ ڈن ءَ مچ کتگینانی بارو ءَ نہ گشتگ –

ریفرنس ءِ رد ءَ عمران خان ءَ وتی دوستگیں ڈیھاں توشہ خانہ ءَ گپتگیں گران نھادیں مچ کتگیں الیکشن کمیشن ءَ جمع کتگ انت ءُ وتی سالگشتی گوشداروکاں دو سال ءَ داں پدر نہ کتگ اَنت اے مچ کتگیں بس سال دوھزار ءُ بیست ءُ بیست ءُ یک ءَ گوشداروکاں ھما وھد ءَ پدر کتگ اَنت گڑا توشہ ھانہ اسکینڈل روتاکانی سر برز جوڑ بیتگ-

مسلم لیگ ن رکن اسمبلی محسن شاھنواز رانجھا ءِ نیمگ ءَ دیم ءَ پیش کنگ بیتگیں ءُ اسپیکر قومہ اسمبلی ءِ نیمگ ءَ دیم دیگ بیتگیں ریفرنس ءِ گچینیانی چیر دیگ ءِ سر ءَ عمران خان نیست ءُ نابود کنگ ءُ ھشکیں دستاں نادینگ بیتگ-

کیچ دمگ ءِ ھنکین دشت ءَ ناشناسیں سلاہ بندیں پرپٹ سواریں مردماں یک ڈاکٹرے آوار جتگ ءُ گوں وت برتگ-

سربوتگیں ھالانی رِد ءَ گوستگیں روچ ءَ دشت ءِ ھند درچکوہ ءَ ناشناسیں پرپٹ سواریں سلاہ بندیں مردماں ڈاکٹر عبداللہ ء ڈاکٹر سید محمد جھمنند پٹوک آوار جتگ ءُ گوں وت برتگ –

اِھوالکارءِ رِد ءَ سئے پرپٹانی سرءَ اَتکگیں مردماں ڈاکٹر عبداللہ چست کتگ ءُ گوں وت بُرتگ، بلے داں انگت زانگ نہ بیت کہ چست کنوک چونیں مردم بیتگ اَنت ءُ آوار جتگیں ڈاکٹر کجءَ برگ بیتگ۔

آسٹریلیا ءِ برجاھیں گوازی ٹی ٹونٹی ورلڈکپ ءِ بنداتی ءَ ویسٹ انڈیز ءِ ٹیم آئرلینڈ ءَ پروشے وارتگ ءَ ٹورنامنٹ ءِ سپر 12 راؤنڈ ءِ کوالیفائی کنگ ءَ بے سوب بیتگ-

آئرلینڈ ءَ ویسڈ انڈیز ءِ نیمگ ءَ کٹگ ءِ واستا یک سد ءُ چل ءُ ھپت رنزانی ٹارگٹ یک وکٹے ءِ تاوان ءَ ھژدھمی آووراں سرجم کتگ اَنت-

آدینگ ءِ روچ ءَ بوبارٹ ءَ جوانین میچاں ویسٹ انڈیز ءَ ٹاس کٹ اتگ ءُ بندات ءَ بیٹنگ کنگ ءِ پیلسہ کتگ-

ھستیں بیست آوورانی تہ ءَ پنچ وکٹانی تاوان ءَ ویسٹ انڈیز ءَ یک سد ءُ چل ءُ شش رنز اسکور کتگ چریشی ءِ سر ءَ برینڈن کنگ ءَ چل ءُ ھشت ءُ بالاں شست ءُ دو رنز جوڑ کرتگ ءُ ناٹ آوٹ بیتگ –

کنگ ءَ ابید ویسٹ انڈیز ءِ دگہ گوازی کنوکاں ھچ شریں میچ پیش بہ داشتگ بلے کنگ ءِ گوازی جوانیں رنگے ءَ بیتگ ءُ آئی ءَ یک جوانیں رنگے ءَ گوازی پیش داشتگ اگاں آ دگہ گوازی کنوکاں کنگ ءِ وڑ ءَ گوازی بہ کرتینں گڑا ویسٹ انڈیز ءَ اے وڑیں پروشانی دیمپانی نہ بیتگ ات-

ھمے وڑ ءَ آئرلینڈ ءِ گیرتھ ڈیلانی ءَ چار آوورانی توک ءَ شانزہ رن داتگ ءُ سَے وکٹ گپتگ اَنت – اد ءَ گریتھ ءِ جوانیں بالینگ کنگ ءَ ھم آئی ءِ ستاشانی بیتگ کہ آئی ءَ وتی ٹیم ءِ رکینگ ءَ جوانتریں گوازی پیش داشتگ-

ورلڈکپ ءِ سپر دوازدھمی تکاں روگ ءِ واستا کوالیفائی کنوکیں آئرلینڈ ءِ ٹیم ءِ اوپنرزاں یک سد ءُ چل ءُ ھپت رنزانی جوڑ کنگ ءَ ستک بیتگ اَنت-

اوپنت اینڈ بالبرینی بیست ءُ سَے بالانی توک ءَ سِی ھپت رن جوڑ کرتگ آوٹ بیتگ ءُ پال سٹرلنگ ءُ لورکان ٹکر ءَ وتی ٹیم کٹینتگ-

اسٹرلنگ ءَ شست ءُ شش رن ءُ لورکان ءَ چل ءُ پنچ رن جوڑ کرتگ ءُ ناٹ آوٹ بیتگ اَنت-

روکپتی بلوچستان ءِ بنجاھی شھر زاھدان “دزاپ ” ءَ ناشناسانی تیرگواری ءَ یک مردمے بیران بیتگ-

گیشیں ھالانی رد ءَ گوستگیں روچ ءَ دزاپ ءَ ناشناساں تیرگواری کنان ءَ یک مردمے کُشتگ –

بیران بیتگیں مردم ءِ پجار حسن رخشانی جھمنند دزاپ ءِ نام ءَ زانگ بیتگ-

بیران بیتگیں مردم ءِ کوش ءِ درگت ءَ دگہ گپ دیم ءَ نیتکگ اَنت –

ھمے وڑ ءَ کھنوج ءَ نادراہ جاہ ءِ دیم ءَ یک مردمے ءِ جون دزکپتگ-

ھالانی تہ ءَ گوشگ بیتگ کہ کھنوج ءِ نادراہ جاہ ءِ دیم ءَ یک مردمے ءِ جون دزکپتگ کہ آئی ءِ پجار علی حسین زادہ ءِ نام ءَ زانگ بیتگ-

ھالانی تہ ءَ گوشگ بیتگ کہ علی حسین زادہ ءِ کار ءُ کسب دکانداری بیتگ ءُ چریشی ءَ آئی ءِ جون مروچی دزکپتگ-

زانگ بہ بیت روکپتی بلوچستان ءَ زاھدان ءِ وئیل ءَ پد اود ءَ روچ پہ روچ چوشیں وئیل گیش ودان اَنت ءُ اود ءَ ھمک روچ سرکار بگیر دار ءُ سرکار ءِ میان ءَ باوست بیگ ءَ اَنت –