TBP Balochi

کیچ ءِ ھند عمری کہن ءَ پاکستانی پوج ءِ دست ءَ زورانسری آوار جنگ بوتگیں نودربرانی یل نہ کنگے بگیری ءَ بیست ءُ چار ادار ءَ گیش انت کہ تربت تاں شال ءَ رؤکیں شھدگ زالبولاں بند کُتگ ءُ نشتگ انت –

زالبولاں شھدگ تربت ءِ ھند سامی ءَ بند کُتگ ءُ زھرشانی نندانک ءَ نشتگ انت – زالبول ءُ واکدارانی میان ءَ بوتگیں گند ءُ نند سیمی رند ءَ بے سوب بوتگ – چریشی ءَ شال تاں تربت ءُ گوادر ءَ روکیں ایم 8 شھدگ سرجمی ءَ بند انت ھردو نیمگان مساپر کشیں کوچ ءُ دگہ گاڑی کتار ءَ اُشتاتگ انت – سدانی کچ ءَ سپر کنوکیں مردم اشتاتگ انت کہ آھانی تہ ءَ زھگ ءُ زالبول ءُ کماش ھم ھوار انت –

اھوالکارانی رِد ءَ چار ادار انت کہ سپر کنوکیں مردم شد ءُ تند اوپار کنگ ءُ سپر کنگے ودار انت وھدیکہ نزیکیں دکاناں وردنی سامان ھم ھلاس بوتگ انت – دومی نیمگ ءَ واکدار درنگاز کنوکانی لوٹ ءَ سرجم کنگ ءَ نہ انت –

زانگ بہ بیت سامی ءِ ھند ءَ زالبولاں شھدگ گوستگیں روچ ءَ پاکستانی پوج ءِ دست ءَ زورانسری آوار جنگ بوتگیں ورنائیں نودر دھمی تبک ءِ طارق بشیر، بدیر ء حبیب ءِ یل نہ کنگے بگیری ءَ بند کُتگ ءُ بیست چار ادار انت کہ نندانک ءَ نشتگ انت –

زھرشانی کنوکاں لوٹ کتگ کہ ھردو ورنا یل کنگ بہ بنت اگاں آھانی سر ءَ کتکاری ءِ الزام ھست گڈا پاکستان ءِ جوڈ کتگیں کانودانی رِد ءَ آمیدگس ءَ آرگ بہ بنت –

سربوتگیں ھالانی رِد ءَ گوستگیں روچاں بزاں ھبدہ دسمبر ءَ کیچ ءِ بنجاھی شھر تربت ءَ ناشناسیں مردماں پاکستانی پوج ءِ پانگسے ءِ سر ءَ دزبمب اُرش ءِ کُتگ –

اُرش تربت ءَ سنیما چار راھیں برجاھیں پوجی پانگس ءِ سر ءَ کنگ بوتگ ءُ اُرش ءِ آسر ءَ پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ.منّ اِتگ –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں ھبدہ دسمبر ءَ شمبے ءِ روچ ءَ سینما چاراہ ءَ برجاھیں دُژمنیں پاکستانی پوج ءِ پانگسے ءِ سر ءَ دز بمب اُرش ءِ کُتگ- دزبمب پانگس ءِ تہ ءَ کپتگ چریشی ءَ دو پوجی کارمند مرتگ انت ءُ دو زدگ بوتگ انت-

جارکش ءَ دیمتر ءَ گوشتگ کہ اُرش ءَ پد پاکستانی پوج ءَ کورکاؤ تیرگواری کرتگ چریشی ءَ یک راھگوزے زدگ بوتگ، زورگریں پوج ءَ بازار ءِ کِر ءُ کشاں وتی زوراکی برجاہ داشتگ مردم زوراکی ءِ نشانگ کتگ انت –

بی ایل ایف ءِ جارکش میجر گھرام بلوچ گوشتگ کہ زورگریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھشت سد ءُ نود ءُ شش روچ سرجم بوتگ انت –

ھمے وھد ءَ بی این پی ءِ باسک ایڈوکیٹ حسن مینگل، پی ایس ایف ءِ سوبائی سرکماش اسد ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ ءُ بیگواھیں مردمانی یل کنگ ءِ لوٹ کتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ آپریشن ءِ نام ءَ پاکستانی پوج ءَ زورانسری آوار جنگ بوتگیں مردمانی شھید کنگے درچ ءِ تہ ءَ گیشی آرتگ – نوں بلوچ پاکستانی پوج ءُ آئی ءِ رسانکدرانی ھاتر ءَ ھمے واست ءَ ناشرکار انت کہ آ وتی ھک ءُ پجار رکینگ ءِ ھاتر ءَ جھان ءِ کانودانی رِد ءَ جھد کنگ ءَ انت –

آئی ءَ گوشتگ کہ سیاسی جھد ءِ سر ءَ بندش باسکانی آوار جنی ءُ پدا آھانی ژانگولیں جونانی چگل دیگ بلوچ راج ءِ تقدیر جوڈ بوتگ – پاکستانی پوج ءِ در انسانی زوراکیانء دیمپانی کنگے ھاتر ءَ بلوچ راج جھد کنگ ءَ انت –

آئی ءَ گوشتگ کہ زورانسری آوار جنیانی گر ءُدار ءَ سرکار پوج ءِ دیم ءَ بے وس انت – بلوچستان ءِ سرکار وتی کرسی ءِ رکینگے ھاتر ءَ زورانسری آوار جنگ بوتگیں مردماں ناشرکار گوشگ انت –

آئی ءَ گوشتگ کہ بلوچستان ءِ تہ ءَ یک سوبیداری ءِ واک چہ اسمبلی والھاں گیشتر انت ادا ایردست ءُ بےوس ایں مردماں انساپ رسگ مشکل ءُ ناممکن انت –

بلوچ انسانی ھکانی باسک راشد حسین ءِ مات ءَ وتی شنگ کرتگیں درشان ءِ تہ ءَ گوشتگ کہ منی زھگ بیست ءُ شش دسمبر سال دوھزار ھژدہ ءَ متھدہ عرب امارات شارجہ ءَ ھمودے چیریں ادارھاں آوار جتگ ءُ بیگواہ کتگ کہ پدا رند ءَ بیست ءُ دو جون دوھزار نوزدہ ءَ بلوچ باسک پاکستان ءَ آرگ بوتگ –

آئی ءَ مات ءَ گوشتگ کہ امارتی واکداراں پاکستان ءِ گوشگ ءِ پد گیرکانودی منی زھگ پاکستان ءَ دیم داتگ وھدیکہ راشد حسین ءِ جان ءَ پاکستان ءِ تہ ءَ ھترہ انت آ در پہ دری زند گوزینگی بوتگ –

آئی ءَ گوشتگ کہ چہ امارات ءَ زورانسری آوار جنی ءُ پدا پاکستان ءَ دیم دیگ ءَ پد من ھمائیں ھمک روچ کمیشن ءُ آمیدگساں رو آیگ انت بلے تنی وھدی مناں انساپ نہ رستگ –

آئی ءَ چہ بلوچ راستیں پاٹی، نودربر گل ءُ ھر تک ءُ پھناتاں سیادی داروکیں مردماں گوں لوٹ کتگ کہ آ راشد حسین ءِ زند ءِ رکینگ ءَ ھمراہ داری بہ کن انت ءُ زھرشانی ءَ بھر بہ زور انت –

زانگ بہ بیت کہ راشد حسین ءِ پاکستان ءَ آرگے گپ سی ٹی ڈی کراچی ءِ انچارج عبداللہ شیخ ءَ وت سَے جولائی ءَ وتی انٹرویو تہ ءَ راست کتگ – عبداللہ شیخ ءِ رِد ءَ راشد حسین چہ انٹرپول ءَ پاکستان ءَ آرگ بوتگ –

جھانگیر بلوچ ھنکینی کماش ءُ احمر بلوچ ھنکینی کارگشاد گچین کنگ بوتگ اَنت ۔

بلوچ اسٹوڈنس پرنٹ ملیر ھنکین ءِ ھنکینی لس مجلس ءِ دیوان گْوَستگیں ھنکینی کماش ھانی بلوچ ءِ سروکی ءَ برجم دارگ بُوتگ۔ اے دیوان ءِ تہ ءَ بنجاھی سرکولر گْوَستگیں ھنکینی رپوٹ ، شرگداری نشست ، ھَندی ءُ میان اُستمانی جاور ھالانی سر ءَ گپ ءُ باوست کنگ بوتگ اَنے ۔ گل ءِ کار ءُ آیوکیں گامگیج ءِ سر ھال ءِ سر ءَ گْپ ءُ باوست کنگ بُوتگ ، اے دیوان ءِ مھمانِ ھاس بنجاھی پتّر ءِ باسک سنگت لتیپ لال بُوتگ۔

ھنکینی لس مجلس ءِ دیوان ءِ تہ ءَ بنجاھی پَتّر ءِ باسک سنگت لتیپ لال ءَ ھَندی ءُ میان اُستمانی جاور ھالانی سر ءَ تران کنان ءَ وتی ھیال درشان کرت ءُ گْوشت کہ زور گریں کبزہ گیر وتی زوراکیانی سر ءَ مُدامی لٹ ءُ شاپ کُتگ ءُ آیانی بُنکی اگبالانی لگتمالی کُتگ ءُ آیانی مال ءُ مڈّیاں ھوار آیانی تیوگیں مڈّیاں پُل اِتگ اَنت ءُ آیانی سر ءَ راج کُتگ۔ دیمتر ءَ سنگت ءَ تران کنان ءَ گْوشت اگاں ما وتی چمّاں شانک بہ دے اَیں ءُ بچار ایں گُڑا یک نیمگ ءَ امریکہ ءِ اتھادی ءُ دومی نیمگ ءَ روس ،چائنا ءُ آیانی اتھادی مارا گَندگ ءَ کائینت کہ ھر یکے وتی زاتی نپانی ھاتر ءَ دومی ءِ گوما نزیکی کنگ ءَ اِنت ءُ امریکہ اے جنگ ءِ تہ ءَ سِلاہ ءِ دیگ ءِ کمک ءَ کنگ ءَ اِنت۔ دیمتر ءَ سنگت ءَ تران کنان ءَ گْوشت اے زورگیریں ریاست ءِ ھر وھد ءَ دل بہ لوٹ ایت آ وتی نپانی پَچگرگ ءِ ھاتر ءَ بے دردی ءَ زُلم ءُ زوراکی ھم کنت ءُ کسے ءِ جواب دہ ھم نہ بیت۔

دیمتر ءَ سنگت لتیپ لال ءَ گل ءِ کارانی سرھال ءِ سر ءَ گپ کنان ءَ گل ءُ گل ءِ ارزشت بابت ءَ سنگتاناں سرپدی دات ءُ گْوشت کہ گل لھتیں مُردمانی یک ٹولی یے کہ آئی ءِ تہ ءَ مردمانی لیکہ یک بہ اَنت ءُ آ وتی ھمے لیکہ ءِ بنیات ءَ وتی لوٹانی ھاسل کنگ ءِ ھاتر ءَ جھد کن اَنت۔ گل مدامی رھبندی اسولانی بنیات ءَ اوشت اَنت۔ دیمتر ءَ سنگت ءَ تران کنان ءَ گْوشت کہ اے گل ءِ لیکہ اِنت کہ کُلیں نودربراں یکجاہ بہ کنت ءُ آیاناں سرپدی بہ دنت ءُ مھکم بہ کنت، ھمے لیکہ ءِ بُدولت اِنت مروچی ملیر سنگت اُوشتاتگ اَنت ءُ وتی کاراں دیمروی کنگ ءِ ھاتر ءَ جھد ءَ اَنت۔ بنجاھی سنگتانی گوما اوشتاتگ اَنت ءُ آیانی کمک ءَ کنگ ءَ اَنت۔ گل ءِ کارانی تہ ءَ وتی جُھَد ءَ را برجم اِش داشتگ۔

آیوکیں گامگیج ءِ سرھال ءِ سر ءَ دُرستیں سنگتاں وتی پیسلہ دات اَنت ءُ پیسرگیں ھنکین ھلاس کنگ بُوت ءُ نوکیں ھنکینی کابینہ ءِ واست ءَ سنگتاں گچین کاری کرت۔
ملیر ھنکین ءِ ھنکینی کماش جھانگیر بلوچ ، کمک کماش بانک ھانی بلوچ ، کارگشاد سنگت احمر بلوچ ، کمک کارگشاد حسن بلوچ ءُ شَنگکار سنگت حامد بلوچ گچین کنگ بوت اَنت۔ آیاں اِے گْوشت کہ زوت ءَ بُنزھی جوڑِشت اڈ دیگ بہ بیت ءُ گل ءِ سنگتانی زانت ءُ سرپدی دیگ بندات بہ بیت، آیاناں وانگجاھاں روّگ ءُ گشت کنگی اِنت ءُ کتابی ربیدگ دیم ءَ برگی اِنت ۔
دیوان ءِ گُڈسر ءَ سنگتاناں گلءِ سوگند دیگ بوت ءُ دیوان ءِ ھلاسی جار پَرینگ بوت

روکپتی ءُ رودراتکی بلوچستان ءِ میانی دمگ زامران ءَ سلاہ بندیں مردماں ایرانی لشکر ءِ چار کارندھانی سر ءَ اُرش کرتگ ءُ کُشتگ-

گیشیں ھالانی رد ءَ اُرش مروچی سھب ءِ ساھت نُھ ءَ بیتگ سلاہ بندیں مردماں ایرانی لشکر ءِ سر ءَ زامران ءِ کوہ سھر ءُ دراب ءِ میانی ءَ راہ بستگ ءُ اُرش کرتگ-

دمگی مردمانی رد ءَ اُرش ءَ ایرانی لشکر ءِ چار کارندہ مرتگ اَنت ءُ اُرشکار تچگ ءَ سوبین بیتگ اَنت-

چم دیستگیں مردماں دی بلوچستان پوسٹ ءُ گوں تران کنان ءَ گوشتگ کہ اُرشکار یک گاڑی ءُ یک پرپٹے ءَ سوار بیتگ اَنت کہ ایرانی لشکر ءِ سر ءَ اُرش اش کرتگ ءُ پد ءَ زوت تتکگ اَنت-

سرکاری ھال سرکنوکاں ھال راست کرتگ ءُ گوشتگ کہ اُرش ءَ بیران بیتگیں مردمانی پجار مھمد گودرزی، رحیم بخش پرکی، حمید رضا عابدی ءُ مھمود نیکخواہ زادہ ءِ ناماں زانگ بیتگ اَنت –

ایرانی لشکر ءَ بھتام جنان ءَ گوشتگ کہ اُرشکار پاکستانی سیمسراں چہ اتکگ اَنت ءُ اُرش ءَ پد واتر شتگ اَنت-

کینیڈا ءِ شھر ٹورنٹو ءَ تیرگواری وئیلے ءَ اُرشکار ھوار پنچ مردم بیران ءُ یکے زدگ بیتگ-

ھال سرکنوکیں ادارہ اے ایف پی ءَ دمگی پولیس چیف جم میک سوین ءِ درور دیان ءَ گوشتگ کہ کانون داروکیں کارندھانی میان ءَ تیرگواری ءِ آسر ءَ اُرش کار کُشگ بیتگ-

پولیس ءِ رد ءَ تیرگواری ءِ وئیل ٹورانٹو چہ سِی کلو میٹر دوری ءَ وان نامیں شھرے ءَ یک اپارٹمنٹ ماڑی ءِ توک ءَ پیش اتکگ-

وئیل ءَ زدگ بیتگیں مردم نادراہ جاہ ءَ سر کنگ بیتگ ءُ آئی ءِ جاورگھتر گوشگ بوگ ءَ اَنت-

پولیس چیف جم میک سوین ءَ اھوالکاراں گوں تران کنان ءَ گوشتگ کہ وئیل جاہ ءِ سر بیگ ءَ داں اود ءَ یک ترسے ءِ جاور ودی بیتگ اَنت بازیں مردمانی لاش کپتگ بیتگ اَنتٹ

پولیس ءِ نیمگ ءَ شنگ کنگ بیتگیں پٹ ءُ پولی ءَ سرپدی رس اتگ کہ آسرمند ءُ جرمکار ءِ گون ءَ ھچ سیادی نہ بیتگ-

بیران بیتگیں مردمانی لاش جتا جتائیں اپارٹمنٹساں کپتگ بیتگ اَنت-

دمگی رسانکدر ءِ رد ءَ ماڑی سرجم ءَ ھالیگ کنگ بیتگ ءُ اود ءَ بس پولیس ءِ کارمند ءُ ایمطولینس جاڑیگ اَنت-

امریکہ ءُ ھواریں ھمساھیگیں ڈیھ کینیڈا ءَ تیرگواریانی وئیل باز کم گندگ ءَ کاینت بلے لھتے وھدانی توک ءَ اود ءَ سلاہ ءِ دست ءَ کنگ ءَ اود ءَ بیرانیانی تہ ءَ گیشی گندگ ءَ آیگ اِنت ءُ چریشی ءِ سر ءَ سرکار ءَ وتاس ءُ کسانیں سلاھانی سر ءَ بندش ءِ کانون من اتگ-

زانگ بہ بیت اپریل دوھزار ءُ بیست ءَ کینیڈا ءِ رودراتکی اُستان نووا سکوشیا ءَ یک تیرگواری وئیلے پیش اتکگ اَت کہ اود ءَ جرمکار ءَ پولیس ءِ وردی گور ءَ کتگ ات ءُ بیست ءُ دو مردمانی اجل جتگ ات اَنت-

ھمے سال ءِ ستمبر ءِ ماہ ءَ کینیڈا ءِ اُستان سسکیچواں ءَ یک مردمے ءَ یازدہ مردم کشتگ ات ءُ دگہ ھژدہ مردم چاکو جتگ ءُ زدگ کتگ ات اَنت-

چاگردی ترامجاھانی تندجاہ ٹوئٹر ءَ یک جارے ءِ رد ءَ گشتگ کہ دگہ کجام چاگردی ترامجاھانی لنکانی شنگ کنگ ءِ سر ءَ اکاونٹ بند کنگ بیت اِنت، دومی نیمگ ءَ ایلون مسک ءَ وتی بارو ءَ لیکھانی زانگ ءِ ھاتر ءَ یک نوکیں پول ءِ جوڑ کرتگ-

ٹوئٹر ءِ نیمگ ءَ شنگ بیتگیں درشان ءَ پدر کنگ بیتگ کجام ھم سیمی پاٹی ءِ سوشل میڈیا ویب سائٹ ءِ لنک ءِ شنگ کنگ ءِ سر ءَ نہ ایوک ءَ ٹویٹ ڈلیٹ کنگ بیت اِنت بلکیں اکاؤنٹ ھم بند کنگ بیت اِنت-

درشان ءَ گشگ بیتگ ٹوئٹر کارمرد کنوک انسٹاگرام یا دگہ سوشل میڈیا اکاؤنٹسانی یوزرنیماں ھم شنگ کنگ ءِ اجازت نہ بیت اِنت-

ٹوئٹر ءِ اے نوکیں پالیسی ءَ پف کارمرد کنوک نا تھنا ٹویٹ ءَ وتی انسٹاگرام اکاونٹ ءِ لنک ءُ یوزر نیم ءَ شنگ کت نہ کن اَنت-

ٹوئٹر ءِ کلانیں شریدار جیک دارسی ءَ اے نوکیں پالیسی ءِ بس یک لبزے نبشتہ کتگ “پرچا؟ ” نوکیں پالیسی ءِ جار ءَ پد ٹوئٹر ءِ واھند ءُ ارب پتی ایلون مسک ءَ کارمرد کنوکانی لیکھانی زانگ ءِ ھاتر ءَ یک پولے جوڑ کتگ ءُ نبشتہ “من ءَ ٹوئٹر ءِ سروکی ءَ چہ درآیگی اِنت؟ “-

پول ءَ کارمرد کنوکانی لیکھانی واستا ھاں یا نا ءِ آپشن دیگ بیتگ اَنت ءُ ایلون مسک ءَ نبشتہ کتگ آ اے پول ءِ سرجمی ءِ اشی ءِ سر ءَ امل کنت-

ٹوئٹر ءِ نوکیں پالیسی ءَ ٹیکنالوجی ءِ زرکار کار پال گراھم ءِ وڑیں مزن نامیں مردمے ءِ اکاؤنٹس بند کنگ بیتگ چریشی ءَ پد ایلون مسک ءَ ٹویٹ کتگ کہ انفرادی ٹویٹس ءَ ابید آ اکاؤنٹس بند کنگ بیت اِنت- کہ آئی ءِ اولی مول ءُ مراد وتی جار ءِ گیش شنگ ءُ تالان کنگ اِنت ایلون مسک ءَ پد ءَ پھلی لوٹ اتگ ءُ گوشتگ دیم ءَ ھر ھما گامگیج ءِ زیرگ ءَ پیسر مردمانی لیکہ زیرگ بنت –

گوستگیں ھپتگ ءَ ٹوئٹر ءُ ایلون مسک ءِ سر ءَ رپورٹ کنوکانی اھوالکارانی اکاؤنٹ ھم بند کنگ بیتگ اَنت کہ چریشانی توک ءَ امریکہ ءِ روتاک نیو یارک ٹائمز، واشنگٹن پوسٹ، ٹی ویژن چینل سی این این ءُ دگہ میڈیا گروپساں بندوکیں اھوالکار ھوار اَنت بلے پد ءَ بازیں ایراد گرگاں پد دوبر پچ کنگ بیتگ اَنت –

میان اُستمان ءِ ادارہ انسانی ھکانی سروک وولکر ٹرک ءَ ھم اھوالکارانی اکاونٹسانی بند کنگ ءِ سر ءَ پدردی درشان کتگ ءُ ایلون مسک ءَ را زور داتگ کپ آ پالیسانی بارو ءَ انسانی ھک ءُ آجوئی ءِ سر ءَ گپ کنگ ءِ شرپ ءَ بہ کنت –

روکپتی بلوچستان ءَ دو مردم سی ءُ پنچ روچ ءَ پیش گرگ ءُ بیگواہ کنگ بیتگ اَنت ءُ پد ءَ زیک یلو کنگ بیتگ اَنت-

سر بیتگیں ھالانی رد ءَ بنجاھی شھر زاھدان ءَ سِی ءُ پنچ روچ ءَ پیش دو بیگواھیں مردم یل کنگ بیتگ ءُ وتی لوگاں سر بیتگ اَنت-

ھردوکیں مردم وت ماں وت برات اَنت ءُ آیانی پجار الیاس میرکازئی ءُ یاسین میرکازئی ء عبدالرھمان جھمنند زاھدان ءِ ناماں زانگ بیتگ اَنت-

اے سی ءُ پنچ روچ ءَ پیش زھرشانی ءِ وھد ءَ دزگیر کنگ بیتگ اَنت ءُ پد ءَ گوستگیں روچ ءَ یل کنگ بیتگ اَنت-

روکپتی بلوچستان ءَ ھمک روچ مردمانی آوارجنیانی ھال سر بوگ ءَ اَنت دومی نیمگ ءَ کمے کساس ءَ مردم یل کنگ بوگ ءَ اَنت –

فٹبال ءِ جھانی کپ ءِ گُڈی گوازی (فائنل) مروچی گتر ءِ لوسیل پَٹ ءَ ارجنٹائن ءُ فرانس ءِ نیام ءَ لئیب کنگ بیتگ۔ فائنل گوازی ءَ گوستگیں رند ءِ باجبریں ٹیم فرانس ءَ وتی داد رکینت نہ کُتگ ءُ ارجنٹائن ءَ پینلٹی ککس آں گوازی وتی نام ءَ کُتگ ءُ ارجنٹائن سئے رندءَ ورلڈ کپ ءَ برگ ءَ باجبر بیتگ اَنت۔

فیفا ورلڈ کپ ءِ گُڈی گوازی ءَ ارجنٹائن ءَ لئیب ءِ اولی بھر ءَ دو گول آورتگ کہ اِشانی تہءَ یک گولے لیونل میسی ءَ 23می دمان ءَ پینلٹی ءَ آورتگ وھدیکہ دومی گول ارجنٹائن ءِ یازدہ نمبر جرسی گورءَ کنوکیں جوانیں لئیبی اینجل ڈی ماریا ءَ 36 می دمان ءَ آورتگ۔ وھدیکہ اولی بھر ءَ فرانس ءِ ٹیم ءِ نیمگ ءَ ھاسیں گوازی ءِ دروشم ءِ گندگ نہ بیتگ۔

وھدیکہ دومی بھر ءِ ھپتادمی دمان ءَ پد فرانس ءَ گوازی مٹ کُتگ ءُ فرانس ءِ نیمگ ءَ امباپے ءَ 80می دمان ءَ پینلٹی ءَ اولی گول آورتگ ءُ 81 می دمان ءَ دومی گول کُتگ ءُ ارجنٹائن ءِ برابری ءَ وتءَ سرکُتگ۔ لئیب دو دو گولانی سرءَ نود دمان ءَ سربیتگ۔

لئیب ءِگچین کُتگیں دمانانی تہءَ پیسلہ ءَ سر نہ بیگ ءِ سوب ءَ دگہ سی دمان ءِ وھد دیگ بیتگ کہ پانزدہ دمان ءِ دو بھر گوازی کنگ بیتگ اَنت۔ گیشتریں وھدانی لیونل میسی ءَ جوانیں گوازی ءِ درشان کنان ءَ دگہ یک گولے ارجنٹائن ءِ نام ءَ کُتگ ءُ 109 می دمان ءَ ارجنٹائن ءَ فرانس ءَ یک گولے ءَ چہ دیما بیتگ۔ بلے 118می دمان ءَ فرانس ءَ دگہ یک پینلٹی ءِ رسگ ءِ سوب ءَ امباپے ءِ سئمی گول آورتگ ءُ جھانی کپ ءِ فائنلءَ ھیٹرک کنگ ءَ ھوار وتی ٹیم پدءَ برابری ءَ سرکُتگ۔

120 دمان لئیب ءَ پد وھدیکہ گوازی انگت یک آسری ءَ سر نہ بیتگ گُڑءَ گوازی ءِ پیسلہ پینالٹی ککسانی سرءَ کنگ بیتگ، پینالٹی ککسانی تہءَ ارجنٹائن ءَ چار گول آورتگ وھدیکہ فرانس ءَ دو گول آورتگ ءُ دو پینلٹی ءَ گول کُت نہ کُتگ ءُ چریشی سوب ءَ ارجنٹائن ءَ فیفا ورلڈ کپ دوھزار بیست ءُ دو وتی نام ءَ کُتگ۔

زانگ بہ بیت ارجنٹائن ءَ گوستگیں رندءَ 1986 ءَ فیفا ورلڈ کپ ءَ باجبر بیتگ، ءُ کساس سئے ءُ نیم دھکاں پد یک رندے پدءَ نوکیں اھد ءِ جوانتریں فٹبال لئیبی لیونل میسی ءِ مستریءَ ورلڈ کپ وتی نام ءَ کُتگ اِش۔