TBP Balochi

یوکرین ءِ سروک ولادیمیر زیلنسکی ءَ ایران ءَ را ’ناشرکار ‘ گشتگ ءُ بھتام جتگ کہ روس ءِ نیمگ ءَ اُرشانی کمک ءَ تھران ءَ کمک بوگ ءَ اِنت-

عرب نیوز ءِ رد ءَ سروک ولادیمیر زیلنسکی ءَ امریکہ ءِ تر ءُ تاب ءَ کانگریس ءِ ھواریں نیاد ءَ تران کنان ءَ گوشتگ کہ روس ءَ سدانی کچ ءَ راہ دیگ بیتگیں ایرانی ڈرون یوکرین جوانیں انفرسٹرکچر ءِ سر ءِ ترس بیتگ اَنت اے وڑ ءَ یک ناشرکارے دومی ناشرکار ءَ کمک کنگ ءَ اِنت-

اشی ءَ پیش روکپتی ڈیھاں اے گپ جتگ کپ یوکرین ءِ جوانیں جاھانی سر ءَ نشانگ کنگ ءَ ایران ءَ روس ءَ را ڈرون پجارینتگ- چرے اُرشاں لاکانی ھساب ءَ یوکرینی شھری آپ، بجلی ءُ ھیٹنگ ءَ زبھر بیتگ اَنت-

یوکرین ءِ سروک ءَ ایران ءِ درگت ءَ گپ کنان ءَ گوشتگ کہ روس ءَ نسل کشی ءِ پالیسی ءِ تہ ءَ یک نوکیں ھمسنتے دزکپتگ-

آئی ءَ گوشتگ کپ ایران ءِ پلامرزی ءَ کار کنوکیں مردماں بازیں سالاں چہ امریکہ ءُ آئی ءِ ھمسنت سعودی عرب ءُ عرب امارات ءِ سر ءَ اُرش بیتگ اَنت-

آئی ءَ گوشتگ کپ ایران ءِ پلامرزی ءَ یمنی حوثیاں سعودی ءِ سرڈگار ءِ سر ءَ بازیں میزائل آس داتگ اَنت چریشی ءَ چہ بازیں شھری مرگ ءِ ارجان بیتگ اَنت-

سروک زیلنسکی ءَ امریکہ ءِ واکدار ءِ پتر ءِ باسکاناں کڈن ءَ کنان ءَ گوشتگ کہ زوت ءُ چپ زوت گامگیج بہ زور اَنت اگاں ناں گڑا دگہ ھمنستیں ڈیھے ءِ واستا کھر بیت اِنت-

بلوچستان ءِ دمگ کیچ ءَ پاکستانی پوج ءَ یک ورنایے زورانسری آوار جتگ ءُ گوں وت برتگ-

سربوتگیں ھالانی رِد ءَ پرندوشی شپ ءِ ساھت ءَ یک ءَ کیچ ءِ دمگ تمپ ءِ ھند دازن ءَ پاکستانی پوج ءَ بیڑبرتگ ءُ زوراکی کنان ءَ یک ورنایے زورانسری آوار جتگ ءُ گوں وت برتگ-

آوار جنگ بیتگیں ورنا ءِ پجّار دلجان ء موسیٰ نام ءَ چہ بیتگ-

اِھوالکارانی رِد ءَ پاکستانی پوج ءَ دلجان ءِ کستریں برات علی جان ءِ آوار جنگ ءِ جُھد ھم کتگ بلے لوگ مردماں گھگیری کتگ ءُ آ پچ گپتگ –

زانگ بہ بیت بلوچستان ءَ ھمکروچ زورانسری آوار جنی ءِ وئیل نکش بوگ ءَ اَنت دومی نیمگ ءَ بیگواھیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ شُدکُشیں ھڑتال ءَ یک دْراجیں مدتے بیت برجاہ ءَ اِنت-

بلوچستان ءِ بنجاھی شھر شال، گوادر ءُ ڈیرہ غازی خان ءَ بلوچ یکجھتی کمیٹی ءُ بلوچ وومن فورم ءِ چیردستی ءَ نمیرانیں بانک کریمہ بلوچ ءِ دومی شھیدی سالروچ ءِ درگت ءَ مراگش برجم دارگ بوتگ – مراگشاں مزنیں کچے ءَ نودربر، زالبول ءُ ھر تک پھناتاں سیادی داروکیں مردماں بھر زرتگ –

ترانکاراں بلوچ نودربر گل آزاد ءِ گوستگیں سرکماش بانک کریمہ بلوچ ءِ در پہ دری ءُ پدا آئی ءِ شھیدی ءَ پد ریاست ءِ نیمگ ءَ آئی ءِ میت ءِ سر ءَ بندش ءُ آئی ءِ پگری سنگتانی سر ءَ بندش ترندی ءَ گوں ایرجتگ –

مراگشاں بلوچ وومن فورم ءِ نیمگ ءَ کریمہ بلوچ ءُ بلوچ زالبولانی زند ءِ سر ءَ جوڈ کنگ بوتگیں بلوچی تامر “بلوچستان ءِ بانک” ھم پیشدارگ بوتگ –

شال مراگش ءَ بلوچ دانشور ماما تالپور، خرم علی، ایڈوکیٹ شاھزیب، ڈاکٹر ماھرنگ بلوچ، زین گل، تاج بلوچ، اے آر داد، ڈاکٹر منظور بلوچ، شاری بلوچ ءُ خان زمان کاکڑ ءَ بانک کریمہ ءِ راجکاری جھد ءُ آئی دیمھونی ءِ سر تران کتگ دروت ندر کتگ –

گوادر ءِ مراگش ءَ وائس فار بلوچ مسنگ پرسنز ءِ سمی دین بلوچ، جے یو آئی ءِ سوبائی کمک سرکماش خالد ولید سیفی ءُ بی ایس او ءِ گوستگیں سروک ایڈوکیٹ سعید فیض، بلوچ یکجھتی کونسل ءِ عبدالوہاب بلوچ ءَ تران کُتگ ءُ مبارک قاضی ءَ ھوار دگہ شائراں وتی ھیال درشانتگ انت – ترانکاراں گوشتگ کہ کریمہ بلوچ ءَ بلوچ راجی زرمبشت ءِ جھد ءَ نوکیں راہ ءِ داتگ –

شال ءِ مراگش ءَ ترانکارانی گوشگ ات کہ بانک کریمہ راج دپترے تاکانی تہ ءَ ھنچیں کرد ءِ جوڈ بوتگ کہ راج ءَ آ لمّہ بزاں ماتی ءِ بستار داتگ کہ اے گپ ءَ کریمہ بلوچ ءِ ارزشت بلوچ راج ءِ تہ ءَ چی انت – کریمہ ءَ وتی سرجمیں زند بلوچ راج ءُ جھد ءِ تہ ءَ گوازینتگ آئی ءَ وتی زند ءِ یک دمان ءِ ھم وتی زاتی واھشتاں نہ داتگ آ یک ھنچیں کردے ءِ واھند انت کہ گوستانک ءِ سداں سال یات کنگ بیت –

آھانی گوشگ ات کہ بید کریمہ ءَ بلوچ ءِ جھد ناسرجم گندگ ءَ کئیت آئی ءَ بلوچ راج ءُ ھاسکر زالبولانی چاگرد ءِ تہ ءَ جوانیں کردے پیلو کتگ – آئی ءَ شپ روچ جھد کتگ آئی ءَ بلوچ زالبول راجکاری ءِ تہ ءَ آرگ ءَ ھم وتی کرد پیلو کتگ – آئی ءَ گس گس ءَ شتگ بلوچ مات ءُ پت کنونس کتگ انت کہ پہ زالبولانی ھاتر ءَ راجکاری جوانتریں پلیٹ فارم یے کہ ھمودا چہ آدیما رونت ءُ وتی راج ءِ ھاتر ءَ چیزے کت کن انت – آئی ءَ سرجمیں جھان ءِ ایردستانی ھاتر ءَ توار چست کتگ آ پہ ایردستیں راجاں رھشون ءِ بستار ءَ بوتگ –

ترانکارانی گوشگ ات کہ کریمہ بلوچ ءَ راج ھر زلم زوراکیانء بگیری ءَ یکجاہ کتگ انت آ گھگیری ءِ ھاتر ءَ سرپد کتگ انت – بلوچستان ءِ چشیں جاھے نیست کہ کریمہ نشوتگ ءُ راج سرپد نہ کتگ – وھدیکہ کہ بلوچستان ءِ تہ ءَ راجکاری جرمے کوشگ بوتگ ءُ کریمہ ءِ سنگت یک یک ءَ شھید کنگ بوتگ انت آھانی ژانگولیں جون چگل دیگ بوتگ انت بلے اے وڈیں جاور ھالانی تہ ءَ ابید ھم کریمہ پد نہ کنز اِتگ – آئی ءَ اے بیمناکین جاورانی دیمپانی کتگ ءُ اے گپ پدر کتگ کہ ھر وڈیں زرمبشت ءِ یک سیاسی باسک ءَ جاوارانی دیمپانی کنگی انت گڈا آ رھبری ءَ مدامی جھدے چیدگ جوڈ بوت کنت – کریمہ ءَ اے جاہ ءَ سر بوگ ءَ ھما دیمھونی داتگ انت کہ مرچیگیں بیست سال ساری ھچ کس ءَ گمان نہ کتگ بلے آئی ءَ ثابت کتگ کہ بلوچ زالبول چینچو تمرد ءُ مھکم انت بلے زالماں شوربندی ءِ رد ءَ گِسانی تہ ءَ بند کتگ –

ترانکاراں مراگش ءِ گڈسر ءَ لمہ ء وتن بانک کریمہ سھر چکیں دروت ندر کتگ گوشتگ کہ بانک کریمہ تھنا بلوچے نہ انت بلکنہ اے دمگ ءِ تہ ءَ تمردیں زالبولے کرد ءِ چیدگ جوڈ بوتگ آئی ءَ چراگے ءِ دروشم ءَ اے دمگے زالبول وتی آجوئی ءُ ایمنی شوھاز کت کن انت –

گوادر ءِ مراگش ءِ ترانکارانی گوشگ ات کہ بلوچستان ءِ زرمبشت مروچی ھما دروشم ءِ تہ ءَ ھست انت دیم پہ وتی منزل ءَ روان انت آئی ءِ تہ ءَ بانک ءِ بے بھائیں دیمھونی بیھال کنگ نہ بنت – ھر یک گِس ءِ تہ ءَ کریمہ ءِ ودی بوتگ راجی زرمبشت پگری ءُ نزریاتی دروشم ءَ دیم پہ منزل ءَ جنزان انت-

گوادر مراگش ءَ زالبول ءُ مردیناں بھر زرتگ بلے پدا زالبولانی کمیں کساس ءَ بھر زورگ ءَ سمی دین بلوچ ءَ گوشتگ اگاں راستیں دروشم ءَ ما کریمہ پگر وتیگی بہ کتیں گڈا مروچی کریمہ بزاں وتی مات ءُ گھار گسانی تہ ءَ نہ داشتگ اتنت ءُ اے مراگش ءَ آرتگ اِتنت –

من ءَ وشی بوت کہ اے کوم ءِ تہ ءَ کریمہ ءِ پکر ءِ زندگ کنوک انگت ھست انت۔ بلے ھما کریمہ کہ شما وتی لوگانی تہ ءَ بستگ ءُ دو وھد ورگ ءِ پابند کتگ اَنت، کہ آیانی واستا کریمہ ءَ راہ پچ کتگ، آ چی ءَ اے پِنڈال ءِ تہ ءَ موجود نہ اَنت؟

منی واستا باز اپسوز ءِ گپ انت کہ من چہ کراچی ءَ تاں گْوادر ءَ یک پروگرامے ءَ کا ایں کہ آ پروگرام بانک کریمہ ءِ یات ءَ بیت انت، آئی ءِ تہ ءَ چار چہ کراچی ءَ،ءُ ھشت ءُ دہ چہ تُربَت ءَ اتکگیں زالبول انت، بلے گْوادر ءِ زالبول من ءَ گندگ ءَ نئیت انت۔

ترانکاراں کریمہ بلوچ بلوچءِ سیاسی جھد ءُ آئی راجکاری کرد ءِ سر ءَ وتی ھیال درشان اِنت –

آھانی گوشگ ات کہ کریمہ بلوچ یک مھکمیں توار ءِ بوتگ کہ آئی ءِ توار ءَ گلامی زمزیل سرین اتگ انت آئی ءِ توار ءَ سرڈگار ءِ جھمنند ھچبر وتی گلامی بیھال نہ کتگ ءُ بلوچ زالبول ھم اے زمزیلاں رکگے ھاتر ےَ جھد ءِ بھر جوڈ بوتگ انت –

گوادر ءِ مراگش ءَ دومی بھر ءَ شئر شائری ءُ پدا ساز زیملی مراگش برجم دارگ بوتگ –

بلوچستان ءِ دمگ کیچ عومری کہن میتگ ءَ پاکستانی پوج ءِ دست ءَ زورانسری آوار جنگ بوتگیں دو ورنایانی آوار جنی ءِ بگیری ءَ مروچی چارمی روچ ءَ ھم زھرشانی نندانک برجاہ بوتگ –

زھرشانی نندانک ءِ سوب ءَ مروچی چار روچ انت کیچ ءِ دگہ دمگاں رؤگ آیگ بند انت ءُ ھزارانی کچ مساپر کشیں گاڑی ءُ ٹرک دگہ گاڑی اوشتاتگ انت –

چار روچاں برجاھیں زھرشانی دمگی مردماں ھوار چُک زالبول ھم زھرشانی کنگ انت ءُ ھردو ورنایانی یل کنگ ءِ لوٹ ءَ کنگ ءَ انت –

اھوالکار ءِ رِد ءَ اے وھدی نندانک جاہ ءَ پوج مزنیں کچے ءَ اتکگ ءُ ساڑی انت –
مروچی نیشنل پاٹی ءِ دمگی رھشوناں اتکگ ءُ بیگواھیں مردمانی کھول ءِ گوم ءَ دلپدردی درشان اتگ ءُ ورنایانی یل کنگ ءِ لوٹ کتگ –

آھانی گوشگ ات کہ بلوچستان ءَ آوار جنیانی سوب ءَ چاگرد بازیں اڈوجنجالانی دیمپانی ءَ کنگ انت کہ اشی ءِ گرءُ دار المی انت – بلوچستان ءِ گوم ءَ ریاستی ادارھانی رویش ھرابتر بوان انت کہ بدل کنگی انت –

آھانی گوشگ ات کہ سی ٹی ڈی ءِ کار مشکوک انت پولیس ءِ داب ءَ کار کنگ ءَ نہ انت –

آھاں کھول ءِ گوم ءَ گند ءُ نند ءَ نیشنل پاٹی ءِ بنجاھی سرکماش ڈاکٹر مالک ءُ بنجاھی سکریٹری جنرل جان محمد بلیدی ءِ کلوہ ھم سرکتگ – آھاں گوشتگ کہ نیشنل پاٹی سامی عمری کھن ءَ آوار جنگ بوتگیں ورنایانی یل کنائینگ ءَ کھول ءِ ھمراہ انت ءُ سوبائی ءُ بنجاھی سرکار ءِ سر ءَ زور دیگ بیت کہ آ عمری کہن ءَ آوار جنگ بوتگیں ورنایاں یل بہ کن انت اگاں آھانی بگیری ءَ کتکاری ءِ الزام ءِ ھست گڈا آمیدگس ءَ آرگ بہ بنت –

نوکتریں ھالانی رِد ءَ عومری کہن ءَ آوار جنگ بوتگیں ورنا یل بوتگ انت، کھول ءِ نیمگ ءَ.زھرشانی نندانک ھلاس

اھوالکار ءِ رِد ءَ ھردو ورنا یل بوتگ ءُ وتی گِس ءَ سر بوتگ انت گڑا درانگاز کنوکاں شھدگ ءِ سر ءَ نندانک ھلاس کتگ ءُ شھدگ پچ کتگ –

روکپتی بلوچستان ءِ تپابدپی شھر چھبار ءَ ایرانی سپاہ ءَ یک جنوزامیں زالبولے ءِ لوگ ٹکٹر ءِ سر ءَ ڈورینتگ اَنت-

شنگ بیتگیں تامربنداں گندگ بیت اِنت کہ لوگ ءِ ڈوریتگیں دیول ءُ دگہ ازباب ڈن ءَ کپتگ اَنت-

ھالانی تہ ءَ گوشگ بیتگ کہ سپاہ ءپ بسیج ءَ اے جنوزام ءِ زال ءِ لوگ ڈروینتگ ءُ ساماں ڈن ءَ چگل داتگ اَنت –

ھالانی تہ ءَ گوشگ بیتگ کہ سپاہ ءَ گشتگ اشی ءَ “کاگد ” چرے سبب ءَ سرکار ءِ ھساب ءَ اے لوگ ءِ جاگہ زورگری اَنت-

تامر بند ءَ گندگ بیت اِنت کہ اود ءَ زھگانی پریات ءُ واؤزاری اِنت ءُ زالبول گشگ اِنت منی لوگانی ڈروینگ ءَ چہ من اے سارتیں موسماں کجا برواں –

زانگ بہ بیت چد ءُ پیسر ھاش ءَ ھم یک کھولے ءِ ھمے دابیں لوگ ایرانی سپاہ ءَ ڈروینتگ ءُ دور داتگ ات اَنت ءُ چریشی ءَ پد اود ءَ مردماں زھرشانی کتگ ات ءُ پد ءَ ایرانی لشکر ءَ تیرگواری کتگ ات ءُ لھتے مردم ھم زدگ بیتگ ات اَنت-

گیدی ءِ تھنائیں چراگ بانک کریمہ

نبشتہ کار: باہڑ بلوچ

دی بلوچستان پوسٹ

آشوب چَکیں بلوچستان ءِ راجکاری ءُ راجدپتری جنز چہ وئیل ءُ کدآوریں مردماں چہ چَکار اِنت، راجکاری ءِ گِر ءُ چیلانی تہ ءَ عظیم ءُ کدآوریں مردمانی عمل ءُ کردار بلائیں ارزشت ءُ بستارے دار اَنت ۔

ھمے کش ءُ مکش ءُ گر ءُ چیلانی سوب ءَ راجانی تہ ءَ چاگردی ءُ سنچی بدلی اَتکگ، اوشتیں چاگرداں زورآور ءُ توانگریں دروشمے ءَ عملی کردار ءِ نامے بکش اِتگ ئِے ۔ پہ آیوکیں زمانگ ءَ میانجی دوست (اعتدال پرست ) ءُ ربیّت پرستانی ھلاپ ءَ ریڈیکل لیکھاں سر چست کتگ۔

نوزدھمی کرن ءَ یورپ ایردستی رَبیّتانی برجم دارگ ءِ ھاتر ءَ ایشیاء ءُ افریقی ملکانی سر ءَ وتی پاد ءَ مھکم کنت( اے وھد ءَ اٹلی ءُ جرمنی یورپ ءِ کسانیں ریاست بنت ءُ یَکمُشتی ءَ پَد دیم ءَ کاینت)

دگنیا ءِ راجدپتر ءَ اگاں ما چمشانکے بدی ئیں تاں اے گواچن سَھرا بیت کہ زوراکیں راجاں مدام اچ وت نزورتریں راجانی سر ءَ کبزہ گیری وتی پہ زور برجم داشتگ، سیاسی اکتدارانی گوم ءَ وتی دود ءُ ربیدگ نزوریں راجانی سر ءَ مُشتگ ءُ چَٹّی کُتگ اَنت دانکہ سیاسی گلامی ءِ ھمرائی ءَ پگری گلامی اوں مُھکم بہ بیت چیا کہ نِزور ءُ ایردستیں راجانی تہ ءَ آئی ءِ ھلاپ ءَ گِھگیری ءِ ھاٹیگ ءِ جند پشت مہ کپ ایت۔

بلوچ جھمننداں سر زمین ءِ بلوچستان ءِ دلبند ءَ چہ ازل ءَ گوں گھگیری ءَ وتی نام نبیس اِتگ یورپی ملک برطانیہ ءَ اے سرزمین ءِ سر ءَ ایردست کنگ ءَ بہ گِر داں انوگیں استان ءَ بلوچ جھدکارانی کربانی جتا جتائیں رنگ ءُ دروشم ءَ دیم ءَ کاینت-

ءُ ھمے لَڑے تہ ءَ یک رُشنائیں چراگے گندگ ءَ مارا کیت آ رشنائیں چراگ بانک کریمہ بلوچ اِنت آ ھمے جھدکار ءُ دیمونی دیوکاں چہ یکے ، آشوبی جنزانی تہ ءَ جنز ءَ گوں بندوکیں مردمانی کردار لس مھلوک ءِ سر ءَ مزنیں سانے دور دے اَنت-

بانک ءِ کرد ماں جھان ءَ اندیم نہ اِنت بانک ءَ بلوچ ءِ باندات ءِ ھاتر ءَ سکتیں ھالاتانی تہ ءَ وت ءَ را مُھکم داشتگ ۔ سیاسی گل ءَ اوار وتی راج ءِ راھشناسی کُتگ، دنیا ءِ توک ءَ استان ءَ را مدام تھریک ءُ گل چہ گیش مھکمیں ءُ توانائیں راھشون ءُ سروکاں چہ ترس اِیت(ایران ءِ ترس جنداللہ چہ گیش آئی یے سروک اَبدلمالک ءَ چہ بوتگ)-

ھستیں کوشست ھمے بیت کہ نوک آبادی ءِ زھر ءَ لس مھلوک ءِ توک ءَ بلائیں مُدتے ءِ ھاتر ءَ بہ داریت دانکہ وھدے پَجیگ ءَ آیانی سوچ ءُ پگر نزور بہ تر اَنت ءُ جنز اوشتے آماچ بہ بیت ءُ مھلوک چہ جنز ءَ یک کر بہ بیت بلے بانک چہ اے پندلاں چہ آژناگ بیت 2013 ءِ بی اس او ءِ سر ءَ بوتگیں کریک ڈاؤن وئیل، رضا جہانگیر ءِ شھادت ءُ زاھد بلوچ ءِ بیگوائی ءَ بہ گر دانکہ کہ 2018 کونسل سیشن ءَ بازیں اَڑ ءُ جنجالانی دیمپانی بانک ءَ توانائیں دروشمے ء داب ءَ کُتگ(رند ءَ بانک ءِ جند بی این ایم ءَ آوار بیت)-

یوروپین امپیریل ازم راجدپتر ءِ تہ ءَ دو دوراں بھر بوتگ پانزدھمی کرن ءَ بگر دان ھَژدھمی کرن ءَ ملکانی سر ءَ وتی کبزہ گیریتی برجم داشتگ آیانی تہ ءَ پرتگال، اسپین، ہالینڈ، فرانس ءُ انگلینڈ آوار انت(آمریکہ اولی ءُ دومی استمانی جنگ ءَ رند دیم ءَ کئیت اِنت) راجانی تہ ءَ (عروج ءُ زوال) وھدے کہ اَتکگ راج زوال پزیر بوتگ انت ایشی ءِ سوب ءَ راجانی ازم، ادب، ھنرمندی ءُ دستکاری کلیں گوست ءِ راجدپترے ھمرائی ءَ گار ءُ بیگواہ بوتگ انت آھوکیں نسل میزان میزان ءَ وتی دود ءُ ربیدگ، دودمان ءُ زبان چہ چہ پھک ءَ شموشکار ءُ نابلد بوتگ وھدے پجیگ ءَ آ وتی ساچستی دروشم چہ پراموش بہ بنت دانکہ آیاں گوں گوست ءَ ھچ وڑیں نزدیکی نہ بیت ایشی ءِ درور ءَ ما رومن تھزیب ءَ چہ زورت ءُ کُگ کنیں-

یک نا توامیں چاگردے ءِ تہ ءَ زالبولے ءِ کرد ءَ ما کُل آشنائیں بلے بانک ءَ ھمے ڈولیں چاگردے ءَ سرچست کُتگ ءُ استانے ھلاپ ءَ گھگیری برجم داشتگ ءُ املی دروشم ءَ مردینانی سرپ ءَ یکشل ءَ آوار بوتگ چیا کہ آ سرکچ ءُ زانتکار بوتگ کہ گلام ءُ ایردستیں راجانی بھت ءُ تالھے ھما وھد ءَ بدل بیت وھدے زالبوال آشوبی جنزانی توک ءَ مردینانی رم ءَ ھم کوپگ بہ بنت گوں اے چیدگ ءُ دروراں ما افریقی، یورپی ملک ءُ ایشیائے سوبمندی جنزانی تہ ءَ گندیں۔ بانک ءِ کربانی ءِ بلوچ راجدپتر مدام گیر کار ایت اَبید ءِ بانک ءَ اے نوکیں دور ءِ یک بھرے نہ سرجم لیکگ بیت اِنت۔

اِستان زوراک ءُ ایردست ءِ نیام ءَ پَرک ءُ پیر داریت ۔ آئی ءِ وس ءُ واک ءَ گوں جھد ھمیش انت کہ کوشست ھمے بیت کہ وتی رھبندانی توک ءَ نوکیں ھربہ کارمز بہ کنت دانکہ گلامیں راج ءِ سر ءَ کبزہ گیریت ءَ وتی مھکم بہ کنت ءُ آیاں وتی مکسد ءِ ھاترا کارمز بہ کنت۔ بلے اِش ھم گواچنیں گپے کہ ھمود ءَ اِستان اُرش آور بوتگ اَنت ھمود ءَ گھگیری جنزاں وتی سر چست کُتگ کہ ایش جنز راج دوستی ، نیکرائی ، نسلی پرستی ءُ وتی ملکانی وتواجھی ءِ زوراک ءَ گوں جنگ کُتگ ءُ آئی ءَ را پروش داتگ۔

ایردستیں راجانی رنگ ءُ داب ءَ بلوچ راجے گھگیری کارارانی نیام ءَ بانک کریمہ ءِ گھگیری ءُ جھد ءُ جھد ھما روشنائیں چراگ ءَ پیما بوتگ کہ آئی ءِ روشنائی ءَ کوراسیں شپ ءِ دیم داشتگ ءُ سُھب کُتگ-

بلوچستان ءِ زالبولانی ھمرائی ءَ آ دنیا ھر ھمک ایردستیں راج ءِ زالبولانی ھاتر ءَ یک چیدگے زانگ بیت اِنت آئی سیاسی زانت ءُ زانشت جھد ءُ جُھد پہ مارا یک آشوبی یے کشک ئِے پہ مئے واستا پہ بلوچ گلزمین ءِ ھمک بے وس ءُ نیز گاریں مردمانی واستا آئی وتی زیبائی ءِ کہ زندمان ءِ ھُرکیں کنڈان آئی ءَ امل کنگ ءِ رنگ درنز اِتگ-

آئی ءَ وتی زند ءُ زندمان وتی ھر لوٹ ءُ واھگ پہ مئے راج ءُ زمین ءِ شاتکامی ءِ ھاتر ءَ ندر کتگ اَنت اے گپ ءَ ما شموشکار نہ انت کہ بانک ءِ شھادت ءَ بلوچ راج ءُ دگنیا ءِ ھمک انسان دوستیں مھلوک ءَ را تاوان بار کتگ –

بلے آئی ءِ جھدانی برورد، پگر ءُ سسا مروچی ھم بلوچ جنزے راہ شناسی ءَ کننت جنگی پڈ بہ بیت یا کہ زانت ءُ زانشت جاہ بانک ءِ نزیہ بلوچ زالبوالانی ھاتر ءَ یک گھگیری چیدگے جوڑ بوتگ آئی ءِ سوچ ءُ پگر لس بلوچ ءِ دلانی توک ءَ ھست ءُ زندگ اِنت اے کدآوریں پگر ءُ لیکہ ءَ بلوچ راج ، بلوچ زمین ءُ جنز ءَ یک جْوانیں رنگ ءُ گوناپے داتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: کریمہ کھربا گونگیں نودی شل

نبشتہ کار: نودگیر بلوچ

دی بلوچستان پوسٹ

سرڈگارے ءِ سر ءَ کہ اُرش بیت، زورآور ءِ ھلاپ ءَ راجی زرمبشت ھم چست بنت وتی زمزیلانی سِندگ ءَ لس مھلوک پاد کیت۔

انچش کہ بانک کریمہ جاگھے گْوش ایت ’آشوب مدام چہ مھلوک ءَ چست بیت مھلوک ءِ تہ ءَ ردوم زور ایت ءُ چہ مھلوک ءِ کمک ءَ سوبمند بیت‘۔

راجی زرمبشت وتی راھشوناں وت شوھاز ایت آیاں در گیج ایت آ مھکمیں کارست وتی اجتماعی لوٹانی ھاتر ءَ وتی زاتی سیت ءُ نپاں کِمار نہ کن اَنت، وتی واھشتاں گٹگیر کن اَنت، آ ھمے سلھیں مکسد ءِ ھاتر ءَ وتی سرانی کربان کنگ ءَ ھم چَک ءُ پد نہ بنت آ مزنیں واھگانی پدگیر بنت۔

پمیشکا مزنیں منزلانی واھگداریں مردم ھمے پاد اتکگیں لس مھلوک ءَ چِن اَنت ءُ نز کار اَنت ایشاں ادارھانی تہ ءَ یک جاہ کن اَنت ءُ ایشانی لیکھی نزوریانی سر ءَ کار کن اَنت آ زان اَنت کہ جنگانی سپر ارزان نہ اِنت۔

چوناھا گلامی ءِ تَوک ءَ چہ گور ءَ در لگوشگ چوشیں آسانیں کارے ھم نہ اِنت گلامی تھنا پوجی بُنجلانی یا چیک پوسٹانی نام نہ اِنت گلامی ھما ترس ءُ لبّ ءِ ھم نام اِنت کہ گلام ءِ مجگ ءَ پُترتگ آئی ءَ بُرّان اِنت نزور کنان اِنت آئی ءِ توکل ءَ پروشان اِنت ھمے سَوب اِنت کہ بازینے پد کنزان کنت باز پہ لب ءُ باز پہ ترس چریشانی تہ ءَ بازینے کہ وتی راہ ءَ جتا کنت گڑا بدواھگ ءِ ھمراہ داری ءَ کنت ءُ جنز ءِ تاوان دیگ ءَ، زمین ءِ سودا بازی ءَ ءُ مڈیانی لٹ ءُ پُل ءَ ھم چک ءُ پد نہ بیت اِنت۔

گلامی ءِ تَوک وتی جاہ ءَ بلئے بلوچ ءِ سر ڈگار ءِ سر ءَ نندگ تنیگت پہ ھچ زوراک ءَ ارزان نہ بیتگ بلوچ سرڈگار ءَ اے سکت مدام بیتگ کہ پہ وتی کوہ ءُ گیابانانی رکّینگ ءَ مھکمیں سر ودی بہ کنت اے بامرد برے ھمل ء جینئد اِنت برے یوسف عزیز مگسی اِنت ءُ برے فدا احمد اِنت یا کہ بی بی بانڑی اِنت، بانک کریمہ اِنت ءُ یا کہ شیرزالیں شاری اِنت۔

دنیا ءِ راجی زرمبشتانی تہ ءَ زالبولانی کرد مزن اِنت بیدء پنجاہ درسد آبادی ءَ اے پند بُرّگ نہ بیت بلئے وتی چیزے بے سریں قبائلی روایتانی سَوَب ءَ بلوچ ءِ پیسری راجی داواھاں جنینانی الکاپی ءَ گوں بوگ ءِ درور نہ رس ایت۔

اے دوھزار پنچ ءِ زمانگ اَت کہ بلوچ راجی جنز ءِ نوکیں درے پچ بیت یک نوکیں نامے کریمہ ءِ دروشم ءَ دیم ءَ کیت ءُ دو ھزار بیست ءَ ھمے نام یک اھدے وتی نام ءَ رجین ایت ءُ دنیا ءِ درائیں ایردستیں راجاں پہ مادنیں کشکے ءِ چیدگ ءَ ساز ایت مرچی ھمے کشک ءَ ھزاراں آشوبی زندگی ءِ بے مانائی ءَ پروشان ءَ سپر کنان اَنت۔

بانک 1986 ءَ ماں دبئی ءَ ودی بیت بلئے آئی ءِ بوگ ءَ پد آئی ءِ کھول دیم پہ تمپ ءَ روت تمپ راجی بامردانی کسھانی ھلک اِنت ءُ کساں سالیں کریمہ ھمے کسھانی میان ءَ رُد ایت ءُ مزن بیت اے چپ ءُ چاگرد ءَ فدا احمد، حمید ءُ غلام محمد ھم ودی کتگ اَنت۔

پہ گاریں بلوچاں ءُ بلوچستان ءَ آپریشنانی ھلاپ ءَ توار چست کنان ءَ بانک ءِ سْیاسی سپر ءِ بندات چہ بی ایس او ءَ 2006 ءَ بیت بانک کریمہ یکبرے سینٹرل کمیٹی ءِ باسک گچین کنگ بیت پد ءَ 2008 ءِ کونسل سیشن ءَ کمک کماش گچین کنگ بیت وھدے کہ 2009 ءَ سرکار بی ایس او ءِ مستریں کمک کماش زاکر مجید ءَ بیگواہ کنت، گل ءِ گیشتریں ڈبہ بانک ءِ کوپگاں کاینت۔ اے زانگلوکیں جونانی زمانگ اِنت گار ءُ بیگواھانی زمانگ اِنت بلوچستان ءِ سیاست ءَ اے گران تریں فیز اِنت 2012 ءِ کونسل سیشن ءَ بانک مستریں کمک کماش گچین کنگ بیت ءُ چیرمین زاھد کماش گچین بیت۔

2013 ءَ بی ایس او آزاد ءِ سر ءَ ریاست بندش جَنت اے زمانگ ءَ سپر کنگ، سرکل جنَگ، زھرشانی کنگ ءُ سیاسی مچیانی سر ءَ سرکار وڑ وڑیں پابندی جنت بلئے بانک گَل ءِ مھکم کنگ ءَ شپ چار ایت نہ روچ پابندیانی سَوَب ءَ گل ءِ گیشتریں لیڈرشپ بلوچستان ءِ جتا جتائیں ھند ءُ دمگاں رو آ کت نہ کنت ھمے زمانگ ءَ گل ءِ کارگشاد ھم شھید کنگ بیت۔ بلئے بانک بلوچستان ءِ کُنڈ کُنڈ ءَ گَل ءِ پروگرام ءَ بارت ءُ سر کنت۔

2014 ءَ بی ایس او چیرمین زاھد بلوچ بیگواہ کنگ بیت گڑا ڈبہ پد ءَ بانک ءِ سر ءَ کاینت۔ اے زمانگ ءَ آ چوناھا گل ءِ وائس چیئر پرسن بیت۔ بانک چہ 2006 ءَ بلوچ ءِ راجدپتر ءَ نوکاز کنان اِنت بلئے اے 2015 اِنت کہ اولی رَند ءَ راجدپتر ءَ بی ایس او ءِ سر کماش جنکے گچین کنگ بیت۔ سرکاری جبر ءِ ھمراھی ءَ اے بھتامانی زمانگ بیت۔ گوں بد واھگ ءَ ھور وتی مردم ھم اے مناپکی ءَ گوں بنت۔ گل ءِ ھلاپ ءَ وڑ وڑیں پندل سازگ بیت۔ لیڈرشپ ءِ کردارکشی کنگ بیت بلئے بلوچ ءِ مھکمیں سر اے پندلاں کِمار نہ کنت۔

اے گواچنی گپے کہ بانک پہ بلوچ زالبولاں یک کشکے ءِ دنز ءُ گباراں چنڑ ایت بلئے آ راجی زرمبشت ءَ تھنا پہ زالبولاں درورے نہ اِنت آ نوں پہ سرجمیں راج ءَ، پہ کسان ءُ مزناں یک چیدگے جوڑ بیتگ ھما چیدگ کہ چاگرد ءِ گھتگیں روایتاں پروش ایت۔ ھما چیدگ کہ درامد ءِ مکرانی دیم ءَ اوشت ایت بانک ءِ جھد پہ اے کدام بستگیں چاگرد ءَ ھچبر شموشکار نہ بیت ۔

راجی جنز ءَ ابید ھم آ پہ بلوچ زالبولاں یک رول ماڈلے ءِ بستار ءَ دار ایت آئی ءِ جھد پہ زالبولانی وانینگ ءُ آیاں چاگرد ءِ بے سریں ربیت ءُ سانکلاں چہ آجو کنگ ءَ بِھ پراموش کنگ نہ بیت-

آ ھمک زالبول ءَ راجی زانشت دنت ءُ آیاں پہ اے سرڈگار ءِ وتواجھی ءِ ھاتر ءَ جھد کنگ ءِ سکین ءَ دنت۔ مرچی بلوچ زالبول دنیا ءِ کُنڈ کُنڈ ءَ روگ ءَ اَنت پہ وانگ ءَ بایدیں آ وتی ھمے آدینک ءَ ھجبر مہ شموش انت کہ آئی ءِ جھدانی بردورد انت مرچی بلوچ زالبول دیما اَتکگ انت زند ءِ ھر پِڑ ءَ گون انت۔

تُمْپ ءُ تُربَت ءِ دمکاں بگر داں کراچی ءُ شال ءِ دگاں بْیاں آ یک انچیں کِسھے پَشت گیج ایت داں اے گیدی ءَ بلوچے ھست آئی ءِ آواز بلوچستان ءِ ھرچ کوہ ءِ دل ءَ مھکمیں سنگرے ءِ دروشم ءَ مان ایت۔

آ چہ لس نامے ءَ در کپتگ ءُ پہ بلوچ راج ءَ لیکھے جوڑ بوتگ ءُ کبلھے یے بستار ءَ دار ایت ءُ ھمے کبلہ ءَ سرمتابیں سر پہ ھاک ءِ سجدگ ءَ کپنت۔ ھاکءِ سجدگ ءُ بوسگانی شھماں چہ دنیا ءِ دپتر ءِ مزن زھرگیں کِرد شاری ءِ دروشم ءَ دیم ءَ کاینت۔

کریمہ ءِ جاگہ ھورک اِنت آئی ءِ جاگہ ءَ کس گِپت نہ کنت بلئے آئی ءِ توار زمین پھازانی ھون ءِ گڈی ترمپ ءَ داں برجاہ مان ایت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

فروری ءِ ماہ ءَ روس ءِ نیمگ ءَ یوکرین ءِ سر ءَ اُرش ءَ اولی رند ءَ یوکرین ءِ سروک ولاد دیمیر زیلنسکی امریکہ ءِ تر ءُ تاب ءَ سروک جوبائیڈن ءَ گوں گند ءُ نند ءَ شتگ-

ھال سرکنوکیں ادارہ ایسوسی ایٹڈ پریس ءَ دمگی مردمانی دروردیان ءَ گوشتگ کہ کانگریس ءَ سیادی داروکیں دو مردماں ابید دگہ یک مردمے سرجمی ءَ اے تر ءُ تاب ءَ سرپد اِنت کہ آئی ءَ یوکرین ءِ سروک ءُ امریکہ ءِ سروک ءِ گند ءُ نند راست کتگ-

آئی ءَ نام ءِ پدر نہ کنگ ءِ سر ءَ گوشتگ کہ ولادیمیر زیلنسکی ءِ تر ءُ تاب سرجمی ءَ سرجم بیتگ بلے سیکورٹی ءِ سبب ءَ واتر بوگ ءِ ھم گمان ھست اِنت-

یوکرین ءِ سروک ءِ تر ءُ تاب یک ھنچیں وھدے ءَ دیم ءَ اتکگ کہ امریکہ ء کانون ساز لھتے روچانی تہ ءَ سال ءِ گڈسر ءَ پوڑگری ءِ واستا ووٹ دے اَنت ءُ اشانی توک ءَ یوکرین ءِ واستا چل ءُ پنچ ارب ڈالر ھوار اَنت آئی ءَ کمک ءَ دیگ بنت-

ھمے رنگ ءَ یوکرین ءَ روس ءِ اُرشانی بچگ ءِ واستا زمین ءِ چہ برز ءَ دو دیوکیں میزائلانی رسگ ءِ پیکیج ھم ھوار اِنت-

زیلنسکی ءِ اے تر ءُ تاب باز ترسناک ءُ مزن دلی یے تر ءُ تاب ءِ یک روچے ءَ پد دیم ءَ اتکگ کہ آ فرنٹ لائن ءِ نزیکیں شھر باخموت ءِ ھما جاہ ءَ تر ءُ تاب کنگ ءَ اِنت کہ اود ءَ آئی ءَ درستاں گیش جنگجاھے گشتگ-

آئی ءَ ھمے وھد ءَ یوکرین ءِ لشکر ءِ ستا شانی کنان ءَ گوشتگ کہ شمئے جزبگ ءُ ھمت شمئے تاکت اِنت ءُ دیم ءَ سلاھانی جنگ ءُ چوپانی توار اشکنگ بنت اِنت-

زانگ بہ بیت بیست ءُ چار فروری ءَ روس ءَ وتی ھمساھگیں ڈیھ یوکرین ءِ سر ءَ بیڑ برتگ ات کہ آ بیڑ داں انگت ءَ یکشل ءَ برجاہ اِنت-

اُرشاں پد امریکہ ءَ ھوار روکپتی ڈیھ یوکرین ءِ پلامرزی ءَ کنگ ءَ اَنت ءُ ھمے وڑ روس ءِ زرکارایانی سر ءَ بازیں بندش جنگ بیتگ اَنت –

یوکرین ءِ سروک ولاددیمیر زیلنسکی ءِ گوشگ اِنت ھچ رنگ ءَ سلاہ دور دیگ نہ بنت بلے روس ءِ سروک ءِ گوشگ اِنت یوکرین ءِ سر ءَ اُرش داں ھما وھد ءَ برجاہ بنت دانکہ وتی سلاھاں دور نہ دنت-