TBP Balochi

بلوچی زبان ءِ مزن نامیں لچہ کار منیر مومن ءِ لچھانی براھوئی رجانک “کپوت دیوانہ ءُ چک اسے ” زوت چہ اوتاک مکران ءِ نیمگ ءَ چاپ ءُ شنگ کنگ بیت اِنت –

منیر مومن ءِ لچھانی اے تاک نعیم بلوچ ءِ نیمگ ءَ ماں براھوئی زبان ءَ ترینگ بوتگ –

زانگ بہ بیت بلوچی ءِ مان براھوئی ءُ براھوئی ماں بلوچی ءِ تہ ءَ رجانک کنگ باز کم گندگ بیت اِنت ـ منیر مومن ءِ اے لچھانی تاک ماں براھوئی زبان ءَ ترینگ ءَ چاگردی ترامجاھاں رجانکار کار ساڑاھگ بوگ ءَ انت ءُ آئی ءِ کار ءِ ستا کنگ بوگ ءَ انت –

کتاب ءِ درگت ءَ ڈاکٹر رحیم بخش مھر ءَ گوشتگ کہ ما بلوچاں (بلوچی ءُ براھوئی گپ جنوکاں ) دنیا ءُ جھان ءِ ساچشت اے دوئیں زباناں رجینتگ انت بلے بلوچی ءَ براھوئی ءُ براھوئی ءَ بلوچی ءِ رجانک ءِ ربیت باز نزور بوتگ – اے سک جْوانیں کردے باید بلوچی ءَ ھم براھوئی ءِ جْوانیں ساچشت رجینگ بہ بنت-

تاک ءِ پشگال ءَ عبدالرزاق ابابکی ءَ نبشتگ کہ بلوچ وش بھت ءِ کہ آئی ءِ یکے ءَ چہ گیش زبان انت ءُ ھردو لبزانکی ھم زبان انت – بلوچانی مزنیں کچے بلوچی ءُ براھوئی ھردو زباناں گپ جت کن اَنت، نبشتکارانی ھم مزنیں کچے ھست کہ ھردو زباناں نبشتانک نبشتہ کت کن انت بلے وتی لٹریچراں بدل کنگ ءَ انچو دلگوش نہ دے اَنت انچو کہ لوٹ انت – نوں لھتے ورنا ھست انت کہ اے ڈبہ ءِ چست کُتگ کہ آ براھوئی ءَ بلوچی ءُ بلوچی ءَ براھوئی ءِ تہ ءَ رجانک کنگ ءِ سر ءَ کار کنگ ءَ اَنت بلے آھانی کچ سک باز کم انت –

تاک ءِ پیشگال ءَ آئی ءَ دیمتر ءَ نبشتگ کہ اگاں چارگ بہ بیت لبزانک ءِ وشی نوکیں بنداتے ءَ گوں بندوک انت، نوکین ھیالے بیت یا نبیت ، ھیالاں گوں لبزاں کمایگ ءُ دیم ءَ آرگ المی انت – بلے اے تاک ءِ تہ ءَ ھیال نوک انت بوت کنت پگر ھم ھمے بہ بیت کہ ھر بلوچ شائر ءِ واھشت اِنت- بلے آئی ءِ درشان کنگ ءِ وڑ ءُ ڈول ءُ آئی ءِ دیم ءَ آرگ ءِ ڈول، لبزاں نوکیں دابے ءَ کمایگ ءُ وشیں وڑے ءَ براھوئی زبان ءِ تہ ءَ رجینگ ءِ ڈول ءَ آئی ءِ شائری وانگ ءَ گیشتر ھدوناک بیت اِنت –

دیمتر ءَ نبشتہ کنگ بوتگ کہ نعیم بلوچ ھما ورنایانی تہ ءَ یکے کہ ھردو زباناں سرپد بیت ءُ زانت ءُ نبشتانک ھم نبیس ایت – اے تاک ءِ تہ ءَ آئی ءَ بلوچی زبان ءِ مزن نامیں شائر منیر مومن لچہ براھوئی ءِ تہ ءَ رجین اِتگ-

سر وزیر بلوچستان عبدالقدقس بزنجو، وزیر داکلہ ضیا ء اللہ لانگو ءَ ناگتی حق دو تحریک ءِ ھواریں زھرشانی کنوکانی تیرگواری ءَ چہ پولیس ءِ کارمند ءِ بیرانی ایرجتگ-

سر وزیر بلوچستان عبدالقدوس بزنجو ءَ گشتگ کہ تیرگواری کنوکیں جرمکار زوت دزگیر کنگ ءُ کانون ءِ دیم ءَ پیش کنگ بیت اِنت-

وزیر داکلہ ضیا لانگو ءَ وئیل ایرجنان ءَ گوشتگ کہ جرمکار دزگیر کنگ ءُ سزا دیگ بہ بیت- بیڑی ءُ مچی ءِ سبب ءَ ورنائیں پولیس ءِ بیرانی بیتگ ءُ اے وڑیں وئیل اوپار کنگ نہ بنت ءُ چیئرمین حق دو تحریک ءِ ھلاپ ءَ ایف آئی آر نبشتہ کنگ بہ بیت-

دومی نیمگ ءَ حق دو تحریک ءِ سروک مولانا ھدایت الرحمان ءَ گوشتگ کہ گوادر ءَ پوج کشی بیتگ-

آئی ءَ سرکار ءِ درستیں ٹاہ رد کتگ ےُ گوشتگ شپ ءِ سَے بج ءَ مئے نندانک ءِ سر ءَ پوج کشی بیتگ ءُ مردم لٹ ءُ کُٹ کنگ بیتگ اَنت –

آئی ءَ گوشتگ کہ واجہ حسین واڈیلہ ءَ ھوار مئے چل ءِ کچ ءَ مردم بیگواہ اَنت آ ھچ تھانہ ءَ بندیگ نہ اَنت-

آئی ءَ گوشتگ پسنی ءَ ملٹری اٹلی جنس ءَ مئے باسک دزگیر کتگ ءُ بیگواہ کتگ اَنت-

آئی ءَ گوشتگ کہ وھدیکہ ڈپٹی کمشنر مئے گون ءَ گپ ءُ تران ءَ اتکگ گڑا آئی ءَ چیر تر اتگیں توار ءَ بلوچستان ءِ سرکار ءِ بے وسی ءِ لیکہ درشان کتگ اَنت-

تامرکار سلمان خان ءَ ھوار بازیں نامی ئیں مردمانی ڈیٹا دُزی بیتگ اَنت ءُ ھمے درچ ءَ ہیکر ءَ ایلون مسک ءَ را بیھار داتگ-

اسرائیلی سائبر انٹیلی جنس فرم ہوڈسن راک ءِ نیمگ ءَ چاگردی ترامجاہ ویب سائٹ ٹوئٹر ءَ یک نامی ئیں مردمے ءِ ڈیٹا ہیک بیگ ءِ بارو ءَ سرپدی شنگ کتگ –

اسرائیل ءِ فرم ءِ رد ءَ بالی وڈ اسٹار سلمان خان ءُ گوگل ءِ چیف ایگزیکیٹو آفیسر ( سی ای او) سندر پیچائی ءَ ھوار چل کروڑ مردمانی ٹوئٹر اکاؤنٹسانی ڈیٹا ڈارک ویب ءَ ھیکر ءِ نیمگ ءَ بھا کنگ بیتگ اَنت-

انڈین ویب سائٹ کُوئی موئی ءِ رد ءَ سلمان خان ءِ ٹوئٹر اکاؤنٹ ءِ ھیک کنگ بیتگ ءُ آ ڈارک بھا کنگ بوگ ءَ اَنت –

سلمان خان ءِ ھواری ءَ گوگل ءِ سی ای او سندر پیچائی، امریکہ ءِ گشندہ چارلی پوتھ ءَ ھوار بازیں نامی ئیں مردمانی اکاؤنٹ ھیک کنگ بیتگ اَنت-

کوئی موئی ءِ رد ءَ ھیکر ءَ چل کروڑ مردمانی ڈیٹا دزی کنگ ءَ پد ٹوئٹر ءَ لین دین کنگ گشتگ –

ھوڈسن راک ءِ نیمگ ءَ بیھاری سرپدی دیگ بیتگ ھیکر ءَ سلمان خان، چارلی پوتھ ءُ سندر پیچائی ءَ ھوار دگہ مزن نامانی اکاؤنٹ ناگتی دز اتگ اَنت اشانی توک ءَ پون نمبر ءُ ای میل ھوار اَنت-

ھیکر ءَ وتی پوسٹ ءَ نبشتہ کرتگ کہ چل کروڑ مردمانی ڈیٹاھاں بھا کنگ ءَ آں-

ھیکر ءَ ایلون مسک ءَ را بیھار داتگ ءُ گوشتگ کہ ٹوئٹر یا ایلون مسک اگاں وانگ ءَ اِنت سرپد بہ بو تو پیسر ءَ پنچ کروڑ چل لکھانی کارمرد کنوکانی ڈیٹاھانی لیک بوگ ءَ جرمانھاں پرکنگ ءَ ئے نی چل کروڑانی واستا تیار بہ بو-

ھیکر ءُ دیمتر ءَ گشتگ دو ٹک ھپتاد ءُ شش ملین ڈالر ءِ جرمانہ پرکنگ ءَ جوانتر اِنت منی ڈیٹاھاں بھا بہ زور من اے سرپدیاں دگہ جاہ ءَ بھا نہ کن آں ڈلیٹ اش کن اں-

ھوڈسن راک ءِ نوکتریں ٹویٹ ءِ رد ءَ برطانہ ءِ اھوالکار ءُ ٹی وی ھوسٹ پیئرز مورگن ءِ اکاؤنٹ ھم ھیک کنگ بیتگ –

گوستگیں روچ ءَ ناشناسیں سلاہ بندیں مردماں بلوچستان ءِ دمگ آواران جھاؤ ءَ پاکستانی پوج ءِ پانگِسے ءِ سر ءَ اُرش کُتگ –

اُرش جھاؤ ءِ ھند عطا محمد میتگ ءَ برجاھیں پوجی پانگسے ءِ سر ءَ کنگ بوتگ اُرش ءَ پاکستانی پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں بیست ءُ شش دسمبر ءِ نیمروچ ءِ ادار دو ءَ آواران ءِ دمگ جھاؤ ءَ عطا محمد میتگ ءَ دژمنیں پاکستانی پوج ءِ پانگسے ءِ سر ءَ دورجنگ ءُ نوکتریں سلاھاں گوں اُرش کُتگ –

جارکش ءَ گوشتگ کہ اُرش دو پوجی کارمند مُرتگ ءَ دو زدگ بوتگ انت –

آئی ءَ گوشتگ کہ زورگیریں پوج ءِ سر ءَ مئے اُرش ایردستیں بلوچستان ءِ آجوئی ءَ تاں برجاہ مان انت –

بلوچستان ءِ دمگ کیچ ءِ جتا جتائیں جاھاں وھد ءِ وھد ءِ سر ءَ سبک سبکیں ھورانی درچ برجاہ اَنت –

اشانی توک ءَ تمپ ءَ کمو گیش بیتگ ءُ بلیدہ ءَ کمے کساس ءَ ھور بیتگ –

ھمے وڑ ءَ دشت ءِ جتائیں جاھاں سبک سبکیں ھور بیتگ اَنت – تمپ ےَ گوستگیں شپ ءِ ساھت سَے ءَ وھد وھد ءِ ھورانی گوارگ بندات بیتگ اَنت چریشی ءَ دمگ ءَ سارتی ءَ وتی لمب ایر داتگ اَنت-

گوستگیں شپ ءَ نھنگ ءِ کور ءَ آپ ءِ ھار ءَ گومازی ءُ رودبن پھل ءِ زمینی راہ بند بیتگ ءُ پد ءَ رند ءَ آپ ءِ ھلاسی ءَ پد راہ پچ بیتگ ءُ تمپ ءُ بلیدہ ءِ دمگاں ھورانی سبب ءَ دامگی ھال ھم بند بیتگ اَنت-

ھمے وڑ ءَ مھکمہ موسمیات ءِ رد ءَ بیست ءُ ھشت ءُ بیست ءُ نُھ دسمبر ءَ شال ءِ کوھی دمگاں برپگواری ءِ گمان اِنت –

مھکمہ موسمیات ءِ رد ءَ بیست ءُ ھشت ءُ بیست ءُ بیسر ءُ نُھ دسمبر ءَ شال، ژوب، بارکھان، زیارت، نوکنڈی، دالبندین، ھرنائی، قلعہ سیف اللہ، قلعہ عبداللہ، کلات، پشین، گوادر، جیونی، تربت، پنجگور، ھزدار، سبی، نصیر آباد ءُ لسیبلہ ءَ ھور ءُ کوھانی سر ءَ برپگواری گمان اِنت-

روکپتی بلوچستان ءَ سلاہ بند ءُ نارکوٹکس ءِ کارمندانی میان ءَ تیرگواری ءَ نارکوٹکس ءِ یک کارندھے بیران بیتگ –

سر بیتگیں ھالانی رد ءَ روکپتی بلوچستان ءِ دمگ گلشن ءَ ایرانی نارکوٹکس ءُ سلاہ بندین مردمانی تیرگوار کنگ بیتگ چریشی ءَ دومی نیمگ ءِ تیرگواری ءَ نارکوٹکس ءِ کارندھے بیران بیتگ –

بیران بیتگیں نارکوٹکس ءِ کارندہ ءِ پجار “سوم” محمد زور ءِ نام ءَ زانگ بیتگ-

سیستان و بلوچستان ءِ انتزامیہ ءِ مھمد قنبری ءَ گوشتگ کہ نشہ باپار کنوکانی سر ءَ بیڑ برتگ ءُ اود ءَ پنچ کس دزگیر کرتگ اَنت ءُ اود ءَ آیانی گور ءَ چار سد ءُ دَہ سیر تریاک ءُ دو سی تیری ءُ شش دگہ کسان ءُ مزنیں ءُ دو گاڑی دستیگ کتگ اَنت-

زانگ بہ بیت سیستان و بلوچستان ءَ ھاسیں روزگار ءِ نہ بوگ ءِ سر ءَ اود ءَ مردم جانکُشیں باپار ءِ سر ءَ وتی زند ءَ ھلاس کنگ ءُ اے کار ءَ کنگ ءَ اَنت-

بلوچستان ءِ بنجاھی شھر شال ءُ مستونگ ءَ دو جتاھیں تیرگواریانی وئیلانی تہءَ زالبولے ءَ ھوار چار مردم بیران بیتگ اَنت۔

سربیتگیں ھالانی ردءَ سئے شمبے ءِ روچ ءَ بلوچستان ءِ بنجاھی شھر شال ءِ ھند ائیرپورٹ دگ ءِ سرءَ تیرگواری ءَ یک مردمے بیران بیتگ۔

ریسکیو اھوالانی ردءَ ائیرپورٹ دگ ءَ کلی الماس ءِ ھندءَ تیرگواری ءَ چہ عزیت اللہ ء رحمت اللہ جھمنند بلیلی ءَ ھما دمان ءَ ساہ داتگ۔

بیران بیتگیں مردمے لعش المی کاراں پد کھول ءَ دیگ بیتگ، اَے درگت ءَ گیشتر پَٹ ءُ پول برجاہ اِنت۔ وھدیکہ کوش ءِ سوب داں انگت زانگ نہ بیتگ اَنت۔

دومی نیمگ ءَ بلوچستان ءِ دمگ مستونگ ءَ یک لوگے ءَ تیرگواری ءِ وئیل ءَ سئے مردم بیران بیتگ اَنت کہ اِشانی تہءَ یک زالبول ءِ ھم ھوار اِنت۔

ٹی بی پی ءَ سربیتگیں اھوالانی ردءَ مستونگ ءِ ھند کلی پدہ ءَ یک لوگے ءَ تیرگواری ءِ وئیل ءَ سئے مردم کُشگ بیتگ اَنت کہ اِشانی تہءَ یک زالبولے ءُ دو مردین ھوار اَنت۔ گمانی ردءَ وئیل گیرت ءِ نام ءَ پیش اَتکگ وھدیکہ پولیس گیشتر پَٹ ءُ پول کنگ ءَ اِنت۔ واکدارانی نیمگ ءَ داں انگت گیشتریں اھوال دیما نئیتکگ۔

بلوچستان ءِ دمگ کیچ ءِ بنجاھی شھر تُربت ءَ چہ سئے مردم دزگیری ءَ پد بیگواہ کنگ بیتگ انکت۔

اھوالانی ردءَ آبسر یعقوب میتگ ءَ چہ گوستگیں روچ ءَ پاکستانی لشکریاں سئے مردم زورانسری بیگواہ کُتگ اَنت۔

بیگواہ بیتگیں مردمانی پجار سید جان، شہزاد ءُ جہانزیب ءِ ناماں چہ بیتگ، داں انگت آ دیما آرگ نہ بیتگ اَنت۔

کھولاں چہ سرکاری ادارگاں دزبندی کُتگ کہ آیانی دوستیگیں مردم دیما آرگ بہ بنت ءُ آ کجام ھم پئیمیں جرمکاری ءَ ھوار اَنت گُڑءَ آمید گس ءِ دیما پیش کنگ بنت۔

بلوچستان ءَ بیگواھیں مردمانی جیڑہ یک طول کشیں ءُ سنگینیں جیڑہ ءِ جوڑ بیتگ، بلوچ راجدوستیں پاٹیانی نیمگ ءَ بلوچستان ءَ زورانسری بیگواھیانی تہءَ پاکستانی لشکری ءُ چیریں ادارگانی ھوار بئیگ ءِ درگت ءَ باز برءَ منانک پیش ھم کُتگ اَنت ءُ انیگیں وھدءَ پاکستان ءِ بنجاھی سیاست کنوکیں راجدوستیں پاٹی بلوچستان نیشنل پارٹی ءِ سروک اختر مینگل ءِ سروکی ءَ یک کمیشن ءِ اڈ دیگ بیتگ کہ آ بیگواھیں مردمانی درگت ءَ کار کنگ ءَ اِنت۔

زانگ بہ بیت بلوچستان ءَ بیگواھیں مردمانی یل کنگ ءِ ھاترءَ کھولانی نیمگ ءُ شال ءُ کراچی پریس کلبانی دیما ءَ گوستگیں یک دھک ءَ چہ ھم گیشتر اِنت کہ پر ایمنیں زھرشانی برجاہ اِنت۔

نپرت ءِ پائدگ

نبشتہ کار: ھانی بلوچ

دی بلوچستان پوسٹ

چوناھا نپرت یک بدیں چیزے بلے لھتیں جاھاں نپرت ترا پائدگ ھم دنت وھدے کہ 1971 ءَ بنگلہ دیش چہ پاکستان ءَ آجو بوت ءُ یک جُتائیں مُلکے جوڑ بوت گُڑا بنگلہ دیش ءِ تہ ءَ یک بلاھیں راجدوستی یے ودی بوت۔ چوناھا ھمے بنگالیاں دْروگیں پاکستان اڈ کُتگ اَت چے ءَ کہ انگریزانی کاسگ چٹّیں انڈین مسلم لیگ ءِ سیاسی گل 1905 ءَ ڈھاکہ ءَ اڈ دیگ بوتگ اَت۔ ھر کس سرپد اِنت کہ پاکستان ءِ اسکیم بنگالی راج ءُ یو پی ءِ لھتیں کاسگ چٹّیں نوابانی واھشت اَت چی ءَ کہ آیاں مار اِت کہ ھندوستان ءِ آجوئی ءَ پد ھندو راجدوست آیاں راجدْروھی ءِ سزا دنت پرچا کہ ھمے لیاکت الی ھان، مھمد اَلی جناہ ءُ الامہ اکبال مُدام زورگِریں انگریز ءِ کاسگ چٹّ اِت انت۔ وھدے کہ بنگالی راج ءَ چہ پاکستانی پوج ءِ دست ءَ چُکچینی، زالبولانی سر ءَ زُلم ءُ زِنا ءَ ھوار دگہ پیریں کماشانی کم شرپی ءُ لگتمالی ءَ دُچار کپت اَنت گُڑا بنگالی راج ءِ تہ ءَ پاکستانی پوج ءُ پنجابی راج ءِ سر ءَ یک کست ءُ نپرتے ودی بوت۔ دُنیا ءِ آشوبی مردم گْوش اَنت کہ نپرت یک راجے ءِ آشوب ءُ گُلامیں راجانی آجوئی ءِ جُنز ءِ بُنگیج اِنت۔ داں وھدے کہ یک گُلامیں راجے وتی سر ءَ زُلم ءُ زوراکیاں نہ مار ایت آ راج ءِ تہ ءَ آشوبے ودی نہ بیت ، داں وھدے کہ گُلام وتی زورگِر ءِ سر ءَ نپرت ودی مہ کنت آ ھچبر آجو نہ بیت۔ بزاں پہ وتی راجی آجوئی ءَ ھر راجے ءَ دژمن ءِ ھلاپ ءَ نپرت ءُ کینگ ودی کنگ لوٹ ایت گُڑا آ راج اول راجدوست بیت ءُ گُڑا وتی راجی جُھد ءِ برکت ءَ راج ئِے ھم آجو بیت۔

نی ما گپ کن ایں کہ یک گُلامیں راج ءِ تہ ءَ نپرت چون ودی بیت؟ مارا بلوچ راج ءَ چے کنگ لوٹ ایت کہ بلوچ راج ءِ تہ ءَ دژمن ءِ ھلاپ ءَ نپرت ودی بہ کن ایں؟ چوناھا سرجمیں بلوچ راج پاکستان ءَ نپرت کنت ءُ مرچی سرجمیں بلوچ راج سرپد اِنت کہ پنجابی پوج بلوچ راج ءِ سر ءَ وڑ وڑیں زُلم ءُ کھر کنگ ءَ انت۔ ھزارانی کچ ءَ بلوچ ورنائیں نودربر شھید کنگ بوت اَنت ءُ ھزارانی کچ ءَ انگت گار ءُ بیگواہ اَنت ءُ یکشل ءَ بیگواہ بوگ ءَ اَنت۔ ھزارانی کچ ءَ بلوچ راج ءِ ورناہ ءُ کماش دژمن ءِ آزرجاہ ءُ زِندان ءِ تھاریں کوٹیاں لٹ شاپی ءُ گُژن ءِ آماچ اَنت۔ بلوچ راج ءِ گِس ماندار دیگ بوت اَنت۔ بلوچ راج ءِ ٹیل، گیس، کوئلہ، تنگو، زِر ءُ دگہ ھزاریں مال ءُ مڈّی پُلگ بوگ ءَ اِنت، مرچی کوہ، شھر، کوچگ ءُ میتگانی تہ ءَ ھر روچ بلوچ راج ءِ کسانیں چُکاں بہ گِر داں کماشیں شْوانگ شھید کنگ بوگ ءَ اَنت ، بلوچ راج ءِ زُبان، دود ءُ ربیدگ لگتمالی ءِ آماچ اَنت بزاں اے دْراہ دژمن ءِ وتی مھربانی اِنت کہ بلوچ راج ئِے سرپد کُت کہ ما پنجابی تئی سر ءَ زورآور ایں ءُ تو بلوچ یک گُلامیں راجے ئے۔ ما تئی زُبان، دود ءُ ربیدگاں یکشل ءَ لگتمال کنان ایں۔ اے دژمن ءِ زُلم ءُ زوراکیانی آسر اِنت کہ شھید بانُک کریمہ بلوچ ءِ وڑیں زالبولیں رھشُون راج ءِ دیم ءَ آتک ءُ وتی ساہ ئِے پہ راجی آجوئی ءَ ندر کُت چمیشکا مرچی بلوچ راج ءِ آجوئی ءِ جُنز ءُ راجی سوبمندیں آشوب ءَ بلوچ زالبوال کُرد راج ءِ زالبولانی وڑ ءَ دیم ءَ بران اَنت۔

وھدے کہ یک راجے ءِ زالبوالاں راجی آجوئی ءِ آگاھی ءُ سرپدی بوت گُڑا بزاں آشوب سد در سد سوبمند انت۔ وھدے کہ یک راجے ءَ بے کساس کُربانی داتگ ءُ آزاتی ئِے گپت، پد ءَ دژمن ءِ دپچٹ، کاسگ چٹّ ءُ راجدْروھاں لازُم سزا ئِے داتگ گُڑا آ راج یک زِندگیں راجے جوڑ بیت، راج ءِ لس مھلوک وتن دوست بیت، راجدوست بیت پد ءَ مُلک ئِے ھم ھر پھنات ءَ بے کساس دیمروی کنت۔ انچوشکہ بنگلہ دیش مئے دیم ءَ انت۔ اگاں یک مُلکے بے کُربانی ءَ ٹھینگ بوت گُڑا آئی ءِ راج ءِ تہ ءَ ناں راجے بیت ءُ نیکہ راجدوستی یے بیت ئِے بلکیں مُدام سِلکاری ءِ آماچ بیت۔ آ مُپتیں مُلک ءِ مُلکار (سیاستدان) سِلکار بنت بلکیں سرجمیں لس مھلوک سِلکار بیت ئِے انچوچکہ پاکستان اِنت۔

بنگلہ دیش ءِ مھلوک ءَ دژمن ءِ ھر وڑیں زُلم ءُ لگتمالی سگ اِت ءُ وت ءَ آجو کُت۔ آجوئی ءَ پد بنگلہ دیش ءِ سرکار ءَ پاکستانی کاسگ چٹّیں جمائت اسلامی ءِ سِلاھبندیں گل وتگڑیں رزاکار ، الشمش ءُ البدر ءِ کارندھاں راجدْروھی ءِ بھتم ءَ یک یکی ءَ پاھو دات انت۔ ھمے لگتمالی، کُربانی ءُ جنگی بیرانی ءَ پد بنگالی راج ءِ تہ ءَ راجدوستی ءِ مارشت ودی بوت اَنت چمیشکا مرچاں بنگلہ دیش ءَ سک دیمروی کُتگ۔

گُڑا باید اِنت بلوچ ورناہ ھم وتی راج ءِ سر ءَ پاکستانی پوج ءُ پنجابی ءِ زُراکیاں بہ مار اَنت ءُ دُژمن ءِ ھلاپ ءَ نپرت ودی بکن اَنت۔ اے مئے تیوگیں راج ءِ زمہ واری اِنت کہ ما وتی زھگاں زُبان دوستی ءُ راجدوستی ءِ بابت ءَ گپ ءُ تران کنان ءَ آیاں بلوچ راجدپتر ءِ بابت ءَ سرپد بہ کن ایں کہ مارا گوں اے دْروگیں ریاست ءَ ھچ سْیادی نیست ءُ ناں کہ ما بلوچ راج ھُشکنات ھِند ءِ بھرے بوتگ ایں۔ دومی من نبشتانک ءِ گُڈی بھر ءَ گوش آں پاکستان ءِ زرکاری(معشیت) ءِ جاور سک ھراب اَنت، نیکراھی ٹی ٹی پی ءِ گْوریلہ جنگ ءُ پاکستانی مھلوک ءِ وت ماں وت سْیادی جنگ پاکستان ءَ وت پْروشین اَنت۔ گُڑا باید بلوچ راج وت ءَ چو بنگالی راج ءِ وڑ ءَ پہ آجوئی ءَ تیار بکنت۔

بلوچستان آجو بات، بلوچ ءِ راجی زُبان ءُ بلوچستان دیمروی بکنات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیابدپی شھر گوادر ءَ مروچی دومی روچ ءَ زھرشانی برجاہ، مکران مزن دگ ءَ ھوار دگہ شھرانی روانی ءُ ھال رھوت بند کنگ بیتگ اَنت –

سر بیتگیں ھالانی رد ءَ گوادر ءَ حق دو تحریک ءِ رھشونانی دزگیری ءِ ھلاپ ءَ حق دو تحریک ءِ نیمگ ءَ مکران ءِ گیشتریں جاھاں دگ بند کنگ بیتگ اَنت-

گوادر، پسنی ءُ اورماڑہ ءَ مھلوک ءِ زھرشانی یکشل ءَ برجاہ اَنت کہ اود ءَ زھرشانی کنوک ءُ پولیس ءُ دگہ ادارھاں ھوار مھلوک ءِ میان ءَ دست جنگی برجاہ اَنت-

چاگردی ترامجاھاں شنگ بیتگیں تامراں گندگ بیت اِنت پولیس مھلوک ءِ سر ءَ تیرگواری کنگ ءَ اِنت چریشی ءَ جاورناگیگی ءِ دیمپانی ءَ گندگ بوگ ءَ اَنت-

گوستگیں روچ ءَ حق دو تحریک ءِ رھشون حسین واڈیلہ ءُ دگہ رھشون ءُ باسکانی دزگیری ءَ پد مکران ءِ جاور گیشتر ناگیگی ءِ دیمپان بیتگ اَنت اود ءَ موبائل سروس ءُ انٹرنیٹ سروساں ھوار زمینی راہ دگہ جاھاں چہ بند بیتگ اَنت-

حق دو تحریک ءِ کال ءِ پد ءَ گوادر، پسنی، اوماڑہ، کیچ، پنجگور ءُ بلوچستان ءِ دگہ جاھاں ھم زھرشانی روانک کشگ بیتگ اَنت بلے اورماڑہ ءُ گوادر ءُ سربندن کراس ءَ پولیس ءُ زھرشانی کنوکانی میان ءَ جنگ ءُ چوپ ھم بیتگ اَنت-

حق دو تحریک ءِ رھشونانی گوشگ اِنت دانکہ بندیگیں مردماں یل نہ کنت اے جاورگیشتر ناگیگ بنت ءُ اشی ءِ زمہ وار سرکار اِنت-

گوستگیں روچ ءَ بازیں کچے ءَ مردماں شھر ءَ زھرشانی کنان ءَ گوادر ڈی سی آفیس ءِ دیم ءَ نندانک جتگ ءُ زھرشانی برجاہ داشتگ –

شھر ءَ دگانی سر ءَ ٹائر ءُ دگہ چیز ھم ماندارگ ءَ گندگ بوگ ءَ اَنت آیانی گوشگ اِنت سرکار زور ءَ کارمرد کنگ اِنت چریشی ءَ ما اے زوراکی ءِ دیم ءَ گھگیری کنگ ءَ تیار اِنت-

زانگ بہ بیت حق دو تحریک ءِ نیمگ ءَ گوستگیں شست روچاں ما گوادر ءَ وتی ھکانی ھاتر ءَ نندانک برجاہ اِنت کہ اود ءَ گوستگیں دو روچاں زھرشانی کنوک جنز اتگ ءُ آیاں گوادر پورٹ ءِ نزیک ءَ راہ بند کتگ ءُ ھرچ رنگیں رپت آمد بند کتگ اَنت-