TBP Balochi

بلوچستان ءِ دمگ ھزدار ءَ پاکستانی پوج ءِ دست ءَ آوار جنگ بیتگیں دو نودربرانی زورانسری آوار جنی ءِ ھلاپ ءَ گری گریشہ ءِ ھند ءَ کھول ءُ دمگ ءِ مردماں زھرشانی کنان ءَ شھدگ بند کتگ-

شھدگ ءِ بند بوگ ءِ سبب ءَ گاڑیانی لین لگ اتگ ءُ بازیں مساپر مھتل بیتگ اَنت-

زانگ بہ بیت گریشگ ءَ دو نودربر سراج نور محمد عارف ھما وھد ءَ پاکستانی پوج ءَ چست کتگ اَنت آ موکلانی وھد ءَ وتی بنکی ھنکین ءَ شتگ اَنت-

بیگواہ کنگ بیتگیں سراج نور سرگودھا یونیورسٹی ءِ لاء ڈیپارٹمنٹ ءِ ششمی سمسٹر ءِ نودرے ءُ مھمد عارف ءَ بلوچستان یونیورسٹی ءَ اے اے دوھزار ءُ بیست ءَ سرجم کتگ-

اے درگت ءَ تنی وھدی واکداراں ھچ گپ دیم ءَ نیاورتگ اَنت بلے جتا جتائیں تکاں بندوکیں مردم ورنایانی زورانسری آوار جنیاں ایر جنگ ءَ اَنت-

نوکیں سال دوھزار ءُ بیست ءُ سَے ءَ یوکرین شھر کیئف ءَ بازیں میزائل آس دیگ بیتگ اَنت ءُ دگہ شھراں ھم ناگتی اُرشانی سائرن توارینگ بیتگ-

ھال سرکنوکیں روئٹرز ءِ رد ءَ سائرن ءِ توار ءِ اشکنگ ءَ کیئف ءِ شھری وتی لوگانی بالکنانی چہ ڈن اتکگ اَنت ءُ یوکرینی پوجیانی ھک ءَ اوگام اش جتگ-

یوکرین ءِ برزی اُرشانی پھریزی ءَ میزائل برز ءَ تباہ کنگ بیتگ اَنت بلے آیانی ٹُکر جھل ءَ کپتگ اَنت بس یک گاڑی ءَ تاوانباری بیتگ-

کیئف ءَ میئر ویتالی کلچکو ءِ گوشگ اِنت بنداتی ھالانی توک ءَ ھچ مردم زدگ یا بیران ءِ ھال سر نہ بیتگ اَنت-

لشکری واکدارانی گوشگ اِنت روس ءِ نیمگ ءَ بیست ءُ سَے میزائل آس دیگ بیتگ اَنت کہ برز ءَ بے سوب کنگ بیتگ اَنت-

اے اُرش یوکرین ءِ سروک ولاد دیمیر زیلنسکی ءِ نوکیں سال ءِ وھد ءَ تران ءَ پد کنگ بیتگ اَنت – اُرش ءَ پد کیئف ءِ واکداراں چاگردی ترامجاہ ٹیلی گرام ءَ کلوہ دیان ءَ گوشتگ کہ برزی پھریزی ءَ نزام کار کنگ ءَ اِنت-

کیئف ءِ گورنر اولیکسی کولیبا ءِ گوشگ اِنت ڈورنز کارمرد بیتگ اَنت ءُ اشانی سر ءَ شھر ءَ اُرش کنگ بیتگ-

دومی نیمگ ءَ روسی سروک ولادیمیر پوتن ءَ نوکیں سال ءِ روچ ءَ تران ءِ وھد ءَ یوکرین ءِ اُرش سلامتی ءِ جنگ نامینتگ ءُ گوشتگ کپ روکپتی ڈیھ روس ءَ پروشگ ءُ نیزور کنگ لوٹ اَنت-

وتی بیست ءُ دو سالی دور ءِ سرکار ءَ دراج کش تریں تران ءَ پوتن ءَ گوشتگ کہ روسی پوجی راستی، انساپ ءُ وتی سرڈگار ءِ پھریزگ ءَ جنگ کنگ ءَ اَنت دانکہ روس ءِ سلامتی ءَ برجاہ داشت کُت بہ کن اَنت-

گوستگیں ماہ ءَ کریملن یوکرین ءِ جیڑہ ءِ سر ءَ یک ھنچیں مھمے ءِ رنگ ءَ پیش کنگ ءَ اَنت چریشی ءَ روسی شھریاں بازیں کچے ءَ سانمند نہ بیتگ اَنت بلے شمبے ءِ شپ ءَ تران ءَ سروک پوتن ءَ اشی ءِ پژدر ءَ گشان ءَ گوشتگ کہ آیوکیں بازیں ماھاں ھمک یک شھرے ءَ دیمھونء دیگ لوٹ ایت-

چین ءِ سروک چی جن پنگ ءَ ڈیھ ءَ کورونا وبا ءِ بارو ءَ گپ کنان ءَ گوشتگ کہ کورونا ءِ گر ءُ دار ءَ روژنائیں کار مئے دیم ءَ اَنت-

ھال سرکنوکیں ادارہ ایجنسی اے ایف پی ءِ رد ءَ چین ءَ کورونا وابا ء گیش کپتگیں کیسانی پژدر ءَ سرجمیں دنیا ءَ چینی مساپرانی ایگ ءِ سر ءَ ٹیسٹ المی کنگ کتگ-

چین ءَ ھمے زوتاں کورونا ءِ شنگ ءُ تالانی ءِ دارگ ءِ ھاتر ءَ جتگیں پابندی ھلاس کتگ ءُ چریشی ءِ سر ءَ کووڈ 19 گیش بوتگ –

چین ءِ شھر ووھان ءَ سَے سالاں پیسر اولی رند ءَ کورونا وائرس دیم ءَ اتکگ اَے چریشی ءَ پد بیجنگ ءَ ترندیں واک ءَ وتی ترندگیریں کنٹیمنٹ پالیسی ’ شیرو کووڈ ‘ گوستگیں ماہ دسمبر ءَ ھلاس کتگ ات-

میان اُستمانی واکدارانی رد ءَ گوستگیں ماہ دسمبر ءَ چین ءِ نادراہ جاھاں نادراھی گیش کپتگ چریشی ءَ اود ءَ نادراہ جاہ پُر اَنت ءُ اشانی توک ءَ گیشتریں مردم مزن اُمرین مردم اَنت-

اے ایف پی ءِ رد ءَ مردگ جاھاں گنجائش نیست اِنت ءُ بازیں جاھاں درمان ھانھاں ھم دوا ھلاس بیتگ اَنت-

سروک شی جن پنگ ءَ نوکیں سال ءِ درگت ءَ ٹیلی ویژن ءَ شنگ کتگیں وتی یک ترانے ءَ گشتگ کہ وبا ءِ گر ءُ دار ءَ یک نوکیں گامے زرتگ ءُ اشی ءِ سر ءَ ستک اِنت کپ اُمیت داریں کار بوگ ءَ اَنت-

وبا ءِ جاور ھالانی سر ءَ گوستگیں ھپتگ ءَ چین ءِ سروک ءَ گشتگ مردمانی زند ءِ پھریزگ ءَ گامگیج زورگ بوگ ءَ اَنت-

چین ءَ شمبے ءِ روچ ءَ وتی یک ارب ءُ چل کروڑ آبادی ءِ توک ءَ یک روچے ءَ ھپت ھزار ءَ گیش انفیکشن ءُ یک بیرانے ءِ ھاپ داتگ اَت میان اُستمانی واکداراں گشتگ ات اے جاور ھال زمینی جاوراں چہ باز کم اَنت-

سر بیتگین ھالانی رد ءَ چھبار ءَ ھواریں میتگ کپری میتگ ءَ گوستگین روچاں ایرانی لشکر ءِ نیمگ ءَ لس مردمانی لوگانی سوچگ ءُ کروجگ ءِ ھلاپ ءَ زالبولاں چھبار ءَ دمگدار ءِ کارگس ءِ دیم ءَ زھرشانی کتگ-

زھرشانی کنوکاں گوشتگ کہ مئے میار ءُ گناہ چی اِنت؟ ایرانی سپاہ ءُ دگہ ادارہ سراپ کن اَنت ءُ مئے گساں کروج اَنت ءُ آیاں ماندار اَنت-

آیانی گوشگ اَت ایرانی لشکر ءَ مئے لوگانی کروجگ ءِ وھد ءَ لوگ پٹ ءُ پول کتگ اَنت اشانی توک ءَ ھچی درنیتکگ اشی ءَ ابید ھم لوگ ماندارگ ءُ پُر کنگ بیتگ اَنت-

آیانی گوشگ ات کہ لوگانی کروجگ ءِ وھد ءَ ما دست ماں دست بیتگ اِنت چریشی ءزل مارا جتگ اش ءُ بازیں مردمے ٹپ ءُ ٹور بیتگ ءُ نادراہ جاھاں برگ بیتگ اَنت-

آیانی گوشگ ات کہ دمگدار تو گامگیج بہ زور اے کانونی رنگے نہ اِنت نیزگار ءُ پوریاگرانی گساں ماندار ءُ پد ءَ آیاں بہ جن ءُ ڈن ءَ چگل دے –

زانگ بہ بیت روکپتی بلوچستان ءَ چوشین وئیل گوست ءَ ھم دیم ءَ اتکگ اَنت کہ اود ءَ لوگانی ھواری ءَ مسیت ھم کروجگ بیتگ اَنت ایش وئیل گیشتر زور دستیگ کتگیں زمینانی پژدر ءَ کنگ ءَ اِنت-

بلوچستان ءِ دمگ کیچ ءِ ھند مند ءَ آسراتی نہ بوگ ءِ سبب ءَ یک جنوکے ءِ بیران بیتگ-

سربوتگیں ھالانی رِد ءَ زینب نامیں یک جنوکے ءِ تپیگ بوتگ ءُ چریشی ءِ سبب ءَ مند ءَ آئی ءِ الاج ھاتر ءَ آسراتی نہ بوگ ءِ سبب ءَ آ بیران بیتگ-

آئی ءِ مات ءُ پت الاج ھاتر ءَ کراچی ءَ برگ ءَ بیتگ اَنت کہ نیم راہ ءَ مساپر کشیں بس ءِ تہ ءَ نہ رکّ اِیتگ ءُ بیران بیتگ-

زانگ بہ بیت تھسیل مند ءَ اشی ءَ ساری بازیں نادُراہ تربت یا کراچی ءِ روگ ءَ نیم راہ ءَ ساہ اِش داتگ ءُ بیران بیتگ اَنت – مند ءِ پنجاہ ھزار آبادی ءِ تہ ءَ تھنا یک سرکاری آسراتی ءِ نہ بوگی ءِ ھساب ءَ اِنت-

گوستگیں بیست سالاں چہ ھکومت ءِ تہ ءَ بؤکیں زبیدہ جلال ، انُّوگیں ھکومت ءِ وزیر لالا رشید ، اکبر آسکانی ھمے دمگ ئیگ اَنت بلے سھت بُنکی آسراتی ءُ تپ ءِ گولی ءِ نہ بوگ ءِ سبب ءَ چہ مردم سکّیانی دیمپان اَنت-

سربوتگیں ھالانی رِد ءَ بلوچستان ءِ دمگ مچ سیخنی ءَ پاکستانی پوج ءِ لشکر کشی برجاہ انت –

دی بلوچستان پوسٹ پتر ءَ سربوتگیں ھالانی رِد ءَ گوستگیں روچ ءَ سیخنی ھند ءَ مزنیں کچے ءَ پاکستانی پوج مانریتکگ ءُ لشکر کشی کنگ ءَ انت –

چم دیستیں گواھانی رِد ءَ مزنیں کچے ءَ پوک ءَ پیادگ ءَ ترگ ءَ انت ءُ درچکاں ماندارگ انت – وھدیکہ ھر نیمگ ءَ مارٹر گولہ ھم آس دیگ بوگ انت –

بلے تنی وھدی ھچ وڈیں جانی تاوان ءِ ھال نیست اِنت ءُ ناکہ پوج ءِ بنشون ءِ نیمگ ءَ لشکر کشی ءِ درگت ءَ چیزے گوشگ بوتگ –

زانگ بہ بیت بلوچستان ءِ گیشتریں ھند ءُ دمگ ءُ کوھی دمگاں ھمک روچ پوج لشکر کشی کنگ ءَ انت ءُ چریشی ءَ دمگی مردم دلسیاہ انت –

بلوچستان ءِ بنجاھی شھر شال ءَ بیگواھیں مردمانی ھاتر ءَ زھرشانی برجاہ، زھرشانی بنجل ءَ مروچی چار ھزار ءُ نُھ سد ءُ ھپت روچ سرجم بوتگ انت –

مروچی شال ءَ سیادی داروکیں سیاسی ءُ چاگردی باسک ظہیر بلوچ، داد محمد بلوچ ءُ قیوم بلوچ ءَ ھوار دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ نمیرانیں بلوچانی پاکیں ھون ءُ بیگواھیں مردمانی دیمھونیاں مروچی بلوچ راج ءَ بست کُتگ –

آئی ءَ گوشتگ کہ وی بی ایم پی ءَ ریاستی زوراکیاں ابید ھم ھر فورم ءَ بلوچستان ءِ جنگ ءِ جاورھال، پاکستان ءِ زوراکی، انسانی ھکانی لگتمالی ءُ بلوچ سیاسی باسک، دانشور، اھوالکار، شائر، زانتکار، نودربر، ماسٹر، ڈاکٹر، زالبول ءُ زھگاں ھوار دھکان ءُ مزورانی زورانسری آوار جنی ءُ آھانی ژانگولیں جوناں ویرانگاں چگل دیگ ءِ دراھیں گواہ رپورٹ داتگ انت –

ماما قدیر بلوچ ءَ گوشتگ بلوچ جھان ءِ دگہ ایردستیں راجانی وڈا انساپ لوٹیت مروچی بلوچ بے کساس ریاستی زوراکیانی آماچ انت –

آئی ءَ گوشتگ کہ بیگواھیں مردمانی درگت ءَ کمیشن ءُ کمیٹی جوڈ کنگ بنت بلے آھاں واک ھم دیگ بہ بیت تانکہ کھولاں انساپ بہ رس ایت –

آئی ءَ گوشتگ کہ ریاست ءِ پاکستان ءَ بلوچستاں تہ ءَ بے کساس جنگی جرماں ھوار انت بلے تنی وھدی ھچ فورم ءَ جوابدہ نہ بوتگ –

سربوتگیں ھالانی رِد ءَ بلوچستان ءِ دمگ ھزدار ءَ پاکستانی پوج ءَ دو مردم زورانسری آوار جتگ ءُ بیگواہ کتگ انت –

آوار جنگ بوتگیں نودربرانی پجار سراج نور ء نور محمد جھمنند اسپکنری ءُ محمد عارف ء گاجیان جھمنند سریچ گریشگ ءِ ناماں چہ بوتگ انت –

آوار جنگ بوتگیں سراج نور سرگودھا شھدربرجاہ ءَ لاء ڈیپارٹمنٹ ءِ ششمی سمسٹر ءِ نودربر یے ءُ محمد عارف ءَ بلوچستان شھدربر جاہ ءَ ھمے سال ءَ دوھزار بیست ءُ دو ءَایم اے سرجم کُتگ –

اھوالکار ءِ رِد ءَ ھردو نودربر پاکستانی پوج ءَ ھما وھد ءَ آوار جتگ ءُ بیگواہ کتگ انت کہ وتی موکلانی گوازینگ ءَ وتی میتگ ءَ اتکگ بوتگ انت –

بلوچستان ءِ تیابدپی شھر گوادر ءَ مروچی شمبے ءِ روچ ءَ بازار پچ بیتگ ءُ اود ءَ مردم چیز ءِ زیرگاں دزبند اَنت-

بلے شھر ءَ سیکورٹی بازیں کچے ءَ بکتر بندیں گاڑیاں ترگ ءَ اَنت کہ بے اوستی جاور پیش کنگ ءَ گندگ بوگ ءَ اَنت-

حق دو تحریک ءِ سروک ھدایت الرھمان بلوچ ءَ وتی شنگ کرتگیں تامربند کلوہ ءَ دزگیر کرتگین باسکانی یل کنگ ءِ لوٹ کتگ ءُ گشتگ کہ سرکار ءَ جاور ناگیگ کتگ اَنت-

آئی ءَ گوشتگ زالبولانی سر ءَ دست چست کنوکیں پولیس ءُ ایف سی ءِ آفیسر پھل کنگ نہ بنت-

ھدایت الرھمان ءَ گشتگ ایف سی ءُ پولیس ءَ لوگانی تہ ءُ دزی کتگ ءُ موباھل پون ءُ دگہ گران بھائیں چیز دز اتگ اَنت-

آئی ءَ گوشتگ کہ گوادر ءُ کیچ ءَ ایف سی ءُ پولیس ءِ گنڈہ گردی برجاہ اَنت ءُ لھتے روچانی توک ءَ ریاستی گنڈہ گردی ءِ ھلاپ ءَ وتی دیم ءِ جار ءَ جن آں-

یک دمگی اھوالکارے ءَ دی بلوچستان پوسٹ ءَ گوں گوشتگ کہ سرکار ءَ اے تحریک ءِ سروک دزگیر کتگ اَنت نی دوبر مردمانی یکجاہ کنگ مشکل اِنت ءُ بلے سرکار ءَ داں انگت ءَ زالبولانی مُچ بوگ ءِ ترس اِنت-

مولانا ھدایت الرھمان ءَ بلوچستان سرکار ءِ ٹاہ رد کرتگ ءُ گوشتگ مروچی ششمی روچ ءَ ھم گوادر انگیری ءَ اِنت ءُ انٹرنیٹ ءَ ھوار چاگردی ترامجاہ بند اَنت-

آئی ءَ گوشتگ درست وھدیکہ کنٹرول ءِ توک ءَ اَنت گڑا انٹرنیٹ پرچا بند اِنت-

آئی ءِ گوشگ ات کہ سرکار مارا برانز دیگ لوٹ ایت بلے ما پر امن اِنت ءُ پر امنیں رنگے ءَ جد ءُ جھد ءَ برجاہ داریں ءُ ڈن ءَ آیوکیں زورگرانی ھلاپ ءَ جمھوری رنگ ءَ جد ءُ جھد کن ایں زر ءُ مڈیانی پھریزی ءَ کن ایں –

گوستگیں روچ ءَ ایمنسٹی انٹرنیشنل ءَ گوادر ءَ زھرشانی ءَ بازیں کچے ءَ دزگیریانی سر ءَ پدردی درشان کتگ ءُ گوشتگ مردماں وتی ھکانی سر ءَ پر ایمنیں رنگے ءَ زھرشانی کنگ ءِ ھک ھست ءُ ریاست ءِ زمہ واری اِنت کہ آیانی ھکاں سبک بہ کنت-

زورانسری آوار جنی ءِ آماچیں بلوچ رھشون ڈاکٹر دین بلوچ ءِ جنک ءُ وائس فار بلوچ مسنگ پرسنز ءِ جنرل سکریٹری سمی دین بلوچ ءَ بلوچستان ءِ سرکار ءِ نیمگ ءَ بیگواھیں مردمانی واستا جوڑ کرتگیں یک دگہ کمیشنے ءِ بارو ءَ لیکہ درشان کنان ءَ گوشتگ کہ مئے زند کمیٹی ءِ کش ءُ گوراں تران تران گوستگ-

سمی دین ءَ گوشتگ کہ اے سیزدہ سالانی توک ءَ ھمینکس بے واکیں کمیٹی ءُ اے درست دیستگ اَنت نی کمیٹی بس وھد ءِ زوالی ءَ اَنت-

آئی ءَ گوشتگ کہ نی اُستانی سرکار ءِ نیمگ ءَ یک دگہ نوکیں کمیٹی ءِ جوڑ کنگ بیتگ چُشکہ مئے کھولانی گون ءَ مسکرائی اِنت مارا کمیٹی نہ لوٹ ایت وتی دوستیگیں مردم سلامتی ءَ لوٹ اَنت-

زانگ بہ بیت گوستگیں روچ ءَ مھکمہ داکلہ ءَ بلوچستان ءِ سرکار ءَ بیگواھیں مردمانی یک دگہ پارلیمانی کمیشنے جوڑ کرتگ،کمیشن ھائی کورٹ بلوچستان ءِ ھکم ءَ جوڑ کنگ بیتگ-

وزیر داکلہ ضیاء اللہ لانگو پارلیمانی کمیشن ءِ سروک، ھمے وڑ اسمبلی ءِ باسک اسدللہ بلوچ، زابد ریکی، ملک نصیر شاھوانج ءُ زمرک اچکزئی کمیشن ءِ باسک نامینگ بیتگ اَنت-

ایڈیشنل چیف سیکریٹری داکلہ کمیشن ءِ سیکرٹری بیت اِنت، کمیشن بیگواھیں مردمانی درگت ءَ پٹ ءُ پول کنت ءُ کمیشن بیگواھیں مردمانی بارو ءَ ڈیھ ءِ ھلاپ ءَ پرکاریاں چار ایت-

زانگ بہ بیت بلوچستان ءَ بیگواھیں مردمانی درگت ءَ بازیں کمیشن جوڑ بیتگ اَنت بلے واک ءِ نہ بوگ ءِ سر ءَ بیگواھیں مردمانی کھول کمیشنانی سر ءَ اوست دارگ ءَ نہ اَنت-

زانگ بہ بیت سال دوھزار ءُ بیست ءُ دو ءَ انٹرنیشنل کمیشن آف جیورسٹ (آئی سی جے) ءَ پاکستان ءَ زورانسری آوار جنیانی درگت ءَ جوڑ کرتگیں وفاقی کمیشن ءِ کارانی سر ءَ ٹپاسکاری کتگ اے کمیشن ءِ وھد ءِ سرجم بوگ ءَ آئی ءِ دوبر نوک نہ کنگ ءِ سپارش کرتگ-

آئی سی جے ءَ گوشتگ کہ اے کمیشن زورانسری آوار جنی ءِ آماچین مردمانی وئیلان ھواریں مردم درگپت نہ کتگ اَنت ءُ آ وتی کرتگین مساماں سوبمند نہ بیتگ-