TBP Balochi

بلوچستان ءِ بنجاھی شھر شال ءَ زورانسری آوارجنیانی بگیری ءَ برجاھیں زھرشانی بنجل ءَ بیگواھیں جاوید شمس ءِ مات ءَ بھر زرتگ ءُ وتی زھگ ءِ یل کنگ ءِ لوٹ کتگ –

مات ءِ گوشگ ات کہ سِی ءُ یک اگست سال دوھزار بیست ءُ یک ءِ شپ ءَ شال ءِ دمگ کیچی بیگ ءَ پاکستانی پوج ءَ مئے گِس ءَ بیڑ برتگ ءُ منی زھگ جاوید شمس آوار جتگ ءُ بیگواہ کتگ کہ ھنگت گار ءُ بیگواہ انت –

آئی ءَ گوشتگ کی زھگ ءِ یل کنائینگے ھاتر ءَ منی جنکو کمیشن ءِ دیم ءَ پیش بوتگ بلے ھنگت آ تنی وھدی یل کنگ نہ بوتگ –

آئی ءِ گوشگ ات کہ پھازگی کارمنداں منی زھگ منی چمانی دیم ءَ کشان کُتگ ءُ گوں وت برتگ، ءُ مناں زھگ ءِ درگت ءَ ھچ وڈیں سرپدی ھم دیگ بوگ ءَ نہ انت –

آئی ءَ برزی تبک ءِ واکداراں چہ لوٹ کتگ کہ منی زھگ ءِ درگت ءَ مناں سرپد کنگ بہ بیت ءُ منی زھگ یل کنگ بہ بیت –

آئی ءَ گوشتگ کہ اگاں منی زھگ ءَ در کانودی کار ءِ کتگ گڑا کانود ءِرد ءَ سزا دیگ بہ بیت تانکہ من چہ اے ودار ءُ زوراکیاں بہ رکّاں – اے وڈ بیگواہ کنگ پہ من ءُ منی کھول ءِ گوم ءَ ناھکی یے –

آئی ءَ وتی زھگ ءِ یل کنائینگ ءِ ھاتر ءَ انسانی ھکانی ادارھاں چہ لوٹ کتگ ءُ گوشتگ کہ زھگے یل کنائینگ ءَ وتی کرد ءَ پیلو بہ کن انت تانکہ ما چہ اے زوراکی ءَ بہ رک ایں –

سر بیتگیں ھالانی روکپتی بلوچستان ءِ بنجاھی شھر دزاپ ءَ دو جتا جتائیں جاھاں یک لاشے دزکپتگ ءُ یک مردمے پہ چاکو کُشگ بیتگ-

گیشیں ھالانی رد ءَ دزاپ ءَ چہ بیست ءُ پنچ کیلومیٹر ءِ دوری ءَ خاش ءَ یک مردمے ءِ جون دزکپتگ-

شنگ بیتگیں تامر بندے ءَ گندگ بیت اِنت کہ اود ءَ یک لاشے ما بسترانی سر ءَ ایر کنگ بیتگ بلے مردم ءِ پجار نہ بیتگ-

تامر بند ءَ گندگ بیت اِنت کہ لاش یک بندیگ جاھے ءَ بندیگیں مردمے ءِ جاوراں پیش کنگ ءَ اِنت داں انگت ءَ لاش ءِ پجار نہ بیتگ-

دومی نیمگ ءَ زاھدان ءَ ناشناسیں مردماں یک ورنایے چاکو جتگ ءُ کُتگ-

کُشگ بیتگیں ورنا ءِ پجار روح اللہ بیلرانی جھمنند کوثر زاھدان ءِ نام ءَ زانگ بیتگ، کوش ءِ سبب داں انگت ءَ زانگ نہ بیتگ-

روکپتی بلوچستان ءُ اوگانستان ءِ سیمسراں ھواریں دمگ زابل ءَ ایرانی آمیدگس ءِ ھکم ءَ یک بندیگیں بلوچے پاھو دیگ بیتگ-

سر بیتگیں ھالانی رد ءَ رودان ءِ زندان ءَ بندیگیں عبدالنظیر سرخ کمان ء مساپر کہ آئی ءِ اُمر بیست ءُ ھشت سال گوشگ بیگ ءَ اِنت آ گوستگیں شپ ءَ پاھو دیگ بیتگ-

ھالانی تہ ءَ گوشگ بیتگ کہ نظیر ایرانی سال سیزدہ سد ءُ نود ءُ نُھ ءَ نشہ باپاری ءِ بھتام ءَ آوار جنگ بیتگ-

ھالانی تہ ءَ گوشگ بیتگ کہ نظیر گوستگیں شپ ءِ ساھت دوازدہ ءَ ماں زابل ءَ رودان زندان ءَ پاھو دیگ بیتگ-

ھالانی تہ ءَ گوشگ بیتگ نظیر لھتے روچ پیش ما زاندان ءَ لوٹائینگ بیتگ ءُ پد ءَ آ جتا یک کوٹی ءَ کنگ بیتگ ءُ گوستگیں شپ ءِ ساھت دوازدہ ءَ آئی ءِ سر ءَ پاھو اتکگ –

روکپتی بلوچستان ءِ جھمنندیں مردم بازیں وھداں چہ ایرانی آمیدگس ءِ پاھوانی دیمپانی ءَ کنگ ءَ اَنت کہ ایانی سر ءَ جتا جتائیں بھتام جنگ ءُ آ پاھو دیگ بیگ ءَ اَنت-

زاھدان ءَ زھرشانی ءِ وھد ءَ دزگیری بیتگیں مردمانی تہ ءَ چارُمی ورنا ءِ سر ءَ ھم پاھو ءِ ھکم دیگ بیتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی لشکر ءِ دست ءَ گرگ بیتگیں ابراھیم ناروئی ءِ سر ءَ ھم مروچی ایرانی آمیدگس ءَ پاھو ءِ ھکم داتگ –

ابراھیم ناروئی گوستگیں سال ءِ سَے اکتوبر ءَ دوھزار ءُ بیست ءُ دو ءَ ماں زاھدان ءَ چیریں ادارھانی لس پوشاکی کارندھاں آوار جتگ ءُ برتگ –

فارسی نیوز بلوچ گزارش ءِ رد ءَ ابراھیم یک ھپتگے ءَ چیریں زانداناں کنگ بیتگ ءُ پد ءَ آئی ءِ سر ءَ بے کساس لٹ ءُ کٹ لنگ ءَ پد آئی ءِ سر ءَ جتگیں بھتامانی سر ءَ دزنشان چنگ بیتگ-

بھتامانی سر ءَ دزنشان ءَ پد ایرانی پاسداران انکلاب ءِ آمیدگس زاھدان ءَ آئی ءِ سر ءَ پاھو دیگ ءِ ھکم داتگ-

زاھدان ءِ آمیدگس ءِ جج ءَ گشتگ کہ گاں ابراھیم ناروئی ءِ بے گناھی ءِ منانک ھست گڑا آئی ءِ سر ءَ کسے دیم ءَ گپ بہ جنت ءُ آئی ءِ پاھو دارگ بیت اِنت-

زانگ بہ بیت ھمے زوتاں سَے دگہ ورناہ ھم زھرشانیاں ھواری ءِ بھتام ءَ پاھو ءِ دیگ ءِ ھکم دیگ بیتگ اَنت-

اے سئیں ورنایانی تہ ءَ شعیب میر بلوچزئی ریگی، منصور دھمردہ ءُ کامبیز خروت ءِ نام ھوار اَنت کہ ھرسئیں کس کسان سالیں ورناہ اَنت-

بلوچ ورناہ ءُ نشہ ءِ سِلکاری

نبشتہ کار: شازیہ بلوچ

دی بلوچستان پوسٹ

بنی آدم اِے چیز ءَ جْوان سرپد اِنت کہ نشہ یک ھرابیں ءُ سِلیں نادراھی یے، اے انچیں چیزے کہ ترا کدی آرم ءُ وش وابی ءَ نیل ایت۔ اے انچوں انسان ءَ ھلاس کنت کہ سما نہ بیت۔ چوناھا نشہ چم زاھر ءَ نشہ وَ شر لگ ایت چمیشکا ما ھمے سرپد بہ ایں کہ اے وَ نشہ نہ کنت۔ بلے زان ئے؟ نشھی ئیں مردم ءِ توک ءَ ھچی پَشت نہ کپ ایت چی ءَ کہ ھر وھدیکہ تو نشہ کنان کن ئے ھمے پھم اِنت کہ سک وش اِنت دل گُش ایت یکو نشہ بہ کن بلے نادان اے ترا برباد کنگ ءَ انت۔ اے ترا بے ھوش کنگ ءَ اِنت ، اے تئی وش ءُ آسودگیں زند ءَ چہ ترا پچ گِرگ ءَ انت۔ بلکیں روچ پہ روچ اے نشہ تئی زِند ءِ وشی ءَ ھلاس کنگ ءَ اِنت، ھمے نشہ ترا پِنڈگ ءَ پرما ایت اے ترا وڑ وڑیں ناشرکاری ءَ ھم پرما ایت چی ءَ کہ اے وت انچیں چیزے، ایشی ءِ نہ رسگ ءِ سوب ترا بے تاھیری رس ایت۔ گِندئے نشہ تئی اِزت ءَ ھم پچ گِپت ترا چہ اِزت ءَ بے اِزت کنت ترا چہ جان ءَ بےجان کنت ءُ پد ءَ ترا کس مردمے پوہ نہ بیت۔ گِند ئے ھرکس گُوش ایت کہ اے وَ نشہ کنت سوچ ئےِ، کسے گُوش ایت “اے نوں ھال ئےِ چہ مارا یک کِر ءَ بِہ بَہ ئے”-

گُڑا بنی آدم ءِ زِند ءَ چوشیں ویل یکو دیم ءَ کپ اِیت گِندئے گوستگیں سے ماہ یک ورنایے ءَ وتی جند ءِ مات وت کُشت، زان ئے چی واست ءَ کُشتگ ئِے؟ بس ھمے یکیں نشہ ءِ زر نہ رسگ ءِ سوب ءَ کُشتگ ئِے۔ او منی راج ءِ ورناھاں، اُپ چہ نشہ ءَ توبہ بہ کن ات۔ گِند ئے مئے دژمن مئے واست ءَ وڑ وڑیں پندل ساز ایت ، تو اگاں مارا اِلم نہ داتگ اَت گُڑا نشہ ھم مہ داتیں، پرچا کہ ما تئی کر ءَ نشہ وَ نہ لوٹ اِتگ۔ البت مئے لوٹ مُدام اے بیتگ کہ نشہ مہ داتیں مئے بلوچانی زَھگانی اُمر وانگ ئیگ انت بلے تو زان ئے؟ انی مئے ورناہ ءُ نوک رُستگیں زھگ چی کنگ ءَ اَنت؟ نشہ نشہ، اڑے دُژمن تو کموکے انساپ بہ کُتیں ، تو کمو بزگ بہ کُتیں ۔ کسے اُمر پانزدہ، سال انت نشہ کنت کسے ءِ دوازدہ سال انت کہ آ نشہ کنت۔ گندئے تئی وتی چُک ھمے بلوچانی برورد ءَ پنجاپ ءُ لاھور ءَ وانگ ءَ دیم داتگ اَنت بلے مئے بلوچانی چُک نشہ ءِ آماچ اَنت۔

دُگنیا ءِ تہ ءَ انچیں نیزگاریں مات ءُ پت ھست کہ بلکیں شپ ءَ کیت ءُ شام ءَ نئیت ھمیشانی ورنا نشہ ءِ آماچ بوتگ اَنت۔ کدی پہ نشہ ءُ زر ءِ نہ رسگ ءِ سوب ءَ مات ءُ پتاں لٹ ءُ شاپ کن اَنت ءُ وتی مات ءُ پتاں کُش اَنت ءُ دور دے اَنت۔ گُڑا اے وَ کُدرتی موتے وَ نہ اَنت اے کُشوک ءُ اے دْراھیں ویل ءُ بیرانی ءِ زمہ وار زمہ وار کے اِنت؟ گِند ئے راج ءِ دْژمن وت نشہ ءِ بھاپار کنوک اَنت۔ یک وھدے ھست کہ اگاں میتگ ءِ تہ ءَ کسے ءَ نشہ بہ کُتیں گُڑا چاگرد ءِ مردماں وتی گُوْنڈو ھم نہ اِشت اَنت کہ آ نشہ ءِ کر ءَ بروت بلے انوں کج اِنت مرچاں زاھراں سری اِنت تو نشہ بہ کن ءُ من ھم نشہ بہ کن آں۔

ما گوں نشہ ءِ بھاپاری کنوکاں لوٹ کن ئے کہ وتی اے سلیں کار ءَ یلہ بہ کن اِت ءُ مئے کوم ءِ ورناھاں برباد مہ کن اِت گُڈسر ءَ من ھمے گُش آں کہ ناں وت نشہ بہ کن اِت ءُ ناں کہ دومی ءَ بِل اِت کہ نشہ بکنت۔ گوں شُما دزبندی اِنت کہ اے سلیں کار ءَ چہ وت ءَ بہ رکین اِت۔ سلامت بات اِت شمے زند پہ وشیں کردے ءَ گون ءَ بہ گوزات۔ آمین۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پاکستان ءِ سر وزیر شھباز شریف ءَ گوشتگ من آئی ایم ایف ءِ منیجنگ ڈائریکٹر ءِ گون ءَ گپ ءُ تران کرتگ ءُ آئی ءَ را انیگیں جاورھالانی بارو ءَ سرپدی ھست اِنت ءُ پاکستان ءِ جیڑہ ءِ سر ءَ بزگ بہ کنت ءُ اشی ءِ درگت ءَ نرم دلی بہ کنت-

روئٹرز ءِ رد ءَ جنیوا ءَ میان اُستمان ءِ سیکرٹری جنرل ءِ گون ءَ پریس کانفرنس کنان ءَ یک جستے ءِ پسھ ءَ سروزیر پاکستان ءِ گوشگ اَت ” پاکستان اے وھد ءَ ناگیگیں جنجالانی دیمپان اِنت ” گیس ءِ نھاد میان اُستمانی تکاں گیش بیتگ یک جیڑھے بیتگ چریشی ءَ پد توپان ءَ درست تباہ ءُ برباد کتگ اَنت-

آئی ءَ گوشتگ کہ ما امیت کن ایں اے ناگیگیں وھد ءَ اے امپورٹڈ ءِ مھلوک ءِ بوج ءَ وتی مردمانی کوپگاں بہ دے – ءُ میان اُستمانی پھناتاں تیل ءِ گیشیں نھاد ءَ ایانی سر ءَ بہ لڈ ایں-

سر وزیر پاکستان ءَ گوشتگ کہ ما آئی ایم ایف ءِ نیاد ءِ واستا دوبر رھوت کتگ ءُ آئی ءِ گون ءَ ترندیں مسام ایر کرتگ ءُ گوشتگ کہ آ پاکستان ءِ توپان آماچیں مھلوک ءِ سر ءَ چے رنگ ءَ بوج دات کنت-

دومی نیمگ ءَ پاکستان ءِ وزیر ھزانہ اسحاق ڈار ءَ جنیوا ءَ آئی ایم ایف ءِ واکداراں گوں گند ءُ نند کتگ ءُ وزارت ھزانہ ءِ نیمگ ءَ درشان ءَ گوشگ بیتگ کہ آئی ایم ایف ءِ نیاد ءَ سرجمی ءَ آیاں امیت دار کتگ –

نامداریں کشمیری شائر، کتابانی واھند، رجانکار ءُ ٹپاسکار عبدالرحمان راھی دو شمبے ءِ سھب ءَ سرینگر ءَ وتی لوگ ءَ بیران بیتگ – آئی ءِ اُمر اے وھد ءَ نود ءُ ھپتاد بیتگ ءُ لھتے سال بیتگ کہ آ نادراہ بیتگ-

عبدالرحمان راھی کشمیری ءِ ھما لبزانکاراں ھوار بیتگ کہ آ گیشتر نامان بیتگ اَنت آ گوستگیں نیم کرن ءَ گیش ءِ وھد ءَ کشمیر ءَ یک نامانیں شائر ءُ لیجنڈے ءِ رنگ ءَ دیم ءَ اتکگ بیتگ- راھی ءَ وتی گزلانی تہ ءَ کشمیر ءِ دود ءُ دودمانیں رھشونی کتگ-

کشمیر ءَ بیوکیں کُشت ءُ ھون ءُ جاورھالانی تہ ءَ ھم آئی ءِ شائری ءِ زبان رَچوک بیتگ کہ آئی ءِ کشمیری ءِ نزمے ءِ رجانک “آ کَے بیتگ، پرچا کُشگ بیتگ،آئی ءِ لاش کجا ایر کنگ بیتگ ” باز نامان ءُ زبان ءُ رَچوکیں شَیرے بیتگ-

عبدالرحمان راھی ءِ شائری ءُ آئی ءِ ازمکاری ءُ اندر ءِ مارشت وتی مٹ وت بیتگ اَنت ءُ آئی ءِ نبشتگ کرتگیں نزم ءُ شَیر بازیں شائراں گشتگ اَنت-

شش مئی نوزدہ سد ءُ بیست ءُ پنچ ءَ سرینگر ءَ یک گچینی گِسے ءَ وتی بیتگیں عبدالرحمان راھی ءَ وتی بنداتی وانگ ءُ زانگ وتی ھند ءَ بندات کتگ ءُ پد ءَ یونیورسٹی آف کشمیر ءَ انگریزی ءُ فارسی ءِ ایم اے ڈگری ءِ دزگپتگ اَنت-

پد ءَ آ کشمیر یونیورسٹی ءَ ھم نوزدہ ءُ سد ءُ پنجاہ ءُ سَے ءَ فارسی ءِ لیکچرارے ءِ بستار ءَ دارگ بیتگ پد ءَ آ درس گاہ ءِ تک ءَ کشمیری ءِ سروک بیتگ-

راھیطءَ وتی لبزانکی زند دیمروئی کنوکیں کتابکارانی ایسویمسی ایشن ءَ ھوار بیتگ ءُ کتگ آئی ءِ جنرل سیکریٹری ھم بیتگ آئی ءَ لبزانکی کتاب، کونگہ پوچ زعفرانی پھول ءِ تکاں ھم کتگ-

آ سرینگر ءَ شنگ بیتگیں اردو روتاک”حدمت ءِ سروک بیتگ ءُ دھلی اردو روتاک “آج کل ” ءِ شونگالکار ءِ باسک بیتگ-

عبدالرحمان راھی بازیں کتابانی واھند اِنت کہ آئی ءِ تہ ءَ ردانکاری ءُ شائری ھوار اَنت اشی ءَ ھوار ھوار آئی ءَ کشمیری زبان ءَ دزنویسی ءَ سیاھگ ءِ سر ءَ ھم کار کتگ-

رجانکاری ءِ تکاں آئی ءُ بابا فریدالدین ءِ صوفی شائری پنجاپی ءَ رجانک کتگ ءُ کشمیری زبان ءَ کتگ کہ کشمیر ءَ یکدم نامان بیتگ-

عبدالرحمان ءَ سال دوھزار ءُ ھشت ءَ آئی ءِ شائری کتاب “سیاہ رود جیرن منز” سیا ءُ تھاریں شپاں دنزشانی ” ءِ کتاب ءِ سر ءَ ھندوستان ءَ لبزانکی تکاں مزنیں داد گیان پیٹھ ءِ داد دیگ بیتگ ءُ آ اولی ءُ بنداتی کشمیری ندکار بیتگ آئی ءَ اے داد رس اتگ اشی ءَ ابید آئی ءَ را ساھتیہ اکادمی ءُ پدم شری ءِ داد ھم دیگ بیتگ اَنت-

راھی ءِ کھول ءَ سَے بچک ءُ یک جنکے آئی ءِ پشت پد ءَ پشکپتگ اَنت آئی ءِ نماز جنازہ دو شمبے ءِ نیمروچ ءَ سرینگر ءِ ھند نوشھرہ ءُ وانینگ بیتگ ءُ بازیں کچے ءَ مردماں بھر زرتگ-

آئی ءِ مرگ ءِ سر ءَ جتا جتائیں پھناتان سیادی داروکیں مردماں پدری درشان کتگ ءُ ھندوستان ءِ زیردستیں کشمیر ءِ انتزامیہ ءِ سروک لیفٹننٹ گورنر منوج سنھا ءَ ھم آئی ءِ مرگ ءِ سر ءَ پدردی درشان کتگ-

اے اھوال انٹر نیٹ ءَ جتا جتائیں سائیٹاں زورگ ءُ چارگ ءُ ٹپاسگ بیتگ اَنت –

سید ھاشمی ریفرینس کتابجاہ ءِ لس مجلس دیوان 8 جنوری 2023 ءَ ماں سید ھاشمی کتابجاہ کارگس جاہ، دہکان گارڈن، ملیر برجاہ دارگ بیتگ۔

سر بیتگیں ھالانی ردءَ سید ھاشمی ریفرینس کتابجاہ ءِ لس مجلس دیوان 8 جنوری 2023 ءَ سید ھاشمی ریفرینس کتابجاہ ءِ کارگس ءَ برجاہ دارگ بیتگ کہ اِشی تہءَ مزنیں کساس ءَ کتابجاہ ءِ باسکاں ھوار بلوچ لبز انکاراں بھر زُرتگ۔ کتابجاہ ءِ لس مجلس دیوان سئے بھرانی تہءَ بیتگ۔

اولی بھر ءِ تہءَ مالی نگدال (رپورٹ) پیش کنگ بیتگ، دومی بھر ءِ تہءَ کارکردگی ءُ دیمروی نگدال پیش کنگ بیتگ ءُ سئمی بھر ءِ تہءَ کتابجاہ ءِ اگدہ دارانی گچین کاری بیتگ۔

گچین کاری ءِ ھاترءَ اڈ داتگیں کمیٹی ءِ تہءَ واجہ رمضان بلوچ، ارشد صالح ءُ سلمان بلوچ بیتگ اَنت۔ گچین کاری ءِ آسر ءَ کتابجاہ ءِ کابینہ پہ سال ۲۰۲۳ ءُ ۲۰۲۴ ءَ گچین بیتگیں اگدہ دارانی لڑ اے وڑءَ اِنت کماش اکبر ولی، کمک کماش اولی جمال ناصر، کمک کماش دومی واحد کامریڈ، کارگشاد عمران ابراہیم، کمک کارگشاد مشتاق رسول، ھسابدار سجّاد علی، رابتہ کاردار عاصم زھیر، شنگکار بشیر احمد بلوچ ءُ آفیس کاردار ظریف محمود گچین کنگ بیتگ۔ کابینہ ءَ ھوار باسک سلاہکار کمیٹی ءِ ھاترءَ گچین بیتگیں مردمانی تہءَ سعیدہ حسن، ڈاکٹر رمضان بامری، غلام رسول بلوچ، اصغر علی آزگ، تنویر مرزا ءُ مزمل صالح ھوار اَنت

نوک گچین بیتگیں کابینہ ءُ باسک سلاہکار کمیٹی ءِ باسک گچین کاریءَ پد واجہ رمضان بلوچ ءَ سوگند دات اَنت۔ دیوان ءِ پاگواجہ ءُ ریفرنس کتابجاہ ءِ پیسریگیں سروک ڈاکٹر رمضان بامری ءَ تران کنان ءَ نوک گچین بیتگیں اگدہ داراں مراد باتی داتگ ءُ گُشتگ کہ اُمیت انت کہ نوک گچین بیتگیں اگدہ دار ادارگ ءِ دیمروی ءِ تہءَ وتی کرد ءَ جوانیں وڑءَ پیلو کن انت۔ آئی ءَ گُشتگ کہ سید ھاشمی ریفرنس کتابجاہءِ مستریں جیڑہ مالی جیڑہ اِنت۔ سندھ سرکار ءُ بلوچستان سرکار اے ادارگ ءِ مالی کمک بکن اَنت دانکہ بلوچی زبان ءُ لبزانک ءِ دیمروئی ءِ ھاترءَ کتابجاہ وتی کاراں دلجمی ءَ گوں کُت بہ کَنت۔

روکپتی بلوچستان ءِ دمگ خاش ءَ ایرانی لشکر ءَ تیرگواری کنان ءَ دو ورنا کشتگ اَنت-

گیشیں ھالانی رد ءَ خاش ءَ ایرانی یگان لشکر ءَ تیرگواری کرتگ ءُ ارسلان رحمت زئی ء سلیمان ءُ حمید رحمت زئی حسن برای کشتگ اَنت-

ھالانی تہ ءَ گوشگ بیتگ کہ ارسلان ءُ حمید ھردوک سرباز خاش ءَ سیل ءُ سواد ءَ بیتگ اَنت ایرانی یگان لشکر ءَ تیرگواری کنان ءَ کشتگ اَنت-

ھالانی تہ ءَ گوشگ بیتگ کہ ھردوکیں ورنا زدگ بیتگ اَنت پد ءَ ایرانی لشکر ءَ مردم کمک ءَ نیشتگ اَنت چریشی ءَ ھردوکاں وتی ساہ داتگ اَنت-

زانگ بہ بیت دو روچ پیش ھم سراوان گلشن ءَ ایرانی لشکر ءَ تیرگواری کتگ ات ءُ یک ورنایے کشتگ اَت پد ءَ مردماں ورنا ءِ کوش ءِ ھلاپ ءَ زھرشانی بندات کتگ ات پد ءَ دمگدار اتکگ ءُ مردم سدکی داتگ ءُ زھرشانی ھلاس اش کتگ-