TBP Balochi

بلوچستان ءِ دمگ کلات ءَ گوستگیں روچ ءَ ھئور ءُ برپ باری ءَ پد سارتی گیش بوتگ – سارتی ءِ درجگ -4 نبشتہ کنگ بوتگ – 

سارتی ءِ گیش بوگ ءَ مردم وتی گسانی تہ ءَ بند انت ءُ کلات ءَ گیس بندش برجاہ انت وھدیکہ لین ھم سھت دمان رؤنت ءُ کائنت مھلوک چہ لوڈ شیڈنگ ءَ بیزار انت – ھچ وڈیں آسراتی نیست، ھشکیں دار ءُ ایل پی جی گیس ءِ گرانھادی ءَ مردم دلسیاہ انت – 

مردمانی گوشگ انت کہ جست کنوک نیست،  دمگی نمائندگ گار انت،  پرچا کہ آھانی گور ءَ ھر وڈیں آسراتی ھست بلے بزگریں مھلوک وار ءُ بزگ انت چہ بنکی آسراتیاں زبھر انت – 

مردمانی گوشگ انت کہ آمیدگس ءِ نیمگ ءَ گیس پچ کنگ ءِ ھکم دیگ پد گیس واکدارانی اشی سر ءَ گامگیج نہ زورگ بازیں جست ودی کنت – 

دمگی مردماں پاکستان ءِ چیف جسٹس،  وفاق ءِ واکدا ءُ دگہ زمہ داراں گوں لوٹ کتگ کہ لینانی لوڈ شیڈنگ ءُ گیس بندش ءِ بگیری ءَ گامگیج بہ زور انت –

بیگواھیں محمد آصف ءُ عبدالحمید زھری ءِ کھول زھرشانی بنجل ءَ اتکگ انت ءُ وتی دوستیگیں مردمانی یل کنگ ءِ لوٹ اِش کُتگ – 

کراچی پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ،  زھرشانی بنجل ءَ مروچی چار ھزار نُھ سد ءُ سِی ءُ نُھ روچ سرجم بوتگ انت – مروچی پُھلین بلوچ ءَ ھوار دگہ بازیں زالبول ءُ مردیناں اتکگ بیگواھیں مردمانی کھول ءِ گوم ءَ دلپدردی درشان اِتگ – 

زھرشانی بنجل ءَ چہ کراچی ءَ زورانسری آوار جنگ بوتگیں ھزدار ءِ جھمنند عبدالحمید زھری ءِ لوگبانک فاطمہ ءُ زھگ سعیدہ حمید، محمد آصف گھار بی بی شیرین ھوار دگہ بیگواھیں مردمانی کھول اتکگ ءُ وتی زھرشانی ءِ نبشتہ کنائینتگ – 

سعیدہ حمید ءَ گوشتگ کہ منی پت ءِ زورانسری آوار جنی ءَ بیست ءُ دو ماہ سرجم بوگ ءَ انت بلے تنی وھدی آئی ءِ ھچ وڈیں ھال اھوال نیست – 

آئی ءَ لوٹ کتگ ءُ گوشتگ کہ پہ ھُدا ءَ بچارے منی پت ءَ زاھر بہ کن ایت ءُ مار ءَ چہ اے زوراکیں زند ءَ بہ رکین ایت – 

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ زالبول مئے چاگرد ءِ نیم بھر انت ءُ زرمبشتانی تہ ءَ آھانی جوانیں کرد یے بیت اِنت،  مارا آھانی کرد پہ پُرایمنیں جھد ءِ ھاتر ءَ جوانی ءَ کارمرز کنگی انت – مروچی اگاں مردین زرمبشت ءِ یک باسک انت گڈا دومی باسک زالبول انت – اے وڈیں نگیگیں جاورھالاں بلوچ زالبول ھر وڈا پُرایمنیں جھد ءِ تہ ءَ وتی کرد ءَ پیلو کت کن انت ءُ وتی زھگ ءُ براتانی ھمراھی ءَ جھد ءَ  دیم ءَ بہ بر انت – 

آئی ءَ گوشتگ کہ بلوچستان ءِ اے جاورھالاں زالبولانی سر ءَ گیشتر زمہ واری بیت اِنت کہ وتی دوستیگیں مردمانی ھاتر ءَ سیاسی کاراں دیم ءَ بہ بر انت،  جھان ءِ دیم ءَ اشی ءَ پدر بہ کن انت کہ بلوچ زالبوم گِسانی تہ ءَ بندیگ نہ انت بلکنہ مئے زالبول جھد ءِ پڑ ءَ گوں مردیناں ھم کوپگ انت – 

چہ کراچی ءَ پنچ سال ساری زورانسری آوار جنگ بوتگیں محمد آصف ءِ گھار ھم مروچی وائس فار بلوچ مسنگ پرسنز ءِ بنجل ءَ اتکگ ءُ وتی برات ءِ یل کنگ ءِ لوٹ کتگ – 

بی بی شیرین ءَ چہ زھرشانی بنجل ءَ وتی شنگ کرتگیں تامری درشان ءِ تہ ءَ گوشتگ کہ منی برات محمد آصف پنچ سال ساری چہ کراچی بلدیہ ٹاؤن مھاجر بنجل ءَ زورانسری آوار جنگ ءُ بیگواہ کنگ بوتگ کہ ھما انت گار انت – 

آئی ءَ گوشتگ کہ آئی ءَ وتی برات ءِ زورانسری آوارجنی ءِ کیس کراچی ءَ جما کتگ وھدیکہ بیگواھیں مردمانی کمیشن ءُ جی آئی ٹی ءِ گور ءَ ھم وتی برات ءِ سرجمیں ھال نبشتہ کنائیں اِتگ انت – بلے تنی وھدی آئی ءَ ھچ وڈیں وشیں ھال دیگ نہ بوتگ ناکہ روچ مروچی اے گوشگ بوتگ کہ آئی ءِ برات کجام کتکاریانی سوب ءَ بیگواہ کنگ بوتگ – 

آئی ءِ گھار ءِ گوشتگ کہ محمد آصف گِس ءِ یکیں کمائی کنوک انت آئی ءَ پہ گِس ءِ ھاتر ءَ کراچی بزگری ءُ مزوری کتگ اگاں آئی ءِ سر ءَ.کتکاری ءِ الزام ءِ ھست گڈا آمیدگس ءَ آرگ بہ بیت – 

بی بی شیرین ءَ وتی برات ءِ وش ءُ سلامتی یل بوگ ءِ ھاتر ءَ سرکار ءُ انسانی ھکانی ادارھاں چہ لوٹ کتگ گوشتگ کہ آ اے درگت ءَ گامگیج بہ زور انت ءُ تانکہ محمد آسف ءَ انساپ بہ رس ایت –

پاکستان ءِ پرگینگ پنجاب ءِ دمگ میانوالی ءَ مکڑوال پولیس اسٹیشن ءِ سرءَ مزنیں سلاھاں چہ چکاریںتحریک تالبان پاکستان (ٹی ٹی پی) ءِ جنگولاں اُرش کُتگ۔

ڈان روتاک ءِ اھوال ءِ ردءَ اے وئیل پشاور تراک کہ آئی تہءَ 100 چہ گیش مردم بیران بیتگ اَت آئی یک روچے ءَ رند گوستگیں شپ ءَ دیما اتکگ، اے اُرش اے ھساب ءَ ھم مزنیں گام اِنت کہ جنگولاں دوبر سر چِست کنگ ءَ پد اولی بر اِنت کہ پنجاب ءِ کجام ھم پولیس اسٹیشن نشانگ کُتگ، چدوپیسر داں انگت خیبرپختونخوا ءَ پولیس اسٹیشن ءُ بنجل نشانگ کنگ بیتگ اَنت۔

پنجاب ءِ انسپکٹر جنرل پولیس ڈاکٹر عثمان انور ءَ ھال راست کنان ءَ گُشتگ کہ ٹی ٹی پی ءَ گوں سیادی داروکیں سلاہ بنداں پولیس اسٹیشن ءِ سرءَ اُرش ءِ زمہ واری من اِتگ۔

آئی ءَ گُشتگ کہ لاہور پولیس ءُ ناشرکاری ءِ بگیر ءَ کارکنوکیں پنجاب ءِ ادارگ ءِ ھمرائی ءَ 3 دمگ (میانوالی، ڈیرہ غازی خان ءُ سرگودھا) ءِ پولیس ٹیم ٹی ٹی پی ءِ بگیر ءَ ’مزنیں بیڑ‘ ءِ ھاترءَ میانوالی ءَ رستگ اَنت۔

چاگردی رسانکدرانی اھوالانی ردءَ اُرش ءِ بندات شپ ءَ نھ ءَ بیتگ وھدے ٹی ٹی پی ءِ اُرش کاراں گوں وتکاریں سلاھانی کمک ءَ مکڑوال پولیس اسٹیشن ءِ سرءَ ترندیں تیر گواری بندات کُتگ۔

البت آئی جی پنجاب ءَ گُشتگ کہ اُرش ءِ نیام ءَ پولیس کارمندانی ٹپی بئیگ ءِ ھچ اھوال نیست، میانوالی پولیس ءِ یک مستریں کارمندے ءَ گُشتگ کہ اسٹیشن میں جاڑیگیں کارمنداں زیت پسہ داتگ ءُ اُرش بے سوب کُتگ۔

تحریک طالبان پاکستان ءِ جارکش محمد خراسانی ءَ اُرش ءِ زمہ واری منان ءَ گُشتگ کہ “مروچی شپ ءَ ادار نھ نیم نیم تحریک طالبان پاکستان ءِ جنگولاں پنجاب ءِ دمگ میانوالی ءِ تھانہ مکڑوال ءِ سرءَ اُرش کُتگ”

آئی ءَ گُشتگ کہ اُرش ءِ تہءَ اسنائپر، راکٹ، پیکا ءُ جی ایل ءَ ھوار دگہ کسان ءُ مزنیں سلاہ کارمرز کنگ بیتگ اَنت کہ اِشی تہءَ بیرانیانی گمان اِنت ءُ تھانہ ءَ ھم تاوان رستگ جنگولیں ھمراہ سلامتی ءَ گوں درکپگ ءَ سوبین بیتگ اَنت۔

بلوچستان لبریشن فرنٹ ءَ مند ءَ پاکستانی ملٹری انٹیلی جنس (ایم آئی) ءِ کارگس ءِ سرءَ بمب تراک اُرش ءِ زمہ واری من اِتگ۔ 

بی ایل ایف ءِ جارکش  میجر گہرام بلوچ ءَ شنگ کُتگیں درشانے تہءَ گُشتگ کہ  31 جنوری ءِ بیگاہ ءَ ادار 7 ءَ سرمچاراں  کیچ ءِ ھنکین مند سورو ءَ پاکستانی ملٹری انٹیلی جنس(ایم آئی)ءِ کارگس سرءَ دستی بمب ءَ گوں اُرش کُتگ کہ چریشی ءَ آیاں تاوان رستگ۔ زانگ بہ بیت کہ ایم آئی ءَ مند سورو ایکسچینج (پی ٹی سی ایل)ءِ کارگس سرءَ قوضہ کُتگ ءُ وتی کارگس جوڑ کُتگ ءُ آیانی کارندہ ھروھدءَ ھمودءَ ساڑی اَنت۔

آئی ءَ دیمترءَ گُشتگ لس مھلوک چہ ریاستی کارمنداں دیر بہ بنت آ سرمچارانی نشانگ ءِ سرءَ اَنت، قوضہ گیریں لشکر ءُ آیانی کمککارانی سرءَ اُرش ایردستیں بلوچستان ءِ آجوئی ءَ داں برجاہ مان اَنت۔

ڈاکٹر ناگمان ءِ زانشتی گالبندانی کتاب “نوکاز” زوت چاپ ءُ شنگ بیت 

بلوچ زبان ءِ نامداریں ندکار ءُ زبان زانت ڈاکٹر ناگمان ءِ زانشتی گالبندانی کتاب نوکاز زوت چہ ملا اسمائیل لبزانکی گل ءِ نیمگ ءَ چاپ ءُ شنگ بیت – 

ڈاکٹر ناگمان ءِ گالبندانی کتاب چدو پیسر سَے رند ءَ چاپ شنگ بوتگ انت کہ بازیں وھدے ءَ پد گوں نوکیں گال ءُ گالبنداں آئی ءِ چارمی ایڈیشن چاپ ءُ شنگ بوگ ءَ اِنت – کتاب ءِ سرتاک ءِ اکس مختار شاد ءِ انت ءُ سرتاک ءِ تراشکار زبیر بلوچ انت ءُ اے کتاب سَے سد ءُ شست ءُ ھشت تاکدیم انت – 

ڈاکٹر ناگمان ءَ وتی نوکتریں کتاب نوکاز ءِ بابت ءَ گوں دی بلوچستان پوسٹ ءَ تران کنان ءَ گوشتگ کہ نۆکاز بلۆچی ءِ زانِشتی یا اکیڈمک گالبندانی گِچێنے. اِشی ءِ تها سائنس، زبان، لبزانک، سیاست، دین ءُ دگه پِڑانی  کساس هشت هزار گالبند ھوار اَنت۔

آئی ءَ دیمترءَ گوشتگ کہ اے کتاب ءَ انگرێزی لبزانی دێما بلۆچی لبز رۆمن سیْاهگ ءُ اَربی سیاهگ دوئێنان نبشته کنگ بیتگ انت. رۆمنءَ نبشته کنگ ءِ پائدگ اِش اِنت که لبزانی گالتوار گیشّتگ ءُ وانۆک لبزانی مانایانی پَجّی ءَ آیانی گالتوار ءَ هم زانت۔

کتاب انگرێزی لبزانی رِد و بند ءَ اِنت ءُ ABC-wise انت دانکه اگن کسے انگرێزی گالبندے ءِ بلۆچی بدل ءَ دَرگێجگ بلۆٹیت گُڈا دمان ءَ درگێتک ئِے بکنت۔

ڈاکٹر ناگمان ءَ گوشتگ بلۆچی ءَ کوَهنێن گالبند باز اِنت بله نۆکێن دَور ءِ گالبندانی کمّی اِنت. و نۆکاز همے کمّی ءِ پورا کنگ ءِ کسانێن جُهدے. دراجێن سپرے دێما اِنت ءُ اے بِنداتی گامے۔

نوکاز ءِ بابت ءَ ملا اسمائیل لبزانکی گل ءِ کارمستر جمیل محراب ءَ وتی فیس بک ءِ تاک ءَ نبشتگ کہ بلوچی زبان ءَ واجہ ناگمان ھما گچینیں ناماں ھوار انت کہ آئی ءِ دراھیں تکانی کار بے درور بوتگ انت، آئی ءَ آزمانکاری ءُ شرگداری ءِ ھمراھی ءَ وھدے وتی زبان ءِ گالبند سازی ءِ نزوری دیستگ گڑا اے تک ءَ اوں جوانیں کار کتگ- ڈاکٹر ناگمان ءِ نوکاز کہ سے رند ءَ پیسر ءَ چاپ ءُ شنگ بیتگ نوں گوں گیشتریں  گال ءُ گالبنداں چارمی رند ءَ چاپ بیگ ءَ انت – 

آئی ءَ دیمتر ءَ نبشتگ کہ گال چوناھا ھمک زبان ءَ پہ بن ھشتے ءِ ارزشتے دار انت کہ ھما زبان ءِ گال ءُ گالبند ءِ امبار گیش بیت گڑا آ یک مستریں ماڑی یے جوڑ کت کنت ءُ پد ءَ انوگیں دنیا ءِ دیمروئی ءِ سپر گوں گشادی ءَ ودان انت ھمک روچ نوکیں سائنسی، زانشتی، سیاسی ءُ ٹیکنالوجی ءِ گال دیم ءَ آھان انت چہ ایشاں لھتے ھما زبان رواج گر انت بلے اینچو اوں دری گال ءُ گالبند زورگ مہ بیت کہ زبان ءِ جند زدگ بہ بیت۔ ھمے واستا نوکاز ءِ یکرندے پد ءَ نوکازگ ءُ چاپ کنگ ھژدری بیتگ اے رند ءَ نوکاز گوں گیشیں گال کساس ھشت ھزار گال ءُ گالبنداں چاپ کنگ بیت کہ اے ناں بس پہ وانوک ءُ نودربرانی گالانی جیڑہ ءَ کم کنت ءُ آھانی گالگنج ءَ مھکم کنت بلکیں نبشتہ کار ءُ رجانکارانی واستا اوں باز ارزانی آؤرت کنت – چوناھا نوکاز انچیں کتابے کہ پہ ھمک کتابجاہ ءُ وانوک ءَ ھژدری انت- 

زانگ بہ بیت اے کتاب تاں یک ھپتگے ءَ سِی ءُ یک جنوری ءَ بگر تاں شش فروری ءَ ارزانیں نھاد ءَ فری ڈاک ءَ ھم دیم دیگ بیت اِنت –

بلوچستان ءَ دگانی وئیل برجاہ، دگہ سے مردم بیران ءُ یازدہ ٹپی بیتگ اَنت۔

سربیتگیں ھالانی رِد ءَ بلوچستان ءِ دمگ ھُزدار ءَ دو جتائیں دگ ءِ وئیلاں یک مردمے بیران وھدے کہ دہ ٹپی بیتگ اَنت، وئیل ھُزدار ءِ ھند کرخ ءَبیتگ، کہ آودہ تُرند رؤکیں گاڑی ءَ دو پرپٹ سواریں مردم لپاشتگ اَنت، وئیل ءِ آسر ءَ محمد اسماعیل جتک نامی مردمے بیران بیتگ وھدے کہ عبدالرحیم جتک جھمنند مولہ سک ٹپی بیتگ-

لیویز ءِ گْوشگ اِنت کہ وئیل ءَ ھمگرنچیں گاڑی سوار لیویز فورس کرخ ءَ دزگیر کتگ اَنت-

دومی نیمگ ءَ لسبیلہ ءِ ھنکین اوتھل ءَ تُرند رؤکیں مساپر بس ءَ گوں ڈِک ورگ ءِ سوب ءَ پرپٹ سواریں ورناہ بیران بیتگ-

ھمے وڑ ءَ گوستگیں روچ ءَ ھُزدار ءِ دمگ درکھالہ ءِ ھند ءَ یک مزدا گاڑی یے تُرند روگ ءِ سبب ءَ دست ءَ چہ دراتکگ ءُ چپی بیتگ، وئیل ءِ آسر ءَ نُھمردم ٹپی بیتگ اَنت-

اے وئیل ھما وھد ءَ دیم ءَ اَتکگ وھدے مزدا گاڑی ھُزدار ءَ چہ کراچی ءَ روگ ءَ بیتگ- وئیل ءَ پد  MERC 1122 ءَ ٹپی  چست کتگ ءُ کمک داتگ اَنتءُ پہ گیشیں الاج ءِ ھاترءَ ٹپی ھیڈ کوارٹر نادُراھجاہ وڈھ ءَ برتگ اَنت –

ھمے پئیم ءَ دگہ یک وئیلے بلوچستان ءِ دمگ کیچ ءِ شھر تربت ءِ ھند اوسیز کالونی ءَ دیما اتکگ کہ پرپٹ سوار ءَ دگ ءِ سر ءَ اوشتوکیں گاڑی گوںڈِک وارتگ ءُ چریشی ءَ چہ پرپٹ ءَ سوار عاصم ء ماسٹر حاصل بیران بیتگ ءُ وھدے کہ عبدالرحمن ء محمد عارف ٹپی بیتگ دوئینانی سیادی زوربازار ءَ اِنت-

پولیس ءَ گاڑی گپتگ ءُ آئی ءِ ڈرائیور یونس ء منیر احمد جھمنند گھنہ دزگیر کتگ-

زانگ بہ بیت بلوچستان ءَ ھمکروچی بؤکیں دگ ءِ وئیلانی تہءَ بے کساس مردم بیران ءُ بازیں ئِے ٹپی بنت۔سے روچ ءَ ساری  بلوچستان ءِ دمگ لسبیلہ ءِ ھند ءَ چینکی اسٹاپ ءِ نزیک ءَ مساپر بس کنڈ ءَ کپتگ ءُ چریشی ءِ آسر ءَ 40 مردم بیران بیتگ اَت-

ایدھی واکدارانی گوشگ اِنت کہ لسبیلہ ءَ سُتکگ ءُ بیران بیتگیں 38 پجّار کنگ نہ بیتگیں لاشانی ڈی این اے سرجم بیتگ، سی پی ایل سی ایدھی سرد جاہ ءِ ڈن ءَ کھول ءِ راھشونی کنگ ءِ ھاتر ءَ بُنجلے برجم داشتگ ءُ لاشاں کھول ءَ دیگ ءِ کار برجاہ ءَ اِنت-

سربوتگیں ھالانی رِد ءَ گوستگیں سال ءِ دسمبر ءِ ماہ ءَ پاکستانی پوج ءِ دست ءَ زورانسری آوار جنگ بوتگیں ورنا نادل حسین ء مبارک مرچی یل بوتگ ءُ وتی گِس ءَ سربوتگ –

نادل حسین گوستگیں سال ءَ بیست نُھ دسمبر ءِ شپ ءِ ادار یانزدہ ءَ چہ کیچ ءِ بنجاھی شھر تربت ءَ پاکستانی پوج ءَ آوار جتگ ءُ بیگواہ کتگ بوتگ – آئی ءِ یل بوگ ءِ ھبر آئی ءِ مستریں برات ءَ راست کُتگ ءُ گوشتگ کہ ما کلیں مردمانی منت واریں کہ آھاں منی برات ءِ ھاتر ءَ توار چست گوں ما ھمراھداری کُتگ –

زانگ بہ بیت بلوچستان ءِ جتا جتائیں ھند ءُ دمگاں مزنیں کچے ءَ مردم آوار جنگ ءُ بیگواہ کنگ بوتگ انت کہ آھانی تہ ءَ کمے کساس ءَ مردم یل کنگ بوتگ انت بلے دومی نیمگ ءَ دوسری آوار جنگ بیگواہ کنگ بوگ ءَ انت – آوار جنگ بوتگیں مردمانی گیشتریں کچ بلوچ نودربر ورنایانی انت –

روکپتی بلوچستان ءِ شھر زاھدان ءَ ایرانی پھازگی لشکر ءَ جتا جتائیں ھند ءُ دمگاں چار ورنا آوار جتگ ءُ زنداناں بند کرتگ انت –

چم دیستیں گواھانی رِد ءَ اے ورنا لس مردمی پوشاک گوریں پھازگی لشکر ءَ آوار جنی ءَ پیش لٹ شاپ کتگ انت –

دزگیر کنگ بوتگیں ورنایانی پجار ھبدہ سالی علی ریگی ء محمد، ھبدہ سالی عادل سنجرانی، ھژدہ سالی رامین سالارزاہی ءُ ھژدہ سالی افشین ریگی نوتیزی ءِ نام ءَ بوتگ انت –

اھوالکار ءِ رِد ءَ عدیل، افشین ءُ رامین ھمے سال ءِ بیست ءُ ھپت جنوری ھما وھد ءَ دزگیر کتگ انت کہ مکی مسیت ءَ واتر گِس ءَ روگ ءَ بوتگ انت ءُ علی ھم سِی جنوری ءَ چہ دگ ءِ سر ءَ دزگیر کتگ انت –

کھول ءِ رِد ءَ آھاں دزگیر کنگ بوتگیں زھگانی درگت ءَ ھچ سرپدی دیگ نہ بوتگ –

زانگ بہ بیت ایران ءِ پھازگی لشکر زاہدان ءِ آدینگ ءِ نماز ءَ پد بندات بوتگیں زھرشانی ءَ ھوار درنگاز کنوکاں دزگیر کنگ ءَ بندیگ جاھاں برگ ءَ انت –

اے زھرشانی روکپتی بلوچستان تیاب دپی دمگ چابھار ھما وھد ءَ بندات بوتگ انت کہ اودے پولیس سروک ءَ پانزدہ سالی جنک ءِ گوم ءَ زیادتی کتگ ءُ مردم وتی زھرانی درنگازاگ ءَ دگانی سر ءَ دراتکگ انت ءُ پدا اے زھرشانیانی تہ ءَ ترندی ءُ پروشت پروشی اتکگ – زہدان ءَ یک زھرشانی ءِ سر ءَ تیرگواری ءَ بازیں درانگاز کنوکے بیران بوتگ کہ چہ آئی ءَ پد ھما انت کہ ھنگت زھرشانی برجاہ انت –

شال ءُ ڈھاڈر ءَ پاکستانی پوج ءِ سر ءَ بوتگیں اُرشانی زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچ ریپبلکن گارڈز ءَ منّ اِتگ انت –

بی ایل اے ءِ جارکش جیئند بلوچ ءَ وتی آفیشل ٹیلی گرام چینل ” ھکل ” ءَ شنگ کرتگیں درشان ءِ تہ ءَ گوشتگ کہ بلوچ لبریشن آرمی ءِ سرمچاراں گوستگیں شپ ءَ بولان ءِ دمگ ڈھاڈر کلم دین ءَ برجاھیں پاکستانی پوج ءِ پانگِس راکٹ ءُ وتکاریں سلاھاں گوں اُرش کُتگ – اُرش ءَ دژمن پوج ءَ جانی ءُ مالی تاوان ءِ دیمپانی کنگ کپتگ –

جارکش ءَ گوشتگ کہ بی ایل اے اُرش زمّہ واری من ایت – زورگیریں پوج ءِ سرجمی ءَ در آیگ ءَ تاں مئے اُرش برجاہ مان انت –

شال ءَ بوتگیں اُرش ءِ زمّہ واری بی آر جی ءَ منّ اِتگ – بلوچ ریپبلکن گارڈز ءِ جارکش دوستین بلوچ ءَ وتی درشان ءِ تہ ءَ گوشتگ کہ مئے سرمچاراں گوستگیں شپ ءَ سِی جنوری ءَ ایردستیں بلوچستان ءِ دمگ شال ھزار گنجی ءَ پاکستان ءِ پھازگی لشکر ءِ پانگس ءِ سر ءَ دزبمب اُرش ءِ کُتگ –

جارکش ءَ گوشتگ کہ اُرش ءِ آسر ءَ دژمن ءَ جانی ءُ مالی تاوان ءِ دیمپانی کنگ کپتگ ءُ مئے اے دابیں اُرش بلوچستان ءِ آجوئی ءَ تاں برجاہ مان انت –

بلوچستان ءِ دمگ دکی ءُ کش ءُ گوراں سُھرک ءِ نادراھی شنگ بوان انت، ھمے ماہ ءَ جنوری ءَ شش زھگ چہ وتی زند ءَ زبھر بوتگ انت –

دکی کلی شرنگ ناصر ءَ سھرک ءِ نادراھی ءَ دو سالی زھگے بیران بوتگ، ھمے سال ءَ چہ سھرک ءِ نادراھی ءَ بیران بوتگیں زھگانی کچ سرجمی ءَ شش ءَ سر بوتگ انت وھدیکہ دگہ سدانی کچ ءَ مردم سھرک ءِ نادراھی ءِ آماچ انت –

نادراھی ءِ گرءُ دار ءِ ھاتر ءَ دمگی مردماں جانسلامتی ءِ واکداراں گوں لوٹ کتگ کہ اشی ءِ سر ءَ ھمے زوتاں گامگیج زورگ بہ بیت – دمگی مردماں لوٹ کتگ ءُ گوشتگ کہ ھمے زوتاں سھرک ءِ نادراھی ءِ گرءُدار بہ بیت ءُ زھگاں چہ مرگ ءَ رککگے ھاتر ءَ ویکسین ءُ دگہ گامگیج زورگ بہ بنت –

اشی ءَ پیش جنوری ماہ ءِ بندات ءَ جانسلامتی ءِ بنشون ءَ رپورٹ ءِ شنگ کتگ ءُ گوشتگ کہ دکی ءَ چل زھگ ھنگت سھرک ءِ نادراھی ءِ آماچ انت –

ایم ایس ڈاکٹر جوہر خان شادوزئی ءَ سھرک ءَ رکگے ھاتر ءَ گوشتگ کہ سھرک وائرس ءَ جوڈ بوتگیں نادراھی یے کہ آئی ءِ تنی وھدی ھاسیں الاج نیست چہ سھرک ءَ تپ، کلگ چمانی سُچگ ءُ درد کنگ نادراھی پیداک بنت – سھرک ھما دمان ءَ دومی مردم ءَ گپت کنت ھمے ھاتر ءَ دومیانی رکینگے ھاتر ءَ پھریز المی انت ءُ ھما زھگ ءَ کہ سھرک انت آئی ءَ دومیاں چہ گستہ بہ کن ایت –

سھرک ءِ کم کساس ءَ نادراہ نادراھجاھاں دارگ بنت پرچا کہ ٹُکہ ءِ جنگ ءَ چہ سھرک ءَ رکیت کن ایں۔