TBP Balochi

بلوچ لبریشن آرمی ءِ جارکش جیئند بلوچ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں کلات ءِ دمگ ھربوئی ءَ تیل ءُ گیس شوھاز کنوکیں پُلپانچیں شرکت ءِ پھازگی دیوکیں زورگریں پاکستانی پوج ءِ کارندہ نشانگ کتگ اَنت-

جارکش ءَ گْوشتگ کہ بی ایل اے ءِ سرمچاراں پُلپانچیں شرکت ءَ پھازگی دیوکیں کارندھانی سر ءَ ھربوئی ءَ پیسر ءَ راہ بستگ ءُ اُرش کتگ، اُرش ءِ آسر ءَ دُژمنیں کارندھاں جانی ءُ مالی تاوان چست کنگ کپتگ-

آئی ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت- ما پیسر ءَ تچک کتگ گْوشتگ کہ بلوچستان ءَ بلوچ راجی مڈیانی لُٹ ءُ پُل ءِ ھاتر ءَ ھچ وڑیں پُلپانچیں شرکتاں اجازت نہ دئیں- زورگریں پاکستانی پوج ءُ آیانی ھمکاریں شرکتانی سر ءَ مئے اُرش برجاہ بنت-

بلوچستان ءِ بنجاھی شھر شال ءَ بیگواھیں مردمانی پانکنجیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنج ھزار ءُ چِل ءُ سَے روچ سرجم بوتگ انت –

مروچی چہ سوراب ءَ محمد عالم بلوچ، عبدالحمید بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ استان ءُ آئی ءِ کمکار بلوچستان ءِ کنڈ کنڈ ءَ ھر ھما توار ءَ ایرموش کنگ لوٹ انت کہ پہ ھک ءُ راستی ءِ ھاتر ءَ چست بوگ ءَ انت –

آئی ءَ گوشتگ کہ شال ءِ تنکیں دمکاں مانشانتگیں ژند ءُ ژامبلوکیں بدن ءَ کپتگیں ریاستی زوراکی ءُ گوات ءِ بواں ھواریں دنز ءُ لوڑ انسان ءَ پدرھین اَنت لھتے ماھاں وھد وھد ءَ زوالی تچک اِنت ریاستی ناشری ءُ راجی ءُ نسلی بنچُک ءَ نشانگ کنگ ءِ ترس ءَ سماہ کنگ بیت اِنت-

آئی ءِ گوشگ ات کہ اے گریبی ءُ مھکومی بلوچستان ءِ ایندگہ ھند ءُ دمگاں چدو گیشتر انت ، ھپتاد ءُ پنچ سالاں گیش پاکستان ءِ زورگپتی ءَ بگر تاں ھنو پاکستانی استان ءُ آئی ءِ دمگی دلار ھند ءُ دمگاں مھلوکانی سر ءَ زوراکی کنگ ءَ انت –

ماما ءَ گوشتگ کہ استان ءُ ایردستیں راجانی جنگانی تہ ءَ بلوچستان ءَ گیشتر ھون ریچی بوتگ ءُ اے ملک ءِ گوستانک ءِ تہ ءَ بلوچانی پرایمنیں جھد دلیری ءَ گوں کنگ بوتگ – بلوچستان ءِ مزنیں بھرے ءِ سر ءَ پشتون جھمنند انت آ ھم چو بلوچانی وڈا ازیت ءِ آماچ انت ءُ اے مردم ایمنی ءَ گوں ھکجاہ بوتگ انت ءُ ھستیں وھد ءَ پیداک کنگ بوتگیں بازیں شیطانی شور بندی ھم اشاں ھاکاں ھوار کتگ انت –

بلوچستان ءِ دمگ کلات ءَ سلاہ بندیں مردماں پاکستانی پوج ءِ کارندھانی سر ءَ ناشناساں اُرش کتگ-

سر بیتگیں ھالانی رد ءَ کلات ءِ کوھی دمگ ھربوئی ءَ پاکستانی پوج ءِ یک گاڑی یے سر ءَ ناشناسیں سلاہ بندین مردماں اُرش کتگ – چریشی ءِ آسر ءَ پوجی کارندھاں جانی تاوانانی دیمپانی کنگ کپتگ-

دمگی مردماں ٹی بی پی ءَ گوں گوشتگ کہ اے کارندھ دمگ ءَ تیل ءُ گیس ءِ شوھاز کنوکیں کمپنی ءِ کارمندانی پھزداری ءَ بیتگ اَنت-

سرکار ءِ نیمگ ءَ تنی وھدی اے وئیل ءِ درگت ءَ دگہ گپ دیم ءَ نیتکگ اَنت-

بلوچستان ءَ تیل ءُ گیس ءِ شوھاز کنوکیں کمپنیاں ھوار دگہ پراجیکٹسانی سر ءَ بلوچ آجوئی لوٹوکیں سلاہ بندیں گل نشانگ کنگ ءَ اَنت- گوستگین روچاں بلوچ لبریشن آرمی ءَ تجابان ءَ سی پیک دگ ءَ پاکستانی پوج ءُ کلات ءَ مڈی بروکین گاڑیانی سر ءَ اُرش کتگ ات-

بلوچ آجوئی لوٹوکیں گل اے پراجیکٹساں پلپھانچی پراجیکٹس گوشگ ءَ اَنت – سی پیک ءَ ھوار ھوار دگہ پراجیکٹسانی سر ءَ فدائی اُرشاں ھوار دگہ ترندیں اُرش ھم کنگ بیتگ اَنت-

پاکستان پوج ءِ جارکش (آئی ایس پی آر) ءَ یک شنگ کُتگیں درشانے تہءَ ٹاہ داتگ کہ سلاہ بندیں مردماں بلوچستان ءِ ھنکین ھوشاب ءَ لشکریانی یک بُنجل ءِ سرءَ اُرش کُتگ۔

جارکش ءَ دیمترءَ گُشتگ کہ اُرش ءِ سوبمندیءَ گوں بے سوب کنگ ءَ پد سلاہ بندیں مردمانی سرءَ آزمانی سرپانکی کارمرز کنان ءَ نزیکی کوھاں آیانی رندگیری کتُگ، ھمے نیام ءَ آ انگر کتگ اَنت ءُ اُرش کتگ وھدیکہ سلاہ بندیں مردم ءُ لشکریانی نیام ءَ ترندیں تیر گواری بیتگ۔

پاکستانی پوج ءِ ٹاہ ءِ ردءَ جنگ ءِ نیام ءَ پنچ سلاہ بندیں مردم کُشگ بیتگ اَنت۔

البت آئی ایس پی آر ءِ ٹاہ ءَ برھلاپ بلوچ سلاہ بندیں آجوئیں لوٹوکیں گلابی ردءَ داں اَنگت ھچ پئیمیں لیکہ دیما نئیتکگ اَنت۔

زانگ بہ بیت کہ ھمے دمگانی تہءَ سلاہ بندیں بلوچ آجوئی لوٹوکیں گل سُر ءُ پُر کنگ ءَ اَنت ءُ لشکریانی سرءَ اُرشانی ذمہ واریاں من اَنت۔

بلوچستان ءِ دمگ پنجگور ءَ پاکستانی لشکریاں یک مردمے زورانسری بیگواھی ءِ آماچ کُتگ ءُ ناشناسیں ھنداں بُرتگ۔

بیگواہ بیتگیں ورناھے پجار مجاھد ء فضل ءِ نام ءَ چہ بیتگ۔

اھوالانی ردءَ گوستگیں شپءَ لشکریاں پنجگور ءِ ھنکین بونستان ءَ لوگانی سرءَ بیڑ بُرتگ ءُ ھمے ورناہ زورانسری بیگواھی ءِ آماچ کُتگ۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں کلات، زامران ءُ کولواہ ءَ سے جتائیں اُرشاں زورگریں پاکستانی پوج نشانگ کتگ- اُرش ءَ یک دُژمن ءِ کارندھے کُشتگ ءُ پنچ ٹپی کتگ اَنت-

جارکش ءَ گْوشتگ کہ بی ایل اے سرمچاراں گوستگیں شپ ءَ کلات ءِ دمگ منگچر ءَ زورگریں پاکستانی پوج ءِ بُنجاھی بُنجل ءِ پھازوکی پانگس سر ءَ گرنیڈ لانچر ءَ چہ بازیں گولھے آس داتگ چریشی ءِ آسر ءَ پانگس ءَ ساڑی ئیں دو دُژمنیں کارندہ ٹپی بیتگ اَنت وھدے کہ بُنجل ءِ تہ ءَ گولہ ءِ لگگ ءَ چہ دُژمن ءَ گیش جانی ءُ مالی تاوان چست کنگ کپتگ-

آئی ءَ گْوشتگ کہ بی ایل اے ءِ سرمچاراں زورگریں پوج ءِ سر ءَ دومی اُرش زامران ءَ کتگ- آرچنان کور ءِ ھند ءَ برجاھیں پوسٹ ءَ ساڑی ئیں کارندہ بی ایل اے اسنائپر شوٹر ءَ نشانگ کتگ چریشی ءِ آسر ءَ آ دمان ءَ مرتگ-

آئی ءَ دیمتر ءَ گْوشتگ کہ ھمے کیچ ءَ کولواہ ءِ دمگ ڈنڈار ءَ آشال ءِ ھند ءَ زورگریں پاکستانی پوج ءِ بُنجل نشانگ کتگ، سرمچاراں بُنجل سر ءَ گرنیڈ لانچر چہ ءَ بازیں گولھے آس داتگ چریشی ءِ آسر ءَ کم چہ کم سے دُژمن ءِ کارندہ ٹپی بیتگ اَنت وھدے کہ دُژمنیں پوج ءَ مالی تاوان ھم چست کنگ کپتگ-

گُڈی ءَ جارکش ءَ گْوشتگ کہ بلوچ لبریشن آرمی اے سئیں اُرشانی زمہ واری ءَ منّ اِیت- زورگریں پوج ءِ سرجمی ءَ دراھگ ءَ تاں مئے اُرش برجاہ بنت-